زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

19 January, 2009

أنا عايش و مش عايش !!





- الواحد زهقاااااان و قرفاااااااان و مخنوووووووق و كل حاجة !!

خلاص الواحد مش حاسس بطعم الجبنـ.... قصدي بطعم الحياة ,

حاسس إن الواحد ( عايش و مش عايش ) ..
و إننا ( عايشينها و خلاص ) !!

- عادي عادي , و طبيعي .. زي الزبادي ..


- عادي إيه يا عم ؟؟؟ و زبادي إيه ؟؟ إزاي عادي يعني ؟؟


- أقول لك ليه عادي ,

حط نفسك مكان عربية آخر موديل , و محركها جامد طحن , و نظام تعليق ما حصلش .....
مرسيدس F700 مثلا ,

لكن الريّس (أبو مرسيدس) أو المعلم (بنز) حاطينها في المخزن ,
و مش عاوزين حد يشتريها و لا يستعملها ,

حط نفسك مكان العربية دي , و قول لنا حاسس بإيه ؟؟
.. اتفضل , المايك معاك ..

- مش حاسس بحاجة طبعا !! ,
انت شايفني (مازدا) الخطيب , ؟؟

- طب نبسطها ,
اللي عمل عربية بالمواصفات دي كلها , يخليها في المخزن ليه ؟؟

أكيد اللي خلاه يحط المواصفات دي كلها في العربية ,
يبقى عاوزها تطلع و تمشي و (تمرق) الطريق و الحاجات دي ,
و لو فضلت العربية في المخزن , يبقى هتبوظ و تصدي و حالتها هتتدهور على الآخر !!

- أنا شكلي فهمت و لا بيتهيأ لي ؟؟

- لا يا عم , انت اللي فاهم بس خايف من الحسد ,
أصل انت لو تيجي تفكر معايا كده ,
ربنا خلق الإنسان في أحسن تقويم ,
و جعله في الأرض خليفة ,
و فضله على كثير ممن خلق تفضيلا ,
و سخر لنا الأنعام و الشمس و القمر , و ..... كل ده ليه ؟؟
علشان ناكل و نشرب و ننام ؟؟
علشان نعيش و خلاص ؟؟

طبعا , لأ , و إلا هنكون زي المرسيدس إياها ,
هنصدي و نبوظ و نكره نفسنا و نكره العيشة و كل حاجة !!

زي ما ابن القيم ما بيقول :
كل عضو من أعضاء البدن خُلِقَ لفعلٍ خاصٍ به ,
كماله في حصول ذلك الفعل منه
و مرضه أن يتعذر عليه الفعل الذي خلق له
حتى لا يصدر منه أو يصدر مع نوع من الاضطراب

فمرض اليد أن يتعذر عليها البطش
و مرض العين أن يتعذر عليها النظر والرؤية
و مرض اللسان أن يتعذر عليه النطق
و مرض البدن أن يتعذر عليه حركته الطبيعية أو يضعف عنها

و مرض القلب أن :
يتعذر عليه ما خُلق له من معرفة الله و محبته و الشوق إلى لقائه و الإنابة إليه و إيثار ذلك على كل شهوة



- أيوااااااااااا هتقول لي مخلوقين للعبادة , عارف و الله يا (عم الشيخ) , بس ... يعني ..

طيب استنى , طيب لما احنا مخلوقين للعبادة ,
ليه ربنا اعطانا قدرات تانية نستعملها في غير العبادة ؟؟
ليه ربنا ما خلاناش زي الملائكة نعبد و خلاص ,
لكن حط فينا شهوات و إرادات و حاجات تانية ؟؟


- بص يا سيدي , بالنسبة لأن ربنا أعطانا قدرات تانية غير القدرات اللازمة للعبادة , فده لأننا مش رهبان ,

