تاج من مدونة "أجمل أيامنا" ـ

السلام علكيم ..



من يومين تقريبا لقيت جالي تاج من أختكم في الله صاحبة مدونة أجمل أيامنا ..



و كالعادي في التاجات ما بعرفش أحلها قوي ..

لكن أنا هحله و أُتبعه بموضوع جديد على طول ..

علشان أداري على شمعتي



ندخل على التاج





1- الحالة الجسمانية بمعنى هل سيادتك تتمتع بصحة جيدة ولا الاخ صاحب مرض ؟

-مش جيدة قوي يعني

أنا بتعب بسرعة و عندي أنيميا و أملاح و وجع في الظهر على طول ..

و مش بعيد ألاقي ميت و أنا مش واخد بالي

بس جسميا شكلي جامد و عندي عضلات و كده ..

بس ربنا يسهل إن شاء الله .. هحاول أظبط صحتي شوية قبل ما أدخل الجيش .. علشان الشاويش ما يقدرش يضربني

2-الحاله الاجتماعية بمعنى هل علاقتك بمن حولك جيدة ولا عامل مشاكل مع طوب الارض ؟

- هو العلاقات الاجتماعية بتاعتي موجودة ..

بكن محدودة كما و كيفا

يعني مش أي حد أعمل معاه علاقة , و العلاقة ليها حدود مع أي حد ..

و ده مسبب لي مشكلة إني مش عارف ألاقي صديق ( يلزق لي ) زي ما بشوف الناس التانيين ..

بس الحمد لله مافيش مشاكل مع حد .. لأني مش بختلط أصلا مع حد

3-الحاله العقلية بمعنى هل تشعر ان عقلك يعمل ولا حضرتك منيم دماغك ؟

- كنت حاسس إنه بيعمل أيام الكلية .. و الحمد لله هو عمل اللي عليه و زيادة و بفضل الله طلعت السابع على قسم ميكانيكا العريق ...

بس من ساعة ما أخذنا الأجازة و أنا مأنتخ و مبلط في الخط و نايم كله في انتظار .. الجيش !!

4-الحاله العاطفية مش محتاجة تفسير ومش عايز استعباط ؟

- زي كل جيلي

لا متجوز طبعا و لا خاطب أكيد ..

إن شاء الله عدوا عليا كمان تسع ست سنين .. يمكن أكون خطبت و لا حاجة

5-الحاله الروحية بمعنى هل علاقتك بربنا كويسة ولا الكلام على ابو لهب ؟

- احم احم ..

بحاول .. رغم إن الناس مفكرينني (سوبر متدين)

إلا إني بقع كتييييييييير فوق ما الناس بتتصور بس بحاول أرجع و الحمد لله

ربنا حليم ستِّير ..

و ربنا يتوب علينا

ــــــــــــــــــــــــــــــــــــــــــــــــــــــــــــــــ



الخمس اسئلة اللى جاية دى اسئلة متنوعة



الاول : اكتر عيب فيك ونفسك تتخلص منه ؟

- ض . ج .

ده مش تقديري في الكلية ..

ده أكبر عيب فيا

ضعيييييييييييييييييف جداااااااااااااااااااا

و مش بقدر أقاوم الضغوط و لا المشاكل و لا أي حاجة ..

و بكتئب و بستسلم بسرعة !!

الثانى : ايه الحاجة اللى عملتها وندمت انك عملتها قوى ؟

- كتييييييييييير

أهمها إني ما انتحرتش و أنا صغير علشان ما اتحاسبش





االثالث : اية الحاجة اللى لسة معملتهاش وحتموت وتعملها ؟

- أشتغل و أستقل و أسيب البيت و أعيش في الاسكندرية أو أي حتة جنب البحر ..

الرابع : اكتر دعاء بتقوله وبتردده دائما؟

- الله إني أسألك الجنة و أعوذ بك من النار ..

فحولها يدندن كل المسلمين , كما قال رسول الله ..

و أن يوفقني الله لما يحب و يرضى , و أن يجعلني كما يحب و يرضى

و أن يحبب إليّ الإيمان و يزينه في قلبي و يكره إليّ الكفر و الفسوق و العصيان

و يهديني و يتوب عليّ ..

الخامس : لو عرفت انك هتموت دلوقتى وقالولك اخر حاجة نفسك فيها ايه ؟

- هصلي ..

بس للأسف .. مش كفاية خالص !!

أوحش حاجة لما يكون الواحد عارف الغلط و عارف العقاب و عارف إنه لسه فيه مهلة .. و مش عارف يصلح حاجة !!!