زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

24 July, 2011

ـ الخيبة العادية , و الخيبة ( التقيلة ) !! ـ




السلام عليكم و رحمة الله و بركاته

طبعا كلنا عارفين إن الخيبة أنواع ,
و أشهر نوعين في الخيبة هما :
الخيبة العادية , و دي أكثر أنواع الخيبة انتشارا
و الخيبة التقيلة , و دي موجودة لكن مش بنفس انتشار الخيبة العادية ,
و أحد المواضيع التي تدخل تحت باب الخيبة العادية هو :
إن الواحد ( يعمل ) الذنب , و ( يستمتع ) بيه لحظات معدودة , و في الآخر ( ياخد سيئات ) كتييير ,

أما لو بحثنا عن نفس الموضوع في باب الخيبة التقيلة فهنلاقيه برضو , لكن بشكل مختلف شوية :
إن الواحد ( ما يعملش ) الذنب , و ( ما يستمتعش ) بيه لا مدة قليلة و لا كتيرة , و في الآخر ( ياخد سيئات ) برضو !!
و هي دي الخيبة التقيلة اللي بنتكلم عنها ,

واحد هيقول لي إزاي يعني آخد سيئات من غير ما أعمل ذنب أصلا ؟؟
بالبلوتوث و لا بالواي فاي ؟؟

هقول له لا كده و لا كده , إنما ( بالنية ) !!

قال رسول الله صلى الله عليه و سلم :
(( إنما الدنيا لأربعة نفر : عبد رزقه الله مالا وعلما فهو يتقي فيه ربه ، ويصل فيه رحمه ، ويعلم لله فيه حقا ، فهذا بأفضل المنازل ،
وعبد رزقه الله تعالى علما ولم يرزقه مالا ، فهو صادق النية ، يقول : لو أن لي مالا ، لعملت بعمل فلان فهو بنيته ، فأجرهما سواء ،
وعبد رزقه الله مالا ، ولم يرزقه علما ، يخبط في ماله بغير علم ، لا يتقي فيه ربه ، ولا يصل فيه رحمه ، ولا يعلم لله فيه حقا ، فهذا بأخبث المنازل ،
وعبد لم يرزقه الله مالا ولا علما فهو يقول : لو أني لي مالا لعملت فيه بعمل فلان ، فهو بنيته ، فوزرهما سواء ))
[ الراوي: أبو كبشة الأنماري - المحدث: الألباني -
المصدر: صحيح الجامع - الصفحة أو الرقم: 3024
خلاصة حكم المحدث: صحيح ]
 
يا عم انت هتجنني ؟؟
إزاي يا عم الحاج آخد ذنب حاجة ما عملتهاش ؟؟
و بعدين هو مش الرسول قال :
(( إن الله كتب الحسنات والسيئات ثم بيّن ذلك ،
فمن هَمَّ بحسنة فلم يعملها كتبها الله له عنده حسنة كاملة ،
فإن هو هم بها وعملها كتبها الله له عنده عشر حسنات إلى سبعمائة ضعف إلى أضعاف كثيرة ،
ومن هم بسيئة فلم يعملها كتبها الله له عنده حسنة كاملة ،
فإن هو هم بها فعملها كتبها الله له سيئة واحدة ))
[ الراوي: عبدالله بن عباس - المحدث: البخاري -
المصدر: صحيح البخاري - الصفحة أو الرقم: 6491
خلاصة حكم المحدث: صحيح ]
 
أهو يا عم , الرسول بنفسه بيقول لك :
لو هم بسيئة و لم يعملها كتبها الله له حسنة , مش سيئة ,
منكم لله , عاوزين تحرموا علينا عيشتنا

هرد عليك و أقول لك طب اقرأ الحديث ده كده :
(( قال الله عز وجل : إذا تحدث عبدي بأن يعمل حسنة فأنا أكتبها له حسنة ما لم يعمل .
فإذا عملها فأنا أكتبها بعشر أمثالها .
وإذا تحدث بأن يعمل سيئة فأنا أغفرها له ما لم يعملها .
فإذا عملها فأنا أكتبها له بمثلها .
وقال رسول الله صلى الله عليه وسلم : قالت الملائكة : رب ذاك عبدك يريد أن يعمل سيئة - وهو أبصر به - فقال : ارقبوه , فإن عملها فاكتبوها له بمثلها , وإن تركها فاكتبوها له حسنة , إنما تركها من جراي .

