زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

19 February, 2009

ابتسم زي العبيط ... و كله هيتظبط تظبيط !!


عمرك رحت للدكتور و كنت تعبان و بعد ما خلص كشف
راح ( حاطط إيده على كتفك ) و قال لك :
يابني انت سليم , ما عندكش حاجة عضوية ,
الألم اللي عندك ده ( نفسي ) !!
تا تا تا تااااااااااااا

عموما لو ما حصلكش , فيه ناس تانية حصل لهم


المهم يعني , عمرك سمعت عن مرض عضوي كان أصله نفسي ؟؟ (*)

أكيد سمعت ..

طيب عمرك سمعت عن العكس ؟؟

إن وضعك العضوي ,المادي , الملموس ممكن يأثر على حالتك النفسية ؟؟

طبعا هتقول لي : إزاي ؟؟


هقول لك يا سيدي :

ارجع بالكرسي اللي انت عليه لورا شوية ..
اثني ظهرك ..
ضع كوعك على رجلك ..
ضع خدك على إيدك ..
انظر للأرض ..

هاه .. حاسس بإيه دلوقتي ؟؟

أكيد افتكرت موقف وحش ,
أو مشكلة قديمة ( هفّت عليك ) ,
أو جالك إحساس وحش أو .... إلخ,

صح ؟؟


طيب دلوقتي نجرب حاجة تانية ,

رجع ظهرك لورا ,
افرد ظهرك ,
انظر لأعلى بزاوية 45 - و ما تسألش ليه -
,
ارسم ابتسامة عريضة بشفايفك ... ياعم ارسمها و خلاص ,

هاه , جاهز ؟؟

دلوقتي افتكر أي موقف وحش في حياة جنابك الكئيبة ...

لا لا , سيب الوضع و الابتسامة و كل حاجة زي ما هي,

.
.
.

العملية مش نافعة , صح ؟؟

لييييييييييييييه ؟؟


لأن جسمك في وضع ( إيجابي ) ,
يعني في الوضع اللي عادة بيكون فيه بيفكر فيه تفكير إيجابي ,
فمش قادر يفكر تفكير سلبي ,



علشان كده هيئتك و وضعك المادي المحسوس ده ممكن جدا يأثر في حالتك النفسية ,

و فيه مقوله عاجباني جدا للإمام الشافعي بيقول فيها :
(
من نظف ثوبه قلَّ همّه , و من طاب ريحه زاد عقله ) (**) ,

تخيل نفسك كده ( واخد دُش ) و لابس (الحتة اللي على الحبل) و الهدوم مكوية و نظيفة و آخر تمام , و حاطط ريحة - للصبيان بس - و آخر جمال ,


تخيل نفسك في الوضع ده و شوف تفكيرك و تعاملك و حياتك هتكون إزاي ؟؟

و تخيل نفسك العكس برضه ,

أكيد أكيد وضع جسمك و هدومك و جلستك و مشيتك و ..... إلخ ,
كل الحاجات دي بتأثر على حالتك النفسية و على ( دماغ جنابك العالي ) ,


علشان كد لما تلاقي نفسك داخل على نوبة اكتئاب و لا حاجة ,
لازم ( تلبي نداء الطشت ) و تقوم تستحمى ,
و تلبس نظيف و تسرح شعرك و تحط ريحة و تظبط نفسك كده ,

أو على الأقل تعدل من طريقة جلوسك و تبص للسقف و تبتسم زي العبيط كده , و كله هيتظبط تظبيط ,


بس خلاص , رجّع ظهرك لورا و إلزق ابتسامه على وشك ,
و شوف إن كنت هتعلّق و لا هتقفل , و لا شوف انت رايح فين بالظبط .

سلام


و لا تنسوا كاتب الموضوع الأصلي -اللي هو أنا طالما الموضوع في المدونة- من دعوة صالحة
إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<
لو رأيت إنه يستحق النشر
و ياريت تذكر رابط المدونة :

أو على الأقل تذكر إنه : :
" منقول
من مدونة تظبيط "
......................

تحيتي

.....




