زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

31 October, 2010

ـ الدقون و المنقبات ؟؟ أعوذ بالله !! ـ






المكان : قهوة ( طرّيها الناس لبعضيها) للدخان النضيف





جلس المِعلّم ( حِشْمت ) مع الاسطى ( كاظم ) يتبادلان أطراف الـ(تشات)

- حشمت : اسكت يا كاظم يا خويا , ده العالم بتوع الدقون دول طلعوا تايواني خالص ,
لا , تايواني مين ؟؟ دول طلعوا صيني

- كاظم : ليه بس كفى الله الشر , حد فيهم داس لك على ديل ؟؟

- حشمت : انت هتهزر يا ( تيييييييييت ) ؟؟

- كاظم : لا أبدا , بس الكلمة زنقتني , اتفضل ارغي يا برنس .

- حشمت : يااااااه , اقول لك إيه بس و لا إيه ؟؟
( ديك ) النهار كنت بشتري ( فرخة ) مشوية من عند واحد منهم ,
اداهالي من غير رجول و لا جناحات

و مرة راكب مع سواق (موكروباظ) منهم و ماكانش معايا فكة
راح واخد الفلوس و ضرب على الباقي

- كاظم : ده انت مصيبتك صغيرة يا حشمت يا أخويا ,
ده أنا أعرف واحد كان كان داخل شريك في ( مزرعة مكرونة ) مع واحد دقنه طول كده ,
و المشروع خسر و نصب على جارنا في نصيبه بعد ما صفوا الشركة

- حشمت : ده غير المنقبات اللي تلاقيها حاطه كحل ,
و لابسة عباية ضيقة و كلها ترتر بيلمع
و اللي صوتها في الشارع قد كده , و تتكلم مع ده و تهزر مع ده

- كاظم : يا عم دول عالم أعوذ بالله , و يقولوا لك قال الله و قال الرسول ,
طب ما يعملوا الأول بالكلام اللي بيقولوه ده

- حشمت : سيبك انت يا عم , هو الواد حمامة مش مشغل (التي في ) ليه ؟؟


و هنا .............................


ظهر حمامة القهوجي و شغل التلفزيون على القناة الفضائية الأمريكية
و كان شغال برنامج ( صباح القشطة يا أمريكا ) في فقرة ( على المصطبة )
و كان فيها التقرير التالي :

المكان : بار ( هات القزازة و اقعد لاعبني ) لجميع أنواع الحاجات اللي بتتشرب

جلس مستر ( مارك ) و مستر ( جاك ) يحتسيان الخمر

- مارك : شفت يا جاك الجماعة المسلمين ,
دول كلهم إرهابيين و بيفجروا نفسهم في جنودنا و حتى في بلادهم و أهلهم

- جاك : لا و مش إرهابيين بس , ده رجال الأعمال بتوعهم بييجوا يصيعوا هنا في لاس فيجاس ,
و رجال السياسة فاسدين و حرامية و بيسرقوا أموال المعاشات و العلاج على نفقة الدولة و ...

- مارك : انت عرفت المعاشات و نفقة الدولة و الحاجات دي منين يا جاك ؟؟

- جاك : مالكش دعوة , خلينا نكمل شتيمة في المسلمين

- مارك : ماشي يا عم جاك , شفت انت بقى الستات عندهم ,
بيقولوا لك مفروض الست تغطي راسها و جسمها ... هأو !!
أمال أنا لما بتفرج على ( ميلودي اريبيا ) بلاقي المغنيات بتوعهم لابسين من غير هدوم ليه ؟؟
و حتى الحريم اللي بيلبسوا في بلادهم , لما بييجوا عندنا بيقلعوا

- جاك : ياااااه يا عم مارك سوري , أنا عارف إن قعدة الراجل بميت ست
لكن إن جت الست يغور الراجل
و أنا عندي معاد الجيرل فريند بتاعتي دلوقتي , سلا... قصدي حرب .



