انتوا ليه متشددين كده ؟؟

 

 

السلام عليكم و رحمة الله ,

" لا يجوز "
" فِسقٌ و فجور "
" حرامٌ حرامٌ حرام "
 

 

أظن إن ده هو الانطباع اللي ناس كتيرة واخدينة عن السلفيين أو أصحاب الدقون بصفة عامة,

إنهم ( متشددين ) و هيحرموا على الناس عيشتهم ,

و رغم إننا وضحنا قبل كده في موضوع : 

ـ البطاطس حلالٌ شرعاً !! ـ 

حاجات كتيرة بيقولوا عليها حلال عادي ,

لكن النهاردة إن شاء الله عاوزين نتكلم عن ( التشدد ) بتاعهم ,
و الحاجات اللي بيقولوا عليها حرام ,

لكن قبل ما نبدأ عاوز أحكي لكم قصة حصلت للإمام أحمد بن حنبل في فتنة خلق القرآن ,

 
لما الخليفة كام واحد لعبوا في دماغه و قالوا له إن القرآن ( مخلوق ) ,
و الإمام أحمد وقف لهم و قال إن القرآن ( كلام الله ) و مش مخلوق ,
فطبعا الخليفة حبسه , و عذّبه 

علشان يرجع في رأيه و يبقى ( زي الناس ) و ( يبطل تشدد ) و يقول إن القرآن مخلوق و خلاص ,

لدرجة إن الخليفة ( بذات نفسه ) كان بيحضر تعذيب الإمام أحمد و هو بيتجلد ,
و يخلي الجلادين ( يبدلوا عليه ) علشان ( يتوصوا ) بيه :

" وجعل أحدهم يتقدم إلى الإمام أحمد فيضربه سوطين ثم يتنحى ثم يتقدم الآخر فيضربه سوطين ،
والمعتصم يحرضهم على التشديد في الضرب ،
ثم قام إليه المعتصم وقال له :
يا أحمد ... علام تقتل نفسك ؟؟
إني والله عليك لشفيق ,
فما تقول ؟
فيقول أحمد :
أعطوني دليلاً من كتاب الله و سنة رسوله حتى أقول به "
[ انظر القصة كاملة هـــنـــا ]

طبعا اللي يشوف كلام الخليفة للإمام أحمد ممكن يقول :
صحيح , هو غاوي يتعب نفسه ليه ؟؟
ما يقول مخلوق و خلاص زي الناس , إيه التشدد ده ؟؟

لكن رد الإمام أحمد على اللي ممكن يفكر كده كان :
" أعطوني دليلاً من كتاب الله وسنة رسوله حتى أقول به "


هو أنا يعني غاوي وجع قلب يعني و تعذيب و حبس ؟؟
بس ما أقدرش أقول حاجة من غير دليل من ( القرآن أو السنة )


و هذا هو مبدأ الناس الذين يراهم البعض ( متشددين ) في زماننا هذا ,
هم مش واخدينا رخامة و غاويين يصعّبوها على الناس و على نفسهم ,
لكن هم ببساطة ما يقدروش يقولوا عن حاجة حلال و هم عندهم دليل من ( القرآن و السنة ) إنها حرام ,

ما يقدروش يقولوا إن القروض بفائدة حلال
و هم عارفين إن ربنا بيقول : { و أحل الله البيع و حرم الربا } [ البقرة - 275 ]

و مايقدروش يقولوا إن الموسيقى حلال
و هم عارفين إن الرسول بيقول : (( ليكونن من أمتي أقوامٌ يَسْتَحِلُّونَ الحِرَ و الحرير و الخمر و المعازف)) [ البخاري ]
و ما يقدروش يقولوا إن الواحدة المخطوبة ينفع تخرج مع خطيبها لوحدهم
و هم عارفين إن الرسول بيقول (( لا يخلون رجل بامرأة إلا مع ذي محرم )) [ البخاري ]


هات لي أي حاجة بيقولوا عليها حرام و ما عندهمش فيها دليل من القرآن و السنة ...

و لو انت شايفهم متشددين في مسألةٍ ما ,
هات لهم دليل من ( القرآن أو السنة ) إنها حلال
و هم يمشوا وراك ,
دول بشر , و النفس البشرية أحب ما ليها إن كل حاجة تبقى حلال ,

لكن هات لي دليل ....
دليل واحد ... مش 140 دليل
 

و لا تنسوا كاتب الموضوع من دعوة صالحة بظهر الغيب :
أن يُصلح الله له شأنه كله و أن يهديه و يتوب عليه ,

و أن يُعِيذهُ من الهم و الحزن و العجز و الكسل

.......... ما تنسوش بالله عليكم ..........

>> حقوق النشر للجميع <<

بشرط عدم التحريف أو التغيير

و يا حبذا لو تذكر رابط المدونة
tazbee6.blogspot.com

أو تذكر أن الموضوع

" منقول من مدونة تظبيط "

ـ