زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

11 January, 2009

اللي بيحصل في غزة ... ليه ؟؟ و نعمل إيه ؟؟



السلام عليكم و رحمة الله و بركاته ..


تم تحديث الموضوع ليجاوب على تساؤلين :

1-
و ما هو دورنا , نعمل إيه يعني ..

2- لماذا يحدث هذا في غزة ؟؟ و لم لا ينصرهم الله إلى الآن ؟؟

.
.
.


نعمل إيه ؟؟


طبعا كلنا هنسأل :

طيب نعمل إيه ؟؟ ما هم مش عاوزيننا نجاهد ..
و احنا عاوزين نجاهد و مش قادرين !!

أقول لك يا سيدي ,

انت تحب تجاهد قبل الظهر و لا بعده ؟؟

يعني تحب نصحّيك تجاهد من الفجر و لا نسيبك تاخد راحتك في النوم ؟؟


آه صحيح بالمناسبة ..

تحب ( هدوم الجهاد ) تكون على الموضة ؟؟
يعني (لو ويست) =(low waist) و كده ؟؟

و تحبي تلبسي ( بدي )=(body) و جينز ,
أو بدي على جيبة ضيقة في الجهاد و لا إيه بالظبط
؟؟

و بالنسبة للعصاير ..

علشان لما تعطش و انت بتجاهد ..

تحب بيبسي و لا فانتا ؟؟
و لا أقول لك .. سبرايت أحسن علشان ( تروي عطشك ) !!

و بالمرة تحب تجاهد كام مرة في اليوم ؟؟

و تحب تروح تجاهد و لا نجيبهم لك تجاهدهم لحد عندك ؟؟

طبعا مش فاهمني , صح ؟؟

أو فاهمني و بتستهبل ..


بصوا يا جماعة ..

طبعا باب الجهاد عندنا للأسف مقفول دلوقتي ..

و من الخطأ أن نقول : ليس لدينا إلا الدعاء فقط ..

لكن لدينا حاجات أخرى مع الدعاء , و جهاد آخر ,

جهاد النفس ,

طبعا هتسيب الكلام و تمشي ... أصله كلام قديم و مش سريع التنفيذ ,
احنا عاوزين نروح حالا نجاهد و ننصر إخواننا ..

طيب اصبر عليا بس ..

الواحد بيستغرب اللي مش بيقدر يقوم يصلي الفجر ده ,
عاوز يروح يجاهد بعد الظهر مثلا ؟؟
و لا الساعة 10 لما يصحى ؟؟


و اللي مش قادر يصلي خمس صلوات بس في المسجد ,
و بيكسل يروح الجامع ,
هيبقى قادر على الكرّ و الفرّ في الحرب ؟؟

زي ما بيقول بعض السلف :
(( من خان حي على الصلاة خان حي على الجهاد ))

يعني اللي مش هيقدر يجاهد في حالة السِلم , هيقدر يجاهد في الحرب ؟؟

و اللي عاوز يجاهد ده , أو عاوزة تجاهد ,
هيقدر يلبس مثلا لبس متوسخ أو على قده , و يزحف على التراب إزاي

و هو/هي مش قادر يمسك نفسه عن اللبس اللي على الموضة ..
و مش هقول لك سيبي البنطلون و البدي ,
لا سيبي الجيبة الضيقة و الإيشارب القصير ..

و اللي مش قادر يمسك نفسه عن النظر ,
أو سماع الأغاني

إزاي ربنا هينصرنا في الضراء ؟؟
و احنا مش عارفين ننتصر على نفسنا في السراء ؟؟

و كما يقول بعض السلف :
(( أتريد ان تُخرَق لك العوائد ، وأنت ما خرقت من نفسك العوائد !! ))

لما احنا عاوزين ربنا يفتح لنا باب الجهاد المقفول ده
و بعدين ينصرنا على عدو أقوى مننا في السلاح ,
و ده كله شبه مستحيل الآن ,
يعني لو حصل هيبقى معجزة - بمقاييس البشر- و خرق للعادة

و احنا مش عارفين نغير عاداتنا و سلوكياتنا و نترك مشتهياتنا و نغير نفسنا ؟؟

لما احنا مش عارفين نجاهد شيطاننا و نفسنا هنا , يبقى هنعرف نجاهده هناك ؟؟

أنا مش بقول الكلام ده لواحد في غزة مثلا مش عارف يظبط نفسه في الحاجات دي ما يجاهدش ,
لأ , لأنه في الحرب و قد فُرضت عليه ..

