زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

15 July, 2008

كن "عبيطا" ترى الوجود جميلا !!




بسم الله الرحمن الرحيم
-------------



بص يا سيدي ,
انت عاوز تبقى مبسوط لا لأ ؟

-- طبعا أيوة ,بس ازاي , مش شايف الدنيا اللي حواليك ؟ و لا انت عايش في كوكب تاني ؟

على مهلك يا عمي , أنا معاك حتى مش اسمه كوكب الأرض بالأمارة ؟
طب سمعت المقولة اللي بتقول "كلما زادت ثقافة -أو علم- المرء زاد بؤسه" ؟؟
أو سمعت المتنبي و هو بيقول :
ذو العقل يشقلا في النعيم بعقله **** و أخو الجهالة في الشقاوة ينعم !!!

-- أيوة ما أنا قصدي كده , ما احنا لو كنا أغبية أو ما بنحسش كان زماننا عايشين مبسوطين , إنما المشكلة اننا بنحس و بنتأثر و بنعرف كل المصايب و المآسي اللي بتحصل حوالينا ,
ده احنا لو ما اتأثرناش ما يبقاش عندنا دم , و لا نكون بشر من أصله ,

طب ما نفسكش تكون زي "و أخو الجهالة في الشقاوة ينعم" اللي المتنبي بيقول عليه ده ؟؟؟

-- مممم , بصراحة ساعات باتمنى اني كنت ما بحسش أو جاهل مالوش في الطور و لا الطحين , أي نعم هكون جاهل , بس كنت هبقى مبسوط و مش حاسس اني جاهل أصلا !!
بس ما ينفعش أكون جاهل خلاص , احنا في الواقع , و أنا مش جاهل , يعني ما ينفعش أبقى سعيد و أنا شايف و حاسس كل اللي بيحصل حواليا .

طيب اللي يخليهالك "و أخو المفهومية في الشقاوة ينعم" ؟
يعني تيجي نخليك تحس باللي بيحصل حواليك و تعرفه كله , لكن ما تتأثرش بيه و لا يجيلك إحباط و قرف و زهق ..... إلخ , بل على العكس , هيخليك أحسن و يدفعك للأمام ؟؟

-- مممم , طب قول مع اني شاكك في كلامك , بس نسمع , مش هنخسر حاجة , اطربنا يا سيدي و "المية تغرق القرطاس" ...


أقول لك يا سيدي , طالما احنا بادئينها شعر من الأول , يبقى نبدأها شعر هنا ,
سمعت عن بيت الشعر اللي بيقول :
ليس الغبي بسيدٍ في قومهِ *** لكن سيد قومه يتغابى !!!
بصراحة البيت ده عجبني جدا ,
فعلا , مش من الذكاء انك تبقى "حِمَقِي" و كل حاجة تعلق عليها و تدخلها جوه "نافوخك" , فيه حاجات سيبها تعدي "بمزاجك" لأنه ما فيش فايده من انك تعلق عليها أو تلتفت ليها أصلا , هتنرفزك و تعصبك و خلاص , و انت راجل "صاحب مرض" و الانفعال مش كويس علشانك
على فكرة أنا كنت قرأت قبل كده مقال عن الstresses و كان بيقول فيه ان حوالي 50% من مشاكلنا و انفعالاتنا و التعصب اللي بيجيلنا كل يوم ,ممكن نتجنبة بـ "التجاهل" just
let things go

يعني مثلا انت ماشي و حسيت ان الراجل ده بيتكلم عليك أو جارتكم دي بتبصلك بصه مش تمام , أو حتى واحد بيرمي بالكلام عليك , ساعتها انت أكيد هتتصرف بأحد الاحتمالين , اما انك تشبك في خناقه زي الأهبل , و هيقول لك ايه الراجل العبيط ده , حد عملك حاجة و لا حد وجه لك كلام ؟؟
أو انك "تكز" على سنانك طول ما انت ماشي و تقعد تشتم فيهم و تلعن الجيرة "السو" اللي في شارعكم دي , أو الناس و لاد الـ*** -الرقابة بقى - اللي ماسكين الرايح و الجاي "لبانة" في بقهم ,

