زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

07 July, 2008

ايه ؟؟؟ ناوي تفضل مكتئب كده على طول ؟؟




بسم الله الرحمن الرحيم



ايه ؟؟؟ ناوي تفضل مكتئب كده على طول ؟؟



أنا الكئيب المكتئب .... أنا الحزين المحتزن -يعني ايه المحتزن دي ؟؟ -



أنا الكئيب .... أنا الانطوائي ...أنا القلقان .... أنا الحزين ... أنا "المتنيل" على عيني اللي ماليش أصحاب ....



أنا هفضل كدة على طول .. هعيش و أموت مخنوق ومهموم و قلقان و مكتئب و زهقان و متضايق ...



ترا راراراراراراااااااااااااا



هل لديك أقوال أخرى ؟؟ يا ريت بلاش علشان ما عندناش مناديل ....



بص يا سيدي - فين أيام الـ floppy - أنا معاك .. و مصدقك إن حالتك وحشة بجد ..

بجد عارف انك بتعاني و تعبان ... تعبان قوي ..

و برضه عارف إني مش ممكن أكون حاسس بيك 100% , ما حدش يقدر يحس بكل الألم اللي فيك غيرك انت ,



قال الأحنف بن قيس: شكوت إلى عمي وجعا في بطني فنهرني ثم قال:

يا ابن أخي : لا تشكُ إلى أحد ما نزل بك فإنما الناس رجلان : صديق تسوؤه و عدو تسره.

يا ابن أخي: لا تشكو إلى مخلوق مثلك لا يقدر على دفع مثله لنفسه ولكن اشك إلى من ابتلاك به فهو قادر على أن يفرج عليك.

يا ابن أخي : إحدى عيني هاتين ما أبصرت بهما سهلا ولا جبلا منذ أربعين سنة و ما أطلعت ذلك امرأتي ولا أحدا من أهلي .





أي حد تاني ممكن يحس بجزء صغير من اللي انت بتحس بيه ...

إنما ما يقدرش يحس بكل اللي انت حاسس بيه ... فلا تنتظر من أحد شيئا .... و :

لا تشكُ للناس جرحا أنت صاحبه *** لا يشعر الجرح إلا من به ألم



أوك يا دوك ؟؟؟



بس اسمحلي أسألك سؤال .... هتسمح و لا لأ ؟؟



شكلك كدة سمحت لي ... أسأل بقلب جامد



انت ... عاجباك حالتك ؟؟؟

عاجبك اللي انت فيه من كآبة و وَحشة - مِرات الوَحش يعني - و حزن و ألم - و أستيكة- و وحدة و .... إلخ ؟؟



مستريح يعني في الوضع اللي انت فيه ده و لا لأ ؟؟

لو مستريح , أو يعني تعبان بس مش قوي ... و مش طالبة معاك وجع دماغ علشان تغير نفسك أو حتى مش عاوز تحاول ...

خلاص يا "عمُنا" خليك زي ما أنت ... بس لي طلب أخير عندك ..

عاوزك تغمض عينييييييييييك - و ما تمسكش إيديا - و تتخيل جنابك بعد 5 سنين من دلوقتي ..
و انت عايش بنفس الأسلوب الكئيب بتاعك ,

في نفس الحزن و الألم و المعاناة اللي ممكن تكون انت شايفها قليلة دلوقتي و انت اتأقلمت عليها ,

تخيل حالك بعد 5 سنوات من الآن ... حالتك هتبقى شكلها ايه بعد تراكم 5 سنين من الكآبة و الحزن المتواصلين ...

حالتك مع نفسك هتبقى شكلها ايه ؟؟ هتتخنق من نفسك ؟؟ مش هتطيق نفسك ؟؟
و لا هيبقى شكلك ايه بالضبط ؟؟

حالتك مع عيلتك و أسرتك , أو مع زوجتك و أطفالك - بفرض انك عرفت تتجوز يعني- هتبقى إزاي ؟؟
هتبقى عصبي ؟
و لا هتبقى انطوائي و ما حدش هيحب يكلمك ؟
و لا هتبقى حزين كدة و شكلك "يجيب الكآبة" لأي حد ؟

حالتك في شغلك - ده برضه بفرض إنك فارقت مكانك على رصيف العاطلين - تعاملك مع زملائك , بصاتهم ليه ؟ وجهة نظرهم عنك , تعاملهم معاك ...



