زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

28 February, 2009

ـ شخبط شخابيط ... و مش هتسرح أكيد !! ـ



الموقف ده أكيد حصل معاك قبل كده :

جنابك قاعد بتسمع المدرس ,
جنابك مخنوق و زهقان و ملان ,
جنابك عمال تشخبط بالقلم في الكتاب أو الكراسة اللي مفتوحة قدامك ,

ثم ....
.
.
.
.

" سرحان في إيه يا ولد , ركز في اللي قدامك "
- صوت المدرس - !!

الجديد في الموضوع ده إن اللي جنابك عملته ده هو ( عين العقل ) ,

و إن الكتابة العشوائية أو الشخبطة أو الرسم العابث - doodling - دي بتساعد مخك علشان تركز و ما تسرحش !!

ده اللي أثبتته دراسة في المملكة التي غربت عنها الشمس - بريطانيا - على مجموعة من الناس ,
قاموا بإملائهم مجموعة من أسماء الأشخاص و أسماء الأماكن لمدة دقيقتين و نصف ,

بعضهم طُلب منه ( يشخبط ) و هو بيسمع ,
و الآخر يسمع و يركز ,...

و كانت النتيجة :
اللي كانوا بيشخبطوا افتكروا بمعدل 7.8 اسماً
اللي كانوا مركزين افتكروا بمعدل 5.8 اسماً ,

و وجدوا إن الشخبطة - doodling - يتعلي نسبة استرجاع المعلومات بنسبة 29%


طيب إزاي يعني ؟؟
أسرح علشان أركز ؟؟ !!
إيه التفسير العلمي للكلام ده ؟؟

الطريقة بسهولة : إن نشاط بسيط زي الشخبطة - doodling - ,
أدى إلى وقف أحلام اليقظة -daydreaming - و السرحان - اللي كانت بتأثر على عملية الإدراك - ,

بدون تأثير عملية الشخبطة على عملية الإدراك الرئيسية - سماع الأسامي أو التركيز في الفصل أو ... -



خلاصة القول :

 الشخبطة تعمل كمضاد للسرحان ,
و ليست كجالب للتركيز

بس خلاص !!


مقال كنت قرأته في الياهوو :

http://health.yahoo.com/news/healthd...elpmemory.html

و عجبني ,
قلت أترجمة و أحطه في (تظبيط)

بانر المدونة

تحيتي ,



و لا تنسوا كاتب الموضوع الأصلي من دعوة صالحة
إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<
لو رأيت إنه يستحق النشر

بس ياريت تذكر رابط المدونة :
أو على الأقل تذكر إنه : :
" منقول من مدونة تظبيط "
......................

تحيتي

39 comments:

  1. د. ياسر عمر عبد الفتاحFebruary 28, 2009 at 5:03 PM

    طيب ما طول عمرنا بنشخبط .. وعمرنا ما فهمنا
    احم .. قصدى يعنى نادراً ما بنفهم
    يا عم يعنى ساعات مبنفهمش
    وبعدين هوه احنا هناخد على كلام الدكاترة

    قال شخبط علشان تفهم قال
    دى عالم فاضية

    بس على العموم تسلم يا تيمى يا متخفى

    ReplyDelete
  2. mohamed ghaliaFebruary 28, 2009 at 6:42 PM

    دا الواحد يسرح ويشخبط على طول بعد كده
    دمت بكل الود أخى

    ReplyDelete
  3. سمو الاميرFebruary 28, 2009 at 7:31 PM

    أومال أنا ليه مبفهمش بردو مع إن جنابي مش عاتق الكشاكيل من الشخبطة والبهدلة ومليانة حاجات ملهاش لازمة

    بس أنا متأكد ان العيب مش في الذاكرة ولا الشخبطة ولا الكشاكيل

    العيب في اللي بي .... تييييييت

    بلاش اتكلم أحسن ياودوني ورا الشمس

    خلينا نمشي ( تحت ) الحيط لغاية ما نتخرج

    وبعدين هاقولك ع السبب

    بس ادعيلي ربنا يدينا ويديك طولة العمر :)

    ReplyDelete
  4. خديجة عبداللهFebruary 28, 2009 at 9:00 PM

    بحب الأبحاث من النوع ده :)
    هوة المشكلة إن الدكتور فى المحاضرة لو حس إنك بتكتب بيخاف " تمتص" معلوماته مع إنك بتكون بتشخبط مربعات ومنحنيات وغيره :)
    موضوع جميل عملى استراحة شكرا لك

