زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

20 March, 2011

ـ خلي بالك من زرايرك !! ـ


بسم الله الرحمن الرحيم

المكان
الورشة الفنية لتصنيع ( العمدة الآلي )

الزمان
كمان عشرميت سنة كده و لا حاجة ,

الموضوع 
الأسطى بلية... أحد عباقرة الوطن الأفذاذ , توصل لتصنيع روبوت ذكي ,
يا ألف نهار أبيض ... يا ألف نهار مبروك
عقبال عندك يا أم فاروق

المشكلة :
الروبوت شغال بالريموت كنترول ,
و كل ما الروبوت يتعامل مع شخص , يعطي لهذا الشخص الريموت كنترول بتاعه ,
يروح الشخص ده قايل له : انت روبوت غبي ,
و يروح الشخص ضاغط على الزراير و يخليه يخبط نفسه في الحيطة

و شوية و يقول له : انت روبوت عبيط
و يروح ضاغط على الزراير و يخليه يوقع نفسه من على السلم
و ...... غيرها

صاحبننا المخترع المعلم بلية حاول بشتى الطرق إنه يتغلب على المشكلة دي
و ما قدرش ,
ولاد الحلال دلوه على حكيم صيني من زمن الفن الجميل اسمه ( تشانج لي ) ,
قالوا له : روح و اسأله على المشكلة بتاعة الروبوت بتاعك ده
قام المعلم بلية ما كدّبش خبر ,
و ركب ( توك توك نفاث ) للصين

و نزل بعد السور عند تاني فتحة يمين وسأل عن الحكيم ( تشانج لي )
لكن ما حدش كان عارفه !!

لحد ما واحد صيني ابن حلال سأل الأسطى بلية , و قال له :
هم قالوا لك الحكيم ده في الصين البلد و لا الصين المحطة ؟؟
أصل هنا الصين المحطة ,
خد لك ( توك توك تيربو ) بإتنين يوان -عملة الصين- يوديك الصين البلد و اسأل هناك ,
و فعلا , وصل الصين البلد ,
و وصل للحكيم ,
و حكى له المشكلة ,
راح الحكيم رد عليه و قال له :
" برمج الروبوت بتاعك من جديد ,
و خليه ما يعطيش الريموت بتاعه لحد يتحكم فيه "
.
.
.
.
.
.

نسيب المستقبل و الروبوتات
و نرجع للحاضر و للبشر
البشر اللي بيعملوا زي الروبوت البايظ ,
و بيسمحوا للآخرين يتحكموا في مشاعرهم و حالتهم النفسية

تلاقي أول ما حد يقول لك :
إنت ما بتفهمش ,
انت غبي ,

انت ضعيف الشخصية ,
انت .....
أول ما حد يقول لك حاجة زي كدة بتصدقه ,
و بتسمح له يلعب في زراير مخك و مشاعرك
و بكلامه يخليك مكتئب و فاقد الثقة في النفس و محبط و .....
و ما سألتش نفسك :
" لماذا تعتمد مشاعري على الأفكار الموجودة في رؤوس الآخرين ؟؟ "
[ مائة طريقة لتحفيز نفسك - ستيف تشاندلر]

ليه أخلي مشاعري ( أنا ) تتغير بسبب ما في رأس ( واحد تاني ) ؟؟
مشاعري ( أنا ) المفروض تعتمد على ما في رأسي ( أنا )
مش مفروض أسمح لحد تاني إنه يمسك زراير عقلي و مشاعري
و يخليني مكتئب أو محبط أو فرحان أو زعلان


لازم تعرف
" إن أعظم مفتاح للنجاح هو :
الانضباط الذاتي اللازم لمساعدتك على التحكم الكامل والتام بعقلك
وتذكر أنه من الأهمية القصوى أن يكون الشيء الوحيد الذي تتحكم فيه تحكماً كاملاً هو :
موقفك الذهني أو العقلي ."
[ المفتاح الرئيسي للثروة - نابليون هيل ]

يعني موقفك الذهني و العقلي هو الزراير بتاعتك
ما تسمحش لحد أبداً إنه يلعب فيهم و يبوظ لك حالتك النفسية ,
مش أي حد يقول لك كلام وحش عن نفسك تصدقه ,
مش أي حد يحاول ينرفزك تتنرفز
مش أي حد يحاول يعصّبك تتعصّب
no one can make me happy
no one can make me sad

و ركز قوي في أي كلام أو تصرفات من الآخرين تجاهك
لازم تفلترها , و تدخل الجيد و ترمي السيء
و ما تخليهاش تدخل عقلك على طول و تبوظه زي ما كتير من الناس بتعمل


" فمعظمنا يهتم أكثر بما يضعه في حوض الوقود في سيارته
أكثر من اهتمامه بما يضعه في عقله آخر اليوم "
[ مائة طريقة لتحفيز نفسك - ستيف تشاندلر]


.............

