ـ خشوع !! ( ق ق ج ) ـ

كان يفكر في عمله ,

في طلبات زوجته ,

في مشاكل أطفاله ,

في مذاكرته ,

في تصليح سيارته ,

في ...........
.
.
.
.
.
.

ثم سلّم عن يمينه و شماله و قام مما يسميها ( صلاةً ) !!



ـــــــ



ربنا يهدينا و يهدِ بنا ,
و يرزقنا العمل بما نعمل ,

و لا تنسونا من صالح دعائكم ,

جزاكم الله خيرا

...

مولد ... و صاحبه لازم يكون غايب

السلام عليكم و رحمة الله و بركاته ,


البارحة كنت ناوي أنام من المغرب ,
لكن أتاني صديق عزيز من مدينة مجاورة فخرجت معاه ,

لكن بصراحة فوجئت بـ( الكَفر حَدَانا ) !!

مراجيح في كل حتة ,
و زحمة قوي كأننا في العيد ,
و على الكورنيش مزيج من ( الحبِّيبة ) و العائلات ,

و طبعاً لا ننسى تجارة ( تأجير الحمير) اللي بتزدهر في الأوقات اللي زي دي ,

و الجديد بقى - هو يمكن يكون قديم بس أنا أول مرة أشوفه - إن الناس ناصبين أكثر من شادر زي بتاع الأفراح كده في الشوارع ,
و بيوزعوا فيه رز بلبن و كركديه و تمر هندي و كده ,

و الناس في الشادر مشغلين أغاني - بيقولوا عليها إسلامية - بصوت عالي جدا ,
و الرجالة الكبار عمالين يتمايلوا أو بمعنى آخر ( بيفقَّروا ) ,

و العيال الصغيرين بيرقصوا هم كمان و بيتنططوا ,

و بعض الشباب ( المِهَيْبَر ) برضه منتشي بالأغاني دي ,
و ( الهيفي خيبة ) - الخيبة التقيلة يعني - إن الأغاني دي بعيدة كل البعد عن كونها ( إسلامية ) ,
بل الأولى أن تُسمى أغاني ( شِركِية ) ,
لأن فيها ألفاظ غلط كتير زي :
مدد يا رسول الله ,
مدد يا دسوقي مدد يا إمام - و ما تسألش إيه اللي دخل الدسوقي في المولد النبوي - ,
و غيرها ,
- و المعلوم أن طلب المدد هو دعاء , و صرف الدعاء لغير الله شرك - ,


المهم لقيت حاجات كتيرة استغربت لها ,
لكن في الآخر لم أجد تعليقاً على هذا الوضع غير إنه :

(( مولد و صاحبه غايب ))

و لما جيت أفكر في الجملة لقيتها صحيحة ... جدا ,

بل الأَوْلى أن تكون :

(( مولد و صاحبه لازم يكون غايب ))

لأن مولد زي كده , أكيد صاحبه - صلى الله عليه و سلم - حتى لو كان حياً لكان سيغيب عنه ,
لأنه - صلى الله عليه و سلم - ما كان ليشهد هذا الزور ,
و ماكان ليرضى أن يكون الاحتفال بمولده بهذا الشكل الفج من المعاصي و الاختلاط و التبرج و المعازف و ....


اللذيذ في الأمر - غير الرز بلبن - إن ( المحافل ) دي معظمها بتبدأ بحاجات فيها وقار ,
زي أسماء الله الحسنى مثلا , و بعض آيات القرآن ,
لكن علشان الناس ( تنبسط ) فلابد من التحول السريع !!

و رحم الله ابن القيم إذ يصف حال أمثال هؤلاء فيقول :

تُلِيَ الكتاب فأطرقوا لا خيفـةً *** لكنه إطراق ساهٍ لاهٍ

وأتى الغناءُ فكالحمير تناهقـوا *** والله ما رقصوا لأجل الله

دُفٌ ومزمارٌ ونغمةُ شادنٍ *** فمتى رأيت عبادةً بملاهي

ثقل الكتاب عليهمُ لما رأوا *** تقييدَهُ بأوامرٍ ونواهي

سمعوا له برقاً ورعداً إذ حـوى *** زجراً وتخويفاً بفعل مناهي

و رأوه أعظم قاطعٍ للنفس عن *** شهواتها يا ذبحها المتناهي

وأتى السماع موافقاً أغراضها *** فلأجل ذاك غدا عظيم الجاه

أين المساعد للهوى من قاطـعٍ *** أسبابه عند الجَهول الساهي

إن لم يكن خمر الجسوم فإنـه *** خمر العقول مماثلٌ ومضاهي

فانظر إلى النشوان عند شرابـه *** وانظر إلى النسوان عند ملاهي


------------------

مش قلت لكم إن معظم الخيبة و المصايب اللي احنا فيها ليها أصل في الماضي ؟؟

......................


