زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

11 August, 2011

قلقان و خايف من بكره ؟؟


السلام عليكم و رحمة الله وبركاته

تخيل واحد يعرفك اتصل بيك بالتليفون و كان عاوزك ضروري ,
علشان يحكي لك المشكلة التالية و عاوز رأيك فيها :
" أنا لي واحد صاحبي من عشرين سنة ,
جمايله مغرقاني , و مواقفه الرجولية معايا في كل حاجة ,
لكن المشكلة إني ( مقلّق ) منه حبتين ,
مش مطمن من ناحيته ,
حاسس إنه ( مرقّد لي ) على مصيبة في المستقبل ,
رغم إني ما شفتش منه غير كل خير على مدى 20 سنة "

قبل ما أسألك عن رأيك ,
عاوز أسألك عن صاحبه لو عرف الكلام اللي هو بيقوله ,
أكيد هيزعل منه , و يقول بعد كل العمر ده و لسه شاكك فيا ؟؟
و ممكن يتنرفز شوية و يقول , بقى هو مفكرني كده ؟؟
طب أنا هوريه بقى الوش التاني علشان ما أطلعوش غلطان ,
و دلوقتي , عاوز أعرف ردك عليه هيكون إيه ؟؟
بصراحة لو أنا , مش هعرف أرد عليه ,
لكن هقول في نفسي : إيه الراجل الغريب ده ؟؟
الراجل بيحسن إليك طوال 20 سنة , و ما شفتش منه حاجة وحشة ,
قلقان منه ليه ؟؟
ده انت غريب يا أخي !!
لكن لو دققت و تفحصت و تمحصت ,
هتلاقي فيه ناس أغرب منه
.
.
.
.
.
.
.
 
اللي قلقانين من المستقبل , و من قضاء ربنا
دول ناس من يوم ما اتولدوا و هم عايشين في جمايل و نعم ربنا ,
بل حتى من قبل ما يتولدوا

زي ابن القيم ما بيقول :
" فمن ذا الذي شفع لك في الأزل حيث لم تكن شيئاً مذكوراً ؟؟
حتى سماك باسم الإسلام، و وسمك بعلامة الإيمان،
و جعلك من أهل قبضة اليمين،
و أقطعك في ذلك الغيب عمالات المؤمنين ؟؟ "

صحيح , هو حد كان ( اتوسط لك ) عند ربنا قبل ما يخلقك إنه يخلقك مسلم ؟؟
و إنه بعد ما يخلقك يرزقك أبوين بدل ما تبقى مشرد في الشوارع ,
و يكبرك و يعلمك و يصرف عليك و .....
يعني ما شفتش منه غير كل خير أهه ,
ليه تقلق منه ؟؟
ده حتى يبقى عيب ,
يبقى أكنك بتشكك في كرمه ,
و بتتهمه بالمكر بك , تعالى الله عن ذلك ,

علشان كده الرسول صلى الله عليه و سلم قال في الحديث القدسي :
(( قال الله جل وعلا : أنا عند ظن عبدي بي ،
إن ظن خيرا فله ، وإن ظن شرا فله ))
[ الراوي : واثلة بن الأسقع الليثي - المحدث: الألباني -
المصدر: صحيح الترغيب - الصفحة أو الرقم: 3386
خلاصة حكم المحدث: صحيح ]

لو عاوز ربنا يكرمك , ظن فيه إنه هيكرمك
عاوزه ما يكرمكش , ظن فيه إنه مش هيكرمك


و قد فطن ابن الجوزي رحمه الله لهذا المعنى فقال : 
" بلغني عن بعض الكرماء أن رجلاً سأله فقال : أنا الذي أحسنت إلي يوم كذا و كذا ، فقال : مرحباً بمن يتوسل إلينا بنا ، ثم قضى حاجته .
   فأخذت من ذلك إشارة ، فناجيت بها فقلت :

أنت الذي هديته من زمن الطفولة ، 
و حفظته من الضلال ، و عصمته عن كثير من الذنوب ، 
و قمت برزقه من غير تعب منه ، و لا ذل للخلق بالسؤال ، 
و حاميت عنه الأعداء ، فلم يقصده جبار ، 
و إن ذهبت أعد لم أقدر على إحصاء عشير العشير و إن تعدوا نعمة الله لا تحصوها .
فيا محسناً إليّ قبل أن أطلب
لا تخيب أملي فيك و أنا أطلب ,
   فبإنعامك المتقدم أتوسل إليك
"

[صيد الخاطر بتصرف]
و هنا هتلاقي واحد بيقول لك أنا عارف إن ربنا رزقني و نعمه مغرقاني
و إن رزقي مكتوب من قبل ما أتولد و ......
و عارف إني زي مرزوق رزق عبد الرزّاق
و بحاول أظن في الله خيرا إنه هيرزقني و يسترني و ...
لكن برضه قلقان , و مش عارف أشيل القلق ده من قلبي !!
 