تخيل .... تخيل نفسك بكل الحاجات الكئيبة و الحزينة و التشاؤمية اللي جواك دي لما تكبر كمان خمس سنين ... هتبقى أحسن و لا أسوأ من دلوقتي ؟؟



طيب تخيل نفسك بعد كمان 5 سنين ... كل الحاجات دي هتبقى إزاي ؟

الناس هتكرهك علشان انت كئيب ,

أو طز في الناس ,

انت هتفضل عايش 10 سنين بتتعذب علشان ما أعرفش مين سابك , و لا مين خدعك و لا علشان انت عصبي و "حمقي" حبتين , أو متوتر و بتقلق بسرعة أو أي حاجة ,

و لا هتفضل عايش 10 سنين و انت بتكره نفسك و مش طايق نفسك و كاره الدنيا باللي فيها ...



هتبقى مبسوط و لا لأ ؟؟

عاوز الصراحة ؟؟



هفترض انك قلت انك هتكون مش مبسوط ...

يبقى الحق نفسك ... انت دلوقتي , لسه الـ10 سنين ما فاتوش و لا حالتك بقت سيئة قوي زي ما انت تخيلت قبل شوية ... يعني لسه فيه أمل ... - فيه أمل و سعاد و فوزية كمان -



و أهم حاجة انك تكون عاوز تتغير ...

يبقى دلوقتي .. لو سمحت , ما تكملش قراءة إلا لو كنت فعلا عاوز تتغير و شايف ان اللي انت فيه ده غلط , و تتمنى انه يتغير , بصرف النظر إذا كنت مقتنع انه ممكن يتغير للأحسن أو لأ , المهم انك نفسك تبقى أحسن و خلاص , حتى لو شايف ان ده مستحيل .. خليك معانا و المية تكدب الغطاس !!!


...


ممكن حد يقول : ييييه ... يا عم ماشي , أنا مكتئب و عاوز أبقى مبسوط ... بس ما ينفعش , المشاكل و القرف و الذكريات المؤلمة من كل جانب ... ما ينفعش ما أكونش حزين و لا مكتئب !!!



بص يا سيدي المشاكل أو الحاجات اللي قارفاك و مزعلاك و مخلياك مكتئب أصابتك منذ متى ؟؟

سنة مثلا ؟ سنتين ؟؟ شهر ؟؟ شهرين ؟؟

طيب انت بدأت الاكتئاب و الخنقة و الحزن و الهم من قد ايه ؟؟

تقريبا من نفس التاريخ .. صح ؟؟ أو من بعدها بشوية , يعني بعد المشكلة بشوية حضرتك رحت "مديها" اكتئاب و بكاء على الأطلال و الذي منه .. صح ؟؟



طيب ... هاه و بعدين ؟؟ ايه اللي حصل ؟؟؟

ما حصلش حاجة ... صح ؟؟



يعني الكآبة و الحزن و الخنقة و الهم اللي انت فيه لم يحلوا المشكلة !!!! صح ؟؟

لو كانوا بيحلوها أو حتى بيخففوها قلت قلت لك يا عم عيط و افلق نفسك من العياط , و خلص مناديل قد اللي خلصتهم أم كلثوم في حياتها كلها , و "اصرخ و قول يا لهوتي" بس للأسف , ما لهمش أي تأثير إيجابي ,



و بعدين عيني في عينك كدة ... بالله عليك .. ما زهقتش من نفسك و حالتك التي يؤسى لها دي ؟؟ و مش نفسك تعيش حياة طبيعية عادية زي أي حد عايش عادي يعني , مش هقول لك مبسوط و "مزقطط" لكن عايش عادي من غير الهموم و الكآبة طول الـ24 ساعة دول ؟؟؟

عاوز الصراحة ....

......