أو حتى ممكن مواقف زي الزحمة في المواصلات أو رخامة سواقين الميكروباص أو أي حاجة "عابرة" من اللي بتحصل كتير لينا كل يوم , كل الحاجات دي بتنرفزك و "بتعككنن" عليك يومك , صح ؟
بص يا عمي , لو حرقة دمك دي هتخليهم يسكتوا أو هتخفف عنك الزحمة أو القرف اللي حواليك , أنا معاك يا سيدي ... ولع في دمك و في نفسك كمان ,
إنما المشكلة انها ما بتحلش أو بتفيد أي حاجة , بالعكس , هي يتزيد قرفك و زهقك كمان و كمان ,
يبقى انت تخلي ناس زي دول أو مواقف زي دي يعملوا فيك كده ليييييييييييه ؟
رد عليا .. انطق يا جبان

-- ممممم , يعني أسكت لهم ؟ يعني ؟

.


ما هو انت لو ما سكتش هتبقى زي الاهبل اللي بيخانق دبان وشه و مش هتخلص من المواقف اللي زي دي لأن " انت أكيد في مصر" , يبقى هتسكت , و ما تحرقش دمك , بل بالعكس , تذكر قول الشاعر :
اصبر على كيد الحسود فإن كيدك قاتله
فالنار تأكل نفسها إن لم تجد ما تأكله

يبقى انت ما تحرقش دمك , و حاول تستمتع بعظمة تحكمك في نفسك و تغلبك على الضغوط و عدم اكتراثك بيها ,

-- ممم , طيب دي علشان أنا ما ليش يد فيها و مش هاستفيد حاجة من النرفزة , طيب فيه حاجات تانية زي المسلمين اللي بيذبحوا في جميع أنحاء العالم , و الشتيمة اللي في حق الاسلام و الرسوم المسيئة للرسول -صلى الله عليه و سلم- , ده غير الفساد المحلي و الواسطة و المحسوبية و القرف اللي انت أكيد عارفه !!!

بص يا معلم , سأرد عليك زي الأول ان نرفزتك و غضبك مش هيفيدوك بحاجة , بل بالعكس , هيضروك
إنما حاجات زي دي , ما ينفعش تتجاهلها زي اللي قبلها , يبقى تعمل ايه ؟

ستيفن كوفي في كتابه الرائع "العادات السبع للأشخاص الأكثر فاعليه" رسم لسيادتك دايرة كبيييييرة و سوده , و رسم في وسطها دايره صغنونه بيضه ,
سعادتك بقى الدايرة السودة دي هي المشكلات و الواقع و القرف اللي احنا بنشوفه كل يوم
أما البيضه بقى , فتبقى انت , قصدي قدراتك و الحاجات اللي انت تقدر تعملها , و طبعا لأن قدراتك بالنسبة للواقع الأسود صغيرة جدا زي الدايرة البيضه دي ,

عمو ستيفن قال لك لو قعدت تبص على الدايرة السوده هتكبر أكتر و أكتر
لأن الحاجات الوحشة بتكبر مع الزمن ...
هتقعد سيادتك تتكلم عليها و هي عمالة تكبر و انت ما بتعملش حاجة علشان تحلها ..
أو إنك حتى تكبر الخير الصغير الموجود بنفس النسبة اللي الشر بيزيد بيها ..
يبقى تعمل إيه ؟

تحاول تبص على البيضه -الدائرة يعني - و تتجاهل السودة لأنك ما تقدرش تعمل فيها حاجة , خليك مع البيضه و حاول تكبرها أكتر و أكتر لحد ما تقضي الى السودة -في المشمش طبعا , انت بس هتكبرها , إنما الشر و الفساد لازم يبقوا موجودين , احنا مش في الجنة يا زعيم-

-- كلام نظري برضه , يعني ايه سوده أكنسلها و بيضه أوسعاها و الكلام البايظ ده ؟؟


بسيطة يا سيدي , بدل ما هتسأل نفسل "ليه" هتسأل نفسك "ازاي" ؟؟
يعني .....
بدل ما تقول هم الناس وحشين ليه و الاسلام ضعيف ليه , و كل الناس علينا ليه , و الفساد ماله جامد قوي ليه ؟؟
هتسأل بـ"إزاي" .... هتقول , إزاي أغير الناس الوحشين , إزاي أتجنب الناس "الرخمه" , إزاي أخلي الاسلام قوي ؟ إزاي أحاول أحارب الفساد أو أو حتى أتجنبه ؟

