زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

02 September, 2011

مع ( خط الدجال ) ... وداعا للسحر و الأعمال



السلام عليكم و رحمة الله



انتي ...
نفسك تتجوزي ؟؟
نفسك يكون عندك بيت و أسرة و أطفال ؟؟
نفسك تبطلي تغني :
طلعت فوق السطوح هز الهوى كُمّي ... كل البنات اتجوزت و أنا قاعدة جنب أمي !!
لكن المشكلة إن الفارس لسه ما جاش على حمارته العرجة ,


انت ...
نفسك تنجح بقى و تخلص تعليم ؟؟
نفسك تبطل تاخد مصروف من أبوك ؟؟
نفسك ما تسمعش كلمتين في جنابك كل ما النتيجة تظهر ؟؟
و نفسك تبطل تغني :
أنا مهما ذاكرت مدبلر , أنا مهما عملت هشيل
مش ممكن يوم هتغير , مش ممكن أجيب تقدير !!

دلوقتي ... الحل عندنا ,
خط الدجال !!
لفك جميع أعمال السحر و المس و كل ما يتعلق بالعفاريت
كل اللي هتعمله ,
تتصل بـ 0900 0900
و هيرد عليك دجالين متخصصين يقولوا لك هتعمل إيه

مع خط الدجال , وداعا للسحر و الأعمال

...................

للأسف كثير من المسلمين النهاردة بيخلوا حياتهم متوقفة على العفاريت و السحر ,
و بيعلقوا على الشماعة دي أي مشاكل أو هموم تصيبهم ,
تلاقي البنت لو تاخر زواجها يبقى معمول لها عمل ,
و الواد لو عصبي يبقى لابسه جوست
و غيرها ,

مع إن دي ممكن تبقى مشاكل عادية مالهاش علاقة بالجن خالص ,
ممكن تكون مشاكل محتاجة معرفة بالدين و التوكل على الله و حسن الظن بالله و غيرها
أو حتى ممكن تكون مشاكل نفسية ليها علاج طبي عند الدكاترة النفسيين ,

لكن خليني أفرض معاك إن فعلا فيه إنسان معمول له عمل فعلا او به مس من الجن ,
إيه المشكلة في كده ؟؟
على العكس , ده علاجة يبقى أسهل من علاج الاكتئاب و الأمراض النفسية الأخرى ,

ليه بقى إن شاء الله ؟؟

ببساطة لأن ربنا بيقول عن الشيطان :
{ إِنَّهُ لَيْسَ لَهُ سُلْطَانٌ عَلَى الَّذِينَ آمَنُوا وَعَلَى رَبِّهِمْ يَتَوَكَّلُونَ (99)
إِنَّمَا سُلْطَانُهُ عَلَى الَّذِينَ يَتَوَلَّوْنَهُ وَالَّذِينَ هُمْ بِهِ مُشْرِكُونَ (100)} [النحل]
" إن الشيطان ليس له تسلُّطٌ على المؤمنين بالله ورسوله , وعلى ربهم وحده يعتمدون ,
إنما تسلُّطه على الذين جعلوه مُعينًا لهم وأطاعوه , والذين هم -بسبب طاعته- مشركون بالله تعالى" [التفسير الميسر ]

يعني ببساطة علشان تخلي الشيطان لا يضرك , حقق الشرطين اللي في الآية :
آمن بالله حق الإيمان , الإيمان اللي فيه يقين و ثقة و رضا و حسن ظن , و ليس الإيمان باللسان وحده
و توكل عليه و فوض أمرك إليه , و اعلم أنه هو وحده الضار النافع ,
بس تعمل كده باستحضار و تدبر ,
يعني تستحضر و تركز إن ربنا فوق الجميع , و إنه ما من شيء يحدث في الكون إلا بعلمه
قال تعالى :
{ مَا مِنْ دَابَّةٍ إِلا هُوَ آخِذٌ بِنَاصِيَتِهَا } [هود - 56 ]
" فلا تتحرك ولا تسكن إلا بإذنه
فلو اجتمعتم جميعا على الإيقاع بي والله لم يسلطكم علي لم تقدروا على ذلك
فإن سلطكم فلحكمةٍ أرادها " [تفسير السعدي]

