tag تاج

السلام عليكم ...

النهاردة أول تاج لي في المدونة ..

هو التاج من مدونة sheva لحسن
و تراقيعو
و أحمد شرف
حسب الأقدمية :)

مع إني قلت لحسن إن إجاباتي هتكون رخمة و فاترة ..
بس أهي هي دي شخصيتي و خلاص

أنا هدمج التاجز في بعضهم ..

وكله بيطلع في الغسيل :)



س 1-أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

هو حلم واحد .. ألا أكون موجودا ..

أو كنت موت نفسي زمان قبل التكليف ... و ما سمعتش كلام والدتي لما مرة لقتني ماسك شوكة و أنا في رابعة ابتدائي و قالت لي إنه حرام ..
كان المفروض آخد بالي إني لسه مش مكلف و أخلص على نفسي ساعتها :)

و طبعا ما ينفعش أعدل فيه خالص :)

علشان كده هحققه في أولادي إن شاء الله بأن لا أنجبهم



س 2-أذكر 5 أحلام على الأقل تخص مستقبلك ؟

1- الاقي شغل بفلوس كتير

2- أستخدم الفلوس الكتير دي في تصنيع عربية مصرية 100%
و لو ما قدرتي أصنع توك توك على الأقل :)

3- أعمل جمعية زي
US AI
كده بس تكون اسمها
Islamic Aid
في البلاد المسلمة الفقيرة بدل جمعيات النصارى التبشرية و الصليب الأحمر اللي بيعمل تحته التبشيريين
و ما تخافوش .. مس هنعمل دعوة للنصارة .. كفاية علينا المسلمين المنكوبين قوي ..

4- أقعد في شقة لوحدي في الاسكندرية

5-اعمل زي أكادمية للموهوبين ... مش في الومسيقى و التمثيل و الكلام الفارغ ده ..
لكن في الهندسة و مشتقاتها علشان تطلع لنا علماء بدل اللي "بيهجوا" على برة



س 3-أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟

مافيييييييش


س 4-أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟

ما فييييييييييييييييش


س 5-لمن تهدي هذا التاج ؟

أهديه لكل بيت في مصر :)

أي حد عاوز ياخدة يا رجالة :)




بدأت التدوين من امتى ؟ودخلت العالم ازاى؟

من حوالي سنة ...
بس في الياهوو ...
كنت مخنوق من دنيتي و عاوز أكلم أي حد ..
فبدأت أكلم نفسي في المدونة ...
و بعدين لقيت ناس بيعبروني و بيواسوني هناك
و بعدين بقت أحبهم رغم إنهم مش مسلمين ..
و بعدين سيبت التدوين بتاع الياهوو خالص علشان ما أتعلقش بغير المسلمين .. بعد ما اعتذرت لهم إني هسيب المدونة و لغيتها


ايه كانانطباعك فى البدايه؟
مش عارف ..
أهو كان مكان بقول في اللي جوايا و خلاص
بدل ما "أطق" و أموت



ايه اكتر حاجه كرهتها؟

لما حد يرد عليك و " يجري " يعني يشتم و يجري و لا يناقش .. فبمسح تعليقه و خلاص


حاسس ان التدوين له تاثير؟
متهيأ لي ..
زي الصحافة كده ..


و كل عام أنتم بخير ...

و معلش .. التاج طلع فاتر زي ما قلت لكم .. علشان كده أنا هحط بعدة موضوع تاني على طول
علشان "أداري عليه" داري على تاجك يقيد

تحيتي

مش قادر خلاص .. عاوز أرجع أسمع أغاني تاني

مش قادر خلاص .. عاوز أرجع أسمع أغاني تاني !!!

لا لا لا لااااااااااااااااااااااااااا

مش هقدر أكمل خلاص ..

أنا بقى لي شهرين مبطل أغاني ... بس خلاص .. مش قادر .. عاوز أسمعها تاني ..

مش قادر أصبر أكتر من كده !!!!!

أنا جبت آخري خلاص !!!

.
.
.

طيب طيب بالراحة .. على مهلك يا سيدي .. هدي أعصابك ..

عاوز تسمع أغاني ؟؟ زي زمان ؟؟

طيب عاوز ترجع تاني تتفرج على روتانا و (ميلوتشي) ؟؟؟

طيب مش قادر تمسك نفسك خلاص و عاوز ترجع تبص ( عاللي رايحة و اللي جاية )

تحت أمر سيادتك ... بس ممكن أكلم طنـ.... قصدي ممكن أكلمك بس الأول ..

