زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

31 May, 2011

ـ نص العمى و لا العمى كله !! ـ

بسم الله الرحمن الرحيم




خلونا ندخل في الموضوع على طول
و نبدأ بسؤال مباشر ,
مش حلزوني و لا لولبي :
لو انت بتعمل حاجات غلط , و شفت حد تاني بيعملها ,
هتأمره بالمعروف و تنهاه عن المنكر و تنصحه بالابتعاد عنها ؟؟

و لا هتقول :
" يا عم , اسكت , ما حدش عارف حاجة ,
كل واحد فيه اللي مكفيه
و أنا عندي مصايب و ذنوب كتير
و ربنا بيقول :
{ أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ }[البقرة : 44]
لما أبقى أبطل ذنوب أبقى أقول للناس هم كمان يبطلوا "


!!!!!!!!!!!!!!!!!!!!!!!!!!!!!


طبعا منطق مقنع , لأن زي ما عمنا الشاعر بيقول :
و غير تقيٍ يأمر الناس بالتُقى *** طبيبٌ يداوي و الطبيبُ مريضُ


لكنه للأسف منطق ( غير صحيحح ) !!
لأنه "  لو اشترط أحدٌ الخُلُوَّ من الذنوب للدعوة إلى الله, لما دعا إلى الله غير الانبياء المعصومين ,
لأن العدالة ليست شرطا في الآمر الناهي وإذا اشترطناها لم يأمر أحد بشيء،
إذ (( كل ابن آدم خطاء وخير الخطائين التوابون ))[الشيخ سعيد عبد العظيم]
[ الراوي: أنس بن مالك - المحدث: الألباني -
المصدر: صحيح ابن ماجه - الصفحة أو الرقم: 3447
خلاصة حكم المحدث: حسن ]
http://sonnaway.com/topic.php?action=topic&id=9266 

و كما نقل النووي في شرح صحيح مسلم :
" ولا يُشترط في الآمر والناهي أن يكون كامل الحال ممتثلا ما يأمر به مجتنبا ما ينهى عنه ،
بل عليه الأمر وإن كان مُخِلاً بما يأمر به ، والنهي وإن كان متلبسا بما ينهى عنه ;
فإنه يجب عليه شيئان :
أن يأمر نفسه وينهاها ، ويأمر غيره وينهاه ،
فإذا أخل بأحدهما , كيف يباح له الإخلال بالآخر ؟ "
http://www.islamweb.net/newlibrary/display_book.php?flag=1&bk_no=53&ID=204 

و نقل الحافظ ابن حجر في فتح الباري عن بعض أهل العلم قوله :
" يجب الأمر بالمعروف لمن قدر عليه ولم يخف على نفسه منه ضرراً
ولو كان الآمر متلبساً بالمعصية ؛
لأنه في الجملة يؤجر على الأمر بالمعروف ، ولا سيما إن كان مطاعاً ،
وأما إثمه الخاص به فقد يغفره الله تعالى له ، وقد يؤاخذه به "

يعني اللي بيعمل المنكر و بينهى عنه .... بيعمل ذنب واحد : 
و هو ارتكاب المنكر 
أما اللي يعمل المنكر و لا ينهى عنه ...... بيعمل ذنبين :
الذنب بتاع ارتكاب المنكر
و الذنب بتاع التفريط في النهي عن المنكر 

يعني زي ما بنقول بالبلدي كده : 
نص العمى و لا العمى كله
نص العمى إنك : ( تعمل ذنوب و لا تترك الأمر بالمعروف و النهي عن المنكر ) 
و العمى كله إنك : ( تعمل ذنوب , و تترك الأمر بالمعروف و النهي عن المنكر كمان )


- ممممممم , أمّال ليه ربنا بيقول :
{ أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ[البقرة : 44]


؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يقول صاحب تفسير السعدي في هذه آية :
" ليس في الآية أن الإنسان إذا لم يقم بما أمر به أنه يترك الأمر بالمعروف, والنهي عن المنكر,
لأنها دلت على التوبيخ بالنسبة إلى الواجِبَيْنِ،
وإلا فمن المعلوم أن على الإنسان واجبين : أمرُ غَيْرِهِ ونَهْيِهِ , وأمر نفسه ونهيها،
فترك أحدهما, لا يكون رخصة في ترك الآخر،
فإن الكمال أن يقوم الإنسان بالواجبين, والنقص الكامل أن يتركهما،
وأما قيامه بأحدهما دون الآخر, فليس في رتبة الأول, وهو دون الأخير "

