زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

19 June, 2008

لما بتبقى مخنوق ...بتشرب بمناخيرك ؟؟؟


بسم الله الرحمن الرحيم ,,


النهاردة إن شاء الله , سنتناول موضوع يهم الشباب من الجنسين 

-أكيد مش كريم 14 -

دلوقتي طبعا كلنا عارفين , 

إن الواحد لو عاوز يريح "ودانه" .. "هيشرب" عصير مانجة !!!
و لو عاوز يدلع "مناخيرة" ... "هيسمع" أغنيتين كدة "تحت اللسان" ,,,, !!!
أما بقى لو عاوز يمتع "عينيه" ... فعليه و على one man show "ريحة" ما حصلتش !!!


حد حاسس بأي حاجة غلط ؟؟ !!
و لا ما حدش واخد باله أصلا ؟؟؟



متهيأ لي فيه غلطة بسيطة بس

ان اللي عاوز يريح ودانه ... يسمع حاجة حلوة -و بلاش أغاني -
و اللي عاوز يريح مناخيره .... يشم ريحة حلوة -و بلاش one man show برضه -
أما لو عاوز تمتع عينيك .... يبقى هتتفرج على مناظر طبيعية خلابة 

-حلوة خلابة دي -


حد عارف أن اعاوز ايه ؟ و لا لسه ؟؟

بص يا سيدي ,,,


دلوقتي لو جنابك مخنوق ؟؟ و مش طايق نفسك .. بتعمل ايه ؟؟
غالبا يعني , بتعمل حاجة تريح أعصابك ... تسمع موسيقى هادية , أو موسيقى صاخبة
تتنطط معاك و تطلع الـ"باور" اللي جواك , أو "تترزع" قدام التليفزيون تتفرج على أي حاجة "مسلية"
أو لو كنت في الكلية مثلا , تكلم الـ"girl friend" بتاعتك و تمشي معاها شوية و تشتغلوا بعض علشان تستريح , أو لو ربنا كارمك و "دادي" جايب لك عربية, تتطلع "تخمس" بيها شوية .... أو أو أو أو ... حاجات كتيرة ممكن تعملها لما تبقى مخنوق .

صح ؟؟
صح و لا لأ؟؟
أكيد معظمنا بيعمل حاجة من دول , و لا أزكي نفسي ,

بس لو جينا ناخد العملية "جد" شوية ,, و تيجي نشوف ايه "الحتة" اللي بتبقى عاوزة "تتظبط" لما بنبقى مخنوقين ؟؟
يعني ممكن تقول انها : نفسك , قلبك , روحك , .... 

من الآخر "جواك " هو اللي بيبقى عاوز يتظبط ,

لكن للأسف بنروح جايين و بكل غباء

بدل ما نظبط روحنا , نروح "شغالين" على حاجة تانية نظبطها , 
أكننا بالضبط عاوزين نريح وداننا رحنا رايحيين نشرب عصير !!!

في حين اننا المفروض لما نكون مخنوقين ,

 نشوف ايه اللي بيسعد و يريح الروح و النفس و نعمله , 

مش نروح نعمل اللي بيريح الحاجات التانية في جسمنا و نعمله ...

كما يقول شيخ الأدباء - رحمه الله - : 
"إذ لسنا نجهل أن للنفس حظا ليس للجسد
وأن الفارس لا يربط في الإصطبل,وإن كان جواده فيه،

  
غير أننا مع ذلك نحاول أن نغذو النفس من اللذة الجسمية
وأن نعلف الفرس والفارس من طعام واحد !!!

  
فهذا التناقض الذي نسيء به إلى أنفسنا هو الذي يجعل النفس خائفة من الحياة
إذ لا تجد فيها غير ألم التعبد للأهواء والشهوات..." 

