ليه ربنا ما بيساويش بين الناس ؟؟

السلام عليكم و رحمة الله و بركاته

من زمان و أنا بيجيلي تفكير غريب لما أشوف واحد فقير و واحد غني

أو واحد مريض و واحد صحيح

كل ما أشوف حد فوق و حد تحت ييجي في نفسي شعور غريب كده

و أقول لنفسي :

هو ليه ربنا ما خلقش الناس كلهم أغنياء و أصحاء ؟؟

و ليه ربنا لم يساوي بين عباده ؟؟

بس كنت بقول لنفسي بس يا واد ما تقولش كده

ربنا أكيد ساوى بين الناس بس انت مش واخد بالك ,

لكن لقيت حديث بيؤكد الكلام اللي كنت بفكر فيه

إن ربنا فعلا لم يساوِ بين عباده

قال رسول الله صلى الله عليه و سلم في تفسير قوله تعالى  

{ وإذ أخذ ربك من بني آدم من ظهورهم ذريتهم }[الأعراف : 172] :

(( قال : جمعهم فجعلهم أزواجا ، ثم صورهم فاستنطقهم ، فتكلموا ،

ثم أخذ عليهم العهد والميثاق ،

{ وأشهدهم على أنفسهم ألست بربكم } ، قالوا : بلى ،

قال : فإني أشهد عليكم السماوات السبع ، والأرضين السبع ،

وأشهد عليكم أباكم آدم أن تقولوا يوم القيامة : لم نعلم بهذا ،

اعلموا أنه لا إله غيري ، ولا رب غيري ، ولا تشركوا بي شيئا ؛

إني سأرسل إليكم رسلي يذكرونكم عهدي وميثاقي ، وأنزل عليكم كتبي ،

قالوا : شهدنا بأنك ربنا وإلهنا ، لا رب لنا غيرك ، ولا إله لنا غيرك ، فأقروا بذلك ،

ورفع عليهم آدم – عليه السلام – ينظر إليهم ،

فرأى الغني والفقير ، وحسن الصورة ودون ذلك ،

فقال : رب ! لولا سويت بين عبادك !

قال : إني أحببت أن أشكر ))

[ الراوي :أبي بن كعب -المحدث : الألباني -
المصدر : تخريج مشكاة المصابيح - الصفحة أو الرقم : 118
خلاصة حكم المحدث :حسن الإسناد موقوفا ]

يعني سيدنا آدم أهه بيقول لربنا انت ليه ما سويتش بين عبادك

بالإضافة إلى إن ربنا بيقول في القرآن :

{ و الله فضل بعضكم على بعضٍ في الرزق } [ سورة النحل - 71 ]

و قال : { نحن قسمنا بينهم معيشتهم في الحياة الدنيا

و رفعنا بعضهم فوق بعضٍ درجاتٍ ليتخذ بعضهم بعضاً سخريا } [ سورة الزخرف - 32 ]

أنا عاوز أعرف بقى هو ربنا فعلا لم يساوي بين عباده بجد ؟؟

و لا أنا اللي فاهم غلط ؟؟

و إزاي ما يساويش بينهم و هو ( العادل ) اللي مش بيظلم حد ؟؟

و الإجابة

إن فعلا ربنا ما ساواش بين عباده !!

و خلق الغني و الفقير

و المريض و الصحيح

و القوي و الضعيف

و ده مش هباءاً و كده و خلاص ,

إنما لحكمة قد لا نعلمها ,

أو لحكمكة علمنا الله إياها كما في الحديث لكي يشكر الناس ربهم إذا رأوا المبتلين

أما بقى هل عدم المساواة ده يتعارض مع اسم ربنا ( العادل ) ؟؟

فالإجابة : لأ ,

لأن العدل لا يعني بالضرورة المساواة , 

و أديلك مثال ,

لو عندك ابنين , واحد صغير و واحد كبير ,

و حبيت تجيب لكل واحد هدية , و تعدل بينهم ,

هل تجيب لكل واحد مسدس لعبة ,

أم تجيب لكل واحد موبايل بكاميرا و نغمات مجسمة ؟؟

الإجابة طبعا لا ده و لا ده ,

هتجيب للصغير مسدس لعبة مثلا ,

و للكبير موبايل ,

و كده يبقى انت :

لم تساوي بينهما, لكنك عدلت بينهما

لأنك اعطيت كل واحد هدية مختلفة

لكنك أعطيت كل واحد ( ما يصلح له )

علشان كده ربنا من أسمائه الحسنى ( العدل ) و ليس المساوي ,

فربنا لما يجعل في الميراث للذكر مثل حظ الأنثيين ,

يبقى لم يساوِ بين الذكر و الأنثى

و إنما عدل بينهما بأن أعطى لكل منهما حسب ظروفه و حسب ما ينصلح به حاله

و كذا الحال مع الغني و الفقير و المريض و الصحيح و القوي و الضعيف ,

ربنا ( لم يسوِّ ) بينهما ,

( لكنه عدل ) بينهما بأن قسم لكل واحد منهما ما يصلح به شأنه ,

فقد يكون الفقير لو اغتنى لطغى و تجبر ,

و الغني لو افتقر لجزع و كفر ,

و غيرها من الحكم التي قد لا نعلمها أو نعلمها .

و هو ده بقى الفرق بين العدل و المساواة,

و إن العدل أشمل و أنسب و أفضل من المساواة ,

لأنه بيراعي ظروف الشخص نفسه و أحواله ,

و الظروف الخارجية المحيطة بيه

فالحمد لله أنه العدل الحكيم

جزاكم الله خيرا

و لا تنسوا كاتب الموضوع من دعوة صالحة بظهر الغيب :

أن يُصلح الله له شأنه كله و أن يعذه من الهم و الحزن و العجز و الكسل 

>> حقوق النشر للجميع <<

بشرط عدم التحريف أو التغيير

و يا حبذا لو تذكر رابط المدونة

tazbee6.blogspot.com

أو تذكر أن الموضوع

" منقول من مدونة تظبيط "

ـ