زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

03 August, 2008

حب ايه انت جاى تقول عليه ؟! (الجزء الثالث) و الأخير



>>> الجزء الثالث (و الأخير أخيرا )

بص يا سيدي .. أول حاجة لازم تحطها في (نافوخك) و تحطها قدام عينك و انت بتتكلم عن الحب هي:

عن ابن عباس رضي الله عنهما أنَّ رجلاً قال: يا رسول الله! في حجري يتيمة قد خطبها رجل موسر ورجل معدم، فنحن نحبّ الموسر وهي تحب المعدم! فقال رسول الله صلى الله عليه وآله وسلم: "لم يُر للمتحابين مثل النكاح".
هذا الحديث أخرجه ابن ماجه والحاكم والبيهقي والطبراني وغيرهم.. وقال الحاكم: صحيح على شرط مسلم ولم يخرجاه.. والحديث حسن بمجموع طرقه.. وقد صحَّحه الشيخ الألباني رحمه الله في صحيح الجامع.

يبقى خلي بالك قوي من قوله –صلى الله عليه و سلم- : "لم يُر للمتاحبين مثل النكاح" .. هو ده الأصل اللي هنتكلم عليه ..
(حب = جواز) ...
و ليس ( حب = جواز + لما تُفرج )
و ليس (حب = جواز لما أمهد لأهلي)
و ليس (حب = جواز + بس لما نخلص الكلية ربنا يسهل)
مش لسه قدامك كتير لحد ما تكون نفسك و تجيب الشقة و المهر و اللذي منه .. !!!
لو مش في إيدك دلوقتي الجواز .. يبقى أحسن لك (تنسى يا عمرو) و تخليك يا (عمرو ذكي) و لا تتعلق بالوهم ..
هتقول لي هتقول لي دي (عروسة لُقطة) و مش هلاقي زيها بعد كده و و الله ناوي بجد ... هقول لك ماشي , النية عندك (دلوقتي) بس انت مش عارف الظروف (بعد كده) هتبقى شكلها ايه ؟؟ الظروف دي في المستقبل هتسمح للعلاقة إنها تكتمل في صورة زواج و لا لأ ؟؟
ممكن أهلها لا يصبروا .. ممكن انت حالتك تبقى أسوأ أكتر و تبقى عطلتها معاك , ممكن حاجات كتيرة ...
يبقى الأسلم إنك ما تفتحش قلبك غير لما تبقى قادر (الآن) و ليس (في المستقبل) إنك تفتح بيت ,
......

تاني حاجة لازم تقيس عليها العلاقة اللي انت بتقول عليها "حب" دي علشان تعرف إذا كانت حب و لا .. ملوخية

حديث رسول الله - صلى الله عليه و سلم - : " إذا تزوج العبد فقد استكمل نصف الدين ؛ فليتق الله في النصف الباقي "
يعني ايه ؟؟
يعني الجواز بيقطع نصف ذنوبك بحالها ... اللي كنت بتعملها قبل الزواج ..
ماشي .. يعني ايه برضه ؟؟
يعني المفروض إن مقياس الجواز إنه يقربك من ربنا و يخليك تبطل نصف الحاجات الغلط اللي كنت بتعملها ..
يعني ... لو ماكانتش (سكة الجواز) دي من أولها تقودك إلى طريق إكمال (نصف الدين) .. بقى مش هي دي الطريق الصحيحة ..
لأن الجواز ده .. رزق . .صح و لا غلط ؟
طيب الرزق هل يُطلب بطاعة الله أم بمعصيته ؟؟
بطاعة الله طبعا . .

قال رسول الله صلى الله عليه و سلم : "إن روح القدس نفث في روعي أن نفسا لن تموت حتى تستكمل أجلها و تستوعب رزقها فاتقوا الله و أجملوا في الطلب و لا يحملن أحدكم استبطاء الرزق أن يطلبه بمعصية الله فإن الله تعالى لا يُنال ما عنده إلا بطاعته "

يعني سكة الجواز .. لو كانت بدأت بطريق خلوة و تليفونات و شات و اشتغالات و حاجات غلط ..
ما تحاولش تقنع نفسك إنها هتبقى صح بعد كده ..
لأنك لو بتطلب الحب الحقيقي اللي نهايته الزواج ..
اللي هو رزق من الله ..
و الرزق لا يُطلب بمعصية الله ..
يبقى الطريق ده غلط ..
و دي اشتغالات مش حب ..
..............

