زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

26 June, 2008

امسك نفسك ..لأنك لو بصيت .. صعب تغمض عينيك !!



بسم الله الرحمن الرحيم

...


...

في مكان ما من العالم :

واد يا "أ" .. واد يا "ب" .. تعالوا جربوا "الزغروف" ده ... ده متعمر و جامد طحن !!!!

تعالى ياد منك له , ما تبقوش "نايتي" كده ....

و في مكان آخر ... من العالم برضه :

هاي يا "أ" , هاي يا "ب" , ايه ؟؟ ماحضرتوش الـ"session" ليه ؟؟
طب حيث كده .. تعالوا أفرجكم على حاجة على الموبايل .. إنما ايه ؟؟ ... روكس =(rocks) .. هوت قوي !!!


و في مكان تالت -ما تخلصنا بقى يا عم - :

شوف حضرتك يا أستاذ "أ" و يا أستاذ "ب" , فيه مناظرة مع أعضاء من جماعة "الاشتغالات و الفطشة" النهاردة ..
ياريت تحضروا ... و خليكوا منفتحين على الرأي الآخر , و ما تاخدوش فكرة مسبقة إنهم غلط علشان جذورهم كانوا غلط ... be open minded


خلاص ما تزعلوش , فيه أماكن تانية من العالم بس مش هنروحها .. ابقى اتفرج على عالم الحيوان و انت تزور العالم كله أمام " شاشات التلفزة "

تعالى بقى نشوف ايه اللي حصل لكل من الأسطى "أ" , و المعلم "ب" ...

بفرض إن "أ" ... خد له نفسين , أو بص بصة جريئة , أو راح يعرف "الرأي الآخر" و هو "لو يكن ذا علم" .

و .... إن "ب" .... طلع "نايتي" و ما جربش "الزغروف" , و "بيتكسف" و ما اتفرجش , و أخذ بالأحوط و لم يحضر المناظرة لأنه عارف انه ما عنوش علم كفاية ..

أولا : عمُنا "أ" بعد ما يروح :
- ياعيني على الدماغ العالية .. ده ايه الحلاوة دي ؟؟ ما كنتش أعرف إن الحاجات دي بتعلي الدماغ كده .. قشطة يا واد ....
- ياي على الصورة الهوت =(hot).. ياه لو كانت دي الـ"girlfriend" بتاعتي .. كووووووووول يا مان ..
- امممم , هو الفقرة اللي أثارها المناظر بتاعهم عن القرآن دي كانت شبه مقنعة .. أنا عارف انه أكيد غلط .. بس ... مش عارف .. مش عارف طيب أرد عليه إزاي ؟؟ طيب ما هو الراجل لم يتكلم إلا بالدليل .. أحسن يكون صح و احنا اللي غلط ... !!!

ثانيا : السيد المحترم "ب" :
- ولاد الـ**** بيقولوا علي "فرفور" علشان ما رضيتش أجرب ؟؟ لا , ده أنا جامد و أقدر أشرب قدها ميت مرة .. بس أنا اللي مش عاوز .. ما أنا عارف آخرتها إدمان و كلام فاضي ..
- ياااه .. أنا ليه بس ما بصتش ؟؟ شكلها كانت صورة جامدة ناااااار , و بعدين بصه واحدة ما كانتش هتعمل حاجة يعني .. .. لا لا يا عم الحمد لله , كان زماني متعلق بيها و لابسة في دماغي و كل شوية أتخيلها ..
- اممم .. زمانهم قالوا علي متحجر العقل و مش قد المناظرات و ضعيف الحجة .. بس افرض انهم قالوا حاجة أنا مش عارفها ؟؟ أشك بقى في ديني ؟؟ لا يا عم الحمد لله , لما أبقى أعرف أساسيات ديني بعد كده أبقى أشوف الناس التانيين بيقولوا ايه ...

