زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

15 July, 2011

انت مش عارف (أنت) مين و لا إيه ؟؟





- بسسسست , انت ... أيوه انت , انت باللي بتبص وراك  , هو فيه حد بيقرأ غيرك ؟؟
جاهز للدور اللي هتقوم بيه و لا لأ ؟؟


- دور ؟؟  دور إيه كفى الله الشر !!؟؟


- الدور اللي ما حدش في الدنيا يقدر يقوم بيه غيرك  !!


- دور إيه ده اللي ما حدش يقدر يقوم بيه غيري ؟؟

أنا ما حدش قال لي حاجة  !!

على فكرة لو انت طالب جيمس بوند فيسعدني أن أقول لك : النمرة غلط  ..


- جيمس بوند مين ؟؟ أنا طالبك انت , هو انت مش مصدق إن ليك دور ما حدش يقدر يقوم بيه في الدنيا غيرك و لا إيه  ؟؟


- مممم , انت شكلك عبيط و لا إيه ؟؟ طب فكرني يا سيدي  ,


- أنا ؟؟ أنا طبعا ما أعرفش ,

انت اللي لازم تكون ( عارف ) , أو ( بتحاول تعرف ) الدور اللي ربنا خلقك ليه في الدنيا , و ما خلقش حد تاني غيرك ليه ,
أصل ربنا ما خلقش حد كده و خلاص ,
ربنا خالق كل واحد و ليه دور ما حدش يقدر يقوم بيه غيره هو بس ,


- يا عم خضيتني  , دور مين بس يا عم الحاج , خلي الطابق مستور  ,
ده أنا شخص عادي جدا زي أي حد ,


- ما تقولش على نفسك كده , طالما ربنا خلقك يبقى أكيد ليك لزمة , و ليك دور ما حدش يقدر يقوم بيه غيرك , و لو كان مالكش لزمة ما كانش ربنا خلقك , لأنه لا يخلق شيئا عبثا ,


- يا عم ماشي , ربنا ما بيخلقش شيء عبثا , عارفين و الله , لكن أنا ما أنفعش لدور مميز و لا للحاجات دي , أصلك ما تعرفنيش  ,


- شكلك ما تعرفش المنفلوطي بيقول إيه  ؟؟


- بيقول إيه إن شاء الله  ؟؟


- بيقول : " من العجز أن يزدري المرء نفسه فلا يقيم لها وزناً،
وأن ينظر إلى من فوقه من الناس نظر الحيوان الأعجم إلى الحيوان الناطق،
وعندي أن من يخطئ في تقدير قيمته مستعلياً خير ممن يخطئ في تقديرها متدنياً ؛
فإن الرجل إذا صغرت نفسه في عين نفسه يأبى لها من أعماله وأطواره إلا ما يشاكل منزلتها عنده؛
فتراه صغيراً في علمه، صغيراً في أدبه، صغيراً في مروءته وهمته، صغيراً في ميوله وأهوائه، صغيراً في جميع شؤونه وأعماله؛
فإن عظمت نفسه عظم بجانبها كل ما كان صغيراً في جانب النفس الصغيرة . "


- كلام جميل و كلام ( مأعول ) ما أقدرش أقول حاجة عنه , لكن أنا ليا سوابق  في الفشل  , سوابق كتير تخليني ما أساويش حاجة بالفعل , و تخلي أي حد ليه قيمة أكثر مني ,


- يا عم ما تقولش كده , شكلك سمعتش قصة الـ200 جنيه ؟؟


- إحنا هنقضيها منفلوطي و قصص ؟؟ ما عندكش أفلام  وثائقية بالمرة ؟؟

ارغي يا سيدي و سمعنا ..


