زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

27 March, 2010

لا طب صيني و لا أعشاب , عندنا علاج ( مادي ) للاكتئاب



السلام عليكم و رحمة الله و بركاته ,



عمرك جت لك حالة اكتئاب أو خنقة أو ضيق أو حزن أو .... إلخ , قبل كده ؟؟

أكيد إجابة معظم الناس هتكون :
طبعاً
certainly
bestimmt
bien sûr


قشطة , طب يلا ندخل على الوصفة بقى :

طبعا أنا لو قلت إن الحل و العلاج في الإيمان و التوبة و ترك الذنوب و الرضا و التسليم و ......

هنلاقي كل واحد ( قفل سوستة ودانه ) ,
و قالك لك : يا عم عارفين الكلام ده و قرأناه كتير ,
و احتمال تلاقيهم بيسمّعوا لك باقي الكلام اللي انت عاوز تقوله ,

و احتمال تلاقي ( أحدهم ) بيقول لك :
- يا عم الحاجات الروحية دي ما بتجيبش معانا نتيجة ,
احنا في زمن الماديات يا هندزة ,
يعني الواحد عاوز ( حبايتين سعادة ) يبلبعهم ,
أو حد يغزني بحقنة ( طاير في الهوا شاشي ) ,
أو دكتور خالد عبد العال يوصف لنا ( عودين جرجير للسعادة ) الدائمة ,
أو ....
فتح مخك معانا كده يا هندسة !!


- احم احم , بص يا عم اللمض ,
هي الخنقة و الزهق دي حاجات نفسية روحية غير مادية و لا ملموسة ,
علشان كده لازم علاجها يبقى من نفس جنسها ,
بس خلينا نعمل محاولة كده معاك ,
لكن اصبر علينا و خد الكلام لآخره ,
ماشي ؟؟


طبعا عارفين إن الوضوء طهارة مادية لأن بينظف الجسم من الأوساخ و الأتربة و غيرها
و برضه طهارة معنوية و روحية لأنه ..... لأنه إيه ؟؟

قال رسول الله - صلى الله عليه و سلم - :
" إذا توضأ العبد المسلم ( أو المؤمن )
فغسل وجهه ،خرج من وجهه كل خطيئة نظر إليها بعينيه مع الماء ( أو مع آخر قطرالماء )
فإذا غسل يديه , خرج من يديه كل خطيئة كان بطشتها يداه مع الماء ( أو مع آخر قطرالماء )
فإذا غسل رجليه , خرجت كل خطيئة مشتها رجلاه مع الماء ( أو مع آخر قطرالماء )
حتى يخرج نقياً من الذنوب ."
[ صحيح مسلم - الصفحة أو الرقم: 244]


و قال تعالى :
{ وَاللّهُ يُحِبُّ الْمُطَّهِّرِين َ } [سورة التوبة - الآية 108]




فهمت قصدنا إيه ؟؟

يعني احنا قلنا لك الأول تتوب و تتخلص من الذنوب علشان إيمانك يزيد و نفسك تستريح ,
قلت ما بعرفش ,
رحنا ملتفين حول الهدف ,
و قلنا لك تتوضأ ,
و لما تتوضى و ذنوبك تخرج مع الماء ,
و بمجرد نقصان ذنوبك - سواء بعمل قلبي أو بعمل الجوارح - هتلاقي حالتك النفسية تتحسن ,
كما قال رسول الله صلى الله عليه و سلم :
" إن مثل الذي يعمل السيئات ثم يعمل الحسنات كمثل رجل كانت عليه درع ضيقة قد خنقته ،
ثم عمل حسنة فانفكت حلقة ، ثم عمل حسنة أخرى فانفكت حلقة أخرى حتى يخرج إلى الأرض"

[ الراوي:
عقبة بن عامر - المحدث: الألباني - المصدر: السلسلة الصحيحة -
الصفحة أو الرقم: 2854 - خلاصة حكم المحدث: رجاله ثقات]

و تكون من المطَّهرين ,
و ربنا يحبك
أكيد نفسك هتهدأ و تستريح إن شاء الله
و نبقى وصلنا لنفس الهدف ,


و لو عاوز تفصيل أكثر ,
أنصحك أن تمتع عينيك بقراءة بعض ما (صوّرَ) الرافعي في كتابه وحي القلم ,
عن الوضوء و كيف يكون الوضوء طهارةً للروح قبل الجسد :

