زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

02 July, 2008

ـ إيييييييييييه .... دنيا !!!ـ



بسم الله الرحمن الرحيم





زهقان ؟؟ قرفان ؟؟؟ مخنوق ؟؟ متدايق ؟؟؟

المذاكرة قارفاك ؟؟
"دادي" خانقك ؟؟
جيرانكم مزهقينكم ؟؟؟

انت نفسك .. مخنوق من نفسك ؟؟ و كاره نفسك و العيشه و اللي عايشينها و الدنيا باللي فيها ؟؟

ما فيش اي حاجة مزهقاك و مكرهاك في دنيتك ؟؟ أكيد طبعا فيه

و أكيد نفسك العملية تتظبط بقى و الدنيا تمشي معاك و "العملية" تمشي زي "السكينة في الحلاوة" ؟؟

أحب أقول لك في البداية بس .. إن دي حاجة طبيعية خالص !!!!


أيوه مش مصدق ليه ؟؟ طبيعي يابني ,, و أقول لك ليه ...

خد لك نفس الأول كدة .... لأ ما تفهمنيش غلط قصدي نفس هواء شهيق يعني ,,
مش من اللي بالي بالك


خدت النفس ؟؟ و لا مستخصره هو كمان ؟؟ ده ببلاش يا عم ,, خد لك "نفسين" كمان يا راجل ...

نبدأ بقى ...

انت ايه اللي جنابك معترض عليه في الدنيا دي ؟؟
القرف اللي فيها يعني ؟؟ مشاكل و ضغوط و قرف و زهق بسبب و من غير سبب و ......
من الآخر .. عيشة صعبة خالص !!!


طيب و هو جنابك كنت عاوزها تبقى سهلة يعني ؟؟
ما ينفعش يا "عمُنا" .. لأن دي هي طبيعة الدنيا :

طُبعت على كدرٍ و أنت تريدها *** من غير أكدارٍ و لا أقذاء
و مكلف الأشياء ضد طباعها *** متطلبٌ في الماء جذوة نار !!!

من الآخر يعني .. هي دار بلاء و شقاء .. مكان مقرف من الآخر ...
يعني ما تطمعش انك تلاقي فيه السعادة و الحاجات دي ,,


و بعدين هي زي ما قال الرسول -صلى الله عليه و سلم- : "الدنيا سجن المؤمن , و جنة الكافر" ,
يعني لازم تحس إنك محبوس فيها , و لو كانت "ماشية معاك حلاوة" ..
راجع نفسك أحسن تبقى ..... و لا بلاش !!


غير كدة كمان ... دي كل ما تشتد عليك في البلاء , أحسِن الظن بالله في أن تكون من أولئك الذين قال فيهم رسول الله :
" أشد الناس بلاء الأنبياء ، ثم الأمثل فالأمثل ،
يُبتلى الرجل على قدر دينه ، فإن كان دينه صلبا ، اشتد بلاؤه ،
وإن كان في دينه رقة ، ابتلي على حسب دينه ،
فما يبرح البلاء بالعبد ، حتى يتركه يمشي على الأرض ما عليه خطيئة "

و في رواية " وإن كان في دينه رقة .. هُوِّن عليه "

تاني "هام" يا سيدي .. دلوقتي احنا عرفنا إنها "وحشة" و مليانة بالمصائب و المتاعب ..
نعمل إيه يعني ؟؟ نموت نفسنا يعني ؟؟؟


لا , و لا تموت نفسك و لا حاجة ,,
طيب هو إنت مش لو قرأت في سير السابقين من الصالحين و قبلهم الأنبياء كانوا مبتلين كما سبق و بينّا ,
طيب كانوا سعداء و لا كانوا محزونين ؟؟

لا طبعا كانوا سعداء !!!
طيب إزاي مع إن المحن اللي هم كانوا فيها كانت أشد من اللي احنا فيها ؟؟

ببساطة ... كانوا بيستمتعوا !!! أيوة بيستمتعوا ,,
و انت لو عرفت هم كانوا بيستمتعوا ليه ؟؟ هتستمتع زيهم إن شاء الله ...


