زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

25 September, 2008

أنا رايحة ( أَسَلِّي ) في الجامع !!! ـ




السلام عليكم

طبعا أنا عارف إني متأخر جدا في الموضوع ده ...
لأني المفروض أكون كتبته من أول رمضان علشان صلاة التراويح .. بس (ملحوقة) إن شاء الله ..
لسه صلاة العيد جابة ... و هنشوف فيها (مهازل) .. !!


بداية (فرستي) في أول الشهر الكريم لما كنت بصلي في جامع و راح الشيخ قال إن مكان الرجالة التاني هيخلوه للحريم .. " ده احنا ما يبقاش فينا خير لو سيبنا نساءنا يصلوا في الشارع و الرايح و الجاي يتفرج عليهم " !!!


ماشي .. رغم إن النساء في الجامع ده بالذات ليهم مكان كبير قوي غير كل الجوامع ..


لكن اللي غاظني إنهم يزنقوا الرجالة اللي الصلاة في المسجد بالنسبة لهم (فرض) علشان النساء يصلوا في الجامع و صلاتهم فيه (مش فرض) بل بالشكل اللي هم بيطلعوا بيه يرورحوا يصلوا .. احتمال تبقى (محرَّمة) !!!


و بعدين لما تيجي (تحلل) الأصناف النسائية اللي بتصلي في الجامع تلاقي :



- كبيرات السن : و دول بيصلوا في الجامع غالبا في رمضان و غير رمضان علشان أصلا فاضيين .


- فتيات 1 : دول بيطلعوا من بيتهم (لابسين محترم) و بيصلوا في الجامع علشان يتشجعوا بدل ما يقعدوا في البيت و يكسلوا .


- فتيات 2 : دول بقى اللي بيعملوا الزحمة , و بيطلعوا بهدوم (لا تصح الصلاة فيها) أصلا !! ضيقة و حالتها بالبلا .. ده إذا ما كانتش بنطلونات .. و بتطلع كل واحدة فيهم (حاطة كَلونيا) و أكنها رايحة فرح -العطر حرام للنساء حتى في الأفراح- مش رايحة تصلي !!


دول بقى (أُس) البلاوي .. و رايحين يتفسحوا ..

مش رايحين (يصلوا) - و احتمال تلاقيهم كمان بينطقوها بالسين مش بالصاد - لكن رايحين (يسلوا) ...
(يسلوا) نفسهم .. و يشموا هوا .. و يبوظوا غيرهم عادي ..



و طبعا لو أي (واحدة) كلمتهم تلاقي الحديث اللي كلهم حافظينه :



فالرسول –صلى الله عليه و سلم- بيقول : ( لَا تَمْنَعُوا إِمَاء اللَّه مَسَاجِد اللَّه ) ‏


طبعا هي الصلاة في المسجد مش حرام للنساء ..


لكن اللي بيعملوه النساء اليومين دول هو اللي حرام


زي ما قالت أم المؤمنين عائشة رضي الله عنها : : " لو أدرك رسول الله صلى الله عليه وسلم ما أحدث النساء لمنعهن كما منعت نساء بني إسرائيل" قلت لعمرة أو منعن ؟ قالت نعم .

البخاري ( 831 ) ومسلم (445) .


قال عبد العظيم آبادي :
ووجه كون صلاتهن في البيوت أفضل الأمن من الفتنة ويتأكد ذلك بعد وجود ما أحدث النساء من التبرج و الزينة ومن ثم قالت عائشة ما قالت . " عون المعبود " ( 2 / 193 ) .


طيب يعني يخرجوا إزاي ؟؟


في صحيح مسلم بشرح النووي

قَوْله صَلَّى اللَّه عَلَيْهِ وَسَلَّمَ : ( لَا تَمْنَعُوا إِمَاء اللَّه مَسَاجِد اللَّه ) ‏


( هَذَا وَشَبَهه مِنْ أَحَادِيث الْبَاب ظَاهِر فِي أَنَّهَا لَا تُمْنَع الْمَسْجِد لَكِنْ بِشُرُوطٍ ذَكَرَهَا الْعُلَمَاء مَأْخُوذَة مِنْ الْأَحَادِيث ,

وهو الا تكون بخلال يسمع صوتها,َ
ولا مختلطه بالرجال
, وَلَا شَابَّة وَنَحْوهَا مِمَّنْ يُفْتَتَن بِهَا , وَأَنْ لا يَكُون فِي الطَّرِيق مَا يَخَاف بِهِ مَفْسَدَة وَنَحْوهَا . وَهَذَا النَّهْي عَنْ مَنْعهنَّ مِنْ الْخُرُوج مَحْمُول عَلَى كَرَاهَة التَّنْزِيه إِذَا كَانَتْ الْمَرْأَة ذَات زَوْج أَوْ سَيِّد وَوُجِدَتْ الشُّرُوط الْمَذْكُورَة , فَإِنْ لَمْ يَكُنْ لَهَا زَوْج وَلَا سَيِّد حَرُمَ الْمَنْع إِذَا وُجِدَتْ الشُّرُوط ). ‏

-و الأحاديث اللي أشار إليها النووي سنذكرها لاحقا إن شاء الله -



مش ملاحظين كده إن كل أو معظم الشروط اللي ذكرها النووي غير متحققه في خروج النساء لصلاة التراويح و لا صلاة العيد ؟؟



يعني من الآخر .. عاوزين يخرجوا إلى الصلاة .. و بيحتجوا بحديث رسول الله , يبقى يطبقوا الشروط للخروج !!