وقال رسول الله صلى الله عليه وسلم : إذا أحسن أحدكم إسلامه فكل حسنة يعملها تكتب بعشر أمثالها إلى سبعمائة ضعف . وكل سيئة تكتب بمثلها حتى يلقى الله ))
[ الراوي: أبو هريرة - المحدث: مسلم -
المصدر: صحيح مسلم - الصفحة أو الرقم: 129
خلاصة حكم المحدث: صحيح ]

الفرق بين الحديثين صغير جدا ,
لكن الحديث التاني فيه جملة زيادة مهمة قوي و هي :
(( إنما تركها من جراي ))
يعني تركها لأجل الله ,
مش لأجل إنه ماجالوش نفس المرة دي ,
أو إن العين بصيرة و الإيد قصيرة ,
أو الناس شايفينه فما عرفش يعملها ,
أو مش معاه فلوس يعملها ,

كما قال ابن الجوزي في صيد الخاطر يذم أمثال هؤلاء :
" كأنك لا تترك لله إلا ما لا تشتهي أو ما لا تصدق الشهوة فيه , أو ما لا تقدر عليه "
أو أي سبب يخليه ( عاجز ) عن ارتكاب المعصية ,

فقد قال النووي : " من نوى المعصية، وأصر على فعلها ولم يمنعه منها إلا العجز يكون آثماً، وإن لم يفعلها ولم يتكلم بها " .

وقال الحافظ في الفتح : " إنما تكتب الحسنة لمن هم بالسيئة فلم يعملها إذا قصد بتركها وجه الله تعالى وحينئذ فيرجع إلى العمل وهو فعل القلب. "

فالله نزل العاجز المتمني منزلة الفاعل ,
 
ففي الحديث الشهير
عن رسول الله صلى الله عليه وسلم قال: (( إذا التقى المسلمان بسيفيهما، فالقاتل والمقتول في النار.
فقيل: يا رسول الله هذا القاتل، فما بال المقتول؟!
قال: إنه كان حريصاًعلى قتل صاحبه.)) [ رواه البخاري ومسلم ]

فالمقتول لم يقتل صاحبه , بل ( عجز ) عن ذلك , لكنه ( كان حريصا ) على ذلك , فعاقبه الله بنفس جزاء القاتل لأنه تمنى أن يكون مكانه

و هي دي الخيبة التقيلة جدا ,
إن الواحد ما يعملش الذنب , و في نفس الوقت ياخد السيئات بتاعته ,
علشان كده المفروض نتوب من أي ذنب ,
و و ننوي إننا ما نعملش أي ذنب حتى لو قدرنا عليه أو بقى متاح لينا ,

كلمة أخيرة لابد منها ,
لأن فيه واحد الشيطان هيلعب في دماغه دلوقتي و يوهمه إنه نفسه يعمل كل الذنوب اللي في الدنيا ,
و هو هيحاول يستعيذ بالله من الشيطان أحسن ياخد الذنوب دي كلها ,
لو حد جات له الحالة دي يعرف إنه وسواس و لا يلقي إليه بالاً ,
لأن الشيطان شاطر ولو ما عرفش يفسد الناس عن طريق إيقاعهم في المعصية ,
بيحاول يوسوس لهم في الطاعة ,


جزاكم الله خيرا

 و لا تنسوا كاتب الموضوع من دعوة صالحة بظهر الغيب
أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير

و يا حبذا لو تذكر رابط المدونة






أو تذكر أن الموضوع


" منقول من مدونة تظبيط "

ـ

15 July, 2011

انت مش عارف (أنت) مين و لا إيه ؟؟





- بسسسست , انت ... أيوه انت , انت باللي بتبص وراك  , هو فيه حد بيقرأ غيرك ؟؟
جاهز للدور اللي هتقوم بيه و لا لأ ؟؟


- دور ؟؟  دور إيه كفى الله الشر !!؟؟


- الدور اللي ما حدش في الدنيا يقدر يقوم بيه غيرك  !!


- دور إيه ده اللي ما حدش يقدر يقوم بيه غيري ؟؟

أنا ما حدش قال لي حاجة  !!

على فكرة لو انت طالب جيمس بوند فيسعدني أن أقول لك : النمرة غلط  ..


- جيمس بوند مين ؟؟ أنا طالبك انت , هو انت مش مصدق إن ليك دور ما حدش يقدر يقوم بيه في الدنيا غيرك و لا إيه  ؟؟


- مممم , انت شكلك عبيط و لا إيه ؟؟ طب فكرني يا سيدي  ,


- أنا ؟؟ أنا طبعا ما أعرفش ,

انت اللي لازم تكون ( عارف ) , أو ( بتحاول تعرف ) الدور اللي ربنا خلقك ليه في الدنيا , و ما خلقش حد تاني غيرك ليه ,
أصل ربنا ما خلقش حد كده و خلاص ,
ربنا خالق كل واحد و ليه دور ما حدش يقدر يقوم بيه غيره هو بس ,


