زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

26 August, 2008

مش قادر خلاص .. عاوز أرجع أسمع أغاني تاني




مش قادر خلاص .. عاوز أرجع أسمع أغاني تاني !!!

لا لا لا لااااااااااااااااااااااااااا
مش هقدر أكمل خلاص ..
أنا بقى لي شهرين مبطل أغاني ... بس خلاص .. مش قادر .. عاوز أسمعها تاني ..
مش قادر أصبر أكتر من كده !!!!!
أنا جبت آخري خلاص !!!

.
.
.
طيب طيب بالراحة .. على مهلك يا سيدي .. هدي أعصابك ..
عاوز تسمع أغاني ؟؟ زي زمان ؟؟
طيب عاوز ترجع تاني تتفرج على روتانا و (ميلوتشي) ؟؟؟
طيب مش قادر تمسك نفسك خلاص و عاوز ترجع تبص ( عاللي رايحة و اللي جاية )
تحت أمر سيادتك ... بس ممكن أكلم طنـ.... قصدي ممكن أكلمك بس الأول ..
بص يا سيدي .. أنا موافق إنك ترجع تسمع و تتفرج و تبص و تعمل كل حاجة ... بس ممكن طلب ( رفيع ) قبل ما تعمل كده ؟؟
اتخيل نفسك سمعت الأغنية أو اتفرجت على (اللي بالي بالك) أو للبنت اللي ماشية دي ..
و بعدين عاوزك توقف أي (ميكروباص) على طريق (الحاضر- المستقبل) السريع ... و تقول له وديني (نصف ساعة قدام يا أسطى) ...

-لو مافيش ميكروباصات ممكن تاخد حصان عادي هو شكلة حمار مش حصان بس هيقضي الغرض -

و تشوف نفسك كده ... حاسس بإيه دلوقتي ؟؟؟
حاسس بطعم الأغنية بعد النص ساعة ؟؟؟ و لا (بمتعة المشاهدة) أو بـ(حلاوة البصة) ؟؟
لا ... صح ؟؟
علشان كده ابن القيم من أيام زماااااااااااان قال لك إن بعد الشهوة بحبة صغيرين .. الواحد مش هيحس بأي لذة ... بل على العكس .. هيحس بالضيق و الذل و كل حاجة وحشة ..
قال رحمه الله : " اللذة المحرمة ممزوجة بالقبح حال تناولها مثمرة للألم بعد انقضائها
فإذا اشتدت الداعية منك إليها ففكر في انقطاعها وبقاء قبحها وألمها
ثم وازن بين الأمرين وانظر ما بينهما من التفاوت...

والتعب بالطاعة ممزوج بالحسن مثمر للذة والراحة
فإذا ثقلت على النفس ففكر في انقطاع تعبها و بقاء حسنها ولذتها وسرورها
و وازن بين الأمرين وآثر الراجح على المرجوح

فإن تألمت بالسبب فانظر إلى ما في المسبب من الفرحة والسرور واللذة يهن عليك مقاساته
وإن تألمت بترك اللذة المحرمة فانظر إلى الألم الذي يعقبها ووازن بين الألمين

ومن فكر في الدنيا والآخرة علم أنه لا ينال واحدا منهما إلا بمشقة ...... فليتحمل المشقة لخيرهما و أبقاهما
"
يبقى بالله عليك العملية يعني تستاهل ؟؟؟
بقى علشان حتة أغنية و لا فيلم مش هتحس بمتعتهم بعد نص ساعة ... تبوظ حالتك النفسية بالشكل ده .. لا .. و اتسجلت عليك سيئات كمان !!
يعني لو كنت صبرت شوية في الأول ... مش كان أحسن ؟؟
هتقول لي يا عم التفكير و (الشيطان صايع) بقى و النفس الأمارة و ..... إلخ إلخ ..
هقول لك اجمد ياد .. و خليك زي الأسد مش زي الكلب ..!!!