لما تسمع قول رسول الله " إن عظم الجزاء مع عظم البلاء ..
و إن الله تعالى إذا أحب قوما ابتلاهم ..
فمن رضي فله الرضا , و من سخط فعليه السخط "

و قوله : "فما يبرح البلاء بالعبد ، حتى يتركه يمشي على الأرض ما عليه خطيئة"
و غيرها من الأحاديث الكثيرة في باب الابتلاء و المرض و نحوه , أنها تكفر الخطايا ....

طيب ما هو ممكن البلاء بتاعنا يبقى "مش اللي هو" يعني ...
يعني يبقى مش جامد قوي ,,
و لا هو في حاجة خالصة زي الأنبياء و الصالحين !!


إزاي يعني ؟؟


يعني يكون مثلا إن واحد "تعلق قلبه" بواحدة , و بيجاهد نفسه و الشيطان ,
و كل شوية تجيله الأفكار و الذكريات و يقعد يحاول يطردها ,

أو واحد البلاء بتاعه في الذنوب اللي مش عارف يبطلها و اللي بيحبها كمان ,
بس كل شوية يتوب و يبقى قوي ,
و شوية يرجع تاني و بعد شوية يجاهد نفسه تالت و هكذا ....


يعني مش بيجاهد الكفار مثلا و لا بيحتمل أذاهم زي الأنبياء و لا الحاجات الكبيرة دي ؟؟
ده يعتبر بلاء في الدنيا و حاجة الواحد يُثاب عليها ؟؟ و ياخد عليها حسنات ؟؟


طبعا -إن شاء الله- , طالما بتعمل كده لله يبقى إن شاء الله ربنا هيثيبك عليه و هيساعدك ,

و قبل ما نخلص النقطة دي ..
أحب أقول بس , إنك المفروض ما تيأسش في حكاية التوبة و الرجوع ,
طول ما انت بتتوب يبقى انت على الطريق الصحيح ,
كما قال صلى الله عليه و سلم :
"ما من عبد مؤمن إلا و له ذنب , يعتاده الفَيْنَةَ بعد الفينة ,
أو ذنب هو مقيم عليه لا يفارقه حتى يفارق الدنيا ,
إن المؤمن خُلق مفتَنا , توابا نسيا , إذا ذُكِّر ذكر"
,
و ما نفهمش من الحديث ده إن كل واحد يختار له ذنب يبقى هو الذنب بتاعه ,
خلاص بقى يعمله على طول الخط !!
لا إنما كما في آخر الحديث "مفتنا , توابا نسيا" يعني بيعود و بيتوب طول حياته , جهاد مستمر ..
مثله مثل حديث : "إن عبدا أصاب ذنبا فقال: رب أذنبت فاغفره
فقال ربه: أعلم عبدي أن له ربا يغفر الذنب و يأخذ به ؟ غفرت لعبدي
ثم مكث ما شاء الله ثم أصاب ذنبا فقال: ربي أذنبت آخر فاغفر لي
قال: أَعَلِمَ عبدي أن له ربا يغفر الذنب و يأخذ به ؟ غفرت لعبدي
ثم أصاب ذنبا فقال: رب أذنبت آخر فاغفر لي
قال: أعلم عبدي أن له ربا يغفر الذنب و يأخذ به ؟ قد غفرت لعبدي فليعمل ما شاء"

هذا لا يعني أنه يكفر بقى أو يعمل أي حاجة .. لا ,
فليعمل ما شاء إذا كان هذا ديدنه من التوبة و الرجوع بعد الذنب .



و لمعلوماتك ,,
أي بلاء ,, أي حاجة تصيبك في الدنيا حتى و لو كانت صغيرة جدا ,
ستؤجر عليها إذا ما احتسبتها عند الله ,

قال رسول الله :"ما يصيب المسلم من نصب و لا وصب و لا هم و لا حزن و لا أذى و لا غم حتى الشوكة يشاكها إلا كفر الله بها من خطاياه"

نرجع تاني للدنيا و البلاء فيها ..

