ـ الليبرالية ليها أنياب !! ـ

يعني إيه الليبرالية ليها أنياب ؟؟


- يعني لو كنت في أوروبا ينفع تتجوز راجل زيك ...
لكن ما ينفعش تتجوز أكثر من زوجة واحدة !!

- يعني ينفع و انت بتسلم على واحدة ست تبوسها ( بوسة بريئة ) ,
أما لو رفضت تسلم عليها بإيدك .... تبقى متشدد و معقد نفسيا !!



- يعني مافيش حاجة اسمها ( لا إله إلا الله ) ,
لكن : ( الله إله ) , و عيسى إله , و بوذا إله .... خليك fair !!



- يعني يبقى مسموح للستات في فرنسا يمشوا عريانين ,
لكن اللي تلبس نقاب ... يتقبض عليها !!!

- يعني خالد سعيد و سيد بلال يموتوا من التعذيب ,

و البرادعي يزور أهل خالد سعيد و ما يعبرش أهل سيد بلال ... 
أصله ( ملتحي ) و العياذ بالله !!




- يعني لما عمرو أديب يحب تكون فيه ديموقراطية ,
لكن ( تولع الديموقراطية ) لو جابت الإخوان أو حماس!!

http://www.youtube.com/watch?v=SYl_-hOa_Eo




- يعني لما أئمة المساجد ينصحوا الناس يصوتوا بـ( نعم ) في الاستفتاء يبقوا : 
بيفرضوا الوصاية الدينية ,
و لما القسسيسين يقولوا للنصارى صوتوا بـ( لا ) .. يبقى : 
عادي يا عم ما تدقش !!


http://www.youtube.com/watch?v=DEy4YhV1ZdI&feature=related




- يعني نمسك في كلمة الشيخ يعقوب لما قال عن الاستفتاء ( غزوة )=معركة ,
و نسد وداننا لما ساويرس يسميها ( خناقة ) !!!!

http://www.youtube.com/watch?v=clM6vM4cDFk&feature=player_embedded

Think again !!

..................

ـ البطاطس حلالٌ شرعاً !! ـ

السلام عليكم و رحمة الله

طبعا كلنا عارفين الحملة الليبرالية و العلمانية ضد الإسلاميين المنتشرة اليومين دول
و أغلبنا عارف إنها غرضها الأساسي التخويف من الإسلام ,
علشان الناس ما تطالبش بتحكيم الإسلام
لأن ده بيتعارض مع مصالح العلمانيين و الليبراليين اللي ( عندهم حساسية ) ضد كل ما هو ديني
فبينشروا بين الناس إن الإسلام هيقطع ودانهم , و يركبهم جمال و حمير
و يحرم عليهم العربيات و الموبايلات و الساندويتشات و كل الحاجات ,
و يحرم عليهم عيشتهم كلها ,

علشان كده أنا حبيت أبدأ النهاردة بفقرة ( هل تعلم ) عن الإسلام :
هل تعلم ..
هل تعلم أن البطاطس حلال شرعاً !!
هل تعلم أن الخيار - سواء كان استراتيجي و لا عادي - يجوز أكله !!
هل تعلم أن عصير القصب , مش مُنكر و العياذ بالله !!

هل تعلم أن ركوب البسكلته أو الموتوسيكلات أو العربيات المرسيدس و حتى الفيات 128 ,
و لعب كرة القدم و الكورة الشراب ,
و استخدام الراديو و الموبايل و الأتاري و الكمبيوتر ,
و لبس القميص و البنطلون و الجلابية , و الجيبة و البلوزة و العباية ,
و أكل الرز و المكرونة الاسباجتي و الملوخية الناشفة و القُرَص اللي بعجوة و السادة و ......
كل الحاجات دي و غيرها .....

حلالٌ حلالٌ حلال !!