أنا بقول ده لينا طالما ليس هناك حرب هنا ,
فلتكن حربنا مع أنفسنا أولا ,,


و أنا مش بقول الكلام ده و أنا في حلٍ منه ..
الكلام موجه لي قبلكم ..


نربي أنفسنا , و نربي جيل محترم قادر على النصر ,
ينصر الله في نفسه أولاً كي ينصره الله على غيره ..

حتى لو مش احنا الجيل اللي هينتصر ,
نبقى احنا اللي نربي الجيل اللي هينتصر ,

أو على الأقل نبقى ( أنصاف منتصرين ) ,
و الجيل اللي بعدنا يبقى ( منتصر كامل ) !!!


عارفين قوله تعالى في اليهود :

{قَالَ فَإِنَّهَا مُحَرَّمَةٌ عَلَيْهِمْ أَرْبَعِينَ سَنَةً يَتِيهُونَ فِي الأَرْضِ فَلاَ تَأْسَ عَلَى الْقَوْمِ الْفَاسِقِينَ}

ذكر البغوي في تفسيره للآية :
" ومات في التيه كل من دخلها ممن جاوز عشرين سنة غير يوشع وكالب,
و لم يدخل أريحاء أحد ممن قالوا إنا لن ندخلها أبدا ,
فلما هلكوا و انقضت الأربعون سنة,
و نشأت النواشئ من ذراريهم ساروا إلى حرب الجبارين. "


و كنت سمعت لبعض الشيوخ -على ما أذكر إنه الشيخ أبو إسحاق الحويني - إن فترة 40 سنة دي , هي الفترة اللازمة لفناء جيل و لنشوء جيل جديد خالٍ من الضعف و الانهزام و التخاذل و كل العلل اللي كانت في الجيل السابق ..


فما تستعجلوش أبدا ,
اللي صَبّرنا
60 سنة على احتلالهم للقدس ,
يصبرنا كمان
10 سنين , بس نكون بقينا جيل يستحق النصر بجد إن شاء الله





نيجي بقى لـلنقطة التانية ..

متهيأ لي أن الكثير يتساءلون هذه الأيام :

ألسنا على الحق ؟؟ أوليس اليهود على الباطل ؟؟

طيب ليه ربنا سايبهم يقتلونا ؟؟

ليه ربنا سايبهم يقتلوا الأطفال اللي مالهمش ذنب ؟؟



ليييييييييييييه ؟؟



أنقل لكم هذا الكلام من كلام ابن الجوزي في صيد الخاطر :



ليس في التكاليف أصعب من الصبر على القضاء ،
و لا فيه أفضل من الرضى به .


فمن ذلك أنك إذا رأيت مغموراً بالدنيا قد سالت له أوديتها حتى لا يدري ما يصنع بالمال ،

ثم يرى خلقاً من أهل الدين ، و طلاب العلم ، مغمورين بالفقر و البلاء ،
مقهورين تحت ولاية ذلك الظالم .

فحينئذ يجد الشيطان طريقاً للوسواس ، و يبتدئ بالقدح في حكمة القدر .

فيحتاج المؤمن إلى الصبر على ما يلقى من الضر في الدنيا ، و على جدال إبليس في ذلك .

و كذلك في تسليط الكفار على المسلمين ،
و الفساق على أهل الدين .

و أبلغ من هذا إيلام الحيوان ،
و تعذيب الأطفال ،

ففي مثل هذه المواطن يتمحض الإيمان و مما يقوي الصبر على الحالتين النقل و العقل .