و يقول ابن كثير - بتصرف - في تفسير الآية :
" فَكُلٌّ من الأمر بالمعروف و فعله واجب ،
لا يسقط أحدهما بترك الآخر على أصح قولي العلماء من السلف والخلف.
والصحيح أن العالم يأمر بالمعروف ، وإن لم يفعله، وينهى عن المنكر وإن ارتكبه،
قال مالك عن ربيعة: سمعت سعيد بن جبير يقول له :
لو كان المرء لا يأمر بالمعروف ولا ينهى عن المنكر حتى لا يكون فيه شيء ,
ما أمر أحد بمعروف ولا نهى عن منكر.
وقال مالك : وصدق , من ذا الذي ليس فيه شيء ؟ " 

- ماشي , بس برضه ما فهمتش قوي ,
أمال ليه ربنا في الآية السابقة ذم الناس اللي بيأمروا بالمعروف و ينسون أنفسهم ؟؟
يعني إزاي يذمهم ؟؟

و إزاي المفروض إنهم يأمروا و ينهوا حتى لو بيقعوا في المخالفة ؟؟

ابن كثير بيقول أيضا في تفسير الآية :
" ليس المراد ذمهم على أمرهم بالبر مع تركهم له ، بل على تركهم له -يعني البر-،
فإن الأمر بالمعروف معروف -يعني حاجة كويسة- وهو واجب على العالم،
ولكن الأولى بالعالم أن يفعله مع أمرهم به ، ولا يتخلف عنهم "

يعني ربنا في الآية فعلا ذمهم
لكن لم يذمهم على عدم موافقة أقوالهم أفعالهم
لكن ذمهم على تركهم فعل الخير فقط .
مش زي ما كتير مننا فاهم إن الواحد لو بيعمل معصية و بينهى عنها الناس
يبقى ذنبه أكبر من لو عمل المعصية و لم ينه أحداً عنها
ده فهم غلط 
 لكن طبعا الأَوْلى إن اللي بيأمر بالمعروف يكون بيعمل بيه
و إللي بينهى عن المنكر يكون بيجتنبه , 

- برضو مش داخلة دماغي قوي !!
يعني يا عم الشيخ , أبقى بشرب سيجارة مثلا ,
و واحد جنبي بيشرب زيي
أروح واخد نفس و نافخ في وشه , و أقول له :
على فكرة , السجاير حرام , لازم تبطلها !! 

و بعدين انت ناسي حديث رسول الله :
(( يُجاء بالرجل يوم القيامة فيُلقى في النار ، فتندلق أقتابه في النار ،
فيدور كما يدور الحمار برحاه ،
فيجتمع أهل النار عليه فيقولون :
أي فلانا ما شأنك ؟
أليس كنت تأمرننا بالمعروف وتنهانا عن المنكر ؟
قال : كنت آمركم بالمعروف ولا آتيه ، وأنهاكم عن المنكر وآتيه .))
[ الراوي: أسامة بن زيد - المحدث: البخاري -
المصدر: صحيح البخاري - الصفحة أو الرقم: 3267
خلاصة حكم المحدث: صحيح ]  

اجمع لي بين الاثنين بقى !؟

- بص يا سيدي ,
المسألة سهلة إن شاء الله و هي :
إن الواحد مفروض يأمر بالمعروف حتى لو مش بيعمله
و ينهى عن المنكر حتى لو بيعمله
زي ما قلنا في الكلام السابق


أما أحاديث الوعيد كما في الحديث السابق فهي إما : 
1- لمن كان يخالف قوله فعله بشرط :
أن يكون ممن يصر على المعصية و مش عاوز يتوب منها و لا حتى بيحاول ,
زي الباشا بتاع السجاير اللي انت بتقول عليه ده ,
أو منافق ,
زي علماء اليهود و النصارى اللي بيحرموا على الناس حاجات ,
و في نفس الوقت هم بيعملوها
أو
2 - الوعيد فيها ليس لأن قوله خالف فعله ,
لكن تلك العقوبة على الذنب نفسه الذي كان يرتكبه ,
أو الأمر الذي كان يتركه ,
و تذكيره بأنه كان يأمر الناس بالمعروف و ينهاهم عن المنكر هو من باب تأنيبه و إقامة الحجة عليه ,
يعني : العذاب ده جزاء ليك على فعلك المنكر الفلاني أو تركك الفرض الفلاني
و ما تقولش معلش ما كنتش عارف ,
لا, انت كنت عارف الصح من الغلط لدرجة إنك كنت بتأمر بيه الناس ,