شوف , في الحالتين المشاكل موجودة , بس الحالة الأولى انت سألت نفسك و كلمتها بطريقة سلبية محبطه ,
أما الحالة التانية فانت سألت نفسك بطريقة مشجعة تدفعك للعمل ,
يعني بدل ما تقعد "تبكي على الاطلال " جنب التلفزيون و انت بتسمع الأخبار , هتسأل نفسك , أنا لوحدي كده أقدر أعمل ايه ؟ أنا ممكن أتفوق , ممكن أتبرع بفلوس , ممكن أوعّي الناس , ممكن أخاطب "الآخر" و أشرح له الحقيقة , ممكن أعمل حاجات كتيرة هي بسيطة آي نعم , لكني عملت و ما قعدتش و حطيت ايدي على خدي و خلاص ,

زي كل مرة , مع اني ما كنتش ناوي أطول , بس طولت برضه ,
حاجة أخيرة عاوز أقولها
كنت قرأت كتاب عن مهارات التعامل مع الضغوط
بيوصف عده طرق لتعامل الناس مع الضغوط و ردود أفعالهم , منها :
- التصدي للمشكلة.
- طلب الإسناد الاجتماعي.
- طلب الإسناد الانفعالي.
- ضبط النفس.
- الخيال والتمني.
- التجنب والهروب.
- العدوان.
- الإبدال.
أما آليات الدفاع أو (الحيل) أو ميكانيزمات الدفاع فهي:
- الكبت.
- التعويض.
- التبرير.
- التحويل.
- التكوين العكسي.
- النكوص.
- التوحد (التقمص).
- ""التسامي. ""
- الخيال.
- الإسقاط.

اللي يهمنا فيهم هو "التسامي" : "إن هذه الآلية الدفاعية تخفف من شدة الصراعات والتوتر الداخلي لدى الإنسان من خلال تحويل تلك الأفكار والصراعات إلى مجالات مفيدة وسليمة ومقبولة اجتماعياً، كما أنها تمكن الفرد من الإبقاء على هذه الصراعات مكبوتة وبعيدة عن الوعي ."

يعني تخلي الظروف اللي حواليك دافع ليك للنجاح و التفوق , سواء في المذاكرة -علشان أنفع بلدي- أو الابتكار -علشان يبقى عندنا منتجات و صناعات و ما نحتاجش لحد- , أو أدبيا -أكتب شعر أعبر فيه عن ما في نفسي, أو أي مقالات- , أو اجتماعيا -تتكلم مع الناس اللي تعرفهم و تحاول تطورهم و تنفع مجتمعك علشان تزيل الانهزامية اللي في النفوس دي - , و في مجالات كتيرة , انت و حسب شغلك و تفكيرك ممكن تلاقي أكتر من طريق و وسيلة لتحويل الضغوط و المشاكل اللي حواليك لأفعال مفيدة لك و "لأسرتك " و للمجتمع كله ...

خلالالالالالاص بقى أنا تعبت ,

و أرجوكم ما حدش يكسل ,
لو حد استفاد أي حاجة يدعي لكاتب الموضوع الأصلي "اللهم تب عليه و وفقه لما تحب و ترضى و أدخله الجنة و أجره من النار"
و الله خيرا ...و آسف على الإطالة .

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com


أو على الأقل تذكر إنه منقول

......................


تحيتي

.....


14 comments:

  1. إشطة عليك يا هندسة ... ايه الكلام الكبير ده ؟؟
    الله ينور
    بس نصيحة
    حاول تعمل البوستات اللي زي كده على 3 او 4 مرات ... علشان بصراحة ناس كتير مش هاتقدر تكمله ... زيي
    lol
    بالتوفيق .. و الى الأمام

    ReplyDelete
  2. كمان اشطة -غيرالاشطة اللي فوق -
    ونقول السلام عليكم ورحمة الله وبركاته

    دلوقت اتأكدت من مقولة " خذ الحكمة من أفواه المحششين "

    اصلي شفت واحد مهيس يوم -غالبا كان ضارب واحد كابتشينو أخضر أو بني مش فارقة :) -

    قال الحكيم أبو سجارة -: " طنش تفحل "

    ودا التسامي في أسمى صوره

    مية مسا على أجدع مدونين

    سالخير

    ReplyDelete
  3. ابشروا .. هنقفل المدونات ونقعد فى البيت
    يوم الاربعاء 9/7/2008

    فى المصرى اليوم كتب الاستاذ / مجدى الجلاد عن مشروع جديد

    لتقييد الحريات واليكم المقال
    ---------------------------------------

    قانون «ذبح» الفضائيات .. والـ «فيس بوك»!

