زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

31 May, 2011

ـ نص العمى و لا العمى كله !! ـ

بسم الله الرحمن الرحيم




خلونا ندخل في الموضوع على طول
و نبدأ بسؤال مباشر ,
مش حلزوني و لا لولبي :
لو انت بتعمل حاجات غلط , و شفت حد تاني بيعملها ,
هتأمره بالمعروف و تنهاه عن المنكر و تنصحه بالابتعاد عنها ؟؟

و لا هتقول :
" يا عم , اسكت , ما حدش عارف حاجة ,
كل واحد فيه اللي مكفيه
و أنا عندي مصايب و ذنوب كتير
و ربنا بيقول :
{ أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ }[البقرة : 44]
لما أبقى أبطل ذنوب أبقى أقول للناس هم كمان يبطلوا "


!!!!!!!!!!!!!!!!!!!!!!!!!!!!!


طبعا منطق مقنع , لأن زي ما عمنا الشاعر بيقول :
و غير تقيٍ يأمر الناس بالتُقى *** طبيبٌ يداوي و الطبيبُ مريضُ


لكنه للأسف منطق ( غير صحيحح ) !!
لأنه "  لو اشترط أحدٌ الخُلُوَّ من الذنوب للدعوة إلى الله, لما دعا إلى الله غير الانبياء المعصومين ,
لأن العدالة ليست شرطا في الآمر الناهي وإذا اشترطناها لم يأمر أحد بشيء،
إذ (( كل ابن آدم خطاء وخير الخطائين التوابون ))[الشيخ سعيد عبد العظيم]
[ الراوي: أنس بن مالك - المحدث: الألباني -
المصدر: صحيح ابن ماجه - الصفحة أو الرقم: 3447
خلاصة حكم المحدث: حسن ]
http://sonnaway.com/topic.php?action=topic&id=9266 

و كما نقل النووي في شرح صحيح مسلم :
" ولا يُشترط في الآمر والناهي أن يكون كامل الحال ممتثلا ما يأمر به مجتنبا ما ينهى عنه ،
بل عليه الأمر وإن كان مُخِلاً بما يأمر به ، والنهي وإن كان متلبسا بما ينهى عنه ;
فإنه يجب عليه شيئان :
أن يأمر نفسه وينهاها ، ويأمر غيره وينهاه ،
فإذا أخل بأحدهما , كيف يباح له الإخلال بالآخر ؟ "
http://www.islamweb.net/newlibrary/display_book.php?flag=1&bk_no=53&ID=204 

و نقل الحافظ ابن حجر في فتح الباري عن بعض أهل العلم قوله :
" يجب الأمر بالمعروف لمن قدر عليه ولم يخف على نفسه منه ضرراً
ولو كان الآمر متلبساً بالمعصية ؛
لأنه في الجملة يؤجر على الأمر بالمعروف ، ولا سيما إن كان مطاعاً ،
وأما إثمه الخاص به فقد يغفره الله تعالى له ، وقد يؤاخذه به "

يعني اللي بيعمل المنكر و بينهى عنه .... بيعمل ذنب واحد : 
و هو ارتكاب المنكر 
أما اللي يعمل المنكر و لا ينهى عنه ...... بيعمل ذنبين :
الذنب بتاع ارتكاب المنكر
و الذنب بتاع التفريط في النهي عن المنكر 

يعني زي ما بنقول بالبلدي كده : 
نص العمى و لا العمى كله
نص العمى إنك : ( تعمل ذنوب و لا تترك الأمر بالمعروف و النهي عن المنكر ) 
و العمى كله إنك : ( تعمل ذنوب , و تترك الأمر بالمعروف و النهي عن المنكر كمان )


- ممممممم , أمّال ليه ربنا بيقول :
{ أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ[البقرة : 44]


؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يقول صاحب تفسير السعدي في هذه آية :
" ليس في الآية أن الإنسان إذا لم يقم بما أمر به أنه يترك الأمر بالمعروف, والنهي عن المنكر,
لأنها دلت على التوبيخ بالنسبة إلى الواجِبَيْنِ،
وإلا فمن المعلوم أن على الإنسان واجبين : أمرُ غَيْرِهِ ونَهْيِهِ , وأمر نفسه ونهيها،
فترك أحدهما, لا يكون رخصة في ترك الآخر،
فإن الكمال أن يقوم الإنسان بالواجبين, والنقص الكامل أن يتركهما،
وأما قيامه بأحدهما دون الآخر, فليس في رتبة الأول, وهو دون الأخير "

و يقول ابن كثير - بتصرف - في تفسير الآية :
" فَكُلٌّ من الأمر بالمعروف و فعله واجب ،
لا يسقط أحدهما بترك الآخر على أصح قولي العلماء من السلف والخلف.
والصحيح أن العالم يأمر بالمعروف ، وإن لم يفعله، وينهى عن المنكر وإن ارتكبه،
قال مالك عن ربيعة: سمعت سعيد بن جبير يقول له :
لو كان المرء لا يأمر بالمعروف ولا ينهى عن المنكر حتى لا يكون فيه شيء ,
ما أمر أحد بمعروف ولا نهى عن منكر.
وقال مالك : وصدق , من ذا الذي ليس فيه شيء ؟ " 

- ماشي , بس برضه ما فهمتش قوي ,
أمال ليه ربنا في الآية السابقة ذم الناس اللي بيأمروا بالمعروف و ينسون أنفسهم ؟؟
يعني إزاي يذمهم ؟؟

و إزاي المفروض إنهم يأمروا و ينهوا حتى لو بيقعوا في المخالفة ؟؟

ابن كثير بيقول أيضا في تفسير الآية :
" ليس المراد ذمهم على أمرهم بالبر مع تركهم له ، بل على تركهم له -يعني البر-،
فإن الأمر بالمعروف معروف -يعني حاجة كويسة- وهو واجب على العالم،
ولكن الأولى بالعالم أن يفعله مع أمرهم به ، ولا يتخلف عنهم "

يعني ربنا في الآية فعلا ذمهم
لكن لم يذمهم على عدم موافقة أقوالهم أفعالهم
لكن ذمهم على تركهم فعل الخير فقط .
مش زي ما كتير مننا فاهم إن الواحد لو بيعمل معصية و بينهى عنها الناس
يبقى ذنبه أكبر من لو عمل المعصية و لم ينه أحداً عنها
ده فهم غلط 
 لكن طبعا الأَوْلى إن اللي بيأمر بالمعروف يكون بيعمل بيه
و إللي بينهى عن المنكر يكون بيجتنبه , 

- برضو مش داخلة دماغي قوي !!
يعني يا عم الشيخ , أبقى بشرب سيجارة مثلا ,
و واحد جنبي بيشرب زيي
أروح واخد نفس و نافخ في وشه , و أقول له :
على فكرة , السجاير حرام , لازم تبطلها !! 

و بعدين انت ناسي حديث رسول الله :
(( يُجاء بالرجل يوم القيامة فيُلقى في النار ، فتندلق أقتابه في النار ،
فيدور كما يدور الحمار برحاه ،
فيجتمع أهل النار عليه فيقولون :
أي فلانا ما شأنك ؟
أليس كنت تأمرننا بالمعروف وتنهانا عن المنكر ؟
قال : كنت آمركم بالمعروف ولا آتيه ، وأنهاكم عن المنكر وآتيه .))
[ الراوي: أسامة بن زيد - المحدث: البخاري -
المصدر: صحيح البخاري - الصفحة أو الرقم: 3267
خلاصة حكم المحدث: صحيح ]  

اجمع لي بين الاثنين بقى !؟

- بص يا سيدي ,
المسألة سهلة إن شاء الله و هي :
إن الواحد مفروض يأمر بالمعروف حتى لو مش بيعمله
و ينهى عن المنكر حتى لو بيعمله
زي ما قلنا في الكلام السابق