    جزاك الله خيرا ونفع الله بك ودمت بخير

    ReplyDelete
  5. حسن حنفىFebruary 28, 2009 at 11:07 PM

    جزاكم الله خيرا

    انا دايما بشخبط بس مش علشان اركز علشان بكون زهقان

    هههههههههههههه

    ReplyDelete
  6. funckydoctorFebruary 28, 2009 at 11:26 PM

    بجد حلو قوى المقال
    انا بعمل كده من الملل فعلا
    بس هركز بقى فى الشخبطة :P

    ReplyDelete
  7. salma mohamedFebruary 28, 2009 at 11:29 PM

    والله,اااه قولتلي بقى,
    اتاريني كنت على طول من الاوائل وزميلاتي كانوا مفكرين اني سوسه وبذاكر كتير,وانا اتاريني علشان بشخبط كتييير,وكشاكيلي كلها رسومات وشخابيط.

    ReplyDelete
  8. TIMMY !!March 1, 2009 at 2:10 PM

    ياسر ,

    تسلم لي إنت كمان يا ياسر اللي مش متخفي ,

    و العملية مش شخبطة يا دوك ,
    إنما تشخبط لما تكون هتسرح ,
    هي دي النظرية :)

    ReplyDelete
  9. TIMMY !!March 1, 2009 at 2:11 PM

    محمد غاليا :
    ههههههه
    شخبط يا محمد ,
    بس ابقى قابلني ... لو سرحت :)

    ReplyDelete
  10. TIMMY !!March 1, 2009 at 2:12 PM

    سمو الأمير :

    معلش بقى ,
    اقوله اأنا , أنا خلصت خلاص ,
    العيب في الدكاترة ولاد الـ تيييت , صح ؟

    فاهمك يا هندسة :)

    ReplyDelete
  11. TIMMY !!March 1, 2009 at 2:14 PM

    خديجة عبد الله :

    احنا عندنا الدكاترة بقى العكس ,
    تخاف تكون بتشخبط :)

    جزانا و إياكم ,
    و نفعنا الله بما نقول ,

    ربنا يهدينا و إياكم

    ReplyDelete
  12. TIMMY !!March 1, 2009 at 2:16 PM

    حسن

    جزانا و إياكم ,

    و برضه الشخبطة دي مضاد للزهق و الملل اللي بيؤدي للسرحان :)

    تحيتي لك حسناً :)

    ReplyDelete
  13. TIMMY !!March 1, 2009 at 2:18 PM

    funky doctor :

    طبعا يا دكتور ,
    ده انت مش تركز بس في الشخبطة ,
    ده انت تعمل فيها بحث في السيكاتري :)

    تحيتي لك :)

    ReplyDelete
  14. TIMMY !!March 1, 2009 at 2:22 PM

    سلمى محمد :

    ماشاء الله ,
    أديكي عرفتي " سر التفوق " أهه :)
    على فكرة أنا كشاكيلي و كتبي بتكون " معجونة " شخبطة و كلمات و رسومات ,

    و الحمد لله جابت نتيجة معايا أنا كمان :)

    ReplyDelete
  15. أحمد سعيد بسيونيMarch 1, 2009 at 3:11 PM

    سيبك من التفسير اللي فوق ده

    تفسيري الوحيد ان شخبطتك ممكن تلهيك عن النوم وقت المحاضرة وتبقى بديل مناسب

    وهي دي الفائدة الرئيسية

    ReplyDelete
  16. TIMMY !!March 1, 2009 at 4:36 PM

    أحمد سعيد بسيوني :

    يا عيني يا دوك :)

    هي دي تفسيرات الطلبة الجامدين بجد :)

    وسيلة فعالة لطرد النعاس :)

    تحيتي لك يا أحمد :)

    ReplyDelete
  17. لؤلؤة " السلفية ".....هويتي إسلاميةMarch 1, 2009 at 5:14 PM

    السلام عليكم ورحمه الله وبركاته


    ايه ياتيمى البحث ده انا طول عمرى اشخبط ومش فاكره انى استوعبت اى حاجه
    ماعلينا
    يعنىلو فهمنا كنا هنعمل ايه
    الحمد لله اننا خلصنا واتفكينا
    تسلم ياجميل

    ReplyDelete
  18. احمد الجميلMarch 1, 2009 at 5:37 PM

    كلام جديد جداً :) ..
    بس يا ريت دكاتره كلية هندسة يفهمه الاختراعات دى يا استاذ تيمى ..

