زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

12 February, 2010

ـ في الفلانتاين : القرد أبو ( هدوم ) حمرا ـ




السلام عليكم و رحمة الله و بركاته ,

امبارح كنت راجع من القاهرة بنت الكـ.... قصدي بنت المعز ,
بعد أسبوع شحططة و سفر 7 ساعات يوميا من و إلى الشغل ,

المهم جناب سواق الأتوبيس كان مشغل الراديو ,
و المذيع و المذيعة عمالين يتكلموا عن اللي ما يتسمى : ( عيد الحب ) ,




قلت يااااااااااااه , هم لسه فاكرين ؟؟

ده الواحد من ساعة ما خلص الكلية و ما سمعش عن الحاجات دي ,

فين أيام لما كنت بروح الكلية و تلاقي (شباشب) المستقبل لابسين أحمر و مافيش حد ( أحمر ) منهم ,

و البنات بالذات - و بعض الصبيان ( النايتي ) - تلاقيهم عاملين زي القرود ,

مش علشان ( هدومهم ) بتبقى حمرا في اليوم ده زي (هدوم ) القرود ,

لكن علشان عقولهم هي اللي بتبقى زي عقول القرود في التقليد الأعمى , و عدم التفكير ,
و التعلق بالوهم و الخيبة ,

طبعا معظم الناس عارفة إن اللي عمل عيد الحب ده كان قسيس نصراني ,
و إن أصلا مافيش أعياد في الإسلام غير عيدين ,

لكن هتلاقي ( شلاطة الولهان ) و ( سنيَّة الرومانسية ) هيقولوا عليك :

( ياللي انت مالكش قلب ) , و ( آه يا قلبك يا قاسي ) , ...... و غيرها ,

و انك مش فاهم قيمة الحب , و لا معنى الحب , و لا (خِفّة دم ) الحب , لأنك ما جربتوش ,

المهم , علشان ما أطولش عليكم ,

احنا كنا اتكلمنا في موضوع الحب ده من زمان بالتفصيل ,
و قلنا إن الحب يختلف عن الإعجاب و التعلّق و الشوق و الفراغ العاطفي , في موضوعنا :

حب إيه
اللي انت جاي تقول عليه:
1- الجزء الأول
2- الجزء الثاني
3- الجزء الثالث


و كان فيه كلام رائع جدا للرافعي عن الوهم الذي يسمونه حباً و الأوْلى به أن يُسمى ( شوقاً ) ,

لأنه لا يلبث أن يخبو بعد الزواج - ده إن اتجوزوا أصلا - ,
كنت قرأته الأسبوع الماضي في كتابه وحي القلم ,
و أحب أن أُشارككم إياه :

" الحب لفظ وهميٌ موضوعٌ على أضدادٍ مختلفة:
على بركان وروضة، وعلى سماء وأرض، وعلى بكاء وضحك،
وعلى هموم كثيرة كلها هموم ، وعلى أفراح قليلة ليست كلها أفراحًا؛

وهو خداع من النفس يضع كل ذكائه في المحبوب,
ويجعل كل بلاهته في المُحِب،
فلا يكون المحبوب عند محبه إلا شخصًا خياليًّا ذا صفة واحدة هي الكمال المطلق،
فكأنه فوق البشرية في وجود تام الجمال ولا عيب فيه،
والناس من بعده موجودون في العيوب والمحاسن.

وذلك وهمٌ لا تقوم عليه الحياة ولا تصلح به،
فإنما تقوم الحياة على الروح العملية التي تضع في كل شيء معناه الصحيح الثابت
؛
فالحب على هذا شيء غير الزواج،
وبينهما مثل ما بين الاضطراب والنظام؛
ويجب أن يُفهم هذا الحب على النحو الذي يجعله حبًّا لا غيره،
فقد يكون أقوى حب بين اثنين إذا تحابَّا هو أسخف زواج بينهما إذا تزوجا.

و متى تزوج الرجل بمن يحبها اُنهتك له حجاب أنوثتها فبطل أن يكون فيها سر،
وعادت له غير من كانت، وعاد لها غير من كان؛
وهذا التحول في كلٍ منهما هو زوال كلٍ منهما من خيال صاحبه؛

فليس يصلح الحب أساسًا للسعادة في الزواج
،

بل أَحْرِ به إذا كان وَجْدًا واحتراقاً أن يكون أساسًا للشؤم فيه؛
إذ كان قد وضع بين الزوجين حدًّا يعين لهما درجة من درجة في الشغف والصبابة والخيال،
وهما بعد الزواج متراجعان وراء هذا الحد ما من ذلك بد "


و دي شوية مقالات عن ( يوم الفلانتينو) :


:: لماذا تحرمون عيد الحب !؟ ::


و بالله عليكم , أبوس إيديكم ادعولي إن ربنا يهديني و يُصلح لي شأني كله
و يَقدِر لي الخير حيث كان و يُرضِي به ,


10 comments:

  1. .