أمال انت متمسك بيهم ليه ؟؟؟

احتمال تكون اتعودت عليهم .. بجد , فعلا انت ممكن تتعود عليهم زي أي حاجة بتعملها فترة و بتتعود عليها ,

أو تكون بتحاول تقنع نفسك أو تكون شايف إنك لما تعيش نفسك في الكآبة و الاكتئاب فأنت كده بتعاقب نفسك اللي انت كارهها , أو بتثبت وفاءك للشخص اللي "كنسلك" - على فكرة هو فعلا كنسلك , و ما يستحقش منك ده كله , انسى زي ما نسى هو !!- , أو شايف ان الحزن و الهم يعتبروا تبرير للحالة اللي انت فيها قدام الناس , يعني لو انت مثلا مش لاقي شغل و عايش مبسوط الناس هتقول شوف الواد اللي ما عدهوش دم ده , إنما انت بتكتئب علشان "يتبسطوا منك" و يقولوا شوف يا حبة عيني الواد "الحسيس" اكتئب علشان مش لاقي شغل ....



يا عم يولع الناس على كلام الناس ,

انت أهم حاجة يا عم الكتكوت .....



ما حدش من الناس د ول هينفعك خالص , و لا حتى الشفقة أو المساندة العاطفية دي , انت اللي المفروض تسعد نفسك وما تستناش عطف و لا مساعدة من حد ....





و بعدين العملية مش مستاهلة "أي دمعة حزن" ياض ... و الله ما هي مستاهلة :



رأى إبراهيم بن أدهم رجلا مهموما
فقال له: أيها الرجل إني أسألك عن ثلاث تجيبني
قال الرجل: نعم .
فقال له إبراهيم بن أدهم: أيجري في هذا الكون شئ لا يريده الله؟
قال : كلا
قال إبراهيم : أفينقص من رزقك شئ قدره الله لك؟
قال: لا
قال إبراهيم: أفينقص من أجلك لحظة كتبها الله في الحياة؟
قال: كلا
فقال له إبراهيم بن أدهم : فعلام الهم إذن؟؟ !



- و على فكرة ... احنا اتكلمنا عن موضوع الهم و طبيعته و الاستفادة منه في موضوع :
إيييييييييييييه .... دنيا !!!


دلوقتي أنا عاوزك تبقى مقتنع إنك لازم تتغير و إن وضع الكآبة و الحزن و الهم اللي انت فيه ده لازم يتغير .. و إنك انت بس -بمدد من الله قبل كل شيء طبعا- اللي هتقدر تساعد نفسك ... الناس ممكن يدلوك أو يرشدوك .. لكن انت بس اللي هتقدر توجه نفسك و تمشيها و تنتشلها مما هي فيه ..



هاه ... خلاص اتفقت معايا في الثلاث نقاط السابقة دول ؟؟

يبقى ندخل على الخطوة التانية ... معلش .. هطول شويتين .. استحملني ...



دلوقتي هنتكلم عن التغيير ... و التغيير زي ما بيقول بتوع الحكومة ... لازم ينبع من الداخل ...



و علشان الداخل يتغير يبقى لازم تديله بديل ...

لأننا زي ما تكلمنا في موضوع سابق -عاوز أبطل ... ما تبطلشي !!!-
انك ما تقدرش تلغي حاجة في دماغ جنابك العالية ... إنما ممكن تستبدل ,



يعني عمرك ما هتقدر تقول أنا من النهارده هانسى الحزن ... إنما لازم تحط حاجة تانية تعملها و تملى عليك الفراغ اللي هيسيبه في داخلك ..

يعني مثلا انت أكيد هتلاقي نفسك متعود أول ما تقعد على السرير مثلا تنتابك الأحزان و اللذي منه ,,,

لو عملت فيها واد جامد و برضه قعدت على السرير و قعد تقول : مش هفتكر الأحزان , مش هفتكر الحاجات اللي بتخليني مكتئب .... هتلاقي نفسك بكل بساطة , افتكرت كل حاجة تخليك مهموم و مكتئب ..



إنما تحط حاجة بديلة , يعني مثلا أول ما تقعد على السرير تجيب كتاب تقرأه , تمسك الموبايل و تديها ميسدات على اصحابك ..... تعمل اي حاجة , المهم أن تجد بديلا عن الشيء اللي انت ناوي تبطله ..



