زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

15 August, 2008

الانتحار هو الحل ... اقتلني يا سليم !!؟؟ (الجزء الأول) ـ



بسم الله الرحمن الرحيم ..




مش قادر خلاص !!! مش لاقي غير الانتحار !! ؟؟



يا عم دي عيشة تقرف ..مشاكل و قرف و هموم ..

كل حاجة في الدنيا دي خنيقة , و ما فيهاش حاجة حلوة ..نفسي أموت بقى و أخلص من الهم و الخنقة و المشاكل دي ..نفسي أموت بقى و أستريح ...

سليم .. سليم .. سليييييييييييييييييييييم .. (اقتلني يا سليم) استنى يا سليم .. لحظة بس هكلم الراجل , و بعدين لو أصر إنك تقتله ابقى تعالى ..استنانا بره دلوقتي يا سليم
.
.

بص يا سيدي .. أنا معاك إن الدنيا وحشة و خنيقة و مليانة هموم و قرف و مشاكل ..بس هي دي طبيعتها :

طُبعت على كدرٍ و أنت تريدها *** من غير أقذاءٍ و لا أكدارِو مكلف الأشياء ضد طباعها *** متطلبٌ في الماء جذوة نارِ

و الدنيا دي أوحش و أسوأ مما تتصور .. لدرجة أنها ملعونة .. !!!

قال رسول الله –صلى الله عليه و سلم- : " الدنيا ملعونة ملعون ما فيها إلا ذكر الله و ما والاه و عالما أو متعلما "بل دي لازم تبقى خنيقة أصلا ..




اسمع لقول الرسول –صلى الله عليه و سلم- : "الدنيا سجن المؤمن و جنة الكافر"عارف يعني ايه سجن ؟؟يعني طبيعي إنها تبقى خنقة و شقاء و عناء و بلاء و بكاء واء واء واء

يبقى الحاجات اللي بتحصل لك في الدنيا دي طبيعية .. و لازمة من لوازم الدنيا ..
لكن اللي مش طبيعي إنك تتمنى الموت و يبقى نفسك تنتحر و تخلص من حياتك دي ..

أنا عرف أكيد إنك عارف إن الانتحار حرام .. صح ؟بس أنا هفكرك بحديثين بس ..

قال رسول الله –صلى الله عليه و سلم- : " من قتل نفسه بحديدة فحديدته في يده يتوجأ بها في بطنه في نار جهنم خالدا مخلدا فيها أبدا و من شرب سما فقتل نفسه فهو يتحساه في نار جهنم خالدا مخلدا فيها أبدا و من تردى من جبل فقتل نفسه فهو يتردى في نار جهنم خالدا مخلدا فيها أبدا "

و الحديث الثاني : " كان فيمن كان قبلكم رجل به جرح ، فجزع فأخذ سكينا ، فحز بها يده فما رقأ الدم حتى مات ، قال الله عز وجل: بادرني عبدي بنفسه فحرمت عليه الجنة "


و مش عاوزين نتكلم كتير في النقطة دي لأن متهيا لي كلنا متفقين إن الانتحار حرام ..لكن هو بس من كتر الهموم و المشاكل الواحد بيتهيأ له إنه هيكون أرحم من الدنيا دي ..

بس هو مش كده خالص ..و لو أنّا إذا متنا تُركنا *** لكان الموت راحة كل حيِو لكنّا إذا متنا بُعثنا *** و نُسأل بعده عن كل شيءِ


ده حتى تمني الموت بس .. حرام .. –و هتعرف ليه لما أقول لك على فايدة الدنيا في الآخر- و الأدلة على ده كتير ..