و هنا ............................


نهض المعلم حشمت و الريس كاظم من مكانهما غاضبين
و قالا :

الأمريكان دول طول عمرهم أغبية
و مش بياخدوا غير بالظاهر

يا عم مش كل المسلمين إرهابيين و بيفجروا نفسهم
و لا كلهم فاسدين و ( واكلين ناسهم )
و لا كل الستات لابسين من غير هدوم

الأشكال دي جزء صغير جدا من المسلمين ,
و ما ينفعش نعمم الكلام ده على المسلمين كلهم ,

و لازم يفرقوا بين ( الإسلام ) و بين ( المسلم )
الإسلام ليه تعاليم و شرائع بتهدي لكل ما هو حسن ,
لكن المشكلة إن المسلم مش بيعمل بيها كلها و بيخالفها في أحيان كتير
فالمسلم الفاسد ليس حجة على الإسلام
بس أهو نص العمى و لا العمى كله
يعني لما يبقى مسلم فاسد أحسن من إنه يكون كافر خالص


و هنا ..........................


تدخل حمامة اللي كان قاعد ساكت طول الفيلم , ربنا كرمه أخيرا و نطق و قال :

صح القول يا معلمين
الكلام اللي انتوا رديتوا بيه على الأمريكان هو عين شمـ... قصدي عين العقل
بس الكلام ده هو نفسه اللي ممكن تردوا بيه على نفسكم في موضوع الدقون و المنقبات
مش كلهم حرامية و نصابين
و لا كل المنقبات لابسين ضيق و ترتر

دول ممكن يكونوا موجودين ,
لكن مش بيمثلوا المتدينين و لا الملتزمين
فلازم تفصلوا بين ( الالتزام ) و بين ( الملتزمين )

و لو هتقولوا إن دول بيشوهوا صورة الملتزمين فالأحسن يحلقوا دقنهم و يقلعوا النقاب
هقول له برضه نص العمى و لا العمى كله
زي ما المسلم المنحرف اللي بيشوه صورة الإسلام أحسن من الكافر
برضه المسلم اللي بيلتزم ببعض العبادات الظاهرة زي اللحية و النقاب لكن بيعمل حاجات تانية وحشة
ده بيبقى أحسن من اللي بيعمل حاجات وحشة , و (في نفس ذات الوقت) بيضيع العبادات الظاهرة برضو .


و هنا .........................

البوليس عمل كبسه على القهوة و لقى الشيشة فيها حشيشة
فقفل القهوة و أخذ الجميع على البوكس !!

مش هوصيكم ...
عيش و حلاوة

ـــــــــــــــــــــــــــــــــ

و لا تنسوا كاتب الموضوع الأصلي من دعوة صالحة بظهر الغيب
أن يُصلح الله له شأنه كله و جميع المسلمين و المسلمات ..

و طبعا >> حقوق النشر للجميع <<
ـ
لو رأيت إنه يستحق النشر

بشرط عدم التحريف أو التغيير


و يا حبذا لو تذكر رابط المدونة




أو على الأقل تذكر أنه

" منقول من مدونة تظبيط "

ـ

20 comments:

  1. لأ انا مش معاك يا هندسة
    المشكلة ان الملتحي اللي بيبقى نصاب .. او المنقبة ام ترتر .. مش مجرد عصاة .. انما هما بيتخفوا في الشكل ده
    و لو عرف ان الشكل بتاعه بيفرض سلوك معين .. ما كانش عمل المصايب اللي التانيين بيعملوها
    انا عارف مليون في الميه ان الفئة دي اقل بكتييييييييييييير مقارنة بالملتحي الملتزم و المنقبة المحترمة
    بس انا مش متفق معاك في انهم احسن من المش ملتزم الغير ملتحي
    لأنه اصلا مش واخدها سنة .. دا واخدها ستار ... .. لو كان واخدها سنة .. ماكانش عمل البلاوي التانية ... لو كان بيطبق السنة للدرجة دي .. ما كانش اهمل في الاصول و طبق الفروع ... و لا ايه ؟.... و على الاقل المش ملتزم لا ظاهر و لا باطن ما بيفتنش حد
    انما اللي بيفكر يلتحي و يشوف واحد ملتحي نصاب .. بيغير رأية ... و كذلك اللي بتفكر تتنقب لما بتسمع كلام الناس على المنقبات اللي بترتر .. بتراجع نفسها
    هذا و العلم عند الله .. و ربنا يهدي الجميع