احنا في الأرض كي نعمرها كما أمرنا الله , و لسنا للصلاة فقط ,
يعني احنا كل حياتنا تصب في العبادة , سواء بنصلي نبقى في عبادة ,
أو سواء بنشتغل و بنستغل باقي قدراتنا لكن برضه كله بنية التقرب إلى الله , و هتبقى عبادة في الآخر ,
و هيبقى كده كل تصرفاتنا هي عبادة لله ,

و بالنسبة بقى ليه ربنا ركب فينا الشهوات و الحاجات التانية ,
طالما هو خلقنا للعبادة , ليه يركب فينا حاجات تصرفنا عنها ؟؟

هو خلقنا للعبادة و الابتلاء , قال تعالى " (( الذي خلق الموت و الحياة ليبلوكم أيكم أحسن عملا ))
يعين هو خلقنا في دار امتحان , و لو لم يكن هناك صعوبات , لما سُميَ هذا امتحاناً ,
يعني لازم يبقى فيه شهوات , كي يتبين المطيع من العاصي ,
و (( ليعلم الله من يخافه بالغيب ))
و طبعا فإن الله يعلم قبل أن يخلقنا إن كنا في الجنة و لا في النار
لكن ليعلم علما يحاسبنا عليه ,
و يقيم علينا الحجة ..

- طيب سؤال لولبي بقى ,
و لو جدع هات الإجابة يا عم ( الفلحوس ) ,

انت بتقول إن الواحد مخنوق علشان مش بيعمل للآخرة ,
و إن كل حياته سواء عبادة , سواء عمل , لازم كلها تصب و تكون موجهة للآخرة و ليس للدنيا ,
و إلا هيحس بالخنقة و هيبقى مش طايق نفسه ..

و السؤال هو : ليه المغنيين مثلا أو الممثلين , أو (الخواجات) أو يا عم ناس زمايلنا عايشين بالطول و العرض , و لا حتى بيصلوا , و مش حاسين بضيق قد كده و لا حاجة يعني ؟؟

- أقول لك يا سيدي ,
تعرف تاكل ( لحمة قرود ) ؟؟ أكيد هتقرف منها , صح ؟
طيب ليه فيه ناس تانيين -في أفريقيا مثلا - بياكلوها و ( بيمزمزوا ) فيها كمان ؟؟

هل لأن لحمة القرود حلوة و طعمة و خفيفة على المعدة و ... ؟؟
و لا لأن ( معدتهم فسدت ) و باظت من كثر ما ( تعودت ) على أكل مثل هذه القذارة ؟؟
فصارت لا تبالي ؟؟
بل إن الناس دي لو جيت مثلا تأكلهم لحمة بقر مثلا هيقولوا لك إنها مش طِعِمة زي لحمة القرود , صح و لا لأ ؟؟


زي ما ابن القيم ما بيقول :

وكل من عرف الله أحبه وأخلص العبادة له ولا بد ولم يؤثر عليه شيئا من المحبوبات
فمن آثر عليه شيئا من المحبوبات فقلبه مريض

كما أن المعدة إذا اعتادت أكل الخبيث وآثرته على الطيب سقطت عنها شهوة الطيب وتعوضت بمحبة غيره

و قد يمرض القلب ويشتد مرضه ولا يعرف به صاحبه لاشتغاله وانصرافه عن معرفة صحته وأسبابها

بل قد يموت و صاحبه لا يشعر بموته
وعلامة ذلك :
أنه لا تؤلمه جراحات القبائح ولا يوجعه جهله بالحق وعقائده الباطلة
فإن القلب إذا كان فيه حياة تألم بورود القبيح عليه و تألم بجهله بالحق بحسب حياته
وما لجرحٍ بميت إيلام


أما بقى اللي بيعمله معظمنا فبيبقى غالبا زي ده كده :

وقد يشعر بمرضه ولكن يشتد عليه تحمل مرارة الدواء والصبر عليها
فهو يؤثر بقاء الداء على مشقة الدواء !!
فإن دواءه في مخالفة الهوى
وذلك أصعب شيء على النفس وليس لها أنفع منه


يعني بنحاول ننسى و نقنع نفسنا إننا مش محتاجين ,
و إننا ممكن نجد السعادة و الراحة في أي حاجة تانية ,
بس طبعا بيبقى مجرد تخدير مؤقت و بيزول ,
و بنفشل في الآخر و نرجع ندور تاني ..

