زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

02 March, 2010

ياي !! هم الشباب بيعاكسونا ليه ؟؟


السلام عليكم و رحمة الله ,


من أكثر الحاجات اللي بتغيظني ,
و بترفع ضغطي - و بالتالي درجة حرارة غلياني - ,

لما تلاقي واحدة طالعة مثلا في التلفزيون ,
لابسة : بادي , أو بنطلون , أو حتى بلوزة و جيبة , و ( الكل أُس "ضَيِّق" )
سواء كانت ( مغطية شعرها ) أو مش مغطياه ,
-و طبعا اللي مغطية شعرها تفرق كتير عن المحجبة زي ما اتكلمنا قبل كده هــــــــنــــــا -

المهم , لما تلاقي واحدة بالشكل ده سواء مستضيفينها في برنامج ,
أو بياخدوا رأيها في الشارع ,

و تلاقيها بتسأل بكل ( براءة ) - و إن شئت فقل بكل ( استهبال )
- و تقول :
أنا مش عارفة هي الأخلاق انحدرت ليه كده عند الشباب ؟؟
ليه ظاهرة المعاكسات و التحرش زادت كده ؟؟

و كأن ( جناب البريئة ) ترتدي زِيَّ أمهات المؤمنين !!

و مش شايفة إن طريقة لبسها زي ما بيقول الرافعي - من أكثر من 70 سنة - :

" تجعل ثيابها تعبيرًا دقيقًا عن أعضائها،
و بدلاً من أن تُلبس جسمها ثوبًا يكسوه ،
تُلبسه الثوب الذي يكسوه و يزينه و يُظهره و يُحركه في وقت معًا،
حتى ليكاد الثوب يقول للناظر:
هذا الموضع اسمه... وهذا الموضع اسمه... وانظر هنا وانظر ههنا...

ما زادت المدنية على أن فككت المرأة الطيبة ثم ركبَّتها في هذه الهندسة الفاحشة
" [وحي القلم - فلسفة الطائشة]




و إنهنّ - لابسات هذا الزيّ - حتى و لو فرضنا
إنهم ماشيين في حالهم و ( بوزهم في الأرض ) ,
فإن ثيابهن المثيرة و تبرجهن و سفورهن ينادون الرجال أن هلموا ,

و هذه الثياب التي تصف أكثر مما تستر و هذا التبرج جعلهن كما يقول الرافعي أيضا :

" سلعة بائرة يُنادى عليها في مدارج الطرق والأسواق :
العيون الكحيلة ، الخدود الوردية ، الشفاه الياقوتية ، الثغور اللؤلؤية ، الأعطاف المرتجة ، النهود الـ... الـ...

أوليس فتياتنا قد انتهين من الكساد بعد نبذ الحجاب إلى هذه الغاية،
وأصبحن إن لم ينادين على أنفسهن بمثل هذا فإنهن لا يظهرن في الطرق إلا لتنادي أجسامهن بمثل هذا ؟
"[وحي القلم - تربية لؤلؤية]


أنا مش ببرر للشباب معاكسة الفتيات و التحرش بهن ,
لأ , أبسولوتلي
بل الواجب عليهم أن يغضوا أبصارهم حتى لو كان النساء يمشين عرايا ,

لكن في زمنٍ رقَّ فيه الدين ,
أظن أنه ليس من ( العقل ) - و سيبنا من الشرع علشان الناس اللي عندها حساسية - أن تترك باب بيتك مفتوحاً بدعوى أنك ( حُر ) ,
ثم تلوم اللصوص على السرقة !!


.
.
.


طبعا أكيد هلاقي ناس بيقولوا إنهم لابسين محترم و بيتعاكسوا برضه ,
و المسألة دي ليها 3 احتمالات :
1- إنهم شايفين إن لبسهم محترم , و الواقع إنه مش محترم , علشان كده بيتعاكسوا .
2- إنهم لابسين محترم , لكن طريقة مشيهم أو كلامهم أو ..... مش محترمة .
3- الحالة دي نادرة الوجود شوية : إنهم فعلا يكونوا لابسين محترم , و ماشيين بوقار و احترام و كل حاجة عندهم تمام ,
إنما حظهم إنهم مروا أمام بعض الشباب المريض نفسيا , اللي بيعاكس كل ما تلحقه تاء التأنيث
حتى لو كانت قطة , أو فرخة , أو حتى رِجل كنبة !!