اقرأ القصة دي كده .. لابن الجوزي في صيد الخاطر :

" من نازعته نفسه إلى لذة محرمة فشغله نظره إليها عن تأمل عواقبها و عقابها

و سمع هتاف العقل يناديه : و يحك لا تفعل فإنك تقف عن الصعود و تأخذ في الهبوط
و يقال لك : ابق بما اخترت
فإن شغله هواه فلم يلتفت إلى ما قيل له لم يزل في نزول


و كان مثله في سوء اختياره كالمثل المضروب :

أن الكلب قال للأسد : يا سيد السباع غير اسمي فإنه قبيح
فقال له : أنت خائن لا يصلح لك غير هذا الاسم
قال : فجربني فأعطاه شقة لحم و قال : احفظ لي هذه إلى غد و أنا أغير اسمك
فجاع و جعل ينظر إلى اللحم و يصبر
فلما غلبته نفسه قال : و أي شيء باسمي ؟ و ما كلب إلا اسم حسن فأكل..!!!
و هكذا الخسيس الهمة القنوع بأقل المنازل المختار عاجل الهوى على آجل الفضائل

فالله الله في حريق الهوى إذا ثار و انظر كيف تطفئه
فرب زلة أوقعت في بئر بوار و رب أثر لم ينقلع
و الفائت لا يستدرك على الحقيقة
فابعد عن أسباب الفتنة فإن المقاربة محنة لا يكاد صاحبها يسلم "
هتقول لي الكلب يعمل إيه و هو شايف حتة اللحمة قدامة ؟؟؟
ما هو طول ما هو قاعد قدامها كده أكيد هيضعف و ياكلها في الآخر ..
برضه هقول لك هو المفروض ما كانش يقعد (يبحلق) فيها كده و يفكر في حتة اللحمة دي و يشغل نفسه بحاجة تانية .. لأنه طول ما هو بيفكر فيها يبقى هياكلها ..
علشان كده ابن القيم قال :
" وأعلم أن الخاطرات والوساوس تؤدي متعلقاتها إلى الفكر
فيأخذها الفكر فيؤديها إلى التذكر
فيأخذها الذكر فيؤديها إلى الإرادة
فتأخذها الإرادة فتؤديها إلى الجوارح والعمل فتستحكم فتصير عادة ...
فردها من مبادئها أسهل من قطعها بعد قوتها وتمامها.
فصلاح الخواطر بأن تكون مراقبة لوليها وإلهها
صاعدة إليه دائرة على مرضاته ومحابه فإنه سبحانه به كل صلاح ومن عنده كل هدى ومن توفيقه كل رشد ومن توليه لعبده كل حفظ ومن توليه وإعراضه عنه كل ضلال وشقاء فيضفر العبد بكل خير وهدى ورشد بقدر إثبات عين فكرته في آلائه ونعمه وتوحيده وطرق معرفته وطرق عبوديته وإنزاله إياه حاضرا معه مشاهدا له ناظرا إليه رقيبا عليه مطلعا على خواطره وإرادته وهمه فحينئذ يستحي منه ويجله أن يطلعه منه على عورة يكره أن يطلع عليها مخلوق مثله أو يرى بنفسه خاطرا يمقته عليه"
يعني اقطع الطريق من الأول ... ما تفكرش أصلا في الأغاني و انت مش هتسمعها ..., و اشغل نفسك بحاجة تانية علشان ما ترجعلهاش ,
و زي مابيقولوا :
من تلمح حلاوة العافية هانت عليه مرارة الصبر
يعني أهم حاجة تقطع الطريق من الأول ... و لو لقيت (العملية باظت) ...
خد التاكسي إياه للمستقبل نص ساعة قدام و اتخيل نفسك ...
ايه اللي فاضل لك بعد سماع الأغنية أو قضاء الشهوة دي ...
مافيش حاجة غير الذنب اللي اتسجل عليك ... و اللذة راحت و خلاص ..
و أختم كلامي بكلام ابن الجوزي رحمه الله في صيد الخاطر :
من عاين بعين بصيرته تناهي الأمور في بداياتها ،
نال خيرها ، و نجا من شرها .
و من لم ير العواقب غلب عليه الحسن ،
فعاد عليه بالألم ما طلب منه السلامة ، و بالنصب ما رجا منه الراحه .
و بيان هذا في المستقبل ، يتبين بذكر الماضي ،
و هو أنك لا تخلو :
أن تكون عصيت الله في عمرك ، أو أطعته .