    قال الرافعي رحمه الله في وحي القلم :
    إن الفكر في تخفيف العبء الذي تحمله يجعله أثقل عليك مما هو،
    إذ يضيف إليه الهم،
    والهم أثقل ما حملت نفس؛
    فما دمت في العمل فلا تتوهمن الراحة،
    فإن هذا يوهن القوة، ويخذل النشاط، ويجلب السأم؛
    وإنما روح العمل الصبر،
    وإنما روح الصبر العزم.









    .

    ReplyDelete
  2. الأخ الفاضل :: TIMMY !! ::
    تحية طيبة
    وجمعة مباركة

    ثم


    كلام جميييل ..

    لكن ألا تلاحظ معي قد تكون كلمة قرد قاسية قليلاً ؟؟

    ده رأي ..

    أما لبقية التفاصيل فأنا معك ..

    الحب قبل الزواج ده أكذوبة .

    تحياتي

    ReplyDelete
  3. جزاك الله خيرا وجعله في ميزان حسناتك,
    كلام مظبوط,
    ربنا يهدي شبابنا وبناتنا,
    اسأل الله أن ييسر لك أمرك ويقدر لك الخير حيث كان ويرضيك به.

    ReplyDelete
  4. آمييين
    ربنا يوفقك يارب

    ReplyDelete
  5. السلام عليكم ورحمة الله وبركاته : لاء بجد ربنا يبارك فيك ويعزك ويكرمك ويزيدك علما وينفع بك اللهم امين ، فعلا كلام الرافعى هو بالظبط اللى كنت دايما اقوله لاصحابى وكل الشباب اللى كانوا دايما يسالونى عن الحكاية دى ، بس بصيغه مختلفة مكنتش قادر اوصلهم المعنى ده كويس مع انى عارفه وموقنه . المصيبة بقى ان اللى مش فاهم وعامل فيها حبيب بيخسر كتير قوى قوى من عمره ووقته ومجهوده وربما دينه ايضا .
    ربنا يهدى سباب وبنات الامة.
    ممكن تسمحلى ابقى انقل كلام الرافع عندى على الفيسبوك .
    تحياتى .

    ReplyDelete
  6. ياااااه أول مرة اقرأ حاجة للرافعي

    ماشاء الله حفزتني اكتر اني اجيب الكتاب ده واقرأه

    إن شاء الله

    وبالنسبة ل(الفلانطين) كنت قرأت السنة اللى فاتت في احد المنتديات احد الشباب اللى كان داخل يفضفض ويقول انه يوم ماراح الفلانطين الآنسة مجاتش وهو صعبت عليه نفسه والهدايا اللى جابها والورد

    هو صعب عليا بردو :)

    ربنا يهدينا ويصلح لنا أحوالنا جميعا

    ReplyDelete
  7. معلش ممكن تفهمنى ايه الحب اللى شؤم دة!
    .
    .
    ومعاك انا فى باقى الكلام..اجدت الاقتباس

    ReplyDelete
  8. البوست اخر تظبيط ههههههههه
    بجد ربنا يكرمك وكلمات الرافعى اثرت الموضوع جدااااا

    ReplyDelete
  9. باشمهندس تيمى
    اولا بشكرك بالنيابه عن مجانين مدونتى بالزياره
    ثانيا انا عارف انك اكيد فاهم حالتى جدا طالما مهندس وكنت حاسس بنفس حالتى قبل كده
    ثالثا
    تاحب بقى
    بصراحه وبدون لف
    وبدون كلام الفشله اللى يقولك الحب موجود
    مش لازم يبقى له عيد
    كلام اللى عاوز يبقى على الحياد
    ميقولش اه او لا
    انا بقولها بصوت اهم واحد عندى فى المصحه
    دكتور ادجار
    الحب شئ نسبى اغلبه وهم
    واللى اخترع عيده ده راجل تافه
    وفاضى
    واللى مقراش عدل عنه وبيقلده بس
    هيعرف ازاى كانوا بيحتفلوا بيه
    كان يوم ولا يوم تركيا بتاع الحر اللى لازم يقلعوا فيه عشان الجو
    يشرفنى جدا انك بتزورنى
    وانك تتابعنى
    وباذن الله لسه عندى فكر كتير
    ربنا يسهل

    ReplyDelete
  10. السلام عليكم ورحمة الله وبركاته...
    الله ييسر امورك ويصلح حالك...
    وجزيت خيرا على تدوينتك ...
    كلام مهم بالفعل ...
    والغريب إنهم فعلا لسه فاكرين مايدعون أنه عيدللحب ...
    في روسيا حولوا هذا اليوم إلى يوم آخر تحت مسمى عيد العائله والسلام والحب لأنهم وجدوا أنه في هذا العيد المزعوم إنحلال أخلاقي ...
    ...
    في أمان الله

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