أما النقل فالقرآن و السُنّة ،

أما القرآن فمنقسم إلى قسمين :

أحدهما : بيان سبب إعطاء الكافر و العاصي ،
فمن ذلك قوله تعالى : ( إنما نملي لهم ليزدادوا إثماً ) .
( و لولا أن يكون الناس أمة واحدة لجعلنا لمن يكفر بالرحمن لبيوتهم سقفاً من فضة ).
( و إذا أردنا أن نهلك قرية أمرنا مترفيها ففسقوا فيها ) .
و في القرآن من هذا كثير .


و القسم الثاني : ابتلاء المؤمن بما يلقى
كقوله تعالى : ( أم حسبتم أن تدخلوا الجنة و لما يعلم الله الذين جاهدوا منكم ).
( أم حسبتم أن تدخلوا الجنة و لما يأتكم مثل الذين خلوا من قبلكم مستهم البأساء و الضراء و زلزلوا ) .
( أم حسبتم أن تُتركوا و لمّا يعلم الله الذين جاهدوا منكم ).
و في القرآن من هذا كثير .



و أما السُنّة فمنقسمة إلى قولٍ و حال .

أما الحال : فإنه صلى الله عليه و سلم كان يتقلب على رمال حصير تؤثر في جنبه ،
فبكى عمر رضي الله عنه , و قال : كسرى و قيصر في الحرير و الديباج ،
فقال له صلى الله عليه و سلم : " أفي شك أنت يا عمر ؟ ألا ترضى أن تكون لنا الآخرة و لهم الدنيا " .

أما القول فقوله عليه الصلاة و السلام : "
لو أن الدنيا تساوي عند الله جناح بعوضة ما سقى كافراً منها شربة ماء " .


و أما العقل : فإنه يقوِّي عساكر الصبر بجنودٍ منها :
أن يقول : قد ثبت عندي الأدلة القاطعة على حكمة المُقدِّر . .
فلا أترك الأصل الثابت لما يظنه الجاهل خللا .


و منها أن يقول :

أليس قد ثبت أن الحق سبحانه مالك ،
و للمالك أن يتصرف كيف يشاء ؟
أليس قد ثبت أنه حكيم و الحكيم لا يعبث ؟

و أنا أعلم أن في نفسك من هذه الكلمة شيئاً ،
فإنه قد سمعنا عن جالينوس أنه قال : ما أدري ؟ أحكيم هو أم لا .

و السبب في قوله هذا ، أنه رأى نقضاً بعد إحكام ،
فقاس الحال على أحوال الخلق ،
و هو أن من بنى ثم نقض لا لمعنىً فليس بحكيم .

و جوابه أن يُقال :
بـماذا بان لك أن النقص
-من استشهاد الأطفال و المدنيين و العجائز و غيرها - ليس بحكمة ؟

أليس بعقلك الذي وهبه الصانع لك ؟

و كيف يهب لك الذهن الكامل و يفوت هو الكمال ؟
-يعني ما تفكرش إنك وصلت بعقلك لنتيجة مفادها أن ما يحدث هذا شر و ليس لحكمة ,
لأن عقلك اللي وصل بيك للنتيجة دي هو من عند الله عز و جل ,
فإزاي ربنا يعطيك العقل اللي تعرف بيه الخير من الشر , و يفوت عز و جل فعل الخير , ؟؟
يعني أكيد الشر اللي انت شايفه ليه حكمة من وراه , و ليه عاقبة حسنة -

و هذه هي المحنة التي جرت لإبليس .
فإنه أخذ يعيب الحكمة بعقله ،
فلو تفكر على أن واهب العقل أعلى من العقل ،

و أن حكمته أوْفَى من كل حكيم ،
لأنه بحكمته التامة أنشأ العقول .

فهذا إذا تأمله المرء زال عنه الشك .

و قد أشار سبحانه إلى نحو هذا في قوله تعالى : (
أم له البنات و لكم البنون ).
أي أَجَعَل لنفسه الناقصات و أعطاكم الكاملين ؟

فلم يبق إلا أن نضيف العجز عن فهم ما يجري إلى أنفسنا .