لن أسمح للآخرين أن يتحكموا في مشاعري و لا بحالتي النفسية ,
آراء و أقوال الآخرين فيّ لا تعبر عن حقيقتي
أنا أعرف نفسي أكثر من أي أحد ,
أنا أتحرر من آراء و أقوال الآخرين تجاهي ,
أنا أتحكم في مشاعري و انفعالاتي و حالتي النفسية .
I am what I do want to feel


......................

أنا كده خلصت الموضوع


لا تنسونا - إحنا و مصر :) - من صالح دعائكم بالخير

جزاكم الله خيرا

...

11 comments:

  1. :))

    موضوع مهم جدا

    السلبية هي كلمة السر

    ربما معنى أن يترك الإنسان زمام نفسه للآخرين، فهو إمعة

    ولا يكون أحدكم إمعة !


    جزاكم الله خيرًا..

    وحفظ مصر، وقدر لها الخير :)

    ReplyDelete
  2. انت انسان عظيم و بارك الله فيك و ف اسلوبك اللطيف

    ReplyDelete
  3. جزاك الله خيراااا
    كلام جه في وقته :)

    ReplyDelete
  4. جــزاك الله خيرا
    ياتيمى ولكنا لسنا
    جميعا بنفس القوة النفسية
    منا من يتأثر بكلمة ومنا
    من لا بكلام الأخرين.نسأل الله
    ان نتأثر بالصالح من القول.

    ReplyDelete
  5. ربنا يحفظك
    ويحفظ شباب المسلمين
    ويحفظ مصر وأهلها كلهم

    ReplyDelete
  6. بص ياحاج

    انا من اللي شفتوا
    لقيت ان اكتر الناس كدا
    هما الكبار
    اييييييييوون

    هتقولي ازاي

    اقلك اتفرج علي الاستفتاء
    غيرو موقفهم فثواني بسبب اللي اتكلموا ادامهم شويه بهدوء وشويه بعصيبه

    مع اننا مغيرناش ولا حاجه

    بقلك
    هوا ينفع ادعي لمصر بس؟

    اممممممممم
    لا طبعا
    يارب كل حاجه تتصلح

    اللهم امين

    ReplyDelete
  7. جيت على الجرح والله يا تيمى
    انا مريت بتجربة كدا ..طلعب منها ثقتى بنفسى -30 ..يعنى

    يمكن المشكلة اننا فعلا موش روبوتات ..وان المشاعر ما بتتبرمجش.

    كلامك مقنع اوى لوكل واحد عايش لوحده alone يعنى..بس الكارثة ان اغلبننا بيبقى عنده اشخاص معينين هم الدنيا وما فيها

    رغيت انا ..صح؟؟

    عامة ربنا يصلح حالنا كلنا..ويهدينى انا وانتم لسبيل الرشاد

    ReplyDelete
  8. حسام الدينMarch 25, 2011 at 1:14 AM

    السلام عليكم ورحمة الله وبركاته
    جزاك الله خيرا ياغالى

    وكنت اتمنى تسييس الموضوع :)
    علشان الجماعة اياهم
    من بنى علمان وليبرال
    المهم طمنى عليك علشان انا ناوى اترك النت للأبـــد
    صراحة بدات أخاف على زرايرى:)

    ReplyDelete
  9. زهـــــراء:

    هي مش سلبية بالنمعنى الحرفي ,
    ممكن نقول عليها ( عجز ) ـ
    جزاكم الله خيرا

    ------------------------
    Anonymous:

    بارك الله فينا و إياكم
    و نفعنا الله و نفع بنا
    شكرا جزيلا على المرور

    ----------------------
    ايومي:

    جزانا و إياكم
    و الحمد لله إن الكلام كان في الوقت المناسب

    ------------------------
    norahaty:

    جزانا و إياكم يا د.نور
    فعلا مش كلنا بنفس القوة النفسية و لا الثقة بالنفس اللي تخلينا نطبق الكلام ده على طول
    لكن الواحد بيحاول يطبقه قدر الإمكان
    يفشل مرة و ينجح مرة
    أحسن من مافيش خالص
    و ربنا يوفقنا و يهدينا

    ---------------------
    sony2000:

    الاستفتاؤ ده حالة خاصة ,
    أول مرة الناس تحس إن رأيها هيتاخد بيه بجد ,
    لكن للأسف كان فيه ناس رايحة علشان تشارك و خلاص , و ده في حد ذاته حاجة كويسة ,
    لكن للأسف علشان كان فيه كتير رايح لأنه سمع وجهة نظر واحدة , و راح بناء عليها
    فلما سمع التانية غير رأيه
    و قد يكون سمع الاتنين لكنه مش فاهم قوي و مش عارف ياخد قرار فكل ما حد يقنعه يقتنع
    ربنا يسهل

    ----------------
    BoOoO :

    هو احنا فعلا مش روبوتات
    إنما المشاعر ممكن تتبرمج
    مش كلياً لكن ممكن تتبرمج جزئياً
    و التنمية البشرية فيها فرع اسمه ( البرمجة ) اللغوية العصبية

    بالنسبة لكلامي فلو الواحد ( ألون ) و عايش لوحده يبقى كلامي مالوش لزمة أصلا , و مش هنحتاج نطبقة ,
    إنما لازم نحاول نطبقة مع الناس ,
    حتى لو الناس دول هم الدنيا و مافيها , فده يحتم عليهم إن كلامهم لينا يكون كويس و محفز و بنّاء و ليس العكس
    و مافيش رغي و لا حاجة , على العكس أنا بحب المناقشة في الموضوع
    ربنا يصلح حالنا جميعا و يحفظنا و جميع المسلمين

    -------------
    حسام الدين :

    و عليكم السلام و رحمة الله و بركاته
    جزانا و إياكم يا أغلى :)
    و بصراحة الموضوع أنا كاتبه من زمان , من قبل ما هوجة السياسة تبدأ ,

    و معلش أنا مش بسأل عليك من زمان , لأني لسه راجع من الشغل امبارح و الله من أسبوعين متواصلين
    و حكاية ترك النت للأبد دي ما تاخدش القرار بسرعة ,
    أنا عارف ليه , أصلك بتاخد النقاشات على صدرك :) و شكلك بتتنرفز بسرعة زي ما قلت لك
    عموما لما نتقابل ( على النت ) برضو :) نبقى نرغي شوية إن شاء الله
    بس بطل تدخل ( مشغول ) علشان بتكسف أكلمك :) حسيس بقى تقول إيه :)
    ـ

    ReplyDelete
  10. بغض النظر عن إنى بأحب مواضيعك جدا
    وبما إن "حق على أصحاب الكؤوس أن يتناصحوا" فأحب أنقل لك الرابط ده

    http://www.islamweb.net/fatwa/index.php?page=showfatwa&Option=FatwaId&Id=162537

    أنا كنت بأحضر لإبراهيم الفقى ربنا يرحمه
    من خمس سنين تقريبا، بس كنت طفلة يعنى بتاع 15 سنة كده
    وبعدين الحمد لله كنت باحضر درس وبدأ يتكلم على حرمة البرمجة اللغوية، مع إن ده ماكنش موضوع الدرس
    طبعا أنا مش فاكرة أوى الكلام، بس بطلت أقرأ فى الاتجاه ده يعنى
    وربنا أغنانى بتعلم الدين، على الضيق طبعا
    بس ربنا يزدنا وإياك علما ويرزقنا الإخلاص وينفعنا به ويرزقنا العمل به والدعوة إليه ولا يجعلنا من الذين يتعلمون ليقال"عالم" يا رب

    بس ممكن تقرأ الفتوى اللى فى الرابط، وكل روابط الفتاوى اللى داخل الفتوى يعنى

    وقول لى استفدت إيه يعنى أو شايف إيه ... فى تعليق فى "تظبيط" المحطة :)

    ReplyDelete
    Replies
    1. جزاكم الله خيرا على النصيحة ,
      أنا فعلا دخلت على الرابط و الروابط اللي جواه ,

      على حسب فهمي إن الحاجات اللي حرام هي المرتبطة بمصادر الطاقة و إن العقل ممكن يخليك تطير و يعمل المستحيل و الكلام ده , :)

      لكن عامة أنا مش بقتنع أصلا بكلام التنمية البشرية ده ,
      أنا اللي بيعجبني في التنمية البشرية هو كل ما له ارتباط بالطب النفسي ,

      يعني مواضيع الثقة بالنفس و التحفيز و مراقبة الأفكار و كده ,

      و الله أعلم بصراحة
      و جزاكم الله خيرا على النصح .. نفعنا الله و إياكم

      Delete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