    ReplyDelete
  19. د/ ماجدولينMarch 2, 2009 at 8:16 AM

    جميل أوى البوست دة .... أنا عمرى ما شخبطت فى المحاضرة عشان بعتبرها قلة ذوق وتقليل من هيبة الدكتور اللى واقف..لكن النوم والسرحان فى وجهة نظرى... مش بيقللوا من احترامة :)
    هجرب الشخبطة ان شاء الله.....ياكش تيجى بفايدة معايا

    ReplyDelete
  20. ست البناتMarch 2, 2009 at 10:46 AM

    السلام عليكم
    رأي غريب شوية :)ساعات بعد ما الكشكول يخلص أقلبه ألاقيني كاتبه وراسمه درر :) يعني شخبطة تستحق النشر :)

    تحياتي للبانر الجديد :) جميل جدا

    ReplyDelete
  21. مذكرات مشاغبMarch 2, 2009 at 1:33 PM

    يا خبر ابيض
    طيب ايه رايك باه ان البريطانين دول مبيفهموش حاجه
    انا كنت بشخبط وانا سرحان في ملكوت تني خاااااااااااااالص
    ده احسن حاجه بتساعد على السرحان الشخبطه يا راجل
    وبعدين روح استخلى يا عم الحج
    اصل بتوع الربيه والتعليم لو سمعوك هيشنقوك


    تحياتي

    ReplyDelete
  22. TIMMY !!March 2, 2009 at 2:42 PM

    لؤلؤة الرحمن ,

    و عليكم السلام و رحمة الله و بركاته ,

    الحمد لله إن عهد الشخبطة خلص على خير ,

    و عموما الشخبطة كمضاد للسرحان و ليست للتركيز ,

    تحيتي

    ReplyDelete
  23. TIMMY !!March 2, 2009 at 2:44 PM

    أحمد الجميل /

    أهلا و سهلا بيك يا باشمهندس ,

    لكن بالنسبة للدكاترة , اسألني أنا , أنا دكاترتي كانوا " ميكانيكا " :( :(

    عمرهم و لا غيرهم هيفهموا ,

    و عاوزيننا نعمل زي ما عملوا ,
    ربنا معاك ياباشمهندس , أهي سنة و تخلص إن شاء الله
    تحيتي :)

    ReplyDelete
  24. TIMMY !!March 2, 2009 at 2:48 PM

    د . ماجدولين :

    ياسلام , فعلا طلبة اليومين دول آخر انضباط , أنا معاكي إن السرحان و الشخبطة قلة ذوق ...
    إنما النوم !! ده سلطان :) :)

    و جربي الشخبطة كمضاد للسرحان بس , و ليس كجالب للتركيز ,

    تحيتي :)

    ReplyDelete
  25. TIMMY !!March 2, 2009 at 2:52 PM

    د . ماجدولين :

    ياسلام , فعلا طلبة اليومين دول آخر انضباط , أنا معاكي إن السرحان و الشخبطة قلة ذوق ...
    إنما النوم !! ده سلطان :) :)

    و جربي الشخبطة كمضاد للسرحان بس , و ليس كجالب للتركيز ,

    تحيتي :)

    ReplyDelete
  26. TIMMY !!March 2, 2009 at 2:58 PM

    ست البنات :
    و عليكم السلام و رحمة الله و بركاته يا دكتورة ,

    فعلا أنا زيك , من كام يوم كنت بودي كتاب من أول سنة لكلية لواحد يصورة , لقيتني ماليه كتابه و شخبطة ..

    بس وصيته ما يقراش حاجة :) :)

    و شكرا جزيلا على " رؤية البانر " اللي ما حدش شافة خالص لحد دلوقتي :(

    ReplyDelete
  27. TIMMY !!March 2, 2009 at 3:00 PM

    مذكرات مشاغب :

    يا أهلا بيك يا دكتور :)

    هي الشخبطة مش بتساعد على التركيز ,
    لكنها بتقلل السرحان أو بتقلل من تأثيره ,

    ده اللي البريطانيين كانوا عاوزين يقولوه :)

    ReplyDelete
  28. ست البناتMarch 2, 2009 at 11:39 PM

    سلام عليكم تيمي
    معلش المرة دي قاصدة مساعدة حضرتك لما فتحت البلوج بتاعي لقيت أحدث بوست مش ظاهر ولا أي بوست أصلا فقط وجدت الأرشيف رغم أنني لم أغير الإعدادات ولقيتها مضبوطة تمام ياريت تفيدني لو تسمح ربنا يكرمك

    ReplyDelete
  29. TIMMY !!March 3, 2009 at 8:32 AM

    ست البنات ,

    و عليكم السلام يا دكتورة ,

    أنا رحت المدونة و لقيت كله تمام و الحمد لله ,

    لعلها " شدة و زالت " :)

