زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

05 November, 2008

أنا خلاص هتجوز و (مش هبطل) أبص على البنات !!؟؟





أنا خلاص هتجوز و (مش هبطل) أبص على البنات !!



المشهد الأول - الوحيد - :

شاب( رِوِش) على جانب الطريق .. و إحدى (المزز) تمر من أمامه ..
و راجل كبير شوية - بتاع حاجة و تلاتين حاجة و أربعين سنة كده - على الجانب الآخر من الطريق

- الشاب (الظريف) : ادلع يا جميل .. يا أرض احفظي ما عليكي .. حلاوتك دي و لا حلاوة المولد –معلش .. أنا عارف إن المعاكسة دي قديمة .. بس أصلي ما نزلتش الـupdate من على النت لسة

... و هنا يرى الشاب ذلك الرجل (بيبحلق) في تلك (المزة) لكن (من تحت لتحت)

الشاب (بس في سرة المرة دي) : ايه الراجل ده ؟
مش عيب على سِنّه يقعد يبحلق كده ؟؟
ايه ؟؟ مش مكفياه مراته اللي في البيت جاي (يبص معانا) ؟؟
ساب ايه لشباب اليومين دول ؟؟

.... و في هذه اللحظة .. يأتي صوتٌ من أعماق الشاب .. من الأعماق قوي .. من تحت المعدة كده أول دوران يمين بعد البنكرياس على طول ,,,

يأتي صوت العربـ... قصدي صوت الضمير .. صوت العقل –و ما تسألش إيه اللي خلى صوت العقل ييجي من تحت مش من فوق .. يمكن كان فيه مصلحة بيقضيها من عند الكبد و لا حاجة

- صوت العقل : و إيه الغريبة في كده ؟؟
ما يبص يا أخي .. !! اشمعنى انت يعني ؟؟
و لا هو حلال ليك و حرام عليه يعني ؟؟


.... ده العقل شكلة مشيع هو كمان .. ربنا يستر !!

- الشاب : مممم لا هو طبعا حرام عليا و عليه ..

بس يعني .. أنا لسه مش اتجوزتش زيه .. و المفروض إنه رجل متجوز و محترم .. يبقى لما يتجوز يبطل يبص على البنات .. سعد هو اللي قال كده !!!

و بعدين أنا إن شاء الله لما أتجوز زيه ,
هبطل أبص و أظبط نفسي و أبقى آخر تمام
.. بس أنا أتجوز بس ..

- العقل : يا راجل ؟؟ و إيه اللي مخليك متأكد كده ؟؟
يعني أنت مفكر الراجل ده ما كانش ناوي يبطل برضه ؟؟
و انه عاجبه حاله كده ؟؟

- الشاب : طيب و ما بطلش ليه ؟؟ هو اتجوز واحدة (حنشورة) و لا إيه ؟؟ هههه

- العقل : لا يا عم ما تضحكش قوي كده .. ده اتجوز واحدة زي القمر .. "سوسن" بنت خالته ,
ده طبعا بعد ما فسخ خطوبته مع "صفاء" زميلته في الكلية لما لاقاها حاطة صور "مهند" على الموبايل بتاعها ..
و المسكينة مش عارفة إنه حاطط صور "اليسا" هو كمان ..
بس في (هيدن فولدر)=(hidden folder)

- الشاب : ياعم أنا مالي و مال سوسن و صفاء ؟؟ هو أنا من بقيت عيلته ؟؟

- العقل : آه صح .. معلش .. المهم .. قصدي إن مش كل اللي بيتجوز بيقدر يبطل اللي كان بيعمله قبل الزواج ..

يعني ما سمعتش المثل اللي بيقول : (من شب على شيء شاب عليه) ؟؟

- الشاب : بس السبب اللي كان قبل الزواج قد زال بالزواج ..
يعني زوال السبب يوجب زوال الفعل –الكلمتين دول كبار شوية
و بعد" سوزان" المفروض ما يبصش لواحدة تانية ..

- العقل : أولا اسمها "سوسن" مش "سوزان" ..

ثانيا مين قال إن زوال السبب دائما يؤدي إلى زوال الفعل ؟؟

و زي ما في الحديث الشريف , قال رسول الله –صلى لله عليه و سلم- : [( ثلاثة لا يكلمهم الله يوم القيامة ولا ينظر إليهم، ولا يزكيهم و لهم عذاب أليم:
شيخٌ زانٍ و ملك كذاب وعائل مستكبر )]

و الشيخ : هو الرجل الكبير في السن ؛ وذلك لأن الشهوة معه ضعيفة عادة، ولأنه مع كبر السن يكون قد عقل وعرف عقوبة الزنى، فيكون ذنبه أكبر مما لو زنى في حالة الشباب،

و الملك الكذاب رغم إن مافيش سلطة فوقه تخليه يخاف و يكذب

و الفقير المستكبر , و رغم إن الكِبر حرام على طول , إلا إن حالته أشد لأنه مافيش حاجة يتكبر على الناس بها

يعني ده دليل أهه على إن فيه أفعال الناس بتعملها حتى و ما فيش سبب ليها و لا داعية إلى تلك الأفعال ..

خاصة و إن تحول هذا الفعل من رد فعل – نتيجة للشهوة قبل الزواج- إلى عادة – يبص على العمّال و البطال- و العادة صعب إنها تفارق صاحبها ..

