زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

13 April, 2011

ـ البطاطس حلالٌ شرعاً !! ـ


السلام عليكم و رحمة الله

طبعا كلنا عارفين الحملة الليبرالية و العلمانية ضد الإسلاميين المنتشرة اليومين دول
و أغلبنا عارف إنها غرضها الأساسي التخويف من الإسلام ,
علشان الناس ما تطالبش بتحكيم الإسلام
لأن ده بيتعارض مع مصالح العلمانيين و الليبراليين اللي ( عندهم حساسية ) ضد كل ما هو ديني
فبينشروا بين الناس إن الإسلام هيقطع ودانهم , و يركبهم جمال و حمير
و يحرم عليهم العربيات و الموبايلات و الساندويتشات و كل الحاجات ,
و يحرم عليهم عيشتهم كلها ,

علشان كده أنا حبيت أبدأ النهاردة بفقرة ( هل تعلم ) عن الإسلام :
هل تعلم ..
هل تعلم أن البطاطس حلال شرعاً !!
هل تعلم أن الخيار - سواء كان استراتيجي و لا عادي - يجوز أكله !!
هل تعلم أن عصير القصب , مش مُنكر و العياذ بالله !!

هل تعلم أن ركوب البسكلته أو الموتوسيكلات أو العربيات المرسيدس و حتى الفيات 128 ,
و لعب كرة القدم و الكورة الشراب ,
و استخدام الراديو و الموبايل و الأتاري و الكمبيوتر ,
و لبس القميص و البنطلون و الجلابية , و الجيبة و البلوزة و العباية ,
و أكل الرز و المكرونة الاسباجتي و الملوخية الناشفة و القُرَص اللي بعجوة و السادة و ......
كل الحاجات دي و غيرها .....

حلالٌ حلالٌ حلال !!

آه و الله , كل الحاجات دي حلال
أقول لك حاجة أجمد من كده الإسلام بيقولها ؟؟ 
خد عندك : 
الأصل في الأشياء كلها إنها حلال
إلا حاجات قليلة قوي ربنا حرمها علينا ,
مش تعنت لا سمح الله , لكن علشان هي حاجات ضارة ,
ممكن نكون احنا عارفين ضررها و ممكن نكون لسه مش عارفين ,

يعني الإسلام مش جاي يخنقنا و يحرم علينا عيشتنا ,
بدليل إن الحاجات الحرام -اللي هي أصلا ضارة- قليلة جدا بالمقارنة مع الحاجات الحلال ,

لأ , و ( المفاجأة الكبرى ) إن الإسلام بيأمر الناس بالتيسير , و بيبعدهم عن التشدد ,
قال تعالى : { يريد الله بكم اليسر ولا يريد بكم العسر } [البقرة: 185]
قال تعالى: { يريد الله أن يخفف عنكم } [النساء: 28]

بل كان رسول الله - صلى الله عليه و سلم - يحث الناس على استخدام الرُّخَص اللي ربنا سمح لينا بيها فقال :
(( إن الله يحب أن تؤتى رخصه ، كما يحب أن تؤتى عزائمه ))
[ الراوي: عبدالله بن عباس - المحدث: الألباني -
المصدر: صحيح الترغيب - الصفحة أو الرقم: 1060
خلاصة حكم المحدث: صحيح]

و ده كله زي ما وضحنا لأن الدين مش موجود علشان يعقد علينا عيشتنا و يخنقنا ,
بل كما قال الرسول :

(( إن هذا الدين يسر ))
[ الراوي: أبو هريرة - المحدث: الألباني
المصدر: صحيح النسائي - الصفحة أو الرقم: 5049
خلاصة حكم المحدث: صحيح]


و الرسول - صلى الله عليه و سلم - كان أفقه الخلق ,

و كان بيعمل زي ما قالت أمنا السيدة عائشة :
" ما خُيِّر رسول الله -صلى الله عليه وسلم- بين أمرين إلا أخذ أيسرهما ما لم يكن إثما ،

فإن كان إثما كان أبعد الناس منه " [البخاري و مسلم]

و هنا بقى مربط الفرس زي ما بيقولوا ,

( ما لم يكن إثماً ) ,

يعني مش علشان " الدين يسر " , و " يسروا و لا تعسروا " ,

يبقى كل حاجة نعملها و كل حاجة تبقى حلال ,
لأ ,

- فيه حاجات هتفضل طول عمرها حرام و لازم نبقى أبعد الناس عنها ,
و ما نقعدش نفحّر فيها و نحاول نخليها حلال ,
- أما باقي الحاجات فهي حلال و 
 ما حدش ييجي و يخليها حرام و يضيق علينا ,


علشان كده العلماء اللي فاهمين الدين صح كانوا بيقولوا :
" إنما الفقه رخصةٌ من ثِقة , أما التشدد فيحسنه كلُّ أحد "
 
لكن خلي بالك من حتة ( من ثقة ) دي
يعني ما تروحش تبحث في أقوال العلماء لحد ما تلاقي قول ضعيف أو مرجوح أو شاذ بيقول إن الحاجة دي حلال ,
و تروح قايل : حطها في رقبة عالم و اصبح سالم ,
لأ يا زعيم ,
فقد اتفق العل
ماء على أنه :
" من تتبع رخصة كل فقيهٍ تزندق "

و الخلاصة إن مش لازم كل حاجة في حياتنا تبقى حلال
فيه حاجات ( قليلة ) هتفضل حرام طول عمرها لأنها أكيد فيها ضرر
لكن أغلب الحاجات اللي حوالينا في الدنيا حلال بيعملها الناس عادي
و الإسلام دين رحمة و سعة و ليس فيه حرج
إنما حرم علينا ما يضرنا
و ......

