زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

23 September, 2011

حصريا : جميع أخطاء الشيوخ في رابط واحد


كان يا مكان , كان فيه شلّة اسمها ( شلّة الأُنس ) ,
كان أعضاء شلة الأنس دول واقفين على الكورنيش قدام البحر ,
و فجأة لقوا سفينة بتغرق في البحر قدامهم ,
و الناس كلهم اتخضوا لما لقوا السفينة بتغرق ,
ففيه ناس ما بتعرفش تعوم قعدوا يدعوا إن ربنا ينجي ركاب السفينة ,
و فيه ناس بتعرف تعوم نطت في البحر علشان ينقذوهم ,
أما أعضاء شلة الأنس دول قعدوا يتفرجوا على الناس اللي قفزت في البحر و يتكلموا عليهم :
- شايفين الراجل اللي هناك ده , المفروض ما يثنيش ركبته و هو بيعوم ,
- شايفين الراجل التاني ده , المفروض لما يرفع دراعه اليمين يبص لناحية الشمال ,
- و لا الراجل اللي هناك ده , مش بيجدف برجليه كويس ,
- يا عم الناس دي بتعوم غلط خالص ..

قعدوا ينتقدوا أخطاء السباحين و خلاص , إنما يعملوا حاجة , لأ !!

و توتة توتة خلصت الحدوتة !!

لكنها بتتكرر كل يوم , و بتتكرر من زمااااااااااان ,
من أيام الرسول صلى الله عليه و سلم , لما مرة دعا الناس إلى الصدقة ,
فكان المنافقين قاعدين ,
اللي بيتصدق بمبلغ كبير يقولوا عليه ده بيتصدق رياءاً و سمعة ,
و اللي بيتصدق بمبلغ قليل , يقولوا هو ربنا محتاج منه الشوية اللي هو بيتصدق بيهم دول ؟؟

يعني هم لم يتصدقوا بالقليل و لا بالكثير ,
و كل اللي فالحين فيه ينتقدوا الناس و يلمزوهم و خلاص
{ الَّذِينَ يَلْمِزُونَ الْمُطَّوِّعِينَ مِنَ الْمُؤْمِنِينَ فِي الصَّدَقَاتِ وَالَّذِينَ لا يَجِدُونَ إِلا جُهْدَهُمْ فَيَسْخَرُونَ مِنْهُمْ سَخِرَ اللَّهُ مِنْهُمْ وَلَهُمْ عَذَابٌ أَلِيمٌ } [التوبة-79]


و طبعا في زماننا هذا تجدهم موجودين بكثرة ,

تلاقي اللي ناشر فيديو عنوانه : أخطاء الشيخ فلان ,
و اللي بيشير فيديو عنوانه : الشيخ فلان الجاهل ,
و غيرها الكثير

و الغريب في الأمر إنك لو شاهدت تلك الفيديوهات التي نشروها ,
تجدها تبين جهل ناشريها بما يقول الشيخ
و إنهم مش فاهمين قصد الشيخ أصلا

و حتى بفرض إن الشيخ أخطأ و هو بيحاول أن يساعد الناس ,
مش أحسن منك يا اللي قاعد مش بتساعد حد و عمال تتفرج و خلاص ؟؟
لو شايفه أخطأ , علَم انت الناس و صحح لهم أخطاؤه

بدل ما تعمل زي بتوع شلة الأنس ,
عمالين ينتقدوا الناس اللي نزلوا يساعدوا الغرقى ,
و هم :
- لم يساعدوا الغرقى
- لم يساعدوا الناس اللي راحت تنقذ الغرقى
- إنما كمان قعدوا يتريقوا عليهم !!

يبقى انت يا اللي بتتهم الشيوخ اللي بيحاولوا يساعدوا الناس بالجهل و الخطأ :
- ما بذلتش أي مجهود في تعليم الناس أمور دينهم أصلا ,
- ما ساعدتش الشيوخ دول في إنقاذ الناس و حاولت تصحح لهم خطأهم - إن وُجد - بالموعظة الحسنة ,
- قعدت تسب في الشيوخ و تسبهم و تتهمهم بالجهل


و بعدين أصلا يعني أصلا إذا أخطأ العالم خطأً حقيقيا لا يجب أن نحكم عليه بالإعدام ,
لأنه كما قال الذهبي :
" ولو أنَّ كلَّ من أخطأ في اجتهاده ـ مع صحَّة إيمانه وتوخِّيه لاتباع الحقِّ ـ أهدرناه وبدَّعناه،
لقلَّ مَن يسلم من الأئمَّة معنا، رحم الله الجميعَ بمنِّه وكرمه." [السير (14/376).]

لأن الشيخ ده أولا و أخيرا بشر و غير معصوم
كما قال ابن رجب الحنبلي :
" ويأبى الله العصمة لكتاب غير كتابه ،
والمنصف من اغتفر قليل خطأ المرء في كثير من صوابه ". [القواعد (ص:3).]