دلوقتي احنا عرفنا إن الدنيا مجبولة و مخلوقة على الشقاء و البلاء للمؤمنين ,,
و عرفنا إزاي نتعايش مع البلاء ده بإننا نحتسب الأجر عند الله
و إن البلاء أيا كان قدره فسنثاب عليه إن شاء الله

طيب فاضل حاجة قبل الأخيرة ,,
ساعات فعلا بيبقى البلاء شديييييييييييييييد قوي
لا لا , مش هقدر أستحمله !!!!
مش هقدر أصبر عليه , أنا أنتحر أو أهج أو أبيع مبادئي أو .........


ببساطة خالص يا سيدي .. مين اللي ابتلاك ؟؟
الله عز و جل ,
طيب إذا كان ربنا بيقول "ألا يعلم من خلق و هو اللطيف الخبير" ,
يعني هو عارفك و عارف احتمالك و قدرتك قد ايه ,
و عارف انك تقدر تستحمل البلاء اللي انت فيه ده ,
لأن ده قدرك , و قدرك كبير يبقى البلاء كبير "يبتلى المرء على قدر دينه"
و شوف نفس الحديث .. سبحان الله , في رواية منه " وإن كان في دينه رقة .. هُوِّن عليه "
شوف رحمة ربنا , و اللفظ الجميل "هُوِّنَ عليه"
سبحان الله "ألا يعلم من خلق و هو اللطيف الخبير" بلى و الله يعلم ,


يعني لو قلت , ياااااه ده أنا البلاء اللي أنا فيه ده من الفقر مثلا , شديد قوي ,
أو مثلا أبويا خانقني في البيت أو مراتي معكننه علي عيشتي ,
ده أنا لو كنت مكان زميلي فلان اللي يا دوب عنده فشل كلوي مثلا
بس مراته "ست أميرة"
و لا حتى ياسيدي زي "مودي" اللي بيجي الكلية متنرفز لما "دادي" بتاعه ما بيرضاش يديله العربية ....
كان زماني قادر أصبر !!!!


عمرك يا زعيم , حتى لو انت مكان "سي مودي" ده ,
هو البلاء بتاعه "متفصّل" على قده ,
هو مثلا ما عندوش دم , ما بيحبش العلاقات الأسرية ,
ما حدش بيهتم بيه في البيت و هو و لا همه ,
انت مثلا لو كنت مكاته مع العربية و الكلام ده ,
بس ما كنتش هتستحمل الحاجات التانية اللي هو مستحملها ,
لأنه كل واحد ربنا أعلم بيه و أعلم بما يُصلحه ,


يبقى كن واثق تمام الثقة , أن ما أنت فيه من بلاء أنت قادر عليه ,
و أن الله ما ابتلاك به إلا و هو يعلم مقدرتك على تحمله
و إلا لكان هونه عليك كما في الحديث , فاحمد الله و اشكره .



تبقى نقطة أخيرة -يا عم خلص بقى زهقنا -
يا عم الشيخ إنت من أول الكلام عمال تقول البلاء و المؤمن و المؤمن و البلاء ,
طيب إزاي أعرف البلاء ده إذا كان فعلا علشان ربنا بيحبني و بيمحصني من الذنوب و لا بيعاقبني ؟؟؟


أقول لك يا سيدي , أولا أنا مش عم الشيخ و لا حاجة , أنا زيي زيك ,
و و الله أنا أوجه الكلام ده لنفسي قبلك , و ما كتبته إلا حين أحسست أنني أريد أن أتعظ به ,



ثانيا , تعرف إزاي بقى ؟؟ إذا كان الابتلاء للتمحيص و لا للعقوبة ؟؟؟
ببساطة ... من نفسك و من ردة فعلك ,,
"فمن رضي فله الرضى"