أهم حاجة بقى يا عم الأمور في علاج الاكتئاب "و سنينه" هو ....... الهدف !!!

انك يبقى عندك غاية و هدف تصبو إليه ..-حلوة تصبو دي- ,

طول ما انت عايش كده من غير هدف هتلاقي نفسك "عايش و مش عايش" و مش قادر على قرف الدنيا دي ... و كل شوية هتكتئب لأنك مش عارف انت بتعمل ايه هنا أصلا ؟؟

على فكرة .. أنا كنت لمدة طويلة مش عارف أحط هدف برضه , و مش عارف أنا عاوز أبقى ايه ؟؟

بس الحمد لله , بعد ما استخدمت هيد أند شولـ.... قصدي بعد ما قرأت كتاب بعنوان "الرسالة أو الرؤية" للدكتور صالح الراشد الموضوع اتظبط , الكتاب ماشي معاك خطوة بخطوة و بجد إن شاء الله هيخليك تقتنع بضروة أن يكون لك هدف , و كيف تضع هدفك ...

و هذا هو رابط الكتاب :

http://www.saaid.net/book/open.php?cat=98&book=3547

بعد ما حضرتك حطيت الهدف إن شاء الله , و ما خدتنيش على قد عقلي و نزلت الكتاب و لم تقرأه .. لازم "تخش و بلاش تكش" على الخطوة التالية ..



دلوقتي ... لازم جنابك تعمل زي أحمد زكي و ...... تتقدم ترارارارا اتقدم ترارارارارارا ...

يعني ما تقبفش محلك سر ... كل يوم لازم تقرب و لو 1 ميكرون من هدفك - بس بلاش 1 ميكرون دي , خليها أكبر شوية - , حتى لو بقدر ضئيل و بمعدل بطيء ..

لأن طاقة الإنجاز طاقة رائعة جدا و من أكبر الحاجات المضادة للاكتئاب ... لما تحس إنك عملت حاجة , حتى لو بسيطة , هتزيد ثقتك في نفسك , و هتلاقي "الكابتن" تأنيب الضمير و جلد الذات "هدّى اللعب" ... المهم ما تعديش اليوم إلا و تكون عملت حاجة حتى و لو كانت صغيرة ... ما تنساش دي الله يخليك علشان دي مهمة قوي ..



و ما تنساش الهدف الأساسي الذي من أجله خلق الله السماوات و الأرض ... العبادة !!!

و افتكر أول ما تصاب بهم في الدنيا إنها فانية و مش مستاهلة , و إنها مش هدفك الأساسي أصلا , انت هدفك الآخرة و الدنيا ما هي إلا جسر للآخرة , فمش مستاهلة تعمل في نفسك كل ده ,

عن عبد الله بن مسعود قال: لو أن أهل العلم صانوا العلم ووضعوه عند أهله لسادوا به أهل زمانهم ولكنهم بذلوه لأهل الدنيا لينالوا به من دنياهم فهانوا عليهم سمعت نبيكم صلى الله عليه وسلم يقول: " من جعل الهموم هما واحدا هم آخرته كفاه الله هم دنياه , ومن تشعبت به الهموم في أحوال الدنيا لم يبال الله في أي أوديتها هلك "



برضه اعمل حاجة جديدة في حياتك .. جدد حياتك ... أي حاجة و لو كانت بسيطة بس تبقى جديدة ..علشان تعمل زي "ميلودي" و "تقتل الملل" و الرتابة –على فكرة دي قناة مملة طحن ... هي اللي عاوزة تتقتل - , و ما يبقاش "اللي تبات فيه تصبح فيه" ..

يعني لو هتقرأ صفحة من كتاب يوميا .. أو تحفظ مثلا خمس آيات بس في اليوم أو .... المهم تعمل أي حاجة جديدة و "تنجز" حاجة جديدة كل يوم ...



حاجة مهمة برضه .. الرياضة للجميع يا عمو , و بما أنك من الجميع تبقى الرياضه ليك انت كمان ...... ابسط يا عم ...

كنت قرأت إن النشاط الرياضي بيخلي الجسم يفرز هرمون مش عارف ايه كدة , اللي بيخليك تشعر بالسعادة , ده غير الثقة بالنفس و جريان الدم في عروقك و في الأماكن اللي ما كانش بيقدر يوصل لها في العادة من غير الرياضة ...

