ـ خلي بالك من زرايرك !! ـ

بسم الله الرحمن الرحيم

المكان

الورشة الفنية لتصنيع ( العمدة الآلي )

الزمان

كمان عشرميت سنة كده و لا حاجة ,

الموضوع 
الأسطى بلية... أحد عباقرة الوطن الأفذاذ , توصل لتصنيع روبوت ذكي ,

يا ألف نهار أبيض ... يا ألف نهار مبروك

عقبال عندك يا أم فاروق

المشكلة :

الروبوت شغال بالريموت كنترول ,

و كل ما الروبوت يتعامل مع شخص , يعطي لهذا الشخص الريموت كنترول بتاعه ,

يروح الشخص ده قايل له : انت روبوت غبي ,

و يروح الشخص ضاغط على الزراير و يخليه يخبط نفسه في الحيطة

و شوية و يقول له : انت روبوت عبيط

و يروح ضاغط على الزراير و يخليه يوقع نفسه من على السلم

و ...... غيرها

صاحبننا المخترع المعلم بلية حاول بشتى الطرق إنه يتغلب على المشكلة دي

و ما قدرش ,

ولاد الحلال دلوه على حكيم صيني من زمن الفن الجميل اسمه ( تشانج لي ) ,

قالوا له : روح و اسأله على المشكلة بتاعة الروبوت بتاعك ده

قام المعلم بلية ما كدّبش خبر ,

و ركب ( توك توك نفاث ) للصين

و نزل بعد السور عند تاني فتحة يمين وسأل عن الحكيم ( تشانج لي )

لكن ما حدش كان عارفه !!

لحد ما واحد صيني ابن حلال سأل الأسطى بلية , و قال له :

هم قالوا لك الحكيم ده في الصين البلد و لا الصين المحطة ؟؟

أصل هنا الصين المحطة ,

خد لك ( توك توك تيربو ) بإتنين يوان -عملة الصين- يوديك الصين البلد و اسأل هناك ,

و فعلا , وصل الصين البلد ,

و وصل للحكيم ,

و حكى له المشكلة ,

راح الحكيم رد عليه و قال له :

" برمج الروبوت بتاعك من جديد ,

و خليه ما يعطيش الريموت بتاعه لحد يتحكم فيه "

.
.
.
.
.
.

نسيب المستقبل و الروبوتات

و نرجع للحاضر و للبشر

البشر اللي بيعملوا زي الروبوت البايظ ,

و بيسمحوا للآخرين يتحكموا في مشاعرهم و حالتهم النفسية

تلاقي أول ما حد يقول لك :

إنت ما بتفهمش ,

انت غبي ,

انت ضعيف الشخصية ,

انت .....

أول ما حد يقول لك حاجة زي كدة بتصدقه ,

و بتسمح له يلعب في زراير مخك و مشاعرك

و بكلامه يخليك مكتئب و فاقد الثقة في النفس و محبط و .....

و ما سألتش نفسك :

" لماذا تعتمد مشاعري على الأفكار الموجودة في رؤوس الآخرين ؟؟ "

[ مائة طريقة لتحفيز نفسك - ستيف تشاندلر]

ليه أخلي مشاعري ( أنا ) تتغير بسبب ما في رأس ( واحد تاني ) ؟؟

مشاعري ( أنا ) المفروض تعتمد على ما في رأسي ( أنا )

مش مفروض أسمح لحد تاني إنه يمسك زراير عقلي و مشاعري

و يخليني مكتئب أو محبط أو فرحان أو زعلان

لازم تعرف

" إن أعظم مفتاح للنجاح هو :

الانضباط الذاتي اللازم لمساعدتك على التحكم الكامل والتام بعقلك

وتذكر أنه من الأهمية القصوى أن يكون الشيء الوحيد الذي تتحكم فيه تحكماً كاملاً هو :

موقفك الذهني أو العقلي ."

[ المفتاح الرئيسي للثروة - نابليون هيل ]

يعني موقفك الذهني و العقلي هو الزراير بتاعتك

ما تسمحش لحد أبداً إنه يلعب فيهم و يبوظ لك حالتك النفسية ,

مش أي حد يقول لك كلام وحش عن نفسك تصدقه ,

مش أي حد يحاول ينرفزك تتنرفز

مش أي حد يحاول يعصّبك تتعصّب
no one can make me happy
no one can make me sad

و ركز قوي في أي كلام أو تصرفات من الآخرين تجاهك

لازم تفلترها , و تدخل الجيد و ترمي السيء

و ما تخليهاش تدخل عقلك على طول و تبوظه زي ما كتير من الناس بتعمل

" فمعظمنا يهتم أكثر بما يضعه في حوض الوقود في سيارته

أكثر من اهتمامه بما يضعه في عقله آخر اليوم "

[ مائة طريقة لتحفيز نفسك - ستيف تشاندلر]

.............