و هياخد الحسنات و الأجر و كل الحاجات الحلوة اللي قلنا عليها ,

"و من سخط فعليه السخط"
اللي يُبتلى و يسخط على البلاء , و لا يرضى عن قضاء الله و يقعد بقى, ليه يا رب كده ؟
هو انت بتعمل فيه كده ليه -و الله فيه ناس بتقول كده جهرا - ,
و تلاقيه بقى يقلبها صياعة و يزداد غيا و بعدا على بعده ,
و قال ما هي كده كده بايظه , أطيع قع في مشاكل و أعصي أقع في مشاكل برضه !!
يبقى خلينا بقى في "الضياع" و خلاص , يبقى ده بلاء عقوبة و ليس تمحيصا ,


و كنت سمعت إجابة للشيخ أبو إسحاق الحويني -على ما أذكر- على مثل هذا السؤال ,
فأجاب : لو إن البلاء قرب الواحد من ربنا , يبقى ده تمحيص ,
أما لو بعده عن الله فهذا بلاء عقوبة ليزيده الله إثما .



و أخيرا نذكر كلاما لابن القيم يقول فيه :
"إن الله لم يبتلي عبده ليهلكـه ، وإنما ابتلاه ليمتحـــن صبره وعبوديــتـــــه ."


و كما قال سيد المرسلين "عجبا لأمر المؤمن إن أمره كله له خير و ليس ذلك لأحد إلا للمؤمن
إن أصابته سراء شكر و كان خيرا له و إن أصابته ضراء صبر فكان خيرا له"


فوطِّن نفسك على البلاء , و تذكر أن العبد في الدنيا ما هو "إلا كراكبٍ استظل بظل شجرة ثم قام و تركها "


و أن البلاء لا ينفك عن الدنيا و عن عباد الله المؤمنين

و أن الله لا يبتلي ليعذب و إنما لمحص و ليُثيب

و أن البلاء صغر كان أو كبر فأنت مثاب عليه

و مهما كان البلاء , فأنت قادر على تحمله لأن الله و تعالى أعلم بك و يعلم أنك تتحمله ,
و لا تجعل بلاءك في الدنيا عقابا بسخطك عليه , لكن اجعله ثوابا برضاك و صبرك

و جزاكم الله خيرا على حسن قراءتكم لما كتبته "لنفسي" و إياكم ,
و لا تنسونا من دعوة صالحة بظهر الغيب

فما كان من توفيق فمن الله و ما كان من خطأ فمني و من الشيطان
و إن كانت هنالك أي أخطاء إملائية أو تخريجية أو في أي حاجة , خصوصا في الآيات الأحاديث فأرجو إعلامي بها لأصححها , أو أي حديث ضعيف قد أكون ذكرته , رغم أني اعتمدت على برنامج "الجنى الداني من دوحة الألباني" في ذكر الأحاديث ههنا ,


و سلام على المرسلين و الحمد لله رب العالمين .


و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

tazbee6.blogspot.com


أو على الأقل تذكر إنه منقول

......................


تحيتي

.....




18 comments:

  1. تعرف انا اول مره فى حياتى ارد فى مدونه اى حد طول عمرى مش بحب المدونات دى مش عارفه ليه بس انا اول لما قريت الكلام بتاعك ده مقدرتش اشيل عينى من عليه الا لما خلصته و قريته كذا مره كمان ,,هو مش جديد عليا الكلام ده بس الفكره فى الاسلوب الجميل بتاعك اللى طالع كده من جواك علطول مش كتاب جاى تسمعه زى ما معظم الناس بتعمل
    بص انا مش هعلق على الموضوع لان بعد الكلام ده انا عن نفسى مش هقدر اقول اى كلام غير انت بجد انسان محترم ربنا يكملك بدينك و بعقلك

    ReplyDelete
  2. متميز كالعاده .. يابشمهندس ..
    تسلم ايدك ..
    وإلى الأمام دائماً ..