يعني لو مثلا هتعمل كل يوم 150 ضغط -مش للدرجة دي يعني , أنا بجيب 20 بالعافية - أو أي حاجة في البيت لو مش قادر تمارس رياضة خارج البيت ... المهم انك تعمل نشاط رياضي و خلاص ...



آخر حاجة بقى علشان لو الكلام اللي فات ده ما جابش نتيجة معاك ... يبقى تاخد على دماغك شوية ... و يا ريت ما تزعلش مني ... الكلام ده لو انت لسه مش ناوي تتغير و تخرج بره مود الكآبة ده ....



انت عامل فيها مكتئب و حزين و وحيد و مهموم و متنيل على عينك ..... ما تجمد ياد .. استرجل كده و خليك راجل .. و بلاش دلع !!!

فيه ناس قدك و أصغر منك رجالة و بيموتوا و بيتبهدلوا كمان ...

الشباب اللي قدك في فلسطين مثلا أو العراق أو ...... بلاد المسلمين كلها متبهدلة يعني .. دول عندهم مشاكل أكتر منك عشرميت مرة .. لو كل واحد منهم اكتأب و قعد في بيتهم يبكي على الأطلال كده علشان قريبه مات مثلا أو مش لاقي شغل أو الاحتلال اعتقل أخوه و لا أبوه و لا .... لو كلهم اكتأبوا كده .... مين اللي هيشيل البلد و يرجع الحق لأصحابه ؟؟

و لا انت علشان متدلع حبتين و ما خدتش على دماغك فعايش الدور بقى ...؟؟

على فكرة ... ممكن قوي تكون انت عايش الدور بجد ...

يقول أحد الصالحين : إذا قصّر العبد في العمل .... ابتلاه الله بالهموم !!!!!!!



أيوة , قاعد فاضي , لا تعمل لا لدنياك و لا لآخرتك .... لازم يبتليك الله بالهموم ... لأنك مش مقدر النعمة الي انت فيها ...



و قد قال رسول الله صلى الله عليه و سلم : "نعمتان مغبون فيهما كثير من الناس : الصحة و الفراغ" !!!
مغبون يعني خسران ,


ما هو انت لو تشغل نفسك و تستفيد بوقتك اللي انت عمال تعيط فيه ده , تساعد حد , تعمل حاجة تتعلم حاجة , تدرس فقه مثلا, تحفظ قرآن ... تعمل أي حاجة مفيدة , علشان ربنا يمن عليك و يطلعك من اللي انت فيه ده ...



و بعدين انت زعلان على ايه أصلا ؟؟؟



ده انت تبوس ايدك "شعر و دقن" –على فكرة , تقبيل اليد بعد الصلاة أو في أي وقت لحمد لله ليس له أصل , بل بدعة !!!-, ده فيه ناس زي ما قلت لك مطحونين أكثر منك , لكن "مسترجلين" و مش مستسلمين زيك كده ...



ما تبصش لمودي و توتي اللي مش عارفين يودوا الفلوس فين و بيروحوا الشركة عند دادي يوم و عشرة لأ , و البنات بتجري و راهم ,,,

بص لمن هم أقل منك علشان تعرف ربنا أنعم عليك قد ايه :

قال رسول الله – صلى الله عليه و سلم- : "إذا نظر أحدكم إلى من فُضِّل عليه من المال و الخلق فلينظر إلى من هو أسفل منه" متفق عليه
و في رواية لمسلم
"انظروا إلى من هو أسفل منكم و لا تنظروا إلى من هو فوقكم فهو أجدر أن لا تزدروا نعمة الله عليكم"




و بعدين انت تقعد تكتئب لي و اللي قدك في "أوروبا و الدول المتقدمة" عمالين ينحتوا في الصخر و يتقدموا علشان يركبوا على كتافنا أكتر و أكتر ؟؟؟

لعلمك يعني ... انت كده بتعمل لمصلحتهم ... هم كل شوية يعملوا حرب و توترات في المنطقة , علشان يحبطونا و يجيبولنا الهم من بلاده ... و هم في بلادهم بجد يعني , الطلبة و الموظفين و الناس و الذي منه ما بيخلوش حكاية الحرب دي تأثر عليهم ... ده إذا كانوا أخدوا بالهم منها أصلا ...