ــــــــــــــــــــــــــــــــــــــــــــــــــــــــــــــــ

(*) و فيه آلام عضوية أصلها نفسي ,
على ما أذكر زي حاجة اسمها (hysterical globes) إنك بتحس بحاجة واقفة في زورك


(**) ملحوظة بره الكلام :
كان فيه كلام لابن تيمية - رحمه الله - عن إن اللي بيلبس زي العسكر بيتصرف زيهم و اللي بيلبس زي معين و هيئة معينة بيتصرف زي أهلها ,
ياريت لو حد عارفه أو عارف حتى جملة منه يقولها لي علشان أضيفها ,


64 comments:

  1. هههههههههههههههههههههههههه
    بوست دكه خفيف خالص
    بس فيه اخطاء كتييييييير جدا
    اولا انا لما بصيت لتحت مقدرتش اكمل بقيت البوست
    فاضريت اني اتعدل عشان اقدر اكمله
    ونفس الوضع لما بصيت 45 درجه لفوق
    وقولت طيب لازم اعاندك وبصيت لفوق وافتكرت موقف وحش
    اصل العند وحش بعيد عندك

    هههههههههههههههه
    لا بجد فعلا كلامك فيه قدر كبير جدا من المنطق والواقع
    مظبووووووووووووووووووط

    تحياتي

    ReplyDelete
  2. ههههههههههههههههه

    نفسي اقولك على حاجة بس متزعلش

    يخرب بيت دماغك العالية ههههههههههه

    والله بوست جاي في وقته يا تيمي

    ربنا يجازيك عنا كل خير

    ReplyDelete
  3. هههههههههههههههههههههههههههههه
    كل هيتظبط تظبيط يامان
    حلو قوى الموضوع والدماغ عاملة شغل جامد
    دمت بكل الود

    ReplyDelete
  4. ههههههههه
    جميل أووووى البوست دة و صحيح تماما
    تصور حضرتك ممكن ناس تدخل فى غيبوبة لسنوات بدون سبب عضوى وتكون عملية الإفاقة من الغيبوبة مقرونة برغبة المريض فقط فى العودة من عالم اللاوعى مرة آخرى......بجد البوست أكتر من رائع
    ابتسم تبتسم لك الحياة:)
    بس فى حاجات معينة لازم نكتئب فيها والا مش هيبقى عندنا دم يعنى!!
    بس زعلنا يكون ايجابى يعنى يدفعنا لقدام
    رغيت كتير..صح؟؟!!
    يللا مش همسح حاجة
    فى امان الله

    ReplyDelete
  5. لالالالالالالالالالالا


    مش ينفع كدا يا عم الحاج افتح بلوجك ولا
    www.2knowmyself.com

    ههههههههه

    بجد بوست جامد

    مش قلت حتبقا ع النت امتا
    انا على طول ببقا يوم الخميس والجمعه

    بتوقيت التعليق دا

    يلا سلام كفايه كدا

    ReplyDelete
  6. السلام عليكم
    على فكرة أنا قربت أحسدك :)
    مفيش وسط خالص ياإما كل شهر بوست يا إما كل يوم...حاجة جامدة جدا بصراحة (ما شاء الله)

    بالنسبة للموضوع هو جامد جدا وكلنا محتاجينه ... أنا مثلا ساعات لما بلاقي حد متنرفز بابتسم له لكن للأسف الموضوع ده بيغيظ ناس كتير :)
    بس بحاول أهدي الجو
    اليومين دول الناس كرمشت من كتر التكشير

    تحياتي بجد
    تدوينة لطيفة جدا

    ReplyDelete
  7. it is all about the will,if you want to be happy really from your heart you will be happy but if you want be sad nothing in the whole world would even but a smile on your face

    we just have to stop that feeling and remember that we choose how to be

    nice post as usual

    ReplyDelete
  8. والله أنا لسه جاى من عند الدكتور
    بس مش حاجة نفسية والله .. أنا بكامل قواى العقلية (مقارنةً بالصيادلة اللى زيى بس)

    لكن كلامك سليم .. والحالة النفسية للمريض مهمة جداً

    لما بيجوا يعملوا دواء معين مش بيدوا لكل الناس دواء
    فيه ناس بياخدوا هوا .. كبسولات فاضية
    وبتتسمى بلاسيبو
    علشان يقيسوا النسبة النفسية
    لأنها بتأثر بالسلب أو الإيجاب على تقدم العلاج بشكل كبير

    رغيت كثير أنا عارف .. بس ما صدقت لقيت حاجة بفهم فيها(والحاجات بينى وبينك قليلة بس متقلش لحد)

    دمك خفيف بجد .. وأسلوبك رائع وراقى
    تسلم ايدك

    ReplyDelete
  9. سمو الأمير :

    جزانا الله خيرا و إياكم ,

    و انت عارف و لله يا أحمد هي مش عملية دماغ عالية و لا دياولوا !!