- طيب معلش , أنا عارف إني طولت عليك ,
سؤال أخير بعد إذن جنابك ,
انت بتقول إن العبادة و الحاجات دي كلها بتخلي القلب مستريح و كل حاجة حلوة ,

لكن المشكلة إن الواحد مش بيلاقي لذة في العبادة و لا انشراح في الصدر و لا الحاجات دي كلها ,
بل بالعكس , الواحد بيلاقي الصلاة صعبة , و ثقيلة على النفس و ...
تفسر ده بإيه بقى ؟؟

- بص ياعمي ,
هو المرسيدس إياها اللي كانت متخزنة ,
أول ما بتطلع بتمشي على طول ؟؟

و لا لازم تشغلها شوية في (التليين)
و تشوف الحاجات اللي كانت مصدية من الركنة تغيرها ,
و تظبط شوية حاجات كانت باظت فيها ,
و بعدين هتلاقيها ( ماشية معاك حلاوة )


قال العلامة ابن القيم:
" السالك في أول الأمر يجد :
تعب التكاليف و مشقة العمل لعدم أنس قلبه بمعبوده،
فإذا حصل للقلب روح الأنس زالت عنه تلك التكاليف والمشاق،
فصارت قرة عين له وقوة ولذة،
فتصير الصلاة قرة عينه بعد أن كانت عملا عليه،
و يستريح بها بعد أن كان يطلب الراحة منها "


و قال أيضا :


" ومنها ان المعاصي تزرع أمثالها
وتولد بعضها بعضا حتى يعز على العبد مفارقتها والخروج منها
كما قال بعض السلف أن من عقوبة السيئة السيئة بعدها
وأن من ثواب الحسنة الحسنة بعدها

فالعبد إذا عمل حسنة قالت أخرى الى جنبها أعملني أيضا
فاذا عملها قالت الثانية كذلك وهلم جرا
فيتضاعف الربح وتزايدت الحسنات
وكذلك كانت السيئات أيضا

حتي تصير الطاعات و المعاصي :
هيئات راسخة و صفات لازمة و ملكات ثابتة

فـلو عطل المحسن الطاعة لضاقت عليه نفسه
و ضاقت عليه الارض بما رحبت
وأحس من نفسه بأنه كالحوت إذا فارق الماء حتي يعاودها
فتسكن نفسه و تقر عينه

و لو عطل المجرم المعصية وأقبل على الطاعة لضاقت عليه نفسه
و ضاق صدره و أعيت عليه مذاهبه حتي يعاودها
حتي أن كثيرا من الفساق ليواقع المعصية من غير لذة يجدها و لا داعية اليها
إلا لما يجد من الالم بمفارقتها

و لايزال العبد يعاني الطاعة و يألفها و يحبها و يؤثرها
حتى يرسل الله سبحانه برحمته عليه الملائكة تأزه اليها أزا
وتحرضه عليها وتزعجه عن فراشه ومجلسه اليها

و لايزال يألف المعاصي و يحبها و يؤثرها
حتي يرسل الله اليه الشياطين فتأزه اليها أزا

فالأول قوَّي جند الطاعة بالمدد فكانوا أكثر من أعوانه
وهذا قوي جند المعصية بالمدد فكانوا أعوانا عليه "


يعني من الآخر ,
ما تستعجلش , لازم تتعب في الطاعة في الأول ,
لحد ما طبقة الصدأ اللي على القلب تروح ,
و بعدين هتلاقي نفسك مستمتع بجد ,

و ربنا يهدينا و إياك إن شاء الله ..
و يتوب علينا و يوفقنا لما يحب و يرضى .,.