و أخيرا اترككم مع الرابط التالي :
http://www.youtube.com/watch?v=X3pl2lcIlNU

و لو عاوز تحمله من هنا :
http://aljaami.myblog.it/media/01/01/527251902.mp3


.............................

جزاكم الله خيرا
و لا تنسونا من دعوة صالحة بظهر الغيب

........

19 comments:

  1. السلام عليكم

    فكرتنى بالاعلانات وانت بتقول والمفاجأة الكبرى :)))

    ربنا يكرمك طمنتنى ان الخيار حلال

    جزاك الله خيرا وتحياتى

    ReplyDelete
  2. اوفيت اخي الكريم في موضوعك
    و الذي هو جميل و شيق كسائر مواضيعك :)

    و فعلا الدين بيسط و يسر و سهل جدا
    بل و ممتع جدا و الابحار فيه من امتع الاشياء بالدنيا

    و صدقني اخي كل من يفعلون ذلك سواء من المتشددين اليمينين او اليسارين هم على خطأ كبير
    فان الرسول الكريم قد قال
    ان هذا الدين متين فاوغلوا فيه برفق و لا يشاد احد الدين الى غلبه

    جزاك الله خيرا اخي الطيب

    ReplyDelete
  3. بنجاواتي :
    و عليكم السلام و رحمة الله يا د.مصطفى
    جزانا و إياكم يا مصطفى
    و الحمد لله الطماطم كمان حلال رغم إنها مجنونة :)

    ReplyDelete
  4. Ahmed Mustafa - zema

    أهلا و سهلا بيك يا ياباشمهندس
    و أنا معاك برضو إن الوسط هو خير الأمور
    لا أقصى اليمين و لا أقصى اليسار
    ربنا يهدينا و يوفقنا لما يحب و يرضى
    جزاك الله خيرا يا باشمنهندس

    ReplyDelete
  5. جزاك الله خيراً يا باشمهندس

    وفعلا احنا محتاجين علماء دين ثقات ولذلك أتممنى إن الأزهر يرجع لدوره السابق والريادي منارة للعلم الشرعي يهتدي إليها عامة الناس
    :)

    ReplyDelete
  6. يرادل
    تصدق اول مره اعرف المعلومه دي:)

    ميرسي اكتيييييييييييييير

    ReplyDelete
  7. سمو الامير :

    جزانا و إياكم يا باشمهندس :)
    كلنا نفسنا دور الأزهر يرجع تاني زي زمان ,
    مين كان يصدق إن الأزهر اللي تحول 180 درجة في عهد صلاح الدين من شيعي لسني و قاد مصر كلها للحق , مين كان يتصور إن دوره يبقى بالضعف الحالي
    ربنا يسهل إن شاء الله و يرجع زي ما كان منارة للعلم و الحق

    ReplyDelete
  8. sony2000 :
    شكرا جزيلا على المرور و التعليق
    تحيتي

    ReplyDelete
  9. جزاك الله خيرًا يا بشمهندس على رقي أسلوبك :)

    احنا محتاجين نرجع بجد، علشان نعرف ان الإسلام اسم على مسمى..

    دين السلام والتسليم .. مش دين التحريم .. :)

    ReplyDelete
  10. زهـــــراء :

    جزانا و إياكم يا باشمهندسة
    فعلا الإسلام جاي بالوسطية ,
    مش بالتشدد لأنه لن يشاد الدين أحد إلا غلبه
    و لا بالتسيب و الانحلال و اتخاذ التيسير سبيلا للتفريط

    ReplyDelete
  11. ياااااااااااه المدونة دى وحشتنى جدا يابشمهندس تصدق انتى بدأت تخلينى اندم على سيبانى التدوين والتركيز على الفيس

    التوبك هايل ماشاء الله عليك


    يارب نتكون فاكرنى

    ReplyDelete
  12. بشمهندس ياريت تضيف الاكونت بتاعى على الفيس

    http://www.facebook.com/mohghalia

    ReplyDelete
  13. أنا أول مرة أجاي هنا
    لاقيت البوست متشير على الفيسبوك.. وعجبني جدا بصراحة
    ... بس سؤال
    ما الحكم في الايس كريم .. :))؟؟

    جزاك الله خيرا عليه
    وجعله الله في ميزان حسناتك

    ReplyDelete
  14. mohamed ghalia:

    طبعا فاكرك يا محمد
    هل تبحث عن السعادة :)
    مدونتك واحشانا أكثر
    و ياريت ترجع للتدوين و الفيس بوك معا إن شاء الله
    و تمت الإضافة على الفيس بوك و في انتظار موافقتك

    ReplyDelete
  15. فتافيت :
    أهلا و سهلا بحضرتك
    و الحمد لله إن الموضوع أفاد و إنه بيوصل الفكرة من غير ملل
    جزاكم الله خيرا

    ReplyDelete
  16. amrelmeligy1001 :
    آآآآآمين ,
    بارك الله فينا و إياكم
    جزاكم الله خيرا

    ReplyDelete
  17. فعلا والله، البطاطس حلال الحمد لله بالذات المقلية بالكاتشب

    أحلى حاجة النشيد اللي في الآخر
    بقالي أكتر من 7 شهور بسمعه بشكل إدماني
    من أيام الثورة والهجمات على السلفيين وشفت فيديو عن الخدمات اللي قدموها للناس أثناء الثورة (وكان النشيد في الخلفية) وهو بيرن في وداني

    جزاك الله خيرا وسدد رميتك وأجرى الحق على لسانك

    ReplyDelete
  18. HopefulHopes :

    فعلا النشيد ده رائع فعلا ,
    أنا أول ما سمعته نزلته على الكمبيوتر و عملته رنة للموبايل
    جزاكم الله خيرا و استجاب دعاءكم

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