    ReplyDelete
    Replies
    1. أنا مش عارفة حضرتك هاتشوف التعليق ده ولا لأ
      بس لو هنتكلم عن اللى لابسين الحجاب اللى ربنا أمر به أو
      مطلقين لحيتهم
      بس بتشوف منهم حاجات مش كويسة

      أنا كنت فاكرة إن ماينفعش حد يتنقب إلا لما يكون على علم بأمور الدين ومحترم ومؤدب ومش بيضحك بصوت عال ومش بيقف مع ولاد ولا بيسلم ياليد عليهم وفى حاجات معينة يعنى لازم تبقى فيه
      بس كل ده قبل ما أعرف إن مافيش حاجة اسمها نقاب أصلا،
      والحجاب أصلا هو النقاب فى مصطلحات اللى بنقولها دلوقتى
      ف مبقاش قدامك حتة لازم أبقى كويسة الأول وبعدين أتنقب
      لأنه فرض مفهوش بقى معلش استنى على بال ما أبقى كويسة

      واكتشفت بعدها إن لما تلبسه أنت بتتغير نفسك وبتبطل حاجات معينة لا تتناسب مع الحجاب بقى لما بقى هو ده الحجاب :-)

      أما بقى لما بتلاقى ناس بتعمل حاجات غلط وبيعملوا الهدى الظاهرى للرسول صلى الله عليه وسلم
      فهما راحوا ولا جم: بشر
      !!

      ولما يكون البلد المسلمة الناس فيها بتفتن اللى عايز يتبع سنة الرسول صلى الله عليه وسلم
      يروح فين طيب ؟؟

      يعنى هو قابض على جمر أصلا !!
      اللى بيشوفه بيخليه يسيب الجمر حبة وبعدين يرجع يمسكه تانى

      يعنى البنت اللى لابسة حجاب نص كم دى أكيد بتفتن اللى لابسة الحجاب اللى ربنا أمر به
      ومع الاحتكاك بتخليها وحشة زيها فى شوية حاجات

      والراجل اللى مطلق لحيته رضه كل الكلام عليه
      لأنه أول ما عرف إن ده فرض مابقاش قدامه وقت أصلا يصلح نفسه وبعدين يبطل يحلقها

      وبعدين المفروض أصلا إن كل الرجال مطلقين لحيتهم وكل البنات متحجبين كما أمر الله
      بعد كدة بقى هيبقى المعروف إنه كويس بأخلاقه مش بلبسه

      الخلل فى تربية المسلم من أولها
      لما الست أصلا مش عارفة حاجة فى دينها والراجل فى الطراوة
      مين اللى هيربى عيالهم صح ؟؟

      الناس اللى بتنخدع بالمظاهر دى أصلا عندهم خلل فى التربية

      ربنا يعافينا ويصلح حالنا وحال المسلمين ويهدنا سبل السلام ويغفر لنا ولكاتب المقال ويرزقنا جميعا رضوانه
      آمييين

      آسفة على الإطالة

      Delete
    2. هي التعليقات كلها بتوصل لي على الميل , حتى اللي على المواضيع القديمة

      أنا أتفق معكم إن الفروض مافيهاش ترتيب ,
      يعني ما ينفعش الواحد يقول لما أصلي الأول مثلا , أبقى أطلع زكاة ,
      أو لما أبطل أغاني الأول مثلا أبقى أطلق لحيتي - على القول القائل بوجوب اللحية - ,
      لكن كل الفروض واجبة في الحال ,