هتقول لي دول عالم ما عندهمش دم أصلا ...

إزاي أنا أشوف إخواننا في فلسطين و العراق و أفغانستان و الشيشان و .... بيموتوا و بيضطهدوا و بيتبهدلوا و ما أزعلش ؟؟؟ ده أنا كده ما يبقاش عندي دم ؟؟؟

شوف يا سيدي ...

واحد من أمريكا اسمه ستيفن كوفي , الراجل ده عمل كتاب مشهور قوي اسمه "العادات السبعة للأشخاص الأكثر فاعلية"
-ممكن تقرأهم في الموضوع ده :
العادات السبع للأشخاص الأكثر فاعلية-
, اتكلم فيه على حاجة اسمها
دائرة التأثير و دائرة التأثر !!!


شبه لك المشاكل اللي حوالينا بدائرة سوداء كبيرة سماها دائرة التأثر ...

و شبه قدراتنا و اللي احنا نقدر نعمله بدائرة بيضاء صغيرة في وسط الدائرة السوداء و سماها دائرة التاثير ...

قال لك لما يبقى واحد زي حالاتك شايف الدائرة السوداء , و مركز عليها و عمال كل شوية يقول المشاكل و البلد و الدنيا و القرف ... عمره ما هيوصل لحل ... بل على العكس لازم يكتئب لأنه فعلا مش هيلاقي حل لأنه ليس له يد في الحاجات اللي بتحصل دي و ما يقدرش يغيرها ..

إنما اللي "ينفض" للمشاكل اللي حواليه و يحاول ينساها و يركز على الدائرة البيضاء و ما يستطيع فعله , و يحاول ينميه ... هيلاقي الدائرة البيضاء تكبر و تكبر لحد ما تغطي على الدائرة السوداء و تبقى أكبير منها كمان ...

يعني اللي عمال يقول لك رغيف العيش و البطالة و الحرب و العراق و فلسطين و ..... ده آخرته كآبة مستعجلة , عمال يبص على الدائرة السوداء و عمره ما هيقدر يغيرها ...

إنما اللي يفكر في الدائرة البيضاء ... أنا ممكن أعمل ايه ؟؟

ممكن أدعيلهم , ممكن أتفوق علشان أبقى عالم كبير و أصنع صواريخ أضربهم بيها , أو أنتج أدوية أعالج بيها إخوتي , أو أساعد أهلي و أطور بلدي و أطلعهم من حالة الذل دي و أخلي الناس عندها ثقة في ربها ثم في نفسها و أننا نستطيع أن ننتصر ... و .......... حاجات كتيرة ممكن بيها توسع الدائرة البيضاء لحد ما تبقى أكبر من الدائرة السوداء ... أو على الاقل تبقى كبيرة شوية –عمر ما الدائرة السوداء ما هتختفي ... لأن الدنيا دار بلاء أصلا و الشر فيها كما فيها الخير - ...



يبقى الله يكرمك ....

سيبك من حالة الحزن و الكآبة اللي انت فيها دي ,

و اجعل الهموم هما واحدا... هم الآخرة ...

و "كن في الدنيا كأنك غريب أو عابر سبيل"

و اعلم أن "الدنيا ملعونة ملعون ما فيها إلا ذكر الله و ما والاه , أو عالما أو متعلما"

و لا تقصر في العمل كي لا يبتليك الله بالهموم ..

و "اعلم أن ما أصابك لم يكن ليخطأك و ما أخطأك لم يكن ليصيبك , و اعلم أن النصر مع الصبر و أن الفرج مع الكرب , و أن مع العسر يسرا "
و برضه ما تنساش .. أن الله قال (و الذين جاهدوا فينا لنهدينهم سبلنا)
يعني العملية برضه مش سهلة... هي عاوزة مجاهدة ... بس لو هتجاهد ..ربنا هيوصلك ,
و لما تقع في النص و ترجع تاني لا تيأس ...
يقول ابن القيم :

لابد من سنة الغفلة

و رقاد الهوى

و لكن كن خفيف النوم

فحراس البلد يصيحون : دنا الصباح
يعني انت بشر , و لازم هتخطيء و لازم هترجع لأي حاجة كنت عليها من آن لآخر

فلا تيأس , و اعرف ان ده أمر طبيعي ,
و ما تخليش من انتكاسك ذريعة "للتبليط" في الخط

.......