و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com


أو على الأقل تذكر إنه منقول من مدونة تظبيط

......................


تحيتي

.....



43 comments:

  1. بجد موضوع جامد جيد
    انا لس كنت بسأل نفسي امبارح السؤال ده
    بجد ربنا يبارك لك و يكرمك
    و بجد اسلوب تحفة و كلام حلو اوي
    السلام عليكم اما اروح اكمل مذكرة

    ReplyDelete
  2. فتح الله عليك يا أخى .. تسلسل ممتاز تقبل الرحمن منك

    الطاعة .. لذة الطاعة .. ذاك الران يحرمنا إياها
    جهاد النفس شاق لكنه مثمر
    نفعنا الله بكلامك واجتهادك وجعله خالصا لله تعالى

    تساؤل : هوة مش حضرتك كنت بتقول هتنقطع تدوينيا لظروف الجيش :(
    أمال البوست ده جه من مين ؟

    ندعو الله لك بأن ييسر أمرك ويرزقك الخير كله ويرضيك به ويجزيك الفردوس الأعلى من الجنة ويحرم جسدك عن النار
    ويتقبل منك إن شاء الله

    ReplyDelete
  3. جزاكم الله خيرا

    الانسان لازم يبدأ يصلح من نفسه ويقرب من ربه ساعتها بس هيحس بطعم العباده

    ReplyDelete
  4. someone

    شكرا جزيلا على المرور ,
    و فعلا غالبا الواحد بيسأل السؤال ده في أيام الامتحانات :)
    ده طبعا لما يتخنق من المذاكرة ,
    و ربنا معاكم و تخلصوا على خير إن شاء الله

    ReplyDelete
  5. مهندس مصري ,

    و عليك يا باشمهندس محمد ,
    نورتنا بجد :)

    ReplyDelete
  6. خديجة عبد الله ,

    فتح الله علينا و إياكِ أختي الكريمة ..

    و الحمد لله أن وفقنا لهذا التسلسل ,
    لأني بجد كان فيه حاجات ناسيها و أنا بكتب في الأول ,
    نفعنا الله بما نقول ,
    و رزقنا العمل به و إياكم ,

    --------------
    و بالنسبة للتوقف فلأنهم أخروا النتيجة بدلا من يوم الأربعاء الماضي ليوم الأربعاء القادم - غدا - , و ربنا يقدم اللي فيه الخير ,


    جزاكم الله خيرا أختي الكريمة ..

    ReplyDelete
  7. حسن ,

    جزانا و إياكم يا حسن ,

    و فعلا لو الإنسان قرب من ربنا بجد , هيلاقي لذة مافي بعدها لذة ,
    لكن كما قال تعالى : (إنه من يتق و يصبر ) , لازم نتقي , و نصبر على التقوى و ما نستعجلش ,

    جزاك الله خيرا يا حسن

    ReplyDelete
  8. جزاك الله كل خير

    ReplyDelete
  9. السلام عليكم
    الاخ تمي
    يارب يكون موضوع الجيش جه بخير
    الموضوع بجد رائع جدا جدا,جزاك الله خيرا,ونفعنا به ,ونفع بك.
    في حاجة بس حبيت اوصلهالك,انا فتحت موقع طنطا اوف لاين,وقرات موضوع فيه عجبني,بس حسيت ان الاسلوب بتاع الكتابة ده كانه اسلوبك ,قلت اكيد انت,لكن لقيت صاحب الموضوع واحد من المشرفين,ومكتوب انه كلية تجارة,وانا عارفة انك مهندس,المهم فتحت مدونتك دي لقيت الموضوع فعللا موجود في مواضيعك القديمة(عاوز ابطل,ماتبطلشي),
    حبيت بس اعرفك انه ناقل الموضوع وحاطه هناك من غير ما يكتب انه منقول منك.

