زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

21 December, 2009

ـ من فضلك اجعلني أشعر أنني مهم !! ـ

السلام عليكم و رحمة الله و بركاته ,

بما إني اشتغلت و الحمد لله و بقى لي رئيس -غالبا بيكون رخم- في العمل ,
يبقى هنتكلم النهاردة إن شاء الله عن عادة ممتازة في التعامل مع الناس ,
تخليهم يحبوا طعمك و ريحتك و يشربوك و هم مبسوطين - زي حليب إنجوي -


نبدأ بعون الله :

في ( الكَفر حَدَانا ) كان مكتب التجنيد لازق فيه مركز الشرطة ,
و طبعا يوم تقديم الورق كانت العملية زحمة طحن على شباك مكتب التجنيد ,
و بينما نحن على هذا الحال , إذ بعسكري من مركز الشرطة ,
و اللي كنا بنشتري منه استمارة الفيش أو طوابع الشرطة ,
العسكري ده كان عامل نفسه واسطة لواحد ,
و عاوز يدخل من الباب و يخلص له الورق ,
لكن عسكري مكتب التجنيد -اللي تبع القوات المسلحة-
ما رضاش يدخل العسكري بتاع الفيش -اللي تبع الداخلية- ,
و قال له : تعالى من الشباك و قف في الدور ,

طبعا العسكري بتاع الداخليه ما عجبهوش الوضع ,
خاصة إنه كان عامل فيها ( بتاع ) قدام الواد اللي جايله كواسطة ,
و راح مزعق في عسكري التجنيد و قال له :
أقف في الشباك إزاي ؟؟
هو أنا فاضي ؟؟
أنا ورايا شغل , و ( ببيع فيش ) !!!

بصراحة أول ما سمعته كنت (هفطس ) من الضحك ,
إيه يعني بيبيع فيش و طوابع ؟؟
هو البتاع ده مفكر نفسه حاجة بجد و لا إيه ؟؟


لكن اتضح لي فيما بعد إن كل إنسان بيحب يحس ( إن ليه لزمه )
حتى و إن كان في الحقيقة مالوش لزمة ,



زي ما في قصة ( سلطان الأباريق ) :

" يُحكى أن رجلاً كانت وظيفته ومسؤوليته هي الاشراف على الأباريق لحمام عمومي،
والتأكد من أنها مليئة بالماء بحيث يأتي الشخص ويأخذ أحد الأباريق ويقضي حاجته ثم يرجع الابريق الى صاحبنا،
الذي يقوم باعادة ملئها للشخص التالي وهكذا.
في إحدى المرات جاء شخص وكان مستعجلا فخطف أحد هذه الأباريق بصورة سريعة وانطلق نحو دورة المياه،
فصرخ به مسؤول الأباريق بقوة وأمره بالعودة اليه فرجع الرجل على مضض،
وأمره مسؤول الأباريق بأن يترك الإبريق الذي في يده ويأخذ آخر بجانبه،
فأخذه الشخص ثم مضى لقضاء حاجته،
وحين عاد لكي يسلم الإبريق سأل مسؤول الأباريق:
لماذا أمرتني بالعودة وأخذ إبريق آخر مع أنه لا فرق بين الأباريق،
فقال مسؤول الأباريق بتعجب : إذن ما عملي هنا ؟! "


و دي طبيعة في البشر ,
زي ما بيقول علماء علم النفس إن كل شخص يولد وعلى جبهته علامة تقول :

(( من فضلك اجعلني أشعر أنني مهم ))


و دي فعلا عادة مهمة جدا مع تعاملك مع أي حد ,
سواء من هم أعلى منك أو دونك,



حتى أنت أيضا بحاجة لهذا الشعور ,

أنا لما كنت عاطل - أعاذنا و الله و إياكم - كنت حاسس إني ماليش لزمة في حاجة ,
لكن لما اشتغلت , حسيت إني مفيد ... شوية
و إن شاء الله أبقى مفيد أكثر مع مرور الوقت ,



الخلاصة إنك المفروض تحاول تُظهر اهتمامك بكل أحد ,

و تُشعره بقيمته كي يحبك ,

بس خلاص ,

و دعواتكم بالخيرعلشان أنا لسه واصل امبارح و راجع تاني الشغل بعد بكرة ,
و مش راجع تاني غير بعد أسبوعين إن شاء الله ,

و جزاكم الله خيرا على القراءة ,
و طبعا >> حقوق النشر للجميع <<
و يا حبذا أن تذكر المصدر :
tazbee6.blogspot.com

..............