واخد انت بالك من {آخذ بناصيتها} ؟؟
تخيل إنك ماسك واحد من شعره و بتشده معاك ,
هتلاقيه ماشي معاك في أي اتجاه انت بتشده فيه و مش قادر يقاوم ,
أهو ربنا عز وجل آخذ بنواصي كل الخلق ,
و ما حدش يقدر يروح يمين أو شمال و لا يعمل أي حاجة إلا لو ربنا سمح له ,
فالجني ما يقدرش يؤذيك , إلا لو ربنا سمح له و أذن له ,
قال تعالى :
{ وَمَا هُمْ بِضَارِّينَ بِهِ مِنْ أَحَدٍ إِلا بِإِذْنِ اللَّهِ } [البقرة - 102]
و لو ربنا سمح له يبقى " لحكمةٍ أرادها "

يبقى انت دلوقتي بعد ما طبقت نصف الآية الأول و آمنت بالله ,
يبقى تكمل نص الآية التاني ,
فتتوكل على الله و ترمي حمولك عليه و تفوضه أمرك ,
و تعلم أنه يعلم ما أصابك , و أنه هو الوحيد القادر عن دفع الضر عنك ,
و أن هذا الجني الذي آذاك لا يملك من أمره شيئا ,
و أن ناصيته بيد الله , فتدعو الله أن يأخذ بناصيته بعيدا عنك و يدفع عنك شره ,


و لمعلوماتك فإن الجن ضعفاء جدا ,
كما قال الله تعالى :
{ إِنَّ "كَيْدَ الشَّيْطَانِ كَانَ ضَعِيفاً } [ النساء: 76 ]
و هناك خبر ذكره ابن كثير بسنده في تفسيره يقول فيه :
قال ابن أبي حاتم : حدثنا أبو سعيد يحيى بن سعيد القطان، حدثنا وهب بن جرير، حدثنا أبي، حدثنا الزبير بن الخرِّيت،
عن عكرمة قال :
" كان الجن يَفْرَقُون -يعني يخافون و يهربون- من الإنس كما يفرَق الإنس منهم أو أشد،
وكان الإنس إذا نزلوا واديا هرب الجن،
فيقول سيد القوم : نعوذ بسيد أهل هذا الوادي ,
فقال الجن : نراهم يفرقون منا كما نفرق منهم ,
فدنوا من الإنس فأصابوهم بالخبل والجنون "

و دي حقيقة صحيحة جدا ,
لأن الإنسان سهل جدا إنه يطرد الجن عنه ,
عن طريق إنه يعمل زي ما علمنا رسول الله صلى الله عليه و سلم
و يحافظ على الرقية و أذكار الصباح و المساء و أذكار النوم و غيرها


قال رسول الله :
(( يا ابن عباس ! ألا أخبرك بأفضل ما تعوذ به المتعوذون :
{ قل أعوذ برب الفلق } و { قل أعوذ برب الناس } هاتين السورتين ))
[ الراوي: ابن عابس الجهني - المحدث: الألباني -
المصدر: صحيح الجامع - الصفحة أو الرقم: 7839
خلاصة حكم المحدث: صحيح ]

و قال ‏ :
(( إن الله كتب كتابا قبل أن يخلق السماوات والأرض بألفي عام
أنزل منه آيتين ختم بهما سورة البقرة ،
ولا يقرآن في دار ثلاث ليال فيقربها شيطان ))
[ الراوي: النعمان بن بشير- المحدث: الألباني -
المصدر: صحيح الترمذي - الصفحة أو الرقم: 2882
خلاصة حكم المحدث: صحيح ]

و كما صدّق الرسول على نصيحة الشيطان لأبي هريرة بقراءة آية الكرسي :
" فقال : إذا أويت إلى فراشك فاقرأ آية الكرسي ،
لن يزال معك من الله حافظ ، ولا يقربك شيطان حتى تصبح . "
فقال النبي صلى الله عليه وسلم : (( صدقك وهو كذوب ، ذاك شيطان ))
[ الراوي: أبو هريرة- المحدث: البخاري -
المصدر: صحيح البخاري - الصفحة أو الرقم: 5010
خلاصة حكم المحدث: صحيح ]

و أحاديث الرقى كثيرة , لكن هذا ليس محل سردها ,

لكن فيه حاجة مهمة جدا في موضوع الرقية و الأذكار ده ,
إنك تفهم انت بتقول إيه ,
و إنك توقن بنتيجة و فائدة ما تقول ,

يعني مثلا و انت بتقول : حسبي الله لا إله إلا هو عليه توكلت و هو رب العرش العظيم
تبقى فاهم انك بتقول " حسبي الله " يعني الله كافيني و حاميني
و الله اللي كافيني و حاميني ده " لا إله إلا هو " , يعني مافيش إله آخر و لا أي حاجة أقوى منه تقدر تضرني
علشان كده أنا توكلت عليه و اعتمدت عليه و واثق فيه و هو رب العرش العظيم ,