آخر حاجة عارف إن الناس هتسأل :
طب اللي بيحتفل بالمولد من غير أغاني و لا اختلاط و لا كلام فاضي من بتاع الجهّال ده , حرام و لا حلال ؟؟

هنقول لهم زي ما ابن مسعود ما قال :

" إنكم لعلى مِلِّةٍ هي أهدي من ملة محمد ,
أو مفتتحوا باب ضلالة "


انت بتعمل حاجة تتقرب بيها إلى الله ,
يبقى لازم تعملها بالطريقة اللي ربنا قال لك عليها عن طريق نبيه :
(( الإخلاص و المتابعة ))
انت عندك الإخلاص , و نية التقرب إلى الله ,
لكن المتابعة مش موجودة , لأنك بتعمل حاجة على غير الطريقة اللي الرسول قال لك عليها ,
و قد قال - صلى الله عليه و سلم - :
( من عمل عملا ليس عليه أمرنا فهو رد ) , يعني مردود على صاحبه لا يقبله الله ,
و النية الصالحة في العمل - بدون وجود المتابعة - ليست كافية لقبول العمل ,

يقول الله عز و جل :
{ قُلْ هَلْ نُنَبِّئُكُمْ بِالْأَخْسَرِين َ أَعْمَالًا (103)
الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا (104) } . سورة الكهف

يقول ابن كثير في تفسيرها :
" الَّذِينَ ضَلَّ سَعْيهمْ فِي الْحَيَاة الدُّنْيَا " : أَيْ عَمِلُوا أَعْمَالًا بَاطِلَة عَلَى غَيْر شَرِيعَة مَشْرُوعَة مَرْضِيَّة مَقْبُولَة .
" وَهُمْ يَحْسَبُونَ أَنَّهُمْ يُحْسِنُونَ صُنْعًا " : أَيْ يَعْتَقِدُونَ أَنَّهُمْ عَلَى شَيْء وَأَنَّهُمْ مَقْبُولُونَ مَحْبُوبُونَ .


و موضوع البدعة و السنة و البدعة الحسنة و غيرها مما يطول الكلام عنه ,
و إن شاء الله نبقى نتكلم عنه بشكل منفصل في موضوع آخر إن شاء الله


و دي فتاوى لابن تيمية رحمه الله عن هذا حكم الاحتفال بالمولد :
http://www.saaid.net/mktarat/Maoled/37.htm

و دي أقوال مجمعة عن حكم الاحتفال بالمولد :

ربنا يهدينا و يتوب علينا ,

و جزاكم الله خيرا على القراءة ,

و لا تنسونا من دعوة صالحة بظهر الغيب :
أن يطهر الله بدني و قلبي و عقلي من كل شر
و ان يهديني و يتوب عليّ و يرحمني ,
و إياكم و سائر المسلمين و المسلمات .

في أمان الله

ـ (الشباب السيس) بتوع أيام زمااااااااااان !! ـ

السلام عليكم و رحمة الله و بركاته

كنت عند ابن خالتي في مركز التدريب من حوالي شهر و نص , في أول زيارة بعد أول أسبوع ,

و واحنا قاعدين لفت نظري 3 ( أشياء ) يُقال عنهم ( ذكور ) جايين يزوروا واحد صاحبهم ,

شعرهم طويل ... لابسين بناطيل ساقطة ... لابسين حظاظات .... إلخ



لقيت ابن خالتي برضه بيبص عليهم , و بيقول :
أهي العيال دي هي اللي كانت المفروض تدخل الجيش علشان يسترجلوا شوية ,

و تعدي الأيام و تفوت ,

و بينما كنت أقرأ في كتاب " وحي القلم " للرافعي ,
إذ بي أقرأ كلماتٍ له يصف بها أحد أولئك ( الأشياء ) حق الوصف ,


يقول :