و نقول هذا فعل عالمٍ حكيمٍ و لكن ما يَبِينُ لنا معناه .

فما المانع أن يكون فِعْل الحق سبحانه له باطنٌ لا نعلمه ؟

و لو لم يكن في الابتلاء بما تنكره الطباع إلا أن يقصد إذعان العقل و تسليمه لكفي .

.
.
.
.
.

و أزيدها بسطاً فأقول :

أترى إذا أُريد اتخاذ شهداء ،

فكيف لا يخلق أقوام يبسطون أيديهم لقتل المؤمنين ،

أفيجوز أن يفتك بعمر إلا مثل أبي لؤلؤة ؟
و بعليّ مثل ابن ملجم ؟؟
أفيصح أن يقتل يحيى بن زكريا إلا جبار كافر ؟

-يعني كمثال على اللي ذكره , لو ربنا عاوز يدخل ناس الجنة و يخليهم شهداء ,
مش لازم يخلق ليهم شر , و ناس شرانيين تقتلهم ؟؟
مع إن ظاهر القتل إنه شر , لكن العاقبة منه و هي الشهادة هي خير -

و لو أن عين الفهم زال عنها غشاء العشا ،
لرأيت المسبب لا الأسباب ،
و المُقَدِّر لا الأقدار ،

فصبرت على بلائه إيثاراً لما يريد ،
و من ههنا ينشأ الرضى .

.........

ابن الجوزي - صيد الخاطر .. بتصرف

....






و ربنا ينصر المسلمين في غزة و في كل مكان ..


و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com


أو على الأقل تذكر إنه منقول من مدونة تظبيط

......................


تحيتي

.....




..



..

32 comments:

  1. السلام عليكم ورحمة اللة وبركاتة
    جزاك الله خيرا على الايضاح والتفصيل.
    وربنا يرضينا بقضاءة وقدرة ويصبرنا على ما يبتلينا.
    فالابتلاء اما لتكفير الذنوب وتطهير البشر واما امتحان من الله ليختبرنا انصبر ان كان ابتلاء في وجهة نظرنا شر او انشكر ان كان الابتلاء في وجهة نظرنا خير,وطبعا امر المؤمن كله خير.
    واما ان يكون الابتلاء ايات تذكير لنتقرب الى الله ونفر اليه.

    ReplyDelete
  2. هو كلام كويس بس فيه شوية فلسفة في الآخر ما اعتقدش ان كل الناس حتفهمها

    اللهم استعملنا و لا تستبدلنا و اجعلنا من الصابرين على الإبتلاء

    ReplyDelete
  3. بارك الله فيك
    وفي مدونتك
    اد ايه مدونتك دي ليها قيمة وفايدة
    جزاك الله خير
    ووصلت رسالتك وفهمت المغزى
    بس عندي ملاحظة ان الكلام في بعض الحجات مفهمتهاش
    كانت محتاجة تفسير منك اكثر لكثرة علمك ليها وفهمك ليها
    جزاك الله خير
    وربنا ينصر اخواننا في فلسطين
    ويزيدهم صر وايمان ورضا

    ReplyDelete
  4. سلمى محمد ..

    و عليكم السلام و رحمة الله و بركاته ,

    جزانا و إياكم ,
    و شكرا جزيلا على التعليق ..

    هو فعلا قضاء الله خيرٌ كله , إنما الذي قد يكون شرا هو " المَقضيّ " , هذا الذي قد نراه شرا ,

    فمثلا فتح بطن المريض هو المقضي , و هو شر في الظاهر ,
    أما القضاء فهو استئصال المرض , و هو خير ..

    و ربنا يصبرهم و يحتسبوا إن شاء الله

    ReplyDelete
  5. مهندس مصري ,

    أهلا و سهلا بيك يا باشمهندس محمد يا أخو زميلي :)

    هو أنا حاولت أبسط الكلام على قد ما أقدر , و أشيل منه الحاجات اللي ممكن تكون غير مفهومة , و هو ابن الجوزي بصراحة أسلوبة روعة ..