و اسمع لقول رسول الله –صلى الله عليه و سلم- : [({ عليكم بالصدق فإن الصدق يهدي إلى البر وإن البر يهدي إلى الجنة وما يزال الرجل يصدق و يتحرى الصدق حتى يُكتب عند الله صديقا , وإياكم والكذب فإن الكذب يهدي إلى الفجور , وإن الفجور يهدي إلى النار وما يزال الرجل يكذب و يتحرى الكذب حتى يُكتب عند الله كذابا )]


طبعا تقريبا كلنا سمعناه قبل كده .. بس هل أخدت بالك قبل كده من قوله –صلى الله عليه و سلم- : [( و يتحرى الكذب )] ؟؟

يعني مش مكفيه إنه بيكذب مثلا في موقف و لا حاجة .. أو لسبب شديد –رغم إن الكذب حرام على طول- لكنه : [( ويتحرى الكذب )] يعني بيدور على الكذب حتى و لو ما فيش داعي ليه !!!

زي الشاب اللي مش بيكتفي (بالقرف) اللي بيشوفه (غصب عنه) في الشارع و الكلية و غيره ..
لأ .. ده كمان (بيتحرى) البص و بيقف على (النواصي) و جنب العماويد –ده لو كان شاب (بيئة) ياي – أو تلاقيه (داير) على المولات ليل نهار ..

و مش عارف إنه و هو (بيتحرى) المعصية ممكن يُكتب عند الله من أهلها و ما يقدرش يبطلها حتى بعد انتفاء سببها بعد الزواج !!!

رغم إنه بيبقى عاوز يبطلها و مش لاقي لذة فيها لكنه كُتب من أهلها بتحريه إياها ..

قال قال ابن بطال شرحا لهذا الحديث :
وقوله ( وما يزال الرجل يكذب ) هو كما مر في قوله وما يزال الرجل يصدق في أنه إذا تكرر منه الكذب استحق اسم المبالغة وهو الكذاب .
وفي الحديث إشارة إلى أن من تحرى الصدق في أقواله صار له سجية
و من تعمد الكذب و تحراه صار له سجية ,
وأنه بالتدرب والاكتساب تستمر صفات الخير والشر .

يعني بتكرار الفعل .. بيتحول لعادة .. و ما بيبطلهاش حتى لو انتفى سببها ..
زي الملك اللي بيكذب ده
برضه ممكن واحد يفضل يبص حتى بعد الجواز ..

زي ما بيقول بعد السلف : ( يُفعل الذنب فَيَخْلَقُ -يعني يبلى و يصبح قديما- الإيمان في القلب، كما يَخْلَق الثوب، ثم يُغلَّف بالرَّان فيذبل، ثم يقسو (فَوَيْلٌ لِّلْقَاسِيَةِ قُلُوبُهُم من ذِكْرِ اللهِ) ثم يموت،
وعندها يُحْرم الإنسان لذَّة مناجاة الله، فعباداته بعد ذلك آليَّة لا روح فيها، لا تزكِّي نفسه، ولا تطهِّر رجْسَه، تلك عقوبة وبلية أي بلية،
ثم ينسى القرآن إن كان معه شيء من القرآن، ثم يَهْمِل الاستغفار،
ثم يحرص على الذنب مع عدم التلذذ به ، كلما حاول أن يعود أُرْكِسَ في ذنبه مع همٍّ وغمٍّ وحزن وخوف وذلٍّ لا يفارقه، أبى الله إلا أن يذلَّ مَنْ عصاه.)

و خلي بالك من ( ثم يحرص على الذنب مع عدم التلذذ به، كلما حاول أن يعود أُرْكِسَ في ذنبه مع همٍّ وغمٍّ وحزن وخوف وذلٍّ لا يفارقه، أبى الله إلا أن يذلَّ مَنْ عصاه.)

طيب هو الواحد هيعمل حاجة غلط ليه و هو مش عاوز يعملها و لا يجد فيها لذة ؟؟
إلا إن كانت صارت له عاده , أو طبع الله على قلبه فصار يفعلها من غير داعٍ إليها.

و كما قال أحد السلف - ابن القيم على ما أذكر- :

"ومنها ان المعاصي تزرع أمثالها
وتولد بعضها بعضا
حتى يعز على العبد مفارقتها والخروج منها
كما قال بعض السلف أن من عقوبة السيئة السيئة بعدها
وأن من ثواب الحسنة الحسنة بعدها

فالعبد إذا عمل حسنة قالت أخرى الى جنبها أعملني أيضا
فاذا عملها قالت الثانية كذلك وهلم جرا
فيتضاعف الربح وتزايدت الحسنات
وكذلك كانت السيئات أيضا

حتي تصير الطاعات والمعاصي
هيئات راسخة
و صفات لازمة
و ملكات ثابتة

فـلو عطل المحسن الطاعة لـضاقت عليه نفسه و ضاقت عليه الارض بما رحبت وأحسن من نفسه بأنه كالحوت إذا فارق الماء حتي يعاودها فـتسكن نفسه وتقر عينه

ولو عطل المجرم المعصية وأقبل على الطاعة لـضاقت عليه نفسه وضاق صدره وأعيت عليه مذاهبه حتي يعاودها