- كان يا ماكان , في أحد المحاضرات
رفع المحاضر  ورقة بـ200 جنيه ..
وقال: من يريد هذه ؟
رفع معظم الموجودين أيديهم
وقال لهم : سوف أعطيها لواحد منكم لكن بعد ما أفعل هذا :
فقام بكرمشة  الورقة  ثم سألهم :
من يريدها ؟؟؟
ومازالت الايدي مرتفعة ..
حسنا .. ماذا لو فعلت هذا ..
فرمي النقود على الارض وقام بدعسها بحذائه من ثم رفعها وهي متسخة
ومليئة بالتراب !!
وسألهم : من منكم مازال يريدها ؟؟
فارتفعت الايدي مرة ثالثة ..
فقال : الان يجب أن تكونوا تعلمتم درسا قيماً ..
مهما فعلت بالنقود فمازلتم تريدونها لانها لم تنقص في قيمتها فهي مازالت 200 جنيه
في مرات عديدة من حياتنا نسقط على الأرض وننكمش على أنفسنا ونتراجع بسبب القرارات
التي اتخذناها أو بسبب الظروف التي تحيط بنا ، فنشعر حينها بأنه لا قيمة لنا ..
مهما حصل فانت لا تفقدك قيمتك ..
و ابقوا قابلوني لو حد أخد الـ200 جنيه 


- مممممممممممممم ............




- انت لسه محتقر نفسك ليه ؟؟ ربنا بيقول { و لقد كرمنا بني آدم } , و انت من بني آدم , مش عاوز تكرم نفسك ليه  ؟؟
مش مصدق ليه إن ربنا خلقك انت لمهمة ما حدش غيرك يقدر يقوم بيها ,

حتى لو انت شايف حياتك بسيطة , لكن ما حدش كان يقدر يعيشها غيرك ,
صدقني بجد , انت ليك دور خاص بيك في الدنيا ,

دور ما حدش غيرك يقدر يقوم بيه حتى جيمس بوند
فاعرف قيمة نفسك , و لا تحقر نفسك ,

فـ( إن نفس المؤمن غالية , و بعضهم يبيعها برخص ) ....


















15 comments:

  1. الوسط مطلوب برضه لأن فيه ناس بتقعد تنفخ فى نفسها لحد ما يوصل للغرور
    يعنى المهم الواحد لا يحقر من نفسه ولا يستعلى على الناس مش كدة ولا ايه .؟
    بس كلامك رائع كالعادة :)

    ReplyDelete
  2. Anonymous :

    طبعا خير الأمور الوسط مافيش كلام ,
    بس للأسف فيه كتار ناس بقت تحقر نفيها و لا ترى لها نفعا ,
    و هذا أخطر من المتكبر الذي يرى نفيه صالحا لكل شيء , و السبب قد بينه صاحب العبارة

    ReplyDelete
  3. كلام رائع كالعاد ه
    لكن تسمحلى اختلف معاكِ..فكرت فى الكلام والموقف بتاع ال200 جنيه ولقيت انى اكيد مش هاخدها لو اترمت فى الارض مش علشان قيمتها قلت ..لا علشان قيمتى انا اللى هتقل لو اخدتها من الارض بالضبط زى ما المواقف بتقلل من قيمة الانسان وتخليه ينكمش على نفسه ..
    هاوضح لحضرتك وجهة نظرى اكتر ..اثق فى المقوله التى تقول ان "الانسان موقف"
    فلو اى انسان اخد موقف سلبى او موقف متوقعتهوش منه
    هيقل فى نظرك وتفقد احترامك ليه
    فبالضبظ لما بتعمل قرارت خاطئه او مواقف غلط بتزل ى نظر اللى حواليك فبالتالى بتفقد الثقه فى نفسك ..
    مجرد رأى

    ReplyDelete
  4. السلام عليكم ورحمة الله وبركاته اخى الفاضل تيمى صاحب الموضوعات الاكثر روعة فى عالم بلوجر

    اوافقك تماما فى ان قيمة الانسان محفوظة وان لم يستشعرها او لم يكتشفها
    ولكن من العار ان لا يحاول الانسان ان يكتشف نفسه وان يترك نفسه العوبة كرة القدم يتقاذفها الناس بين اقدامهم فيصبح كالالة اذا ضغطوا زرا راح يمينا واذا ضغطوا زرا اخر راح يسارا فهو بلا شخصية منعدم الرأى برغم انه يمتلك المؤهلات التى تؤهله لان يكتشف ذاته وان يكون صاحب رؤية وصاحب قرار دون ان يتلاعب به الناس

    فالمرء الذى يترك نفسه للاخرين يتلاعبون بها قد قلل من قيمة ذاته

    وهذا الموقف عايشته طويلا مع احد الاشخاص الذى لم يتخذ قرار من تلقاء نفسه فى امور مصيريه خص حياته وكان يترك الامر لاخرين يخططون له . ويقررون له فاصبح امعة .