    أنا أصلا طالع من نوبة احتئاب من كام يوم :( ,

    فبحاول أنصح نفسي بنصحي لغيري .. بس كده !!

    إنما أنا مش إبراهيم الفقي و لا حسن شحاته - و ما تسألش إيه دخل حسن شحاته -

    تحيتي :)

    ReplyDelete
  10. مذكرات مشاغب :

    آه بالنسبة للأخطاء لما بصيت تحت و بـ45 درجة , دي مش مشكلتي , دي مشكلتك إن الكمبيوتر بتاعك مش " حِرِك " و بيعرف يتصرف :) و يطلع فوق و ينزل تحت مع عينيك :)


    و بالنسبة للموقف الوحش اللي تفتكره .. مش شرط يكون وحش قوي يعني :) ..

    لا بجد بقى : قصدي انت افتكرت الموقف الوحش , بس تأثيره علي كان مش زي العادة حتى بالأمارة انت بتهزر أهه , يبقى الموقف ما أثرش عليك :)

    عموما ربنا يكرمنا و إياك , و يبعد عننا المواقف الوحشة , و ما نحتاجش نبص بـ45 درجة :)

    تحيتي - واحدة بس :) -

    ReplyDelete
  11. محمد غاليا :

    منورني و الله يا محمد ,

    هي الدماغ مش عاملة شغل و لا حاجة :)

    ربنا يستر علينا :) ,

    تحيتي لك :)

    ReplyDelete
  12. موناليزا :

    الحمد لله إن معايا الحق :)

    شكرا جزيلا للمرور ,

    تحيتي

    ReplyDelete
  13. د/ماجدولين :

    شكرا جزيلا على المرور و الإضافات القيمة ,
    أنا سمعت فعلا عن الغيبوية و الحاجات دي ,
    و حتى سألت عن اللي عاوز يدخلها يعمل إيه :) ,
    ساعات الواحد بيحس إنهم محظوظين في إنهم لقوا طريقة للخروج من الكآبة و لو حتى إلى غيبوبة , المهم إنهم " نفدوا بجلدهم " و خلاص , و ساعات بيحس بالشفقة عليهم لضعفهم ,
    ربنا يهدي و يوفق الجميع إن شاء الله ,

    و بالنسبة للحاجات اللي لازم نكتئب فيها اكتئاب إيجابي , فمعاكي حق , و متهيأ لي كنت اتكلمت علي حاجة زي كده في بوست قديم اسمه " كن عبيطا ترى الوجود جميلا " :) ,

    ما رغيتيش كتير و لا حاجة , أنا رغيت أكثر :) ,
    و أعتذر عن صيغة التذكير التي تحدثت بها في الموضوع الماضي ,

    شكرا جزيلا على المرور ,

    في أمان الله

    ReplyDelete
  14. المبرمج المحترف :

    العملية سهله خالص يا عمر ,
    افتح الموقع التاني طبعا :)

    و عاوزك تحمل لي منه الكتاب بتاع :
    getting over depression , mood swing, and bad moods
    لأن شكله عجبني جدا و الكلام عليه برضه , بس اللي يدفع بقى و يحمله :)

    و بالنسبة لمواعيدي على النت , بص يا عم عمر , أنا راجل عاطل على ذمة القوات المسلحة لمدة شهرين جايين كمان , بدخل غالبا بعد الفجر و قبل الظهر , غير كده بقى بيبقى عشوائي :) ,
    و عموما انت قلت بتقعد خميس و جمعة , هحاول أفتح إن شاء الله كل ما أقعد ,