و اقرأ كلام الشيخ سلمان العودة عن هذا الحديث في الرابط التالي :
http://audio.islamweb.net/audio/index.php?page=FullContent&audioid=13854#13854
فقرة : الوقوع في المعاصي لا يمنع من القيام بالنهي عن المنكر
مدونة تظبيط



و تنبيه أخير علشان ماحدش يفهمني غلط
ما حدش قال إن الذنوب حلال
و لا إن المجاهرة بالمعصية حلال  
الكلام كله على إن :
الوقوع في الذنوب لا يعفي صاحبها من الأمر بالمعروف و النهي عن المنكر
و اللي بيعمل الذنب  لغلبة الشهوة و النفس
و من غير إصرار و لا مجاهرة و افتخار و لا نفاق 
و في نفس الوقت بيأمر بالمعروف و ينهى عن المنكر
أفضل ممن يفعل الذنب و لا يأمر بالمعروف و لا ينهى عن المنكر 

و لأن أصلا مافيش إنسان معصوم من الذنب , 
فلو كل واحد استنى إنه ما يعملش ذنوب خالص علشان ينصح الناس , 
يبقى عمره ما هينصح حد , لأن عمره ما هيخلو من الذنوب , 
كما قال شيخ الإسلام ابن تيمية رحمه الله : 
" لا يقولن أحدكم لا أدعو حتى يكتمل إيمانى ,
فإنه بين أمرين: إما أن يموت ولم يكتمل إيمانه بعد ,
وإما أن يأتى يوم ويقول قد اكتمل إيمانى ... فليعلم أنه قد ضل !! " 

يا رب تكون وجهة نظري وصلت

جزاكم الله خيرا


نسأل الله أن يغفر لنا و يتوب علينا و يهدينا و جميع المسلمين


في أمان الله


..............

28 May, 2011

ـ سأقاطع تلك الأخبار ( شعر ) ـ


السلام عليكم و رحمة الله و بركاته ,

طبعا أغلبنا يشاهد الأخبار يوميا , و يرى الكم الهائل من الأخبار المحزنة و المحبطة في العالم بصفة عامة مثل الكوارث و الحروب , 

أو في مصر بصفة خاصة , مثل التباطؤ في محاكمة الفاسدين , 
و الحرب الإعلامية ضد التيارات الدينية , 
و محاولات الالتفاف على الشرعية كتعيين مجلس رئاسي و غيرها ,

 
و قد قرأت كلاما أعجبني في هذا الموضوع لستيف تشالندر في كتابه 100 طريقة لتحفيز نفسك , يقول فيه :

" إن الاستماع لفترة طويلة من الوقت إلى البرامج الإخبارية المثيرة تجعلنا نكون صورة مشوهه للحياة .
فالبرامج الجديدة اليوم لها هدف واحد وهو أن تصدم المستمع أو تثير فيه الحزن
ولهذا تبحث هذه البرامج عن أكثر القصص ابتذالاً ورعباً في الولاية أو الدولة وتجدها بالفعل .

ولكن هذا الأمر يصل إلى أقصى درجات الضرر عندما يصدق المستمع العادي أن كلهذه الأخبار السيئة هي انعكاس حقيقي وعادل لما يحدث في العالم ،
وهذه ليست هي الحقيقة ,

وإنما هي أخبار اختيرت عن قصد لتغذية البرامج بالإثارة وجعل الناس يستمرون في الاستماع
فهي أخبار المقصود منها بث الخوف وذلك لأن الشخص الخائف يكون أكثر انتباهاً وهذا ما يريده المعلنون ."