    ربنا يكتب النصر على ايدينا , أو على أيدي من بعدنا , لكن يكون لنا مشاركة فيه ..

    شكرا جزيلا على مرورك يا باشمهندس ,

    ReplyDelete
  6. مها زين .

    بارك الله فيناو إياكِ

    و شكرا جزيلا على مرورك و تشجيعك ,

    و ربنا يهدينا و يرزقنا العمل بما نكتب ,

    و بالنسبة للكلام , فأنا حاولت أشيل الأجزاء الصعبة أو وضع شرح تحتها بعد ملاحظتك ,

    جزانا و إياكم ,

    و ربنا ينصرهم و يخذل من خذلهم !!

    ReplyDelete
  7. جزاااااااااكم الله خيرا ونفع بكم
    ربنا يتقبل يااااااااارب
    كلام 100% صح
    ربنا يرزقنا العمل

    ReplyDelete
  8. السلام عليكم
    حبيت اشكرك على الجزء المضاف(الجزء التاني من الكلام)ربنا ينفع بيك دينه واهل دينه.
    وبالمناسبة فعلا الكلام لابن الجوزي ممكن يكون صعب شوية للي مش متعود على القراءة ليه مع انه رائع جدا.

    ReplyDelete
  9. جزاك الله كل خير
    أسلوب فعلا متميز وجميل ربنا يتقبل

    ممكن نحط نغمة تنبه لوقت الجهاد وكمان حظاظة عليها صورة سيف
    وممكن كمان سليبر اخضر لزوم الحرب وكده
    فعلا هم يضحك :)
    ربنا يصلحنا جميعا ويرزقنا الفهم والعمل وينصر اخواننا المجاهدين

    ReplyDelete
  10. جزاكم الله خيرا

    واعطاك الثواب

    دمت بخير

    ReplyDelete
  11. أخت مسلمة

    جزانا و إياكم و رزقنا العمل بما نقول ,

    و تقبل الله منا و منكم ..

    و شكرا جزيلا لمروركِ أختي الكريمة ..

    ReplyDelete
  12. سلمى محمد ,

    و عليكم السلام و رحمة الله و بركاته ..

    عفوا على إيه , أنا افتكرت إني مش هلاقي وقت أضيف فيه بوست تاني فضيفته ,

    و بالنسبة لكلام ابن الجوزي فهو بالنسبة لي أثر من ممتع بصراحة ,
    لكن فيه أكتر من واحد من زمايلي قال لي إنه مش متعود عليه , و استأذني ينقل الموضوع من غير كلام ابن الجوزي ,

    تحيتي لكِ أختي ..

    ReplyDelete
  13. خديجة عبد الله ,

    جزانا و إياكم أختي الكريمة ..

    و على رأيك , ممكن نحط حظاظة جهادية و مكن حلقة شعر كمان !!

    ربنا يهدينا و يهدي الجميع

    ReplyDelete
  14. حسن حنفي , ..

    جزانا و إياكم يا حسن ,

    و نفعنا بما نقول ,

    و ربنا معاك و يوفقك في دراستك و امتحاناتك إن شاء الله ..

    ReplyDelete
  15. السلام عليكم ورحمه الله وبركاته
    -----------------------------
    تسلم تيمى على البوست
    اللى بجد لو بس نفهمه كويس ونتمعن فيه هنعرف نتعامل ازاى مع حالنا ونصلحه
    بدل محنا قاعدين نندب حظنا
    ومحدش فاهم في ايه
    نصلح حالنا الاول
    وبعدين نفكر نحارب ونجاهد
    نلتزم بتعاليم دينا الاول
    وبعدين نحاول نفرضها على غيرنا
    نشوف وضعنا اصلا يرضى ربنا ولا لا وبعدين نقول ان الله ناصرنا

    الله المستعان
    ------------------------------

    ReplyDelete
  16. طبعا لازم نقاطع مش بس الاسبرايت والكوكاكولا والبيبسى والحاجات الامريكية والاسرائليه ...