لكن على الطرف الآخر لما مثلا انت بتتعوذ بالله من شر غاسق إذا وقب و من شر النفاثات في العقد
انت عارف يعني إيه أصلا ؟؟
يبقى إزاي الكلام هيطلع من قلبك و انت مش فاهم معناه أصلا ؟؟

يبقى لازم تفهم الكلام اللي انت بتقوله علشان تستحضره و تقوله من قلبك ,
لأن الله لا يقبل دعاءاً من قلبٍ غافلٍ لاهٍ

و حاجة تانية إنك تستحضر النتيجة من كل رقية بتقولها و تؤمن بذلك ,
يعني لما تقرأ آية الكرسي تبقى متأكد إن لن يقربك شيطان حتى تصبح ,
و لما تقرأ خواتيم سورة البقرة ثلاث ليالٍ توقن بأن الشيطان لن يقربك ,
و غيرها ,


و خلاصة القول علشان الناس اللي تاهت مننا :
إن كيد الشيطان ضعيف جدا ,
بشرط أن تؤمن بالله و تتوكل عليه
ثم تأخذ بالأسباب و تقرأ الرقية و أذكار الصباح و المساء و النوم و غيرها من الأذكار ,
لكن يجب أن تفهم ما تقول فلا تكن كمن يتكلم بكلام لا يفهمه , و يجب أن تؤمن بنتيجته
و إن لم يفلح هذا فاعلم أن الشيطان ليس هو من يضرك بنفسه ,
و لكن الله هو من سمح له بذلك , لحكمةٍ يراها الله
فلا تجزع من الشيطان , و الجأ لمن ناصية الشيطان بيده ,
و تضرع إليه أن يقيك شر كل دابةٍ هو آخذ بناصيتها ,
فإن الله يستحي إذا رفع العبد إليه يديه أن يردهما صفرا خائبتين ,
و لإن أخر عنك الإجابة فاعلم أنه إما أن يكون أخرها لوقت مناسب ,
أو ادخرها لك في الآخرة , أو دفع عنك من السوء مثلها ,
و إياك أن تيأس , أو تمل , أو تتعجل الإجابة ,
فإنه يُستجاب لأحدكم مالم يعجل , يقول : قد دعوت و دعوت فلم أر يُستجب لي ,

نسأل الله أن يعافي كل مبتلى ....

و أخيرا هذه بعض روابط للرقية الشرعية :
http://www.saaid.net/tabeeb/20.htm
http://www.tvquran.com/rouqia.htm

جزاكم الله خيرا

ـ
و لا تنسوا كاتب الموضوع من دعوة صالحة بظهر الغيب
أن يُعذه الله من الهم و الحزن , و العجز و الكسل و أن يُصلح الله له شأنه كله

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير

و يا حبذا لو تذكر رابط المدونة


أو تذكر أن الموضوع
" منقول من مدونة تظبيط "

ـ

16 comments:

  1. كنت لسه بسمع الشيخ حازم شومان ، كان بيقول : ربنا ميتجربش معاه .. ربنا عاوزك تعمل بيقين ، وتسأل بيقين ، وتدعي بيقين .. لأنه سبحانه قادر .. ولو مش عندك اليقين دا يبقى شك في الله ، حشاه سبحانه ..

    فعلا ، من غير الله يأتيكم به؟

    جزاكم الله خيرا على التذكرة يا باشمهندس .. وأعاذك الله من الهم و الحزن , و العجز و الكسل و أصلح الله لك شأنك كله ، وجميع المسلمين ..

    ReplyDelete
  2. شكرا لييييييييييك بجد

    غعجبتني المقوله دي
    وجت فوقتها جدا

    شكرا الك

    ReplyDelete
  3. زهـــــراء :

    جزانا و إياكم ,
    نسأل الله أن يرزقنا اليقين و حسن الظن به و معرفته حق المعرفة

    ReplyDelete
  4. sony2000 :

    عفوا ,
    و الحمد لله إن المقال أضاف جديد
    نسأل الله أن ينفعنا و ينفع بنا

    ReplyDelete
  5. سبحان الله فعلا !! كنت لسة بقول لنفسي "ما ممكن عين أصابتني عشان مافيش أي موضوع راضي يتسهل لي في أي حاجة وكل حاجة فيها مائة عقبة (الحمد لله :) ) مع إني بقول الأذكار" ... بس فعلا، كتير بقولها بسرعة ببؤي عشان يبقى اسمي قلتها وخلاص (تعويد يعني) ومش بحس بمعانيها أوي ولا إني فعلا ربنا حافظني لما أقولها