و بصراحة فأنا من النوع الذي يتأثر سلبا بما يشاهد و يسمع من أخبار ,
لذا فقد اخترت الحل الذي أراه أفضل لي و عبرت عنه بهذه الأبيات :

هذا ماتَ و ذاك اُغتيل ,
شعبٌ مقهورٌ و ذليل , 

 
أطفالٌ تبكي و نساءٌ ...
لم تُخْفِ صراخا و عويل , 

 
و الناسُ صُموتٌ عن ردعٍ ...
لعدوٍ يهوى التنكيل , 

 
كارثةٌ في بلدٍ آخرَ
تتركُ آلافاً كضحايا
ما بين جريحٍ و قتيل ,

 
داءٌ فاشٍ ليس يُداوى
تحملُهُ ريحٌ و هواء , 

 
فقرٌ آتٍ لخزائننا
أزمةُ أطعمةٍ و غذاء , 

 
موتٌ , حزنٌ , ظلمٌ , فقرٌ ,
و مآسٍ كبرى و شقاء , 

 
هذا ما تنقله دوماً جُلُّ محطاتِ الإعلام ,
هذا ما يسمعهُ الناسُ ...

يُقظاناً كانوا و نيام , 
 
فلهذا فكرتُ مليّاً و عقدت العزم بإصرار ,
و اخترتُ الأفضل لحياتي , و أخيراً أصدرتُ قرار :
سأقاطعُ تلكَ الأخبار ... !!!


............................
 
طبعا أنا لم أقاطع الأخبار كلها , 
لأن المرء عليه أن يعرف أخبار العالم حوله , 
لكني قاطعت ( تلك ) الأخبار , المثبطة و الكئيبة و المستفزة فقط ,

......................

26 May, 2011

ـ احنا عارفين مصلحتكم أكثر منكم !! ـ


السلام عليكم و رحمة الله و بركاته , 


هحكي لكم موقف حصل زمااااااااان قوي , 
اللي كان عايش منكم من أيام الفراعنة تلاقيه سمع عنه , 
و اللي ما كانش عايش سمع عنه في القرآن : 
لما سيدنا موسى راح لفرعون علشان يدعوه للإيمان بالله , 
فرعون قال لشعبه إيه ؟؟
قال لهم أنا ( خايف عليكم ) من موسى و عاوز  ( مصلحة البلد ) : 
{ إِنِّي أَخَافُ أَن يُبَدِّلَ دِينَكُمْ أَوْ أَن يُظْهِرَ فِي الْأَرْضِ الْفَسَادَ } [غافر : 26 ]
و أنا ( شايف الصح ) ليكم علشان كده ( لازم تتبعوني ) : 
{ مَا أُرِيكُمْ إِلَّا مَا أَرَى وَمَا أَهْدِيكُمْ إِلَّا سَبِيلَ الرَّشَادِ } [غافر : 29]
 
.........................

و تعدي أيام و سنين و قرون 
و ييجي فرعون تاني اسمه مبارك , 
ييجي الناس يقولوا له عاوزين عدل و حرية و إصلاح , 
يقول لهم : 
و أنا ( خايف عليكم ) من المتطرفين و  ( خايف على البلد ) من الإرهاب لو اديت للشعب الحرية ,
و بعدين أنا ( شايف الصح ) للبلد كده , و ( لازم تتبعوني ) !!


..............................


و تعدي أيام و شهور , 
و يروح الفرعون مبارك , 
و ييجي ناس برضو بنفس ( العقلية الفرعونية ) , 
يسميهم الإعلام بـ( النخبة المثقفة ) , 
يقولوا للناس إن التعديلات الدستورية اللي ( اخترتوها انتم ) كانت غلط , 
و احنا ( خايفين عليكم ) من الإسلاميين , و ( خايفين على البلد ) أحسن تبقى إسلامية و ديكتاتورية , 
و احنا عارفين مصلحتكم أكثر منكم  , و  ( شايفين الصح ) ليكم  , 
و ( لازم تتبعونا ) و ترفضوا التعديلات اللي ( وافقت عليها الأغلبية ) ,
و تطلبوا ( تعيين ) مجلس رئاسي مننا , احنا الناس اللي بتفهم , 
علشان نقودكم للخير , لأن احنا عارفين مصلحتكم أكثر منكم 


المنطق الفرعوني ... يتكرر !! 


..................

