زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

14 November, 2010

اشمعنا أنا يارب اللي مش بعرف أطير ؟؟

السلام عليكم و رحمة الله و بركاته

الست أم حنفي ابنها ( داس عليه فيل ) و مات ,
قعدت في الجنازة تعيط   و تقطع في شعر اختها -اللي كانت بتتباهى بيه- و تقول :
اشمعنى ابني أنا يارب , ده كان أحسن ولادي و ......


أما عم فكري جت له ( أزمة في كعب الجزمة )  و بقى مش عارف يتحرك و لا يمشي ,
و بقى كل شوية بيقول :
يا رب انت خلقت الناس كلهم أصحاء
اشمعنى أنا اللي خليتني مش عارف أمشي و لا أتحرك  ؟؟


أما سمير أفندي الراجل ( المُسأَّف )   و المفكر الكبير ,
فكان كلما مشي في الشارع و رأى أعمى أو أخرس أو معوق أو مبتلى ,
قال فيه نفسه : اشمعنى دول اللي ربنا يخلقهم معوقين غير باقي الناس الأصحاء
و ..... الأمثلة كثيرة
طبعا فيه ناس هترفض - بالفطرة - التصرفات بتاعة أم حنفي و عم فكري و سمير أفندي
و فيه ناس هتفكر فيها من تحت لتحت كده و تقول لعقلها : هششش  حرام اللي انت بتفكر فيه ده
و ناس هتقول علناً : هو فين العدل و الحكمة في كده   ؟؟

مع إن المسألة سهلة إن شاء الله
و هديلك مثال توضيحي , افتح معايا كتاب الوزارة صــ53ـــ  :
افرض إن ربنا خلق الناس كلهم سواسية  ,
كلهم بيض و حلوين و أمامير   و طول بعرض بصحة  بفلوس بكل حاجة زي بعض ,
و عاشوا في تبات و نبات و سكنوا في منتجعات و فيلات
و بعدها ربنا أنعم على واحد منهم و اعطاه جناحين يطير بهما   ,
يقدر الباقيين يقولوا : إشمعنا هو بيعرف يطير و احنا لأ   ؟؟
هيكون الرد عليهم إن ده ( زيادة و فضل ) من ربنا على الراجل ده ,
طالما ( ما حدش أخد منكم ) حاجة يبقى ما تتظلموش ,
طيب لو ربنا ( أنعم و تفضل ) على الناس جميعا و أعطاهم كلهم أجنحة إلا واحد فقط ,
هل يحق للواحد ده إنه يقول : إشمعنا أنا يا رب اللي مش بعرف أطير  ؟؟
لأ برضو ,
لأن ربنا ما ظلموش و ( ما أخدش منه حاجة ) , إنما ( أعطى غيره ) تفضُلاً

نفس المبدأ ده بينطبق على أصحاب القصص الأخرى اللي ذكرناها في الأول ,
قال تعالى :
{ وَاللهُ أَخْرَجَكُم مِّن بُطُونِ أُمَّهَاتِكُمْ لاَ تَعْلَمُونَ شَيْئًا وَجَعَلَ لَكُمُ الْسَّمْعَ وَالأَبْصَارَ وَالأَفْئِدَةَ لَعَلَّكُمْ تَشْكُرُونَ } [النحل - 78]
" { أَخْرَجَكُمْ مِنْ بُطُونِ أُمَّهَاتِكُمْ لا تَعْلَمُونَ شَيْئًا } ولا تقدرون على شيء " [تفسير السعدي]
" { لا تَعْلَمُونَ شَيْئًا } تَمَّ الكلام , ثم ابتدأ فقال جل وعلا { وَجَعَلَ لَكُمُ السَّمْعَ وَالأبْصَارَ وَالأفْئِدَةَ } " [تفسير البغوي]
يعني أصلا الطبيعي بتاع الناس كلها إننا خرجنا للدنيا لا نعلم شيئا و لا نقدر  على فعل شيء
و كل الحاجات اللي احنا فيها من سمع و بصر و أفئدة و أعضاء و .....
كل الحاجات دي نعم من الله و فضل و ( زيادة ) ,

زي الجناحات كده في المثال اللي ضربناه ,
لو ربنا ما أعطاش واحد الجناحات دي
أو أعطاها لواحد و بعدين أخدها منه ,
الشخص ده مالوش أن يعترض , لأنه واخد الجناحات دي زيادة أصلا,