    وبنسى إن "واعلم أن الأمة لو اجتمعت على أن يضروك، لن يضروك إلا بشئ قد كتبه الله عليك" ... حديث الرسول صلى الله عليه وسلم

    ربنا يجزاك خير، ديما مواضيعك في محلها
    ربنا يعيذك من الهم والحزن والعجز والكسل والجن والبخل وغلبة الدين وقهر الرجال

    ربنا يجري الحق على لسانك إلى أن تلقاه

    ReplyDelete
  6. HopefulHopes

    جزانا و إياكم ,
    و جزاكم الله خيرا على الدعاء ,
    نسأل الله الإجابة

    ReplyDelete
  7. أسألك يارب أن تعيذه وإيانا من الهم و الحزن , و العجز و الكسل و أن تصلح يا الله له ولنا جل أمرنا
    واجعله يارب ذخرا للإسلام والمسلمين وقرة عين أهله.
    جزاك الله خيرا أخي.

    ReplyDelete
  8. ايومي:
    آآآآآآآآآآمين و إياكم و جميع المسلمين و المسلمات
    جزاكم الله خيرا

    ReplyDelete
  9. جزاكم الله خيرا ياتيمى
    ونفعنا واياكم بما
    نقرأ ونسمع
    ونعوذ بكلمات
    الله من شر ما خلق وبرأ

    ReplyDelete
  10. هي هذه أسهل طريقة للحصول على المبتغى ،الدجل والشعوذة ، وهذا من الجهل والعياذ بالله

    يعجبني جدا طريقتك في تسهيل طرح موضوعاتك ، بارك الله فيك وجعلها في ميزان حسناتك

    تقبل خالص الاحترام والتقدير

    ReplyDelete
  11. norahaty
    جزانا و إياكم يا د.نور
    نسأل الله ان يعيذنا من شر كل دابة هو آخذ بناصيتها

    ReplyDelete
  12. وجع البنفسج

    بارك الله فينا و إياكم ,
    نسأل الله أن يهدينا و يهدي بنا
    جزاكم الله خيرا

    ReplyDelete
  13. بالتوفيق والسداد
    تحيتي ومودتي

    ReplyDelete
  14. محمد ملوك :
    شكرا جزيلا على المرور أخي الكريم ,
    جزاك الله خيرا :)

    ReplyDelete
  15. تيمي D:

    كالعادة تناولت الموضوع بدلائل و خفة ظل ، و فعلا الدجل ده انتشر دلوقت...
    يعني مثلا في وسائل المواصلات العامة تلاقي إعلان صغير كده مكتوب عليه علاج بالرقية الشرعية...و بالتليفون (تكنلوبيا بقي xD)

    رغم إن (حسب معلوماتي) الموضوع مش محتاج بقي واحد بركة من بتوع الأعلانات دول...ده انت ممكن ترقي نفسك...أو حتي أي شخص قريب منك محافظ علي دينه...

    علي فكرة أنا وصلت لمدونتك من عضويتك (abc) علي منتدي إسمه حاجة مصر...مصر حاجة...حاجة زي كده xD

    زعلت أما عرفتك إنك سيبت المنتدي...بس الحمد لله وصلت لمدونتك...
    (ملحوظة : متاخدش مقلب في نفسك xP)

    أسلوبك جميل و مواضيعك منسقة ، و علي فكرة أنا كمان من عشاق تيمي تيرنر...

    معلش لو طولت...

    كان معكم...مايند فريك من المدونة التي لا يعرفها أحد !!
    : )

    ReplyDelete
    Replies
    1. أهلا و سهلا أيها العقل الغريب :)

      شكرا جزيلا على المقدمة ( النافخة ) - من الفعل : ينفخ - كما أشكرك على الدبوس اللي في آخرها :)

      فجزاك الله خيرا

      بالنسبة للمنتدى إياه فكان فترة و عدت , و سيبته لإن إدارة المنتدى كانت عقيمة

      أم هند ,
      بالنسبة لموضوع الدجل و الكلام ده , فعلا كلامك صح , ممكن الواحد يرقي نفسه , و ممكن يخلي واحد يرقيه لو توسم فيه قوة الإيمان ,

      إنما اللي بياخدوها تجارة و يقول لك خط الرقية و المصنف الاول على العالم في الرقية الشرعية و الكلام ده ... فكك منه :)

      لي عودة إلى مدونتك إن شاء الله , لكن بعد الغداء :)

      فقط أحب أن أذكرك بأنه :
      يا عزيزي كلنا فريكس
      freaks
      :)

      Delete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