......................


بس خلاص ,
ده موقف كان غايظني فحبيت أتكلم عنه ,


و ألقاكم بعد أسبوع إن شاء الله

و لا تنسوا الدعااااااااااا اء بظهر الغيب
و لا تبخلوا على أنفسكم بدعاء المَلَك لكم
كما قال رسول الله - صلى الله عليه و سلم - :
مامن عبد مسلم يدعو لأخيه بظهر الغيب , إلا قال المَلَك : ولك بمثل



و لأي نقد أو اقتراحات عامة خارج الموضوع ,
لا تتردد و أضفها هـــــــــنــــــــــا

في أمان الله


21 comments:

  1. .









    قال رسول الله :
    لا ينبغي لمؤمن أن يذل نفسه ،
    قالوا: وكيف يذل نفسه ؟
    قال: يتعرض من البلاء ما لا يطيق .

    رقم 613 السلسلة الصحيحة - المجلد الثاني







    .

    ReplyDelete
  2. دائما تعجبنى تدويناتك
    بارك الله فيك وهدى على يديك الكثير

    ReplyDelete
  3. موناليزا

    بارك الله فينا و إياكم ,

    و ربنا يهدينا و يهدي بنا ,

    جزاكم الله خيرا

    ReplyDelete
  4. السلام عليكم...
    جزاك الله خير على هذا الطرح الطيب ...
    ....
    ذكرتني بنقطه في محاظره
    طبعا نحن في الإمارات الكل يلبس العبائه السوداء
    ولو إن البعض العبائه عندهم بتفضح أكتر ما بتستر
    إن بعض الشباب مجرد إنه يشوف اي شيئ أسود
    يمشي امامه يعاكسه حتى لو كيس زباله
    طبعا مثل ما ذكرت المهم إن البنت تكون
    حشمت نفسها وتوكلت على الله وأيضا تحاول قدر المستطاع أن تخرج مع محرم أو في مجموعه مع اخوات صالحات
    .........
    والله يهدي الجميع
    في أمان الله

    ReplyDelete
  5. نهار :
    و عليكم السلام و رحمة الله

    فعلا التبرج ليس له حدود ,
    فالابتكار فيه حتى و إن كان الزي محتشما ,
    بتخصير العباءة أو إضافة أشياء تلمع لها أو ...

    ربنا يهدينا و يهدي الجميع

    جزاكم الله خيرا

    ReplyDelete
  6. انا مش هممنى هذه المواضيع قد ما انا عاوز اتجوز واعيش جنه الدنيا مع زوجتى





    يقول الرسول صلى الل علية وسلم
    الدنيا متاع وخير متاعها الزوجة الصالحة

    ReplyDelete
  7. محمد فوزي

    يا راجل !! مش تقول انك عاوز تتجوز ,
    اشترك في خدمة جوزني شكرا :P
    و لا دي مش عندكم في موبينيل ؟؟

    صحيح ابقى فكرني لما أرجع أوريلك الورقة اللي في المحفظة بتاعتي ,
    فيها كل الأسباب اللي هتخليك تكره الزواج ,
    سواء كانت أسباب في الزوج أو في الزوجة أو في الأطفال

    الورقة دي ما وريتهاش لحد قبل كده ,
    بس مش هتغلى عليك :)

    على فكرة , انت كنت كاتب على ظهرها مقاسات القاعدة بتاعة الموتور بتاع المشروع ,
    بس الحمد لله انت ما فتحتهاش ساعتها :)

    في أمان الله
    بعد أسبوع ألقاك إن شاء الله

    ReplyDelete
  8. ما أحنا بنقول كدهـ
    يقولولك أمال فين أحترام الأخر
    وقبول الأخر وترررررررم الأخر :(
    مرة قلت الكلام ده لزميلة لى بصت لى
    بأسغراب أوى وقالتلى أمال حالبس اللحاف؟!
    ما أنا لازم ابقى شيك؟؟؟؟؟ صراحة سكت ياتيمى
    ربنا يوفقك ويهديك ويصلح شأنك كله ونحن معك
    اللهم آمين يارب العالمين.!

