زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

15 November, 2009

ـ حبيتك من أول نظرة !! ـ


ركبت حماري من غير بردعة ...
و سحبت ورايا نسواني الأربعة ..
لمحت عيونك وسط المعمعة ...
الحب نط في قلبي زي الضفدعة .




النهاردة إن شاء الله هنتكلم عن :

>> الحب من أول نظرة <<

فيه ناس بتكون مثلا بتتفرج على فيلم أو مسلسل ,
و تشوف البطل أو البطلة و تتعلق بيهم جدا ,
و تلاقيهم يجيبوا صورهم و يعلقوها في الغرفة ,
و يحطوا صورهم على الموبايل و في النت و في كل مكان ,

أو واحد أو واحدة يكون في الكلية أو الشغل و يبص لزميلة ليه ,
و يتعلق جدا بشكلها , و صورتها تعلق في ذاكرته ,
و يقعد يفكر فيها على طول

الحالات اللي زي دي كتيرة ,

و طبعا الكلام ده مش اسمه حب ....

إنما اسمه (( تعلق )) , أو زي ما الفقهاء سموه (( عشق الصور ))
إن الواحد يتعلق بجمال شخص تاني ,
و ما يعرفش حاجة عن أخلاقه و لا طريقة تعامله و لا أي حاجة ,
لكن شكله بس يعلق في دماغه ,

و عموما الكلام ده احنا اتكلمنا عليه قبل كده ,
اللي عاوز يقرأ أكثر عن الحب و أنواعه يتفضل يقرأ الموضوع ده :
حب إيه اللي انت جاي تقول عليه :
1- الجزء الأول
2- الجزء الثاني
3- الجزء الثالث


لكن احنا النهاردة هنتكلم عن :

>> علاج الحب من أول نظرة ده <<
أو علاج التعلق بصور الأشخاص :

- أول حاجة تخيل حبيب القلب ده مثلا و هو بيتثائب و مناخيرة واسعة و بقه مفتوح و عينيه مغمضة ,
تخيل بس ...



تخيله مرة تانية و هو بيعطس و بيفتح بقه و مناخيره و بيغمض عينه و بيقول : هاتشييييييييي




تخيل الشخص اللي انت متعلق بصورته و شكله في أي وضع سيء ,

زي ما ابن مسعود رضي الله عنه ما بيقول :
" إذا أعجبت أحدكم امرأة، فليتذكر مناتنها "

تخيل مناتنه ... و بلاش نفصل أكثر في حكاية المناتن دي علشان الناس ما تتقرفش


علشان إيه ؟؟ .... ما تتقرفش ,

أيوااااااااا هو ده الغرض ,
إنك تتخيل صورة الشخص اللي انت متعلق بيه في حالة مقرفة علشان ما تتعلقش بيه .


- تاني حاجة لازم تعملها إنك تقفل الباب ,
الباب اللي فتحته و تعلقت بصورة الممثلة الفلانية أو بنت الجيران أو ....
و تبعد عن مصدر الفتنة زي التليفزيون و المسلسلات و الأفلام ,
أو أماكن الاختلاط , و تحاول قدر المستطاع تغض بصرك فيها ,
و ما تقولش أنا جامد و زي إخواتي و مش هبص و ....
لأن زي ما بيقول ابن الجوزي :
" من قارب الفتنة , بَعُدَت عنه السلامة ,
و من ادعى الصبر وُكِلَ إلى نفسه
"


- آخر حاجة علشان ما نطولش عليك ,
إنك تتوب لربنا و تستغفره ,
و تعلم إن تعلق القلب بصور الأشخاص ده إبتلاء ,
فتدعي ربنا إنه يتوب عليك منه و يرفعه عنك ,


و الموضوع ممكن يكبر أكثر من كده بكتير ,
بس أنا مش عاوز أطول أكثر من كده علشان الزهق ,
جزاكم الله خيرا للمتابعة و القراءة ,

و لا تنسونا بالله عليكم من دعوة بظهر الغيب أن يُصلح الله لي شأني كله ,

و طبعا :
>> حقوق النشر للجميع <<
و حبذا لو تذكر رابط المدونة :
tazbee6.blogspot.com

.......................

.

42 comments:

  1. .














    قال الحسن البصري :
    ليس الإيمان بالتمني ولكن ما وقر في القلب وصدقه العمل,وإن قوما غرتهم الأماني حتى خرجوا من الدنيا ولا حسنة لهم وقالوا:نحن نحسن الظن بالله تعالى وكذبوا,لو أحسنوا الظن لأحسنوا العمل











    .

