زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

31 August, 2011

ـ سوريا .... ( لقطة ) ـ


عاد لمنزله بعد يومٍ طويل ,
أراد أن يعلم آخر أخبار العالم ,

جلس أمام التلفاز يتابع أحد القنوات الإخبارية ,
أخذ يقرأ شريط الأخبار :

- قصف إسرائيلي على غزة يخلف 4 قتلى
- غارة أمريكية بدون طيار تقتل 5 أشخاص في باكستان
- سقوط 8 محتجين (((سوريين))) برصاص الجيش (((السوري))) !!!

.......

اللهم انصر إخواننا المسلمين في سوريا و ليبيا و فلسطين و اليمن و العراق و أفغانستان و في كل مكان يا رب العالمين


11 August, 2011

قلقان و خايف من بكره ؟؟


السلام عليكم و رحمة الله وبركاته

تخيل واحد يعرفك اتصل بيك بالتليفون و كان عاوزك ضروري ,
علشان يحكي لك المشكلة التالية و عاوز رأيك فيها :
" أنا لي واحد صاحبي من عشرين سنة ,
جمايله مغرقاني , و مواقفه الرجولية معايا في كل حاجة ,
لكن المشكلة إني ( مقلّق ) منه حبتين ,
مش مطمن من ناحيته ,
حاسس إنه ( مرقّد لي ) على مصيبة في المستقبل ,
رغم إني ما شفتش منه غير كل خير على مدى 20 سنة "

قبل ما أسألك عن رأيك ,
عاوز أسألك عن صاحبه لو عرف الكلام اللي هو بيقوله ,
أكيد هيزعل منه , و يقول بعد كل العمر ده و لسه شاكك فيا ؟؟
و ممكن يتنرفز شوية و يقول , بقى هو مفكرني كده ؟؟
طب أنا هوريه بقى الوش التاني علشان ما أطلعوش غلطان ,
و دلوقتي , عاوز أعرف ردك عليه هيكون إيه ؟؟
بصراحة لو أنا , مش هعرف أرد عليه ,
لكن هقول في نفسي : إيه الراجل الغريب ده ؟؟
الراجل بيحسن إليك طوال 20 سنة , و ما شفتش منه حاجة وحشة ,
قلقان منه ليه ؟؟
ده انت غريب يا أخي !!
لكن لو دققت و تفحصت و تمحصت ,
هتلاقي فيه ناس أغرب منه
.
.
.
.
.
.
.
 
اللي قلقانين من المستقبل , و من قضاء ربنا
دول ناس من يوم ما اتولدوا و هم عايشين في جمايل و نعم ربنا ,
بل حتى من قبل ما يتولدوا

زي ابن القيم ما بيقول :
" فمن ذا الذي شفع لك في الأزل حيث لم تكن شيئاً مذكوراً ؟؟
حتى سماك باسم الإسلام، و وسمك بعلامة الإيمان،
و جعلك من أهل قبضة اليمين،
و أقطعك في ذلك الغيب عمالات المؤمنين ؟؟ "

صحيح , هو حد كان ( اتوسط لك ) عند ربنا قبل ما يخلقك إنه يخلقك مسلم ؟؟
و إنه بعد ما يخلقك يرزقك أبوين بدل ما تبقى مشرد في الشوارع ,
و يكبرك و يعلمك و يصرف عليك و .....
يعني ما شفتش منه غير كل خير أهه ,
ليه تقلق منه ؟؟
ده حتى يبقى عيب ,
يبقى أكنك بتشكك في كرمه ,
و بتتهمه بالمكر بك , تعالى الله عن ذلك ,

علشان كده الرسول صلى الله عليه و سلم قال في الحديث القدسي :
(( قال الله جل وعلا : أنا عند ظن عبدي بي ،
إن ظن خيرا فله ، وإن ظن شرا فله ))
[ الراوي : واثلة بن الأسقع الليثي - المحدث: الألباني -
المصدر: صحيح الترغيب - الصفحة أو الرقم: 3386
خلاصة حكم المحدث: صحيح ]