[الرافعي - المساكين]

طيب و ايه اللي بيريح الروح ؟؟
باختصار ......, الصلة بالله عز وجل ,
بأي نوع من أنواع الطاعة ,,

تصلي , تتوضى -حتى لو اتوضيت بس و ما صليتش- , تقرأ قرآن , 
أو حتى يا سيدي تقعد ساكت كافي خيرك شرك , 
بس ما تروحش تظبط حاجة تانية غير الحاجة اللي عاوزة تظبيط ,

طيب أنا راضي ضميرك يا راجل ,
عمرك كنت مخنوق , 

و رحت سمعت شوية موسيقى و لا مشيت مع واحدة و لا جريت بالعربية , 
و حسيت انك استريحت ؟؟

آه !!!


أيوة ممكن فعلا تكون استريحت ,, "لحظيا"  

لكن أول ما خلصت رجعت لك الخنقة تاني , 
ده لأنك ما عالجتش المكان اللي عاوز يتعالج ,

و اسمع لكلام ابن القيم في الموضوع ده :
"إن في القلب فاقة لا يسدها شيء سوى الله تعالى أبدا 

وفيه شعث لا يلمه غير الإقبال عليه 
وفيه مرض لا يشفيه غير الإخلاص له وعبادته وحده 
فهو دائما يضرب على صاحبه حتى يسكن ويطمئن إلى إلهه ومعبوده 
فحينئذ يباشر روح الحياة ويذوق طعمها 
ويصير له حياة أخرى غير حياة الغافلين المعرضين"

يبقى لما تبقى مخنوق , و تيجي تطلع زهقك , 

افتكر على طول انك مش بتعالج الجزء الصحيح , 
انت بتدي "مسكنات" لأماكن "تانية خالص" غير الأماكن اللي المفروض تعالجها ..

أنا طولت عليكم , صح ؟؟

بس أرجو أن تكون الفكرة قد وصلت ,,,

و إن كنت لم أنتبه بالذي *** وَعَظْتُ به فانتبه أنت به


و أنا و الله ما بكتب الحاجات دي علشان أنا واد مخلص و متظبط و عامل الحاجات الصح كلها , 

إنما أعظ نفسي بموعظتي لغيري ..

و لا تنسوني من أي دعوة صالحة بظهر الغيب ...
"اللهم اغفر له و ارحمه و تب عليه و وفقه لما تحب و ترضى و جميع المسلمين و المسلمات "
ملحوظة : ادعي بضمير و من القلب ,علشان الملك يدعيلك و يقول آمين و لك بمثل , و مش هتخسر حاجة يعني ...

--------------------------

الموضوع مصاغ بأسلوبي المتواضع عن قصة في محاضرة للشيخ عبد الرحمن العريفي بعنوان "استمتع بحياتك" :
http://www.islamway.com/?iw_s=Lesson&iw_a=view&lesson_id=48079
--



و طبعا >> حقوق النشر للجميع <<
لو رأيت إنه يستحق النشر
و ياريت تذكر رابط المدونة :

أو على الأقل تذكر إنه منقول
......................

تحيتي

.....

21 comments:

  1. ماشي ياعم

    مع اني رديت عليك هنا

    بس موضوع جامد

    ReplyDelete
  2. ألف شكر ليك على التعليق يا دكتور حمود
    و الله ما خدش بالي غير دلوقتي ...

    نفعنا الله و إياكم به , و هدانا الله و إياكم ..

    ReplyDelete
  3. جامد جدا
    ربنا يكرمك

    ReplyDelete
  4. some one

    أهلا و سهلا بيك ..

    و شكرا جزيلا على المرور ..

    و ربنا يكرمنا و إياك ..

    تحيتي ..

    ReplyDelete
  5. جميل اوى موضوعك بس عايز تظبييييييط
    هههههههههههههههههه
    وكل اللى علقوا تعليقهم جميل بردوا بس محتاج تظبييييييط
    هههههههه
    بجد برافو عليك موضوعك لذيذ0000000000

    ReplyDelete
  6. ايمي

    أهلا و سهلا بيكي

    و الحمد لله إن الموضوع عجبك :)

    و الأسلوب ما كانش ممل ..

