زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

15 May, 2011

ـ مش أي حد بدقن .. يبقى سلفي !! ـ



السلام عليكم و رحمة الله و بركاته ,


اسمحوا أسألكم سؤال علمي شوية , ماشي ؟؟
السؤال هو :
مين الحد اللي بيربي دقنه , و بيقصر بنطلونه أو جلبيته ؟؟


ها ؟؟ عرفتم و لا لسه ؟؟
طب هسهلها لكم و أديلكم اختيارات :
( السلفي - الجهادي - التكفير و الهجرة - التبليغ و الدعوة )

؟؟؟؟؟؟؟؟

ممممم
متهيأ لي الاختيار بقى صعب شوية , صح ؟؟
لسبب بسيط جدا و هو .....
كل الجماعات دي بتربي دقنها و بتقصر ثيابها !!
أيوة
و رغم ( الاختلاف الفكري ) و المنهجي الواضح جدا بين بعض الجماعات دي ,
إلا إنهم كلهم ( بيتشابهوا في الهيئة ) ,

لكن المشكلة إن الناس ما بتعرفش تفرق
و أي حد بدقن بيعمل أي حاجة بيقولوا عليه ( سلفي ) من غير تفكير !!
و يقعدوا يتهموا السلفيين تهم مالهمش ست آلاف دعوة بيها
و ألف باء عند السلفيين إن الحاجات دي ما ينفعش تتعمل
زي تكفير الناس و  قطع الودان و رش مية النار  
و الأمر بالمعروف و النهي عن المنكر باليد لغير ولي الأمر , وغيرها.

و هنا , يجب أن ( ينط ) سؤال مهم إلى مخيخ كل واحد ,
إزاي نعرف السلفي من الناس التانيين الكتير اللي شبهه دول ؟؟

هقول لك زي ما قال علماء السلف :
( اعرف الحق تعرف أصحابه )

اعرف أولا يعني إيه ( السلفية ) دي ,
بعد كده اللي هتلاقيه يطبقها يبقى سلفي ,
و اللي مش بيطبقها ما يبقاش سلفي حتى لو بنطلونه قصير و دقنه طويلة

شوف يا سيدي ,
السلفيين بيقولوا إن منهجهم هو :
( الكتاب و السنّة بفهم سلف الأمة )

يعني إن الناس المفروض تعمل بالقرآن و أحاديث الرسول ,
و دي حاجة كل المسلمين متفقين عليها ,
لأن الرسول -صلى الله عليه و سلم- قال :
(( تركت فيكم شيئين ، لن تضلوا بعدهما :
كتاب الله ، و سنتي ))
[ الراوي:أبو هريرة - المحدث: الألباني -
المصدر: صحيح الجامع - الصفحة أو الرقم: 2937
خلاصة حكم المحدث:صحيح ]

إنما السلفيين حاطين شرط و هو إن التطبيق يبقى مش حسب ما أنا فاهم
و لا حسب ما أنت فاهم ,
لكن يبقى على حسب ما الصحابة و التابعين و السلف فهموا ,
 
أولا : لأن الرسول قال كده :
(( عليكم بسنتي وسنة الخلفاء الراشدين المهديين عضوا عليها بالنواجذ ))
[ الراوي:عبدالله بن مسعود- المحدث: الألباني -
المصدر: تخريج كتاب السنة - الصفحة أو الرقم: 58
خلاصة حكم المحدث:صحيح ]

و ثانياً : لأن ممكن آية قرآنية أو حديث , كل واحد فينا يفهمها بشكل تاني خالص ,
حسب ثقافته و فهمه و علمه و لغته و حاجات كتيرة ,
لأننا مش بنفهم لغة فصحى زي اللي كانوا أيام الرسول ,
و لا الآيات و الأحاديث نزلت على عهدنا و عارفين مناسباتها زي اللي كانوا على أيام الرسول
فطبيعي إن فهمهم هم يبقى أقرب للصواب مننا دلوقتي ,

و أديلك مثال على السريع :
عارف انت آخر آية في سورة الكافرون :
{ لكم دينكم و لي دين }
كتير من الناس بتفهمها إن العملية ( بيس ) ,
و إن عادي خليكم كفار و احنا خلينا مسلمين مافيش أي مشاكل ,