و الشروط دي طبعا لا تتحقق إلا في نسبة ضئيلة جدا من النساء اللاتي يخرجن للصلاة ..
و اللي بيصلي التراويح أو العيد -الذي أمر في الرسول الحيَّض و ذوات الخدور بالخروج له حتى لو مش هيصلوا !! بس يطلعوا محترمين - يعرف قد إيه الشروط دي (متدمرة) بين النساء ..


و هناك أحاديث أخرى تدل على وجوب التزام المرأة بشروط الخروج للمسجد .. منها :

فعن أبي هريرة قال : قال رسول الله صلى الله عليه وسلم : ( أيما امرأة أصابت بخورا فلا تشهدن معنا العشاء الآخرة ) رواه مسلم وأبو داود والنسائي .


و أخرج مسلم من حديث زينب امرأة ابن مسعود: ( إذا شهدت إحداكن المسجد فلا تمس طيبا )


وعن أبي هريرة أن النبي صلى الله عليه وسلم قال : ( لا تمنعوا إماء الله مساجد الله , وليخرجن تفلات) رواه أحمد وأبو داود .

قوله : ( وليخرجن تفلات ) بفتح التاء المثناة وكسر الفاء : أي غير متطيبات ,
يقال : امرأة تفلة إذا كانت متغيرة الريح , كذا قال ابن عبد البر وغيره ,
وإنما أمرن بذلك ونهين عن التطيب كما في رواية مسلم المتقدمة عن زينب امرأة ابن مسعود لئلا يحركن الرجال بطيبهن . و يلحق بالطيب ما في معناه من المحركات لداعي الشهوة كحسن الملبس والتحلي الذي يظهر أثره والزينة الفاخرة .
وفرق كثير من الفقهاء المالكية وغيرهم بين الشابّة وغيرها , وفيه نظر , لأنها إذا عرت مما ذكر وكانت متسترة حصل الأمن عليها ولا سيما إذا كان ذلك بالليل .

ده بخلاف الاختلاط الحادث أصلا و المنهي عنه :

كما في حديث أسيد الأنصاري أنه سمع النبي صلى الله عليه وسلم يقول وهو خارج من المسجد فاختلط الرجال بالنساء في الطريق...
فقال النبي صلى الله عليه وسلم للنساء: ( استئخرن فإنه ليس لكن أن تحققن الطريق، عليكن بحافات الطريق ) فكانت المرأة تلتصق بالجدار حتى إن ثوبها ليلتصق بالجدار من شدة لصوقها به.

(أخرجه أبو داوود وغيره وإسناده حسن بمجموع طرقه كما قال الألباني)
تَحْقُقْن : أي تتوسطْن


و بعدين بقى بصراحة ... أنا نفسي أعرف النساء ليه بيتسابقوا كده على الصلاة في المساجد ؟؟

يعني هم ربنا مريحهم و مخلي أجر صلاتهم في البيت أكبرمن أجر صلاتهم في المسجد .. على عكس الرجال ..
هم بقى (غاويين زحمة) و خلاص ؟؟ و لا عاوزين يطلعوا (يشموا هوا) ؟ و لا ... (يسلوا) زي ما ليقولوا !!


عن أم حميد امرأة أبي حميد الساعدي : " أنها جاءت النبي صلى الله عليه وسلم فقالت : يا رسول الله إني أحب الصلاة معك قال : قد علمت أنك تحبين الصلاة معي وصلاتك في بيتك خير لك من صلاتك في حجرتك وصلاتك في حجرتك خير من صلاتك في دارك وصلاتك في دارك خير لك من صلاتك في مسجد قومك وصلاتك في مسجد قومك خير لك من صلاتك في مسجدي ، قال : فأمرت فبني لها مسجد في أقصى شيء من بيتها وأظلمهفكانت تصلي فيه حتى لقيت الله عز وجل " .

رواه أحمد ( 26550 ) .
والحديث : صححه ابن خزيمة في " صحيحه " ( 3 / 95 ) وابن حبان ( 5 / 595 ) ، والألباني في " صحيح الترغيب والترهيب " ( 1 / 135 ) .



يعني صلاتها في بيتها أفضل من صلاتها في المسجد النبوي اللي أجر الصلاة فيه مضاعف !!

يعني هي تقعد في بيتها معززة مكرمة و تاخد أجر ما يقدرش الراجل ياخدة !!



و عن عبد الله بن مسعود ، عن النبي صلى الله عليه وسلم قال : " صلاة المرأة في بيتها أفضل من صلاتها في حجرتها وصلاتها في مخدعها أفضل من صلاتها في بيتها " .