      و فعلا أولا و أخيرا كلنا بشر ,
      مش معصومين علشان أطلقنا لحانا أو لبسنا نقاب ,

      لأن الأصل زي ما قلتم هو اللحية و الحجاب للبر و الفاجر ,
      لكن الناس هي اللي بقت شايفة الأصل غريب ,
      زي القصة بتاعة " أبو ودان " المشهورة ,

      ربنا يهدينا و يهدي الجميع ,

      و جزاكم الله خيرا

      Delete
  2. انا معاك جدا فى ضرورة الفصل بين المنهج اللى هو كامل وتم وهو بمثابة المحجة البيضاء وبين اصحاب المنهج اللى لازم يكون منهم درجات وتكون منهم سقطات وذلات لانهم بشر وان الخلط بين الامرين هو فى الحقيقة زم للمنهج وليس اصحابه

    تحياتى

    ReplyDelete
  3. صح جدا وانا مع رأى الأخ معتز قنديل طبعا
    فى مسألة الاستغلال للحية والنقاب لا يعطى صاحب اللحية أو صاحبة النقاب بل إذا كان الغرض الأساسى من اللحية والنقاب هو الاستغلال فيكون مثل الرياء يحبط العمل من الأصل
    لكن اذا كان واحد ملتحى لله أو منتقبة لله لكنه فيهم عيوب شخصية دينية فى نقاط أخرى فمقدرش اقول انهم افضل أو أسوأ من كل واحد مش ملتحى أو واحدة مش منتقبة

    ReplyDelete
  4. السلام عليكم
    حلو اوي بجد
    ينفع اسكتش فكاهي
    ربنا يهدينا ويصلح قلوبنا
    ويجعلك من أهل الجنة

    ReplyDelete
  5. معاك حق والله
    هو كده في ناس مالهاش هم ولا شغله الا ازاي تنتقد وتمسك على الواحده للملتزمين،ويعمموا أخطاءهم على الدين وأهله ككل،
    ربنا يهدينا ويهديهم.

    ReplyDelete
  6. كلامك اوافقه

    لكن لا ننسي ان من تلبس النقاب او يربي ذقنه يجب ان يكون قدوه لغيره

    للأسف ارى امثال كثيره منهم ملتزمين فقط ظاهرياً

    وارى البعض منهم ما شاء الله ملتزمين ظاهرياً وداخلياً


    اللهم اهدنا جميعاً

    جزاك الله خيراً

    مقال رائع بجد

    ReplyDelete
  7. م . معتز بك

    أنا بقى متفق معاك مش مختلف
    فكرة التخفي في المظهر دي ما جاتش على بالي

    بس متهيأ لي بتبقى باينة
    يعنا أنا اعرف واحد ( حَدانا ) بدقن
    و مالوش في البطيخ
    و لا حتى بيصلي في الجامع إلا بالتساهيل
    و شغال مع الحزب الوطني اللي المستقبل ليه
    و ده باين طحن إنه متخفي

    إنما بالنسبة للي عاملها سنة و مش بيرعى حقها ,
    فده ربنا يكرمه ,
    ما هو الرسول ما قالش طبقوا الأصول و خلصوها و بعدين ادخلوا في الفروع
    لكن اللي تقدر عليه اعمله
    فلو بيربي دقنه و مش بيصلي مثلا
    يبقى أعلى درجة من اللي مش بيصلي و لا بيربي دقنه - على اعتبار أن إطلاق اللحية واجب -
    و الله أعلم

    ReplyDelete
  8. موناليزا

    شكرا جزيلا

    ReplyDelete
  9. بنجواتي:

    جزاك الله خيرا
    أخيرا لقيت حد معايا

    فعلا الدعوة غير الداعية

    علشان كده ابن مسعود كان بيقول من كان متأسيا فليتأس بمن قد مات فإن الحي لا تؤمن عليه الفتنة