بص يا سيدي .. أنا موافق إنك ترجع تسمع و تتفرج و تبص و تعمل كل حاجة ... بس ممكن طلب ( رفيع ) قبل ما تعمل كده ؟؟

اتخيل نفسك سمعت الأغنية أو اتفرجت على (اللي بالي بالك) أو للبنت اللي ماشية دي ..

و بعدين عاوزك توقف أي (ميكروباص) على طريق (الحاضر- المستقبل) السريع ... و تقول له وديني (نصف ساعة قدام يا أسطى) ...

-لو مافيش ميكروباصات ممكن تاخد حصان عادي هو شكلة حمار مش حصان بس هيقضي الغرض -

و تشوف نفسك كده ... حاسس بإيه دلوقتي ؟؟؟

حاسس بطعم الأغنية بعد النص ساعة ؟؟؟ و لا (بمتعة المشاهدة) أو بـ(حلاوة البصة) ؟؟

لا ... صح ؟؟

علشان كده ابن القيم من أيام زماااااااااااان قال لك إن بعد الشهوة بحبة صغيرين .. الواحد مش هيحس بأي لذة ... بل على العكس .. هيحس بالضيق و الذل و كل حاجة وحشة ..

قال رحمه الله : " اللذة المحرمة ممزوجة بالقبح حال تناولها مثمرة للألم بعد انقضائها

فإذا اشتدت الداعية منك إليها ففكر في انقطاعها وبقاء قبحها وألمها

ثم وازن بين الأمرين وانظر ما بينهما من التفاوت...

والتعب بالطاعة ممزوج بالحسن مثمر للذة والراحة

فإذا ثقلت على النفس ففكر في انقطاع تعبها و بقاء حسنها ولذتها وسرورها
و وازن بين الأمرين وآثر الراجح على المرجوح

فإن تألمت بالسبب فانظر إلى ما في المسبب من الفرحة والسرور واللذة يهن عليك مقاساته

وإن تألمت بترك اللذة المحرمة فانظر إلى الألم الذي يعقبها ووازن بين الألمين

ومن فكر في الدنيا والآخرة علم أنه لا ينال واحدا منهما إلا بمشقة ...... فليتحمل المشقة لخيرهما و أبقاهما "

يبقى بالله عليك العملية يعني تستاهل ؟؟؟

بقى علشان حتة أغنية و لا فيلم مش هتحس بمتعتهم بعد نص ساعة ... تبوظ حالتك النفسية بالشكل ده .. لا .. و اتسجلت عليك سيئات كمان !!

يعني لو كنت صبرت شوية في الأول ... مش كان أحسن ؟؟

هتقول لي يا عم التفكير و (الشيطان صايع) بقى و النفس الأمارة و ..... إلخ إلخ ..

هقول لك اجمد ياد .. و خليك زي الأسد مش زي الكلب ..!!!

اقرأ القصة دي كده .. لابن الجوزي في صيد الخاطر :

" من نازعته نفسه إلى لذة محرمة فشغله نظره إليها عن تأمل عواقبها و عقابها

و سمع هتاف العقل يناديه : و يحك لا تفعل فإنك تقف عن الصعود و تأخذ في الهبوط

و يقال لك : ابق بما اخترت

فإن شغله هواه فلم يلتفت إلى ما قيل له لم يزل في نزول

و كان مثله في سوء اختياره كالمثل المضروب :

أن الكلب قال للأسد : يا سيد السباع غير اسمي فإنه قبيح

فقال له : أنت خائن لا يصلح لك غير هذا الاسم

قال : فجربني فأعطاه شقة لحم و قال : احفظ لي هذه إلى غد و أنا أغير اسمك

فجاع و جعل ينظر إلى اللحم و يصبر
فلما غلبته نفسه قال : و أي شيء باسمي ؟ و ما كلب إلا اسم حسن فأكل..!!!
و هكذا الخسيس الهمة القنوع بأقل المنازل المختار عاجل الهوى على آجل الفضائل

فالله الله في حريق الهوى إذا ثار و انظر كيف تطفئه

فرب زلة أوقعت في بئر بوار و رب أثر لم ينقلع

و الفائت لا يستدرك على الحقيقة

فابعد عن أسباب الفتنة فإن المقاربة محنة لا يكاد صاحبها يسلم "

هتقول لي الكلب يعمل إيه و هو شايف حتة اللحمة قدامة ؟؟؟

ما هو طول ما هو قاعد قدامها كده أكيد هيضعف و ياكلها في الآخر ..