هقول له ده بقى يبقى شوشو !!
الشيطان عاوز يفسد على المسلم دنياه و آخرته بأي طريقة ,
يفسد آخرته بأن يجعله يسيء ظنه بربه
و يفسد دنياه إنه يخليه عايش قلقان على طول ,
و دي حاجة ربنا قال لنا عليها,
قال تعالى :
{ الشَّيْطَانُ يَعِدُكُمُ الْفَقْرَ وَيَأْمُرُكُمْ بِالْفَحْشَاءِ وَاللَّهُ يَعِدُكُمْ مَغْفِرَةً مِنْهُ وَفَضْلا وَاللَّهُ وَاسِعٌ عَلِيمٌ } [البقرة-268]

فشوف انت بقى ,
الشيطان بيوعدك بالفقر ,

و ربنا بيوعدك بالفضل ,

تصدق وعد مين ؟؟


علشان كده سيدنا عبد الله بن مسعود كان بيقول :
(( إن للشيطان لُمَّة بابن آدم ، وللمَلَك لُمَّة :
فأما لمة الشيطان : فإيعاد بالشر ، وتكذيب بالحق ،
وأما لمة الملك : فإيعاد بالخير ، وتصديق بالحق ،
فمن وجد ذلك ، فليعلم أنه من الله ، فليحمد الله ،
ومن وجد الأخرى ، فليتعوذ بالله من الشيطان الرجيم ،
ثم قرأ : { الشيطان يعدكم الفقر ويأمركم بالفحشاء } الآية ))
[ الراوي : عبدالله بن مسعود - المحدث:الألباني -
المصدر: صحيح الترمذي - الصفحة أو الرقم: 2988
خلاصة حكم المحدث:صحيح ]

يبقى الحل إنك طالما انت عارف إن ربنا كاتب لك رزقك من قبل ما يخلقك ,
و إنه لم يخلقك ليعذبك , و لم يبتليك ليهلكك و ......
يعني عارف نظري و مش عارف تطبق الكلام ده في حياتك ,
يبقى تعرف إن القلق اللي عندك ده مش حقيقي , و إنه من الشيطان ,
فتستعيذ بالله منه و تحاول أن تطرده عن قلبك ,
و تستعين على ذلك بتذكر الآيات و الأحاديث و أقوال السلف التي ذكرناها ,
و و الدعااااااء ألا يجعل الله الدنيا أكبر همك ,

و ياريت لو تشاهد الفيديوهين دول , مش هتندم إن شاء الله :
http://www.youtube.com/watch?v=rfiRw7Pi_2g
http://www.youtube.com/watch?v=iU7Sl_MAuaU

نسأل الله أن يشفِ أمراض قلوبنا

و بالله عليكم ادعوا لكاتب الموضوع :
اللهم أعذه من الهم و الحزن , و أعذه من العجز و الكسل ,
من القلب بالله عليكم و ما تنسوش إن المَلَك هيؤمن على دعائكم و يدعو لك بمثل


  >> حقوق النشر للجميع <<
لو رأيت أنه يستحق النشر بشرط عدم التحريف أو التغيير
و يا حبذا لو تذكر رابط المدونة







أو تذكر أن الموضوع

" منقول من مدونة تظبيط "


ـ

17 comments:

  1. جزاك الله خيراً ع التذكرة يا باشمهندس
    :)

    ReplyDelete
  2. جزانا و إياكم يا باشمهندش أحمد
    و تم تثبيت تعليقات الفيس بوك أيضا
    شكرا على رابط التعليم

    ReplyDelete
  3. اللهم أعذه من الهم و الحزن , و أعذه من العجز و الكسل

    موضوع جميل وطريقة العرض مبسطة وسهلة ، ياريت توصل لكل الناس علشان يستفيدوا ويفهموا ..