لو عاوز ربنا يكرمك , ظن فيه إنه هيكرمك
عاوزه ما يكرمكش , ظن فيه إنه مش هيكرمك


و قد فطن ابن الجوزي رحمه الله لهذا المعنى فقال : 
" بلغني عن بعض الكرماء أن رجلاً سأله فقال : أنا الذي أحسنت إلي يوم كذا و كذا ، فقال : مرحباً بمن يتوسل إلينا بنا ، ثم قضى حاجته .
   فأخذت من ذلك إشارة ، فناجيت بها فقلت :

أنت الذي هديته من زمن الطفولة ، 
و حفظته من الضلال ، و عصمته عن كثير من الذنوب ، 
و قمت برزقه من غير تعب منه ، و لا ذل للخلق بالسؤال ، 
و حاميت عنه الأعداء ، فلم يقصده جبار ، 
و إن ذهبت أعد لم أقدر على إحصاء عشير العشير و إن تعدوا نعمة الله لا تحصوها .
فيا محسناً إليّ قبل أن أطلب
لا تخيب أملي فيك و أنا أطلب ,
   فبإنعامك المتقدم أتوسل إليك
"

[صيد الخاطر بتصرف]
و هنا هتلاقي واحد بيقول لك أنا عارف إن ربنا رزقني و نعمه مغرقاني
و إن رزقي مكتوب من قبل ما أتولد و ......
و عارف إني زي مرزوق رزق عبد الرزّاق
و بحاول أظن في الله خيرا إنه هيرزقني و يسترني و ...
لكن برضه قلقان , و مش عارف أشيل القلق ده من قلبي !!
 
هقول له ده بقى يبقى شوشو !!
الشيطان عاوز يفسد على المسلم دنياه و آخرته بأي طريقة ,
يفسد آخرته بأن يجعله يسيء ظنه بربه
و يفسد دنياه إنه يخليه عايش قلقان على طول ,
و دي حاجة ربنا قال لنا عليها,
قال تعالى :
{ الشَّيْطَانُ يَعِدُكُمُ الْفَقْرَ وَيَأْمُرُكُمْ بِالْفَحْشَاءِ وَاللَّهُ يَعِدُكُمْ مَغْفِرَةً مِنْهُ وَفَضْلا وَاللَّهُ وَاسِعٌ عَلِيمٌ } [البقرة-268]

فشوف انت بقى ,
الشيطان بيوعدك بالفقر ,

و ربنا بيوعدك بالفضل ,

تصدق وعد مين ؟؟


علشان كده سيدنا عبد الله بن مسعود كان بيقول :
(( إن للشيطان لُمَّة بابن آدم ، وللمَلَك لُمَّة :
فأما لمة الشيطان : فإيعاد بالشر ، وتكذيب بالحق ،
وأما لمة الملك : فإيعاد بالخير ، وتصديق بالحق ،
فمن وجد ذلك ، فليعلم أنه من الله ، فليحمد الله ،
ومن وجد الأخرى ، فليتعوذ بالله من الشيطان الرجيم ،
ثم قرأ : { الشيطان يعدكم الفقر ويأمركم بالفحشاء } الآية ))
[ الراوي : عبدالله بن مسعود - المحدث:الألباني -
المصدر: صحيح الترمذي - الصفحة أو الرقم: 2988
خلاصة حكم المحدث:صحيح ]

يبقى الحل إنك طالما انت عارف إن ربنا كاتب لك رزقك من قبل ما يخلقك ,
و إنه لم يخلقك ليعذبك , و لم يبتليك ليهلكك و ......
يعني عارف نظري و مش عارف تطبق الكلام ده في حياتك ,
يبقى تعرف إن القلق اللي عندك ده مش حقيقي , و إنه من الشيطان ,
فتستعيذ بالله منه و تحاول أن تطرده عن قلبك ,
و تستعين على ذلك بتذكر الآيات و الأحاديث و أقوال السلف التي ذكرناها ,
و و الدعااااااء ألا يجعل الله الدنيا أكبر همك ,

و ياريت لو تشاهد الفيديوهين دول , مش هتندم إن شاء الله :
http://www.youtube.com/watch?v=rfiRw7Pi_2g
http://www.youtube.com/watch?v=iU7Sl_MAuaU