فلما ربنا يبتلي واحد و ( ياخذ منه ) حاجة ,
هو في الحقيقة ( لم يأخذها منه ) لكنه جل و علا ( لم يُعطِها إياه ) أصلاً ,
لأن الإنسان لا يملكها من البداية ,
و الله غير ظالمٍ له إذا لم يعطها له من البداية ,
أو أعطاها له ثم أخذها منه ,
لأنها تفضلاً و زيادة ,
فلا يحق لهذا الذي لم يُعطهِ الله الزيادة أن يعترض  ,
كما في الحديث :
(( إنما أجلكم في أجل من خلا من الأمم ، كما بين صلاة العصر ومغرب الشمس ،
ومثلكم ومثل اليهود والنصارى ، كمثل رجل استعمل عمالا ،
فقال : من يعمل لي إلى نصف النهار على قيراط ،
فعملت اليهود ،
فقال : من يعمل لي من نصف النهار إلى العصر ،
فعملت النصارى ،
ثم أنتم تعملون من العصر إلى المغرب بقيراطين قيراطين ،
قالوا : نحن أكثر عملا وأقل عطاء ،
قال : هل ظلمتكم من حقكم ؟
قالوا : لا ،
قال : فذاك فضلي أوتيه من شئت))
[ الراوي: عبدالله بن عمر - المحدث: البخاري -
المصدر: صحيح البخاري - الصفحة أو الرقم: 5021
خلاصة حكم المحدث: صحيح ]


آخر حاجة عاوزين نقولها هي تنبيه صغير :
فيه ناس بتقول : إن الله ( لا بد )  و أن يساوي بين عباده في العطايا

و كل واحد واخد الـ24 قيراط بتوعه لكن في صور مختلفة ,
اللي واخد أكثرها صحة , أو أكثرها سعادة  أو فلوس أو ... إلخ
لكن الكلام ده طلع ( خـــــــــطــــــــــأ ) ,


و الدليل من القرآن الكريم :

قال تعالى : { و الله فضل بعضكم على بعضٍ في الرزق } [ سورة النحل - آية 71 ] ـ
و قال تعالى : { نحن قسمنا بينهم معيشتهم في الحياة الدنيا و رفعنا بعضهم فوق بعضٍ درجاتٍ ليتخذ بعضهم بعضاً سخريا } [ سورة الزخرف - آية 32 ] ـ

و الدليل من السنة النبوية :
ما جاء في الخبر عندما رأى أبونا آدم البشر كلهم في عالم الذَرِّ :
(( ورُفِع عليهم آدم ينظر إليهم ,
فرأى الغني والفقير وحسن الصورة ودون ذلك ,
فقال : رب لولا سويت بين عبادك ؟؟
قال : إني أحببت أن أُشكَر ))

[الراوي: أبي بن كعب - المحدث: الألباني
المصدر: تخريج مشكاة المصابيح - الصفحة أو الرقم: 118
خلاصة حكم المحدث : حسن الإسناد موقوفا]


و كما هو مبين في هذه الفتوى

www.salafvoice.com/article.php?a=4868

و بعدين لو كان صحيحا كنا هنبقى بـ(نناقض)  نفسنا منين بنقول إننا مالناش أي حاجة و كل النعم اللي عندنا دي فضل و زيادة
و منين بنقول إننا ( لازم ) كلنا نكون ( متساويين في الزيادة ) دي و عندنا الـ 24 قيراط كاملين  ؟؟
كده بقينا زي اللي بيقول : ( طالما أنا ما أخدتش جناحات زيهم , يبقى أكيد هيديني حاجة تانية مكانها )
و هذا خطأ , فالله قسم بيننا الأرزاق بـ(العدل) و (الحكمة) و ليس بالتساوي ,
لأن العدل أنسب من المساواة ,
فلو وجدت أحدهم رزقه قليل فاعلم أن الله جعل رزقه كذلك لحكمة علمناها أو جهلناها.

و للمزيد عن الرضا بالقضاء بالشرع و بالعقل يُرجى قراءة الموضوع التالي
ليك اعتراض على قضاء ربنا ؟؟


و جزاكم الله خيرا

و لا تنسوا
كاتب الموضوع الأصلي من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر

 بشرط عدم التحريف أو التغيير

و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ
 

15 comments:

  1. موضوع جميل اوي وفعلا بنلاقي ناس كتير بتقول الجمله المشهوره اشمعنى انا يارب

    بس كل ما اسمع الجمله بفتكر كلام سمعته من الشيخ الشعراوي زمان

    كان بيقول ان كل الناس متساويين في النعم

    يعني لو مثلا ادينا لكل نعمه درجه

    هنلاقي ان كل واحد هياخد عشره من عشره مثلا

    بس الفرق هي اختلاف النعم دي

    يعني هتلاقي واحد غني ومعندهوش اولاد

    وتلاقي واحد عنده اولاد ومعندهوش فلوس

    يبقى كل واحد فيهم عنده نعمه

    يعني متساويين

    وزي ما انت قلت ان كلها نعم وفضل من عند ربنا

    اللهم ارضنا بما قسمته لنا

    جزاك الله خيراً

    ReplyDelete
  2. سبحان اله كنت داخلة اقول نفس تعليق ولاء (: (:
    الفكرة وصلت حلوو قوي بجد
    والكلام فعلا منطقي
    الحمد لله على كل حال
    تحيتي