    ReplyDelete
  30. أخـــ مسلمة ـــتMarch 3, 2009 at 9:18 AM

    طيب لما يكون الدكتور بيتكلم واحنا بنجري وراه ـ اقصد بنكتب وراه

    أقعد اشخبط وانفض للدكتور؟
    :)
    اصلا المحاضرات الخنيقة سبحان الله الالهام ماعرفش بينزل منين وافضل اكتب وارسم واعمل حاجات غريبة
    بس اجمل بوستات المدونة هي اللي كتبتها او فكرت فيها في محاضرة خنيقة
    :)

    ممكن يدرسولنا محاضرات دوودلينج بعد كده

    دمت بخير
    تحياتي

    ReplyDelete
  31. HossamMarch 3, 2009 at 6:01 PM

    حبيب قلبى
    بوست جامد اخر حاجة وانا قريته بالانجلش وفهلا حسيت ان الكلام صح وبينطبق عليا فى معظم الوقت
    مدونة تظبيط وبتطبتنا فعلا
    شكرا للبوست وتحياتى صديقى
    سلام

    ReplyDelete
  32. موناليزاMarch 3, 2009 at 8:30 PM

    الشخبطة دى بحب اشوفها اوى بعد انتهاء الموقف
    بتشوفها بنظرة تانية خالص وبتستغرب انك انت اللى رسمت او كتبت الكلام ده

    ReplyDelete
  33. TIMMY !!March 4, 2009 at 2:23 PM

    أخت مسلمة ,

    لا انت مش محتاجة تشخبطي في الجري و راء الدكتور ,
    لأنه مافيش وقت تسرحي أصلا :)

    و بالنسبة للمحاضرات الخنيقة .. فطله ليها فائدة معاكي أهه :)

    في أمان الله ...

    ReplyDelete
  34. TIMMY !!March 4, 2009 at 2:24 PM

    حسام ,

    أيوة كده يا حسام ,

    قلهم إنك قرأته بالنجليزي و طلع زي ما أنا قلت ,

    أحسن الناس مش مصدقة :)

    الله يخليك يا حسام و يكرمك و يوفقك و إيانا يا رب :)

    ReplyDelete
  35. TIMMY !!March 4, 2009 at 2:25 PM

    موناليزا :

    بالفعل بعد مضي وقت على الشخبطة ,
    ساعات الواحد بيقول : هو مين اللي عمل الحاجات دي :) ,

    و ساعات بيشوفها أكبر من كونها مجرد شخبطة :)

    تحيتي :)

    ReplyDelete
  36. My Hope$March 4, 2009 at 11:27 PM

    هو عموما لما بتريح اي حاسة من الحواس بتلاقي الحاسة اللي المفروض تركز عليها بتزيد يعني علشان كدا الاصم بيشوف كويس جدا وبيحس كويس او عندة اي قدرة بتعوض الحاسة اللي فقدها او مش شغالة
    وهكذا بالنسبة للضرير بيسمع كويس وبيحس بردة كويس
    فا يممكن لما نشغبط هنريح حاسة التركيز بالنظر وبنركز بالسمع والله اعلم طبعا

    سلاممممممم

    ReplyDelete
  37. TIMMY !!March 6, 2009 at 7:36 AM

    My Hope$

    تفسرك حلو جدا ,

    فعلا لما بنركز على حاسة دون أخرى فالتانية بتعمل بكفاءة أكثر ,
    أو مش بتتعرض لضغك في العمل فبيزيد أداءها ,

    احتمال فعلا يكون تفسير صحيح , و الله أعلم ,

    شكرا جزيلا للمرور و التعليق :)

    تحيتي

    ReplyDelete
  38. lil.DMarch 10, 2009 at 2:59 AM

    ما أنسى فالمدرسة .. المعلمة مرة كانت تشرح وأنا فعلا أركز لما أرسم .. ومندمجه مركزة معاها وارسم .. شوي وقفت المعلمة الكلاس .. وخذت ورقتي وراوتها الصف كله .. وبهدلتني .. وشقت الورقة >_< ... عقب هذا قالت انتي طالبة مجتهدة عيب تسوين جيه!!


    انا لازم اسوي كوبي من موضوعج واطرشه لها < صار على السالفه ثمان سنين يمكن .. بس بعدني حاقدة عليها لول

    ReplyDelete
  39. TIMMY !!March 10, 2009 at 7:40 AM

    lil.D

    لا لا , ما يحق للمعلمة تسوي كده ,
    خليها تقرأ الوضوع في البي بيسي :)

    بس لو عرفتي تقابليها بقى بعد 8 سنين :)

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

Subscribe to: Post Comments (Atom)

حقوق النشر للجميع


ـ
و لا تنسوا كاتب الموضوع من دعوة صالحة بظهر الغيب
أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