حتي أن كثيرا من الفساق ليواقع المعصية من غير لذة يجدها ولا داعية اليها إلا لما يجد من الالم بمفارقتها

كما صرح بذلك شيخ القوم الحسن بن هانيء -أبو نواس- حيث يقول :

وكأس شربت على لذة * وأخرى تداويت منها بها

وقال الآخر :

وكانت دوائى وهي دائي بعينه * كما يتداوى شارب الخمر بالخمر

ولايزال العبد يعاني الطاعة ويألفها ويحبها ويؤثرها حتى يرسل الله سبحانه برحمته عليه الملائكة تأزه اليها أزا وتحرضه عليها وتزعجه عن فراشه ومجلسه اليها

ولايزال يألف المعاصي ويحبها ويؤثرها حتي يرسل الله اليه الشياطين فتأزه اليها أزا

فالأول قوي جند الطاعة بالمدد فكانوا أكثر من أعوانه
وهذا قوي جند المعصية بالمدد فكانوا أعوانا عليه
"

أظن إن الكلام شارح نفسه .. ربنا يتوب علينا !!!


و بعدين يعني الظاهرة دي مش في الرجالة بس ..

دي في (الحريمات) كمان ..

يعني عمرك ما شفت واحدة كبيرة و (قَرشانة) قد طحنها الدهر بكلكله و مزقها بتطاوله –على رأي قِس بن ساعدة- ,
و تلاقيها لابسه قصير .. أو بنطلون ضيق أو حاطة (ميك أب) كامل على وشها المكرمش ده .. رغم إنك تلاقيها متجوزة و مخلفة و عيالها متجوزين كمان ..
أمال هي بتعمل كده ليه ؟؟

صحت من النوم مثلا (لقت نفسها بُرعي) و راحت قالعة العباية و الطرحة و لبست اللبس ده ؟؟
لا طبعا .. إنما (على الماضي دور) ..

دي تلاقي أهلها كانوا شايفين (البنت لسه صغيرة) ,
دخلت الثانوي و برضه (لسه صغيرة) ,
دخلت الجامعة و (خليها تفرح بشبابها شوية) ,

خلصت الجامعة و (خليها علشان تلاقي عريس) ,
لقت عريس (مغفل) و اتجوزت ,
و برضه (لحد ما أخلف و أبقى أم) , خلفت و بقت أم ,
خليني (لحد ما العيال يكبروا) , العيال كبروا و طلعوا لاقوا أمهم كده عادي ..
و طلعوا زيها .. و مافيش أي حاجة غريبة أو مُستغربة عندهم ..

و دي أمثلة بس ..

فيه أفعال كتيرة غلط بيعملها الرجالة و الستات بدون داعية من شهوة أو غيرها ..
و ده بسبب تعودهم عليها في حال الصغر ...


و لا يؤمن عواقبها في حال الكِبَر ..
يقول ابن الجوزي رحمه الله في صيد الخاطر :

" و قد يُهانُ الشيخ في كِبَرِهِ حتى ترحمه القلوب ،
و لا يدري أن ذلك لإهماله حق الله تعالى في شبابه .
فمتى رأيت معاقباً ، فاعلم أنه لذنوب ."

ملحوظة..

كنا تكلمنا من قبل عن العادات و كيفية الإقلاع عنها في موضوع :

عاوز أبطل ... ما تبطلشي !!!

و كلمة أخيرة ..

ياريت بلاش ( 9*الشر)=(تسعى في الشر)
و بلاش تجري و راء الذنوب و (تتحراها) ,
و كفاية الذنوب اللي بتيجي لوحدها لغلبة الشهوة أو غياب العقل و عدم تصور النهايات ..
أحسن تبقى زي الراجل (جوز سوسن) ده , أو تبقي زي الست (الخنشورة) إياها ..



و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com


أو على الأقل تذكر إنه منقول

......................


تحيتي

.....

56 comments:

  1. تحفة أسلوبك حلو :D

    بس أحب أعلق على حاجة ..


    و الشيخ : هو الرجل الكبير في السن ؛ وذلك لأن الشهوة معه ضعيفة عادة، ولأنه مع كبر السن يكون قد عقل وعرف عقوبة الزنى، فيكون ذنبه أكبر مما لو زنى في حالة الشباب،


    في سبب أقوى .. هو السبب اللي جعل حدّ الزنا مختلفا للمحصن عن غير المحصن..

    أي أن الشيخ أدعى لأن يكون محصنا + السن بقى والمفروض أن الإنسان كلما كبر عقل "المفروض!"


    تحياتي لك

    ReplyDelete
  2. 77Math

    أهلا و سهلا بيكي في المدونة ..

    و شكرا على المرور ..

    و المحد لله إن الأسلوب حلو و بيشد القاريء :)


    فعلا أنا معكِ فالوازع في حالة الشيخ يضاف إليه حد الرجم لا حد الجلد ..

    شكرا جزيلا على الإضافة ..

    و شكرا جزيلا على المرور ..

    و ربنا يهدينا و يوفقنا للعمل بما نقول ..

    تحيتي ..