    ReplyDelete
  10. أسلوب رائع و بسيط فى الدعوة قد نكون محتاجين اليه لدعوة بعض الناس ممن لا يستجيبون الا بهذه الطريقة :)
    أكمل على بركة الله أخى الحبيب
    و خلصك الله مما انت فيه من امر الجيش على خير باذنه

    ReplyDelete
  11. طبعا كالعاده

    بوست جاااامد كيك

    المهم انا خلاص عرفت ميلك

    بس انت مش بتفتح خالص يا عم الحاج مش ينفع كدا

    هو عشان نكلمك نعمل ايه ؟؟؟؟؟؟؟؟

    هههههههه

    تبقا تقول على وقت معين كدا

    سلام


    اه نسيييت بعد 17 -1 عشان الامتحانات

    ولا اقولك ف اى وقت لان يمكن انتحر بعد 17-1 ...انت وحظك بقا لو لحقت

    سلام

    ReplyDelete
  12. ربنا ييسر لك امورك ويهئ لك كل الخير
    وبجد بجد ربنا يحميك ويبارك فيك ويعزك ويرضى عنك
    تسلم ايدك

    ReplyDelete
  13. الكيان الإرهابي الصهيوني أعد لنا جيشاً من المدونين فأين جيشنا ؟






    وَأَعِدُّوا لَهُمْ مَا اسْتَطَعْتُمْ مِنْ قُوَّةٍ ,,,

    كلنا مقاومة

    http://kollonamoqawma.blogspot.com

    ReplyDelete
  14. غير معرف ,

    جزانا و إياكم ,

    و شكرا جزيلا على المرور ..

    تحيتي :)

    ReplyDelete
  15. سلمى محمد ,

    و عليكم السلام و رحمة الله و بركاته ,

    جزانا و إياكم ,

    و ربنا ينفعنا بما نكتب , و يرزقنا العمل به !!

    ---------
    و بالنسبة للموضوع المنقول, فده لأنه غالبا منقول من منتدى آخر , و ليس من المدونة , فغالبا اللي بينقل من منتدى لمنتدى مش بيكتب منقول و لا غيره !!
    بس مش مهم , المهم إن الموضوع ينتشر و خلاص , و يستفيد منه أكبر عدد , مش مهم قوي إنه يكتب منقول ,
    و شكرا جزيلا على الاهتمام ,

    و بالنسبه للجيش ... ظابط !!

    جزاكم الله خيرا ,

    ReplyDelete
  16. أحمد الجميل ,

    جزاك الله خيرا على المرور يا باشمهندس ,
    شرفتنا بجد , و سعيد بإنك منورنا ,
    لأني بحبك من كلام مصطفى - مصطفى محمود - عليك ,

    و ربنا ينفعنا و ينفع غيرنا بما نقول ,
    و بالنسبة للجيش .. خلاص بقى , عرفنا " نهايتنا " :)

    نورتنا يا باشمهندس أحمد ,

    جزاك الله خيرا

    ReplyDelete
  17. المبرمج المحترف ,

    شكرا جزيلا على المرور ,

    و هي مش كالعادة و لا حاجة ,

    ربنا يغفر لنا ما لا تعلمون ,

    و بالنسبة لتواجدي على الشات , فاعذرني يا عمر , الواحد كان متلخبط اليومين اللي فاتوا , بالإضافة إن دخولي بيبقى سريع و بطلع على طول لو ما لقيتش حد من زمايلي فاتح ,

    بص , انت ادي أي معاد , و أنا هجاول أكون فاتح فيه ,
    على الأقل نلحق نسمع صوتك قبل ما تنتحر :)
    صحيح إنت هتنتحر إزاي ؟؟ هتفجر نفسك في موقع يهودي و لا إيه ؟؟ :)

    هستناك إن شاء الله على الشات -بعد ما تبعت لي رسالة أوفلاين بمواعيد تواجدك - ,

    و ربنا يوفقك في الامتحانات ,

    و لا متهيأ لي انت خلصت , آه صحيح , 17 - 1 ده خلص !!