لكن في الحقيقة تفسيرها الصحيح اللي الناس أيام زمان فهموها بيه
إنها ( للتهديد ) , يعني زي ما تكون بتقول لهم :
طب انتوا على دينكم و أنا علي ديني و هنشوف في الآخر ,
أو ( للبراءة ) من دينانتهم الباطلة ,
كأنك بتقول لهم :
لكم دينكم الباطل الفاسد , و أنا ماليش دعوة بيه لأن لي ديني الصحيح النقي
و المزيد عن تفسير هذه الآية في موضوع :
يا حبيبي يا مرقص انت و كوهين !!
تظبيط
مدونة تظبيط
لحد هنا تمام ؟؟
أظن حاجة كويسة لما يبقى الناس عاوزين تطبيق القرآن و السنة
بالفهم الصحيح بتاع الصحابة و التابعين و السلف

بس لسه فيه مشكلة صغيرة شوية ,
طيب طالما هم منهجهم كده , و ده المفروض إنه منهج المسلمين كلهم ,
ليه بقى هم يفرقوا المسلمين و يقسموا نفسهم و يبقوا جماعة لوحدهم و يسموا نفسهم اسم لوحدهم ؟؟
ما يسموا نفسهم ( مسلمين ) و خلاص !!
هم لازم يتفزلكوا و يخترعوا لهم اسم ( السلفيين ) ده ؟؟

هقول لك دي مش فزلكة و لا حاجة ,
على العكس , دي حاجة أحيانا بتبقى لابد منها ,
قول ليه ؟؟
دلوقتي الشيعة بيكفروا الصحابة .... و بيقولوا على نفسهم مسلمين
البهائيين عندهم نبي بعد سيدنا محمد ... و بيقولوا على نفسهم مسلمين
الخوارج بتوع التكفير بيكفروا الناس كلهم .... و بيقولوا على نفسهم مسلمين
و كل الطوائف الضالة بتقول على نفسها مسلمين ,
يبقى انت لو قلت على نفسك ( مسلم بس )
هتتلخبط مع الناس الكدابين التانيين اللي بيقولوا على نفسهم مسلمين برضو
يببقى لازم كل ما تعرّف نفسك تقول :
( أنا مسلم من اللي مش بيكفروا أصحاب الرسول و لا اللي بيقتلوا الناس و لا ...
و منهجي هو الكتاب و السنة بفهم سلف الأمة )
أو بدل ما بتقول التعريف الطويل ده كل ما تتكلم عن نفسك أو دينك
بتقول : ( سلفي ) و تختصر كل ده !!!

يعني السلفية لا تعني حزباً و لا جماعةً و لا طائفةً ,
بل هي اختصار لتعريف منهج ,
و انتساب لجماعة من الناس كانت فاهمة الإسلام صح - اللي هم كانوا أيام زمان -

و موضوع التسميات ده مش حاجة جديدة مخترعينها الأيام دي ,
دي بدأت من زمان أول ما الإسلام ضعف و ظهرت فيه الفرق المنحرفة كالروافض و الخوارج و غيرها
راحت الطائفة المسلمة من السلف اللي على نهج الصحابة و التابعين أطلقوا على أنفسهم اسم :
( أهل السنة و الجماعة )
علشان يميزوا أنفسهم عن الطوائف الغلط اللي بتدعي الإسلام باللسان و بيخالفوه بالأفعال ,

بتقول إيه ؟؟ الأفعال ؟؟
أيوااااااااا خلينا في الأفعال دي شوية يا عم الشيخ ,
انت عارف إن الناس السلفيين دول أقوالهم بتخالف أفعالهم ,
يقولوا لك : تبسمك في وجه أخيك صدقة ,
و تلاقي جاركم أبو دقن مكشر على طول الخط ,
و يقولوا لك : من غشنا فليس منا ,
و تلاقي الجزار أبو دقن بيحط لك دهنة وسط اللحمة من غير ما تشوف
ينفع الكلام ده ؟؟ 

هرد عليك و أقول لك الكلمة اللي قلتها لك في الأول :
( اعرف الحق تعرف أصحابه )
شوف المنهج بيقول إيه ,
و اللي بيطبقه يبقى تبعه , و اللي بيخالفه يبقى مش تبعه ,
و سيبك من الأشخاص و تطبيقهم اللي ممكن يكون غلط ,