    ReplyDelete
  3. السلام عليكم

    كيف احوالك مش ظهرت مكن زمان االحمد لله علي السلامه وان شاء الله مش تغيب تاني وتاخد تاجيل من الجيش باذن الله وابقي طمنا عليك كل فتره كده
    بالنسبه للموضوع انا اعتقد ان اي شاب بيبدا اي معصيه في الاول بانه مش بيكون عارف انها غلط بس المشكله انه بيعرف في الاول وبيكسل يعالج من نفسه وبيستني لغايه اما تتحول لعاده
    دمت بخير

    ReplyDelete
  4. و عليكم السلام و رحمة الله و بركاته

    ازيك يا حسن ؟؟

    معلش بقى كان فيه ظروف خلتني أختفي ..

    بس ربنا يسهل و يقدم اللي فيه الخير ..

    و كلامك فعلا صحيح إن الواحد ممكن يكسل يتوب عن المعصية و يستصغرها ..
    و بع دكده تبقى هي أكبر منه و تتحكم فيه ..

    و لا تنسنا من الدعاء ..

    جزاك الله خيرا

    ReplyDelete
  5. very nice
    "و ربنا يكرمك ان شاء الله و تأخذ الإعفاء إن شاء الله
    و متغيبش كثير

    ReplyDelete
  6. تيمى موضوعك جامد جدا وعايزة اقلك انة جة على الجرح وفعصة وبهدلة

    وطلبى بقى طب اية الحل؟؟؟؟؟؟؟؟؟

    لما الواحد ذنب بيتحول معاه لعادة وربنا يكون طبع على قلبة ؟؟؟؟؟؟؟؟؟

    طب هل فى امل يرجع وربنا يتوب علية منة ؟؟؟؟؟

    ReplyDelete
  7. السلام عليكم ورحمه الله وبركاته
    -------------------------------
    اذيك ياتيمى ايه الغيبه دى كلها انا قلت انك نسيت مدونتك ياراجل
    يلا حمدله على سلامتك

    ربنا يكرمك يارب ويرضيك ويجعلك من داخلين جنته بغير حساب
    وتاخد الاعفاء من الجيش
    اللهم امين

    بالنسبه للبوست فأولا بدايه شدتنى واسلوبك ظريف ووصلت حاجه مهمه جدا بأبسط الاساليب وابسط الامثله

    مقدرش ازود على كلامك حاجه غير انه ربنا يهدى شباب المسلمين اجمعين
    اللهم امين
    تسلم على البوست الرائع
    --------------------------------

    ReplyDelete
  8. اثبت دي عندك يا بيه :)

    "دافع الخطرة؛ فإن لم تفعل صارت شهوة وهمة؛ فإن لم تدافعها صارت فعلاً، فإن لم تتداركه بضده صار عادة؛ فيصعب عليك الانتقال عنها. "

    انتهى

    من غرر ودرر ابن القيم الجوزية :)

    عودا حميدا يا تيمي ,,,
    نورت المدونات يا معلمي :))

    ReplyDelete
  9. TiMmY

    السلام عليكم

    ربنا يفتح عليك وعلى أمة لا اله إلا الله

    وربنا يهدي (او ياخد) اصحاب الفتن اللي ربنا سبحانه قال عنهم انهم "يستحبون الحياة الدنيا على الآخرة ويصدون عن سبيل الله ويبغونها عوجا"

    اللهم لا تجعل مصيبتنا في ديننا

    تحياتي يا عم وابئ افتكرني :)

    ReplyDelete
  10. someone
    أهلا و سهلا بيك ..
    و شكرا جزيلا على المرور ..

    بصراحة أنا عاو اتعرف بيك .. الغموض اللي انت عامله ده مخليني أحس إنك عارفني في الحقيقية
    عموما ربنا يخليك لينا .. غامضا كنت أو غير ذلك :)

    تحيتي

    ReplyDelete
  11. جيهان

    أهلا بيكي ..
    و مين سمعك .. ده جه عندي جوة الجرح مش عليه !!
    ما أهو أنا أصلا غالبا مش بكتب غير علشان أعظ نفسي أولا
    يعني معظم كلامي بيبقى موجه ليا قبل الآخرين
    و لا يكون لخلوي مما أنه عنه الناس
    ربنا يتوب علينا

    و بالنسبة للعلاج .. فأنا حطيت رابط للموضوع بتاع العلاج
    كنت عامله من زمان .. حطيته في البوست
    "عاوز أبطل ما تبطلشي "
    يارب يكون فيه فايدة ..
    و طبعا الأمل موجود .. طالما بندعي ربنا و بنجاهد
    قال تعالى : (و الذين جاهدوا فينا لنهدينهم سبلنا)

    تحيتي ..

    ReplyDelete
  12. لؤلؤة الرحمن

    و عليكم السلام و رحمة الله و بركاته

    الله يسلمك .. و أنا ما نسيتش المدونة و لا حاجة ..
    لكن هي مسألة حاجة نفسية لا أكثر ..
    ربنا يهدينا

    شكرا جزيلا على مرورك و الحمد لله إن البوست عجبك ..

    جزاكِ الله خيرا ..

    و ربنا يهدينا و يهدي الجميع ..

    تحيتي

    ReplyDelete
  13. تيفا

    شكرا جزيلا على الإضافة ..

    رحم الله ابن القيم و جزاه عنا خيرا ..

    تحيتي لك ..