15 May, 2011

ـ مش أي حد بدقن .. يبقى سلفي !! ـ



السلام عليكم و رحمة الله و بركاته ,


اسمحوا أسألكم سؤال علمي شوية , ماشي ؟؟
السؤال هو :
مين الحد اللي بيربي دقنه , و بيقصر بنطلونه أو جلبيته ؟؟


ها ؟؟ عرفتم و لا لسه ؟؟
طب هسهلها لكم و أديلكم اختيارات :
( السلفي - الجهادي - التكفير و الهجرة - التبليغ و الدعوة )

؟؟؟؟؟؟؟؟

ممممم
متهيأ لي الاختيار بقى صعب شوية , صح ؟؟
لسبب بسيط جدا و هو .....
كل الجماعات دي بتربي دقنها و بتقصر ثيابها !!
أيوة
و رغم ( الاختلاف الفكري ) و المنهجي الواضح جدا بين بعض الجماعات دي ,
إلا إنهم كلهم ( بيتشابهوا في الهيئة ) ,

لكن المشكلة إن الناس ما بتعرفش تفرق
و أي حد بدقن بيعمل أي حاجة بيقولوا عليه ( سلفي ) من غير تفكير !!
و يقعدوا يتهموا السلفيين تهم مالهمش ست آلاف دعوة بيها
و ألف باء عند السلفيين إن الحاجات دي ما ينفعش تتعمل
زي تكفير الناس و  قطع الودان و رش مية النار  
و الأمر بالمعروف و النهي عن المنكر باليد لغير ولي الأمر , وغيرها.

و هنا , يجب أن ( ينط ) سؤال مهم إلى مخيخ كل واحد ,
إزاي نعرف السلفي من الناس التانيين الكتير اللي شبهه دول ؟؟

هقول لك زي ما قال علماء السلف :
( اعرف الحق تعرف أصحابه )

اعرف أولا يعني إيه ( السلفية ) دي ,
بعد كده اللي هتلاقيه يطبقها يبقى سلفي ,
و اللي مش بيطبقها ما يبقاش سلفي حتى لو بنطلونه قصير و دقنه طويلة

شوف يا سيدي ,
السلفيين بيقولوا إن منهجهم هو :
( الكتاب و السنّة بفهم سلف الأمة )

يعني إن الناس المفروض تعمل بالقرآن و أحاديث الرسول ,
و دي حاجة كل المسلمين متفقين عليها ,
لأن الرسول -صلى الله عليه و سلم- قال :
(( تركت فيكم شيئين ، لن تضلوا بعدهما :
كتاب الله ، و سنتي ))
[ الراوي:أبو هريرة - المحدث: الألباني -
المصدر: صحيح الجامع - الصفحة أو الرقم: 2937
خلاصة حكم المحدث:صحيح ]

إنما السلفيين حاطين شرط و هو إن التطبيق يبقى مش حسب ما أنا فاهم
و لا حسب ما أنت فاهم ,
لكن يبقى على حسب ما الصحابة و التابعين و السلف فهموا ,
 
أولا : لأن الرسول قال كده :
(( عليكم بسنتي وسنة الخلفاء الراشدين المهديين عضوا عليها بالنواجذ ))
[ الراوي:عبدالله بن مسعود- المحدث: الألباني -
المصدر: تخريج كتاب السنة - الصفحة أو الرقم: 58
خلاصة حكم المحدث:صحيح ]

و ثانياً : لأن ممكن آية قرآنية أو حديث , كل واحد فينا يفهمها بشكل تاني خالص ,
حسب ثقافته و فهمه و علمه و لغته و حاجات كتيرة ,
لأننا مش بنفهم لغة فصحى زي اللي كانوا أيام الرسول ,
و لا الآيات و الأحاديث نزلت على عهدنا و عارفين مناسباتها زي اللي كانوا على أيام الرسول
فطبيعي إن فهمهم هم يبقى أقرب للصواب مننا دلوقتي ,

و أديلك مثال على السريع :
عارف انت آخر آية في سورة الكافرون :
{ لكم دينكم و لي دين }
كتير من الناس بتفهمها إن العملية ( بيس ) ,
و إن عادي خليكم كفار و احنا خلينا مسلمين مافيش أي مشاكل ,