    و ما تنساش , عاوز الكتاب الي فوق ده :)

    ReplyDelete
  15. أحمد سعيد بسيوني :

    شكرا جزيلا على المرور ,

    و الحمد لله إن الومضوع عجبه بدرجة " هههههه" :)

    نورتنا يا أبوحميد :)

    تحيتي

    ReplyDelete
  16. ست البنات :

    و عليكم السلام و رحمة الله و بركاته يا دكتورة ,

    معلش بقى , أصل حضرتك مش عارفه هي البوستات بتيجي إزاي :( ,

    و بينبي و بينك , لو أنا متنرفز و لقيت حد بيضحك ... ده أنا أفجره :)

    أنا المفروض أخليه يحاول يضحك و لو على سبيل المجاز , يغير عضلات وشه بس , و إن شاء الله حالته هتتظبط :)

    شكرا جزيلا على المرور يا دكتورة ,

    تحيتي .. بجد برضه :)

    ReplyDelete
  17. someone:
    اسمحيلي هتكلم بالعربي علشان " أفتح في الكلام " :) ,
    أنا عارف إن الأمر أولا و أخيرا بيكون نابع من رغب الإنسان إنه يكون سعيد و لا لأ ,

    و طبعا أنا إنسان كئيب و مجرب إن الواحد لما يكون " في الحالة " , بيبقى مش عاوز يكون سعيد أصلا ,

    و بيكون شايف إن الدنيا كئيبة و إن الطبيعي إنه يكون مكتئب و إن الناس الفرحانة و المبسوطة دي ناس عبيطة , و عما قليل هياخدوا على دماغهم و هيعرفوا إنهم هبل ,

    المهم مرة قرأت عبارة ساعدت على تغييري ,
    بتقول : اضحك يضحك العالم معك...وابك تبك وحدك.

    بصراحة العبارة دي وقفتني شوية ,

    طيب ماشي , أنا شايف الدنيا على حقيقتها الكئيبة , و شايف المشاكل حواليا فلازم اكتئب ,

    طيب ما أنا هكتئب " لوحدي " و الناس كلها فرحان أو على الأقل عايشة عادي ,
    طيب ما أنا الخسران و انا مكتئب كده ,

    لأني مكتئب ,
    و ما حدش حاسس بيا ,
    و الاكتئاب مش بيقدم أي حل للمشكلة !!

    يعني أنا أصلا ما كنتش عاوز , و ما كانش عندي الرغب في إني أكون سعيد .. لأي أسباب ,

    طيب ما أجرب " أعوز " أكون سعيد شوية و أجرب الحال شكله إيه ؟؟

    جربي تكوني تكوني مبسوطة و شوفي الحال هيبقى شكله إيه ,
    و آديكي جربتي تكوني مكتئبة و ما حدش كان بيهتم بيكي ,

    متهيأ لي أن ارغيت كتير علشان أخلي حكاية الـwill دي تيجي ,

    و يارب تنفع :)

    and remember , if U want to want something , U already want it !!

    ReplyDelete
  18. د. ياسر :

    لا ألف سلامة عليك يا دكتور ياسر :) ,
    سواء سلامة " بدنية " أو حتى " عقلية " :)

    لا رغيت و لا حاجة يا دكترو ياسر , بالعكس الواحد استفاد معلومة البلاسيبو دي , أهي حاجة الواحد يتفزلك بيها على زمايلي من " ذوات البالطو الأبيض " :)
    نفسي ترغي كتير بجد على طول :)

    شكرا جزيلا على المرور بجد ,
    جزاك الله خيرا ,

    تحيتي :)

    ReplyDelete
  19. عمق ثقافي
    شغف للمعرفة
    رأي صائب ,, وتحليل صيـّب

    ::::::
    استمتعت جدا بوجهة نظرك ,واستفدت أكثر بكبسولات التفاؤل وجالبات الأمل.