رواه أبو داود ( 570 ) والترمذي ( 1173) .
والحديث : صححه الشيخ الألباني في " صحيح الترغيب والترهيب " ( 1 / 136 ) .


( في بيتها ) هو الحجرة التي تكون فيها المرأة .
( حجرتها ) المراد بها صحن الدار التي تكون أبواب الغرف إليها ، ويشبه ما يسميها الناس الآن بـ ( الصالة ) .
( مخدعها ) هو كالحجرة الصغيرة داخل الحجرة الكبيرة ، تحفظ فيه الأمتعة النفيسة .
( الشرح من كتاب عون المعبود )
خلاص بقى ... اللي عاوزة تصلي (بأجر أقل من أجر الصلاة في بيتها) و( تضيع على نفسها أجر أكبر من أجر الصلاة في المسجد النبوي) .. يبقى خلاص .. مش هنمنعها .. تصلي عادي .. ما حدش هيمنعها ... بس تطلع محترمة .. بالشروط الشرعية ..
آه بالمناسبة .. دي فتوى من دار الإفتاء المصرية ...

الفتوى...دار الافتاء المصريه


علشان اللي مش مصدق أو ..... و لا بلاش ..
و تحيتي لكل واحد يظبط أهله و يخليهم يطلعوا محترمين ,
و لكل واحدة تطلع محترمة و تتقي الله في نفسها و في غيرها ...
و آسف جدا على الإطالة ...


تحيتي ..



.....



و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com


أو على الأقل تذكر إنه منقول

......................


تحيتي

.....

38 comments:

  1. السلام ورحمه الله وبركاته
    ------------------
    يعنى اولا كده انا مبسوطه انك بتتكلم فى الموضوع ده لانه بجد كان نفسى احس انه فى شاب مش عاجبه حال البنات

    الحمد لله اخيرا فى

    ومع انى بنت الا انى معاك فى كل حرف قلته للاسف قله قليله من البنات ربنا يبارك فيهم بيكونوا رايحين يصلوا ابتغاء وجه الله فقط

    والباقين بيستعرضوا لبسهم او حلاوتهم او دينهم اللى زى مبنقول كده دانا متدينه والله حتى بروح اصلى فى المسجد

    وطبعا ده مش دين ولا تدين دى سلطه

    فى النهايه

    اللهم اهدى بنات المسلمين اجميعن
    اللهم امين

    تسلم بجد بوست رائع حتى لو اتأخرت فيه هو عموما مهم فى اى وقت
    --------------------------

    ReplyDelete
  2. اسفه لتدخلى بس لو سمحت هو ممكن يعنى
    تقلبلنا مدونتك عربى

    انت فاهم اغلبنا ماشى بانجليزى رابعه ابتدائى وربنا يستر عليا

    ثم انه لغتنا احسن بكتير

    وانت طبعا براحتك

    اللى يعجبك اعمله
    ------------------------------

    ReplyDelete
  3. جزاك الله خيراً على هذا البحث النفيس والذي يتميز مع نفاسته بخفة الظل كعادتك. أحمد كمال

    ReplyDelete
  4. لؤلؤة الرحمن

    و عليكم السلام و رحمة الله و بركاته

    جزاكِ الله خيرا على المرور ..

    و على فكرة الشباب كلهم مش عاجبهم حال البنات ده .. لكن فيه فئة زهقت فقالت تستفيد من الوضع و خلاص !!

    بس ربنا يهدينا و يثبتنا و يتوب علينا ..


    و بخصوص العربي ...

    معلش .. هغيرة فعلا لأنه أحسن حتى في الكتابة .. بس الواحد مش بياخد باله من إعدادات الاستايل أول لما يركبه ..

    جزاكِ الله خيرا ..

    ReplyDelete
  5. باشمندس أحمد كمال ..

    جزاك الله خيرا على المرور ..
    هو مش بحث بالمعنى يعني .. إنما مجرد خواطر ..

    ربنا ينفعنا .. و يهدينا و يتوب علينا

    تحيتي

    ReplyDelete
  6. حمد الله على السلامة فينك على العموم الموضوع مهم غطى على التأخير المهم على فكرة اللى انت اوقلتة صح حتى الشيخ عندنا اتكلم عن الموضوع دة كتير بس فى شوية على الشباب يعنى بيطلع من الصلاة يوقف مترصصين وسدين السكة خالص واللى عيزة تسلم من كل دة متصليش الشفع والوتر فى الجامع تصلى فى البيت علشان لما تطلع متقليش عدد كبير معلش على الاطالة

    ReplyDelete
  7. والله وجهة نظرى فى حضرتك كل ما بتتاكد ان مناقشتك للمواضيع الدينية واخدة شكل عملى وساهل جدا

    موضوع فى غاية الاهمية

    جزاك الله خيرا

    انا مع حضرتك فى الرأى

    ReplyDelete
  8. بص يا تيمى اقلك انا الستات بتنزل تصلى لية فى الجامع علشان يهربوا من شغل البيت الى بعد الفطار بجد والله مش بهزر وطبعا مش كل الستات والبنات كدة
    بس دى عينة انا شفتها الى بتبقى متخانقة مع جوزهاوعايزة تنزل تفك عن نفسها والى بتهرب من شيل الكل بعد الفطار والى والى ......