    ReplyDelete
  3. موضوع جميل جدا
    وترجعلنا بالسلامة يا تيمى

    ReplyDelete
  4. بجد ميرسي ليك
    لما بقرأ مواضيعك
    اي نعم مش بعلق
    بس بتضيف لياكتير
    وياريت تكمل علي كدا
    وماتخليش حاجه توقفك عن اللي بتكتبوا
    ميرسي مره تانيه

    ReplyDelete
  5. سلام عليكم

    كل عام أنت إلى الله اقرب
    وعن النار أبعد
    عيييييييييييييييد سعيييييييييييييد

    ReplyDelete
  6. د.ولاء
    شكرا جزيلا لمرورك
    و أنا مسحت تعليقي السابق لأنه اتضح إنه خاطيء
    و التصحيح تم في أصل الموضوع

    ميرام :
    سبحان الله
    :)
    أنا برضه مسحت التعليق اللي رديت بيه على حضرتك
    و الرد في التخديث بتاع الموضوع


    حسام الدين
    شكرا جزيلا يا رافع راسي :)
    و آديني معاكم و منوركم من خلال نت الموبايل اللي خارب بيتي :(


    سوني 2000
    شكرا جزيلا للمرور
    و للتعليق المرة دي
    و ربنا ينفعنا و إياكم بما نكتب و نقول


    ست البنات :
    و عليكم السلام يا ام يحيى
    كل سنة و حضرتك بخير
    عيد أضحى سعيد

    ReplyDelete
  7. جزاك الله خيرا

    حقيقى تدوينة رائعة والتحديث محتاج لاظهار اكثر لانه مهم جدا

    تحياتى

    ReplyDelete
  8. ربنا يكرمك ويجعله في ميزان حسناتك


    وكل سنه وحضرتك طيب وبالف خير وصحة وسلامة

    وربنا يعود عليك الايام وانت في احسن حال يارب

    عيد سعيد عليك وعلى كل اللي بتحبهم

    (f)

    ReplyDelete
  9. مشكور على الاضافه

    جينا نهني بالعيد ونقول :

    الله يتقبل اعمالك ومبارك عليك العيد
    و يعود عليك بصحه وسعاده وعمر مديد

    ReplyDelete
  10. جزاك الله خيرا يا تيمي

    المفروض نشكر ربنا الاول على نعمه الغزيرة علينا

    كل سنة وانت طيب
    ربنا يجعل ايامك كلها سعيدة
    :)

    ReplyDelete
  11. السلام عليكم

    أحييك على كلماتك وبخاصة طريقة معالجتك للمواضيع
    أسلوب رائع وجديد لم أعهده قبلُ

    أشكرك وبإذن الله أتابع مواضيعك الجميلة

    تقبل مروري : أخوك وسام

    ReplyDelete
  12. ازيك يا تيمي كل سنه وانت طيب

    يارب يكون اسعد عيد عليك وعلي عيلتك

    وعلي احبابك

    :)

    ربنا يكرمك ويكتبلك الخير وإيانا

    :)

    ReplyDelete
  13. بنجواتي :

    جزانا و إياكم يا دوك

    و بالنسبة للتحديث فبيني و بينك هو محتاج لإظهار و إضافة ,
    لكن لما أروح بيتنا إن شاء الله علشان ظروف النت ده
    جزاك الله خيرا


    كركبة دماغ :
    جزاكم الله خيرا
    و كل عام أنتم بخير

    د.ولاء:
    شكرا جزيلا
    و كل عام أنتم بخير

    سمو الأمير:
    جزانا و إياكم يا هندسة ,
    و كل سنة و انت طيب و كل أهالي السويس بخير
    و مواقع السويس كمان :)


    وسام :
    و عليكم السلام و رحمة الله وبركاته
    جزاك الله خيرا على الإطراء و التشجيع ,
    و ربنا يتقبل و ينفعنا و إياكم ,
    و شكرا جزيلا أخي وسام و انا أسعد بذلك


    زيزو :
    الحمد لله بخير يا عبد العزيز
    كيف حالك انت ؟
    عسى ما شر إن شاء الله
    و كل سنة و انت طيب و بخير و سلامة و جهاد و قطز كمان :)

    ReplyDelete
  14. و للمزيد عن الرضا بالقضاء بالشرع و بالعقل يُرجى قراءة الموضوع التالي


    """ليك اعتراض على قضاء ربنا ؟؟ """

    هو ده اسم مقال أنت كاتبه؟
    ولا تقصد المقال القادم وخلاص
    لم أجد مقالا بهذا الاسم !!

    ReplyDelete
    Replies
    1. شكرا جزيلا على التنبيه

      هو فيه مقال سابق بهذا العنوان
      و المفروض إنه يكون رابط الموضوع شغال

      تم تعديل الرابط
      http://tazbee6.blogspot.com/2009/10/blog-post_2476.html

      و جزاكم الله خيرا

      Delete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