    (النظرة الايجابية ,, والنظرة السودوية)

    فلعل واجبنا أن نضحك لبعض ,, بدل من أن يبكي كل واحد بمفرده

    ReplyDelete
  20. ايه ده؟
    11واحد علقوا ؟طب امتى ؟
    كانوا بايتين هنا وانا معرفش؟
    فعلا فيه وقت ما ينفعش فيه الا
    (الطشت) او البانيو لاننا
    بعنا الطشت من زمان!
    وجبنا اراوانّة:)
    واتحداك انك تعرف
    يعنى ايه اروانّة
    من غير مساعدة
    صديق اوزميل
    ومن غير
    اختيارات؟

    ReplyDelete
  21. بص يا عمنا
    لو عاوزنى أيلك تانى
    متقليش يا دكتور ياسر

    هوه أنا باين عليا إنى عجوز؟
    على فكرة أنا شفت سنك وأنا قدك بالظبط

    ReplyDelete
  22. ايه ده
    المشكله انى وانا بقرا عماله ابتسم
    ومش عارفه ابطل
    ف بلاش ابتسم زى العبيط دى

    على العموم موضوع جميل بجد
    وفعلا الحاله النفسيه بتاثر عضويا وممكن تدى اعراض اى مرض
    تصور؟

    والعكس صحيح
    بس موضوع الوضعيه ده تاثير لحظى يعنى شويه صغننه وهيعدى

    وبس

    شكرا

    ReplyDelete
  23. هههههههههههههههههههههههههههه


    ماشي يا عم انا هعمل كده بس لو كنت بره البيت اعمل ايه

    :d

    ReplyDelete
  24. تخيل نفسك كده ( واخد دُش )
    عارف الشكل اللى جنب الجملة دي وعمال اسك منديل وبيعمل يه
    عسل عسل عسل وتحسه فرحان انه مستحمي
    انا علي فكرة قريتها امبارح بس اول ما جيت اخد الوش ده كوبي عشان احطهولك في التعليق واقولك عليه جهازي هنج وقفل لوحده
    بس مطلعتش انت السبب
    ومطلعش الشكل بيظهر في التعليقات
    ماشي يا عم يا بتاع البرمجة اللغوية العصبية انت
    وتوشكر علي الكام نصيحة
    هنلبي نداء التشط بعد كده

    وحلوة حركة الهوامش اللى انت عاملها دي
    انت يا راجل انت تنفع تعمل راجستير وتكمل دراسات
    صدقني
    طالما بتحب الهوامش يبقه عليك وعلي الدراسات العليا

    ReplyDelete
  25. جميل ماشاء الله
    هههههههههههههه هههههههههههه بجد بجد تحفة ..فعلا ده بيحصل كتير تروح للدكتور أيام الامتحانات بسنانك وهيا زى الفل وتقوله ألم فظيع :) وبالمثل تقعد مرتاح فى جلسة وأنت تأكل شيكولاته تحس إن الكون كله يغرد وعكسها لما تكون متنرفز تحس انك مكموش وحاسس انك قصير مثلا :)

    ربنا يحفظ حضرتك وينفع بك
    عن طلب حضرتك حاضر جارى البحث ولعلنا نجد تلك الكلمات إن شاء الله
    جزاك الله خيرا ودمت بأمان الله

    ReplyDelete
  26. TIMMY !!

    ينصر دينك :)

    قبل سنوات عدة، اخذت دورة اسمها "الإيحاء والإيماء"

    دورة حاجة جميلة خالص، بإختصار بتتعلم فيها الإنتباه لحركات جسمك وحركات الآخرين علشان تنفع فيها نفسك عند اتصالك بخلق الله (وتنفع الناس كمان)

    فعلا

    الحركة تولد الفكرة والفكرة تولد الحركة

    يا اخي الشافعي رضي الله عنه حاجة محصلتش

    ReplyDelete
  27. ههههههههههههههههههههههههههههههههه

    هههههههههههههههههههههههههههههههه

    صراحه تجنبا للبوست انا نزلت ضحك على

    الصور...وكمان البوست...ربنا يحمى حضرتك....