12 December, 2009

ـ (مغطية شعرها) لكن (مش محجبة) !!؟؟ ـ


السلام عليكم و رحمة الله و بركاته , 


طبعا الكل عارف أني كنت ( نابغة ) منذ نعومة أظفاري ,
بدليل ( العُلَق ) اللي كنت باخدها في مادة الحساب بالذات ..

و رغم نبوغي المبكر , إلا أن سؤالا كان يطرأ على ذهني و مش عارف له إجابة
و السؤال هو :
لو واحدة ست حلقت رأسها ( زلبطة ) - على الزيرو يعني -
ممكن تمشي في الشارع من غير حجاب و لا لأ ؟؟

و النقطة المحيرة في هذا السؤال هو إني كنت أظن إن الستات لازم ( يغطوا شعرهم )
و يلبسوا إيشارب أو أي حاجة تغطي شعرهم خارج البيت
لكن بقى لو ما كانش عندهم شعر ؟؟؟

و تمر أيام و شهور و سنين ...
و العمر يمشي بيا و أكبر و أبقى شحط طول بـ(نص عرض )
و برضه لسة السؤال مش لاقي له إجابة !!

لحد ما جت اللحظة الحاسمة !!!
و دخلت الكلية ,
و لقيت إن فيه بنات مغطيين شعرهم أيوه
لكن لبسهم ضيق أو شفاف أو قصير أو ..... بطريقة مستفزة ,

ساعتها قلت لنفسي إن أكيد مجرد تغطية الشعر لا تعني التحجب
فليست كل من سترت شعرها متحجبة ,
بل من سترت جسمها كله ,

لا , بل إن الأمر أكثر من مجرد ستر البدن كاملا ,
كما يقول الدكتور محمد إسماعيل المقدم :
" ليس الحجاب الذي نعنيه مجرد ستر لبدن المرأة ..
إن الحجاب عنوان تلك المجموعة من الأحكام الاجتماعية المتعلقة بوضع المرأة في النظام الإسلامي ،
والتي شرعها الله سبحانه وتعالى لتكون الحصن الحصين الذي يحمي المرأة ،
والسياج الواقي الذي يعصم المجتمع من الافتتان بها ،
والإطار المنضبط الذي تؤدي المرأة من خلاله وظيفة صناعة الأجيال ،
وصياغة مستقبل الأمة وبالتالي المساهمة في نصر الإسلام والتمكين له ."
من كتاب الشيخ / محمد بن أحمد بن إسماعيل المقدم " عودة الحجاب " .


فمن سترت شعرها و كشفت جسمها ,
لا ترتدي (( حجاباً ))


بل ترتدي (( غطاءاً للرأس ))



و للمزيد



http://www.saaid.net/female/h43.htm


و ده فلاش جامد جدا :
http://www.saaid.net/flash/Thabaat.htm


انتهى الكلام ,

و جزاكم الله خيرا على القراءة ,
و طبعا >> حقوق النشر للجميع <<
و يا حبذا أن تذكر المصدر :
tazbee6.blogspot.com



و قبل الختام أسألكم الدعااااااااااا ااااااااااااء :
أن يُصلح الله قلبي و عقلي ,
و أن يقيني شر الشيطان و شر نفسي
و أن يُصلح الله لي شأني كله , أنا و جميع المسلمين و المسلمات ,

و جزاكم الله خيرا

15 November, 2009

ـ حبيتك من أول نظرة !! ـ


ركبت حماري من غير بردعة ...
و سحبت ورايا نسواني الأربعة ..
لمحت عيونك وسط المعمعة ...
الحب نط في قلبي زي الضفدعة .