    و ابقى عرفني الجي ميل بتاع جنابك .. !!

    ReplyDelete
  14. ولد الديرة

    و عليكم السلام يا ناصر ..

    فتح الله علينا و عليك ..
    و هدانا و وفقنا لما يحب و يرضى ..

    شكرا جزيلا لمرورك ..

    و طبعا فاكرينك .. :)

    هي دي حاجة تتنسي ؟؟ :)

    تحيتي

    ..

    ReplyDelete
  15. انا بعتلك الجيميل ياريس
    ابقى اعمل المطلوب بقى

    كلمة السر كتكوت
    :D

    ReplyDelete
  16. "اللهم اني اعوذ بك من علم لا ينفع,و قلب لا يخشع ,و عين لا تدمع و دعوة لا يستجاب لها"

    و بالنسبة للمعرفة , ده كان يكون شرف لي بس في الحقيقة الطريفة إن الشخص الوحيد اللي أعرفوا اسمه تيمي في الحقيقة "فتاة" و في هندسة كذلك

    وجزاك الله كل خير و تأخذ اعفاء
    و شكر علي المرور ايضا علي مدونتي لكن توضيح ضغير جدا
    "this is not lyrics and not a song
    فلا تقلق و ربنا يكرمك و يقويك ان شاء

    ReplyDelete
  17. ما شاء الله على موضوعك .وأسلوبك الرائع
    إللى بيوصل المعلومة بسرعة ويخلنانكمل البوست للاخر .حفظك الله
    وياريت تشرفنى فى المدونة بعد new look

    ReplyDelete
  18. انا دايما كده يا تيمى مش بعرف اقول حاجه من بعد كلامك ده

    احييك بجد على كلامك واسلوبك ده

    والله مهما كتبت مش هقدر اوفيك حقك

    جزاك الله خيرا

    ربنا يهدى شباب المسلمين

    ReplyDelete
  19. السلام عليكم ورحمة الله

    مبدأيا كده اسلوبك جامد اخرررر 6 حاجات مش حاجة واحدة

    لكن بجد ما شاء الله اسلوبك سهل ممتنع...باسلوب سهل و بسيط بتوصل اللى عايز تقوله بمنتهى السلاسة

    ثانيا احب اوصل اعجابى الشديد بشكل المدونة ...الخشب بجد تحفة :ي الصرف باين بصراحة:p
    اصل انا مكبرة من ملاعب التدوين الفترة اللى فاتت ..بس واضح ان حصل طفرة جامدة فى الشكل..اينعم الكراسة المربعات دى كانت موترانى شوية وانا بقرا..بس المدونة بجد شكلها شيك ...وعايزة اعرف انت ازاى بتحط الايموشنز دى...لانها بجد ادت جو ظريف جدا للكلام :ي

    تحياتى ليك ولمدونتك الجميلة

    ReplyDelete
  20. السلام عليكم
    ورحمة الله تعالى وبركاته
    طبعا وزى اللى قبلى كلهم ماقالوا كلامك وترتبه وتسلسله فى الموضوع ممتاز
    لكن بصراحة كمان انا بيعجبنى الاشعار والحكم والدرر(على رأى Teva)اللى بتستشهد بها فى كتاباتك ممتازة وبتضيف الى كلامك ثقافة مالها حدود.
    ربنا يقويك
    ويقوينا جميعآ
    لترك المعاصى

    ReplyDelete
  21. السلامات عليكم تيمي

    صحيح كلامك عن اعتياد المعصية
    فكرني أول ما دخلت الجامعة كنت خايفة جدااااااااا أني أعتاد مناظر الشباب والبنات والاختلاط السائد وظليت أقول لنفسي ده مش الطبيعي ده مش الطبيعي ده مش الطبيعي طول مانا ماشية
    بعد كده سبحان الله مبقيتش آخد بالي خالص من المناظر دي
    يمكن ده إلف المعصية ولا الصدمة الأولى راحت :)) مش عارفة
    المهم
    تدوينة جميلة جدا
    ربنا يهدي البصاصين
    ويعمي عيون الشباب-عن الحرام طبعا-
    ويحجب البنات ويتحشموا

    تحياتي
    وجزاك الله خيرا

    ReplyDelete
  22. أسلوب ساحر وعبقرى ويدل على موهبة أدبية
    وظرف غير عادى وكمان إلتزام دينى عالى
    بالتوفيق

    ReplyDelete
  23. some one

    ==========
    اللهم اني اعوذ بك من علم لا ينفع,و قلب لا يخشع ,و عين لا تدمع و دعوة لا يستجاب لها"
    ==========

    نعوذ بالله من ذلك ..
    مع أننا واقعون فيه !!

    و بالنسبة للمعرفة .. فأعتذر فالاسم لا يدل على النوع ..
    و أهلا بيكي يا باشمهندسة ..
    و معلش . أصل أنا عندي فوبيا من كل "مجهول" زيي كده ..
    بحد إنه متخفي عني بالذات .. يبقى عارفني ..
    معلش .. هتعالج إن شاء الله :)

    و بالنسبة للكلمات ..
    الحمد لله إنها ما طلعتش أغنية ..
    علشان الشيطان ما يوزنيش و أدور عليها !!
    بس كلماتها حلوة جدا ..
    طيب صحيح هي مش lyrics أمال هي ايه ؟.
    و مين اللي كاتبها ؟؟
    محرد فضول :)

    و جزاكم الله خيرا على المرور

    ReplyDelete
  24. د/همسة

    أهلا و سهلا بيكي
    و شكرا جزيلا على التعليق ..