    سلام احسن الواحد هيفطس

    سندس

    ReplyDelete
  28. السلام عليكم
    كلام حلو اوي
    وفي جزء كبير من المصداقيه,
    بس للاسف مش بينفع مع الناس اللي غاوية غم مافيش حاجه هتاثر معاهم بس هما حرين جابوه لنفسهم,
    اما موضوع الاستحمام واللبس والتسريح ففعلا بيجيبوا نتيجة هايلة,
    عن نفسي ساعات لما بكون مكتئبة باعمل ريفرش,واقوم احط ميكب وسيب شعري وغير لبسي و....,وفعلا بيتغير مودي(:

    ReplyDelete
  29. السلام عليكم

    اقولك برضو بسمتزعلش


    يخرب بيت دملغك العالية

    انا معملتش حاجة من اللى قلت عليهم

    احسن يكون مقلب

    ههههههههههههههه


    عامة

    ربنا يصلح حال الجميع

    تحيتى

    ReplyDelete
  30. بوست جميل واسلوب رائع

    وعندك حق

    بس بلاش زي العبيط ديه

    مش ناقصين

    غربتي

    ReplyDelete
  31. كلام جميل ياتيممى ..بس كده لو عرفوا انك ضليع فى أحوال النفسوعضوية حيجندوك يا حبيبى خدمات طبية ويفتحولك قسم ابتسامات عساكر يعنى يجيبولك عساكر مكتئبة وانت تحطلهم زراجين ابتسامية فى بؤهم وتثبته فى وضع ابتسام 4 أيام وبعدين تفك الزرجينة ..وممكن تطلب كرسى أسنان لزوم الجعصة لورا المصاحبة للابتسام ابو زرجينة ويبقى علاج غير مسبوق

    ReplyDelete
  32. السلام عليكم

    تيمي ازيك يارب تكون بخير

    عندك حق فعلا والبوست جاي في وقته

    بس انا عندي سؤال ؟؟

    طيب الي عندهم الميه مقطوعه يعمل ايه؟؟

    طيب والي معندوش طشت ولا قروانه :) يعمل ايه

    اقولك هنزل استحمي في العمومي ههههههههههههههههههه ولا في نافوره ههههههههههههه

    مش هقولك متزعلش

    بس يخرب عقلك دماغك عاليه فعلا

    وبيني وبينك ومن قلبي ربنا يديمها عليك نعمه

    يلا عايزين شغل أكتر

    دمت بكل ود

    تحياتي

    ReplyDelete
  33. على فكره حد قالك ان مدونتك مبهره ؟

    دمت مبدعاً

    نفسى اعرف الوجوه التعبيريه بتعملها ازاى :D

    ReplyDelete
  34. تيمى

    والله يا تيمى بوستك دة روووووووووووووعة بجد
    وفعلا الدش بجد بيغير الحالة النفسية 180 درجة

    ReplyDelete
  35. بلاش تولديني :

    مش لدرجة العمق و الشغف و الحاجات دي :)

    مش هطول في الرد عليك ,

    بس مش عارف ليه حاسس إني عاوز أعرفك أكثر و أكثر ,
    بجد حاسس إنك شبهي , في مرحلة ما !!

    ReplyDelete
  36. دكتورة نور :

    معلش بقى , مرة من نفسي الناس تتخانق عليا :)

    و بالمناسة , أنا عارف " روانة " يعني إيه :)

    ياريتك كنتي عملتي جايزة :)

    ReplyDelete
  37. يااااااااسر حاااااف :)

    ماشي يا عم ياسر ,
    و أنا يعني هعرف منين إنك قدي ؟
    ما انت مش كاتب عمرك ,
    و بعدين عامل فيها كبير و كتب اسمك الثلاثي و د. و شغل كبير كده :)

    ماشي يا أبو ياسر :)

    ReplyDelete
  38. دينا :
    معلش بقى ,
    أصل القافية حكمت :)

    بالنسبة لوضوع الوضعية ,
    هو بيأثر قليل لو احنا عاوزين نتغير بيه ,
    لكن قصدي إنه بيغير من حالتنا لما نقعد من غير ما ناخد بالنا ..

    تحيتي :)

    ReplyDelete
  39. حسن حنفي :

    ماشي يا أبو علي ,
    لو كنت بره البيت ... بص للسما :)
    بجد بص للسما و هتحس بشعور غريب ,
    و ياسلام لو بصيت للنجوم بالليل ,

    بص و ادعيلي .. بجد و الله مش بهزر

    ReplyDelete
  40. مها زين :
    معلش بقى ,
    الوشوش مش بتطلع في التعليقات :(
    و الحمد لله غن الموضوع عجبك , بكلامه و بوشوشه :)

    و بالنسبة للهوامش ,
    ادعيلنا , هنفكر نقدم تمهيدي إن شاء الله بس بعد ما ناخد الإذن من الكلية الأول ,
    ربنا يسهل و يقدم اللي فيه الخير ..