أما أحاديث الوعيد كما في الحديث السابق فهي إما : 
1- لمن كان يخالف قوله فعله بشرط :
أن يكون ممن يصر على المعصية و مش عاوز يتوب منها و لا حتى بيحاول ,
زي الباشا بتاع السجاير اللي انت بتقول عليه ده ,
أو منافق ,
زي علماء اليهود و النصارى اللي بيحرموا على الناس حاجات ,
و في نفس الوقت هم بيعملوها
أو
2 - الوعيد فيها ليس لأن قوله خالف فعله ,
لكن تلك العقوبة على الذنب نفسه الذي كان يرتكبه ,
أو الأمر الذي كان يتركه ,
و تذكيره بأنه كان يأمر الناس بالمعروف و ينهاهم عن المنكر هو من باب تأنيبه و إقامة الحجة عليه ,
يعني : العذاب ده جزاء ليك على فعلك المنكر الفلاني أو تركك الفرض الفلاني
و ما تقولش معلش ما كنتش عارف ,
لا, انت كنت عارف الصح من الغلط لدرجة إنك كنت بتأمر بيه الناس ,

و اقرأ كلام الشيخ سلمان العودة عن هذا الحديث في الرابط التالي :
http://audio.islamweb.net/audio/index.php?page=FullContent&audioid=13854#13854
فقرة : الوقوع في المعاصي لا يمنع من القيام بالنهي عن المنكر
مدونة تظبيط



و تنبيه أخير علشان ماحدش يفهمني غلط
ما حدش قال إن الذنوب حلال
و لا إن المجاهرة بالمعصية حلال  
الكلام كله على إن :
الوقوع في الذنوب لا يعفي صاحبها من الأمر بالمعروف و النهي عن المنكر
و اللي بيعمل الذنب  لغلبة الشهوة و النفس
و من غير إصرار و لا مجاهرة و افتخار و لا نفاق 
و في نفس الوقت بيأمر بالمعروف و ينهى عن المنكر
أفضل ممن يفعل الذنب و لا يأمر بالمعروف و لا ينهى عن المنكر 

و لأن أصلا مافيش إنسان معصوم من الذنب , 
فلو كل واحد استنى إنه ما يعملش ذنوب خالص علشان ينصح الناس , 
يبقى عمره ما هينصح حد , لأن عمره ما هيخلو من الذنوب , 
كما قال شيخ الإسلام ابن تيمية رحمه الله : 
" لا يقولن أحدكم لا أدعو حتى يكتمل إيمانى ,
فإنه بين أمرين: إما أن يموت ولم يكتمل إيمانه بعد ,
وإما أن يأتى يوم ويقول قد اكتمل إيمانى ... فليعلم أنه قد ضل !! " 

يا رب تكون وجهة نظري وصلت

جزاكم الله خيرا


نسأل الله أن يغفر لنا و يتوب علينا و يهدينا و جميع المسلمين


في أمان الله


..............

14 comments:

  1. عم ياااااااااااااااااااا

    انا ليا رأي
    ماحدش معصوم من الخطأ وكلنا بنغلط

    بس من اللي شوفتوا
    ممكن الناس تتقبل كدا
    بس اهم حاجه
    الاسلوووووووووووب
    اسلوب الكلام نفسوا

    هوا اللي بيفرق

    ReplyDelete
  2. السلام عليكم
    رائع كالعادة والأجمل فى كل المواضيع إن حضرتك مش بتسيب ثغرة للقارئ ، كل الأدلة موجودة ومتناقشة ما شاء الله ما شاء الله ،
    حضرتك طبعا شايف ايه اللى بيحصل والهجوم اللى على الإسلام الأيام دى وهوس الناس بالعلمانية وال...
    نفسى حضرتك تكتب مقال ترد بيه على كل ده ، أنا كان نفسى أوى أعمل كدة وأدور وأجتهد بس واضح إن مليش نصيب لأنى مضغوطة جدا فى الدراسة ،، بس حقيقى دمى محروق قوى إنى فى حاجات مش بعرف أرد عليها من الحاجات اللى بتهاجم الإسلام، وبشوف حاجات غلط بس معنديش أدلة أو حجج أرد بيها ،، للأسف مش قادرة أعمل حاجة ،، وآخرهم المقال ده
    http://www.almasry-alyoum.com/article2.aspx?ArticleID=298652
    مش قادرة أصدق بجد ،، وخصوصا إن ناس صحابى مقتنعين أوى باللى فيه ،
    على الآخر الزمن ييجى مش عارفة مين يقول أن الحضارة الإسلامية والتاريخ الإسلامى مكنش عادل ومش مثال نطبقه ولا...
    بجد لو حضرتك كتبت حاجة عن الموضوع ده ، حتبقى فى وقتها أوى
    بعتذر عن أى تدخل أو غلط فى كلامى
    ..