    و إن شاء الله أتشرف بزيارة مدونتك النهاردة .

    و شكرا جزيلا على التشريف و الزيارة
    تحيتي

    ReplyDelete
  25. ريمان

    أهلا و سهلا بيكي

    و ما يهمش .. ما تقوليش حاجة ..

    مرورك وحده يسعدنا ..

    و أهم حاجة الاستفادة ..

    جزانا و إياكم ..

    نفعنا الله و إياكم بما نقول و هدانا لما يحب و يرضى

    تحيتي ..

    ReplyDelete
  26. نرمين

    و عليكم السلام و رحمة الله و بركاته

    شكرا جزيلا على المرور
    و التعليق
    و الإعجاب بالأسلوب :) اللي الحمد لله مش ممل و أرجو أن يكون مش مُخِلّ

    و شكرا على إعجابك بشكل المدونة ..

    كله ببلاش على فكرة .. مافيش صرف و لا حاجة

    قبنوري بيعمل كل حاجة بالتقسيط :)

    و بالنسبة لحكاية المربعات فوالله عاملالي ارتباك أنا كمان
    و حاولت أشيلها من الكود .. بس لقيت العملية كلها هتبوظ ..

    ربنا يسهل ..

    و بالنسبة للإموتيكونز فمن أي منتدى من اللي بكتب فيهم ..

    تحية واحدة تكفي .. فـ"التحيات" لله ..

    جزاكم الله خيرا ..

    تحيتي

    ReplyDelete
  27. دكتورة نور

    و عليكم السلام

    دائما زيارتكِ تشرفني .. و تسعدني

    هو أنا مش قد الإطراء ده كله ..
    فإني على عرجتي أحاول ..
    فإن سبقت فكم لرب الورى من فرج
    و إن تخلفت فما على أعرج حرج

    يعني ده كله من باب التعاقل .. و ليس العقل
    فقد يبلغ الطالع شأو الضليع
    و عد في زمرة العقلاء : المتعاقل الرقيع ..

    معلش .. حبيت أخليكي ما تنخدعيش بس
    ربنا يهدينا و يسترنا و يوفقنا لما يحب و يرضى

    تحيتي

    ReplyDelete
  28. ست البنات

    السلام عليكم يا دكتورة

    فكرتيني أنا كمان بأول ما دخلت الجامعة ..
    كنت مش متعود على مظهر البنات اللي كاشفة شعرها
    فأول ما دخلت كنت بقول : يااااه ؟؟ إيه ده !! :(
    هم عاملين كمده و مش مكسوفين ؟؟

    كنت كقروي ساذج بهرته أضواء المدينة زي ما بيقولوا

    لكن الحمد لله الذي جعلنا من أهل "الأقاليم" , ده الحال في القاهرة و الاسكندرية .. أعوذ بالله

    الحمد لله الذي نجانا من مرحلة الجامعة دي

    ربنا يعمي عيوننا كلنا ... عن الحرام طبعا :)

    و يستر البنات و يرد عليهن حياءهن !!

    جزانا و إياكم ..

    و تحية واحدة تكفي ..

    ReplyDelete
  29. غير معرف
    لكم تسعدني و "تحيرني" تعليقات الغير معرفين

    شكرا جزيلا على الإطراء

    و يارب تكون موهبة أدبية بجد و ليست مزيفة ..

    و بالنسبة لحكاية "اتزام ديني " دي .. فمش معاك فيها
    اللهم اجعلني خيرا مما يظنون و اغفر لي مالا يعلمون

    و مش بقولها تواضع و الله و لا حاجة ... لكنها الحقيقة ..

    و أنا أعلم بـ"مصائبي" !!

    عموما جزاك الله خيرا على المرور

    و لا تنسنا من الدعاء

    جزاك الله خيرا

    ReplyDelete
  30. صحيح ايه أخبار الجيش؟

    ReplyDelete
  31. يا الله علي جمال اسلوبك
    انت بتعمل حاجة حلوة وفى نفس ذات الوقت بتاخد عليها حسنات
    ربنا يكرمك ويجازيك خير وهيديك الى الخير

    بجد الواحد بيفرح لما يلاقي ان فى شباب صغير بيفكر بالشكل ده
    وبيحاول يقنع غيره كمان
    بجد ما شاء الله

    وبعدين بقه انت اصلا فطستني من الضحك
    ايه حوار البنكرياس والفشة والكبدة ده
    وبعدين العقل نازل يقضي مصلحة فى الكبد؟
    ده انت خلاص شكل الجيش هيسك

    عموما الجيش اصلاح وتهذيب
    والجيش للجدعان
    بس بردو يا رب تاخد تاجيل
    امين

    ReplyDelete
  32. أخى العزيز
    أول زيارة ليا لمدونة حضرتك
    بس بجد اسلوبك جميل قوى
    وفعلا عندك حق الى بيتعود على حاجة على طول بيعملها
    تحياتى
    دمت بكل الود