" فإذا قمت إلى وضوئك ....
فأيقن في نفسك واعزم في خاطرك على أن في هذا الماء سرا روحانيا من أسرار الغيب والحياة ,
وأنّهُ رمزٌ للسماء عندك ،
وأنك إنما تتطهر به من ظلمات نفسك التي امتدت على أطرافك ؛
ثم سَمِّ الله تعالى مفيضا اسمه القادر الكريم على الماء وعلى نفسك معا ،
ثم تمثل أنك غسلت يديك مما فيهما ومما تتعاطاه بهما من أعمال الدنيا ،
وأنك آخذٌ فيهما من السماء لوجهك وأعضائك؛
وقرر عند نفسك أن الوضوء ليس شيئا إلا مسحة سماوية تسبغها على كل أطرافك، ليشعر بها جسمك وعقلك؛
وأنك بهذه المسحة السماوية تستقبل الله في صلاتك سماويا لا أرضيا ,
فإذا أنت استشعرت هذا وعملت عليه وصار عادةً لك ،
فإن الوضوء حينئذ ينزل من النفس منزلة الدواء،
كلما اغتممت أو تسخطت أو غشيك حزن أو عرض لك وسواس،
فما تتوضأ على تلك النية إلا غسلت الحياة وغسلت الساعة التي أنت فيها من الحياة ,
وترى الماء تحسبه هدوءا ليناً لِينَ الرضى ،
وإذا هو ينساب في شعورك وفي أحوالك جميعا . "
[مصطفى صادق الرافعي - وحي القلم > انتحار]

---------------------------------
ملحوظة لابد منها :
نحن لم نتطرق كثيرا للجانب الروحي في علاج الزهق و الاكتئاب في هذا الموضوع ,
لكن ركزنا على الوضوء فقط باعتباره ذو شقين مادي و روحي ,
أما الحديث عن العلاج الروحي فتكلمنا عنه من قبل في أكثر من موضوع :

لما تبقى مخنوق ...اشرب بمناخيرك !!
و
إيييييييييييييه .... دنيا !!!
و
إيه نظامك ؟ ناوي تفضل مكتئب كده على طول؟؟



بس خلاص !!
ــــــ


و لو استفدت من الموضوع ياريت تنشره
و تدعو لنا بظهر الغيب بالهداية و التوبة و التوفيق
و أن يُصلِح الله لي شأني كله و سائر المسلمين و المسلمات


في أمان الله

..............

15 comments:

  1. .







    فمن آمن بالله فكأنما قال له: "امتحنِّي!"
    وكيف تراك إذا كنت بطلا من الأبطال مع قائد الجيش,
    أما تفرض عليك شجاعتك أن تقول للقائد: "امتحني وارم بي حيث شئت!"
    وإذا رمى بك فرجعت مثخنا بالجراح ونالك البتر والتشويه،
    أتراها أوصافا لمصائبك, أم ثناء على شجاعتك؟
    [الرافعي - وحي القلم]
    ـ






    .

    ReplyDelete
  2. تصدق بالله انا فعلا داخل علي حالة مايعلم بيها الا ربنا...

    شكرا علي النصيحة ياكبير

    ReplyDelete
  3. عجبتنى اوى جملة الرافعى لاننا بكده بنتعامل مع قعلنا الباطن و بنقنعه بحاجة معينة و بالتالى هو هيتصرف بناء عليها
    جزاك الله خيرا

    ReplyDelete
  4. اولا بجد الاسلوب والفكرة فوق الممتاز..لأا غبار عليه
    ثانيا ناولنى كتاب الرافعى لو سمحت :)

    ReplyDelete
  5. أبو علي :
    لا لا يا هندسة ,
    امسك نفسك ,
    الاكتئاب اليومين دول بقى ادمان ,
    إوعى تدخل و تسيب الحالة تتدهور أحسن ما تعرفش تطلع تاني ,
    بجد مش بهزر !!