    ReplyDelete
  41. خديجة عبد الله :

    الحمد لله إن الموضوع عجبك ,
    فعلا أنا لسه والدتي حاكية لي امبارح عن بنت واحدة زميلتها في الثانوية و عندها مرض عضوي مالهوش تفسير غير إنه نفسي ,
    ربنا يعافينا و يشفينا , و يحفظنا و إياكم ,

    و بالنسبة للطلب .. في انتظار نتيجة البحث ,
    و بالنسبة للأخ اللي هناك ,
    فإنتي عرفتي الرد قبل ما أقوله : ما تشغليش بالك :)
    و أظنك عرفتي خلاص :)

    تحيتي ..

    ReplyDelete
  42. ولد الديرة :

    منورنا و الله ,
    و ياسلام عليك و انت بتتكلم اللهجة المصرية دكه :)

    و شكرا على المقولة الجديدة المفيدة : " الحركة تولد الفكرة و الفكرة تولد الحركة

    و ربنا يرحم أئمتنا أجمعين و كل من له فضل علينا .

    ReplyDelete
  43. سندسن و أمل :

    سندس بس قصدي :)

    هههههههههههه
    أنا اللي شكلي هفطس من تعليقك :) ,
    شكل البوست كان ليه تأثير كبير قوي عليكي :)

    ربنا يستر :)

    سلام عليكم

    ReplyDelete
  44. سلمى محمد :

    و عليكم السلام و رحمة الله

    هو معاكي إن الواحد الغاوي غم مافيش حاجة تفرق معاه ,
    بس هو قدامه خيارين على حسب ما فيه مقولة بتقول :

    ابتسم تبتسم لك الدنيا
    و ابك تبك وحدك !!

    و فعلا تغيير الوضع و الحالة لو حتى تسريحة الشعر بيغير نفسية الواحد ..

    تحيتي :)

    ReplyDelete
  45. المحارب المتيم :

    و عليكم السلام و رحمة الله

    يا عم و الله دماغي ما هي زي ما انت فاكر
    ربنا يستر علينا :)

    أنا مش بكتب إلا لو حاجة كانت مبوظاني أو ما شابه

    يعني مجرب كل سوء !!

    ربنا يهدينا
    و يصلح حالنا
    و شكرا جزيلا على مرورك :)

    تحيتي :)

    ReplyDelete
  46. غربتي :

    شكرا جزيلا على المرور

    و الحمد لله إن البوست عجبك ,

    و معلش بقى , زي العبيط دي جات علشان القافية :)

    تحيتي :)

    ReplyDelete
  47. قاعد فاشخ ضبي على الأخر اهو ومبتسم

    بس المشكله مش عارف هو الأنبساط علشان القعده ولا بعد ما قرات البوست
    يا فقري
    ههههههههههههههههههه

    عموما هاجرب بعد كده الطريقه دي
    تشكر على النصيحه

    سلاااااااااااااااااااااااام
    اخوك ايهاب

    ReplyDelete
  48. ياتيمى انا ماقلتش روانة
    انا قلت أروانّة شفت ازاى!
    أ ر ا و ا نّ ة!!!!
    روانة دى نوع من الحلوى
    اى المعجنات لاجل ما اوريك
    ان احنا بنعرف عربى يعنى مش
    انت بس:)

    ReplyDelete
  49. و أنا يعني هعرف منين إنك قدي ؟
    ما انت مش كاتب عمرك ,
    و بعدين عامل فيها كبير و كتب اسمك الثلاثي و د. و شغل كبير كده :)



    هوه ده الجديد
    أصل أنا متخفى ..