    ReplyDelete
  33. يارب تاخد اعفي من الجيش
    يلا اي خدعة
    مش تاجيل بس


    بالنسبة للموضوع

    فالذيذ
    مش بطال
    او شغال
    هههههههههههه

    لالا بجد بهزر

    حلو جدا وعجبني كل كلمة فية
    وربط الاحاديث كمان
    هايل والله جزيت خير
    يااخي العزيز
    ومدونتك لذيذة
    هبقي اتفقدها كدا شوية بعد اذنك يعني

    ربنا معاك

    سلامم

    ReplyDelete
  34. ست البنات

    شكرا جزيلا على السؤال

    لا هو لسة "السماع" يوم 23 مِنُّه :)

    دعواتكم معانا ما يطلبوش ميكانيكا بور و لا يوم ميلادي ..

    يااااااااارب .. و يكون خير إن شاء الله

    بجد ما تنسوش الدعاء ..

    تحيتي

    ReplyDelete
  35. maha zein

    ألف شكر على المرور ..

    و شكرا جزيلا على التشجيع ..

    و ربنا يجعل العمل ده فيه فايدة ..
    و يثيبنا عليه .. و يغفر لنا الزلات و الغلطات الكتيرة اللي الواحد بيعملها فيه

    بصراحة الشباب الصغير ده مش صغير قوي يعني :)

    و بعدين بصراحة الواحد لما بيحس إنه مش بيعمل حاجة في دنيته لآخرته بيحس بالخنقة جدا

    ربنا يهدينا و يوفقنا لما يحب و يرضى ..

    و بالنسبة للبنكرياس و اللسعان و الجيش ..
    دي لسة "ريحة" الجيش بس ..

    التأثير الحقيقي يوم 23 الجاي إن شاء الله ...

    يوم الإرجاء .. اللي هنعرف فيه إن كنا "هنتشرف" بخدمة مصر ..

    و لا هيسحبوا مننا الشرف ده و يدونا تأجيل ..

    دعواتكم معانا :)

    ReplyDelete
  36. محمد غاليا

    أهلا و سهلا بيك في المدونة ..

    و نورتنا بالزيارة الغالية دي ..

    شكرا جزيلا على المرور و التعليق ..

    "تحيتي" لك ..

    تحية مفردة ..
    فـ"التحيات" لله .

    شكرا جزيلا أخي محمد

    ReplyDelete
  37. my hopes

    يارب .. يسمع من بقك ربنا
    و آخد تأجيل .. لأن الإعفاء ما بتجيش في طبي بس :)
    و الكشف الطب عدى خلاص :)

    و شكرا جزيلا على الزيارة و التعليق ..

    الحمد لله إن الموضوع عجبك ..
    و الإسلوب يكون سهل و مش ممل .. و في نفس الوقت يبقى خير مخل إن شاء الله

    يشرفنا مرورك على طول .. من غير اذننا :)

    تحيتي

    ReplyDelete
  38. العزيز تيمى

    بجد موضوع طويل
    انما جميل جدا جدا جدا

    واسمح لى ان اوضح لك وللصديقة 77Math امرا صغيرا
    وهو ان المحصن ليس المقصود به السن فمن الممكن ان يكون سنه عشرون عاما او اقل ويكون محصنا
    فالمحصن فى الشريعة هو من سبق له الزواج
    والعلة من ذلك انه قد تمكن من الحلال وادرك فضله وبذلك لا يصح ان يعامل معاملة غيره

    تحياتى دوما

    ReplyDelete
  39. أستاذtimmy
    شكرا على مرورك فى المدونةأما عن موضوعات التنمية البشرية فأنا من محبى التنمية البشرية جدا بس لازم المدونة تبقى متنوعة
    ******************
    بس مدونة الرقائق جميلة جدا وأنا نفسى أشارك فيها بس مش عارفة أبعت المواضيع إزاى

    ReplyDelete
  40. أستاذtimmy
    شكرا على مرورك فى المدونةأما عن موضوعات التنمية البشرية فأنا من محبى التنمية البشرية جدا بس لازم المدونة تبقى متنوعة
    ******************
    بس مدونة الرقائق جميلة جدا وأنا نفسى أشارك فيها بس مش عارفة أبعت المواضيع إزاى

    ReplyDelete
  41. الازهري

    أهلا و سهلا بك في مدونتي التي ازدانت بمرورك

    و شكرا جزيلا على الإعجاب .. أخجلتم تواضعنا :)

    و شكرا على الإضافة أخي الكريم

    هو فعلا المحصن هو الذي سبق له النكاح بعقد صحيح
    حتى لو كان غير متزوج حيتنا زنى .. و لكن لأنه سبق له النكاح


    شكرا جزيلا أخي الكريم على المرور ..

    تحيتي

    ReplyDelete
  42. د.همسة :

    مدونتك جميلة جدا

    و فعلا لازم تكون منوعة و تعكس كل حاجة عنك ..

    ده كان مجرد تخمين إن الطابع العام سينحى ذلك الاتجاه :)


    و بالنسبة لمدونة رقائق لازم تبعتي الميل اللي على الجي ميل علشان نضيفك في قائمة الـadmins
    اللي في المدونة , علشان تقدري تضيفي فيها موضوعات

    تحيتي

    و بالتوفيق دائما ..