" فإني لجالسٌ ذات يوم وقد أقبلتُ على شأني من الكتابة،
وبإزائي فتى رَيِّق الشباب ،
في العمر الذي ترى فيه الأعين بالحماسة والعاطفة ، أكثر مما ترى بالعقل والبصيرة ،
ناعمٌ أملدٌ تمَّ شبابه ولم تتم قوته ،
كأنما نكصت الرجولة عنه إذ وافته فلم تجده رجلاً ...
أو تلك هي شيمة أهل الظَّرف والقصف من شبان اليوم :
ترى الواحد منهم فتعرف النضج في ثيابه أكثر مما تعرفه في جسمه ،
و تأبى الطبيعة عليه أن يكون أنثى فيجاهد ليكون ضربًا من الأنثى "

استغربت جدا لما لقيت إن كان على أيام الرافعي حاجات زي دي ,
لكن لما قرأت أكثر في كتابه " وحي القلم " ,
وجدت تشابها كثيرا بين ( مصائب ) زماننا و زمانهم ,
و إن شاء الله سأوافيكم بها تباعاً

ربنا يهدينا و يهدي الجميع ,

في أمان الله

و لا تنسونا من دعوة صالحة بظهر الغيب

-----------------------------------

آراؤكم و مقترحاتكم و نقدكم ... من فضلكم

السلام عليكم و رحمة الله و بركاته

من غير كلام كتير و لا مقدمات ,

أحب أعرف من حضراتكم رأيكم إيه في المدونة ؟؟

إيه رأيك في الشكل ؟؟

في الأسلوب ؟؟

في أي حاجة ,


أي حاجة عندك اعتراض عليها ياريت تقول لنا عليها علشان نغيرها ,

و لو مش عاوز تقول اسمك , عادي , قول رأيك و انت ( غير معرف )

ياريت تقول أي نقد أو أي اعتراض على أي حاجة ,

سواء في المدونة كشكل أو أسلوب أو ككاتب أو أي حاجة تخطر على بالك ,

عاوز اعتراضات و نقد و أي حاجة تخطر على دماغك ,

و كلي آذان صاغية إن شاء الله

جزاكم الله خيرا

المدونة الجديدة

السلام عليكم و رحمة الله و بركاته .

طبعا احنا واجعين دماغكم معانا من عنوان على عنوان ,

لكن بصراحة العنوان اللي فات ما كانش حلو قوي ,

علشان رقم 6 اللي كان في أوله ده كان ليه تأثير مش ظريف على اللي يشوف العنوان لأول وهلة ,

غير كمان إنه ما كانش صحيح لغويا ,

عموما المدونة هنا كاملة إن شاء الله

و معلش ... تاعبينكم معانا

و أرجو أن تعذروني في عدم انتظامي في الدخول ,
أو التعليق على مدوناتكم

لأن العملية ... بايظة :(

و لا تنسوا الدعاء بالله عليكم

جزاكم الله خيرا

ـ في الفلانتاين : القرد أبو ( هدوم ) حمرا ـ

السلام عليكم و رحمة الله و بركاته ,

امبارح كنت راجع من القاهرة بنت الكـ.... قصدي بنت المعز ,
بعد أسبوع شحططة و سفر 7 ساعات يوميا من و إلى الشغل ,

المهم جناب سواق الأتوبيس كان مشغل الراديو ,
و المذيع و المذيعة عمالين يتكلموا عن اللي ما يتسمى : ( عيد الحب ) ,




قلت يااااااااااااه , هم لسه فاكرين ؟؟

ده الواحد من ساعة ما خلص الكلية و ما سمعش عن الحاجات دي ,

فين أيام لما كنت بروح الكلية و تلاقي (شباشب) المستقبل لابسين أحمر و مافيش حد ( أحمر ) منهم ,

و البنات بالذات - و بعض الصبيان ( النايتي ) - تلاقيهم عاملين زي القرود ,

مش علشان ( هدومهم ) بتبقى حمرا في اليوم ده زي (هدوم ) القرود ,

لكن علشان عقولهم هي اللي بتبقى زي عقول القرود في التقليد الأعمى , و عدم التفكير ,
و التعلق بالوهم و الخيبة ,

طبعا معظم الناس عارفة إن اللي عمل عيد الحب ده كان قسيس نصراني ,
و إن أصلا مافيش أعياد في الإسلام غير عيدين ,

لكن هتلاقي ( شلاطة الولهان ) و ( سنيَّة الرومانسية ) هيقولوا عليك :