    ReplyDelete
  9. السلام عليكم ورحمة الله وبركاته :
    كيف حالك اخ تيمى ، اولا خيرا فعلت بخصوص اسم المدونة كدة تمام قوى .
    ثانيا الله عليك ، عرض ممتاز باسلوب رائع واظن بقى ان بعد الكلام ده مفيش واحدة عندها حجة فى سوق اى مررات لما تيجى الطوبة فى المعطوبة ، وبعدين اللى يغيظ اكتر يا عم تيمى ان الكلام ده هن عارفينه وحافظينه لكن تعمل ايه فى كيدهن اللى هيجننا ويطلعنا من هدومنا .
    تحياتى .

    ReplyDelete
  10. السلام عليكم ورحمة الله وبركاته

    تعرف يا هندسة ،، واحد صاحبي قوي ، أنت عارفه :D
    قالي مرة إن اللي بيعمل حاجة غلط ، ساعات بتصول بيه حالته إنه يدور على حاجة تبرر موقفه دا ، حاجة تريحه ، عشان كده لما تيجي تنصحه مش هتلاقي استجابة منه لأن غالبا قلبه ميت ، وعايز حاجة تريحه وبس حتى لو غلط. وطبعا لو لقى حد يشجعه ويبررله موقفه يبقى يا سعده يا هناه .


    هو دا حال اللي بيعمل معصية -ربنا يستر علينا وعلى المسلمين -

    بس تعرف مع كل دا أنا بصراحة مرتاح نفسياً لأن حاسس إن قوافل العائدين بتكتر ، ربنا يهدينا ...

    أخيراً أقول ترجع بالسلامة ، وربنا يصلح شأنك ويغفر لك ويهديك الصراط المستقيم

    بوركت :)

    ReplyDelete
  11. و بترفع ضغطي - و بالتالي درجة حرارة غلياني - ,

    هههههههههههههههههههههه
    جميلة يا تيمي

    وبالنسبة للبنات اللى بيطلعوا يقولوا كده وهم ع الحالة دي بيفكروني بالراجل الاصلع اللى كان طالع يعمل اعلان عن كريم للشعر

    ربنا يهدي شباب وبنات المسلمين
    ويهدينا جميعا لما فيه الخير

    ReplyDelete
  12. عندي شوية ملاحظات
    انت بتقول ان لبس البنات الضيق والقصير و و و هو السبب في المعاكسات او التحرش
    طب ليه زمان لما كانوا البنات بيلبسو مني جيب
    او ضيق ماكنشي في نفس الكم من المعاكسات اللي بتحصل دلوقت
    وكمان شايفه ان حضرتك بتنتقد المحجبات بطريقه جامده جدا
    اه انا معاك ان في محجبات حجابهم مش حجاب اوافق معاك بس بردو بحس من كلامك انك ماشفتش محجبات كويسين !!
    يلا ماعلينا
    بس ممكن ترد عليا وتقولي ليه ايام زمان برغم المني جيب والضيق واالمفتوح
    ماكنش في معاكسات وتحرش بنفس الكم زي النهارده ؟

    ReplyDelete
  13. د.نور :
    كنت لسة بتكلم مع واحد و انا راجع من الشغل النهاردة عن الموضوع ده ,
    فقال لي إن زي ما هيقول لي إني حر , و من حقي أمشي عريان في الشارع ..

    هقول له إني حر برضه إني ما أشوفش زبالة في الشارع !!

    ReplyDelete
  14. طارق سليم :
    و عليكم السلام و رحمة الله و بركاته ,
    أنا بخير و الحمد لله , جزاك الله خيرا ,
    بصراحة من عارف أقول إيه يا طارق,
    نفسي ألاقي ( غرض شريف ) للتبرج ده !!