قال رسول الله –صلى الله عليه و سلم - : " قال رسول الله صلى الله عليه وسلم لا يتمنى أحدكم الموت لضر نزل به فإن كان لا بد متمنيا الموت فليقل اللهم أحيني ما كانت الحياة خيرا لي وتوفني إذا كانت الوفاة خيرا لي "

طيب هو الرسول أصلا لا ينهانا إلا عما يضرنا , و لا يأمرنا إلا بما ينفعنا ..طيب افرض مثلا إن الانتحار ما كانش حرام !!!كان هيبقى تمني الموت برضه حلو ة لا لأ ؟؟ كان هيبقى برضه وحش و هتبقى خسارة كبيرة لو الواحد انتحر ..و أقول لك ليه ...



فاكر أيام الدراسة .. و وجع القلب و المذاكرة و الزنقة السودة ساعة الامتحان .. حيث (يُضرب) المرء أو يهان .. لما تكون في الامتحان أبو 3 ساعات – ربنا ما يعيدها أيام – و تيجي مش عارف شوية أسئلة .. و وقفت مش عارف تحل ..بتعمل ايه ؟؟

أكيد بتسلم الورقة و تطلع على طول من اللجنة بعد نص الوقت علشان تستريح من الضغط النفسي اللي في اللجنة .. صح ؟؟صح ايه ؟؟ ده غلط خالص .. ده انت بتقعد تعصر دماغك أو تحاول (تستعين بصديق) لحد آخر ثانية في الوقت لحد ما المراقب ييجي و يشد الورقة منك .. صح ؟؟

طيب ما هي الحياة = ابتلاء = امتحان

يبقى لازم تحاول و تحاول تتغلب على العوائق و الأسئلة الصعبة و الضغط النفسي لحد آخر لحظة .. علشان بعد ما تسلم الورقة و تشوف النتيجة ما تجيش تقول ياريتني كنت كملت الوقت للآخر !!فاهمني و لا ؟؟

طيب ما الرسول –صلى الله عليه و سلم- نهانا عن تمني الموت علشان كده ..

قال رسول الله صلى الله عليه وسلم: "" لا يتمنى أحدكم الموت إما محسنا فلعله أن يزداد خيرا ، وإما مسيئا فلعله أن يستعتب"" . رواه البخاري .

و قال رسول الله صلى الله عليه وسلم: "" لا يتمنى أحدكم الموت ولا يدع به من قبل أن يأتيه ، إنه إذا مات انقطع أمله ، وإنه لا يزيد المؤمن عمره إلا خيرا "" . رواه مسلم .

يعني يعني لو كنت بتعمل خير .. تزداد فيه ...

و لو كنت بتعمل شر .. ربنا يتوب عليك قبل ما تموت .. و قبل ما تقفل باب التوبة بإيدك !!


هتقول لي يا عم ده أنا بقائي في الدنيا أصلا جاي عليا بخسارة ..
لأني كل يوم بتزيد سيئاتي و (بنيل الدنيا) أكتر ..

بص يا( CD)=(سي دي)=(سيدي) هو تمني الموت له أسباب كتيرة ..

منها : (1) إن الواحد يبقى مضيع و بيعمل بلاوي كتير-و ده هنتكلم عليه في الآخر خالص علشان نفضفض و ناخد راحتنا- ..و منها (2) إن الواحد بيكون زهقان من المشاكل اللي حواليه ليل نهار

أو السبب الأخير (3) إنه يكون (زهقان و خلاص) و ما لهوش نفس يعيش ..و خلينا نتكلم عن كل سبب من دول باختصار . .
.
.

نبدأ بحكاية الهموم الكتير و المشاكل اللي بتخلي الواحد يتمنى الموت ...

بص يا عمي ..



هو لما عربيتك (الهيونداي) بتعطل .. بتروح لمين ؟؟أكيد بتروح للناس اللي صنعوها ... بس مش في كوريا طبعا ..
بتروح التوكيل علشان هم أعلم الناس بالأعطال في الحاجة اللي صانعينها ...

