زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

25 May, 2010

ـ ربك رب قلوب ... و أعمال كمان ـ


السلام عليكم و رحمة الله و بركاته ,


- (مودي) شاب كوول
,
على الناصية على طول ,
لابس حظاظة و مسقط البنطلون
,
و لما حد يكلمه ,
يقول لك : إيه يا مان , ده أنا أحسن من ناس كتير ,
أنا لا بروح ديسكو
و لا بمشي مع بنات ,
و لا بقضيها دردشة و اشتغالات ,
و بعدين العملية مش بالشكل و لا بالهيئة و لا بالهدوم ,
المهم إن الواحد قلبه ( نِدِيف ) -نظيف يعني-



- أما ( لولي ) فبنوته استايل آخر حاجة ,

علشان تعرف تلبس البنطلون ... بتحط على جسمها صابون ,
أما البادي , فبتلبسه بدون الحاجة إلى ( زحلقة )
و طبعا مش كاشفة شعرها ,
إنما مغطياه بطرحة اسبانيش على الموضة
,
و لما تيجي واحدة تكلمها ,
تقول لها : أنا مش بعمل حاجة غلط ,
أنا بلبس بنطلون علشان رجلي ما تتكشفش
و أنا بركب المواصلات لو لابسه جيبة ,
و بلبس البادي بكم , مش بنص كم زي البنات الوحشين ,
و بعدين أنا أحسن من ناس كتير ,
و المسألة مش بالمظهر , لكن بالجوهر .


-------------------------------------



طبعا الدين ليس مظهرا فقط ,

لكنه مظهرٌ مع جوهر ,
كلاهما معاً ,

ممكن يبقى واحد مظهره ملتزم , لكن باطنه غير كده ,

عادي , المنافقين كانوا كده ,


إنما ما ينفعش
يبقى واحد باطنه كويس و ظاهره وحش ,
لأن الباطن لما بيبقى كويس , بـ(ينشع) على الظاهر و بيظهر على الجوارح ,
زي ما العرب بيقولوا في المثل :
" كل إناءٍ ينضح بما فيه "
يعني ما تجيبش قُلَّة و لا زير بينضح جاز ريحته وحشة ,
و تقول لي إن فيهم مية نظيفة !!

و الرسول -صلى الله عليه و سلم - بيقول :

(( ألا وإن في الجسد مضغة إذا صلحت صلح الجسد كله ، وإذا فسدت فسد الجسد كله ، ألا وهي القلب ))
[رواه البخاري]
قال شيخ الإسلام بعد ذكر الحديث: (... فمن صلح قلبه صلح جسده قطعا بخلاف العكس)
[مجموع الفتاوى(7/9)]

( وإذا قام بالقلب التصديق به والمحبة له , لزم ضرورة أن يتحرك البدن بموجب ذلك من الأقوال الظاهرة والأعمال الظاهرة , و يظهر على البدن من الأقوال والأعمال هو موجب ما فى القلب ولازمه ودليله ومعلوله , كما أن ما يقوم بالبدن من الأقوال والأعمال له أيضا تأثير فيما فى القلب فكل منهما يؤثر فى الآخر لكن القلب هو الأصل والبدن فرع له والفرع يستمد من أصله والأصل يثبت ويقوى بفرعه
)
[مجموع الفتاوى ( 7 / 541) ]

و قال تعالى :

{لا تَجِدُ قَوْمًا يُؤْمِنُونَ بِاللَّهِ وَالْيَوْمِ الْآَخِرِ يُوَادُّونَ مَنْ حَادَّ اللَّهَ وَرَسُولَهُ
وَلَوْ كَانُوا آَبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ
أُولَئِكَ كَتَبَ فِي قُلُوبِهِمُ الْإِيمَانَ وَأَيَّدَهُمْ بِرُوحٍ مِنْهُ
}
[المجادلة:22]

و قال تعالى :