    ReplyDelete
  18. موناليزا ,

    آآآآآمين على دعائك ,

    و جزاكم الله خيرا ,
    رزقنا الله الخير و إياكم ,


    --------
    و شكرا جزيلا على التنبيه بخصوص المدونين اليهود ,

    جزاكم الله خيرا

    ReplyDelete
  19. السلام عليكم ورحمة الله
    ازيك يا تيمي وازي الجيش؟ يارب يكون ماشي تمام :)
    توظيفك لكلام ابن القيم جميل جدا خلى الواحد/ة لو فيه حاجة صعبة في الكلام تتفهم ...بجد موضوع جه في وقته
    ومليان أمثلة قريبة جدا خاصة موضوع لحم القرود ده :))))

    جزاكم الله خيرا
    أسألك الدعاء

    ReplyDelete
  20. جزاكم الله خيرا سيد TIMMY
    موضوع رائع ومفيد جدا
    اعاننا الله على التنفيذ وجعله حجة لنا لا علينا
    جعله الله فى ميزان حسناتك
    واعننا واياكم على الطاعه

    ReplyDelete
  21. السلام عليكم ورحمة
    الله تعالى وبركاته
    الله يفتح عليك وعلىّ
    وعلى المسلمين أجمعين
    وينزل الرحمات على
    العلامّة ابن القيم
    ايه الناس دول
    ياتيمى
    ناس غير الناس ولا
    الزمان غير الزمان!
    لو قعدت ادى ملاحظات على كل كلمة اعجبتنى يبقى حاقول على كل الكلام وممكن اعيد كل كلامك تانى لكن حأدى مثل بسيط :
    ((كل عضو من أعضاء البدن خُلِقَ لفعلٍ
    خاصٍ به كماله في حصول ذلك الفعل منه
    و مرضه أن يتعذر عليه الفعل الذي
    خلق له حتى لا يصدر منه أو يصدر مع
    نوع من الاضطراب ,فمرض اليد أن يتعذر
    عليها البطش ومرض العين أن يتعذر
    عليها النظر والرؤية ومرض اللسان أن
    يتعذر عليه النطق ومرض البدن أن يتعذر عليه حركته الطبيعية أو يضعف عنها)))ياالله ياالله ياالله
    ده علم فسيولوجى وباثولوجى وسيكولوجى وكل شى فى ثلاثة او اربعة اسطر والله ياتيمى مع الاخد فى الاعتبار ان كل هذه العلوم وكما قيل لنا نشأت فى الغرب فى القرنين الثامن عشر والتاسع عشر .
    ربنا يسامحنا ويحبب لنا طاعته
    اللهم امين يارب العالمين

    ReplyDelete
  22. موضوع جاااااااامد جدااا وانت جايب اسألة حلوة اووي الواحد دايما بيسألها لنفسه
    بس في حاجة واحدة انا مش قدرة احددها
    في اعتقادي الانسان اللي بيعيش حياته بالطول والعرض ده مش بيكون سعيد بل بالعكس جدااا حياته بتكون كلها مشاكل يعني انا بتيجي عليا فترات اعك الدنيا فيها بس مش لدرجة اني اسيب الصلاة خالص بس اصلي مثلا بدون تركيز افوت يوم من غير مااصلي انام من غير مااصلي العشا...او اصلي بس اعك الدنيا في حاجات تانية..الفترة دي بتكون اسوأ فترة خلافات كتير بيني وبين مامتي...نفسيتي بتكون مدمرة
    يعني اعتقد سعادة الناس اللي عايشين حياتهم كده بمزاجهم بتكون سعادة ظاهرية فقط ده ان وجدت اصلا
    مش عرفة هي كل الناس كده ولا في ناس بتكون سعيدة وحياتها ماشية ميه ميه ومفهاش مشاكل رغم انها بعيدة عن ربنا
    واكيد لازم الموضوع ياخد مجهود ووقت وسنين عشان الواحد يقدر يثبت علي حاجات معينه ويقدر يطيع ربنا
    فهو موضوع حلو اوي وانا بشكرك عليه
    وبعتذر علي الاطالة
    واعتذر للغيبة الطويلة دي
    تحياتي