    ReplyDelete
  3. عبير

    شكرا جزيلا على المرور

    طيب الحمد لله إني كنت اول مدونة تردي عليها ..
    أنا لي الشرف :)

    و على فكرة أنا مش بحب المدونات برضه
    يعني ما تلاقي للمدونة زوار من أهل التدوين ..
    لكن معظم الزائرين من غير المدونين

    و الحم دلله إن الأسلوب كان سهل و وصل و الحمد لله

    لأنه فعلا طالع من جوايا بعد صراع مع القرف دام كثيرا ..
    لكن الحمد لله

    و سيبك من حكاية إنسان محترم و متدين دي ..

    ادعي لي بالتوفيق و الهداية بس ..

    و ربنا يستر عنكم عيوبي ..

    تحيتي و الشكر الجزيل لمرورك

    ReplyDelete
  4. smska

    أهلا بيكي
    دائما ..

    و بجد ألف شكر على المتابعة ..
    سلمت لنا تعليقاتك المشجعة ...
    بجد جزاكِ الله خيرا

    تحيتي

    ReplyDelete
  5. ربنا يهديك ويهدينا و يثبتك ويثبتنا .

    اللهم ارزقنا قبل الموت توبة
    وعند الموت شهادة وبعد الموث جنة ونعيما

    جزاك الله عنا خيرا

    ReplyDelete
  6. مصطفى ...

    آمين ..

    و جزاك الله خيرا ..

    و لا تنسنا من الدعاء ..

    ReplyDelete
  7. جزاك الله عنا خيرا

    مش اقلك اكتر من كدا

    ربنا يكرمك

    ReplyDelete
  8. ربنا يجرمك يا غير معرف ..

    و جزانا و إياكم ...

    و بجد إوعى تنسنا من الدعاء ...

    جزاك الله خيرا ..

    ReplyDelete
  9. سمو الاميرOctober 16, 2008 at 3:52 PM

    والله أنت راجل محترم

    ربنا يجازيك كل خير

    ويثبتك ع الطريق الصح

    ReplyDelete
  10. سمو الامير ..

    الله يخليك

    و يهدينا و إياك ..

    و شكرا جزيلا على المرور .

    تحيتي

    ReplyDelete
  11. بصراحه اسلوبك يشد

    صحيح ما تفرحش بنفسك وتغتر و الشيطان يضحك عليك انك بقيت شيخ الازهر الجديد


    بس بحب اقول انك بتقرا محاضره او درس لشيخ و تحولها لاسلوب شبايى جااااااامد

    ربنا يباركلك ويزيد علم ولا يضلك او يفتنك فى دينك

    الى الامام دائما

    خلاص ياسيدى الرغى خلص

    ReplyDelete
  12. غير معرف

    شكرا جزيلا على المرور

    و التعليق

    و ربنا يقينا الفتن ما ظهر منها و مابطن

    و أن يبعدنا عن العجب و الرياء و سائر الأمراض

    و عندك حق إن الغرض الأساسي من المدونة هو توصيل الكلام بطريقة تانية كنت مفتقدها في يوم من الأيام ..

    فحبيت أعملها للناس التانيين

    و لعلمك أنا بخاطب نفسي أولا و أخيرا .
    و اقرأ اللي أنا كاتبه في أ,ل المدونة بره خالص ..

    ربنا يتوب علينا و يسترنا

    جزاك الله خيرا على المرور

    و على فكرة ..

    أنا شاكك بنسبة 97.5% -مجموع الثانوية بتاعي :) - إني عارفك و إني تكلمت معك قبلا ..

    حاسس بكده مش عارف ليه .. يمكن من الأسلوب و استخدام بعض المفردات في كلامك ..

    خلاص يا عم هو أنا هقعد أحلل شخصيتك ..

    شكرا جزيلا بجد على المرور ..

    بس يا ريت ما تنساش الدعاء .. بجد ..