.... و بعد عشرين سنـ... قصدي بعد يومين :

- الباشا "أ" نفسه في نفسين كمان , أو عاوز بصة تانية .. حاجة أجمد كده , أو عمال يفكر هو صح و لا غلط , و دينه هو الصح و لا دينهم !!
- أما "ب" , فنسى حكاية "الزغروف" دي , و حكاية الصورة كمان , لأنه ما جربهمش فلا يجد شوق إليهم , و ما فيش شك عنده في جهة دينه ...


تعالى انت بقى أما أقول لك ,لما تيجي تقارن بأمانة بين حال "أ" و "ب" , مين الأحسن ؟؟

"ب" خلاص ما فيش حاجة في دماغة , عايش في سلام .. بيس يا مان

أما "أ" فإما :عمال يدور على "قُرني" علشان يجيب له "سوجارة" تانية , أو بيسأل على "مودي" و موبايلاتك يا مودي , أو دماغة بيودي و يجيب مش عارف مين الصح و مين الغلط .
أو : ندم و تاب على اللي عمله , و قال انه هيبطل خلاص , بس كل ما يشم ريحة سيجارة "نفسه تهفه" على واحدة , أو لما يقعد لوحده يقعد يتخيل الصورة إياها , أو كل ما يفتكر الجماعة إياهم .. يقعد يشد في شعره .. هم الصح و لا احنا ؟؟


كما قال الشاعر :
تفنى اللذات ممن ذاق صفوتها *** من الحرام و يبقى الذل و العار
تبقى عواقب سوء من مغبتها *** لا خير فى لذة من بعدها النار
-ده بالنسبة لبلدياتنا بتاع السيجارة و الصورة -


و كل شوية يتمنى أنه لو ما كانش بدأ فيها كان أسهل له من انه يبدأها و بعدين يحاول يبطلها , كما يقول ابن القيم :
"الصبر على الشهوة أسهل من الصبر على ما توجبه الشهوة،
فإنها إما أن توجب ألماً وعقوبة،
وإما أن تقطع لذةً أكمل منها،
وإما أن تضيع وقتاً إضاعته حسرة وندامة،
وإما أن تثلم عرضاً توفيره أنفع للعبد من ثلمه،
وإما أن تذهب مالاً بقاؤه خير له من ذهابه،
وإما أن تضع قَدْراً وجاهاً قيامه خير من وضعه،
وإما أن تسلب نعمة بقاؤها ألذ وأطيب من قضاء الشهوة،
وإما أن تُـطَـرِّق لوضيعٍ إليك طريقاً لم يكن يجدها قبل ذلك،
وإما أن تجلب هـمّـاً وغـمّـاً وحزناً وخوفاً لا يقارب لذة الشهوة،
وإما أن تُنْسي علماً ذكره ألذ من نيل الشهوة،
وإما أن تُشَمِّت عدواً وتُحْزِن ولياً،
وإما أن تقطع الطريق على نعمة مقبلة،
وإما أن تُحْدِث عيباً يبقى صفة لا تزول.
فإن الأعمال تُـوَرِّثُ الصفات والأخلاق."

فلو الواحد "مسك نفسه" من الأول ...
و لو يرتكب ذلك الفعل ...
لكان الأمر عليه أهون من أن يرتكبه ثم يندم بعد ذلك
و يحاول تركه فيجد الأمر أصعب من لو لم يكن قد عرف هذا الذنب أصلا

و لو كان أخد باله إن الرسول -صلى الله عليه و سلم- , حين سُئل عن نظر الفجأة فقال : "اصرف بصرك" .. بسرعة , على طول , أحسن تتعلق بيه و ما تقدرش تبطله ..