    وياليت يا اخى يقف الامر عند هذا الحد
    بل يصل الى حد انهم قد يتسببون فى ان يخسر اخراه بسبب بعد ان وضعوا على عينيه عصابة ليخفوا عنه حقائق الامور فلا يرى جيدا .

    تحياتى لك كثيرا

    ReplyDelete
  5. Anonymous :

    على فكرة أنا أوافقك الرأي إن لوحد عمي قدامي في 200 جنيه كده و بعدين أنا وطيت عليها آخدها أبقى إنسان مش تمام ,
    بس المثال المقصود بيه إنك تحط نفيك مكان الـ200 جنيه , مش الراجل اللي هياخدها ,
    يعني لما تكون انت 200 جنيه , قيمكتك هتفضل زي ما هي حتى لو اتوسخت و اتكرمشت

    أما بالنسبة للإنسان لما بيغلط أو بياخد قرار غلط بينزل من عين اللي حواليه , فمش مشكلتنا دي , المهم يبقى هو في عين نفسه ما ينزلش , لأني كنت قرأت عبارة زمان مش فاكرها قوي , إن الواحد لو عمل غلط , و اتحط في نفس الموقف تاني بنفس خبراته السابقة و حالته النفسية السابقة يبقى هيعمل نفس الغلط ,
    إنما الإنسان لما بيعمل غلط بيكتسب خبرة جديدة فلما بيتحط في الموقف تاني مش بيعمله ,
    يعني المهم إن أي حاجة غلط نتعلم منها , و ما يهمناش رأي الآخرين فينا طالما احنا حاولنا و بذلنا أقصى ما في وسعنا و لما فشلنا اتعلمنا من خطأنا

    ReplyDelete
  6. طارق الطيب سليم :

    و عليكم السلام و رحمة الله و بركاته أخي طارق ,
    و جزاك الله خيرا على الإطراء
    أوافقك الرأي أنه من العار على الإنسان أن لا يعرف قيمة نفسه , بل ألا يستخدم نفسه أصلا و يدعها في أيدي الآخرين بتلاعبونا بها كام في المثال الذب ذكرتَ

    نسأل الله العافية
    جزاك الله خيرا أخي طارق

    ReplyDelete
  7. الصراحه كلام مقنع لكن لو انا ال200 جنيه اكيد نظرة الناس ليا هتختلف بعدما اتكرمشت واترميت على الارض مش زى لما اكون مفروده وجديده يعنى بتقلل من قيمتها المعنويه مش الماديه
    يعنى فى نظر الناس مش هتكون زى الأول ..
    اما بالنسبه للخطأهو اكيد بنتعلم منه بس انا بحس انه بياخد من الانسان يعنى بيقلل من قيمته فاكيد هيهمه راى الاخرين ليه
    خصوصا وهو متاكد من جواه انه غلطان علينا بقلة الثقه
    وبرده مجرد رأى بحاول اقتنع بعكسه
    وده بينعكس

    ReplyDelete
  8. طارق الطيب سليمJuly 17, 2011 at 11:15 PM

    الحقيقة انى شايف ان القاء المائتين جنيه على الارض لا يقلل من قيمتها ابدا ولا اجد حرجا فى ان انحنى لالطقتها ، فسقوطها ليس عيبا بها وانما عيبا على من القها عمدا ودعاها تسقط مع علمه بقيمتها ، فاما انه مختل عقليا او انه انسان خبيث النفس او انه لا يعرف قيمة المائتى جنيه .