بص يا أخي .. أنا عارف إني يمكن أكون عقدتك , أو قفلتها في وشك .. بس ليه ما تقولش إني بحاول أضعك أمام الحقيقة ؟؟
أنا معاك , و زيي زيك إني نفسي أحب و أتحب .. و ألاقي اللي تفهمني و أفهمها , دي حاجة طبيعية و رغبة عادية و مركبة فينا معشر البشر –حلوة معشر دي , حد يسقف لي عليها - , لكن كما يقول السلف : (من تعجل شيئا قبل أوانه ... عوقب بحرمانه !!) ...
الطفل الصغير مثلا ... حمادة ..- مش عارف حمادة ؟؟- لو شاف تفاحة حمراء و جميلة هيحب ياكلها .. صح ؟؟
بس هو لسه بيرضع , معدته لسه مش متعودة على التفاح .. و لسه مش وقت أكل التفاح ليه .. لو كل التفاحة و صمم , و هو لسه صغير .. ايه اللي هيحصل له ؟؟
بطنة هتوجعه لأن معدته مش متعودة لسة , و مش ده الوقت المناسب لسه .. .. يعني لو أكل قبل المعاد . هيبقى فيه نتيجة سلبية .. مش كده يا حمادة ؟؟ ايه ؟؟ مش بتردش ليه يا حمادة ؟؟ آه معلش .. نسيت إن اسمك مش حمادة .. اسمك توفيق !!!
فنصيحتي لك أخي .. خطوتين لناصية الشارع أو (للقمة) –لو كنت اسكندراني - و اشتري رزة و قفل ..
و اقفل قلبك و اقنع نفسك إنه لازم يبقى مقفول لحد ما ييجي الوقت المناسب لفتحه ..
و قاوم أي حد يحاول يفتحه أو (يفش القفل ) قبل الوقت ده ..
لأنه لو دخله حد قبل المعاد هيبوظه ..
و ما تخليش (المحسوسات) الحلوة اللي في أول العشق دي تحببك فيه ..

يقول أحدهم : "العشق جليس ممتع وأليف مؤنس وصاحب ملك مسالكه لطيفة ومذاهبه غامضة وأحكامه جارية ملك الأبدان وأرواحها والقلوب وخواطرها والعقول وآراءها قد أعطي عنان طاعتها وقوة تصرفها توارى عن الأبصار مدخله وعمي في القلوب مسلكه!"
فامسك نفسك ..
و (اعصر على نفسك لمونة) .. و اوعى تحب على نفسك لحد ما ييجي الوقت المناسب و الإمكانيات تبقى متاحة .. لتنفيذ ما قاله النبي : (و لم يُر للمتاحبين مثل الزواج)
ساعتها افتحه .. و هتلاقي إن شاء الله بنت الحلال المحترمة -مس ما تكونش مجنونة زي دي - اللي أحسن من اللي انت سبتها زمان .. لأنه كما يقول السلف (من ترك شيئا لله .. عوضه الله أفضل منه)
يقول ابن القيم: "وحسب قتيل العشق أن يصح له هذا الأثر عن ابن عباس رضي الله عنهما على أنه لا يدخل الجنّة حتى يصبر لله و يعف لله و يكتم لله , لكن العاشق إذا صبر وعفّ وكتم مع قدرته على معشوقه، وآثر محبة الله وخوفه ورضاه، هذا من أحق من دخل تحت قوله تعالى: (وأمّا من خاف مقام ربه ونهى النفس عن الهوى * فإّن الجنّة هي المأوى)"
"إنه من يتق و يصبر فإن الله لا يضيع أجر المحسنين"..
.. "وحين يصدق المسلم في حبه لله تعالى ورسوله صلى الله عليه وسلم فإنه يتحرّر به من ضغوط المادة، ودوافع الغريزة، ونزوات الذات، وألوان الوهن والضعف البشري، وتنتظم به حياته وفق قِيَم سماوية وموازين علوية.. فيتجاوز شوطه سنين هذه الحياة الدنيا إلى الرغبة في العيش الأبدي، وتسمو أهدافه على حرث الدنيا ومتاعها إلى نعيم لا يحول ولا يزول.
فحب المسلم لله ولرسوله حب رسالي مقدس: يجعل الشقاء سعادة في طاعتهما.. والسعادة شقاءً في عصيانهما.. والتعذيب راحة في سبيلهما.. والراحة عذاباً في مخالفتهما.. والموت حياة من أجلهما.. والحياة موتاً بدونهما: {قالَ ربِّ السجنُ أحَبُّ إليّ ممّا يدعونني إليهِ...}"