    ReplyDelete
  23. ست البنات ,

    و عليكم السلام و رحمة الله و بركاته يا دكتورة ,

    هو فعلا المدونة دي قائمة أساسا على توظيف كلام السلف -اللي معظم الناس لم تكن لتقرأه إن وُجد منفردا- ضمن كلام عادي بالعامية علشان الناس تقرأه ,
    لكن أنا فعلا في الحقيقة مش بخترع :)
    إنما الخير كله في كلام السلف رحمهم الله ..

    و بالنسبة للجيش بقيت ظابط خلاص ,و هترحل آخر إبريل , دعواتكم معانا ,

    جزاكم الله خيرا

    ReplyDelete
  24. وحي القلم ,

    جزانا و إياكم

    و شكرا جزيلا على المرور ,

    و ربنا يعيننا أجمعين على على العمل بما نقول ,


    جزاكم الله خيرا

    ReplyDelete
  25. دكتورة نور ,

    و عليكم السلام و رحمة الله و بركاته ,

    فعلا يا دكتورة ,
    كلام ابن القيم دائما قيم ,

    بجد ابن القيم خصوصا بحس فعلا إن كلامه مش زي أي كلام أي حد تاني ,
    سواء كان الأسلوب الأدبي ,
    أو الوعظي ,
    أو حتى العلمي في التقسيمات و التفريعات و غيرها

    سبحان الله ..

    رحمه الله و رحم سلفنا الصالح ,

    و نفعنا بما قالوا ..

    شكرا جزيلا على مرورك يا دكتورة نور ,

    ReplyDelete
  26. أحلى حياة ,

    أهلا و سهلا بيكي ,
    و الحمد لله إن الموضوع كان بفائدة ,

    و بالنسبة للنقطة إن اللي بيعيش حياته بالطول و بالعرض ممكن يكون سعيد أو لا ,

    هو أيوة لازم يكون تعيس ,

    لكن زي ما في كلام ابن القيم , ممكن يصل به الحال إنه ما يفرقش معاه إنه يكون تعيس , أو إنه يفقد لذة الطاعة , لأنه ممكن فعلا يُران على قلبه , أو إنه يحاول يلهي نفسه بحاجات مؤقته علشان ينسى ,

    لكنه لازم مهما طال بيه الزمان في اللهو و غيره , لازم هيجي يوم و يحس إنه مش عارف يعيش كده و إنه لازم يرجع تاني و يدور على الطريق اللي فيه راحة قلبه ,

    شكرا جزيلا للمرور الكريم ,
    و عودا حميدا إن شاء الله ..

    ReplyDelete
  27. جزاكم الله خيرا

    جعله الله في ميزان حسناتك

    ReplyDelete
  28. القلم السكندري ,

    جزانا و إياكم ,

    و رزقنا و إياكم العلم بما نقول ,

    تحيتي

    ReplyDelete
  29. نفسىىىىى اخش مرة والاقى مضووع قصير يتقرا كله
    يبنى انت بتفكرنى بال Critical Reading
    مش كده يعنى مش مذاكرة وكمان فى المدووات اللله
    وحشنى جدا
    والموضوع كامن لذيذ بس رغاااااااااى
    سلام

    ReplyDelete
  30. حساااااااام

    أهلا و سهلا بيك يا حسام ,
    واحشني بجد انت كمان ’

    و معلش بقى , أصل الموضوع مش هيكتمل إلا لو كان طويل

    و بالنسبة للمواضيع القصيرة جدا كمان عندنا منها برضه ,

    خذ عندك يا سيدي :

    http://6azbeet.blogspot.com/2008/12/blog-post.html#comments


    http://6azbeet.blogspot.com/2008/12/blog-post_8407.html


    http://6azbeet.blogspot.com/2008/12/blog-post_30.html


    حاجة قصيرة جدا أهه , على الله تعجبك بس :)

    ReplyDelete
  31. يا سلام يا تيمي

    فعلا احنا محتاجين نطلع الفيات .. قصدي المرسيدس من الجراش

    ونعملها حملة تليين لغاية ما ربنا يسهلها ونعرف نكمل الرحلة


    قبل ما الرخص تتسحب !!!