    وعلى فكرة بجد نزول البنات فى الصلاة انا شايفة انة حاليا بقى حرام
    وانا رحت مرة وحيدة اصلى العيد وقلت مش هتنيها تانى
    لان لقيت الرجالة بتصلى ورا الستات !!!!!!!!!!!!

    ReplyDelete
  9. همس الحنين

    الله يسلمك .. بس أنا موجود و الحمد لله لكن هي "النِفس" بس ..

    أما بالنسبة للشباب اللي بيقف .. فبصراحة "الشارع من حق الشاب" :) ..
    يعني زي في الحديث "لا تحققن الطريق , عليكن بحافات الطريق" لأن الطريق أصلا مش للنساء ..
    و بعدين في السنة إن الرسول كان لا ينصرف حتى ينتظر قليلا علشان تنصرف النساء الأول و بعدين لما الرسول ينصرف ينصرف معه الرجال ..

    بس النساء تلاقيهم بيتلكعوا في الانصراف ..

    المهم .. .أنا مش بقول الشباب "يبلطج" يعني في الشارع .. لكن هو المفروض يكون عنده دم هو كمان ..

    معلش .. طولت في الرد و شكلي تشعبت فيه ...

    و شكرا جزيلا لمرورك ..

    تحيتي

    ReplyDelete
  10. اختكم في الله

    جزاكِ الله خيرا على المرور ..

    و شكرا جزيلا على كلامك

    و ربنا يهدينا و يهدي الجميع ..

    تحيتي ..

    ReplyDelete
  11. جيهان ..

    أهلا و سهلا بيكي ..

    شكلك خبيرة بالأمور دي :)

    بس ربنا يهديهم .. و يعرفوا إنهم على الأقل ينووا بالعمل ده وجه الله و مش الهروب من البيت بس ..

    أما صلاة العيد دي .. !!!!
    ده الواحد بيشوف في التلفزيون في أماكن الستات بتصلي وسط الرجالة ..
    رغم إن المراة لو صلت جماعة مع جوزها فلا تقف بجواره و لكن وراه حتى لو كانت هي لوحدها ..

    أما بقى إن تبقى وسط الرجالة و في رجالة وراها كمان يبقى .... لا تعليق !!

    ReplyDelete
  12. السلام عليكم

    لديك رسالة من يتيم
    على قلب ابيض

    نتمنى منكم المشاهدة .. والنقد البناااء

    تحياتى ..

    ReplyDelete
  13. اممممممممممممممممممم
    اولا بخصوص الموضوع هو كويس جدا بس ليا كذا تعقيب
    اولهم ان بخصوص الستات الكبار هما مش بيروحوا المسجد عشان فاضيين
    هما بيروحوا لانه فعلا الشخص لما بيكبر خاصة الستات بتحس انهم بيخافوا الموت وبيبداوا يقربوا من ربنا اوي خوفاا من لقائه
    وبالتالي بيحافظوا جدا علي الصلاه في المسجد اجدع من اجدعها جدع
    وطبعا اجرهم عند ربنا
    بخصوص بقه الستات عموما وصلاتها في المسجد
    في ستات لو مصلوش في المسجد هيكسلوا يصلوا في البيت
    وبيتهيقلي صعب اوي انهم يضيعوا اجر الصلاه في رمضان وبالتالي بتلاقيهم بيتشجعوا اوي
    وخاصة ان الروحانيات والدعاء وكل حاجة بتكون اجمد في المسجد
    بعدين اصلا انت هتلاقيهم كده اصلا بس في الجمعات وفي رمضان غير كده صعب تلاقي ست واحدة في المسجد
    بص انما الاعغمال بالنيات
    لو واحدة صدقها في نيتها لخروجها للمسجد علي ما اعتقد ربك هيديها ثوابها
    وكمان الايه اللى انت ذكرتها
    لا تمنعوا اماء الله مساجد الله
    بتدل علي ان ربنا حلل الصلاه لانه اعلم باحتياج الستات للصلاه في المسجد في الاوقات اللي بيكون فعلا الصلاه في المسجد فيها الروحانيات والخشوع والتأثر اعلي
    عموما اكيد طبعا ان صلاه الست في بيتها هيكون ائمن وافضل
    واكيد طبعا اللى يروح مسجد يحافظ علي شروط الصلاه فيه
    لانه باقل غلطة ممكن يضيع صلاته كلها
    يلا انا سعيدة بموضوعك
    وسعيدة اكتر بسؤالك عن مدونتي
    انا فعلا في فترة محاسبة نفس وفترة بحاول اعمل فيها حجات كويسة تسعدني
    اخر عشر ايام وانت عارف بقه
    انا هطل بقه طلة علي اللى فاتني عندك
    يلا سلام بقه متعطلنيش

    ReplyDelete
  14. يا سلام عليك يا هندسة

    بجد البوست دا في الجون بجد ..

