زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

07 July, 2011

ـ إيه دخل الدين بس ؟؟ ـ

السلام عليكم و رحمة الله و بركاته ,


النهاردة إن شاء الله عاوزين نتكلم عن عادة مشهورة عند ( الإسلاميين ) ,
و هي إن كل ما حد يتكلم في موضوع يقولوا له :
" قال الله و قال الرسول " , " أصل الإسلام بيقول كذا " , " أصل الدين بيقول كده "

حتى لو الموضوع مش ديني خالص ,
كأن يكون في السياسة مثلا أو الاقتصاد أو أي حاجة تانية عادية في الدنيا
يعني بيحاولوا يدخلوا الإسلام في كل حاجة ,


لكن بعد الفحص و التمحيص ,
اتضح إن دي مش حاجة في الإسلاميين ,
لأ
دي حاجة في الإسلام نفسه !!
و بيسموها في الكتب : شمولية الإسلام
يعني إن ( الإسلام شامل كل حاجة )

زي ما ربنا بيقول :
{ قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ } [ الأنعام : 162 ]


يعني الإسلام بينظم كل حاجة في الحياة ,
سواء كانت دينية : { صلاتي و نسكي } , أو دنيوية : { محياي }
على عكس الأديان التانية اللي بتنظم أمور العبادة فقط ,

تظبيط مدونة تظبيط
و على فكرة حكاية شمولية الإسلام دي كانت غايظة غير المسلمين من أيام زمااااان برضو
فالمشركين مرة جاءوا لسيدنا سلمان الفارسي يقولوا له هو محمد ده عمال يكلمكم على كل كبيرة و صغيرة ؟
حتى آداب دخول الخلاء ؟؟

" قد علمكم نبيكم صلى الله عليه وسلم كل شيء ؟ حتى الخراءة ؟
فقال : أجل , لقد نهانا أن نستقبل القبلة لغائط أو بول ,
أو أن نستنجي باليمين ,
أو أن نستنجي بأقل من ثلاثة أحجار ,
أو أن نستنجي برجيع أو بعظم ."
[ الراوي: سلمان الفارسي -المحدث: مسلم -
المصدر: صحيح مسلم - الصفحة أو الرقم: 262
خلاصة حكم المحدث: صحيح ]



يعني صلى الله عليه و سلم كان بيعلمهم كل حاجة ,
لدرجة تعليمهم آداب دخول الخلاء ,

علشان كده سيدنا أبو ذر لما يقول :
" تركنا رسول الله صلى الله عليه وسلم وما طائر يقلب جناحيه في الهواء إلا وهو يذكرنا منه علما "
لما يقول إن مافيش حاجة إلا و الرسول صلى الله عليه و سلم كلمنا عليها ,
حتى الطير اللي بيطير في الجو
يبقى مش بيبالغ ,


و موضوع شمولية الإسلام ده عامل أزمة عند العلمانيين و الليبراليين و أصحاب الأفكار الغربية ,
هم عاوزين يخلوا الدين يختص بالعبادة فقط و مالوش دعوة بالحكم و لا السياسة و لا الأحوال الشخصية و غيرها ,
لأن في أوروبا - منشأ الأفكار دي - الدين في الكنائس بس , و مالوش دعوة بباقي مناحي الحياة ,
لكن الحاجة اللي ما أخدوش بالهم منها إن الإسلام مش زي النصرانية ,

هم لما يخلوا دينهم في الكنائس بس , يبقوا مش بيخالفوا دينهم
إنما احنا لو خليناه جوه المساجد بس يبقى خالفنا ديننا اللي بيقول لنا لازم يبقى في جميع مناحي الحياة ,


هم لما يألفوا قوانين من دماغهم يحكموا نفسهم بيها , يبقوا مش بيخالفوا دينهم ,
لأن دينهم لم يعطِ لهم قوانين ليحكموا نفسهم بيها
إنما إحنا لما نألف قوانين وضعية نحكم نفسنا بيها ,
نبقى بنخالف ديننا , لأن ديننا عامل لنا قوانين نمشي عليها

فإحنا بنقول للجماعة أصحاب الأفكار الغربية : يا جماعة افهموووونا ,

احنا لو طبقنا العلمانية بتاعتكم و فصلنا الدين عن الحياة نبقى بنخالف ديننا و بنرتكب محرم
إنما الأديان الأخرى لو فصلتها عن الحياة مافيش فيها أي مشكلة

و لو طبقنا الليبرالية بتاعتكم و خلينا حرية الفرد مطلقة و غير مقيدة بشرع أو دين نبقى بنخالف ديننا
إنما الأديان الأخرى مش فارقة معاها

لأن ديننا زي ما قلنا مختلف عن الأديان التانية في إنه ( داخل في كل حاجة ) ....
شاااااااااااااامل .

{ قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ }

..................
حقوق النشر للجميع
...................