و كان فيه شريطين للشيخ محمد العريفي عن العشق ..
من أروع ما سمعت :





بس خلاص .. البندقية اتكلمت !!! قصدي .. خلص الكلام و البندقية اتكلمت ..
و لو ليك أي رأي أو تعليق .. تخرسـ.... قصدي .. اتفضل قوله .. احنا في بلد ديموقراطي ..
و أنا كلي (ودان) صاغية ..
و لو استفدت أي حاجة ... أرجوك ما تكسلش و لا تنسني من الدعاء ..
كلمتين بس, بي من قلبك الله يخليك .. قول "اللهم اغفر له و ارحمه و تب عليه و وفقه لما تحب و ترضى و أدخله الجنة و أجره من النار" آمين و لجميع المسلمين و المسلمات ..
>> حقوق النشر للجميع لو عاوز تنشره <<
بس ياريت تذكر رابط المدونة :
6azbeet.blogspot.com

................


مستني بقى اللي كانوا (بيشمروا) و مستحلفين يردوا لما أخلص الموضوع كله ..
أهه خلص أهه ..

الراجل بقى يوريني نفسه






و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com


أو على الأقل تذكر إنه منقول

......................


تحيتي

.....


25 comments:

  1. ايه الجمال ده

    انت عقدتني

    هههههههههه

    بسم الله ماشاء الله

    ReplyDelete
  2. ههههههههههههه

    ههههههههههههههههههههه

    هههههههههههههههههههههههههه

    جميييييييييل جمييييييييل جمييييييل

    بجد بجد انت عرضا الفكره باسلوب ممتاز

    انت دمك خفيف اوى

    ReplyDelete
  3. السلام عليكم

    بجد بجد البوست عجبنى جدا جدا

    براااااااااافو

    عجبنى اوى اسلوبك فى الكتابه بجد لذيذ جدا

    ومضحك جدا

    ومشوق جدا جدا

    بجد انت ممتاز

    انا هزور مدونتك على طول

    عجبنى اوى فى البوست انك مستشهد باحاديث النبى صلى الله عليه وسلم

    بس انت عارف بقى شباب اليومين دول بيقولوا احنا عايزين نتعرف اكتر ببعض قبل الارتباط ونحب فى بعض شويه والكلام ده

    اشتغالات بقه

    ههههههههههههه

    على فكره انا برضه صاحبه مدونه هاكونا مطاطا اللى انت زورتها ومشتركه مع حسام فيها

    ReplyDelete
  4. حسن ...

    ايه بس يا راجل ..

    انت لحقت تتعقد ؟؟ :)

    أمال لما تدخل الكلية و تبقى "على وش جواز" هتعمل ايه ؟؟ :)

    ReplyDelete
  5. حسام باشا
    أكيد حسام بس طالما ريمان تحت لوحدها :)

    ايه الضحك ده كله يا راجل ..

    كل ده كنت حابسه في نفسك ؟؟ :)

    على فكرة .. "قهقهاتك" دي شجعتني قوي .. :)

    و إن شاء الله تضحك لحد ما بطنك توجعك :) .. بس لمهم تكون فيه حاجة دخلت "في العمق" !! ؛)

    تحيتي ..

    ReplyDelete
  6. ريمان ..

    و عليكم السلام و رحمة الله و بركاته ..

    نورتي المدونة انتي و حسام اللي فوق:)

    احم احم ..
    ألف شكر على الإعجاب الشديد بالمدونة ده .. :)

    و إن شاء الله نبقى عند حسن ظنكم -هم بيقولوا كده على طول :) - و ما تنسيش .. انتي و حسام لازم تزوروها على طول زي ما قلتم :)

    و أنا معاكي إن معظم كلام الشباب عن إنه يتعرف على البنت قبل ما يتقدم و الحاجات دي كلها "اشتغالات بتخيل على البنات" :) ...
    لو عاوز بجد الخير للبنت دي كان دخل البيت من الباب ..