لكن في الحقيقة تفسيرها الصحيح اللي الناس أيام زمان فهموها بيه
إنها ( للتهديد ) , يعني زي ما تكون بتقول لهم :
طب انتوا على دينكم و أنا علي ديني و هنشوف في الآخر ,
أو ( للبراءة ) من دينانتهم الباطلة ,
كأنك بتقول لهم :
لكم دينكم الباطل الفاسد , و أنا ماليش دعوة بيه لأن لي ديني الصحيح النقي
و المزيد عن تفسير هذه الآية في موضوع :
يا حبيبي يا مرقص انت و كوهين !!
تظبيط
مدونة تظبيط
لحد هنا تمام ؟؟
أظن حاجة كويسة لما يبقى الناس عاوزين تطبيق القرآن و السنة
بالفهم الصحيح بتاع الصحابة و التابعين و السلف

بس لسه فيه مشكلة صغيرة شوية ,
طيب طالما هم منهجهم كده , و ده المفروض إنه منهج المسلمين كلهم ,
ليه بقى هم يفرقوا المسلمين و يقسموا نفسهم و يبقوا جماعة لوحدهم و يسموا نفسهم اسم لوحدهم ؟؟
ما يسموا نفسهم ( مسلمين ) و خلاص !!
هم لازم يتفزلكوا و يخترعوا لهم اسم ( السلفيين ) ده ؟؟

هقول لك دي مش فزلكة و لا حاجة ,
على العكس , دي حاجة أحيانا بتبقى لابد منها ,
قول ليه ؟؟
دلوقتي الشيعة بيكفروا الصحابة .... و بيقولوا على نفسهم مسلمين
البهائيين عندهم نبي بعد سيدنا محمد ... و بيقولوا على نفسهم مسلمين
الخوارج بتوع التكفير بيكفروا الناس كلهم .... و بيقولوا على نفسهم مسلمين
و كل الطوائف الضالة بتقول على نفسها مسلمين ,
يبقى انت لو قلت على نفسك ( مسلم بس )
هتتلخبط مع الناس الكدابين التانيين اللي بيقولوا على نفسهم مسلمين برضو
يببقى لازم كل ما تعرّف نفسك تقول :
( أنا مسلم من اللي مش بيكفروا أصحاب الرسول و لا اللي بيقتلوا الناس و لا ...
و منهجي هو الكتاب و السنة بفهم سلف الأمة )
أو بدل ما بتقول التعريف الطويل ده كل ما تتكلم عن نفسك أو دينك
بتقول : ( سلفي ) و تختصر كل ده !!!

يعني السلفية لا تعني حزباً و لا جماعةً و لا طائفةً ,
بل هي اختصار لتعريف منهج ,
و انتساب لجماعة من الناس كانت فاهمة الإسلام صح - اللي هم كانوا أيام زمان -

و موضوع التسميات ده مش حاجة جديدة مخترعينها الأيام دي ,
دي بدأت من زمان أول ما الإسلام ضعف و ظهرت فيه الفرق المنحرفة كالروافض و الخوارج و غيرها
راحت الطائفة المسلمة من السلف اللي على نهج الصحابة و التابعين أطلقوا على أنفسهم اسم :
( أهل السنة و الجماعة )
علشان يميزوا أنفسهم عن الطوائف الغلط اللي بتدعي الإسلام باللسان و بيخالفوه بالأفعال ,

بتقول إيه ؟؟ الأفعال ؟؟
أيوااااااااا خلينا في الأفعال دي شوية يا عم الشيخ ,
انت عارف إن الناس السلفيين دول أقوالهم بتخالف أفعالهم ,
يقولوا لك : تبسمك في وجه أخيك صدقة ,
و تلاقي جاركم أبو دقن مكشر على طول الخط ,
و يقولوا لك : من غشنا فليس منا ,
و تلاقي الجزار أبو دقن بيحط لك دهنة وسط اللحمة من غير ما تشوف
ينفع الكلام ده ؟؟ 

هرد عليك و أقول لك الكلمة اللي قلتها لك في الأول :
( اعرف الحق تعرف أصحابه )
شوف المنهج بيقول إيه ,
و اللي بيطبقه يبقى تبعه , و اللي بيخالفه يبقى مش تبعه ,
و سيبك من الأشخاص و تطبيقهم اللي ممكن يكون غلط ,