و آسف جدا إذا كنت قد قسوت عليك ... لكن ما فيش وقت , و العملية مش مستاهلة ...
و أنا نفسي كنت زيك كده في يوم من الأيام –قصدي في أيام كتيرة من الأيام .. سنين - ,
لذا فأنا أكلمك كما كنت أحب أن يكلمني أحدهم ... و أحاول أن أنقذك كما منَّ الله عليّ و أنقذني ...




و آسف على الإطالة ....

و لا تنسنا من دعوة صالحة بظهر الغيب ... قال صلى الله عليه و سلم :
" إذا دعا الرجل لأخيه بظهر الغيب قالت الملائكة آمين ، ولك بمثل"




فقط ادع الله أن يوفقني لما يحب و يرضى و يغفر لي و يتوب علي و أن يرزقني الجنة و ينجني من النار .... و إياك و جميع المسلمين و المسلمات ....



و ............

إن كنت لم أنتبه بالذي *** وَعظتُ به فانتبه أنت به !!!



و سلام على المرسلين و الحمد لله رب العالمين


و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<


لو رأيت إنه يستحق النشر
بشرط عدم التبديل أو التغيير

و يا حبذا أن تذكر رابط المدونة :

أو على الأقل تذكر إنه :
" منقول
من مدونة تظبيط "
ـ

......................


تحيتي

.....

13 comments:

  1. انت وصلت لصالح الراشد وستيفن كوفي كمان

    يخرب عقلك
    هو الواحد ميعرفش يقرأ حاجة في السر ابدا

    :))

    بص يا عم انت

    أولا بس عايز اقولك انك لكاك قوي - خف شوية

    ثانيا عايز اقولك ان لكك دا عايز يتمسك من حته لاني بتوه في الموضوع وممبقاش عارف منين يودي على فين

    ثالثا بقى محدش واخد منها حاجة عشان نكتئب -حقيقة لسه نمكتشفها من يجي كام شهر كده :)

    رابعا ودا المهم - ربنا يبارك لك ويبارك فيك ويهديك ويجعلك زخرا للمسلمين


    بس خلاص

    واييييييييييييه

    ReplyDelete
  2. ياباشا أنا الحمدلله

    وصلت من زمان ..

    بس تهت أو تعلقت بيهم أكثر مما تعلقت بالأسباب الشرعية

    علشان كده سبتهم ..

    بس الحمد لله أخيرا قدرت أوفق بين الجميع ..

    و "تظبيط" إنما هي محاولة جادة مني للدمج !!
    شفت الكلام الكبير :)


    2 )و أنا معاك في حكاية التوهان دي :)
    للأسف أنا أكثر من واحد قايلين لي عليها ..
    بحاول أمسك نفسي و أنا بكتب ..
    و المحاولات مستمرة .. تعالى امسك معانا :)


    3 ) حبيبيي العبد لله لسه مكتشف العملية دي حديثا برضه ..

    من نص السنة اللي فاتت بس :)

    4 ) ربنا يبارك فين او إياك يا رافع من روحي المعنوية بكريك كلماتك الحلوة , و مغير كاوتشة قلبي , و نافخ حياتي بحبك :)

    و ايييييييييييييه -برضه-

    ReplyDelete
  3. بارك الله فيك
    بالتوفيق
    http://allinone5.blogspot.com

    ReplyDelete
  4. Besm Allah Alrahman Alraheem,
    This is the first time I read in your blog. Masha'a Allah, I like your style and I think it's very effective. I just wanted to say Jazakom Allah Khairan, and wanted you to know that I took the time to read many articles. Please keep the spirit and keep writing. It's really benefitial.
    Apologies for using English. I don't have an arabic keyboard handy
    Akhok Nour Aldeen
    naulabi@yahoo.com

    ReplyDelete
  5. جزاك الله خيرا يا نور ..

