زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

17 April, 2012

ـ بس يا سيدي , و قبل ما أموت هنطق الشهادتين !! ـ


السلام عليكم و رحمة الله و بركاته ,
 


طبعا كلنا عارفين حديث رسول الله - صلى الله عليه و سلم - المشهور :
(( من كان آخر كلامه : لا إله إلا الله ، دخل الجنة ))
[ الراوي: معاذ بن جبل - المحدث: الألباني -
المصدر: صحيح الجامع - الصفحة أو الرقم: 6479
خلاصة حكم المحدث: صحيح ]
 
 
 
و للأسف فيه ناس فهمت الحديث ده غلط ,
و مفكرين إنهم يقدروا يعيشوا ( مقضّيينها ) ,
و عايشين مش في دماغهم الدين
و الأوامر و النواهي و لا أي حاجة ,


و في اللحظة الأخيرة ...
و قبل ما يموت ....
يقول : " لا إله إلا الله " ....
و يدخل الجنة !!
تاراراراراراااااا


و ده طبعاً وهم كبير ,
لا يفعله إلا اللي عايشين في مية البطيخ !!

لأن " لا إله إلا الله " مش كلمة بس و خلاص ,
و إلا كان المشركين أيام الرسول قالوها و ريّحوا نفسهم من الحروب و وجع الدماغ و الكلام ده كله ,

لكن كلمة " لا إله إلا الله " لها شروط كثيرة , مثل :
اليقين بها ,
و العلم بمعناها ,
و العمل بمقتضاها ,
و القبول لما اقتضته ,
و الانقياد لما دلّت عليه و ...... إلخ


يعني مفتاح الجنة هو فعلا " لا إله إلا الله " ,
ما حدش اختلف معاك ,
لكن لابد للمفتاح من أسنان ,

قيل لوهب بن منبه:
" أليس "لا إله إلا الله" مفتاح الجنة ؟
قال: بلى ، ولكن ....
ما من مفتاح إلا له أسنان ،
فإن جئت بمفـتاح له أسـنـان فُـِتح لك،
وإلا لم يُفـتح لك "


,,,,,,,,,,,,,,,,,,,
 
 
بص يا CD ,
سيبك انت من الكلام اللي فات ده لو مش قادر تفهمه
و تعالى نأخذ الموضوع من وجهة نظر أخرى ,


عمرك شفت واحد خارج من العملية
و لسه تأثير البنج - المخدّر - لم ينتهي ؟؟


بتلاقيه عمال يقول أي كلام و خلاص ,
تلاقيه مثلا بيشتم في الدكتور بتاع الكلية ,
و لا في جيرانهم اللي مطلعين عينهم ,
أو بينادي على واحد صاحبه مسافر مثلا أو .....


و مهما حاولت تكلمه أو تسكتّه مش هيرد عليك و لا هيسمع كلامك ,

ليه !!؟؟

لأنه سكران .... تحت تأثير المخدر ,


و كذلك الحال في الموت ,
قال تعالى : { و جاءت سكرة الموت بالحق }

سكرة الموت ...

يعني هتلاقي نفسك بتتكلم من غير إرادة ,
و لو 532 واحد حواليك قالوا لك : قل " لا إله إلا الله " ...
مش هتاخد بالك منهم ,
و هتقول اللي في عقلك الباطن
و اللي قلبك كان مليان بيه في الدنيا ,


يعني العملية مش فهلوة و شطارة ,
لأن عقلك مش هيكون معاك , لأنك في ( سكرة ) ,
فمش هتقدر تقول غير اللي كنت عايش فيه
و اللي قلبك كان متعلق و مشغول بيه




نسأل الله لنا و إياكم حسن الخاتمة ,
و أن يجعل آخر كلامنا من الدنيا شهادة ألا إله إلا الله و أن محمدا رسول الله
و أن يُدخِلنا الجنة , و يُجِرنا من النار
 
 
 
 
و لا تنسوا كاتب الموضوع من دعوة صالحة بظهر الغيب :
أن يُصلح الله له شأنه كله و أن يهديه و يتوب عليه ,
و أن يكفِنا بحلاله عن حرامه 
و يُغنِنا بفضله عمن سواه 

.......... ما تنسوش بالله عليكم
..........