يبقى انت تغفر له الخطأ ده , لكن طبعا لا تطيعه فيه طالما انت متأكد إنه خطأ ,
زي ما الإمام الذهبي قال :
" ثم إن الكبير من أئمَّة العلم إذا كثر صوابُه ، وعُلم تحرِّيه للحقِّ، واتَّسع علمه، وظهر ذكاؤه، وعُرف صلاحُه وورعه واتِّباعه،
يُغفر له زلَلُـه، ولا نضلِّله ونطرحه، وننسى محاسنه،
نعم ! ولا نقتدي به في بدعته وخطئه، ونرجو له التوبة من ذلك ". [ سير أعلام النبلاء (5/271).]

يبقى بدل ما تعين الشيطان عليه و تقعد تشتم فيه ,
ادع الله أن يريه الصواب و يتوب عليه من الخطأ

قال سعيد بن المسيب : " ليس من عالم ولا شريف ولا ذي فضل إلاَّ وفيه عيب،
ولكن مَن كان فضلُه أكثرَ من نقصه ذهب نقصه لفضله،
كما أنَّه من غلب عليه نقصانه ذهب فضله. "
[ جامع بيان العلم وفضله لابن عبد البر (2/48).]

فنصيحة لمن يتتبع أخطاء العلماء و ينشرها ,
- إما أن تحاول أن تفعل مثلهم و تدعو إلى الله أنت بالعلم ,
- أو تصحح لهم أخطاءهم بالحسنى
- أو على الأقل تدعو الله أن يسددهم و يهديهم للحق

نسأل الله أن يوفقنا جميعا للحق ,
و أن يرينا الحق حقا و يرزقنا اتباعه
و يرينا الباطل باطلا و يرزقنا اجتنابه

-------------------

و بالله عليكم ادعوا لكاتب الموضوع :
اللهم أعذه من الهم و الحزن , و أعذه من العجز و الكسل ,
من القلب بالله عليكم و ما تنسوش إن المَلَك هيؤمن على دعائكم و يدعو لك بمثل

>> حقوق النشر للجميع <<
لو رأيت أنه يستحق النشر بشرط عدم التحريف أو التغيير

و يا حبذا لو تذكر رابط المدونة
tazbee6.blogspot.com






أو تذكر أن الموضوع
" منقول من مدونة تظبيط "


ـ

8 comments:

  1. ما شاء الله ، كلام جميل والله ..

    ومااااااااااا أكثرهم !!!

    اليوتيوب مليان .. وهكذا كل واحد عاوز يمشي بمزاجه يخطئ الغير ..

    ما آلمني أكثر ، الآية الكريمة " الذين يلمزون المطوعين من المؤمنين ... "

    كلنا نقع في هذا الخطأ .. الظن السئ ، عافنا اللع وعفا عنا وعن إخوتنا ..


    جزاكم الله خيرا يا باشمهندس ، وأعاذك من الهم و الحزن , و أعاذك من العجز و الكسل

    ReplyDelete
  2. الـــلهم أعذه من الهم و الحزن
    و أعـــــذه من العجز و الكسل
    اللهم آمـــين يارب العالمين
    جزاكم الله خيرا ياباشمهندز
    ونفعنا وأياكم بما نقول
    ونسمع من الصالح من
    القول والفعل

    ReplyDelete
  3. طارق الطيب سليمSeptember 26, 2011 at 4:37 PM

    موضوع جميل جدا
    جزاك الله خيرا

    الكثير يهاجم اما عن جهل او لغرض فى نفسه او لسوء فهم وقد التبس عليه الامر

    اسمح لى اخ ان اقوم بنشر هذا الموضوع فى الجروبات الخاصة بى على الفيس بوك ( مع ذكر المصدر ووضع الرابط :) )
    نظرا لقيمتته واهميته

    ReplyDelete
  4. زهـــــراء :

    جزاناو إياكم
    فعلا اليوتيوب مليان ,
    و يمكن هو السبب في إني أكتب الموضوع ده لما لقيت واحد زميلي عامل شير لفيديو بيتهم فيه الشيخ أبو إسحاق بالجهل
    ربنا يهدينا و يتوب علينا

    ReplyDelete
  5. norahaty :
    جزانا و إياكم يا خالة نور
    نسأل الله أن يستجيب لدعائكم لنا
    و يجازيكم بمثل

    ReplyDelete
  6. موناليزا :
    جزاكم الله خيرا

    ReplyDelete
  7. طارق الطيب سليم :

    جزانا و إياكم أخي طارق
    فعلا عندك حق ,
    معظم المهاجمين إما جهال أو يعلمون و يُشغِّبون
    نسأل الله أن يهدينا و يتوب علينا

    و النشر من غير إذن يا أستاذ طارق
    حقوق النشر للجميع
    جزاكم الله خيرا

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