    ادعوكم لبحث هذا الموضوع الخطير قبل فوات الاوان

    ReplyDelete
  4. أحسن شاب في ابلد :

    ازيك يا أبو المعاتيز :)

    الله ينور عليك انت كمان .. و نشوف جنابك هنا على طول ..

    أنا ساعات بعمل الحكاية في في المنتديات ..

    بس في المدونة فين اللي هيقعد يجري ورا كل موضوع في البوستات المختلفة علشان يجيب آخره ؟؟؟

    عموا .. شكلها فكرة حلوة .. أجربها إن شاء الله ..

    شكر ليك يا معتز باشا :)

    بالمناسبة .. إيه أخبار المشروع ؟؟ :D

    اوعى تضرب .. خلاص خلاص :)

    ReplyDelete
  5. مصطفى باشا
    و عليكم السلام و رحمة الله و بركاته

    يا جابر بخاطري .. يا معلي راية مدونتي في مدونات اللينكس و الأنظمة الأخىرى :)

    قشطة تانية ؟؟
    كده قشطتين في الراس يوجعوا :)

    عموما .. لا تعليق على كلام المهيسين بتاعك من قبل المحششين أمثالنا ..

    روح نام ياد

    ReplyDelete
  6. أشتاذ حسن ..

    ربنا يبشرك بالخير ..

    هو احنا كده كده قاعدين في البيت .. سواء المدونة اتقفلت أو ما اتقفلتش ..

    خليهم يقيدونا كمان و كمان ..
    هيقفلوا خرم هنفتح عشرة ..

    هننشر المدونات على البلوتوث كمان :)

    ReplyDelete
  7. السلام عليكم
    كن جميلا ترى الوجود جميلا
    ما اعرفش اغير جيت متاخر
    هو بصراحه التطنيش في كتير من الامور بتريح الاعصاب بس في الناس زي حالاتي ما املكشي للاسف الفن دا لان العبط والاستهبال والتطنيش بيحكمهم قوى مش عندي وبحاول بس مفيش فايده الي كان كان بس الحمد الله بقدر اخد حقي باحترام وبحاول اغير الي بتعامل معاهم وفيهم صفات مش متناسبه معايا من غير ما اشعرهم ان الطبع دا مش حلو او الاسلوب ممكن بطريقه معينه من تصرفاتي اخليهم يتغيروا طبعا للاحسن وانا مش ملاك انا ليا اخطائي الكتير بس الحمد الله انا بعيش واتعلم من الي اجده كفاءه وقدوه ممكن اني اخد منه حاجه واتعلم يعني هاقولك موقف حصل معايا في المدرسه بما اني مدرسة انا بعاقب الطالب الي بحس انه مش خلوق من الاخر يعني قليل الادب وبيوم من الاسبوع بتيجي موجهه عالمدرسه بتشوف بعض الطلاب فهي بقت شافتين وانا بضرب ولدين وكلهم والله عصيتين للتاديب والتربيه مش للعنف والضرب المبرح ورفعت عليا تقرير المهم انا روحت بعد ما اطلبت لاجتماع عن الموضوع دا فبقول للمدير انا عارفه قبل ما تقول اي كلمه بالنسبه لمبارح وكدا انا مسؤوله عن تصرفاتي قدام اي حد سواء من الاهل او من الاداره ولو مفيش ثقه انا مش عايزه اكمل فاتضح ان المخلوقه الي بحترمها جدا للاسف وصلت اني ضربت ضرب مبرح وانا سابقا متفقه على اسلوبي مع المدير مسبقا في اني احيانا هلجا لاسلوب التاديب بعصايه ودا عشان احسس الطالب واحسن سلوكه مش والجيل بجد بحاجه لحزم وشده مع اسلوب يعني الكلام دايما مش بيفيد بالتغيير خصوصا انهم ولاد مش بنات يعني انا بتفكيري عمري بجد ما فكرت اني ممكن اضرب حتى لو عصايه صغيره بس الي يجرب ويشوف ويعيش التدريس مش زي الي بيقول نظريات المهم انا شتيت عن الموضوع عارفه المخلوقه دي ابعد ما تكون عن المرشده النفسيه شكلا ومضمونا اولا بالتدخين ثانيا بالالفاظ الي لا تنم ابدا عن انسانه متعلمه وبتحل مشاكل الناس المفروض انها تقوم نفسها اولا واخيرا وانا لو ناقشتني بحكايه الضرب المبرح بوجهه نظرها هاخد واعطي معاها بس هي اساسا مش اهل لاني اخد معلومات منها ومن غير ما امدح نفسي واللهي دا انا قريبه جدا من الطلاب سواء من ناحيه دراسيه او نشاطات وفعاليات في المدرسه وللاسف هي عارفه كدا كويس جدا وعارفه ان الطلاب بيحبوني جداااا وفي احيان كتير بيلجاوا ليا مش ليها مع اني مش بحسسها بكدا بالعكس بساعدها في الحل .. وفي الاخر ما قدرشي استهبل !! بس مش بياس ولا بكره وبحاول اغير وكل واحد ونيته في الاخر
    اسفه للاطاله
    تحياتي
    زوزو