( ياللي انت مالكش قلب ) , و ( آه يا قلبك يا قاسي ) , ...... و غيرها ,

و انك مش فاهم قيمة الحب , و لا معنى الحب , و لا (خِفّة دم ) الحب , لأنك ما جربتوش ,

المهم , علشان ما أطولش عليكم ,
احنا كنا اتكلمنا في موضوع الحب ده من زمان بالتفصيل ,
و قلنا إن الحب يختلف عن الإعجاب و التعلّق و الشوق و الفراغ العاطفي , في موضوعنا :

حب إيه
اللي انت جاي تقول عليه:
1- الجزء الأول
2- الجزء الثاني
3- الجزء الثالث


و كان فيه كلام رائع جدا للرافعي عن الوهم الذي يسمونه حباً و الأوْلى به أن يُسمى ( شوقاً ) ,
لأنه لا يلبث أن يخبو بعد الزواج - ده إن اتجوزوا أصلا - ,
كنت قرأته الأسبوع الماضي في كتابه وحي القلم ,
و أحب أن أُشارككم إياه :

" الحب لفظ وهميٌ موضوعٌ على أضدادٍ مختلفة:
على بركان وروضة، وعلى سماء وأرض، وعلى بكاء وضحك،
وعلى هموم كثيرة كلها هموم ، وعلى أفراح قليلة ليست كلها أفراحًا؛

وهو خداع من النفس يضع كل ذكائه في المحبوب,
ويجعل كل بلاهته في المُحِب،
فلا يكون المحبوب عند محبه إلا شخصًا خياليًّا ذا صفة واحدة هي الكمال المطلق،
فكأنه فوق البشرية في وجود تام الجمال ولا عيب فيه،
والناس من بعده موجودون في العيوب والمحاسن.

وذلك وهمٌ لا تقوم عليه الحياة ولا تصلح به،
فإنما تقوم الحياة على الروح العملية التي تضع في كل شيء معناه الصحيح الثابت؛
فالحب على هذا شيء غير الزواج،
وبينهما مثل ما بين الاضطراب والنظام؛
ويجب أن يُفهم هذا الحب على النحو الذي يجعله حبًّا لا غيره،
فقد يكون أقوى حب بين اثنين إذا تحابَّا هو أسخف زواج بينهما إذا تزوجا.

و متى تزوج الرجل بمن يحبها اُنهتك له حجاب أنوثتها فبطل أن يكون فيها سر،
وعادت له غير من كانت، وعاد لها غير من كان؛
وهذا التحول في كلٍ منهما هو زوال كلٍ منهما من خيال صاحبه؛

فليس يصلح الحب أساسًا للسعادة في الزواج ،

بل أَحْرِ به إذا كان وَجْدًا واحتراقاً أن يكون أساسًا للشؤم فيه؛
إذ كان قد وضع بين الزوجين حدًّا يعين لهما درجة من درجة في الشغف والصبابة والخيال،
وهما بعد الزواج متراجعان وراء هذا الحد ما من ذلك بد "

و دي شوية مقالات عن ( يوم الفلانتينو) :

:: لا تكن (فالنتاينياً)!! ::

:: عيد الحب لمن !!؟ ::

:: عيد الحب وأعياد المشركين ::

:: لماذا تحرمون عيد الحب !؟ ::


و بالله عليكم , أبوس إيديكم ادعولي إن ربنا يهديني و يُصلح لي شأني كله
و يَقدِر لي الخير حيث كان و يُرضِي به ,

ـ ناجحون في ماء البطيخ !! (ق ق ج) ـ

أنهى يومه المليء بـالفشل و الإحباط و الخَيبة ,

عاد لبيته ....

تناول طعامه ....

أعَدَّ كوب الشاي ...

اتخذ مقعده أمام جهاز الكمبيوتر ,




و أخذ بتسجيل الدخول في المنتديات و المواقع المشترك بها ,

كانت لديه كلمة مرور واحدة كي لا ينساها ,

أما معرفاته الشخصية فكانت متنوعة ما بين :

شاب ناجح - البروفيسور - إنسان عظيم - الأستاذ - ..... و غيرها !!


.......................

و لا تنسوا الدعاء بالله عليكم أن يُصلح الله لي شاني كله
و أن يَقدر لي ايخير حيث كان و يُرضني به
و جزاكم الله خيرا
ـــــــــــــــــــــــ