    احنا كمان مفروض نقاطع الحكومة لانها بجد مش حكومة ..


    طبعا دا كلام الناس كلها ايون يا عم المخبر انت عشان مش انا لوحدى

    ملكش دعوة انت يا هندسه انا بكلم المخبرين


    المهم دلوقتى ان شاء الله فى محاولات جارية لقصف كام موقع اسرائيلى ويب سيت يعنى

    من ناس كدا بس نخلص امتحانات

    ادعلنا بقا يارب مش الفير وال مش جامد عشان الواحد خلاص اتخنق بقا عاوز سديرى ملغم وروحين روح يفجربيها نفسه ف كل الحكام العرب و روح يفجر فيها نفسه ف كل اليهود ...

    خلينا نشوفك وادعيلى عندى امتحانات

    سلاموز

    ReplyDelete
  17. السلام عليكم يا دفعة :D

    كلام جميل قوي يا تيمي

    بس فيه نقطة معينة كنت عايز اتطرق ليها

    بما إنك اتكلمت عن جهاد النفس والموضه .. الخ

    افتكرت الاندلس !!

    فاكرين الاندلس ؟

    قصة يمكن قريناها كتير في كتب التاريخ ومرينا عليها مرور الكرام .. ويمكن بعضنا مقرهاش

    كان ياماكان فيه دولة اسلامية عريقة في الاندلس (اسبانيا حاليا)

    وطبعا كان محاطة بالاعداء من كل جهة .. وبمرور الوقت مات الخليفة واتقسمت الدولة بين الورثة وبقت دويلات .. وكان حالها اشبه بحال الدول الاسلامية دلوقتي

    المهم بقى نيجي للموقف اللي حصل ساعتها ..



    o قبل أن يدخل المستعمرون الصليبيون بلاد الأندلس الإسلامية في عصر الدولة الأموية، أرسلوا أحد أقطاب المستعمرين لينظر حال المسلمين في بلاد الأندلس، ليعلموا هل يمكن غزو المسلمين في هذه البلاد أم لا؟ ودخل الرجل الصليبي بلاد الأندلس، فرأى طفلا صغيرا يبكي، فجاء إلى الطفل الباكي وسأله: لماذا تبكي أيها الطفل؟ قال الطفل: أبكي لأن أخي يضرب بالسهام في الضربة ضربتين، وأنا اضرب في الضربة ضربة واحدة!! فرجع الرجل الصليبي إلى الصليبيين المستعمرين، وقال: لم يأن الأوان لغزو المسلمين. وما كان منهم إلا أن أرسلوا إلى المسلمين ما يبعدهم عن الله - تعالى -، كآلات الغناء والشطرنج والطاولة والحشيش والتدخين...

    وبعد مدة من الزمان، رجع أحد أقطاب المستعمرين إلى بلاد الأندلس، فوجد شيخا كبيرا يبكي. فسأله: ما الذي يبكيك؟ قال: إن حبيبتي تركتني منذ ساعتين ولم تأتِ!! فعلموا أن الوقت قد حان لقطف الثمرة!!!



    السؤال المؤلم الذي أود طرحه الآن يا تيمي ..

    هل شبابنا مهيئون للجهاد ؟

    وهرجع لنفس النقطة اللي اثرتها .. هيلبسوا ايه وهما بيجاهدوا ؟

    تخيل شاب رايح يجاهد وسجارتين حشيش في جيبه جنبيها صورة الجو بتاعه والووكمن على ودانه ..

    وبدل ما الشعب كله واقف يدعيله ان ربنا ينصره بنصرة دينه هنلاقي فيفي عبده اهدت له رقصتها الجديدة او شعبولا طلع أغنية روشة يدعمه بيها ومفيش مانع ان الحكومة تصرف له مع الوجبة علبة سجاير عشان يمخمخ !!