    شموخ مسلمة
    فعلا كلام الرافعي جميل جدا ,
    بحس إنه حكيم و أديب في نفس الوقت


    أخت في الله :
    الحمد لله إن الكتاب عجبك ,
    رابط التحميل هو :
    http://www.saaid.net/book/open.php?cat=90&book=5000

    و بالنسبة للمواضيع التي أزكيها :

    بين خروفين ,
    انتحار ,
    حديث قطين ,
    الطائشة ,
    س.ا.ع ,
    الجمال البائس ,
    قرآن الفجر ,
    المجنون ,
    عربة اللقطاء ,
    أحلام في الشارع ,
    الأجنبية ,
    المشكلة ,
    موت أم ,
    قصة أب ,
    قلت لنفسي و قالت لي ,

    أرجو أن ينفع الله به

    ReplyDelete
  6. مهو المشكلة يا هندسة لما تبقى مش مستشعر أصلا

    يبقى ساعتها العلاج مادي مش أكتر ،، ومش هتاخد ومن الوضوء غير إنك اتبليت !!!

    سيدنا عمر كان يرقي الناس بالفاتحة ،، فلما مات أرقى بعضهم بعضاً بالفاتحة فلم تجد ، فقالوا : هذه الفاتحة فأين عمر ؟

    الشاهد إن الوضوء بحد ذاته زي الدعاء كده ،، ممكن تتوضى من غير استشعار وممكن تصلي من غير خشوع وممكن تدعي من غير يقين ،، بس السر كله في القلب ،، يعني الروحيات مش الماديات :)

    ربنا يرزقنا الإخلاص واليقين يارب :)

    بارك الله فيك ،،، وابقى طمنا عليك يا هندسة :)

    ReplyDelete
  7. ربنا يكرمك يارب

    بجد المدونة أسلوبها جميل جدا قرأت فيها شوية

    جزاك الله خيرا وان شاء الله في ميزان حسناتك

    ReplyDelete
  8. كيفك تيمى


    بداية وحى القلم
    من الكتب التقيلة وكل جملة لها معنى كبير جدا محتاج اكتر من ساعة تفكير فيها


    بالنسبة للاكتئاب انا برتاح جدا لما اسمع قرآن
    واكيد كل واحد ممكن يلاقى جانب روحانى معين يستريح معاه




    واهلا لدخولك للفايس بوك تيمى

    ReplyDelete
  9. T3V4

    عندك حق طبعا يا مصطفى ,
    هو الوضوء من غير روح هيبقى انك اتبليت بس ,
    لكن حتى لو مجرد بلل , المية فيها روح ,
    انت عارف لما تبقى مخنوق و تاخد دُش بتحس إنك أحسن ,
    يعني حتى اللي الروحانيات ضاربه معاه ,
    هياخد ريحة من الماديات بتاعة المية

    ,


    -----------
    و ابقى طمنا عليك انت يا هندسة ,
    أنا هعوزك في خدمة إن شاء الله بس لما أقبض ,
    ناوي على لاب إن شاء الله و مش هلاقي مرشد أحسن منك :)

    ReplyDelete
  10. Lady E

    ربنا يكرمنا و إياكم ,
    و ربنا ينفعنا و ينفعكم بما كتبنا ,
    جزاكم الله خيرا

    ReplyDelete
  11. د.عرفة ,
    بالنسبة لوحي القلم ,
    فالكتاب لا يوصف ,
    لابد أن تقرأه كي ترى روعته ,
    أنا بقرأه للمرة الثانية أو الثالثة ,
    و إن شاء الله ناوي أفرغ الحكم اللي فيه و أنزلها في بوستات منفصله ,
    ربنا يسهل ,


    و بالنسبة للقرآن , فطبعا فهو شفاء لما في الصدور و هدى و رحمة ,
    ربنا يهدينا و يشفينا ,

    بالنسبة للفيس بوك ... مجبر أخاك لا بطل :(
    أنا بكرهه أصلا !!

    ReplyDelete
  12. وقرر عند نفسك أن الوضوء ليس شيئا إلا مسحة سماوية تسبغها على كل أطرافك، ليشعر بها جسمك وعقلك؛

    كلام مظبوط جدا يا تيمي

    ربنا يرزقنا العمل بيه باخلاص وصدق نية

    جزاك الله خيرا

    ReplyDelete
  13. سمو الأمير :
    ربنا يرزقنا العمل بيه باخلاص وصدق نية
    آمين يا أحمد ,

    جزانا و إياكم

    ReplyDelete
  14. مشكور اخي بس تقدر تشيل صورة البنت الي في اخر الصفحه على جمب

    ReplyDelete
  15. yokan

    عفوا أخي ,
    و شكرا للمرور
    بس وين صورة البنت دي ؟؟
    مافي شيء في آخر الصفحة على جنب فيه صورة بنت !!

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