و بعدين كلنا بشر بنغلط و مش ملائكة ,
و لو هتقول السلفيين ( كلهم ) وحشين علشان شفت واحد مكشر أو بيغش في اللحمة ,
يبقى المسلمين ( كلهم ) برضو وحشين علشان فيه منهم نصابين و حرامية ,
شوف المنهج , لو صحيح ابقى طبقه , 

و خليك انت مثال جيد ,
لأن مافيش حد عاقل مثلا يقول لك أنا هسيب الإسلام علشان فيه مسلمين نصابين ,
لكن يقول أنا هبقى مسلم أمين و أبقى قدوة حسنة ,
و على فكرة برضو , الموضوع ده رغينا فيه كتير قبل كده هنا :

ـ الدقون و المنقبات  ؟؟ أعوذ بالله  !! ـ


اللي عاوز أوصله لك في الآخر ,
إن مش كل حد عمل حاجة غلط بدقن يبقى سلفي ,
و مش كل واحد بدقن و سلفي عمل حاجة غلط يبقى السلفية غلط ,
كلنا بشر , نخطيء و نصيب , و الأشخاص ليسوا حجة على المنهج ,
لكن احكم على السلفيين من منهجهم ,
اسمع منهم , و لا تسمع عنهم ,
فإن كان منهجهم سليما فاقبله , وإن كان قبيحا فاتركه
,


أنا كده خلصت الكلام اللي عندي ,
لو انت عندك استفسار ... خش عليا بيه 
و كلنا ( ودان ) صاغية 

..................

حقوق النشر للجميع
........................

14 comments:

  1. السلام عليكم:
    (حدثني زهير بن حرب وشجاع بن مخلد جميعا عن ابن علية قال زهير حدثنا إسماعيل بن إبراهيم حدثني أبو حيان حدثني يزيد بن حيان قال انطلقت أنا وحصين بن سبرة وعمر بن مسلم إلى زيد بن أرقم فلما جلسنا إليه قال له حصين لقد لقيت يا زيد خيرا كثيرا رأيت رسول الله وسمعت حديثه وغزوت معه وصليت خلفه لقد لقيت يا زيد خيرا كثيرا حدثنا يا زيد ما سمعت من رسول الله قال: يا ابن أخي والله لقد كبرت سني وقدم عهدي ونسيت بعض الذي كنت أعي من رسول الله فما حدثتكم فاقبلوا وما لا فلا تكلفونيه، ثم قال قام رسول الله يوما فينا خطيبا بماء يدعى خما بين مكة والمدينة فحمد الله وأثنى عليه ووعظ وذكر، ثم قال: أما بعد ألا أيها الناس فإنما أنا بشر يوشك أن يأتي رسول ربي فأجيب وأنا تارك فيكم ثقلين أولهما كتاب الله فيه الهدى والنور فخذوا بكتاب الله واستمسكوا به فحث على كتاب الله ورغب فيه، ثم قال وأهل بيتي أذكركم الله في أهل بيتي أذكركم الله في أهل بيتي أذكركم الله في أهل بيتي، فقال له حصين ومن أهل بيته يا زيد أليس نساؤه من أهل بيته قال نساؤه من أهل بيته ولكن أهل بيته من حرم الصدقة بعده قال ومن هم قال هم آل علي وآل عقيل وآل جعفر وآل عباس قال كل هؤلاء حرم الصدقة قال: نعم)
    صحيح مسلم:2408
    -----------------------------------
    (حدثنا محمد بن بكار بن الريان حدثنا حسان يعني ابن إبراهيم عن سعيد وهو ابن مسروق عن يزيد بن حيان عن زيد بن أرقم قال دخلنا عليه فقلنا له لقد رأيت خيرا لقد صاحبت رسول الله وصليت خلفه وساق الحديث بنحو حديث أبي حيان غير أنه قال ألا وإني تارك فيكم ثقلين أحدهما كتاب الله عز وجل هو حبل الله من اتبعه كان على الهدى ومن تركه كان على ضلالة وفيه فقلنا من أهل بيته نساؤه قال لا وأيم الله إن المرأة تكون مع الرجل العصر من الدهر ثم يطلقها فترجع إلى أبيها وقومها أهل بيته أصله وعصبته الذين حرموا الصدقة بعده)
    صحصح مسلم: 2408
    -----------------------------------
    (لقيت زيد بن أرقم وهو داخل على المختار أو خارج من عنده ، فقلت له : أسمعت رسول الله صلى الله عليه وسلم يقول : إني تارك فيكم الثقلين [ كتاب الله وعترتي ]........ ؟ قال : نعم)
    الراوي: زيد بن أرقم - خلاصة الدرجة: إسناده صحيح، رجاله رجال الصحيح - المحدث: الألباني - المصدر: السلسلة الصحيحة - الصفحة أو الرقم: 4/356
    -----------------------------------
    لست بمعرض الحديث عن الفهم الخاطيء لبعض غلاة الشيعة لمعني الحديث أو انكار بعض غلاة السنة لهذا الحديث الصحيح.
    فلهذا حديث آخر.
    حازم