    ربنا يهدينا و يهدي الجميع ,

    و ما تنساش الدعاء بظهر الغيب يا طارق

    ReplyDelete
  15. T3V4
    حبيبُ قلبي ..
    و عليكم السلام و رحمة الله و بركاته ,
    مين صاحبك ده ؟؟ و لا عمري شفته :) !!

    المهم , فعلا أي حد بيعمل حاجة غلط بيبقى عنده تأنيب ضمير ,
    ما بيبقاش مسترح و هو بيعصي ,
    فبيحاول يتغلب على تأنيب الضمير ده بإيجاد مخرج و تبرير ,,
    و ....
    ربنا يهدينا , و يهدي الجميع ..

    ReplyDelete
  16. سمو الأمير :
    ههههه
    أمال يا هندسة , مش لازم الثرموديناميك ( تطفح ) على كلامنا :) ؟؟

    عندك حق يا أبو حميد , تشبيه في الجون : أصلح بيعمل إعلان للشعر !!

    مش عارف هي بجاحجة و لا غباء ؟؟

    ربنا يهدي الجميع

    ReplyDelete
  17. أبو علي :
    تغيظ ... و بشدة !!

    ReplyDelete
  18. yara
    أنا قلت فعلا إن لبس البنات الضيق و القصير هو ( سبب ) في المعاكسات و التحرش ,
    لكنه مش السبب الوحيد ,
    لأن زي ما قلنا إن ممكن - في حالات خاصة - يكون فيه معاكسات لنساء محترمات ,
    أما بالنسبة لسؤالك ليه ما كانش فيه ترحش في السبعينات أيام المايكرو جيب و غيرها ,
    فيه إجابات كتيرة للسؤال ده ,
    منها إن لابسي هذه الجيبات كانوا من مش عامة الشعب , كانوا من الطبقات الغنية - و لا نقول العليا - ,
    و إن التبرج ده كان مقصور على أماكن تواجد الناس دي في الأماكن اللي بيقولوا عليها راقية ,

    يعني الناس اللي كانت بتلبس كده كان مثلا عددهم ما يجيش 1% من عدد اللي بيلبسوا كده دلوقتي ,
    فلو حتى كان التحرش زمان بنفس النسبة بتاعة دلوقتي , كان هيبقى قليل و مش هيبان , لأن العدد الكلي كان قليل ,

    و لو حتى افترضنا إن حتى التبرج ده كان موجود في عامة الشعب - و ده ما كانش موجود - , فزمان ما كانش فيه عاطلين و لا مرتادي نواصي بالعدد الموجود دلوقتي ,

    و بعدين لنفرض فرض تاني - ماكانش موجود برضه - , إن الشباب كان عاطل و واقف على النواصي ,
    لكن كان الالتزام ( بالتقاليد ) - و ليس بالدين - زمان كان أكثر من دلوقتي ,

    ,
    أما بالنسبة بانتقد المحجبات , فأنا لا أنتقد المحجبات , أنا أنتقد اللي مغطيين ( شعرهم ) و مفكرين نفسهم محجبات ,
    و المحجبات الكويسين كتير و الحمد لله ,

    ReplyDelete
  19. بصراحة رائع جدا
    طريقة تفكيرك رائعة لجمع الدين بالدنيا بسهولة و يسر
    ان اتفق معاك جدا في الموضوع ده
    يمكن انت قولت كلام كان نفسي اقوله
    و اخيرا اشكر حظي اللي وقعني هنا بالصدفة
    ويالها من خير صدف

    تقبل مروري و تحياتي :):)

    ReplyDelete
  20. ZEMA

    هلا و سهلا فيك يا باشمهندس ,
    الكلام ده مش نفسك تقوله لوحدك ,
    تقريبا معظم الشباب - العازب بالذات - نفسه يقوله :(

    ربنا يهدينا و يهدي الجميع ,
    و أخيرا .... يا محاسن الصدف :)
    ـ

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