    تحيتي لكِ و لحسام طبعا ..
    و .. هاكونا مطاطا :)

    ReplyDelete
  7. جميييل جدا البوست دا
    بجد وصفت فأوفيت
    وعندك حق في حاجات كتير
    قول يارب الناس تعرف تعملها

    أكتر حاجة عجبني تفكيرك فيها
    هو موضوع نصف الدين
    تمام
    بجد خليتني افهم المعنى دى
    عارف
    زوجة بالشكل دا هتكون معين على دخول الجنة
    يوم القيامة لما الناس كلها تتبرى من بعضيها
    هي هتيجي ماسكة ايدك و تخش بيك الجنة
    قول يارب

    خير
    محدش عارف الخير فين

    ReplyDelete
  8. السلام عليكم
    موضوع هايل الصراخة ده اول جزء بالنسبة لية بس كلامك صح ومش بيغقد ولا حاجة وانا بعمل بيه الحمد لله
    انا عارفة الشباب مستعجلة ليه
    ههههههههههه
    ربنا يكرمك
    اتمنى زيارتك
    تحياتى

    ReplyDelete
  9. فتوح باشا
    أو الباشمهندس محمد ..
    اللي أنا عارفه و هم مش عارفني :)

    نورت مصـ... قصدي نورت المدونة :)

    شكرا على الإطراء يا هندسة ..
    و هو فعلا المهم العمل و ليس القول ..
    فيه ناس كتير عارفة الصح من الغلط .. لكن بتعمل الغلط برضه !!

    احم احم ... بص .. هي حكاية تفكيري في موضوع نصف الدين ده .. للأمانة هو مزيج بين تفكيري و تفكير شخص آخر قمت بصياغته في الآخر ليظهر على ههذا الشكر ..

    بس هي فين بس الزوجة الصالحة دي يا محمد ..

    و لا هو أحنا لأننا لسنا بمحمد فلن نجد خديجة !! ؟؟

    نورتنا يا محمد

    ReplyDelete
  10. توتي ..

    و عليكم السلام و رحمة الله و بركاته ..

    طيب الحمد لله إن الكلام حلو و مش بيعقد :)

    و هو الشباب مش مستعجلين و لا حاجة ..هو بيسدوا الفراغ اللي جواهم زي ما قلنا في أول جزأين ..
    إنما من ناحية الاستعجال فمافيش خالص .. :)

    ReplyDelete
  11. R.for.ever
    معلش أنا هرفق كلامك الي قلتيه بره و بعدين أرد عليه :
    --------------
    انت قلت انو اوعى تحب لحد ما يجي الوقت المناسب وتمتلك كل الامكانيات لذلك الكلام هاد للشباب طبعا طيب والبنات مهمه اصلا مش مطلوب منهم ولا امكانيات ولا اشي
    ولو حاول حد يدق باب القلب يعني يخليك تفكر فيه غصب عنك بكون مش ذنبهالو طلبت ن ربنا انو يجعلو نصيبها بكون خطأ ولا لأ
    -------------

    طبعا ألف شكر على مرورك و تعليقك و مديحك و إن شاء الله كل المواضيع تكون عاجباكي ..

    بالنسبة لكلامك .. لأن البنت طبعا ما عليها غير إنها تستنى .. يبقى برضه لو حد خبط عليها و هي عارفه إنه لسه ما ينفعش يبقى المفروض "تسد ودانها" و ما تفتحش !!

    لأنها لو فتحت يبقى هتتعلق "بقشاية" طالما هو مش جاهز و بيتعجل ما ليس له طاقة عليه بعد ..
    يعني هو لو دخل من الباب من الطريق الشرعي و من تجاه الأهل و الخطوبة يبقى ماشي .. حتى لو مش جاهز دلوقتي ..
    لأن الخطوبة في حد ذاتها التزام منه , و من أهله أمامكِ و أمام عائلتك ..