    ReplyDelete
  2. جمداااااااا بجد:)

    ReplyDelete
  3. أعجبتني جدا !

    الأشخاص ليسوا حجة على المنهج

    أظن أن هذه الجملة تكفي جدا.. :)

    جزيت خيرا

    ReplyDelete
  4. أنا اركب دقن

    واروح احرق كنيسة

    واقولهم أنا سلفي
    :))

    تسلم ايديك يا هندسة :)

    ReplyDelete
  5. واحمد السقا في الفيلم كان مربي دقنه ومقصر بنطلونه وقريت من شويه ان بعض المخبرين بدأوا يربوا دقنهم ويقصروا

    ReplyDelete
  6. أ.حازم :
    شكرا جزيلا على الأحاديث
    لكن كما قلتَ : ليس هذا بمعرض الحديث عن هذا الأمر
    جزاك الله خيرا

    ReplyDelete
  7. sony2000 :
    يارب تكون أضافت شيء و كشفت عن مجهول

    ReplyDelete
  8. زهـــــراء :
    فعلا الأشخاص ليسوا حجة على المنهج لاستحالة تطبيق المنهج كما هو إلا من النبيين

    حتى إني لأذكر حديثا لرسول الله أمر به أحد القادة إذا حاصر الكفار و أرادوا أن ينزلوا على عهد الله و رسوله , قال لهم بل انزلهم على عهدك
    أو كما قال صلى الله عليه و سلم ,
    كي لا يخفر عهد الله و رسوله إن خالف

    جزاكم الله خيرا

    ReplyDelete
  9. سمو الامير :
    على رأيك يا باشمهندس أحمد ,
    و أزعم أنهم لو استطاعوا فعل ذلك لفعلوه كي يشوهوا صورتهم

    سلمك الله يا هندسة

    ReplyDelete
  10. wael :
    أحمد السقا و المخبرين و كل الزبالة نفسهم يشوهوا صورة الإسلام بتشويه صورة منتسبيه بأي طريقة
    ربنا يسترها إن شاء الله

    ReplyDelete
  11. السلام عليكم
    تحياتى
    كله طلع علينا من عبائة الاخوان المسلمين وبعد
    ين شويه وانا اقرأ التعليقات عشان برضه اعلق صح
    تحياتى

    ReplyDelete
  12. شاهد هذا الفيديو

    http://www.youtube.com/watch?v=SNKJeKTarx0&feature=player_embedded

    ReplyDelete
  13. فشكووول :
    و عليكم اسللام و رحمة الله أستاذنا الفاضل
    لكن اسمح لي أعترض ,
    فعباءة الإخوان المسلمين ليست قبعة ساحر يخرج منها كل أحد
    إنما خرج الجميع من منطلق محبتهم للإسلام
    فاجتهد كل فريق يتحرى الصواب , كلٌ حسب وجهة نظره
    و الله الموفق
    نسأل الله أن يوفقنا جميعا لما يحب و يرضى

    ReplyDelete
  14. Anonymous :

    جزاك الله خيرا على إضافة الفيديو الذي يؤكد صدق الخبر
    نسأل الله أن ريد كيدهم و يجعله في نحورهم

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