    ReplyDelete

  43. السلام عليكم ورحمة الله وبركاته
    باشمهندس ابس
    موضوع جميل بجد ..
    جمع بأسلوب سلس بين النقد والنصيحة والابتسامة

    أكيد ليا تعليق تاني بس لما اشرب كوباية الشاي وارجع بقى على رواقه ههههه

    عندي كلمتين محشورين في زوري عن خواطر النفس اللي طرحتها في موضوعك ومدافعهتا قبل أن تصبح همّا ومن ثم فعلا

    شكرا لسؤالك ..

    خالص تحياتي

    ReplyDelete


  44. سيمباوي

    و عليكم السلام و رحمة الله و بركاته يا أحمد ..

    و على فكرة أنا هنا معروف بـ"تيمي" و ليس "ابسا" :)

    بس أي حاجة تناديني بيها عادي يعني ..

    كلها متغيرات ترمز لشخص واحد :)

    شكرا جزيلا على الزيارة ..

    و في انتظار الكلمتين المحشورين .. بعد ما الشاي يسلك زورك إن شاء الله :)

    في أمان الله

    ReplyDelete
  45. ما شاء الله موضوع جميل

    جزاك الله خيرا

    ReplyDelete
  46. موضوع مهم جدااا والاجمل انه من شاب
    ربنا يرزقك بكل الخير ويهديك دائما الى طاعة الله

    ReplyDelete
  47. طالبة الفردوس ..

    شكرا جزيلا على المرور ..

    جزاكِ الله خيرا

    تحيتي

    ReplyDelete
  48. موناليزا

    شكرا جزيلا على مرورِك ..

    غفر الله لنا مالا تعلمون و جعلنا خيرا مما تظنون .

    تحيتي

    ReplyDelete
  49. ههههههه اضحكــَ الله سِنَكــ


    الاسلوب جميل وشيق

    سبحان الله فعلا اللى فيه عاده استحاله يبطلها ولو اتجوز 100 واحده

    كان فيه شيخ جليل بيقول

    فى شرج الحديث بتاع الزواج اللى هو


    عن عبدالله بن مسعود قال رسول الله صلى الله عليه وسلم " يا معشر الشباب ! عليكم بالباءة . فإنه أغض للبصر ، وأحصن للفرج ، فمن لم يستطع منكم الباءة فعليه بالصوم . فإن الصوم له وجاء " رواه الترمذى
    الشيخ فسره وقال ان الباءه اللى هيه الزواج تكون اغض للبصر

    ما قالش تغض البصر ليه

    لا جه هنا بأفعل التفضيل

    قال أغض وده معناه انه الرجل اصلا بيغض البصر فالزواج بقى ييجى يجعله اغض للبصر

    مش حد ما بيغضش ويقول الزواج هيساعدنى

    هنا الشيخ والكلام على لسان الشيخ : ان الانسان اللى مش بيغض بصره بعد الزواج بيكون عدم عض البصر اكتر يعنى بيزيد وده لانه الزواج بيفتح عينه على اشياء يمكن ما يكونش واخد باله منها فيبتدى يبص اكتر


    الله المستعان

    هدى الله جميع بنات وشباب المسلمين لما يحبه ويرضاه

    ReplyDelete
  50. أمة الله ..

    شكرا جزيلا لمرورك ..

    و جزاكِ الله خيرا على الإضافة ..

    بجد أنا أول مرة آخد بالي من شرح الحديث بالشكل ده ..

    الواحد أكتر حاجة بيخاف منها لا يفضل على الحاجات الغلط اللي بيعملها لد بعد الجواز ..

    ربنا يوب علينا و يهدينا ..

    جزاكم الله خيرا على المرور .. و الإضافة القيمة ..

    تحيتي

    ReplyDelete
  51. جزاك الله خيرا اسلوبك جميل اوى والمدونة جميلة جدا

    ReplyDelete
  52. ايوشة

    جزانا و إياكم ,

    و ربنا ينفعنا بما نكتب في المدونة ,
    و يجعله لينا مش علينا !!

    جزاكم الله خيرا

    ReplyDelete
  53. ما شاء الله عليك بجد

    أول مرة أزور المدونة
    بس سامحنى ان الوقت ميسعفنيش اقرأ كل المواضيع
    بس بجد بدايه مبشرة بكل الخير
    ان مدونتك متميزة
    وأكيد هتابعها
    والموضوع مفيد

    _______________

    أكيد كلامك عالعين والراس
    كلام فعلا مليان إحساس
    وياريت يعمل بيه كل الناس
    مانت استعنت من الأساس
    بكلام حبيبنا رسولنا الكريم
    وبإذن الله يهدينا العظيم
    مالناش غيره داالرحيم
    يارب يجازيك خير مهو العليم

    أختك ليتل كات

    ReplyDelete
  54. little_cat
    الحمد لله إن المددونة عجبتك
    و تشرفي في أي وقت يا فندم
    جزاكم الله خيرا

    ReplyDelete
  55. بسم الله ماشاء الله

    بجد بجد تحفه وجزاك الله كل خير

    ReplyDelete
  56. Anonymous

    جزانا و إياكم
    و ما تنساش تدعو لنا بالخير بالله عليك
    و شكرا جزيلا على المرور و التعليق

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