    و اللي مات ده يكون مات على الدين الصحيح مش الناقص
    و الله اعلم
    شكرا جزيلا يا دوك

    ReplyDelete
  10. مجرد مدونة

    معلش يا رامي أنا ما فهمتش الجملة دي :

    " لكن اذا كان واحد ملتحى لله أو منتقبة لله لكنه فيهم عيوب شخصية دينية فى نقاط أخرى فمقدرش اقول انهم افضل أو أسوأ من كل واحد مش ملتحى أو واحدة مش منتقبة "

    أفضل أو أسوأ من حيث الباطن طبعا ما نقدرش نقول فيها حاجة , الله اعرم بالسرائر

    لكن متهيأ لي ظاهريا هيبقى الامر ممكن الترجيح فيه
    مممممم
    مش فاهم قوي بصراحة

    ReplyDelete
  11. أم يَحيى:
    و عليكم السلام و رحمة الله

    آآآآآآآآآآآمين , ربنا يهدينا و يتوب علينا و يغفر لنا و يُصلح لنا شأننا كله و جميع المسلمين و المسلمات

    ReplyDelete
  12. ايومي :
    هو فيه ناس أصلا مالهاش غير في النقد
    و كان واحد ضرب لهم مثل بغن سفينة غرقانة , و الناس بتسبح تجاه الغرقى , و صاحبنا بيعايب على المنقذين إنهم مش بيعرفوا يعوموا كويس !!

    ReplyDelete
  13. د.ولاء صلاح

    النقطة دي بقى فعلا كان لازم أوضحها

    الناس اللي بتقول إن اللي يربي دقنه أو تلبس نقاب لازم تكون قدوة

    و في نظرهم إنهم المفروض ما يعملوش حاجات غلط
    و طبعا كلنا بشر
    و في نفس الوقت إن الواحد اللي بيقول للملتزم المفروض ما تعملش كذا
    بيكون هو نفسه بيعمل كذا

    و كأن الملتزم عليه تكاليف شرعية أكثر من غير الملتزم

    جزاكم الله خيرا

    ReplyDelete
  14. لا فض فوك يا تيمي

    مقارنة في محلها :)

    ReplyDelete
  15. سمو الأمير

    شكرا جزيلا لمرورك يا أحمد
    جزاك الله خيرا

    ReplyDelete
  16. بما اني ملتحي ، فكلامك كله يخصني وبقابله ... كل كلامك صح جدا جدا ،وأحب اضيف ان الملتحي بشر زيه زي غيره بالظبط ،ومعرض للوسوسة وطرق الشيطان بل الشيطان اقوى في الوسوسة للمتزم عن غير الملتزم ولكن الله يعينه عليها ان صدق .
    قصدي أقول ان في الاخرة كل واحد هايشيل ذنبه هو بس وربنا زي ماهيسبني على كل حاجة في الدين وكل تكاليفه ،هايحسبك برضو زيك زي ... يارب تكون الفكرة وضحت

    ReplyDelete
    Replies
    1. عائــــد لله

      الله ينور عليييييييييك
      هو ده اللي أنا أقصده ,
      إن ربنا مش هيحاسبنا نسبياً
      إنما هيحاسبنا مطلقاً

      يعني مش هيقارنا بأقل واحد و يرفعنا بعد كده زي في الكلية ,
      لا
      هيحاسب كل واحد بالنسبة للشرع , و ليس بالنسبة لأقل واحد ,

      و اللي مربي دقنة زي اللي مش مربيها ,
      عليه نفس التكاليف و الواجبات ,
      و مش علشان واحد ربى دقنه بقى عليه تكاليف زيادة
      احنا مش زي رهبان النصارى اللي بتبقى فيه حاجات زيادة محرمة عليهم دون باقي النصارى

      جزاكم الله خيرا
      و عذرا على التأخر في الرد
      ما أخدش بالي :) معلش

      Delete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