النهاردة إن شاء الله هنتكلم عن :

>> الحب من أول نظرة <<

فيه ناس بتكون مثلا بتتفرج على فيلم أو مسلسل ,
و تشوف البطل أو البطلة و تتعلق بيهم جدا ,
و تلاقيهم يجيبوا صورهم و يعلقوها في الغرفة ,
و يحطوا صورهم على الموبايل و في النت و في كل مكان ,

أو واحد أو واحدة يكون في الكلية أو الشغل و يبص لزميلة ليه ,
و يتعلق جدا بشكلها , و صورتها تعلق في ذاكرته ,
و يقعد يفكر فيها على طول

الحالات اللي زي دي كتيرة ,

و طبعا الكلام ده مش اسمه حب ....

إنما اسمه (( تعلق )) , أو زي ما الفقهاء سموه (( عشق الصور ))
إن الواحد يتعلق بجمال شخص تاني ,
و ما يعرفش حاجة عن أخلاقه و لا طريقة تعامله و لا أي حاجة ,
لكن شكله بس يعلق في دماغه ,

و عموما الكلام ده احنا اتكلمنا عليه قبل كده ,
اللي عاوز يقرأ أكثر عن الحب و أنواعه يتفضل يقرأ الموضوع ده :
حب إيه اللي انت جاي تقول عليه :
1- الجزء الأول
2- الجزء الثاني
3- الجزء الثالث


لكن احنا النهاردة هنتكلم عن :

>> علاج الحب من أول نظرة ده <<
أو علاج التعلق بصور الأشخاص :

- أول حاجة تخيل حبيب القلب ده مثلا و هو بيتثائب و مناخيرة واسعة و بقه مفتوح و عينيه مغمضة ,
تخيل بس ...



تخيله مرة تانية و هو بيعطس و بيفتح بقه و مناخيره و بيغمض عينه و بيقول : هاتشييييييييي




تخيل الشخص اللي انت متعلق بصورته و شكله في أي وضع سيء ,

زي ما ابن مسعود رضي الله عنه ما بيقول :
" إذا أعجبت أحدكم امرأة، فليتذكر مناتنها "

تخيل مناتنه ... و بلاش نفصل أكثر في حكاية المناتن دي علشان الناس ما تتقرفش


علشان إيه ؟؟ .... ما تتقرفش ,

أيوااااااااا هو ده الغرض ,
إنك تتخيل صورة الشخص اللي انت متعلق بيه في حالة مقرفة علشان ما تتعلقش بيه .


- تاني حاجة لازم تعملها إنك تقفل الباب ,
الباب اللي فتحته و تعلقت بصورة الممثلة الفلانية أو بنت الجيران أو ....
و تبعد عن مصدر الفتنة زي التليفزيون و المسلسلات و الأفلام ,
أو أماكن الاختلاط , و تحاول قدر المستطاع تغض بصرك فيها ,
و ما تقولش أنا جامد و زي إخواتي و مش هبص و ....
لأن زي ما بيقول ابن الجوزي :
" من قارب الفتنة , بَعُدَت عنه السلامة ,
و من ادعى الصبر وُكِلَ إلى نفسه
"


- آخر حاجة علشان ما نطولش عليك ,
إنك تتوب لربنا و تستغفره ,
و تعلم إن تعلق القلب بصور الأشخاص ده إبتلاء ,
فتدعي ربنا إنه يتوب عليك منه و يرفعه عنك ,


و الموضوع ممكن يكبر أكثر من كده بكتير ,
بس أنا مش عاوز أطول أكثر من كده علشان الزهق ,
جزاكم الله خيرا للمتابعة و القراءة ,

و لا تنسونا بالله عليكم من دعوة بظهر الغيب أن يُصلح الله لي شأني كله ,

و طبعا :
>> حقوق النشر للجميع <<
و حبذا لو تذكر رابط المدونة :
tazbee6.blogspot.com

.......................

.