    انت عارف اني ساعات بهرب من الجامع اللي جنبي وأروح اصلي في جامع بعيد عشان موضوع الستات دا .. وإن كان مش هو السبب الوحيد :))

    بس حاجة تغيظ فعلا الستات اللي راحه "تسلي" دي .

    ربنا يهديهم ويهدي الجميع ان شاء الله

    أحييك على انتقاءك للموضوع :)

    تحيتي ,,

    ReplyDelete
  15. اولا مرسي جداا علي سؤالك ومعلش عشان غبت بس والله كان غصب عني...حصلت عندي حالة وفاه وبعدها الكلية دخلت اول سنة بقي شقلبت حالي
    فانا اسفة لتأخري واسفة مقدرتش اقري البلوج ده وهقرا طبعا اكيد وهاجي اعلق ....وانا تقريبا فهمت هو بيتكلم عن ايه من كلام لؤلؤة الرحمن...اتفق معاها في رأيها بس علفكرة مش البنات بس الشباب كمان والشيوخ وكل الناس عامتا
    ممكن مترحش الجامع لله وحده..وتبقي نيتها خالصة...الاخلاص عامتا حاجة صعبة جداا
    لاني ممكن اكون ريحة الجامع عشان اصلي لله وحده ومخلصة...وناس تشفني مثلا تقول ماشاء الله دي بنت متدينة وتشكر فيا اوووي فانا بقي افرح اوووي كده واحس اني حاجة...فكده مبقاش فيها اخلاص
    وكل منا حتي لو قريب من ربنا ممكن يحسها ومنقدرش نلوم او نحاسب حد عليها لانه لايعلم الاخلاص الا الله
    فمنين بتقول لؤلؤة ان هما قلة قليلة رايحن لله ولا يعلم النية الا الله
    ممكن يكون الظاهر كده لكن باطنها حاجة تانية..ومعتقدش ابدا ان حد بيروح يستعرض لبسه هناك..لو وحده عيزة تعمل كده يبقي ليه تروح جامع من اصله مهي تمشي في الشارع تستعرض لبسها
    او حتي ممكن ناس تظهر لينا انها ريحة تستعرض لبسها وهي في نيتها حاجة تانية خالص انها لبسة احلي ما عندها عشان هي ريحة بيت من بيوت الله
    فليه بناخد الامور بوجه النظر دي
    وانا هكرر برده الجملة دي لا يعلم النية الا الله
    وانا ان شاء الله هقري البلوج قريب بس هضبط مواعيدي عشان الكلية وكده ومش هتأخر تاني كده عليكم ان شاء الله
    وجزاك الله كل خير

    ReplyDelete
  16. قلب أبيض ..

    شكرا جزيلا على المرور ..

    تحيتي

    ReplyDelete
  17. مها زين

    بخصوص الستات الكبار .. أتفق معك ..
    مع إن صلاتهم في بيتهم أفضل برضه ..
    لكن ربنا ييسر لهم الحال و يعينهم على ما هم فيه ..
    و يختم لهم بخير ..

    بخصوص اللي بيكسلوا بصلوا في البيت ..
    أنا قلت عادي يروحوا الجامع . .
    بس لو هيروحوا يبقى بالشروط الشرعية ..
    يعني
    take them all or let them all

    و طبعا الأعمال بالنيات ..
    لكن النية الصالحة لا تصلح العمل الفاسد ..
    يعني لو واحدة نيتها تتشجع على الصلاة ..
    بس بتروح المسجد بلبس غير شرعي و ملفت أو ضيق أو ....
    يبقى نيتها الصالحة لا تشفع لعملها الفاسد اللي هو ذهابها بالشكل ده ..

    بس ملحوظة بسيطة .. (لا تمنعوا إماء الله نساجد الله) ده حديث و ليس آية ..

    و شكرا جزيلا على المرور ..

    و أهلا بيكي في عالم التدوين مرة تانية ..

    ReplyDelete
  18. تيفا

    أهلون و سهلون

    أنا برضه على فكرة غيرت الجامع إياه ..

    و صليت في جامع تاني فيه باب الرجال بعيد عن باب النساء ..

    و شكرا جزيلا على مرورك ..

    أحييك على تعليقك في الموضوع :)

    تحيتي -برضه :) -

    ReplyDelete
  19. أحلى حياة ..

    أهلا بيكي من جديد
    ..

    و البقاء لله ..
    و إن شاء الله العام يكون خير عليكي ..

    أنا معاكي إن أي حد ممكن تكون نيته ليست خالصه لله في الذهاب للمسجد
    رجلا كان أو امرأة ..

    و لا أحد يعلم ما في القلب إلا الله ..
    و نحن لا نحاسب الناس إلا على ما ظهر ..

    علشان كده احنا بنتكلم على اللبس اللي بيلبسوه .. و التصرفات اللي بيعملوها ..
    و مش على النيات ..

    و حتى لو نيتهم سليمة لكن بيروحوا باللبس ده و بيتصرفوا بالشكل ده ..
    فالنية الصالحة لا تصلح العمل الفاسد ..