>> حقوق النشر للجميع <<
بشرط عدم التحريف أو التغيير

و يا حبذا لو تذكر رابط المدونة
tazbee6.blogspot.com


أو تذكر أن الموضوع
" منقول من مدونة تظبيط "

ـ

8 comments:

  1. بوست اكثر من رائع و معانيه جميلة و عميقة
    فكرتني برضة بالناس اللي بتبقى مقضياها و تلاقيهم بيقولوا يا سلاااااام على الفنان فلان او الراقصة علانة عملوا كل اللي في نفسهم و استمتعوا بجميع ملذات الدنيا المحرمة و شوفت يا عم اهو دلوقتي ربنا تاب عليهم و بقوا الحاجة فلان و الحاج علان!!!!
    في ناس فعلا ادمغتهم غريبة
    ربنا يحسن ختامنا جميعا
    اللهم امين

    ReplyDelete
    Replies
    1. جزاك الله خيرا يا أحمد
      فعلا للأسف فيه ناس كده ,
      و فيه ناس أقل من كده بشوية , اللي بيقول لك أنا هفرح بشبابي و أقضيها لحد ما أكبر شوية و أتجوز و أعقل ,
      و هو مش ضامن أصلا

      ربنا يهدينا و يهدي الجميع
      و شكرا جزيلا على التعليق يا أحمد

      Delete
    2. مش حكاية مش ضامن ولا ضامن ..
      حتى لو هو ضامن ولو إنه مستحيل

      هو مش مستوعب إن مش هى دى السعادة ولا إنه مبسوط فعلا
      هوالشباب ده للإنجازات مش عشان نضيعه

      اللهم أعزنا بالإسلام وأعز الإسلام بنا وكاتب المقال
      آمين

      Delete
    3. Mariam Alaa Khairy

      مع إني أظن إنه عارف إن مش هي دي السعادة ,
      بس هو مش عاوز يفوق
      و لا عاوز يتعب نفسه و يحاول

      ربنا يهدينا و يتوب علينا

      جزاكم الله خيرا

      Delete
  2. كان هناك شيخ يعلم تلاميذه العقيدة .. كان يعلمهم لا إله إلا الله و يشرحها لهم
    وفي يوم جاء أحد تلامذة الشيخ ببغاء هدية له وكان الشيخ يحب تربية الطيور والقطط

    ومع الأيام أحب الشيخ الببغاء وكان يأخذها معه في دروسه حتى تعلم الببغاء نطق كلمة لا إله إلا الله فكان ينطقها ليل ونهار،

    وفي مرة وجد التلامذة شيخهم يبكي بشدة وينتحب ...
    وعندما سألوه قال لهم: لقد قتل قطٌ عنده الببغاء ...

    فقالوا له لهذا تبكي !! إن شئت أحضرنا لك غيره وأفضل منه ... فرد الشيخ وقال لا أبكي لهذا ... ولكن أبكاني أنه عندما هاجم القط الببغاء أخذ يصرخ ويصرخ إلى أن مات مع أنه كان يكثر من قول لا إله إلا الله ...
    إلا أنه عندما هاجمه القط نسيها ولم يقم إلا بالصراخ، لأنه كان يقولها بلسانه فقط ولم يعلمها قلبه ولم يشعر بها ...

    ثم قال الشيخ : أخاف أن نكون مثل هذا الببغاء نعيش حياتنا نردد لا إله إلا الله من ألسنتنا وعندما يحضرنا الموت ننساها ولا نتذكرها لأن قلوبنا لم تعرفها ... فأخذ طلبة العلم يبكون خوفا من عدم الصدق في قول لا إله إلا آللـّه والعمل بها ...

    ReplyDelete
    Replies
    1. جزاكم الله خيرا على الموعظة ,
      ربنا ينفعنا بيها و يُصلح حال قلوبنا

      Delete
  3. نقلتهاآ على فكره !
    و أسجل متاآبعتي اليوميه للمدونة
    كل يوم بدخل أشوف لو في جديد !
    إستمر

    ReplyDelete
    Replies
    1. جزاكم الله خيرا
      ربنا ينفعنا و يأجرنا و إياكم

      Delete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