فأين لذة معصيتك ؟ و أين تعب طاعتك ؟


هيهات رحل كلٌ بما فيه !

فليت الذنوب إذ تخلت خلت !
.
.
.
آه و الله ... رحل كلٌ بما فيه !!!
و لم يبقى إلا أثر الذنوب !!!




هداني الله و إياكم لما فيه الخير ..


و وفقنا و إياكم لما يحب و يرضى .


و رزقنا الجنة و أجارنا من النار ...


و لا تنسوا الدعاء ...


و جزاكم الله خيرا على المرور ..



>> حقوق النشر للجميع لو عاوز تنشره << بس ياريت تذكر رابط المدونة :
6azbeet.blogspot.com
......
....
..



=======================


و بخصوص الأغاني هي كانت مثل ضربته و لم أقصد أن يكون الموضوع عنها ...

لكن للاستزادة في موضوع الغناء و حكمة أرجو مشاهدة هذا العرض :









تحيتي ..




و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<
لو رأيت إنه يستحق النشر
و ياريت تذكر رابط المدونة :

أو على الأقل تذكر إنه منقول
......................

تحيتي

.....

33 comments:

  1. اول زيارة واول تعليق كمان ... يلا يا سيدى

    ههههههههه

    اول حاجه انا اول مره ادخل مدونه جامده بالشكل دا .. بجد مدونتك فظيعه فظيعه بعنف يعنى ...ههههههه


    بجد مدونتك جميلة جدا

    والبوست دا من النهاية .. كلامك مؤثر بجد

    اهو الواحد على قد ما يقدر بيغض بصرة

    يجى يبص فوق يلاقى ناس ف البالكونات يجى يبص قدام تلاقى حاجات بالهبل
    طب حتمشى ازاى

    حتبص تحت يبقا حتقع
    حتبص يمين يبقا مجنون

    حتبص شمال يبقا اهبل

    الواحد يعمل ايه بس
    ف نفسه

    ههههههههه


    ربنا يخرجنا منها على خيير


    ارجوا التواصل بيننا


    ويارب اشوفك على مدونتى وتقول ايه رايك

    ReplyDelete
  2. اه نسييت اقوول حاجه
    بالنسبه للأغانى


    اللى بيسمع اغانى .. اكييد اكييد حيحاول ينفذ


    طب إزاى ينفذ دى ؟؟ اقولك انا

    يعنى لو سمع اغانى عن الحب ومبهدل نفسه سماع

    يبقا اكيد حيبقا محتاج يعيش حالة حب

    وانت عارف الباقى بقا

    على العموم انا اتشرفت بالدخول لمدونتك بجد

    مفيده جدا

    ReplyDelete
  3. ربنا يكرمك على طرح هذا الموضوع وطريقة عرضه
    وتعرف لو بدلنا سماع الاغانى بسماع القران هنجد متعة ولذة مختلفة تماما
    واللى عايز يسمع اغنية يسأل نفسه لو سمعتها هاخد ثواب ولا لا
    طب ولو بدلتها بقران هاخد ثواب ولا لا
    ومتهيألى كل واحد هيبقى عارف هو عايز ايه وهيعمل الحاجة بناء عليه

    ReplyDelete
  4. بوست رائع رائع
    وكلمات معبره
    شكراااااا على البوست
    تحياتى

    ReplyDelete
  5. والله معاك حق

    ربنا معانا

    ياااارب

    ReplyDelete
  6. ما شاء الله

    مدونة اكثر من رائعة بجد

    الاول الاسلوب لذيذ جداااااااااا والكلام مقنع جدااااااااا

    وجو المدونة رائع بجد

    جزاك الله خيرا اخى الكريم وجعله فى ميزان حسناتك

    اسمحلى اضافتها فى المفضلة ودوام متابعتها

    وفكرة الوشوش دى تجنن على فكرة

    تقبل مرورى

    ReplyDelete
  7. المبرمج المحترف

    شكرا جزيلا على مرورك ..