و بعدين كلنا بشر بنغلط و مش ملائكة ,
و لو هتقول السلفيين ( كلهم ) وحشين علشان شفت واحد مكشر أو بيغش في اللحمة ,
يبقى المسلمين ( كلهم ) برضو وحشين علشان فيه منهم نصابين و حرامية ,
شوف المنهج , لو صحيح ابقى طبقه , 

و خليك انت مثال جيد ,
لأن مافيش حد عاقل مثلا يقول لك أنا هسيب الإسلام علشان فيه مسلمين نصابين ,
لكن يقول أنا هبقى مسلم أمين و أبقى قدوة حسنة ,
و على فكرة برضو , الموضوع ده رغينا فيه كتير قبل كده هنا :

ـ الدقون و المنقبات  ؟؟ أعوذ بالله  !! ـ


اللي عاوز أوصله لك في الآخر ,
إن مش كل حد عمل حاجة غلط بدقن يبقى سلفي ,
و مش كل واحد بدقن و سلفي عمل حاجة غلط يبقى السلفية غلط ,
كلنا بشر , نخطيء و نصيب , و الأشخاص ليسوا حجة على المنهج ,
لكن احكم على السلفيين من منهجهم ,
اسمع منهم , و لا تسمع عنهم ,
فإن كان منهجهم سليما فاقبله , وإن كان قبيحا فاتركه
,


أنا كده خلصت الكلام اللي عندي ,
لو انت عندك استفسار ... خش عليا بيه 
و كلنا ( ودان ) صاغية 

..................

حقوق النشر للجميع
........................

11 May, 2011

ـ المتهم ( سلفي ) حتى تثبت ( إدانته ) !! ـ


السلام عليكم و رحمة الله و بركاته

طبعا كلنا سمعنا عن أحداث كنيسة امبابة ,
اللي كان المتهم ( الأول ) فيها ( تلقائيا ) هم السلفيين ,

رغم إن وزير الداخلية قال ( مش هم ) :
http://www.youtube.com/watch?v=GpxUEbcHvQw


و مراسل جريدة الشروق قال ( مش هم ) :
http://www.youtube.com/watch?v=08OK4zU0A4k


و أهالي المنطقة قالوا ( مش هم ) :
http://www.youtube.com/watch?v=LX-yhl9uzo4&NR=1


بل إن كاهن الكنيسة نفسه قال ( مش هم ) : 

فهل سيظلون متهمين حتى بعد أن قالت التحريات العسكرية ( مش هم ) :
http://gate.ahram.org.eg/News/68844.aspx
 
؟؟؟؟؟؟؟؟؟؟؟؟؟؟؟؟؟؟؟؟؟؟؟؟

و لا احنا بقى أسهل حاجة عندنا و عند الإعلام إننا نتهم السلفيين في كل مصيبة تحصل ؟؟
و أصبح السلفي متهم حتى تثبت ( إدانته ) , حتى لو كان بريء !!؟؟


ناقص نتهم السلفيين إنهم اللي حدفوا مبنى الإذاعة و التليفزيون بالطوب ,

و إنهم راحوا عند السفارة الأمريكية بيطالبوها تحميهم ,

!!!!!!!!!!!!!!!

الله يرحم الإخوان زمان لما مرة ( لمّحوا ) لفكرة إشراف دولي على الانتخابات
فاكرين إيه اللي الإعلام قاله عنهم ؟؟

طيب دلوقتي الإعلام قال إيه عن اللي ( صرّحوا ) بإنهم عاوزين أمريكا تحميهم ؟؟


تظبيط 
مدونة تظبيط

.............................

و رجاءاً شاهد هذا الفيديو كي ترى من الذي يُشعل الفتنة 
و من الذي يحافظ على ظبط النفس و يُقدم مصلحة البلد : 


Think Again !!

  .................................

حقوق النشر للجميع 
..........................