آه و الله , كل الحاجات دي حلال
أقول لك حاجة أجمد من كده الإسلام بيقولها ؟؟ 
خد عندك : 
الأصل في الأشياء كلها إنها حلال
إلا حاجات قليلة قوي ربنا حرمها علينا ,
مش تعنت لا سمح الله , لكن علشان هي حاجات ضارة ,
ممكن نكون احنا عارفين ضررها و ممكن نكون لسه مش عارفين ,

يعني الإسلام مش جاي يخنقنا و يحرم علينا عيشتنا ,
بدليل إن الحاجات الحرام -اللي هي أصلا ضارة- قليلة جدا بالمقارنة مع الحاجات الحلال ,

لأ , و ( المفاجأة الكبرى ) إن الإسلام بيأمر الناس بالتيسير , و بيبعدهم عن التشدد ,
قال تعالى : { يريد الله بكم اليسر ولا يريد بكم العسر } [البقرة: 185]
قال تعالى: { يريد الله أن يخفف عنكم } [النساء: 28]

بل كان رسول الله - صلى الله عليه و سلم - يحث الناس على استخدام الرُّخَص اللي ربنا سمح لينا بيها فقال :
(( إن الله يحب أن تؤتى رخصه ، كما يحب أن تؤتى عزائمه ))
[ الراوي: عبدالله بن عباس - المحدث: الألباني -
المصدر: صحيح الترغيب - الصفحة أو الرقم: 1060
خلاصة حكم المحدث: صحيح]

و ده كله زي ما وضحنا لأن الدين مش موجود علشان يعقد علينا عيشتنا و يخنقنا ,
بل كما قال الرسول :
(( إن هذا الدين يسر ))

[ الراوي: أبو هريرة - المحدث: الألباني
المصدر: صحيح النسائي - الصفحة أو الرقم: 5049
خلاصة حكم المحدث: صحيح]

و الرسول - صلى الله عليه و سلم - كان أفقه الخلق ,
و كان بيعمل زي ما قالت أمنا السيدة عائشة :
" ما خُيِّر رسول الله -صلى الله عليه وسلم- بين أمرين إلا أخذ أيسرهما ما لم يكن إثما ،
فإن كان إثما كان أبعد الناس منه " [البخاري و مسلم]

و هنا بقى مربط الفرس زي ما بيقولوا ,
( ما لم يكن إثماً ) ,

يعني مش علشان " الدين يسر " , و " يسروا و لا تعسروا " ,
يبقى كل حاجة نعملها و كل حاجة تبقى حلال ,
لأ ,
- فيه حاجات هتفضل طول عمرها حرام و لازم نبقى أبعد الناس عنها ,
و ما نقعدش نفحّر فيها و نحاول نخليها حلال ,
- أما باقي الحاجات فهي حلال و 
 ما حدش ييجي و يخليها حرام و يضيق علينا ,

علشان كده العلماء اللي فاهمين الدين صح كانوا بيقولوا :
" إنما الفقه رخصةٌ من ثِقة , أما التشدد فيحسنه كلُّ أحد "
 

لكن خلي بالك من حتة ( من ثقة ) دي
يعني ما تروحش تبحث في أقوال العلماء لحد ما تلاقي قول ضعيف أو مرجوح أو شاذ بيقول إن الحاجة دي حلال ,
و تروح قايل : حطها في رقبة عالم و اصبح سالم ,
لأ يا زعيم ,
فقد اتفق العل

ماء على أنه :
" من تتبع رخصة كل فقيهٍ تزندق "

و الخلاصة إن مش لازم كل حاجة في حياتنا تبقى حلال
فيه حاجات ( قليلة ) هتفضل حرام طول عمرها لأنها أكيد فيها ضرر
لكن أغلب الحاجات اللي حوالينا في الدنيا حلال بيعملها الناس عادي
و الإسلام دين رحمة و سعة و ليس فيه حرج
إنما حرم علينا ما يضرنا
و ......

و أخيرا اترككم مع الرابط التالي :
http://www.youtube.com/watch?v=X3pl2lcIlNU

و لو عاوز تحمله من هنا :
http://aljaami.myblog.it/media/01/01/527251902.mp3


.............................