طيب ما ربنا هو اللي خلقك .. (الذي خلقك فسواك فعدلك) .. و ربنا اللي وضعك في هذه الدنيا .. في الوقت ده في الزمان ده في الظروف دي , بالاسم ده , في العائلة دي ..يعني كل حاجة انت فيها ربنا عارف بيك .. و هو اللي خالقك .. و عارف إنك هتستحمل اللي انت فيه ده .. (ألا يعلم من خلق و هو اللطيف الخبير) .. أكيد يعلم .. و هو بهم لطيف و خبير ..

فلما تعرف إن ربنا اللي خالقك عارف إنك قد اللي انت فيه ده و تقدر تستحمله بل كمان بيعطيك ثواب على اللي انت فيه ده ,

قال رسول الله : " ما يصيب المسلم من نصب و لا وصب و لا هم و لا حزن و لا أذى و لا غم حتى الشوكة يشاكها إلا كفر الله بها من خطاياه "



يعني أي أي حاجة هتصيبك .. سواء هم أو غم أو مشاكل أو حتى كوعك اتخبط في حاجة .. سيكفر الله بها من خطاياك ..لما تعرف كل ده .. يبقى أكيد إن شاء الله تقدر تستحمل اللي انت فيه ..و لا تتمنى الموت بسببه ... و للمزيد عن النقطة دي ياريت تقرأ موضوع سابق لنا بعنوان ( إيييييييييه دنيا !! )


النقطة التانية اللي الواحد ممكن يتمنى الموت علشانها ..

هي .... مش عارف ؟؟؟ !!!

أنا زهقان و خلاص ..

مخنوق من الدنيا من غير سبب ..

مع إن (القشية معدن) و الفلوس موجودة و مافيش مشاكل .. بس أنا زهقان منها و خلاص ..ماليش نفس أعيش .. .
.

أقول لك ياسيدي ..

هل قرأت قبل كده الآية دي : قال تعالى: { ومن أعرض عن ذكرى فإن له معيشة ضنكا ونحشره يوم القيامةأعمى }.

وقال تعالى: { فمن يرد الله أن يهديه يشرح صدره للإسلام ومن يرد أنيضله يجعل صدره ضيقا حرجا كأ نما يصعد في السماء كذلك يجعل الله الرجس علىالذين لا يؤمنون }.

يقول ابن القيم :

فأهل الهدى والإيمان لهم شرح الصدر واتساعه وانفساحه

وأهل الضلال لهم ضيق الصدر والحرج .



وقال تعالى: { أفمن شرح الله صدرهللإسلام فهو على نور من ربه }.


فأهل الإيمان في النور وانشراح الصدر وأهلالضلال في الظلمة وضيق الصدر .يعني لو جيت تراجع نفسك و تشوف أسباب الخنقة اللي من غير سبب دي هتلاقي إن السبب هو التقصير في العبادة و البعد عن الله عز و جل ..


قال أحد السلف : "إذا قصر العبد في العمل .. ابتلاه الله بالهموم"

يعني شوف كده بقا لك قد ايه لم تصلي بخشوع مثلا ..أو لم تتدبر القرآن أو أو ...و لأن القلب لا بنصلح حاله إلا بالقرب من الله عز و جل ..و اسمع لكلام ابن القيم في الموضوع ده :
"إن في القلب فاقة لا يسدها شيء سوى الله تعالى أبدا

وفيه شعث لا يلمه غير الإقبال عليه

وفيه مرض لا يشفيه غير الإخلاص له وعبادته وحده

فهو دائما يضرب على صاحبه حتى يسكن ويطمئن إلى إلهه و معبوده

فحينئذ يباشر روح الحياة و يذوق طعمها و يصير له حياة أخرى غير حياة الغافلين المعرضين عن هذا الأمر الذي له خلق الخلق ولأجله خلقت الجنة والنار وله أرسلت الرسل ونزلت الكتب ولو لم يكن جزاء إلا نفس وجوده لكفى به جزاء وكفى بفوته حسرة وعقوبة "


أظنك دلوقتي فهمت إيه سبب الخنقة اللي من غير سبب الي بتخليك كاره الدنيا و نفسك تنتحر دي ..