{تَرَى كَثِيرًا مِنْهُمْ يَتَوَلَّوْنَ الَّذِينَ كَفَرُوا
لَبِئْسَ مَا قَدَّمَتْ لَهُمْ أَنْفُسُهُمْ أَنْ سَخِطَ اللَّهُ عَلَيْهِمْ وَفِي الْعَذَابِ هُمْ خَالِدُونَ
وَلَوْ كَانُوا يُؤْمِنُونَ بِاللَّهِ وَالنَّبِيِّ وَمَا أُنزلَ إِلَيْهِ مَا اتَّخَذُوهُمْ أَوْلِيَاءَ
}
[المائدة:80-81]

فأخبر سبحانه و تعالى أن من كان مؤمنا بالله واليوم الآخر -و الإيمان في القلب-

لا يواد أعداء الله ورسوله -و الود و الموالاة عمل ظاهر -
بل نفس الإيمان ينافي مودتهم، فإذا حصلت الموادة دل ذلك على خلل الإيمان.


و ابن المقفع كان اتكلم عن حاجة زي دي في نص " اختيار الصديق "
اللي كنا أخدناه في الثانوي لو فاكرين ,

كان اتكلم عن الصديق الكذاب و قال :
" لأن الكذب الذي يجري على لسانه إنما هو من فضول كذب قلبه "

يعني ما ينفعش يكون حد بيكذب - ظاهِرُهُ كذاب - و يقول أنا من داخلي صادق و قلبي نظيف ,

لأن (بوظان) الجوارح و الأعمال الظاهرة بيبقى ناتج عن بوظان المصدر و هو القلب - الباطن -


إلا إذا ....

.
.
.
.
.
إلا إذا كان الشخص جاهل أو فاهم غلط ,

و بيتحرى الخير فعلا , لكن بيعمل الشر لجهله أنه شر ,
زي ما ( بعض ) الشباب ما بيلبس حظاظات و بيسمع أغاني و ما يعرفش إنها حرام ,
و (بعض) الفتيات بتلبس بنطلونات و لبس ضيق و ما تعرفش إنه حرام ,
و لو إني أشك
إن فيه حد اليومين دول مش عارف الحلال من الحرام ,
{ بَلِ الإِنْسَانُ عَلَى نَفْسِهِ بَصِيرَةٌ وَلَوْ أَلْقَى مَعَاذِيرَهُ }
[القيامة: 14-15]


عارف إن فيه واحد بيقول :

يا عم , ده الرسول - صلى الله عليه و سلم - بيقول :
(( إنما الاعمال بالنيات ))
و انت بتقول لي الظاهر و الشكل ؟؟ المهم النية يا باشا ,

و الرد على الشبهة دي سهل جدا ,

الرسول قال إنما ( الاعمال ) بـ(النيات )
و لم يقل إنما ( النيات ) بـ(النيات)

يعني لازم يكون فيه عمل و فيه نية ,

لكن ما ينفعش تكون فيه نية و خلاص من غير عمل


واحد تاني هييجي يقول :

يا عمي , ده الرسول بيقول :
(( إن الله لا ينظر إلى صوركم وأموالكم . ولكن ينظر إلى قلوبكم ))

و الرد على الشبهة دي برضه سهل جدا
,

فقط أكمل الحديث :
((إن الله لا ينظر إلى صوركم وأموالكم . ولكن ينظر إلى قلوبكم وأعمالكم))
[الراوي: أبو هريرة - المحدث: مسلم -
المصدر: صحيح مسلم - الصفحة أو الرقم: 4651
خلاصة حكم المحدث: صحيح]



آخر حاجة بس عاوز أقولها ,

هي أننا لا ننادي بإصلاح الظاهر فقط
لكن بإصلاح الباطن مع الظاهر ... كلاهما معاً


نسأل الله أن يُصلِح شأننا كله ,

و أن يُصلح باطننا و ظاهرنا ,
و أن يغفر لنا مالا تعلمون و يجعلنا خيرا مما تظنون


????? ?????? - ?????? ??????: ???? ??????? ??? ?????? ???????

http://audio.islamweb.net/audio/inde...audioid=119525


و جزاكم الله خيرا

و
بالله عليكم لا تنسونا من دعوة صالحة بظهر الغيب

...........................