    يعني ما ينفعش واحدة تروح بلبس ضيق أو حتى ملفت للنظر بس ..
    و تقول أنا نيتي حلوة إني ألبس أحسن ما عندي ..

    طيل ما "الفعل" و هو لبسها أحسن ما عندها ده "فاسد" أصلا .. لأن اللبس غير شرعي
    يبقى النية الحلوة لا تصلح عملها ده ..


    و شكرا جزيلا على المرور ..

    و ربنا يعينك على الكلية و تتأقلمي إن شاء الله ..

    ReplyDelete
  20. السلام عليكم

    ازيك يا تيمى

    والله موضوعك فى الصميم وانا متفقه معاك

    بس فى حاجه انا مش متفقه فيها معاك

    انك بتقول ان خروج النساء للصلاه فى المسجد مش فرض ازاى بس تقول كده انت متعرفش ان صلاه العيد دى فرض علينا كلنا يعنى لازم النساء تخرج وتشهد العيد زى ما قال الرسول انما فى غير صلاه العيد مش فرض طبعا على المراه انها تخرج المسجد تصلى

    بس باقى البوست بجد جميل جا وانا متفقه معاك فيه خالص

    جزاك الله خيرا يا تيمى

    ReplyDelete
  21. ريمان

    و عليكم السلام و رحمة الله و بركاته

    شكرا جزيلا على المرور ..
    و الحمد لله إنك متفقة مع الموضوع في جوانب كتيرة ..

    بالنسبة للنقطة اللي ش متفقة معايا فيها و هي في صلاة العيد .
    .
    هي على قولين إما سنة مؤكدة و إما فرض ..

    و في كلا الحالتين يعني المفروض الناس كلها تروح
    حتى النساء ..
    فقد أمر رسول الله بالخروج إليها حتى الحيّض و ذوات الخدور ..

    و ده في صلاة العيد بس و مش في الصلوات العادية ..

    بس حتى صلاة العيد المفروض إن المراة تراعي الله في لبسها و هي رايحة تصلي ..

    مش معنى إنها رايحة تؤدي فرض و ما حدش يقدر يمنعها ..
    يبقى تروح بمزاجها .. لأن درء المفسدة مقدم على جلب المصلحة ..

    يعني لو هنعمل خير فيه شر .. يبقى الأحسن ما نعملهوش و لا ناخد الخير و لا الشر ..


    و شكرا جزيلا على المرور و النقاش ..

    جزانا و إياكم

    ReplyDelete
  22. أولا السلام عليكم ...

    ثانيا ماشاء الله المدونة فى منتهى

    الروعة"مش مجاملة" ..........

    ثالثا بمناسبة الموضوع بقى هوا يعنى

    ...فى منتهى الروعة وبيعرض حجات مهمة

    جدا"اللى بتتعمل فى البلد"

    وعلى العموم ربنا يهديهم ويهدينا

    "سندس"

    ReplyDelete
  23. خللي الشعب يعيش

    موش ممكن البنات اللي بيلبسوا اوفر انهم يبقيوا فله؟؟

    يعني لبسهم يتحسن

    في ناس بتعمل الغلط اساسا من غير ما تاخد بالها

    يعني بيبقي طبيعه في طبيعتهم

    وكل سنه و إنت كويس :)

    ReplyDelete
  24. السلام عليكم ورحمة الله وبركاته
    زى عوايداك موضوعك مستوفى ووافى
    فتح الله عليك ببركاته وذادك علما
    ويارب واحدة ممن ذكرتهن تقرأ الكلام اللى انت كتبته وتتعظ به وتعمل به
    وساعتها لك عظيم الاجر من الله
    لكن المشكله انهن لا يقرأن
    ويقرأن ما يردن فقط
    زى ما انت قلت حديث
    الرسول صلى الله عليه
    وسلم
    (لَا تَمْنَعُوا إِمَاء اللَّه مَسَاجِد اللَّه )
    بس هو هذا الحديث ما يعلمونه من سيرة
    واحاديث الرسول صلى الله عليه وسلم!!
    اقولك :اللهم اهدى قومى فانهم لا يعلمون
    تقبل تحيتى

    ReplyDelete
  25. السلام عليكم ورحمة الله وبركاته
    انسيتنى ان اقول لك
    كل عام وانت والاسرة
    باكمل حال واتم عافية

    ReplyDelete
  26. سندس و أمل ..

    و عليكم السلام و رحمة الله

    و شكرا جزيلا على الإعجاب بالمدونة الي مش مجاملة :)

    و ربنا يهدينا و يهدي الجميع ..

    و يلح حال البلد بإصلاح حال من فيها ..

    شكرا جزيلا على المرور ..

    تحيتي

    ReplyDelete
  27. ديكستر

    أنا معاك إن فيه بنات كتير بتعمل الغلط و هم مش عارفين إنه غلط ..

    يعني ممكن لو حد يقول لهم .. يبطلوه ..

    بس المهم حد يعرفهم ...

    و ربنا يهدي ..

    و كل عام و أنت حلو :)

    ReplyDelete
  28. norahaty

    و عليكم السلام و رحمة الله و بركاته يا دكتورة ..