    تحيتي

    ReplyDelete
  13. اولا :: انا بحب اشكرك بجد على المجهود الرائع في المدونة ككل ..

    وبحب اشكر كمان على الموضوع الشيق دا

    اسلوبك في الكتابة فوق الرائع

    صدقني ومتكذبنيش لو قلتلك ان المدونة دي عندي في المفضلة وبدخلها اقرا المواضيع نفسها تقريبا 3 مرات في الاسبوع . :)

    مع إني بعمل بلاوي ونفسي اتوب :(

    بدخل اقرأها كل يوم لعل وعسى أكون في يوم انسان كويس زي حضرتك .

    جزاك الله خير

    أخوك ....

    ReplyDelete
  14. غير معرف ,

    أهلا و سهلا بك أخي الحبيب ,
    مش عارف أنا حبيتك ليه من التعليق بس ,

    يمكن لأني زيي زيك بعمل بلاوي و أتوب , بس بحاول أوعي الناس من البلاوي اللي بعملها بأسلوب جديد شوية ,
    فأنا مش إنسان كويس و لا غيره ,
    و زي ما أنا كاتب في أول المدونة إن الواحد مش سوبر متدين , و إني أعظ غيري بموعظتي لنفسي ,

    عموما شكرا جزيلا على الزيارات المتكررة ,

    و يارب بعد كل الزيارات دي ما تكونش ناسينا في دعاءك ,

    أي دعوة بالخير في ظهر الغيب ..

    و جزاك الله خيرا أخي الحبيب :)

    ReplyDelete
  15. مساءك فرح ورضى من الرحمن يا أستاذ
    وجمعة مباركة عليك وعلى المسلمين جميعاً
    وقبل كل شيء
    السلام عليكم ورحمة الله وبركاته
    حقيقة احتفظتَ بهذه المدونة لفترة طويلة وللتو تفحصتُ مفضلتي فوجدتها وقرأتها
    فعلاً ماشاء الله عليك أخي الكريم جداً اسلوبك سهل ويصل بطريقة أسرع من أسلوب التنميق والكتابة التي قد تكون أحياناً رغم سهولة أحرفها إلا إنها صعبة الفهم او صعبة الوصول لهدفها
    ربي يسعدك ويكملك بعقلك ويهديك ويهدي شباب المسلمين جميعاً ويحفظك من كل مكروهـ


    تقبل ودي وإحترامي
    أختك / Miss Huda
    المملكة العربية السعودية

    ReplyDelete
  16. Miss Huda

    و عليكم السلام و رحمة الله و بركاته ,

    و جزاكِ الله كل الخير على الكلمات المشجعة في حق المدونة و طريقتها ,

    و الحمد لله أن الدافع الذي من أجله بدأت هذه المدونة قد آتي أكله - أتمنى ذلك - ,

    فأنا لم ابدأ هذه المدونة بهذا الأسلوب إلا لأنني مررت بفترة ضياااااع حقيقي , لم أجد ما يدخل رأسي فيعيده إلى رشده حينها من ذلك الكلام المنمق ,

    فنويت أن أعظ نفسي و غيري بأسلوب تمنيت لو أن قد وُعِظت به حينها ,

    و أرجو من الله أن ينفعني و غيري به ,

    و جزاكم الله خيرا أختنا الكريمة ,

    و لا تنسي الدعاء بالخير ..

    ReplyDelete
  17. والله فعلا عندك حق
    لو حاولنا نفكر فيها هيك على طول
    رح بنكون راضيين قانعين وبنعيش بسعادة دنيا وآخرة ان شاء الله
    اسلوب مميز جدااا وبيصل بسرعه
    ربي يسلم قلبك وفكرك ويبارك بعمرك ويوفقك

    ReplyDelete
  18. سما أحمد :
    جزاكم الله خيرا ,

    و رحمكِ الله رحمةً واسعة , و أسكنكِ فسيح جناته ,
    و ألحقنا بكِ على خير بإذن الله

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