سؤال مالوش دعوة بالموضوع 
هل تؤيد أن تكون التعليقات في المدونة بحسابك في الفيس بوك ؟؟
و لا نسيب التعليق بحسابات بلوجر و غير معرف ؟؟

.

18 comments:

  1. جزاك الله خيرا، الناس كلها فعلا بتقول لي "مال الدين بالسياسة" وفارساني أوي

    أرجح إن التعليق يكون ببلوجر وغير معروف

    ReplyDelete
  2. HopefulHopes :

    جزانا و إياكم
    فعلا الدين مالوش دعوة بالسياسة بس , لكن ليه دعوة بالسياسة و بكل حاجة في الحياة

    و شكرا جزيلاعلى إبداء الرأي في طريقة التعليقات

    ReplyDelete
  3. المشكلة ان في ناس حاقدين على الاسلام عايزين ينزعوه من كل حاجة في الحياة والمشكلة الأكبر في المسلمين اللي بيحبوا ربنا زي ما بيقولوا لكن بيجاروهم في اللي بيعملوه

    جزاك الله خيرا

    ReplyDelete
  4. luv_Islam :
    فعلا المشكلة مش في غير المسلمين اللي بيحاربوا الإسلام ,
    المشكلة في أبناء جلدتنا الذين يتكلمون بألسنتنا , لكن تعرف منهم و تنكر

    جزانا و إياكم الخير

    ReplyDelete
  5. انا مقتنعة ان الدين الاسلامى ليه علاقة بكل امور الدنيا بس ليه مثلا الاخوان المسلمين كانوا فى البداية قالوا ان الهدف الاساسى هو الدين وليس السياسة

    وليه برده الشيخ الشعراوى قال(فيما معناه) اتمنى ان يصل رجال السياسة الى الدين ولكن لا يصل اهل الدين الى السياسة

    ReplyDelete
  6. غير معرف :
    هو لو اتكلمنا بصفة عامة على التيارات الإسلامية فهدفهم هو ( إقامة الدين ) هذه هي الغاية , أما الوسائل فمتعددة ,ففمثلا في عهد النظام السابق كان الإخوان يتخذون وسيلة الترشح في المجاس بالإضافة إلى الدعوة في المساجد
    أما السلفيين مثلا فكانوا شايفين إن الترشح في المجالس و المشاركة في السياسة عامةً مالوش فايدة لأن كل حاجة بتتزور , فكانت الوسيلة عندهم هي الدعوة فقط , في المساجد و الفضائيات و غيرها ,

    أما في العهد الجديد دخل السلفيون ميدان السياسة مع الإخوان لأنه يُرجى أن يككون لذلك فائدة لأن غالب الظن أن الانتخابات لن تكون مزورة ,

    فبصفة عامة علشان ما حدش يتوه مننا , الغاية هي إقامة الدين ,
    و الوسائل متعددة , منها السياسة إن كانت متاحة ,

    أما قول الشيخ الشعراوي رحمه الله فبصراحة أنا أول مرة أسمعه , و بصراحة مش فاهم قصده إيه ؟؟

    ReplyDelete
  7. و حط فيس بوك برضه ايه المشكلة

    ReplyDelete
  8. السلام عليكم:
    يقول مراد هوفمان نقلا عن نيتشة (الفيلسوف الألماني الملحد) كيفية نشر الالحاد تدريجيا في أوساط أي مجتمع:
    (قصر الدين علي المجال الخاص بالشخص هو الخطوة الأولي للتخلص منه و القضاء عليه تماما).
    (ص:23 كتاب الاسلام و الألفية الثالثة)
    توجد أكثر من طريقة أخري ليس مجال ذكرها الآن و لكن كل تلك الطرق تم تنفيذ الكثير منها منذ سنوات طويلة و جاري الآن استكمالها.

    هذا حدث في أوروبا الي أن وصلت الي ما وصلت اليه، و يحدث عندنا بشكل أو بآخر منذ عشرات السنين و لم يبدأ من الآن.

    تصحيح لمعلومة مذكورة في التدوينة: المسيحية فيها بعض التشريعات و لكن تم ايقاف العمل بها.

    نفس الكلام ينطبق علي الاسلام فأي تشريعات اسلامية نعمل بها الآن من أول البنوك الربوية و اباحة الخمر الي تطبيق الحدود علي السارق و المرتد الزاني......الخ؟!

