زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

20 May, 2009

العادة الخامسة (قدم السبت علشان تلاقي الحد) ـ



5 – العادة الخامسة :
seek 1st to understand then to be understood ,
افهم الآخرين أولا ثم اطلب منهم بعد ذلك أن يفهموك :


-الاتصال الفعال مع الآخرين هو أهم مهارة يجب أن تكتسبها في تعاملك مع الآخرين

-إذا أردت أن تتعامل بفاعلية مع الآخرين و تؤثر فيهم فيجب عليك أن تفهمهم أولا ...

-لكن كيف نفهم الآخرين ؟؟ عن طريق الاستماع الفعال أو
الـempathic listening
و الترجمة الحرفية أو الدقيقة لها هي
أن تستمع و تُشعر المتكلم بأنك مهتم و متعاطف لما يقوله .

,
الاتصال الفعال من أهم المهارات التي يجب أن نتمتع بها في حياتنا ,
فهي تجعلنا محبوبين و مألوفين من الناس ,
فكثير من الناس قد تُحل مشاكلهم "بالفضفضة " ,

و قد ذكر المحاضر الذي حضرت له هذه الدورة مثالين - جامدين قوي -
يوضحان الفارق بسن الاستماع الفعال و الاستماع غير الفعال :


غير الفعال :

الابن: أنا قرفان من المدرّسة بتاعتي جدا...
الأب : المدرّسة؟؟ حصل إيه؟
الابن: لغت حفلة الصيف اللي كلنا مستنينها...
الأب :بس كده أنا فاكر المشكلة كبيرة... عموما إنتو أكيد ضايقتوها... أنا عارفكم مزعجين
الابن: يا بابا ماحدش ضايقها... هي اللي مجنونة
الأب : إيه؟؟!!! عيب تقولكدهعلى مدرّستك انت ولد مش مؤدب
الابن: لا انا مؤدب... أنا مش عايز أروح المدرسة دي تاني
الأب : اتكلم كويس... انت عارف احنا تعبنا قد إيه علشان ندخلك المدرسة دي؟ انت ماتحمدش ربنا
الابن: مش ممكن تفهمني ... أنا غلطان ... أنا غلطان ... أنا غلطان
الأب : !!!!!!!!!!!!!!


طا طا طا طاااااااا !!!!!!!!


شفتم الحوار عامل ازاي ؟ ده حتى طلع عن مساره الأصلي
و صار صراعا الأب و الابن و انتهى في النهاية بـ....قفلة !!!

شوفوا بقى المثال هذه نموذج للأب "اللي بيفهم" و نموذج للاستماع الفعال ...
خش عليه :

الابن: أنا قرفان من المدرّسة بتاعتي جدا...
الأب : ياه شكلك متضايق
الابن: لغت حفلة الصيف اللي كلنا مستنينها...
الأب : دي الحفلة اللي بتجهزلوها من زمان... دي أكيد حاجة محبطة قوي
الابن: كل ده علشان بعض الأولاد عملوا شغب في الفصل
الأب : همممم
الابن: وكمان هي بتقول ماحدش فينا حافظ دوره
الأب : فهمت
الابن: قالت إذا حفظتم أدواركم خلال يومين هاتعطينا فرصة تانية
الأب : هممممم
الابن: بابا... ممكن تساعدني أحفظ دوري؟؟؟
الأب (يبتسم)



شفتم بقى الروعة بتاعة الأب الناصح الواعي , لما الأب سكت ,
و ما تدخلش إلا ببعض الكلمات التي تبين الاهتمام و لا تقاطح حديث الابن,
الابن فضل يتكلم عادي و تمت معرفة المشكلة
و تم حلها بكل سلاسة – سلاسة و أربعة -

و أخيرا , نلخص أهم النقاط التي تدعم أو تدمر الاستماع الفعال :
  • نقاط تدعم الاتصال الفعال :
- أن تتفاعل مع المستمع بكل جوارحك , أن تكون مهتما بما يقول ظاهريا و باطنيا .