    و على رأيك ..
    الأعداء من كل جانب :)

    بس ربنا يهدينا و يهديهم كمان

    و على فكرة فيه حل جميل جدا ... تغمض عينيك و تشوف واحد يسحبك :)

    أما في حكاية الأغاني ...

    فأنا معاك جدا جدا جدا ..
    إن الواحد اللي بيسمع أغانبي بيحب "يعيش" الدور و بيعيش في الوهم خالص ..

    شكرا جزيلا على المرور ..

    نورتني بجد :)

    ReplyDelete
  8. موناليزا

    شكرا جزيلا على المرور ..

    و أ،ا معاكي إن إيجاد البدائل من أهم الأسباب لتغيير العادات و الإقلاع عنها ..

    يعني بدل ما نبطل نسمع أغاني ... نسمع برضه لكن قرآن أو أناشيد مافيهاش موسيقى أو أي حاجة حرام ..

    و شكرا جزيلا على الإضافة ..

    تحيتي

    ReplyDelete
  9. أحمد أشرف ...
    ألف كشرا على مرورك ..

    و الحمد لله إنها عجبتك ..

    شكرا جزيلا على مرورك :)

    ReplyDelete
  10. حسن حنفي...

    شكرا جزيلا على تشريفك ليا على طول ..

    ربنا يرفع من معنوياتك ..

    و ربنا يوفقنا كلنا إن شاء الله

    ReplyDelete
  11. اختكم في الله

    أهلا و سهلا أختي الكريمة ..

    مرورك أسعدني ..

    جزانا الله خيرا و إياكِ

    و الحمد لله إن المدونة عجبتك ..

    و ده يشرفني إنك تحطيها في القائمة بتاعتك .

    بس بصراحة "فكرة الوشوش" دي مش فاكرها !!! :)

    هي كانت فين بالضبط :) ؟؟؟

    عموما شكرا جزيلا على المرور ..

    تحيتي

    ReplyDelete
  12. دى أول زيارة هنا
    بس بجد مدونة رائعة
    تستحق التقدير
    وكلامك وتحليلك رائع يجذب الانتباة ويوصل رسالتك
    وياريت تعدى على مدونتنا وتقول رأيك فى المدونة
    على فكرة المدونة بقالها بالضبط أسبوعين
    مستنيا الزيارة والتعليق

    ReplyDelete
  13. همسة ..

    شكرا جزيلا على المرور و التعليق ..

    و الحمد لله إ، المدونة عجبتك ..

    و إن شاء الله تتكرر الزيارة دي :)

    تحيتي

    ReplyDelete
  14. بجد بوست رائع

    من البوستات القليله اللى انا قريتها فى المدونات النهارده

    ربنما يجعله فى ميزان حسناتكم ياااارب

    ReplyDelete
  15. ماشاء الله ربنا يباركلك ويزيدك
    علي فكرة اول ما دخلت
    اعتقدت انك بتقول انك عاوز ترجع تسمع اغاني تاني وانك مش قادر تصبر
    اضايقت جدا
    وقلت ايه ده مين اللى عامل بوست مخضوضو عشان عاوز يسمع اغاني ده
    بس فرحت جدا لما كملت
    اسلوبك حلو جدا يشد
    وصلت للناس كلام ابن القيم واللى ممكن محدش يتشجع ويرقاه
    انت وصله باسلوب خفيف وسلس
    بجد كلامك استفدت منه انا شخصيا ربنا يزيدك
    مع انى ياخويا مبسمعش اغاني الحمد الله من سنين
    واحترمك انك عارف ان الاغاني حرام
    لان ناس كتير بتجادل في الموضوع ده
    تحياتي ليك
    وكل سنة وانت طيب
    ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒ kol 3am w antom be5eer ▒▒♥▒▒♥▒▒كـــــــــريــم♥▒▒رمضــــــــان♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒

    ReplyDelete
  16. ايه يا عم GRIN دى ... ولا عشان خلاص بقيتوا مهندسين .. ولا ايه



    ههههههههههه

    رمضان كريم

    ReplyDelete
  17. احم احم..
    السلام عليكم
    عجبني البوست جدااااااااااااا
    وفكرته رائعة بجد
    فكرة اركب التاكسي إياه (ولا اقولك خليها اتوبيس عشان رخيص هههههه)
    واروح للمستقبل ربع نص ساعة
    علي فكرة انا قبل كدة فكرت في الحكاية دي وبقعد اقول لنفسي طيب هو انا استفدت ايه ..ولا حاجة بالعكس دانا اخدت ذنوب
    بس للأسف في ناس ضعيفة جداً وكمان في عامل مهم جداً للتوبة عن إي حاجة
    العامل دة هو الأصدقاء والناس المحيطين
    بجد بيعملوا شغل جااااااااامد
    لأنهم هما اللي ممكن يثبتوا حد علي الطريق الصح أو يشجعوه علي الغلط
    واسألوا مجرب (حصلتلي)
    علي فكرة انا طمعانة في الحسنات اللي حتاخدها من وراء الناس اللي حتتوب عن الأغاني وغيرها بسبب البوست دة
    بس طمع حلو صح؟؟
    سلام
    آه نسيت أقول
    رمضان كرييييييييييم
    و كل سنة وانتم طيبين جميعاً
    ومتتقلوش في الفطار..هاه!!!

    ReplyDelete
  18. مرور للتهنئة بقدوم شهر رمضان وتمنياتى بان ننال منه الكثير ...لا تدع الفرصة تفوتك باغتنام هذا الشهر الذى فضله الله على باقى الشهور
    ودعواتى لكم جميعا بقبول اعمالكم وعباداتكم وان نكون مع الرسول ان شاء الله ..سعيد بزيارتى ومرورى والى لقاء قريب لك كل التحية والتقدير

    ReplyDelete
  19. السلام عليكم ورحمة الله وبركاته

    بصراحة اول زياااااارة بس المدونة شكلها اعتقلتنى مش هاسيبها ابدااااا

    دمها خفيف وهادفة واسلوبها جميييييل جدااااا

    وحكاية التاكسى او الحصان عملية جداااا


    ربنا يجعله فى ميزان حسناتك يااااارب

    ReplyDelete
  20. بجد بجد مدونتك رائعة جدا واسلوبها حلو قوى

    بجد الله يجازيك كل خير عليها

    ReplyDelete
  21. حسام ..

    ألف شكر على مرورك ..

    شكلك مبطل قراءة و لا ايه ؟؟

    شكلك مخنوق يا نصه :) !!!

    ربنا يفرج عنك

    ReplyDelete
  22. مها زين

    بارك الله فيكِ أختي ..

    و الحمد لله إن "الخضة" لم تدوم :)

    و ربنا يوفقنا و نبطل كل حاجة وحشة ..

    و الحم دلله إن المدونة عجبتك ..
    في أمان الله

    ReplyDelete
  23. لمبرمج المحترف ..

    كل سنة و انت طيب يا عمر ..

    و رمضان مبارك

    ReplyDelete
  24. ميوية

    أهلا بكِ في المدونة ..

    و الحمد لله إن الموضوع عجبك ..

    و هو زي ما قلتي فعلا ..

    الناس و البيئة و الأصدقاء عامل مهم في الثبات

    علشان كده المفروض الواحد يظبط الحاجة اللي حواليه كمان علشان ما تأثرش عليه ..

    و ربنا يكرمنا كلنا .. و يارب يجعله في ميزان حسناتنا ..

    و رمضان مبارك

    ReplyDelete
  25. أستاذ حسن محمد

    كل عام حضرتك بخير ..

    و بعودة الأيام :)

    ReplyDelete
  26. رد الي روحي

    و عليكم السلام و رحمة الله و بركاته

    الحمد لله إن المدونة عجبتك ..

    بس بلاش "اعتقلت" دي :) أحسن يفكرونا مخبرين و لا حاجة ..

    و إن شاء الله تنورينا على طول ..