نسأل الله أن يشفِ أمراض قلوبنا

و بالله عليكم ادعوا لكاتب الموضوع :
اللهم أعذه من الهم و الحزن , و أعذه من العجز و الكسل ,
من القلب بالله عليكم و ما تنسوش إن المَلَك هيؤمن على دعائكم و يدعو لك بمثل


  >> حقوق النشر للجميع <<
لو رأيت أنه يستحق النشر بشرط عدم التحريف أو التغيير
و يا حبذا لو تذكر رابط المدونة







أو تذكر أن الموضوع

" منقول من مدونة تظبيط "


ـ

08 August, 2011

ـ هارد لك , رمضان الجاي بقى !! ـ

ملحوظة : الموضوع معاد نشره
---------------------------


السلام عليكم و رحمة الله ,


كل سنة و انتوا طيبين ,
بكره العيد إن شاء الله
و العيد فرحة , هييييييه ,




رمضان خلص خلاص ,
و انفض السوق ,
و قد ربح فيه من ربح , و خسر فيه من خسر ,
و اللي استغل رمضان كويس و اجتهد فيه هيكون من المفلحين إن شاء الله ,
و اللي كسّل و ( أنتخ ) خسر كتير قوي ,

كما أمّن الرسول -صلى الله عليه و سلم- على دعاء جبريل - عليه السلام - :
(( رَغِمَ أنف امريءٍ أدرك رمضان فلم يُغفر له ))
[الراوي: أنس بن مالك - المحدث: الألباني -
المصدر: فضل الصلاة - الصفحة أو الرقم: 15
خلاصة حكم المحدث: صحيح بشواهده]

بس بصراحة الواحد ندمان حبتين ... لأ تلاته و عشر حبات كمان ,
الواحد ما كانش بيصلي كل الفروض في المسجد ,
و كان ساعات بيكسل يروح يصلي التراويح ,
و يعني كان بيتفرج على التلفزيون كتير ,
و ........
بس خلاص بقى , هارد لك ,
رمضان الجاي بقى نبقى نعوضها إن شاء الله,
بس يا ترى مين يعيش !!

.
.
.
.
.
.
.


طبعا الكلام اللي فوق ده مش حقيقي دلوقتي , لأن رمضان لسه ما خلصش ,




لكنه غالبا بيبقى حقيقي في أواخر رمضان ,

تلاقي الواحد مننا في أول رمضان ناوي يختم القرآن حوالي خمس أو ست مرات
و يصلي كل الصلوات جماعة في المسجد ,
و طبعا التراويح في مسجد بيقرأ جزء في الليلة

بس المشكلة إنه أكل كتير النهاردة فمش قادر يصلي التراويح
و الدنيا حر فمش قادر يطلع يصلي الظهر و العصر في المسجد
و مش عارف يلاقي وقت يقرأ في قرآن ,

محتاجين شوية وقت بس علشان نتأقلم !!

و دخلنا في نص رمضان و لسه مش عارفين نظبط الأداء
بس إن شاء الله هيتظبط في العشرة الأواخر إن شاء الله ,

و دخلت العشرة الأواخر و برضو لسه بنسخن
بص , الكسل ده مش نافع , آخر كلام بقى :

احنا نركز على الليالي الفردية علشان نتحرى ليلة القدر ,
و تلاقي رمضان معانا صفصف على ليلة 27 سواء كانت ليلة القدر أو لأ ,
و كل سنة و انتوا طيبين ,



و في الآخر رمضان بيخلص من غير ما نستغله ,
و نرجع نقول الكلام اللي في الأول ده ,
و لا حول و لا قوة إلا بالله .



ربنا يهدينا و يتوب علينا و يوفقنا لما يحب و يرضى ,
و يعيننا على ذكره و شكره و حسن عبادته

و كل عام أنتم بخير


و جزاكم الله خيرا

و لا تنسوا كاتب الموضوع من دعوة صالحة بظهر الغيب
أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر بشرط عدم التحريف أو التغيير


و يا حبذا لو تذكر رابط المدونة





أو تذكر أن الموضوع

" منقول من مدونة تظبيط "

ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