- لا للشفقة بل التعاطف , مهمة جدا هذه النقطة ,
لأن الشفقة قد تزيد من مشاعره السلبية و تجعله محبطا أكثر ,
يعني لو واحد جاء يقول لك الدراسة صعبة و المناهج منيله بنيلة و كله حفظ حفظ – ما فيش شتيمة -
ما تقعدش تقول أيوه يا أخويا , التعليم بقى زبالة , و بعد كل الهم ده هتتطلع ما تلاقيش شغل و مش هتستفيد بالكلام اللي احنا حارقين دمنا فيه ده.... ,
لأ ما تتكلمش كده , إنما تقول له :
فعلا إنت شكلا مش تعبان قوي من حكاية الحفظ دي , هي فعلا صعبة شوية , لكن ممكن تعملها , أيوه أنا معاك أنك ممكن ما تستفيدش منها بعد الدراسة , لكن انت مطالب بيها علشان تجيب درجات دلوقتي و بعدين لما تتخلص تبقى في موقع يسمح لك انك تدرس للي تحت ايدك بطريقة أفضل ما فيهاش حفظ و ....... إلخ .

- الاستماع بنية فهم الطرف الآخر , مش علشان أجهز الرد عليه , لأنه فعلا ساعات الحوار بيخلص لوحده , لو بس صبرت شوية و استمعت و لم تقاطعه .

- أن تضع نفسك مكانه و هو يتكلم, أن تشعر بما يحس به , أن تشعر بحالته و كم هو في حاجة إلى أن يتكلم بحرية و يخرج ما في صدره و ....... يفضفض .
  • نقاط تدمر الاستماع الفعال :

1- الاستماع لتحضير ما ترد به وليس للفهم ,
أو تحيُّن الفرصة لقطع حديث الطرف الآخر و بدء الكلام .

2- رفض المشاعر (مافيش سبب علشان تتضايق كدة) , انت كده تبقى "قفلته" من أولها , فكيف يكمل و هو يشعر أن المستمع لا يقدّر مشكلته ؟ و لا عواطفه و أحاسيسه .

3- النصيحة (انت عارف الصح تعمل إيه؟؟ ......... ) , اتركه يتحدث قليلا , حتى ينتهي , و لا تتعجل , سيطلب منك المساعدة بنفسه في النهاية ,

4- الأسئلة التفصيلية , ده بقى نظام الناس "الرخمه" ,
تسأل و تقاطع و تستفسر عن حاجات تافهه و خلاص.

5- دفاع عن شخص آخر (أكيد المدرسة مضغوطة ...) ,
لأنك كده بتحط نفسك في الطرف المعادي ليه من الأول ,
خليك محايد و اسمع للآخر .

6- التحليل النفسي (أصل انت عندك مشكلة من زمان .... ) ,
يا عم انت كنت طبيب العائلة ؟
غالبا المشكلة أو العقدة دي بتكون عندك أنت
و أنت حاسس إن اللي العقد اللي جواك كلها عنده هو .

7-الشفقة (ده انت ظروفك صعبة قوي، انت صعبان عليا.... ) ,
هتخليه ينام في الخط , و يحبط و ييأس و ...

8 - وأخيراً: لاتقس مشكلة الشخص على تجربتك الشخصية


و كما رأينا , فإن كل النقاط يمكن تلخيصها في كلمة واحدة "استمع" ,
اصبر و استمع للنهاية و لا تقاطع , و سوف تجد النتيجة إن شاء الله .

و بهذا تنتهي هذه العادة , التي هي فعلا من أهم العادات , في التعامل مع الناس ,

و لا أنسى أن أكرر شكري للمهندس محمد بدران الذي حاضرنا في هذه الدورة الرائعة و الذي اقتبست كثيرا من كلماته و جمله في هذه العادة بالذات , فلقد شرحها بشكل أكثر من رائع ,


و الآن ........ إلى العادة السادسة

13 comments:

  1. السلام عليكم
    جميلة جدا العادة الخامسة...بصراحة أنا قرأت الكتاب من قبل بس تلخيصك بارع ماشاء الله

    تيجي بألف سلامة

    ReplyDelete
  2. أنا بثبت حضور : وهرجع تاني علشان اكمل قراية.