- يا عم خضيتني  , دور مين بس يا عم الحاج , خلي الطابق مستور  ,
ده أنا شخص عادي جدا زي أي حد ,


- ما تقولش على نفسك كده , طالما ربنا خلقك يبقى أكيد ليك لزمة , و ليك دور ما حدش يقدر يقوم بيه غيرك , و لو كان مالكش لزمة ما كانش ربنا خلقك , لأنه لا يخلق شيئا عبثا ,


- يا عم ماشي , ربنا ما بيخلقش شيء عبثا , عارفين و الله , لكن أنا ما أنفعش لدور مميز و لا للحاجات دي , أصلك ما تعرفنيش  ,


- شكلك ما تعرفش المنفلوطي بيقول إيه  ؟؟


- بيقول إيه إن شاء الله  ؟؟


- بيقول : " من العجز أن يزدري المرء نفسه فلا يقيم لها وزناً،
وأن ينظر إلى من فوقه من الناس نظر الحيوان الأعجم إلى الحيوان الناطق،
وعندي أن من يخطئ في تقدير قيمته مستعلياً خير ممن يخطئ في تقديرها متدنياً ؛
فإن الرجل إذا صغرت نفسه في عين نفسه يأبى لها من أعماله وأطواره إلا ما يشاكل منزلتها عنده؛
فتراه صغيراً في علمه، صغيراً في أدبه، صغيراً في مروءته وهمته، صغيراً في ميوله وأهوائه، صغيراً في جميع شؤونه وأعماله؛
فإن عظمت نفسه عظم بجانبها كل ما كان صغيراً في جانب النفس الصغيرة . "


- كلام جميل و كلام ( مأعول ) ما أقدرش أقول حاجة عنه , لكن أنا ليا سوابق  في الفشل  , سوابق كتير تخليني ما أساويش حاجة بالفعل , و تخلي أي حد ليه قيمة أكثر مني ,


- يا عم ما تقولش كده , شكلك سمعتش قصة الـ200 جنيه ؟؟


- إحنا هنقضيها منفلوطي و قصص ؟؟ ما عندكش أفلام  وثائقية بالمرة ؟؟

ارغي يا سيدي و سمعنا ..


- كان يا ماكان , في أحد المحاضرات
رفع المحاضر  ورقة بـ200 جنيه ..
وقال: من يريد هذه ؟
رفع معظم الموجودين أيديهم
وقال لهم : سوف أعطيها لواحد منكم لكن بعد ما أفعل هذا :
فقام بكرمشة  الورقة  ثم سألهم :
من يريدها ؟؟؟
ومازالت الايدي مرتفعة ..
حسنا .. ماذا لو فعلت هذا ..
فرمي النقود على الارض وقام بدعسها بحذائه من ثم رفعها وهي متسخة
ومليئة بالتراب !!
وسألهم : من منكم مازال يريدها ؟؟
فارتفعت الايدي مرة ثالثة ..
فقال : الان يجب أن تكونوا تعلمتم درسا قيماً ..
مهما فعلت بالنقود فمازلتم تريدونها لانها لم تنقص في قيمتها فهي مازالت 200 جنيه
في مرات عديدة من حياتنا نسقط على الأرض وننكمش على أنفسنا ونتراجع بسبب القرارات
التي اتخذناها أو بسبب الظروف التي تحيط بنا ، فنشعر حينها بأنه لا قيمة لنا ..
مهما حصل فانت لا تفقدك قيمتك ..
و ابقوا قابلوني لو حد أخد الـ200 جنيه 


- مممممممممممممم ............




- انت لسه محتقر نفسك ليه ؟؟ ربنا بيقول { و لقد كرمنا بني آدم } , و انت من بني آدم , مش عاوز تكرم نفسك ليه  ؟؟
مش مصدق ليه إن ربنا خلقك انت لمهمة ما حدش غيرك يقدر يقوم بيها ,

حتى لو انت شايف حياتك بسيطة , لكن ما حدش كان يقدر يعيشها غيرك ,
صدقني بجد , انت ليك دور خاص بيك في الدنيا ,

دور ما حدش غيرك يقدر يقوم بيه حتى جيمس بوند
فاعرف قيمة نفسك , و لا تحقر نفسك ,

فـ( إن نفس المؤمن غالية , و بعضهم يبيعها برخص ) ....


