و لو كان مر عليه حديث رسول الله -صلى الله عليه و سلم- : "ضرب الله تعالى مثلا صراطا مستقيما و على جنبتي الصراط سوران فيهما أبواب مفتحة و على الأبواب ستور مرخاة و على باب الصراط داع يقول: يا أيها الناس ! ادخلوا الصراط جميعا و لا تتعوجوا و داع يدعو من فوق الصراط فإذا أراد الإنسان أن يفتح شيئا من تلك الأبواب قال: ويحك لا تفتحه فإنك إن تفتحه تلجه , فالصراط الإسلام و السوران حدود الله تعالى و الأبواب المفتحة محارم الله تعالى و ذلك الداعي على رأس الصراط كتاب الله و الداعي من فوق واعظ الله في قلب كل مسلم "

و هذا الحديث من أبلغ الدلالات على أن البعد عن المعصية ابتداءا هو الطريق الأنجع للنجاة منها , و أننا إذا اقتربنا منها وقعنا فيها ..
"كالراعي يرعى حول الحمى ... يوشك أن يرتع فيه"

تلاقيه يجرب سيجارة و يقول .. أنا عارف نفسي ...
قوي و مش هدمن الحاجات دي ...
أنا بجربها بس .. لكن عمري ما هتعلق بيها ....

و فعلا يسيبها ,,,
لكن تيجي عليه مرة يبقى مخنوق , يروح رايح جايب سيجارة و "معفر" ... على الرغم انه لو ما كانش جربها مع زمايله في الأول , كان عمره ما هيجيلها و هو مخنوق لأنه كان هيبقى مش عارفها أصلا و ما تعرضش ليها قبل كده

من الآخر يعني علشان أنا طولت ...

كل اللي عاوز اقوله ... إن عدم معرفتك بالشيء ... أسهل من معرفتك إياه و محاولتك الإقلاع عنه !!!

سهله دي ؟؟

يعني في " الجهل زينة " في بعض الحاجات ...

و إياك و الفضول !!!!
لأنه هيوديك في داهية على طول
...
...

بس خلاص

تحية "رطبة" ... علشان الحر ده





و لا تنسوا كاتب الموضوع الأصلي من دعوة صالحة إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com


أو على الأقل تذكر إنه منقول

......................


تحيتي

.....



10 comments:

  1. ههههههههههههههههه
    بجد طريقتك في الكلام بتجذب القارئ
    والمواضيع بتاعتك دايماً هادفه .. جزاك الله خيراً يا بشمهندس ..
    أنا اول مره اخد بالي انك عندك مدونه ..
    ان شاء الله هتشوفني هنا كتيييييييييير :))

    ReplyDelete
  2. smska
    بجد بجد مرورك أسعدني

    أنا ما صدقتش نفسي لما لقيت حد عبرني في المدونة
    خاصة إني ما ليش علاقة بمجتمعات البلوجرز و مش عارف ابدأها لسه ..

    و برضه مش عارف حكاية "بشمهندس" دي اتعرفت إزاي ..

    بس المهم إن الموضوع أفاد و الحمد لله

    و يارب أعمل بما أقول ..
    و لا تنسونا من الدعاء ..

    و منتظرين "الشوفان" الكتييييييييير إن شاء الله

    ReplyDelete
  3. السلام عليكم
    في البداية أحب اقولك إن حتى الآن ما وقعش قي ايدي تدوينة طويلة زي دي و كملتها للآخر
    انت بقى كسرت القاعدة
    و خلتني اكمل التدوينة من غير ملل
    لا استنى كده
    تقريباً حصلت معايا مرة قبل كده
    علشان الصدق بس
    المهم
    بجد أسلوبك حلو جداً
    و الفكرة اللي بتتكلم عنها في غاية الأهمية
    و انا معاك تماماً فيها
    اللي يقول يقول المهم أنا أبقى كويس قدام ربنا ثم نفسي

    القصيدة اللي في البوست اللي فات حلوة قوي على فكرة

    بجد انت لازم تنتشر في مجتمع البلوجرز
    علشان بجد عندك فكرة و هدف غاية في السمو
    غير إن اسلوبك كمان جميل و يشد
    حرام المدونة تبقى مقتصرة عليك و بس

    خالص احترامي

    يلا سلام

    ReplyDelete
  4. ňįĝŗő

    و عليكم السلام و رحمة الله و بركاته

    أهلا و سهلا بيك في المدونة ..
    و الحمد لله إني قدرت أكسر الرقم القياسي بتاعك :)

    شكرا بجد على تعليقك و تشجيعك ....