12 comments:

  1. قال رسول الله صلى الله عليه و سلم :

    ثلاثة كلهم ضامن على الله عز وجل

    رجل خرج غازيا في سبيل الله فهو ضامن على الله حتى يتوفاه فيدخله الجنة أو يرده بما نال من أجر وغنيمة

    ورجل راح إلى المسجد فهو ضامن على الله حتى يتوفاه فيدخله الجنة أو يرده بما نال من أجر وغنيمة

    ورجل دخل بيته بسلام فهو ضامن على الله عز وجل


    الراوي: أبو أمامة المحدث: الألباني - المصدر: صحيح أبي داود - الصفحة أو الرقم: 2494
    خلاصة حكم المحدث: صحيح

    ReplyDelete
  2. إنما ما ينفعش يبقى واحد باطنه كويس و ظاهره وحش ,
    لأن الباطن لما بيبقى كويس , بـ(ينأح) على الظاهر و بيظهر على الجوارح

    عجبتنى جدا الجملة دى وفيها اختصار لخطب كتيرة اوى


    ربنا يكرمك

    ReplyDelete
  3. موناليزا

    شكرا جزيلا ,
    و لو إني غيرت اللفظ ده لأني حسيت غنه مش مناسب شوية

    جزاكم الله خيرا

    ReplyDelete
  4. أزيك يا هندزة
    عامل إيه؟

    واحشني والله جداً
    عاوز أشوفك على النت كده مره

    ReplyDelete
  5. ينأح ينضح ينشع
    هو دة الكلام
    عشان بسمع الكلام دة كتير ومش بيبقى عندى الرد
    جزيتم خيرا

    ReplyDelete
  6. السلام عليكم

    صح يا تيمي
    وكمان منحكمش بالظاهر بس
    ودي حاجة مهمة جدا

    ربنا يصلح حالك بباطن القلب مش بالكتابة بس :) وتنال الراحة في الدنيا والآخرة

    أم يحيى

    ReplyDelete
  7. د. ياسر عمر عبد الفتاح

    يااااه , جاي دلوقتي تسأل ؟؟
    ماشي يا عم ,
    أنا حلو الحمد لله .. بس مش بلزّق :)
    و ربنا يسهل و نشوفك قريب

    ReplyDelete
  8. أخت في الله :

    جزانا و إياكم ,
    فعلا الواحد كان بيسمع الكلام ده من ناس كتير و مش بيعرف يرد عليهم ,
    ربنا يهدينا و يهدي الجميع

    ReplyDelete
  9. ست البنات

    و عليكم السلام و رحمة الله و بركاته يا أمَّ يَحيى ,

    فعلا الظاهر وحده مش كفاية ,
    لكن كلاهما معاً ,

    ربنا يُصلح بواطننا و ظواهرنا ,

    و جزاكم الله خيرا على الدعاء ,
    نسألكم دوام الدعاء

    جزاكم الله خيرا

    ReplyDelete
  10. الأخ الفاضل :: TIMMY ::
    صباحك ورد وفل وحب وطاعة
    ثم

    نعم المسألة هي مظهر وجوهر معًا ..

    ولكن مما زاد الطين بلة ..

    أن أغلب الناس تقارن بعضها ..

    وهكذا نرضى بالدون وبالمفضول -إن صح - حتى تدنينا جميعًا ...


    دمت بود

    ReplyDelete
  11. افروديت :

    شكرا جزيلا على المرور ,
    و الواحد لازم يستشهد بآيات و أحاديث في الكلام الديني علشان كلامه يكون له قيمة ,

    شكرا جزيلا

    --------
    و عفوا مرة أخرى تم مسح تعليق حضرتك علشان الصورة غير لائقة

    ReplyDelete
  12. محمد سعد القويري

    أخي محمد ,
    السلام عليكم و رحمة الله

    صباحك سكر ,

    فعلا للأسف الناس بتقارن نفسها بالأسوأ و ليس بالأحسن ,
    بينما صاحب الهمة لا يقان نفسه إلا بالنجوم ,

    أو على الأقل بالوضع القياسي الذي يُدخله الجنة

    ربنا يهدينا و يهدي الجميع

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