    و ربنا يهدينا و نعمل بما نقول ..

    تحيتي

    ReplyDelete
  7. شكرا جزيلا على مرورك يا أحمد

    ربنا يخليك :)

    ReplyDelete
  8. الكلام المناسب في الوقت المناسب ...

    "اللهم اغفر له و ارحمه و تب عليه و وفقه لما تحب و ترضى و جميع المسلمين و المسلمات "

    بضمير والله :)

    ربنا يصلح حالك وحالنا ,,,,

    ReplyDelete
  9. آآآآآآآآآآآمين ,

    و إياكم يا مصطفى ,

    جزاك الله خيرا

    ReplyDelete
  10. موضوع رااائع جداااا

    كل فترة لما بأكون متدايقة بأقرأ فيه

    أستأذنكم فى نقله أخانا الفاضل مع ذكر المصدر إن شاء الله

    وجزاكم الله عنا خيرا

    عارفة ان الموضوع قديم لكن كان واجب إنى أدخل وأشكر حضرتك عليه لأنه كان له أثر كبير عليا وعلى من معى

    بوركتم

    ReplyDelete
  11. د/مسلمة :

    جزانا و إياكم يا دكتورة ,

    و حقوق النشر في المدونة للجميع , أي حد عاوز ينقل أي موضوع ينقله

    و ربنا يهدينا و إياكم ,
    و ينفعنا بما علمنا

    ReplyDelete
  12. السلام عليكم ،
    المدونة أكثر من رائعة ما شاء الله،
    أتمنى أنى أقدرأعمل حاجة مفيدة زيها
    ما شاء الله، ربنا يتقبل وينفع بها إن شاء الله
    جزاكم الله خيراًَ ..

    ReplyDelete
  13. Sarah Mohamed :
    و عليكم السلام ,
    و الحمد لله أن المدونة أعجبتكِ ,
    نسأل الله أن ينفع بها ,
    و إن شاء الله تجدي الوسيلة التي تنفعي بها الناس إن شاء الله
    نسال الله أن يستخدمنا و لا يستبدلنا
    جزاكم الله خيرا

    ReplyDelete
  14. طول ما الإنسان مبيخالفش تعاليم دينه و صوت ضميره مش هيحس بضيق ، و حتي لو حسيت بضيق...
    في أفضل من ربك تشكيله ؟؟!

    القراءة في مدونتك ممتعة يا تيمي ، في إنتظار المزيد...
    ; )

    ReplyDelete
    Replies
    1. لا فض فوك
      فكما يقول تعالى :
      و من أعرض عن ذكري فإن له معيشةً ضنكا

      نسأل الله أن يشرح صدورنا و ييسر أمورنا

      Delete
  15. ما شاء المولى سبحانه على ابداعك
    رزقك الله الزوجة الصالحة والذرية التي تكون قرة عين لك
    كلامك مبكي ومفرح ، جمع كل شئ

    ReplyDelete
    Replies
    1. جزاكم الله خيرا
      و استجاب لدعائكم
      و وقانا و إياكم شر نفوسكم

      Delete
  16. In the pic.:
    "Angry" without "e" after the "g"
    :)

    ReplyDelete
    Replies
    1. عايزة أطبع الموضوع أنا بس مش عايزة أقول حتة:"تسمع موسيقى هادية , أو موسيقى صاخبة"

      أقول إيه ؟؟

      Delete
    2. تم إزالة الصورة ,
      و تم تعديل أخطاء إملائية تانية الواحد ما كانش واخد باله منها :(
      شكرا جزيلا

      و بالنسبة لموضوع الموسيقى الهادية أو الصاخبة فأنا جايبه في سياق الحاجات الغلط اللي بعض الناس بتعملها
      و لو عاوزة تحذفيه مافيش مشكلة ,
      احذفي العبارة كلها

      جزاكم الله خيرا

      Delete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