    آآآمين .. ربنا يستجيب لدعائك ..

    و يكون لينا الأجر .. و بيعوضنا عن التقصير في الجوانب الأخرى ..

    أنا بصراحة مش عارف إذا كان الدعم بيصل لمستحقيه و لا لأ :)

    يعني أنا كنت عامل المدونة دي أصلا للوصول إلى الفئات التي تستحق ,,
    و اللي مش بتقرأ الكلام العادي و بتستثقله ..

    و ربنا يوفقنا و يهدينا و يهدي الجميع ..

    و جزاكِ الله خيرا على المرور و الإضافة ..

    و كل عام أنتِ بخير .. و الأسرة الكريمة برضه :)

    تحيتي

    ReplyDelete
  29. بجد بجد بوست ميه ميه

    واسلوبك فعلا متميز انا جايه اقول كل سنه وانت طيب لقيته بجد تنحت فيه

    رائع

    عيد سعيد عليك

    ReplyDelete
  30. اللهم زد هـــــــذا الوجه نورا
    واجعله دائـما مأجورا
    وبلغه العيد مسرورا
    امين يارب العالمين
    عيد سعيد

    ReplyDelete
  31. السلام عليكم

    كويس أنك جبت سيرة صلاة العيد ، خاصة أن الشياطين خلاص مش بتبقى مصفدة ولا محبوسة والكل بيكون لابس جديد في جديد ، فما المانع من الفرجة على أحدث صيحات الموضه؟
    صحيح بعد الصلاة بتلاقي البنات المحترمات مش باينين كده واخدين جنب أما اللي لابسات وحش بيقفوا كده أمام المسجد وهاتك يا ضحك وكلام وبوس في بعض وبايباي وكده
    بجد بتضايق جدا
    كمان اللي بسلبسن عبايات وبيبقى اسمها لابسة عباية بس بتكون ضيقة جدا وفيها حركات وقصات وحاجات كده تبقى أشبه للفستان من العباية...
    واللي أول ما اصلاة تخلص تخلع الحجاب-لأنها أصلا لابساه علشان الصلاة بس- وتفتح العباية ادام الجامع في منظر مخزي للبنات كلهن

    ربنا يهدي بناتنا ويعمي شبابنا -عن الحرام طبعا- :) :)

    شكرا جدا على موضوعك الرائع
    وكل عيد وأنت على طاعة

    ReplyDelete
  32. كيارا ..

    شكرا جزيلا على المرور ..

    و الحمد لله إن الأسلوب مش ممل ..

    و كل سنة و انتوا طيبين ..

    ReplyDelete
  33. نهر الحب

    شكرا جزيلا على المرور ..

    و الدعاء ..

    جعله الله عيدا سعيدا عليكم و على الجميع ..

    ReplyDelete
  34. ست البنات

    و عليكم السلام و رحمة الله و بركاته ..

    الحمد لله إنك معانا و مش ضدنا ..

    و حاسة بالغلط اللي بيعمله "بني جنسك" :)

    و الله يوم العيد ده .. الواحد بيعاني فيه علشان ما ياخدش ذنوب على الصبح كده ..

    بجد اللي بيعمله البنات ده بقى حاجة تقرف ..

    ربنا يهديهم .. و يعمينا :) عن الحرام ..
    و شكرا جزيلا على المرور ..