    ReplyDelete
  50. ماكس بتاع زمان :

    شكرا جزيلا على مرورك أستاذي المهندس الظابط الفاضل :) ,

    بالنسة إنهم يحولونوا قوافل طبية لو قرأوا الكلام ده ؟؟ بعيدة قوي ,
    تعرف حضرتك أنا أصلا نازل لائق ب في النفسية :( , يعني بايظ خالص , هم اللي جنوا على نفسهم و دخلوني ظابط :)

    ReplyDelete
  51. z!zOoOo

    و عليكم السلام و رحمة الله ,

    كيف أحوالك يا راجل ؟؟ :)

    بالنسبة لحالة فقد الماء أو التشط أو أحد الأدوات ,

    في أي ترعة و لا بحر و ما تقلقش :)

    و الحمد لله إنك أول واحد تدعي لدماغي و ما تدعيش عليها :)

    ReplyDelete
  52. حسام يحيى ,

    شكرا جزيلا على المرور و مش لدرجة " مبهرة " يعني :) ,

    بالنسبة للوشوش فبكتب الموضوع في أي منتدى و آخده كوبي :)
    شفت ؟؟
    سهله خالص :)

    ReplyDelete
  53. جيهان :

    أهلا و سهلا بيكي ,

    و شكرا على المرور و التعليق ,

    بالفعل الدش بيصنع .... مش معجزات يعني بس بيصنع كتير :)

    ReplyDelete
  54. الشنكبوتي الكبييييير :

    إزيك يا إيهاب :)

    يا راجل خليك مبسوط و ماتسألش ليه ,
    المهم تبقى مبسوط و خلاص :)

    جرب و ابقى قل لي :)

    تحيتي

    ReplyDelete
  55. دكتورة نور :

    معلش بقى ,
    غلطة في الاسبلنج :)

    بصراحة ان اما اعرفش روانة دي يعني إيه غير من حضرتك ,يعني لو على العربي يبقى أنا فيها ميح :)

    لكن أروانة تعني " طشت معدني " :) صح ؟؟

    ReplyDelete
  56. ياسر , ,, حاف برضه :)

    يا راجل بقى التخفي تجيب اسمك ثلاثي !!!

    أمال اللي يعرفوك بقى ؟؟ بتقول لهم شجرة العائلة و لا إيه ؟؟؟ :)

    ReplyDelete
  57. السلام عليك أيها الباش مهندس


    ,,
    أنا إيميلي demaagh@yahoo.com

    حاولت أجيب إيميلك من الجنب (الحتة اللى في الجنب عندك ,,لا لا مش الطحال,,أقصد جنب المدونة)

    بس الظاهر جنبها كان واجعها ,,


    المهم ألف سلامة عليك من انفصاخ الشخصية ,, ولو تعرف إلى فيها (كلنا منفصخييين شخصيا),,

    دنيا غدارة,
    مستنيك

    ReplyDelete
  58. بلاش تولديني :

    و عليكم السلام أيها الرفيق :) , و لا بلاش رفيق دي مش بتاعتنا , خليها يا أخي أحسن :)

    تمت إضافة الميل , و في انتظار موافقة سعادتك عليه :) ثم أن يلتقي كلانا ,

    و معلش هبقى أضيف الميل في الجنب :)

    ReplyDelete
  59. تيمى

    بجد و الله موضوع جميل قوى هههههههههههه

    ودمه خفيف و غير كده ماشاء الله ليك طريقه جميله فى توصيل المعلومه

    تحياتى

    ReplyDelete
  60. زينب :

    شكرا جزيلا للمرور و التعليق ,
    و الحمد لله إن المووضع ما كانش ممل و عجبك ,

    تحيتي ..

    ReplyDelete
  61. سلامو عليكم
    جزاك الله خيراً على الموضوع الجميل. فعلا المظهر الرث يوقعك في حلقة مفرغة من الاكتئاب فهو يؤدي إلى سوء المزاج وسوء المزاج يؤدي إلى التكاسل عن تغير المظهر وهذا التكاسل بدوره يؤدي إلى ازياد سوء المزاج وهكذا .......

    ReplyDelete
  62. thinking man :

    و عليكم السلام يا باشمهندس أحمد ,

    فعلا زي ما حضرتك قلت ,
    هي حلقة ما بين الحالة المزاجية و الحالة الجسدية

    و شكرا جزيلا على مرورك أستاذي الكريم ,

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