و برضه كنا اتكلمنا عن النقطة دي قبل كده في موضوع بعنوان ( لما تبقى مخنوق .. ليه ما تشربش بمناخيرك )


آخر نقطة بقى و اللي ما اتكلمناش عليها قبل كده ..



لما تكون عاوز تموت علشان (العملية بايظة بايظة) و على كلامك إن كل يوم سيئاتك بتزيد أكتر .. و كل يوم جاي عليك بخسارة .. يعني كل ما أموت بدري يبقى احسن .....

أقول لك ... انت غلطان جدا قوي خالص ..

عاوز تعرف غلطان ليه ؟؟
.
.
.
.
>>> يُتبع ..


22 comments:

  1. ليه يبني

    بالراحه علي نفسك شويه

    بطل تعقيد بقي

    :d

    ReplyDelete
  2. المدونة رائعة و بصراحة الاسلوب عجبنى اوى

    و جزاك الله خيرا

    و دمت بخير

    ReplyDelete
  3. السلام عليكم
    مشاء الله موضوع جميل وبيحصل
    كتير خصوصا اليومين دول ربنا يوفقك وتكمله واحسن حاجة استشهادك بالاحاديث النبوية
    جزاك الله خير
    تحياتى

    ReplyDelete
  4. موضوع رائع ربنا يجعلك لنصرة الاسلام
    ................تحياتى

    ReplyDelete
  5. بص ياسيدي الموضوع ده فعلا انا بستغيربله جدااا حكاية انا عايز اموت...يعني اقعد الانسان اللي يقول كده ده اقرب واحد الي الايمان
    هتقلي ازاي؟؟
    لان كره الدنيا...فمجرد بس لو ربنا حط في طريقه حاجة تهديه..وتعرفه ان حياته ممكن تبقي احلي حياة..مدام مع ربنا..هروح ساعتها لربنا وهيعيش حياته لله كلها..وطبعا مقصدقش بس الصلاة والصوم والتهجد..الاعمال كلها ممكن تكون عبادة..شغلي ممكن يبقي عبادة..ويبقي لله
    فده اكتر واحد ممكن يهتدي...وانا بستغرب علي اللي بيقول عايز اموت...واقول ازاي؟؟ده الواحد فينا متمسك بالدنيا..مهما كانت متعبة...ومتقنعنيش ان في حد عايش الحياة كلها تعيس او كلها سعيد..لايمكن
    واكيد كل واحد منا ربنا بيديله حاجات وياخد منه حاجات..لانه مش هينفع انو ياخد كل حاجة..متبقاش دنيا
    وبعدين حكاية انا عايز اموت.!!اللي بيقول كده مش عارف اكيد هيحصل ايه بعد مايموت...ولو عارف مش هيقول الكلمة دي...مش عارف ان ربنا هيحسبه علي كل حاجة...ويشوف اختبار اصعب من اي اختبار في الدنيا...واللي بيقول انا ذنوبي كتير ودول منا عايش هاخد ذنوب اكثر...طب مانت لو مت بالذنوب دي هتتعذب...ليه عايز تموت..مايمكن ربنا يهديك
    وحكاية انا عايز اموت وخلاص دي اقرب الي الواقع وبتحصل كتير للناس الاغنياء بالذات...عنده كل حاجة..وكل حاجة عملها..ومش لاقي حاجة جديدة يعملها...الايام شبه بعضها..وفيقول حاجة جديدة اموت احلي
    ودي غالبا بتحصل بره..خارج مصر..الاجانب
    بس انا اعتقد وان كانت في حاجات كتير في الدنيا بتتعبنا بس انا مقدرش اتمني الموت
    وعلفكرة في تمني الموت بس نوع تاني
    ان واحد صالح اوووي وبيحب ربنا اوووي..فنفسه يقابل ربنا...فيتمني لقاء الله واعتقد ده مفهوش حاجة
    بجد موضوعك جميل
    ومنتظرين القادم
    وجزاك الله خيرا
    خالص تحياتي