    ReplyDelete
  2. طيب ليه نبوظ شكل الناس كده ؟
    ما اعتقدتش انهم يحبوا ابداً الناس تفكر فيهم بالطريقة دي او تشوفهم كده .. انا شايفة ان الحل ان الواحد يشغل نفسه بأي حاجة تخليه مايفكرش في اللي اتعلق بيه دا وبس

    ReplyDelete
  3. ربنا يحفظ ابصارنا واسماعنا وارجلنا وايدينا عن الحرام
    ويحفظ قلوبنا من ان يختلط فيها حبه بحب اي شيئ في الدنيا

    ReplyDelete
  4. هههههههههههههه


    يعنى دايما بقول فى المواضيع دى بالذات الحلول النظرية سهلة أوى
    لكن الفعلية مش دايما بتكون بالسهولة دى

    بس جميلة الحلول اللى طرحتها تيمى

    ودايما بيقولوا
    الباب اللى يجيلك من الريح سده وإستريح

    ReplyDelete
  5. جميل الخطوات دى فعلا
    بس بعيد عن الممثلين و خلينا فى الاشخاص
    لو فعلا تخيلت كل اللى انت قولت عليه و بردو لا فائدة تفتكر وقتها يكون اسمه ايه ؟؟
    اصل مش دايما بيكون الموضوع غلط ولا دايما بيكون صح
    ولا انت ايه رأيك ؟؟

    ^_^

    ReplyDelete
  6. حلوة قوى الحلول اللى انتى حطيتها دى ، بس من باب اولى اننا نسمع للقرآن ونغض بصرنا ، وفعلا ضرورى نشغل اوقاتنا باى حاجة مفيده ومثمرة عشان نبعد عن نفسنا الافكار الغريبة والمريبة

    ReplyDelete
  7. ممكن بعد اذنك تعيد نشر الموضوع ده فى مدونتك لتعم الفائدةويكون فى ميزان حسناتك ،وتشارك احبابك فى حصد الحسنات .
    الرابط
    http://eyuon.blogspot.com/2009/11/blog-post_16.html

    ReplyDelete
  8. السلام عليكم
    ازيك يا استاذى الفاضل
    انا شايف ان اول علاج لهذه المشكله الزواج الزواج
    زوجنى تجدنى
    اشكرك

    بعد تصحيح اللغه

    ReplyDelete
  9. سمو الأميرة سارة :

    مش مهم الناس تفكر فيهم بأي طريقة ,
    المهم إن اللي يفكر فيهم ده يخرج من حالة التعلق دي و خلاص , بأنه يحاول يشوه الصورة اللي الشيطان طبعها في رأسه و علقه بيها ,

    تحيتي ..

    ReplyDelete
  10. salma mohamed:

    آآآآآآآآآآآآمين ,
    و كل المسلمين و المسلمات ...

    ReplyDelete
  11. د/عرفه :

    أنا معاك يا محمد إن المواضيع دي بيكون الكلام فيها بعيد عن التطبيق شويتين ,
    لأن - عافانا الله إياكم - أمراض القلب دي بتبقى صعبة شوية ,
    بس بالدعاااااااااااااااء و الدعاء كثيييييييييييييييرا ربنا هيرحم صاحب المرض بإذن الله ,

    ربنا يهيدينا و يهدي الجميع

    ReplyDelete
  12. Sweet Violet

    لو جربنا الخطوات دي و مافيش فايدة ,
    يبقى ده يؤكد الإصابة بالمرض , و ده يبقى اسمه تعلق بالتلاته و مش حب ,
    أما حكاية إنه بيكون غلط أو صح دي , فمن وجهة نظري إنه بيكون غلط على طول ,
    فيه حديث بالنسبة لتعلق الرجل بالمرأة إن " المرأة إذا خرجت استشرفها الشيطان "
    و متهيأ لي الأمر نفسه ممكن يكون بصورة عكسية , إن الشيطان يجمل صورة حد لحد تاني علشان يخليه متعلق بيه و في قلبه ,
    ربنا يعافينا و إياكم

    ReplyDelete
  13. (المهاجر الى الله) :
    فعلا سد باب الذريعة من الأول أسلم , و إننا نغض أبصارنا أحسن من إننا نصاب بالمرض و نشفى منه ,
    و النفس إن لم تشغلها بالطاعة شغلتك بالعصيان ,

    ---------------
    و شكرا جزيلا على الموضوع اللي حضرتك أشرت إليه ,
    و إن شاء الله هنشره في المدونة هنا