    ReplyDelete
  18. حملة المقاطعة

    لا تستطيع ان تجاهد

    لا تستطيع ان تتظاهر

    لا تستطيع ان تتبرع بالمال

    اذاً قاطع

    وادعو غيرك لمقاطعة منتجات كل من يدعم العدو

    ReplyDelete
  19. بارك الله فيك يا تيمي :)

    أنا لم اسال نفسي يوما لماذا لا ينصرنا الله ؟,, وأنا اعتبرتها إبتلاء و من ناحية تانية عدم استيفاء لشروط النصر ...


    بس السؤال نعمل ايه دا اللي لسه واقف في زوري ..
    وزي ماأنت قلت الدعاء مش كفاية...

    وإن ميدان مجاهدة النفس أهم ...

    ربنا يهدينا ويثبتنا على الحق

    بارك الله فيك :)

    ReplyDelete
  20. السلام عليكم ورحمة الله وبركاته

    بجد انت جبت المفروض يتعمل

    تحياتي

    ReplyDelete
  21. لؤلؤة الرحمن ,..

    و عليكم السلام و رحمة الله و بركاته ,

    و جزاكم الله خيرا على التعليق ,

    فعلا أنا معاكي إننا طالما لم تفرض علينا الحرب بعد , فعلينا التجهز لها بإصلاح أنفسنا ,

    و تحقيق الشرط في " إن تنصروا الله " كي يحقق لنا الله النتيجة في " ينصركم "

    و أن نأخذ دفعة مما يحدث و ليس إحباطا ..

    تحيتي

    ReplyDelete
  22. المبرمج المحترف ..

    أهلا و سهلا يا عم عمر :)

    احنا فعلا لازم نقاطع كل حاجة مالهاش لزمة !!

    و نبقى مش محتاجين لحد عن طريق إننا نقوي أنفسنا و نبقى أحسن من اللي استغنينا عنهم دول ..

    و ربنا يعينك و تخلص امتحانات ... و تفضى لهم :) ..

    ReplyDelete
  23. سيمباوي ..

    و عليكم السلام يا سيمباوي ..

    بس بلاش دفعة دي علشان مشكوك فيها دلوقتي :)

    للأسف القصة اللي ذكرتها بخصوص الأندلس وقعت و بتقع في بلادنا فثي كل حتة ,
    على الكورنيش و في الجامعات و في "الحدائق العامة و المنتزهات" :) و في التلفزيون و الأفلام و في كل حتة !!


    و هي دي النقطة اللي انت بتتكلم عليها ,
    هل نحن فعلا مهيئون للجهاد ؟؟

    لا أظن , و لا أخرج نفسي منهم ..

    بل كلنا في حاجة للتظبيط !!

    إلا ما رحم ربك ..

    ReplyDelete
  24. بنت أبيها ...

    فعلا المقاطعة سلام فعال ..

    خصوصا دلوقتي بعد الأزمة المالية العالمية ,

    هتبقى خسارتهم مضاعفة ..

    بس احنا نصبر عن البيبسي و الذي منه !!

    ReplyDelete
  25. تيفا ..

    بارك الله فينا و إياك ..

    للأسف مجاهدة النفس دي رغم إنها ساحة مفتوحة ..

    إلا إنهاصعبة جداااااااااااا

    ربنا يعيننا على أنفسنا و على شياطيننا !! و على أعدائنا جميعا ..

    ReplyDelete
  26. الفقير إلى الله ..

    و عليكم السلام و رحمة الله و بركاته ..

    للأسف أنا و غيري عارفين اللي مفروض يتعمل ,

    لكن أنا و غيري برضه كتير مش عارفين نعمل !!


    ربنا يعين الجميع و يفقنا لما يحب و يرضى ..

    و شكرا جزيلا لزيارتك أخي الكريم ..