    لأن ساعتها كل شئ هاينتهي

    ايه اللى أنا باقوله ده ؟

    متشغلش دماغك .. واحشني كتير والله .. ووحشاني كتاباتك

    ربنا يباركلك ويزيدك من العلم النافع ويجعلك ممن يعلمون فيعملون



    وإيانا

    ReplyDelete
  32. سمو الأمير ,

    منورني و الله يا باشمهندس ,

    فعلا زي ما انت قلت , احنا محتاجين نلين الأول و بعدين نسوق ,

    علشان لو سقنا على طول الموتور هيفوت و هيبوظ ,

    ربنا يهدينا و إياك ,
    و يوفقنا لما يحب و يرضى ,,

    ReplyDelete
  33. TIMMY !!

    ثلاث ارباعنا عايشين ومش عايشين للأسف

    البوصلة تاهت

    ربنا يحفظك ويحفظ كل اللي حواليك

    ReplyDelete
  34. تيمى

    الله ينور عليك بجد

    دايما كده مواضيعك بتيجى فى وقتها والله

    وكمان اسلوبك ظريف جدا وبيشجعنا كتير

    جزاك الله خيرا

    مع تحياتى

    ReplyDelete
  35. أنا قولت أجى اسلم على أخويا بعد مخلصت إمتحانات
    ربنا يسعدك
    دمت بكل الود

    ReplyDelete
  36. ولد الديرة ,

    للأسف كلامك صحيح و بشدة ,

    ربنا يرزقنا الاتباع على طريق الحق ,

    و أن يرزقنا العمل لما خلقنا له ,,,

    جزاك الله خيرا

    ReplyDelete
  37. ريمان ,

    جزانا و إياكم ,

    و الحمد لله إن الموضوع جاء في وقته ,

    ربنا ينفع بينا إن شاء الله ,

    و شكرا جزيلا على المرور و الزيارة ..

    ReplyDelete
  38. محمد غاليا ,

    يا أهلا و سهلا بيك يا محمد

    و ألف مبروك على انتهاء الامتحانات ,

    إن شاء الله بقى نشوفك كتير اليومين اللي جايين دول :)

    شكرا جزيلا على الزيارة يا محمد :)

    تحيتي

    ReplyDelete
  39. جزاك الله خير
    فعلا موضوع مهم جدا وحضرتك كاتبه بطريقة اكثر م رائعة برغم انه طوييييل جدا :D

    عنوان الموضوع ذكرنى بكتاب "وحضرتك حى ولا عايش"

    وطبعا لاننسى ان الدنيا دار عمل بلا حساب والاخرة دار حساب بلا عمل

    واخيرا
    لك منا جزيل الشكر ع الموضوع المميز

    ReplyDelete
  40. جزاك الله خيرا موضوع رائع وهام جدااا

    واجابات على اسئله تدور فى اذهان الكثيرين ربنا يجعله فى ميزان حسناتك

    ReplyDelete
  41. صحوة أسوان ,

    جزانا و إياكم ,

    و معلش بقى , التطويل ده مش عارف ألاقيله حل لحد دلوقتي :(

    عموما شكرا جزيلا على الزيارة ,

    و على الإضافة القيمة ,

    جزاكم الله خيرا

    ReplyDelete
  42. طالبة الفردوس ,

    جزانا و إياكم ,

    و نفعنا الله بما نقول و نكتب ,

    جزاكم الله خيرا
    و شكرا جزيلا على المرور ,,

    تحيتي

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