06 November, 2009

ـ كيف تصبح ( بتاعاً ) !! ـ



قبل أن نبدأ الخطوات ,
أحب أن أوضح أن هذا الموضوع كان مُعداً في البداية للحديث عن كل صاحب قلمٍ أو رأي منحرفٍ ,
يرى نفسه ( أبو العريف ) و يرى أنه ( مُسَأّفاً ) - مثقف يعني - و ( سابق عصره و أوانه ) ,
ثم تفرع بي الموضوع و ( وسع مني )
إذ أن غالب هؤلاء ( المسأفين ) يتنوعون ما بين :
( مسأف سادة ) و مجرد جاهلٍ جهلا مركباً ,
أو ( مسأف محشي ) بليبرالية أو علمانية أو اشتراكية أو ( بتاعية ) ,
لذا فقد اخترت لفظ ( بتاع ) كاسمِ جامع لكل هؤلاء السابقين ,

و الآن ...
دعونا ( نخش في الموضوع ) ,

مع الخطوات العملية لكي تصبح ( بتاعاً ) :
ـــــــــــــــــــــــــــــــــــــــــــــــــــــــــــــــــــــــــــــــــــــ


أن تتكلم و تتناقش ( بطراطيف مناخيرك ) لأنك ( أبو العريف )
و باقي الناس ( مش من مستواك ) الفكري و الثقافي

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تُكثر من ذكر الكلمات التالية في حديثك : ديموقراطية , استراتيجية , أيدلوجية , و أي ( بتاعية )

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تقرأ لكبار ( المسأفين ) أمثال :
(عميل ) الأدب العربي , و نجيب ( محظوظ )
و أن تحفظ أسماء بعض رواياتهم ( لزوم الفزلكة )

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تتعدى كَوْنك
( مسأف لوكال ) إلى ( مسأف انترناشيونال )
بأن تحفظ أسماء بعض الروايات العالمية و كُتابها ,
كالحرب و ( الكلام ) , و أَنّا ( خرتيتا ) ,
و في هذه النقطة لا يُشترط أن تقرأ الروايات ,
لأن ( ماحدش بيقرأ الحاجات دي دلوقتي )

ـــــــــــــــــــــــــــــــــــــــــــــــــــــــــــــــــــــــــــــــــــــ

أن يكون قدوتك رجلاً غربياً , ( مش بلدي ) .....
جيفارا أو مارتن لوثر كينج ( ممكن يقضوا الغرض )

ـــــــــــــــــــــــــــــــــــــــــــــــــــــــــــــــــــــــــــــــــــــ

لابد أن يكون لك باعٌ في السياسة , و إن لم يكن فاحفظ هذه الكلمة و رددها عن ظهر ( كلب ) :
" أنا ضد إدخال الدين في السياسة "

ـــــــــــــــــــــــــــــــــــــــــــــــــــــــــــــــــــــــــــــــــــــ

يجب أن تتذوق ( الفن ) , خاصةً العاري منه !!ـ

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تكون ( كلك ذوق ) مع الجنس ( الظريف ) ,
علشان تبقى ( تري جنتيل )

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تؤمن أن العائق بين المسلمين و بين ارتياد الفضاء ليس عائقا تقنياً ,
( ورش أبو علامة شغالة آخر حلاوة ) ,
و لكن العائق في أن نساءنا ( محجبات ) ,
و صاروخ الفضاء حالف ( يمين طلاق تلاته ما هو طالع غير لما يقلعوا ) !!ـ

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تؤمن بمقولة ( الدين لله ) و ( الوطن للجميع )
و شرع الله لا دخل له في الوطن و لا في القانون و لا في أي حاجة

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تحذف عبارة ( لا إله إلا الله ) و تصبح ( الله إله ) ,
و فيه آلهة تانية ( عاتشي ) ... خليك كوول يا مان .ـ

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تتخنق من الكلام اللي فوق ده كله و يتحرق دمك

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تحذف موضوعي من المنتدى أو تغلقه لو كنت مشرف ,ـ

ـــــــــــــــــــــــــــــــــــــــــــــــــــــــــــــــــــــــــــــــــــــ

أن تشتمني و تشتم اللي خلفوني بعد أن تقرأ هذا الموضوع ,
و مش بعيد تقول عليا إرهابي و متخلف و رجعي و ...
مع إن ( أناغلبااااااااا اااااااااااان ) ـ

ـــــــــــــــــــــــــــــــــــــــــــــــــــــــــــــــــــــــــــــــــــــ
و ....

و إلى اللقاء




و طبعا
>> حقوق النشر للجميع <<

و حبذا لو تذكر رابط المدونة :
6azbeet.blogspot.com


..........

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