    و أنا بحاول "أنتشر في المنطقة" بس لسه أتلمس طريقي في البلوجرز

    تحيتي لك ,
    و لأهالي المحلة .. جيراننا .. بس من بعيد شوية :)

    ReplyDelete
  5. عجبنى موضوعك اوى و كلامك صح و عجبتنى اوى جمله "ابعد عن الفضول لانه هيوديك فى دهيه علطول" ضحكت اوى لما قريتها اصلها صح جدا ,على فكره بعرف معلومات دينيه كتير من كلامك مكنتش اعرفها
    ربنا يكرمك

    ReplyDelete
  6. أهلا و سهلا بيكي يا عبير ..

    شكرا بجد على المرور ..

    فعلا ,, المضول ده حاجة وحشة جدا ..

    و احنا ما بنحسش بالغلط بتاعها غير بعد ما الفاس تقع في الراس ..

    نفعنا الله و إياكِ بما نقول ..

    و وفقنا العمل بما نقول ..

    تحيتي

    ReplyDelete
  7. تحية أرطب من التحية بتاعتك يا هندز

    انت راجل كده - مش كده -

    وادينا ماسكين اللي ممكن يتمسك اهو وربك يسترها !!

    سلام

    ReplyDelete
  8. مصطفى ..

    انت عارف الرطوبة النسبية عندكم كام علشان تحكم إذا كانت تحيتك أرطب و لا تحيتي أنا ؟ :)

    هو أنا راجل فسيولوجيا .. أيوة ..

    لكن عمليا .. و لا أفيدك .. !! :)

    أنا أجزم بكوني ذكرا و أشك بكوني رجلا ...


    و ربنا يسترها ....

    شكرا يا تيفا ..

    ReplyDelete
  9. فعلا معاك حق ف كل الكلام
    بس بالنسبة لموضوع المناظرة ده

    كنت عايزة احكى موقف حصل معايا
    كنت باتكلم مع واحدة صاحبتى من المكسيك

    جالها تليفون وهى بتكلمنى ف راحت تتكلم وجت اختها اتكلمت معايا

    كانت اول مرة اعرف انها واسرتها مش بيؤمنوا بوجود اله اصلا

    فضلت اتكلم معاها وماقدرتش امنع نفسى من انى احاول اخليها حتى تفكر

    وف الاخر سابتى ومشيت ورجعت صاحبتى تانى واعتذرتلى على طريقة كلامها والموضوع خلص على كدة

    بس وقتها مكانش قصادى حاجة اعملها وكلامها استفزنى بطريقة خليتنى عايزة اقنعها بس مكانش فيه فايدة للاسف

    وللاسف اكتر .. كلامنا ده ودانى لافكار على طول باندم عليها

    ومش قادرة اقول انها مش ف دماغى دلوقتى لانها لسة بتيجى ف دماغى من وقت للتانى ومش عارفة الاقيلها اجابة

    ولو كنت رفضت الكلام من الاول
    ماكنتش هاوصل للافكار دى اصلا

    ReplyDelete
  10. منى :

    بالنسبة للموضوع بتاعك ,
    ففيه ناس كتير حصل لها الكلام ده برضه ,

    و الأفكار اللي بقت تنتابك من حير لآخر بعد كلامك معاها دي مجرد وساوس شيطان أو شبهات ,
    و الحل الوحيد لعلاج الشبهات يكون بالعلم : (( إنما شفاء العي السؤال )) ,
    انتي ممكن الأفكار دي تكتبيها في استشارة لأي موقع إسلامي و يجاوبك عليها ,
    زي موقع www.islamweb.net
    أنا بستشير في الموقع ده على طول ,
    ادخلي على الموقع في قسم الاستشارات و قولي لهم كل اللي في دماغك ,

    و إن شاء الله هتلاقيها إنها حاجات بسيطة جدا , لكن الشيطان هو اللي بينفخ فيها و يهولها ,

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