برضه هقول لك هو المفروض ما كانش يقعد (يبحلق) فيها كده و يفكر في حتة اللحمة دي و يشغل نفسه بحاجة تانية .. لأنه طول ما هو بيفكر فيها يبقى هياكلها ..

علشان كده ابن القيم قال :

" وأعلم أن الخاطرات والوساوس تؤدي متعلقاتها إلى الفكر
فيأخذها الفكر فيؤديها إلى التذكر
فيأخذها الذكر فيؤديها إلى الإرادة
فتأخذها الإرادة فتؤديها إلى الجوارح والعمل فتستحكم فتصير عادة ...
فردها من مبادئها أسهل من قطعها بعد قوتها وتمامها.

فصلاح الخواطر بأن تكون مراقبة لوليها وإلهها
صاعدة إليه دائرة على مرضاته ومحابه فإنه سبحانه به كل صلاح ومن عنده كل هدى ومن توفيقه كل رشد ومن توليه لعبده كل حفظ ومن توليه وإعراضه عنه كل ضلال وشقاء فيضفر العبد بكل خير وهدى ورشد بقدر إثبات عين فكرته في آلائه ونعمه وتوحيده وطرق معرفته وطرق عبوديته وإنزاله إياه حاضرا معه مشاهدا له ناظرا إليه رقيبا عليه مطلعا على خواطره وإرادته وهمه فحينئذ يستحي منه ويجله أن يطلعه منه على عورة يكره أن يطلع عليها مخلوق مثله أو يرى بنفسه خاطرا يمقته عليه"

يعني اقطع الطريق من الأول ... ما تفكرش أصلا في الأغاني و انت مش هتسمعها ..., و اشغل نفسك بحاجة تانية علشان ما ترجعلهاش ,

و زي مابيقولوا :

من تلمح حلاوة العافية هانت عليه مرارة الصبر

يعني أهم حاجة تقطع الطريق من الأول ... و لو لقيت (العملية باظت) ...
خد التاكسي إياه للمستقبل نص ساعة قدام و اتخيل نفسك ...
ايه اللي فاضل لك بعد سماع الأغنية أو قضاء الشهوة دي ...
مافيش حاجة غير الذنب اللي اتسجل عليك ... و اللذة راحت و خلاص ..

و أختم كلامي بكلام ابن الجوزي رحمه الله في صيد الخاطر :

من عاين بعين بصيرته تناهي الأمور في بداياتها ،

نال خيرها ، و نجا من شرها .

و من لم ير العواقب غلب عليه الحسن ،

فعاد عليه بالألم ما طلب منه السلامة ، و بالنصب ما رجا منه الراحه .

و بيان هذا في المستقبل ، يتبين بذكر الماضي ،

و هو أنك لا تخلو :

أن تكون عصيت الله في عمرك ، أو أطعته .

فأين لذة معصيتك ؟ و أين تعب طاعتك ؟


هيهات رحل كلٌ بما فيه !

فليت الذنوب إذ تخلت خلت !

.
.
.

آه و الله ... رحل كلٌ بما فيه !!!

و لم يبقى إلا أثر الذنوب !!!

هداني الله و إياكم لما فيه الخير ..


و وفقنا و إياكم لما يحب و يرضى .


و رزقنا الجنة و أجارنا من النار ...


و لا تنسوا الدعاء ...


و جزاكم الله خيرا على المرور ..



>> حقوق النشر للجميع لو عاوز تنشره << بس ياريت تذكر رابط المدونة :
6azbeet.blogspot.com
......
....
..


=======================


و بخصوص الأغاني هي كانت مثل ضربته و لم أقصد أن يكون الموضوع عنها ...

لكن للاستزادة في موضوع الغناء و حكمة أرجو مشاهدة هذا العرض :

لحفظ الفلاش اضغط هنا بزر الفارة الأيمن ثم أختر حفظ باسم

تحيتي ..




و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com

أو على الأقل تذكر إنه منقول

......................

تحيتي

.....