يا عم عارفين و الله , ربنا خلقنا للعباااااادة

السلام عليكم و رحمة الله و بركاته ,


طبعا لو جيت و سألت أي حد و قلت له :
هو ربنا خلقنا ليه ؟؟

هتلاقي الرد عليك ( توماتيكي ) و تلقائي لكنه مشوب ببعض (الملل) و هتلاقيه كالآتي :

يا عم خلقنا علشان نعبده , عارفين و الله ,
أقول لك الدليل ؟؟
قال تعالى : { و ما خلقت الجن و الإنس إلا ليعبدون }
أقول لك حاجة كمان ؟؟
الآية دي في سورة الذاريات
استريحت يا عم ؟؟ أدينا طلعنا عارفين أهه و الحمد لله
ورينا بقى ( كعوب جزمتك ) .

................

طبعا ما حدش يقدر يقول حاجة على الإجابة اللي قالها صاحبنا ,
لأنها فعلا صحيحة ,

لكن رغم كده فيه حاجة ناقصة عند صاحبنا تخلي البقرة أحسن منه !!
البقرة اللي في الحديث ده :

عن أبي هريرة رضي الله عنه قال :
صلى رسول الله صلى الله عليه وسلم صلاة الصبح ،
ثم أقبل على الناس فقال :
( بينا رجل يسوق بقرة إذ ركبها فضربها ، فقالت : إنَّا لم نُخلَق لهذا ، إنما خلقنا للحرث ) .
فقال الناس : سبحان الله بقرة تَكَلَّم ،
فقال : ( فإني أومن بهذا أنا وأبو بكر وعمر - وما هما ثَمَّ - ,
وبينما رجل في غنمه إذ عدا الذئب فذهب منها بشاةٍ ، فطلب حتى كأنه استنقذها منه ،
فقال له الذئب هذا : استنقذتها مني ، فمن لها يوم السبع ، يوم لا راعي لها غيري ) .
فقال الناس : سبحان الله ذئب يتكلم ،
قال : ( فإني أومن بهذا أنا وأبو بكر وعمر ) . -وما هما ثم-

[الراوي: أبو هريرة - المحدث: البخاري
المصدر: صحيح البخاري - الصفحة أو الرقم : 3471 ]
ـ


الشاهد من الحديث هو قول البقرة : " إنا لم نُخلق لهذا , إنما خُلِقنا للحرث "

البقرة عارفة هي اتخلقت ليه
اتخلقت علشان الحرث

و صاحبنا عارف هو اتخلق ليه
اتخلق علشان العبادة

لكن فيه حاجة زيادة البقرة عملتها و صاحبنا ما عملهاش و هي
taking action
القيام بفعل

لم تكتفي بإنها عارفة إنها اتخلقت للحرث ,
و سابت الراجل يركبها و خلاص ,
و قعدت تقول في نفسها :
أنا اتخلقت للحرث , بس مش مشكلة لما اعمل حاجة تانية غير اللي ربنا خلقني علشانها
فيها إيه لما حد يركبني يعني , على الاقل أستمتع بشعور الحصان شوية , و ربنا غفور رحيم ,
لكنها عملت حاجة , و رفضت إنه يركبها و قالت له إن ربنا ما خلقهاش علشان كده ,
ده كله مع إن البقرة ( مُسَخَّرة ) أصلا .

و على النقيض ,
هنلاقي صاحبنا اللي ( بيعرف ينطق و ليه قدرة ) , ما عملش زيها ,

كان عارف إن ربنا خلقه علشان العبادة
لكنه بيصلي فرض و يسيب عشرة

كان عارف إن ربنا خلقه علشان العبادة
لكنه كان ليل نهار يسمع أغاني و يتفرج على أفلام

كان عارف إن ربنا خلقه علشان العبادة
لكنه كان بيسهر طول الليل ( يشيّش ) في ( الكوفي شوب )

كان عارف إن ربنا خلقه علشان العبادة
لكنه كان قاطع اشتراك في ( كباريه النجوم ) عند ( لولا الرقاصة )

كان عارف و كان عارف
لكنه و لكنه


علشان كده كانت البقرة أحسن منه
لأنها ( عارفة ) هي اتخلقت ليه
و ( اتصرفت ) في حياتها على هذا الأساس

لكن معظمنا للأسف عارف هو اتخلق ليه
لكن مش بيتصرف و لا بيعيش حياته على هذا الأساس


فالمعرفة مطلوبة
لكن المعرفة (وحدها) لا تكفي .


.................................................


و لا تنسوا كاتب الموضوع الأصلي من دعوة صالحة بظهر الغيب
أن يُصلح الله لي شأني كله و جميع المسلمين و المسلمات ..

و طبعا >> حقوق النشر للجميع <<
ـ

لو رأيت إنه يستحق النشر
بشرط عدم التحريف أو التغيير

و يا حبذا لو تذكر رابط المدونة :

tazbee6.blogspot.com

أو على الأقل تذكر إنه :
" منقول من مدونة تظبيط "
ـ
في أمان الله

.....