    ReplyDelete
  3. معلش حوضح حاجة أنا عارفة إن فى كمقالات كتير أوى وكمان الكتاب بتاع د محمد إسماعيل أساليب طمس الهوية الإسلامية ، بس كل المقالات تقريبا لشيوخ سلفيين ، و الناس مش بتفكر تقرالهم أصلا !!! ، فأنا كان قصدى على حاجة زى أسلوب حضرتك كدة ، الناس ممكن تقراها

    ReplyDelete
  4. انا برضه كنت كاتب موضوع شبيه يا تيمى وبتخيل انك كنت قريته برضه
    http://1-aim.blogspot.com/2011/06/50.html


    وعلى شارب الكاس أن ينكر على الجلاس



    على فكرة انا كنت بتابع مدونتك كل ما يقع تحت عينى لينك موضوع جديد وما أكدبش عليك تقريبا المدونة الوحيدة من اللى كنت بتايعهم زمان اللى يمكن دخلتها الفترة اللى فاتت دى كلها

    ReplyDelete
  5. ربنا يبارك في حضرتك
    كلام مهم جدا وباسلوب اعتدنا تميزه
    -----------------
    لا تنسى أختك من دعائك
    فهي في شدة الحاجه له

    ReplyDelete
  6. sony2000 :

    طبعا الأمر بالمعروف يجب أن يكون بالمعروف
    و النهي عن المنكر يجب أن يكون من غير منكر
    و قد أوصى الله تعالى سيدنا موسى عليه السلام - خير الخلق في زمانه - أن يكلم فرعون - شر الناس في زمانه - بالقول اللين لعله يتذكر أو يخشى
    فإن الله رفيق يحب الرفق ويعطي على الرفق ما لا يعطي على العنف وما لا يعطي على ما سواه
    كما قال رسول الله لأمنا عائشة
    و الذي يقرأ في كتب الفقه عن شروط الأمر بالمعروف و النهي عن المنكر يعلم كم أن دين الإسلام رفيق بكل الناس

    ReplyDelete
  7. Sarah Mohamed :
    و عليكم السلام و رحمة الله و بركاته :
    و جزاكم الله خيرا على الإطراء , نسأل الله أن يصاحبه دعاء بالخير

    بالنسبة لدعاة العلمانية و الرد عليهم , فأنا كنت أهتم بذلك في الماضي , و يضيق صدري إن تكلم أحدهم بكلمة و لم يوجد من يردها عليه ,
    إلى أن سمعت درسا للشيخ مصطفى دياب عنوانه " امش و لا تلتفت "
    http://www.youtube.com/watch?v=1ZnpKVrKvSc
    اقتنعت أننا يجب ألا نكون رد فعل , نرد عليهم كل قول ,
    لكن بدلا من أن نرد و نكون رد فعل على كل كلمة , يجب أن نبادر و نمضي في دعوة الناس أيضا للحق الذي نراه , و هكذا نأخذ نحن زمام المبادرة ,
    فإن أضل كلامه ناسا , سيهدي كلامنا ناسا آخرين , و نكون قد لعبنا دورا غير دور رد الفعل , و لا نضيع جهدنا في الرد على كل شاذة و فاذة قالها أحدهم

    و هذا مختصر من كلامٍبليغ لصاحب هذا المدونة :
    http://blog.hassanalhazmi.net/2009/07/blog-post_19.html