جزاكم الله خيرا
و لا تنسونا من دعوة صالحة بظهر الغيب

........

ـ السلفيين ... خدوهم بالصوت ليغلبوكم !! ـ

السلام عليكم و رحمة الله و بركاته ,

حد فيكم فاكر أي أحداث من الماضي لما كان عنده سنة او سنتين ؟؟
أنا بقى ...... مش فاكر زيكم برضو

لكن أكيد فاكرين لما كنا صغيريين و كنا بنطلع على بعضنا ألقاب زي :

قُزعة , أبو طويلة , جاعورة ... إلخ ,

و كانت الألقاب دي بتغيظنا قوي لما حد ينادينا بيها ,

لكن أنا بقى كنت شرير زيادة عن اللزوم , و بغيظ أخويا الصغير بأكثر من كده ,

كنت بناديه باللقب اللي هو بيكرهه و أعلّي صوتي علشان أشوش عليه ,
و في نفس الوقت بسد وداني علشان ما أسمعش صوته و هو بيرد عليا باللقب اللي أنا بكرهه .....

الوضع ده أنا حاسس إنه بيحدث اليومين دول ,

لكن مش بين الأطفال الصغيرين لوحدهم ,
أقول لكم إزاي ....

طبعا كلنا سمعنا عن الإتهامات الموجهة للسلفيين إنهم بيهدموا الأضرحة ,
و بيقطعوا ودان الناس ,
و بيرشوا مية نار على البنات اللي مش محجبات في الشارع ,
و بيخطفوا العيال الصغيرة اللي مش مربيين دقنهم !!
و إنهم السبب وراء الشغب في مباراة الزمالك و الإفريقي التونسي ,
و وراء زيادة أسعار المواصلات ,
و إن ابنك لو مارضيش يشرب اللبن يبقى أكيد السلفيين هم اللي محرضينه ,

كل الاتهامات دي بنسمعها في التليفزيون , و بنقرأها في الجرائد ,

و بتنزل لنا كمان من الحنفية ,

و وجه الشبه بينها و بين شغل الأطفال اللي اتكلمنا عنه إن :

- الجرائد و القنوات اللي بتذيع الاتهامات دي بتكررها كتيييييييير قوي ......

( الصوت العالي و التشويش ) ,

- مش بتتيح أي مساحة للسلفيين إنهم يردوا و يدافعوا عن نفسهم .......

( سد الودان )

ده للأسف لأن معظم وسائل إعلامنا اللي هي فعليا تابعة لأفكار مموليها من (رجال الأموال) ,

معظمها لا يملك جرأة النقاش و إتاحة الفرصة للطرف الآخر ,

فبيلجأ لسياسة ( خدوهم بالصوت ليغلبوكم ) !!

و ده في إطار ما يسمى بـ:

( الحملة الحلزونية للتخويف من السلفية ) 

لكن علشان الحق يتقال برضو ,
فإن ( بعض ) وسائل الإعلام دي صارت تسمح ( بقدر صغير ) -بالمقارنة بكم التهم- من ظهور السلفيين للدفاع عن أنفسهم ,
و ده مش حبا في العدل و لا كفالةً لحق المتهم في الدفاع عن نفسه ,
لكنه ذرّاً للرماد في العيون ,

علشان يقولوا إنهم بيسمحوا بتعدد الآراء ,

و لو إنهم مش بيعطوا للدفاع نفس مساحة الادعاء ,

بل أحيانا بيضللوا الناس و يجيبوا حد لا يمثل المتهم أصلا كطرف آخر في الحوار ,

المهم ,

كنتوا هتنسوني حاجة مهمة جدا عاوز أقولها ,

و دليل مهم و قاطع على براءة السلفيين بعد الجرائم الكتيرة اللي اتهموهم بيها

و اللي ما يعملهاش غير سوبر مان



السلفيين يا جماعة ما بيعرفوش يطيروا !!!


........................

و حقوق النشر للجميع طبعا 


ـ