    كل عام أنتِ بخير

    ReplyDelete
  35. بص ياسيدي بقي وحده وحده كده
    اولا موضوع مهم جداا وكويس انك فتحته
    ثانيا بقي وده الاهم
    ليه تعقيب علي حاجة اساسية قبل مااتكلم عن رايي
    جزاك الله خيرا طبعا علي البلوج وانا عرفة انك اكيد نيتك كويسة جداا في كتابة البلوج ده بس الحقيقة كان المفروض الاسلوب يكون احسن من كده شوية يعني طبطبة...بمعني ان لو وحده حتي بتروح بشعرها ولبسة لبس ضيق...المفروض وعلي حد اعتقادي انها بتكون حبه تقرب من ربنا...ممكن خطوة الحجاب دي مقدرتش تاخدها...بس هي حاجة كويس وبتصلي وكل حاجة..فالمفروض اننا بنحببها في الدين مش بنكرهها ونقلها انتي لاتصلحي انك تدخلي مسجد...وانتي ريحة تتسلي وتستعرضي لبسك وانتي كده بتأذينا...ونحتقرها
    بسم الله ابدأ
    احم احم...1- اولا اعتقد ان صلاة الرجل في المسجد سنة مؤكده وليست فرض
    2- وجينا لاهم نقطة في البلوج كله...وهي كلامك علي فتيات رقم 2...الناس اللي لو كانوا حتي مش محجبين اصلا وانا شفت زيهم في ستي استار....لعلمك اللي بتقول عليهم دول اس البلاوي...دول يمكن يكونوا بيخصلوا النية في ذهبهم للمسجد اكتر مننا احنا ياللي لبسين كويس وقريبين من ربنا....اقلي ليه...اقلك ياسيدي...هي لو عيزة تتفسح او تستعرض لبسها...أيه اللي يوديها المسجد ....متروح تتفسح في أي مكان...وتقدر تروح وطبعا تقدر تلفت النظر ليها...فايه اللي يوديها الجامع يعني!!! انت عارف انا شفت ناس في ستي استار والله شكله اول ماتشفهم تقول دول ولا بيركعوها....لبسهم نطلونات وعادي جداا...بس راحوا يصلوا في الجامع اللي جوه ستي ستار...عارف دول والله احسن مننا....لان باين عليهم من مستوي...فاكيد الناس اللي من مستوي عالي اوووي كده...قدمهم ومعارفهم استغفر الله يعني كلهم في دنيا تانية..فانهم يصلوا دي حاجة كويسة جدااا...وطبعا داخل المسجد بيلبسوا اسدال للصلاة
    فانا عيزة اقلك انو مش بالبس خالص...ممكن تكون وحده بشعرها وتكون نيتها خالصة لله اكتر من التانية...لانها لو كان يفرق معاها كلام الناس وعيزة مدح وبتاع...كانت اتحجبت عشان الناس تقول دي كويس...لو عيزة تتفسح زي مابتقول او تستعرض لبسها عمرها مهتفكر في الجامع اللي تعمل فيه كده
    ده غير ان الناس دي والله بتبقي عرفة هي ايه وربنا ايه...عرفة حجمها اكتر من اللي قريب من ربنا...يمكن المتدين ودول بعضهم يحسوا انهم حاجة كده وانهم طائعين...وينسوا انهم ديما بيعملوا ذنوب وينسوا حجمهم ايه قدام ربنا
    لكن دول بيبقوا عرفين كويس اوووي انهم مقصرين جدا في حق ربنا ...بعضهم مش بيبقي قادر يبعد عن الحاجات اللي حرمها ربنا...اللي اتربي وعاش في وسط اسرة بتعمل حاجات تغضب ربنا..فهم بجد مجرد صلاتهم دي بتبقي احسن من صلاتنا احنا
    واكيد ربنا في يوم من الايام هيديهم
    واكيد لازم نقول للناس دي انهم يروحوا بزي افضل من كده علي اد مايقدروا بس نقولهم ونفهمهم براحة ومنحسسهمش انهم كفرة..ولافاسقين
    3- زي مانت بتحب تروح الجامع ومتعلق بيه احنا نساء وبنات بنحب بنحب نروح الجامع لانه جو تاني خالص غير البيت..دي حاجة ...الحاجة التانية بقي مين قال ان صلاة المرأة في البيت ثوابها اكبر من المسجد....لا طبعا....افضل لاتعني ان الثواب اكبر ولا حاجة دي معنها ان احسن ليها عشان محدش يتعرضلها..خوف عليها يعني...مش ان الثواب هيبقي اكبر في البيت...لا طبعا لان كل خطوة واي حد سواء ست او راجل..بحسنة
    وبالنسبة للست اللي خرجت تصلي كل الصلوات في المسجد وجوزها قلها لا وهي راحت من وراها ده انا بعتبره تشدد....هي عملت معصية عشان تروح تصلي...اغضبت زوجها وطبعا حرام جداا تعمل حاجة زي كده
    دي اللي زوجها بينام وهو غضبان عليها الملايكة بتلعنها طول الليل
    وطبعا الافضل اننا نصلي الصلوات كلها في البيت بس لو تروايح او صلاة عيد مفهاش مشكلة اننا نروح عشان بيبقي جو جميل الناس كلها تروح رجاله وستات..فدي حاجة كويسة جداا
    كده انا خلصت ومعلش طبعا عشان طولت...انا مش عرفة اوصفلك فرحتي اد ايه...انا بقالي 5 او 6 ايام عيزة اكتب الكومنت ده ومش عرفة كل مااكتبه الكمبيوتر يقفل...اضطرت اقوم المهم تحصل حاجة ومعرفش اكمله...مكنتش عايز يتكتب ولا ايه مش عرفة..فالحمد لله
    وجزاك الله كل خير

    ReplyDelete
  36. هههههههههههههه يالهوي كل ده كتبته...هههههههههههه معلش بقي الله يكون في عونك هتقري كل ده

    ReplyDelete
  37. ربنا يهدي بنات وشباب المسلمين جميعا

    وربنا يجازيك خير على البوست الجميل

    أسلوبك ملوش حل فعلا

    أنا خلاص بقيت زبون عندك

    والكرسي اللى هناك دا بتاعي أوعي تخلي حد يقعد عليه

    ReplyDelete
  38. الاول شكرا ليكى على اثارة النقطه الهامه دى لان البنات دلوقتى بقت بتروح للصلاه وهى مش فى دماغها الصلاه بحد ذاتها وزى ماانت قولت تشم هوا او تخرج والجديد بقه علشان تلاقيلها عريس يعنى تشوفها واحده من الستات الكبار الى موجودين دول وتخطبها لابنها ولا حاجه وطبعا مش كل البنات .

    لا حول ولا قوة الا بالله

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