ـ كسلان عاوز يتوب !! ـ

كان يا مكان , في ( حاضر ) الدهر و الزمان
كان فيه واحد كسلان ,
كان نفسه بقى يتوب , و يبطل معاصي و ذنوب ,
فراح لشيخ يستشيره :

---------------


- كسلان : أنا مشكلتي يا شيخ إني مش قادر أبطل أغاني ,
ليل و نهار على التليفزيون و الموبايل و الكمبيوتر ,
مش عارف أعمل إيه ؟؟


- الشيخ : خد قرار و امسحها من الموبايل و الكمبيوتر ,
و احذف قنوات الأغاني من التليفزيون ..


- كسلان في سِرُّه : هو أنا لسه هقعد أنقي قنوات الأغاني من الدش و أحذفها ,
و بعدين أقعد أنقي الكمبيوتر و الموبايل من الأغاني و أمسحها ,
أنا هخليهم وخلاص و أبقى أمسحهم بعدين لما ربنا يسهل


---------------


- كسلان : أنا مشكلتي في فتنة النساء ,
و ما أقدرش أتجوز علشان مافيش شقة و لا شبكة و لا عفش و لا ....


- الشيخ : خلاص , اعمل زي ما الرسول قال و صوم ..


- كسلان في سِرُّه : أصوم ؟؟ بس المشكلة إن الواحد بيحب يشرب حاجة ساقعة و هو بره البيت ,
و بعدين بحب أنأنأ أي حاجة كده طول النهار ,
ربنا يهدينا إن شاء الله ..


---------------


- كسلان : أنا مش قادر أصلي الفجر خالص ,
ما بقدرش أصحى من النوم ,

- الشيخ : حاول تنام بدري و اظبط المنبه و حطه بعيد عن إيدك علشان ما تطفيهوش و انت نايم

- كسلان في سِرُّه : أنام بدري ؟؟ ده الفيلم بيخلص الساعة واحدة ,
و بعدين الخروجات و الفسح بتبقى بالليل كلها ,
ربنا يسهل  ..


---------------

- كسلان : بص يا شيخ , أنا مش عارف أعمل حاجة من اللي انت قلت لي عليهم خالص ,
أنا نفسي ربنا يهديني و خلاص ,
بس مش لازم يعني أتعب و أجاهد نفسي و كده ,
ما ألاقيش عندك حل ؟؟

- الشيخ : ممممممم أكيد فيه حل ,
فيه حاجة اسمها ( أمبول التوبة ) ابقى تعالى لي أديلك واحد ,
و تاخده في أي حقنه و هتتوب و تبقى تمام من غير أي مجهود


- كسلان في سِرُّه : هو لازم حقن يعني ؟؟ أصلها بتوجعني ,
أنا عاوز حاجة أسهل ,
يا سلام لو فيه منها أقراص أو دوا شرب ,


---------------



" إن النعيم لا يُدرك بالنعيم ,
والنار تُحرِق فتُنضِج ,
ودون الشهد إبر النحل ,
ومن رام اللآلئ زج بنفسه البحر ,
بقدر العنا تنال المنى ,
ولا يُدرك الشرف إلا بالكَلَف ,
و لن يُدرِك البطَّال منازل الأبطال ,
ولا يُدرِك السادة من لزم الوسادة ,
لولا المشقة ساد الناس كلهم *** الجود يُفقر والإقدام قَتَّال "
[الشيخ علي القرني - شريط " النعيم لا يدرك بالنعيم" ]


قال رسول الله صلى الله عليه و سلم :
(( من خاف أدلج ، ومن أدلج بلغ المنزل ،
ألا إن سلعة الله غالية ، ألا إن سلعة الله الجنة ))
[ الراوي: أبو هريرة - المحدث: الألباني -
المصدر: صحيح الترمذي - الصفحة أو الرقم: 2450
خلاصة حكم المحدث: صحيح ]


و قال تعالى :
{ وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ } [العنكبوت:69]


----------------

نسأل الله أن يهدينا و أن يتوب علينا ,
و يرزقنا العمل بما نقول ,
و أن يرزقنا همةً عالية في الخير ,
و أن يدخلنا الجنة و يجرنا من النار ..

جزاكم الله خيرا

....