    كل عام وانت بخير

    ReplyDelete
  4. وجع البنفسج :
    جزاكم الله خيرا على الدعاء
    نسأل الله أن يتقبل
    و أن يحسن ظننا فيه
    و أن يهدينا و يهدي بنا

    ReplyDelete
  5. فيا محسناً إليّ قبل أن أطلب ,
    لا تخيب أملي فيك و أنا أطلب ,
    فبإنعامك المتقدم أتوسل إليك
    جميل الدعاء ياتيمى جميل اوى
    جزاكم الله خيرا على تدوينتك
    الجميلة

    ReplyDelete
  6. جزانا و إياكم يا خالتي د. نور
    و لا تنسوني من الدعاء

    ReplyDelete
  7. انا متابعك من زمان يا تيمى .. وحالنا متشابه تقريبا

    انت محتاج بس تطلب علم شرعى .. وربنا هيفتح عليك ان شاء الله

    بس قولى بتكتب مواضيعك فى منتدى ايه

    عشان اعرف انقلها للمنتديات بالتنسيق و الاموشنات بتاعتها

    ReplyDelete
  8. Anonymous:

    تسعدني متابعتك طبعا ,
    و شيء جميل إننا نبقى متشابهين ,
    لكن على الله ما تكونش تشبهني في الجزء السيء أيضا ,
    بالنسبة للعلم الشرعي فأنا كنت بدأت فيه في الكية لكن للأسف توقفت :(
    و نفسي أكمل تاني لكنني أعاني من العجز و تمني الاماني ,
    ربنا يهدينا

    و بالنسبة للمنتدى اللي بكتب فيه على طول المواضيع اللي بكتبها هو منتدى المهندسين العرب ,
    و ده ملفي الشخصي فيه , تقدر تدخل عليه و تشوف مواضيعي
    http://www.arab-eng.org/vb/u669522.html

    جزاك الله خيرا

    ReplyDelete
  9. بص , علشان تشوف الملف الشخصي لازم تكون مسجل في المنتدى
    الأسهل تدخل على أي موضوع أنا كاتبه :
    http://www.arab-eng.org/vb/t278777.html

    و في آخر الموضوع هتلاقي قائمة بآخر مواضيعي

    ReplyDelete
  10. ياااااااااااه !!! بجد في وقتها أوي والأسلوب رهيــــــــب ما شاء الله
    أنا فعلا لسة متخرجة من الكلية وكانت بتراودني الأفكار دي عن الشغل والحياة الجديدة عامة
    سبحان الله
    أبكيتني بشدة
    مع إني عارفة الكلام دة وحافظاه أوي وسمعته كتير وبقوله للناس دايما، بس المرة دي مسني أوي وأثر فيا بشدة
    جزيت الفردوس الأعلى

    ReplyDelete
  11. رائعة يا باشمهندس ..

    جزاكم الله خيرا ..

    ReplyDelete
  12. HopefulHopes:

    جزاكم الله خيرا ,
    و الحمد لله إن الموضوع أفادك ,
    نسأل الله أن يوفقك في حياة ما بعد التخرج إن شاء الله

    ReplyDelete
  13. زهراء :
    جزانا و إياكم
    شكرا جزيلا على المرور و التعليق

    ReplyDelete
  14. جزاك الله خيرا على جهدك في التذكرة ونشر دين الله باسلوب مبسط يحبب القارئ ويجذبه
    أثقل الله موازين حسناتك به
    وسبحان الله،أقسم اني اتعجب من رزقك في دعائي،فوالله أن الله يذكرني بك من حيث لا أحتسب
    أرجو أن يتقبل مني وأرجو منك كثير الدعاء بما تجود به نفسك من خير.

    ReplyDelete
  15. ايومي :
    جزانا و إياكم ,
    نسأل الله أن يعلمنا ما ينفعنا و أن ينفعنا بما علمنا
    و جزاكم الله خيرا على الدعاء نسأل الله ان يستجيب منكم
    و أن يؤمن الملَك على الدعاء لكم بمثل
    جزاكم الله خيرا

    ReplyDelete
  16. يا أخي انا بقالي ساعة فى المدونة و مش عارف اخرج منها
    راااااااااااااااااااائع

    ReplyDelete
    Replies
    1. و تخرج ليه بس يا عم
      ما تخليك منورنا :)

      ربنا ينفعنا و إياكم
      و ما تنساناش من الدعاء بظهر الغيب
      اللي ييجي في دماغك ادعي لي بيه

      Delete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