    ReplyDelete
  6. المشكلة ان ناس كتير مش واخده بالها ان فيه حياة بعد الموت بس هتكون فى القبر الى ان ياذن المولى بنفخ الصور

    ReplyDelete
  7. اللام عليكم

    كالعاده موضوع مهم واسلوب ظريف ودمه خفيف

    والله بجد المشكله كلها فى حاجه واحده

    قال تعالى: { ومن أعرض عن ذكرى فإن له معيشة ضنكا ونحشره يوم القيامةأعمى }.


    هو الاعراض عن ذكر الله

    هو سبب المشاكل والهموم والقرف اللى احنا فيه بجد

    بس خد هنا قولى

    انت بقى مش بتحس انك مخنوق ومضايق ومش طايق نفسك زينا ولا لاء؟؟؟؟

    هههههههه

    مع ارق تحياتى

    ReplyDelete
  8. البوست بصراحة اكتر من رائع ودى مش مجاملة

    ReplyDelete
  9. حسن حنفي ..

    ألف شكر ليك على تنويرك المدونة على طول :)

    و هبطل تعقيد يا عم

    انت تأمر :)

    ReplyDelete
  10. خديجة محسن ..

    شكرا لمرورك ..

    و الحمد لله إن المجونة عجبتك ..

    جزانا و إياكم ..

    ReplyDelete
  11. tote

    و عليكم السلام و رحمة الله

    هو فعلا .. للأسف بقى يحصل كتير اليومين دول
    لأن الدنيا بقت بايظة خالص .. و الناس كمان مش عارفين يتظبطوا أو يعرفوا يعيشوا صح ..

    و إن شاء التكملة عن قريب

    ReplyDelete
  12. أحمد شرف ...

    شكرا جزيلا لمرورك ..

    و ربنا يهدينا و ينفعنا بما نكتب

    تحيتي لك ..

    ReplyDelete
  13. أحلى حياة ..

    أهلا بيكي و بتعليقاتك المفصلة .. :)

    تصوري أول مارة آخد بالي من الحتة دي ..

    إن اللي بيقول هو عاوز يمت ده .. لو أنا وجهت طاقاته في الخير هيبقى مفيد جدا لأنه أصلا مش عاوز من الدنيا حاجة !!!

    و الله فكرة :)

    هو بالنسبة للي بيتمنوا الموت ما بتبقاش العملية سهلة زي ما انتي فصلتيها كده ...

    إنه يشوف لو مات هستحاسب , و إن فيه حاجات كتير في الدنيا حلوة و الكلام ده ..

    الإنسان لما بيوصل لدرجة تمني الموت .. بيبقى وصل لدرجة من البعد عن الله و تمكن الشيطان منه فيكله الله إلى نفسه فحينئذ لا ينقذه عقله .. و لا يزجره عن أشياء هي بدهيات لغيره من الناس ..
    علشان كده الواحد ما يستغربش لما واحد يتمنى الموت .. لأنه بيكون تقريبا عقله كده اتلخبط خالص و مش بيفكر بطريقة صحيحة زي الناس العاديين ..

    و أنا أؤيدك في النوع الثاني من الصالحين الذين يتمنوا أن لو لم يكونوا مجودين .. او من يتمنى لقاء الله في غير ضراء مضرة و لا فتنة مضله ... بس دول أمثال عمر بن الخطاب و غيره من الصحابة الكبار ممن علا إيمانهم و لو يعد لهم أرب في الدنيا ..

    شكرا جزيلا بجد على إضافاتك المفيدة ..

    و جزاكِ الله خيرا

    ReplyDelete
  14. موناليزا ...

    معاكي حق ...