08 May, 2011

ـ افتح سوستة ودانك !! ـ


السلام عليكم و رحمة الله و بركاته , 


طبعا كلنا سمعنا عن الأحداث الأخيرة اللي حدثت في امبابة
و إن السلفيين هم أكيد السبب فيها ,
زي ما كانوا السبب في كنيسة أطفيح و هدم الأضرحة , و غيرها
و ده كله علشان هم متشددين و فاهمين الدين غلط ,
و نفسهم يحكموا البلد و يعملوا ديكتاتورية دينية ,



و ما حدش يقول لي إني فاهم غلط و لا إني متحامل عليهم , 
و لا إن وزير الداخلية برأهم , و لا الحاجات دي ,
لأ , أنا فاهمهم الأشكال دي كويس قوي ,
و ( سمعت ) عنهم قصص و روايات كتير تؤيد الكلام اللي أنا بقوله ده
و خلوني أحكي لكم قصة حدثت أيام الرسول توضح كلامي ده :


كان يا مكان , يا سعد يا إكرام ,
أيام بداية الإسلام و قبل الهجرة ,
كان فيه واحد شريف و ذو مكانة في قبيلة اسمها " دَوْس " ,
و كان اسمه " الطفيل بن عمرو "
(( وكان قد قدم مكة , فاجتمع به أشراف قريش وحذروه من رسول الله ,
ونهوه أن يجتمع به أو يسمع كلامه ,
قال : فوالله ما زالوا بي حتى أجمعت أن لا أسمع منه شيئا ولا أكلمه ,
حتى حشوت أذني حين غدوت إلى المسجد كُرْسُفاً [قطناً] فَرَقاً [خوفاً] من أن يبلغني شيء من قوله ,
وأنا لا أريد أن أسمعه ,
قال : فغدوت إلى المسجد فإذا رسول الله صلى الله عليه وسلم قائم يصلي عند الكعبة ,
قال : فقمت منه قريبا , فأبى الله إلا أن يسمعني بعض قوله ,
قال : فسمعت كلاما حسنا !!!
قال : فقلت في نفسي واثكل أمي
والله إني لرجل لبيب شاعر , ما يخفى علي الحسن من القبيح ,
فما يمنعني أن أسمع من هذا الرجل ما يقول ؟؟
فإن كان الذي يأتي به حسنا قبلته , وإن كان قبيحا تركته ,

قال : فمكثت حتى انصرف رسول الله صلى الله عليه وسلم إلى بيته دخلت عليه ,
فقلت : يا محمد إن قومك قالوا لي كذا وكذا -الذي قالوا - ,
قال : فوالله ما برحوا بي يخوفونني أمرك حتى سددت أذني بكرسف لئلا اسمع قولك ,
ثم أبى الله إلا أن يسمعني قولك فسمعت قولا حسنا ,
فأعرض علي أمرك ,
قال : فعرض علي رسول الله صلى الله عليه وسلم الإسلام وتلا علي القرآن ,
فلا والله ما سمعت قولا قط أحسن منه ولا أمرا أعدل منه ,
قال : فأسلمت وشهدت شهادة الحق ))
[ الراوي: محمد بن إسحاق - المحدث: ابن كثير
المصدر: البداية والنهاية - الصفحة أو الرقم: 3/97
خلاصة حكم المحدث: مرسل وله شاهد في الحديث الصحيح ]

!!!!!!!!!!!!!!!!!!!!!!!!

طبعا الرواية مش بتأكد صحة موقف الراجل اللي بيتكلم فوق ده ,
على العكس , دي ( بتنسفه ) !!

للأسف معظمنا بقى يسيب ودانه مع طرف واحد ,
طرف الإعلام صاحب الصوت العالي ,
و اللي بيمارس سياسة : خدوهم بالصوت ليغلبوكم
و يقفل سوستة ودانه مع الطرف الآخر ,
و يحكم عليهم من غير ما يعطي لنفسه فرصه يسمعهم و يسيبهم يتكلموا أو يدافعوا عن نفسهم ,
و اختار الطريق الأسهل في الحكم .... سَدُّ الودان ,
و نسي إن في دماغه عقل يقدر يحكم بيه على الأمور
و يميز بين الصح و الخطأ

فإيه المانع إنك تسمع السلفيين دول بيقولوا إيه ؟؟
و لو كان كلامهم غلط ..... عاديهم و اشتم فيهم
و لو كان كلامهم صح ...... خليك منصف معاهم و عادل
فيا صاحب العقل السديد , ذو الرأي الرشيد , 
قبل أن تحكم عليهم ...
اسمع ( منهم ) و لا تكتفي بأن تسمع ( عنهم



و جزاكم الله خيرا
...........................
حقوق النشر للجميع 
............................

فكرة الموضوع مقتبسة من الموضوع التالي :

........................

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