    في أمان الله

    ReplyDelete
  27. جيهان

    شكرا جزيلا على المرور

    و الحمد لله إن المدونة عجبتك ..

    و ربنا ينفعنا بما نقول ..

    في أمان الله

    ReplyDelete
  28. والله أنا مش عارف اقولك ايه
    بس بجد ربنا يجزيك كل خير ويهدينا جميعا لما فيه صلاح في ديننا ودنيانا

    أنت كاتب متميز خفيف الظل ذو ثقافة عالية وافكار سامية

    اسأل الله أن يستعملك لخدمة دينه ويوفقك في كل أمور حياتك

    ReplyDelete
  29. سمو الأمير ..

    جزاك الله خيرا على المرور ..

    و ما تقولش حاجة ..

    غير إنك تدعي لي بجد ..

    بس مش على الماشي كده .. لكن و انت بتصلي ..


    و جزاك الله خيرا

    ReplyDelete
  30. السلام عليكم ..
    ربنا يجزيك الخير على التذكره والعظه القيمه الي اتمنى اني اعمل بيها فعلا لاني بسمع اغاني ومش هقولك اني متعلقه بيها بان لازم اشترى او اسمع وانزل اي جديد الحكايه عندي بعيده عن المعنى دا بس مش مبرر انه مش حرام ولازم احاول ابطل بس مش عارفه وعلى قد ما بحاول اقلل بس بصراحه حتى لو حاولت ساعات الجو الي بيفرض عليك تسمع تلاقيك مش بس بتسمع بتشارك خصوصا لو جات الكلمات على مزاجي وياسلام لو كانت فيروز وورده .. ووو شايف رجعنا نضعف والدعاء مش كفايه بجد لازم وقفه من جوا صادقه مع نفسي علشان اقدر ما انسجمش مع الاغنيه وتمر كلماتها عابره بوداني من غير تاثير ساعتها بجد هاقدر ابطل وما رجعشي تاني وحتى لو سمعتها بمكان غصب عني ما تعنيليش شئ .. اتمنى اوصل للمرحله دي فعلا
    ربنا يهدينا جميعا ويجزيك كل خير
    زوزو

    ReplyDelete
  31. زوزو ,

    و عليكم السلام و رحمة الله ,

    للأسف فعلا الأغاني دي صعب الواحد يبطلها ,

    جنبنا فرح دلوقتي حالا , و مشغلين أغاني بصوت عالي طبعا ,

    و الواحد بيحاول يمسك نفسه أو يلهي نفسه في أي حاجة ,

    و على فكرة أي حاجة صعب الواحد يبطلها من أول مرة , لازم يلاقي لها بديل , يشغل نفسه بيه بدلها ,

    و ربنا يهدينا و يرزقنا العمل بما نقول ,

    و يجعلنا خيرا مما تظنون و يغفر لنا ما لا تعلمون

    ReplyDelete
  32. جزاك الله خيرا يا أخ TIMMY - مش راكبة أخ مع تيمى بس ما علينا :)- المدونة فعلا متميزة والموضوع بيمس الجرح عند أغلب الأمة دلوقت الا من رحم ربى والعبد لله بيعتقد انه من أسباب تخلفنا و كتير من مشاكل الشباب بسبب الأغانى
    واحب أنبهك ان الفلاشة لينكها مش شغال لأن الجيوسيتيز اتقفل من مدة فأرجو تجديد الرابط

    ReplyDelete
  33. abd ALLAH :

    جزانا و إياكم أخي عبد الله ,

    و بالفعل ( أخ تيمي ) دي مش لايقة خالص !!

    لكن الظروف زمان هي اللي خلتني أتخذ اللقب ده , بالإضافة إني مش أنا اللي بكتب هنا علشان أكتب اسمي الحقيقي ,
    إنما جزء مني هو اللي بيكتب هنا , و ليس كلّي ,

    و جزاك الله خيرا على التنبيه بشأن الفلاشة ,
    فعلا جيوسيتيز اتلغى من زمان ,
    جاري تعديل الرابط بتاع الفلاشة ,

    و لا تنس الدعاء بالله عليك يا عبد الله

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