    المهم هو ان ننتشلها من السقوط لنعيد اليها هيئتها التى تستحقها لانها لا ذنب لها فى سقوطها .

    ReplyDelete
  9. Anonymous :

    ممكن نظرة الناس السطحيين تكون كده , و تختلف بعد الكرمشة ,
    لكن رأيهم لا يغير الحقيقة شيئا ,
    فالـ200 جنيه المكرمشة لو رحنا بيها أي محل , هتشتري حاجات بـ200 جنيه زي ما هي ,
    و نظرة ( بعض ) الناس ليها ما غيرتش من قيمتها

    و الأخطاء فعلا قد تقلل من قيمة الإنسان عن ( بعض الناس ) , لكن الحاجات الصح التانية اللي بيعملها أكيد هترفع من قيمته في عينهم في مقابل الخطأ ده
    يعني الحاجات الصح الكتير هتغطي على الخطأ ,
    إلا لو كان الشخص التاني بيتصيد الأخطاء و بيقف له على الواحدة , فده مش هينفع معاه حاجة ,
    لكن الناس الطبيعيين بينسوا الخطأ لما يُتبع بحاجات تانية كتير صح

    ReplyDelete
  10. ابتسمت عندما قرأت مقالك لان هذا ما انادي به و مجموعة من اصدقائي محاولين تغير الفكر المتندي عند معظم الشباب
    فان الله لم يخلقنا فقط لاشباع رغباتنا الحياتيه و المتمثلة في الطعام و المسكن و الزواج و الانجاب و العمل فقط
    ان لكل انسان دور مهم في الحياة
    و يجب عليه كل يوم ان يترك لنفسه بصمة في حياتة حتى لا يموت كالبهائم لن يذكره او يتذكره احدا حتى و ان كان من صلبه

    جزاك الله خيرا على مواضيعك القيمة :)

    ReplyDelete
  11. Ahmed Mustafa - zema :

    أهلا و سهلا بيك يا باشمهندس أحمد
    فعلا ربنا ما خلقناش ناكل و نشرب و نتجوز و نموت و خلاص ,
    و زي ما الرافعي ما بيقول :
    إذا لم تزد على الحياة شيئا كنت أنت زائدا عليها ,
    و أي عمل نعمله في الدنيا لازم يكون فيه نية علشان ناخد بيه حسنات و ما يبقاش جهد مبول على الفاضي و خلاص

    جزانا و إياكم يا باشمهندس أحمد
    منورنا دائما

    ReplyDelete
  12. فتراه صغيراً في علمه، صغيراً في أدبه، صغيراً في مروءته وهمته، صغيراً في ميوله وأهوائه، صغيراً في جميع شؤونه وأعماله؛
    فإن عظمت نفسه عظم بجانبها كل ما كان صغيراً في جانب النفس الصغيرة
    ____


    لا كلام يقال بعد كلام سيدنا المنفلوطي عليه رحمة الله ..

    جزيتم خيرًا يا بشمهندس ..

    ReplyDelete
  13. زهـــــراء :
    فعلا الواحد اكتشف إن المنفلوطي ده في مقام الرافعي في الأدب , خاصة أدبياته الدينية
    ربنا يرحمهم جميعا

    ReplyDelete
  14. اقتنعت تماماً ..جزاك الله خيراً ..
    الحاجات الصح بتغطى على الخطأ
    "فإن الحسنات يذهبن السيئات"
    شكراً جزيلاً ..على البوست الرائعه والمناقشه الأروع..
    يبقى تفكير الانسان وما يشغله فى مادوره فى هذه الدنيا.فالله لايخلق شيئاً عبثاً..
    اهم بالانشغال بنظرة الناس حوله..
    اكرر شكرى ..وادام الله موضوعاتك القيمه

    ReplyDelete
  15. Anonymous :
    جزانا و إياكم ,
    و الحمد لله إن الموضوع غير شيء للأحسن الحمد لله
    و لا تنسونا من دعاء صالح
    جزاكم الله خيرا

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