    ReplyDelete
  8. زوزو ,

    و عليكم السلام و رحمة الله و بركاته ,

    بصراحة القصة اللي ذكرتيها تدعو للإحباط بجد , لأن الواحد لما يُجازى بعكس عمله بتبقى حاجة تأثيرها في النفس سيء جدا ,

    و موضوع التربية و التعامل مع الناس من أكثر المواضيع الشائكة اللي بتقابل الناس في حياتهم ,

    اللي أنا كنت بحاول أقوله في الموضوع هو اللي انتي وصلتي له في تعاملك مع الشخصية دي ,
    و هو إنك لم تسمحي لها أن تصيبك بالإحباط ,
    بل تجاهلتيها على قدر المستطاع ,
    و كما قال القائل : و من جفاك فقد أعتقك ,

    و ربنا يوفقك و يوفق كل المدرسين في شغلهم بجد ,
    لأن عليكم مهمه كبيرة جدا جداااااااا ,

    ربنا يعينكم عليها ,

    ReplyDelete
  9. تصدق الموضوع ده بالخصوص واحد بعتهولي قصد يعني .. لآني كنت لسه متعـارك مع واحد كدة .. و حسيت إني في كلام موجه ليا فعلا . زي كدة > " فعلا , مش من الذكاء انك تبقى "حِمَقِي" و كل حاجة تعلق عليها و تدخلها جوه "نافوخك" "
    المشكلة إني كدة و أي حد يفكـر مجرد تفكير إنه يتعوج مش بسكت له و بديله على نفوخه " حلوة نفوخه دي "
    المهم تسلم يا باشا على موضوعك الجميل

    ReplyDelete
  10. اممم كلام جميل و عجبني جدا

    اولا احب اشكرك على طريقتكـ ف عرض المشكلة بما اني اول مرة ادخل المدونة

    و زي ما قال احد المتواجدين ياليتها تبقى متقسمهـ ثووية صووغنانين

    و احب اشاركـ بحاجة ع طول كنت بسمعها


    (( طنش تعش تنتعش ))


    بس ما اعتقدش اننا نقدر نطنش اي حاجة و لا كل حاجة

    يعني انا عن نفسي مش بعرف اطنش و دمي بتحرق

    بس بحاول اهدي الوضع عشان ما ولعش ف اللي قدامي بكبريت و جازز اسود

    بس يلا الحياه مازلت مستمرة سوااء طنشت او لا

    و اعتقد انها نعمة من ربنا ان احنا بنحس و الا كانت الحياه هتبقى وردي اوي

    للعلم انا قريت نصها بس ف اسمحلي بجد >< سووري

    ReplyDelete
  11. طالبُ الجـنـة :
    يا هلا و سهلا فيك يا زعيم ,
    و الحمد لله إن الموضوع جالك في وقته ,
    أي خدمة يا سيدي , مع تظبيط , أسرع دليفري في مصر :)


    و ما تنساش الدعاء لنا بالخير الله يكرمك ,

    ReplyDelete
  12. صمت الكلام :
    الحمد لله إن الكلام شدك و ماكانش ممل ,
    و شكرا على الاقتراح بخصوص التقسيم ,
    إن شاء الله ننفذه قريب ,

    و جزاكم الله خيرا على المرور ,
    و لا عليكم من عدم إكمال القراءة ,
    المهم الاستفادة ,

    جزاكم الله خيرا

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