    ReplyDelete
  27. السلام عليكم

    مش عارف أقولك ايه

    انت تبريراتك وان كان فيها بعض السلبية الا انها تحمل من الايجابية الكثير
    يعنى أنا بختلف معاك فى تقرير حقيقة ان ان العاصى لا يمكن ان يجاهد

    يعنى ممكن نروح نحارب ونجاهد مع العلم اننا مقصرين فى حق الله وفى العبادة ولا تكتمل العبادة ابدا فهى دوما قاصرة

    والجهاد باب من ابواب العبادة وقيام العباد بباب وعدم قيامهم بباب لا يعنى عدم اثابتهم على ما يقومون به

    من الاخر ممكن نجاهد واحنا مقصريين فى أمر الله

    ومع ذلك محاولة الالتزام مع الجهاد أفضل بكثير

    تحيتى وتقديرى

    ReplyDelete
  28. المحارب المتيم ..

    و عليكم السلام و رحمة الله و بركاته ..

    لكن لالنسة للختلاف فلا أرانا مختلفين اخي ,,

    فأنا لم أقل أن العاصي عليه أن يتوب من معصيته أولا قبل أن يجاهد , أو أنها تحول بينه و بين الجهاد ,
    و دي بينتها لما تكلمت و قلت إن الكلام ده مش بقوله لواحد في غزة ,
    لو واحد في غزة بيشرب سجاير و لا بيعمل أي حاجة مش هقول له بطل الأول و تعالى جاهد , لا , تعالى لأن انت بقيت تحت النار خلاص ,

    لكن الكلام ده بقوله للي زينا هنا , مش عارفين يجاهدوا , و مش تحت النار , يبقى يبدأوا بجهاد نفسهم الأول , ده اللي متاح ليهم ,

    أما لقى اللي مننا و بيقول ما يهمش , مش هبطل , لكن لما يكون فيه جهاد هيجاهد , ده يُشك فيه , لأنه في الرخاء مش عاوز أو مش قادر يصبر على ملذات نفسه , فكيف يكون حاله في الشدة ؟؟

    و لأسف كلنا مقصرين زي ما قلت فعلا ,
    و إن كان الجهاد قد فرض على من لا ذنوب له , فلن نجد من يجاهد !!

    جزاك الله خيرا أخي على إضافاتك و على مناقشتك ..

    و ربنا يوفقنا لما يحب و يرضى ..

    ReplyDelete
  29. ياااااااااه يال تيمي

    بجد مش عارف اقولك ايه !!!

    كلامك صح جداااا .. طالما مش هانعرف نجاهد الأعداء دلوقتي يبقي منتخلاش عن دورنا في وجود جيل جديد يقدر يجاهد

    وإحنا خلينا في نفسنا .. لما نبأي نجاهدها الأول ونعرف نتصر عليها نبقي نفكر في الحروب

    ربنا يصلح حالك ويهدي بالك وينور طريقك وإيانا

    ويا رب انصر إخواننا في غزة

    ReplyDelete
  30. سمو الأمير ..

    لو مش عارف تقول حاجة :) يبقى ادعيلي إن ربنا يهيء لي الخير حيث كان ..

    هو كان لي ملاحظة بسيطة ,
    هو فيه فرق لما نكون ممنوعين من الحرب فيبقى مش قدامنا إلا أنفسنا التي نجاهدها ,

    لكن لو باب الحرب متاح يبقى جهاد النفس و الأعداء في آن واحد ,

    لأن ده مدخل دخل منه بعض الأعداء و هو تثبيط المسلمين بحجة جهاد النفس أولا ثم " إن انصلحت " نبقى نجاهد الأعداء ,

    و ده غلط , إنما الاثنين معا , فإن أُغلق باب جهاد الأعداء - أحد البابين - فلنجتهد في الباب اللي فاضل , باب جهاد النفس ..


    و ربنا يوفقنا و إياك إن شاء الله ..

    و يوفقك في امتحاناتك ياباشمهنس :)

    ReplyDelete
  31. الله يفتح عليك
    اسلوبك جميل جدا
    ربنا ينفع بيك

    ReplyDelete
  32. موناليزا ..

    ربنا يفتح علينا و إياكِ ,

    و يجعل عملنا بفائدة للغير و لنا إن شاء الله

    جزاكم الله خيرا

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