    ReplyDelete
  14. محمد فوزي :

    و عليكم السلام و رحمة الله و بركاته ,
    يا عم أنا مش أستاذك الفاضل و لا حاجة ,
    المهم , طالما انت شايف إن زوجني تجدني ,
    يبقى خد بنصيحتي و اشترك في خدمة " زوجني شكرا " :) :)

    بالمناسبة , أنا عاوز أكلمك , أصلهم كلموني النهاردة و قالوا لي عاوزينك بكره علشان أمضي شوية إقرارات :)
    لما أكلمه هقول لك
    سلام

    ReplyDelete
  15. الحمد لله الــــذى
    بحمده تتم الصالحات
    عارف ياتيمى زمااااان
    حصلت لى الحكاية دى وبعدين
    ما أطولش عليك قول طولى انتِ
    وراكِ ايه :)اقولك المهم والمفيد
    شفت الشخص دا بيشرب شاى مجرد
    بيشرب شاى!!!بس بقى خفيت
    الحمد لله خاااااااااالص:)
    وابقى طول ياتيمى وما تخافش
    مش حنزهق من الكلام الحلو دا

    ReplyDelete
  16. لو تخيل كل الاوضاع فى الانسان اللى معجب بيه وغير تفكيره دة حيكون ابر دليل انه من الاول الموضوع لاشيئ

    ReplyDelete
  17. ههههههههههه
    لا مهو أنا عارف رأيك في الحاجات دي
    واشحني يا مقطوع
    إنت إيه أخبارك يا عم إنت؟

    ReplyDelete
  18. norahaty
    أهلا و سهلا بيكي يا دكتورة ,
    و الحمد لله إن تجربتك عدت بسلام ,
    الحمد لله
    و بالنسبة للتطويل , طالما انتوا مش هتزهقوا , يبقى هكتب لكم معلقات هنا :)

    ReplyDelete
  19. همس الحنين :
    فعلا اللي بيُشفى من اللمرض ده بيعرف إنه وهم و مش حقيقي ,
    لكن فيه ناس بتتربس دماغعا و تعيش دور المحب الولهان ,
    الحمد لله الذي عافانا ,

    و جزاكم الله خيرا

    ReplyDelete
  20. د. ياسر عمر عبد الفتاح :
    إيه ده ؟؟
    هو أنا قلت لك و لا إيه ؟؟
    ده الشعب كله عارف بقى !!

    عموما ربنا يخليك ,
    و ادعيلي إني أوحشك أكثر و أشتغل إن شاء الله ,
    انت صحيح رجعت الصيدلية و لا لسة ( زميل ) :)

    ReplyDelete
  21. السلام عليكم تيمي
    أخبارك ايه؟
    يارب تلاقي شغل سريعا ...يكون مناسب ومربح وغير متعب
    بالنسبة للتعلق ده بيحصل فعلا لو الواحد/ه متوقفش عند أول غلطة وهي النظر...المفروض لو حصل...ينفض للموضوع وخلاص وميبصش تاني :)

    أما الحالات المقرفة دي...أمي لما بدأت أدخل على النت من عشر سنين كده كانت بتقولي اوعي تعجبي بكتابات حد ولا شخصيته عن طريق النت ولو حصل تخيلي مثلا انه معقد نفسيا وبينفس عن حاله بالكتابة أو تخيلي انه تخيييييييين جدا أو ريحته وحشة مثلا...:)
    أما في العالم الحقيقي تخيل أن ريحة بقه وحشة...ده كفاية

    ربنا يكرمك يا تيمي ويعزك ويدخلك في الصالحين

    ReplyDelete
  22. ست البنات :
    و عليكم السلام و رحمة الله و بركاته يا أمَ يَحيَى ,
    و بالنسبة للشغل فالحمد لله , فاضل تكّة , ربنا ييسر إن شاء الله ,

    و بالنسبة للمثال الذي ذكرتِ , فصحيح جدا , لأن فعلا كتير من اللي بيكتبوا على النت مش بيكتبوا بضخصياتهم الحقيقية ,
    و نفس المسألة في الواقع , كل واحد بيحاول يجمل نفسه و يخفي عيوبه , و لا يبدي إلا كل حسن , بينما حقيقته غير ذلك ,
    ربنا يعافينا و يهدينا ,
    و جزاكم الله خيرا يا دكتورة

    ReplyDelete
  23. الأخ الفاضل :: TIMMY ::
    صباح الخير ..
    الحب من أول نظرة ..
    وحكاوي وبلاوي الحب ما بتخلصش أبدًا ..