    انت بجد هايل.
    ربنا يوفقك، ويكرمك في جيشك

    شيماء راضي

    ReplyDelete
  3. ر بالفعل نصائح رائعه للنجاح في الوصول للاخرين وليصلوا اليك ايضاً
    فالتفاهم والانصات والتقدير للطرف الاخر حتما سيؤدي الى التواصل الناجح وبالتالي الى تجنب سوء الفهم
    حقيقي عجبتني كل النقاط ولفتت نظري نقطة كتير بنعملها من دون ما ننتبه وهو اننا بنستمع للاخر حتى نجهز له اجابه مو حتى افهمه بالفعل بتفوتنا هادي النقطة للاسف وبنسمع لنجهز اجابه ومو حتى نفهمه
    كمان الشفقه فعلا والتعاطف ممكن تعمل احباط
    اما المثالين المطروحين عن حوار الاب والابن فحقيقي رااااااائع وبيحصل كتير
    عاجزة عن شكرك
    تسلم ايدك

    ReplyDelete
  4. الغائب الحاضر تيمي
    الحلقة المرة دي بجد من أروع الحلقات
    ربنا يكرمك يا تيمي
    ربنا يوفقك وييسرلك أمرك

    ReplyDelete
  5. يارب ينفعنا بما علمنا ويعلمنا ما ينفعنا,
    كلام مهم وغاية في السلاسة والاهميه معا,
    جعله الله في ميزانك.

    ReplyDelete
  6. موضوع هادف وشيق جدا رغم صعوبة تنفيذه فى بعض الاوقات

    ReplyDelete
  7. ازيك يا تيمي

    ربنا معاك يارب

    شفت ازاي انا متعاطفه معاك :))

    ماشاء الله

    كل مره بحب الدورة دي اكتر

    حجات كتير فيها جميله جدا

    وعادة انهارده حلوة اوي

    ياريت الكل يتعلم الفن ده

    سلااام

    ReplyDelete
  8. أنا جيييييييييييت من تاني.
    بعد ما قريت العادة احب اقولك
    بجد جميلة قوي العادة دي
    وفيها كتير حاجات مفيدة.
    وعلي ما اعتقد ان المبادئ اللي اتكلمت عليها للأتصال الفعال مع الأخرين.
    بيدرس في دورة فن الاتصال، او مهارة الاتصال الفعال.
    لكن انت لخصتة في كلمتين بجد هايل جدااا مشاء الله اسلوبك جميل كتير.

    ReplyDelete
  9. شكرا على مجهودك
    تيمى
    بجد احييك بشدة

    ReplyDelete
  10. هههههههههه عارف يا تيمى انا فيا كام حاجه من الى قلتهم دول للاسف

    بس بجد ناويه اظبطهم

    ReplyDelete
  11. تيمي واحشتني جدا

    ووحشني تواجدك وتعليقاتك وردك علينا

    يارب ترجعلنا بالسلامه مبسوط ويوقفلك ولاد الحلال وينورلك طريقك وبصرك وبصيرتك

    عاده جميله وفعلا من اهم العادات

    لكن ساعات بنقاطع علشان مننساش نقطه معينه من علي سبيل المقاطعه لا اكثر

    ثم لينا مناقشه مطوله لما ترجع إن شاء الله

    ربنا يرجعك بالسلامه

    في رعايه الله

    ReplyDelete
  12. هايل بجد

    وهكذا كان رسولنا الكريم

    لم يكن يصرف وجهه عن محدثه ولا يسحب يده بعد السلام عليه حتى يكون هو البادي في سحب يده

    دمتم بخير

    ReplyDelete
  13. WoooooooooooooW
    بجد موضوع جامد اخر حاجة
    انا حضت كورسات تنمية بشرية بس موصلتش للمرحلة دى
    بجد تحفة جدا واستفدت جدا خصوصا من جزء الاتصال الفعال والغير الفعال
    شكرا عل المعلومات يا جامد
    وربنا يكرمك ويخرجك من الجيش على خير باذن الله
    تحياتى
    سلام

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