    ( امض ولا تلتفت واحذر من بنيات الطريق والمعارك الجانبية التي تستهلك الوقت وتفسد النفس دون أن يكون لها ثمرة ظاهرة
    هنا يحسن التأكيد على أن يكون غالب أمرنا في الفعل لا في رد الفعل، فنحن محتاجون لوضع منهج واضح نسير عليه ونصبر على ما يواجهنا في هذا الطريق دون أن نستهلك أوقاتنا في التفاعل مع ردود الأفعال المتفرقة والغير ممنهجة والتي ستقودنا إلى لا شيء، نحتاج أن نوطن أنفسنا على عدم استنزاف طاقاتنا فلسنا ملزمين بأن يكون لنا رأي في كل مسألة وموقف من كل حادثة. )

    و عذرا على الإطالة و لكن موضوع الرد على المخالفين مهم جدا , يحتاج إلى رد مطول

    ReplyDelete
    Replies
    1. أيوه، الشيخ محمد إسماعيل كان بيقول كدة فى الدرس بتاعه
      إن كان فى طيار حربى بيحكى إنه لو كل ما حد يضرب عليك حاجة فى طريقك لهدفك، ورديت عليه بضربة؛ هتضيع كل ضرباتك وعمرك ما هتوصل للهدف

      جامدين أوى إحنا فى الكلام، بس مين يطبق !! اللهم أعنا على العمل بما علمنا

      Delete
  8. د/عرفه :

    بجد سعيد بتعليقك ,
    موضوعك عن و بالنسبة لموضوع منى و صبحي و خالد
    فقرأته طبعا
    لكن بصراحة ما كانش عندي تعليق ,
    لأن مهاجمة التيارات الإسلامية دلوقتي بقت علامة مميزة في إعلامنا الموجه الممول من رجال الأعمال ,
    فلو قعدنا نرد على كل حد مش هنخلص , و هنضيع وقتنا معاه , و احتمال نكون بننشر رأية ده لما ناس تقرأ الرد بتاعنا و يكونوا ما سمعوش عن صاحب الهجوم ده أصلا ,
    ربنا يهدينا و يهدي الجميع و يوفقنا لما يحب و يرضى

    و شكرا جزيلا على متابعتك يا د.محمد ,
    و و الله الواحد كان متابع مدونتك من زمان ,
    لكن انت اللي هجرتها و غيرت نشاطك للفيس بوك :)
    شكرا جزيلا على المرور و التعليق يا دوك ,
    أدام الله المودة بيننا

    ReplyDelete
  9. ايومي :
    بارك الله فينا و إياكم ,
    و ربنا ينفعنا و غيرنا بما نكتب ,
    نسأل الله لنا و لكم العافية , و أن يقدر لنا الخير حيث كان و يُرضِنا به و يجعل عاقبة أمرنا كلها خير
    جزاكم الله خيرا

    ReplyDelete
  10. بتذكر اني قرأت مرة سؤال وجه للشيخ الشعراوي رحمه الله بخصوص الدعوة إلى الله والنهي عن المنكر .. وانه لو الشخص مش كامل هل يجوز له الدعوة للدين والاصلاح .. وكان رأي الشيخ انه نعم يجوز ، لانه مافيش انسان كامل .. لازم نجتهد في اصلاح انفسنا واصلاح الغير ..

    :::

    سعيدة لمروري هنا ، دمت بخير

    ReplyDelete
  11. السلام عليكم:
    (يا أَيُّهَا الَّذِينَ آَمَنُوا إِنْ تَتَّقُوا اللَّهَ يَجْعَلْ لَكُمْ فُرْقَانًا وَيُكَفِّرْ عَنْكُمْ سَيِّئَاتِكُمْ وَيَغْفِرْ لَكُمْ وَاللَّهُ ذُو الْفَضْلِ الْعَظِيمِ) ( الأنفال /29)
    حازم

    ReplyDelete
  12. وجع البنفسج :
    فعلا مافيش إتسان كامل ,
    علشان كده كله المفروض يساعد و ينصح بعضه
    رحم الله الشيخ الشعراوي رحمة واسعة ,
    و شكرا جزيلا على المرور و التعليق

    ReplyDelete
  13. أ.حازم
    و عليكم السلام و رحمة الله
    و لو تتذكر فهذا ردي الذي كنت أريد أن أخبرك فبه في الموضوع الذي تكلمنا عنه سابقا
    جزاك الله خيرا

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