    أما لو لو يأت البيوت من أبوابها .. و تحجج إنه مش جاهز .. يبقى ده حريّ به أن يُنسى لأنه ليس أهلا للمسؤولية .. فكأنه كالطفل الصغير يطلب ما لا يملك و لا يستطيع .. ثم هو لم يراعيكِ ابتداءا لأنه قبل أن تكون علاقتك معه من غير طريق الأهل -حتى لو علاقة خفيفة جدا- ,

    ده بجد لو محترم أو على قدر المسؤلية كان تقدم من الباب .. و أتى أهلكِ حتى لو لم يكن جاهزا الآن .. فقط للخطوبة لأن الخطوبة هي "لحجز" المخطوبة قبل أن يخطبها أحد آخر .. و بعين يبقى ملتزم أمام أهله و أهلكِ أنه يكون قادر على الزواج في ظرف سنة مثلا أو سنتيين أو حسب الاتفاق ..

    المهم الالتزام .. و أن يأتي البيوت من أبوابها ,, أما غير ذلك فهو إما يتسلى أو أنه أحمق و ليس برجل ..

    تحيتي .. و أرجو أنلا أكون قد "خبّطت في الكلام" :)

    ReplyDelete
  12. اللهم اغفر له و ارحمه و تب عليه و وفقه لما تحب و ترضى و أدخله الجنة و أجره من النار


    اللهم اغفر له و ارحمه و تب عليه و وفقه لما تحب و ترضى و أدخله الجنة و أجره من النار


    اللهم اغفر له و ارحمه و تب عليه و وفقه لما تحب و ترضى و أدخله الجنة و أجره من النار


    بس يا عم مش هقول غير كده

    ReplyDelete
  13. لؤلؤة الجنةAugust 12, 2008 at 1:47 AM

    السلام عليكم
    بجد البوست اكثر من رائع
    وجزاك الله خيرا
    لا تنسونا من الدعاااء

    ReplyDelete
  14. tiva

    شكرا على الدعاء ..
    و يارب يكون من القلب ..

    و ربنا يستجيب ..

    جزاك الله خيرا

    ReplyDelete
  15. لؤلؤة الجنة

    و عليكم السلام ..

    و شكرا على المرور

    و لا تنسينا أنتِ من الدعاء ..

    جزانا و إياكم ..

    ReplyDelete
  16. كلام جميل
    كلام معقول

    :D

    اول زيارة ليا ف المدونة
    بس اسلوب حضرتك بجد جميل جداا

    ان شاء الله هاتابع

    ReplyDelete
  17. منى :

    شكرا جزيلا لمرورك ,

    و إن شاء الله المدونة تعجبك و تفيدك ,
    جزاكِ الله خيرا

    ReplyDelete
  18. آه لو كان الأمر بكبسة زر!!
    ربنا يصبرنا و يستر علينا بقى..
    الحمدلله إني قريت السلسلة دي في الوقت ده بالذات ، شكرًا جدًا :)

    ReplyDelete
  19. جـيـداءGaida

    شكرا جزيلا لمرورك ,
    عسى أن تكون السلسلة قد أفادت ,
    وللأسف كما قلتِ فإن الأمر ليس بكبسة زر , الأمر يحتاج مجاهدة , (( و الذين جاهدوا فينا لنهدينهم سبلنا ))

    رنبا يهيأ لنا الخير و إياكم

    ReplyDelete
  20. السلام عليكم
    كلام محترم و منطقي جدا

    هذه اول زياره لي للمدونه و اعجبتني كتير

    ReplyDelete
  21. د. نورا :

    و عليكم السلام و رحمة الله ,
    و مرحبا بكِ ,
    و إن شاء الله المواضيع تعجبك ,
    و أي موضوع تحبي تنقليه انقليه ,

    شكرا

    ReplyDelete
  22. كلام جدا رائْع ويارب ربنا يقدرنا ونطبقه ،،،،، عن جد لازم نفكر بعقولنا مو بعقول المخرجين الا بصورو الحب الفاضي حق اليومين دي ،،،،
    مرة شكرا ويارب يجعله في ميزان حسناتك

    ReplyDelete
  23. اول الطريق :
    جزاكم الله خيرا ,
    و ربنا ينفعنا و إياكم بما كتبنا ,

    و لا تنسوا الدعاء ...

    ReplyDelete
  24. السلام عليكم بجد كلام رائع و اسلوب متميز للاقناع انا اول مرة ادخل المدونة و ان شاء الله مش هتكون اخر مرة

    ReplyDelete
  25. israa :

    و عليكم السلام و رحمة الله
    و الحمد لله إن الموضوع أفاد حضرتك
    نسأل الله أن يعلمنا ما ينفعنا و ينفعنا بما علمنا
    جزاكم الله خيرا

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