    بمناسبة قول الشعراوي أو القرضاوي أو أي شخص.....أري من المنطقي أولا أن نسأل أين يوجد هذا الكلام؟ في احدي تسجيلاته أو احدي كتبه أو أين؟ أين المصدر الموثق الذي حصلت منه علي تلك المعلومة و التي لا تدع مجالا للشك في أن قائلها هو ذلك الشخص فعلا؟ حتي لا ننسب للرجل ما لم يقل.
    السؤال الثاني من هو الشخص الذي قال ذلك؟ هل هو رسول و الكلام الذي قاله كلام منزل من عند الله بحيث يصبح من الواجب علي اتباعه لكي يكتمل ديني؟
    و اذا كان ليس رسولا فهل كلامه يتفق مع و يستند علي ما جاء به الدين من قرآن صريح و سنة صحيحة؟ أم يخالفها؟
    و في النهايه نفسر الكلمة لنري بالفعل ما القصد من ورائها.
    و سأحدثك عن نفسي عندما سمعت من يقول بذلك قبل أن أحاول تفسير تلك المقولة و وضعها في ميزان الشريعة بحثت طويلا و سألت من يرددها علي مصدر موثق لها يقول أن الشعراوي قال كذا فكانت الاجابة دائما أن الذي يردد لا يعرف مصدر و لكنه يرددها عن آخر رددها، ثم وجدت أن أول من قالها علي الانترنت طبقا للترتيب الزمني هو أحد الفنانين في ساقية الصاوي منذ عدة أشهر و انتشرت بعد ذلك علي الفيس انتشار النار في الهشيم و كذلك علي صفحات الجرائد.
    و حتي هذا الفنان عندما ذكرها لم يصدر من أي المصادر استقاها، مما جعلني غير مضطر الي أن أبحث عن مدي صحة أو خطأ مقولة مجهولة المصدر.
    فالناس البسيطة التي تحب الشعراوي أو ممن مقتنعين بتلك المقولة سيعارضون أي شخص يقول بعدم صحتها قائلين: هو انت مين علشان تقول ان الشعراوي قال حاجة غلط؟ تماما كما يفعل محبي عمرو خالد و حتي اذا أتيت لهم بكل ما يؤيد كلام من القرآن و السنة و التفكير المنطقي و وقائع التاريخ و الواقع حولهم...فانهم لا يريدون أن يستمعوا أساسا لما تقول.
    أرأيت كيف يفكر الناس؟! و كيف يتعاملون مع ما يقدم لهم؟!
    حازم

    ReplyDelete
  9. مهندس مصري

    ما ينفعش يا باشمهندس ,
    هم بيقولوا ده أو ده , و ليس كلاهما معا

    ReplyDelete
  10. أمال فيه مدونات أنا شوفتها شغالة بالإثنين مع بعض
    بس التعليق بيكون في نفس صفحة المدونة مش في صفحة تانية زي عندي و عندك
    يعني لازم تغير قالب مدونتك بقالب من اللي بيخلي التعليق في نفس صفحة البوست

    ReplyDelete
  11. ا حازم :
    و عليكم السلام

    فعلا ما يطبق عندنا الآن هو محاولة لتطبيق ما فعلوه عندهم منذ سنين
    نسأل الله أن يرد كيدهم و ينقلبوا خاسرين

    ReplyDelete
  12. مهندس مصري :
    أنا بصراحة ما شفتش قبل كده الاتنين مع بعض ,
    بس لو زي ما انت بتقول إنها تنفع , يبقى ندور على الطريقة إن شاء الله

    ReplyDelete
  13. السلام عليكم

    أحببت الأسلوب هنا ، دعوة بالحسنى :)

    بالنسبة لفصل الدين عن السياسة ، أو عن أي حاجة تانية .. فكل من يقول بهذا لا يفقه معنى الإسلام - وإن كان مسلمًا -

    جزاكم الله خيرا ..

    ReplyDelete
  14. زهـــــراء
    و عليكم السلام ,
    فعلا لا يفقه معنى الإسلام من يطالب بحصره داخل المساجد و فقط
    جزاكم الله خيرا

    ReplyDelete
  15. بسم الله ماشاء الله
    ربنا يفتح عليك كمان
    وكمان ياباشمهندس ويزيدك
    هدى على هدى.الاسلام دنيا ودين
    أما الأختيار
    بين حساب بلوجر
    ولا حساب الفيس بوك
    فمثل ما قالك مهندس مصرى
    شوف لو ينفع التوقيع بالأثنين
    فأن لم يكن فافضل حساب بلوجر فى بلوجر والعكس صحيح؟.

    ReplyDelete
  16. norahaty :
    آآمين يا خالة نور
    جزاكِ الله خيرا على الدعاء
    ربنا يهدينا و يهدي بنا و ينفعنا بما علمنا و يعلمنا ما ينفعنا

    و شكرا جزيلا على إبداء رأيك في موضوع التعليقات

    ReplyDelete
  17. جزاك الله خيرا

    هو مشكلة الدين والسياسة دي مشكلة عويصة شوية !!

    المشكلة إن الشعارات براقة المخدوعون كُثر !!

    بالنسبة للتعليقات لو الاتنين مع بعض مفيش مشاكل ... إنما لو اختيار واحد يبقى سيب تعليقات بلوجر :)

    ReplyDelete
  18. مصطفى محمود :

    جزانا و إياكم يا مصطفى
    عندك حق يا مصطفى , هم يبيعون التراب و يصفونه بالذهب

    و بالنسبة للتعليقات , شكلها هتبقى بلوجر و خلاص

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