07 July, 2011

ـ إيه دخل الدين بس ؟؟ ـ

السلام عليكم و رحمة الله و بركاته ,


النهاردة إن شاء الله عاوزين نتكلم عن عادة مشهورة عند ( الإسلاميين ) ,
و هي إن كل ما حد يتكلم في موضوع يقولوا له :
" قال الله و قال الرسول " , " أصل الإسلام بيقول كذا " , " أصل الدين بيقول كده "

حتى لو الموضوع مش ديني خالص ,
كأن يكون في السياسة مثلا أو الاقتصاد أو أي حاجة تانية عادية في الدنيا
يعني بيحاولوا يدخلوا الإسلام في كل حاجة ,


لكن بعد الفحص و التمحيص ,
اتضح إن دي مش حاجة في الإسلاميين ,
لأ
دي حاجة في الإسلام نفسه !!
و بيسموها في الكتب : شمولية الإسلام
يعني إن ( الإسلام شامل كل حاجة )

زي ما ربنا بيقول :
{ قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ } [ الأنعام : 162 ]


يعني الإسلام بينظم كل حاجة في الحياة ,
سواء كانت دينية : { صلاتي و نسكي } , أو دنيوية : { محياي }
على عكس الأديان التانية اللي بتنظم أمور العبادة فقط ,

تظبيط مدونة تظبيط
و على فكرة حكاية شمولية الإسلام دي كانت غايظة غير المسلمين من أيام زمااااان برضو
فالمشركين مرة جاءوا لسيدنا سلمان الفارسي يقولوا له هو محمد ده عمال يكلمكم على كل كبيرة و صغيرة ؟
حتى آداب دخول الخلاء ؟؟

" قد علمكم نبيكم صلى الله عليه وسلم كل شيء ؟ حتى الخراءة ؟
فقال : أجل , لقد نهانا أن نستقبل القبلة لغائط أو بول ,
أو أن نستنجي باليمين ,
أو أن نستنجي بأقل من ثلاثة أحجار ,
أو أن نستنجي برجيع أو بعظم ."
[ الراوي: سلمان الفارسي -المحدث: مسلم -
المصدر: صحيح مسلم - الصفحة أو الرقم: 262
خلاصة حكم المحدث: صحيح ]



يعني صلى الله عليه و سلم كان بيعلمهم كل حاجة ,
لدرجة تعليمهم آداب دخول الخلاء ,

علشان كده سيدنا أبو ذر لما يقول :
" تركنا رسول الله صلى الله عليه وسلم وما طائر يقلب جناحيه في الهواء إلا وهو يذكرنا منه علما "
لما يقول إن مافيش حاجة إلا و الرسول صلى الله عليه و سلم كلمنا عليها ,
حتى الطير اللي بيطير في الجو
يبقى مش بيبالغ ,


و موضوع شمولية الإسلام ده عامل أزمة عند العلمانيين و الليبراليين و أصحاب الأفكار الغربية ,
هم عاوزين يخلوا الدين يختص بالعبادة فقط و مالوش دعوة بالحكم و لا السياسة و لا الأحوال الشخصية و غيرها ,
لأن في أوروبا - منشأ الأفكار دي - الدين في الكنائس بس , و مالوش دعوة بباقي مناحي الحياة ,
لكن الحاجة اللي ما أخدوش بالهم منها إن الإسلام مش زي النصرانية ,

هم لما يخلوا دينهم في الكنائس بس , يبقوا مش بيخالفوا دينهم
إنما احنا لو خليناه جوه المساجد بس يبقى خالفنا ديننا اللي بيقول لنا لازم يبقى في جميع مناحي الحياة ,


هم لما يألفوا قوانين من دماغهم يحكموا نفسهم بيها , يبقوا مش بيخالفوا دينهم ,
لأن دينهم لم يعطِ لهم قوانين ليحكموا نفسهم بيها
إنما إحنا لما نألف قوانين وضعية نحكم نفسنا بيها ,
نبقى بنخالف ديننا , لأن ديننا عامل لنا قوانين نمشي عليها

فإحنا بنقول للجماعة أصحاب الأفكار الغربية : يا جماعة افهموووونا ,

احنا لو طبقنا العلمانية بتاعتكم و فصلنا الدين عن الحياة نبقى بنخالف ديننا و بنرتكب محرم
إنما الأديان الأخرى لو فصلتها عن الحياة مافيش فيها أي مشكلة

و لو طبقنا الليبرالية بتاعتكم و خلينا حرية الفرد مطلقة و غير مقيدة بشرع أو دين نبقى بنخالف ديننا
إنما الأديان الأخرى مش فارقة معاها

لأن ديننا زي ما قلنا مختلف عن الأديان التانية في إنه ( داخل في كل حاجة ) ....
شاااااااااااااامل .

{ قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ }

..................
حقوق النشر للجميع
...................

سؤال مالوش دعوة بالموضوع 
هل تؤيد أن تكون التعليقات في المدونة بحسابك في الفيس بوك ؟؟
و لا نسيب التعليق بحسابات بلوجر و غير معرف ؟؟

.

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