    الناس مش بتفكر ساعتها غير في الدنيا بس ..

    و مش بتاخد بالها إنه لو انتحر مش هيخلص و ينتهي ..
    لا .. ده هيكون لسه هيبدأ حياة جديدة في البرزخ و القبر .. حتى تقوم القيامة ..


    تحيتي لكِ ..

    و شكرا جزيلا لمرورك ..

    ReplyDelete
  15. ريمان ..

    و عليكم السلام و رحمة الله و بركاته

    معاكي حق و الله ..

    تالله ما عدا عليك العدو إلا بعد أن تولى عنك الولي .. فلا تظنن أن الشيطان غلب و لكن الحافظ أعرض

    عندما بعدنا عن الله .. تمكن منا الشيطان ..

    فصارت معيشتنا ضنكا لعدم اتصالها بالله عز و جل ..

    فضاق الصدر , و تشعبت الهموم ..
    و قادتنا إلى كل سوء حتى تمنينا الموت ..


    نيجي بقى للحتة اللي زعلتني قوي !!! :(
    :(
    :(

    هو انتي ما قرأتيش بداية المدونة من بره ؟؟

    أنا مش بكتب الحاجات اللي في المدونة دي علشان أنا خالي منها ..

    بل على العكس تماما ,..
    أنا بكتب لأني مريت بكل حاجة أنا كتبتها ..

    أنا زيي زيكم بل أسوأ ..
    اللي بتقرأي له ده مش طايق الدنيا .. و عايش لأنها أمر واقع لا أكثر .. و كان هينتحر مرتين قبل كده , و كان بيتعالج نفسيا و حالته بايظة أكثر منكم ..
    إنما لما بحس إني هبدأ أرجع أبوظ زي زمان .. بحاول أمسك نفسي و أعظ نفسي بما أكتب ههنا علشان أفتكر أن اليه لازم ما أفكرش زي زمان ..

    تحيتي لكِ ...

    ReplyDelete
  16. شفقة هانم و إحسان بيه

    نورتو االمدونة انتوا و العائلة السعيدة :)

    و أنا سعيد جدا بمروركم ..

    و بتعليقكم المشجع ...

    تحيتي لكما ..

    و ما تحرموناش من طلتكم البهية ..

    ReplyDelete
  17. :D

    جووود جداا

    :D

    مش الانتحار بالطريقه دى هوا الحل

    شوف طريقه تانيه

    ReplyDelete
  18. حسام يحيى

    أهلا بيك يا حسام ..

    طيب ايه رأيك في المنوم ؟؟

    أظن كول طحن :)

    مش كده ؟؟

    بهزر إوعى تاخدها جد :)

    نورتني يا حسام :)

    ReplyDelete
  19. السلام عليكم

    اسجل اول مرورى

    بجد بوست هايل وفعلا ساعات ناس كتير بتفكر فى الانتحااار

    بس برضه لازم يبقى عندنا امل

    ReplyDelete
  20. اولا اسلوب الكتابة بسيط وجميل اوى
    بس الهموم والحزن الوتعب والارف دة كله بيغفر من ذنوبنا
    لان ربنا بيبتلينا اما عشان لو كنا عاصيين نفوق من المعصية
    او عشان يختبرنا ويغفر لنا ذنوبنا
    ::::
    تانيا حضرتك ليك تاااج عندى

    ReplyDelete
  21. جوجو

    و عليكم السلام و رحمة الله وب ركاته

    شكرا جزيلا على المرور ..

    و فعلا .. هو فيه أمل .. لكن الشيطان هو اللي بيعمي عيننا عنه ..

    تحيتي

    ReplyDelete
  22. ندى

    شكرا جزيلا لمرورك ..

    هو فعلا كل هم أو غم في الدنيا دي بيكون ابتلاء ..

    علشان كده الواحد المفروض يحتسب الأجر عند الله ..


    شكرا جزيلا لمرورك ..

    تحيتي ..

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