    بارك لله فينا و إياك ..

    و نفعنا بما نقول ..

    ReplyDelete
  6. جمييييييييل جداااااااا الكلام ..هون عليا شوية الحالة اللى انا فيها...

    تسلم ايدك ...

    بحييك على مدونتك الرائعة...

    ReplyDelete
  7. شكرا جزيلا يا غير معرف على كلامك ...

    و الحمد لله إن الكلام جه بفايدة ..

    بس ما تنساش الدعاء ..

    تحيتي ..

    ReplyDelete
  8. ما شاء الله لا قوة إلا بالله
    اللهم بارك

    ربنا يبارك فيك يا أخي ويعزك
    جزاك الله عنا خير الجزاء

    ReplyDelete
  9. جزانا و إياكم يا أحمد ,

    و ربنا ينفعنا و إياكم بما نقول و نكتب

    ReplyDelete
  10. السلام عليكم ورحمة الله و بركاته ..
    مش عارفة ليه حسه انك رسمت الدنيا بينكي جدا
    يمكن عشان انا مش في المود ..

    طيب الحمد لله الواحد عدي مرحلة تحديد الهدف و عارف هو عايز يعمل ايه ..
    بس مش عايز يشتغل و يذاكر و يتعب ؟؟
    فلما مش بيلاقي نفسه بينجز بيكتئب و لما يلاقي الوقت بيعدي اكتر بيكتئب ..


    الواحد فعلا نفسه يوصل لهدفه و نفسه كمان مش بس يحقق ذاته لأ و كمان يعمل تأثير في اللي حواليه ؟؟

    بس للاسف مش بعمل حاجة
    و ترجع تاني للاكتئاب
    و كانها دايرة مقفولة عايزة اعمل و مش بعمل فبكتئب ..

    اضافة بسيطة للمكتئبين و من ضمنهم أنا
    الاكتئاب او عامة الحزن او الضغط strees
    الناتح عن سبب معين و السبب ده مش بيتغير يعني لو فضلت طول عمرك مكتئب عشان اكس من الحاجات
    ده من الاسباب المسببة لل(الزهايمر )

    و ربنا يفرج هم المهمومين و يفك كرب المكروبين ..و يجعل اكبر همومنا هي الاخره و لا يجعل الدنيا مبلغ علمنا ..

    ReplyDelete
    Replies
    1. و عليكم السلام و رحمة الله و بركاته

      هو الكوباية مش مليانة و لا فاضية ,
      هي فيها مية لكن مش لآخرها

      لكن زي ما حضرتك بتقولي ,
      كل واحد بيشوف الوضع حسب حالته النفسية

      بالنسبة طالما الهدف موجود , لكن مش بنمشي فيه أي خطوات ,
      ممكن نحاول ناخد أي خطوة و لو بسيطة جدا
      يعني مجرد إننا نفكر فيه يوميا و نفتح الورقة اللي كاتبينه فيها و نقرأها ... دي خطوة كويسة جدا

      و ممكن نعمل لنفسنا هدف تاني و هو البدء في الهدف الأول :)

      بجد , يعني لو الظروف مش متاحة للبدء في الهدف الرئيسي ,
      ممكن نعمل هدف تاني لمحاولة تذليل العقبات أمام الهدف الرئيسي

      و ربنا يهدينا و يتوب علينا و يشرح صدورنا و جميع المسلمين

      Delete
  11. بجد بجد جزاك الله خيرا رفعت من روحى المعنوية شوية وعملت داونوود لكتاب الرسالة و الرؤية وان شاء الل هاقراه دعواتكم بقى الاقى هدف لحياتى علشان اعرف استقر واركز كده

    ReplyDelete
    Replies
    1. جزانا و إياكم ,
      و ملحوظة صغيرى علشان الإحباط :
      لو مش هتقدر تنفذ الهدف دلوقتي .. اكتبه برضو
      و ابدأ في هدف تاني يكون غرضه هو تذليل عقبات الهدف الأساسي
      أو ملء الوقت بشيء نافع لحين تيسر الأحوال و تهيئتها و سماح الظروف لتنفيذ الهدف الأساسي

      Delete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