    أعجبت كثيرًا بالموضوع ..

    والمشكلة أن عاشق الصور لا يفكر بمنطق وإنما عن هوى مطلق وهنا تكمن المشكلة ..

    أشكرك مرة أخرى على موضوعك .. بجد استفدت منو ..
    أحلى تحية
    ـــــــــــــــــــــــــ
    الله أكبر الله أكبر لاإله إلا الله
    الله أكبر الله أكبر ولله الحمد

    ReplyDelete
  24. محمد سعد القويري

    اهلا و سهلا بك أخي محمد ,
    صدقت أخي , ففعلا عاشق الصور لا يفكر ,
    و لو فكر للحظة لاكتشف أنه لا يعرف شيئا عن هذا المحبوب سوى وجهه !!!

    جزاك الله خيرا على الرور و التعليق أخي محمد ,

    ReplyDelete
  25. السلام عليكم ورحمة الله وبركاته
    جزاك الله خيرا يا تيمي
    ربنا يكرمك ويعزك يا أخي
    بارك الله فيك

    ReplyDelete
  26. السلام عليكم ورحمة الله وبركاته
    بارك الله فيك يا تيمي
    جزاك الله خيرا يا أخي ونفع الله بك

    ReplyDelete
  27. السلام عليكم

    اخي العزيز

    ايه اخبارك يا تيمي باشا

    واحشني والله

    معلش علي التأخير والتقصير

    كل سنه وانت طيب

    وربنا يباركلك وينفع بيك وبينا الناس

    وعيد سعيد عليك وعلي العائله

    كل سنه وانت طيب

    :)

    ReplyDelete
  28. كل سنة وانت
    طيب ياتيمى

    ReplyDelete
  29. والله فعلا كلام جميل، ودى أفضل طريقة للتغلب على عمى الحب وصممه وبكمه وبرصه :)
    جزاك الله خيرا

    وتقبل الله منا ومنكم صالح الأعمال

    ReplyDelete
  30. كل سنة وإنت طيب تيمى

    وعايز اقولك حاجة بس كده

    إنى أحبك فى الله

    ReplyDelete
  31. جزاك الله خيرا يا باشمهندس .. واحشني جدا والله ووحشتني كتاباتك .. يارب تكون بخير

    ReplyDelete
  32. المدونة دى عظيمة
    اعظم عظمات المدونات :D

    ReplyDelete
  33. تيمي

    فينك

    غايب ليه عننا

    لعل المانع خيرا

    يارب تكون بخير

    وياريت تطمنا عليك

    تحياتي

    ReplyDelete
  34. islamiczawaj :
    بارك الله فينا و إياكم أخي الكريم ,

    و نفعنا الله بما نقول , و علمنا ما ينفعنا , آآآآآآمين

    ReplyDelete
  35. z!zOoOo /

    و عليكم السلام و رحمة الله و بركاته ,

    و عيد سعيد و لو إنها فعلا متأخرة جدا ,

    أنا الحمد لله بخير ,
    بس محتاج الدعاء بجد ,

    ادع لي إن ربنا يُصلح لي شأني كله ,

    و ربنا يهدينا و يهدي الجميع ,

    و شكار جزيلا على السؤال و المتابعة يا زيزو :)

    في أمان الله

    ReplyDelete
  36. norahaty /

    و حضرتك طيبة و بخير يا دكتورة

    ReplyDelete
  37. مجرد مدونة :

    جزانا و إياكم أخي الكريم ,

    و تقبل الله منا و منكم

    ReplyDelete
  38. د/عرفه :

    و انت طيب يا محمد ,
    و أحبك الذي أحببتني فيه ,

    لكن أرجو ألا تتعجل , فأنت لا تعرفني حتى تحبني , و لو عرفتني على الحقيقة أظنك قد تكرهني
    ده للعلم فقط

    ReplyDelete
  39. سمو الامير :

    جزانا و إياكم يا أحمد ,
    و انت كمان واحشني و الله ,
    و ياريت ترجع تكتب في المدونة بتاعتك تاني ,

    و كل عام أنت بخير ,,

    ReplyDelete
  40. سندس وأمل

    كالعادة إيه بس ,
    ربنا يغفر لنا مالا تعلمون ,
    و ينفعنا بما نكتب , وجزاكم الله خيرا

    ReplyDelete
  41. غير معرف /

    عظيمة إيه بس يا عم ,
    ربنا يستر علينا ,
    ادع لي بس ربنا يكرمك لو المدونة عجبتك ,

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