لن أسمح للآخرين أن يتحكموا في مشاعري و لا بحالتي النفسية ,

آراء و أقوال الآخرين فيّ لا تعبر عن حقيقتي

أنا أعرف نفسي أكثر من أي أحد ,

أنا أتحرر من آراء و أقوال الآخرين تجاهي ,

أنا أتحكم في مشاعري و انفعالاتي و حالتي النفسية .
I am what I do want to feel

......................

أنا كده خلصت الموضوع

لا تنسونا - إحنا و مصر :) - من صالح دعائكم بالخير

جزاكم الله خيرا

...

يادي ( نعم ) بتاعتكم دي

بسم الله الرحمن الرحيم 

 

الصورة من م.أحمد فتح الباب (سمو الأمير)

طبعا أنا ماليش في خبرة جامدة في السياسة زي ما قلت قبل كده 

و الموضوع اللي فات عن ( نعم ) للتعديلات الدستورية حسيت إنه مش منظم 

لذا رأيت أن أن أنقل موضوعين منظمين بيتكلموا عن التعديلات 

لكلٍ من :

الباشمهندس : أحمد فتح الباب , وزير البترول القادم إن شاء الله

و صيدلي مصر الأجمد : صاحب مجرد مدونة 

http://beta3a.blogspot.com/2011/03/blog-post_15.html

http://mogaradmodawana.blogspot.com/2011/03/blog-post.html

و اللي ليه تعليق يبقى عندهم بقى إن شاء الله 

.....................

التعديلات الدستورية : (نعم) ... ليه لأ ؟؟

السلام عليكم و رحمة الله و بركاته 

طبعا كلنا عارفين إن الاستفتاء على التعديلات الدستورية هيكون يوم السبت القادم إن شاء الله 

لكن هل احنا عارفين هي إيه التعديلات دي أصلا ؟؟ 

دي ورقة بتشرح المواد اللي اتعدلت : 

بصراحة أنا ما بحبش السياسة , 

و آخري كانت الانتخابات البرلمانية , 

علشان ما حدش يستغل صوتي , و أحيانا كنت بروح بس علشان أبطل صوتي , 

زي آخر انتخابات لما رحت و اخترت حوالي 5 مرشحين في نفس الوقت :) 

لكن في موضع التعديلات الدستورية ده أنا ناوي أروح و أقول :

>> نعم <<

مش علشان أنا شايف إنها كفاية و كده 100 فل و 14
بالعكس , أنا مع الناس اللي بتنادي بعدم ترقيع الدستور 

و ده هيحصل إن شاء الله بعد التعديلات دي 

زي ما في المادة 189

يعني أنا ما بقولش إن التعديلات دي تبقى نهائية و يبقى كده قشطة 

لأ 

دي تعديلات تعدينا الفترة القادمة 

لحد ما الحالة تستقر

و يبقى فيه رئيس جمهورية و مجالس نيابية

و بعدين نعمل دستور جديد

لأننا لو جينا نعمل دستور جديد دلوقتي هتلاقي ولاد التيييت اللي عاوزين يشيلوا المادة التانية من الدستور 

http://www.facebook.com/home.php#!/home.php?sk=group_111971772212968

و تحصل خلافات و اعتصامات 

و أي مادة تانية مش عاجبة أي حد هيروح عامل احتجاجات و اعتصامات و بتاعات

لكن لما تكون العملية هدأت , و بقى فيه نظام تاني 

التغيير هيبقى أحسن و أكثر أماناً

غير إن التعديلات لو لم يوافق عليها الشعب 

هتزيد فترة حكم المجلس الاعلى للقوات المسلحة 

و ده خطر من ناحيتين :
داخلية : لأن كل يوم زيادة للعسكر في الحكم ممكن يخلي الشيطان يلعب في دماغهم و يفكروا يمسكوا على طول , أو يرشحوا حد للرئاسة
و خارجية : و اسأل أي ظابط جيش في سيناء يقول لك على حدودنا المفتوحة على البحري

و ماحدش يقول لي إن الرئيس اللي هييجي ممكن يلعب بديله 
و يلحق نفسه و يعمل ديكتاتور بدري بدري 
و يقول لك مش هغير دستور و هحتفظ بصلاحياتي الكبيرة
ده يبقى ما كانش عايش معانا الأيام اللي فاتت
و ما يعرفش عنوان ميدان التحرير

أما اللي بيقول إن مش عاجبه حكاية إن الرئيس لازم تبقى زوجته مصرية 

هقول له إن الكليات العسكرية و السلك الدبلوماسي اللي هم أقل من منصب رئيس الجمهورية 

بيشترط إن الفرد يكون غير متزوج من أجنبية

و بصراحة تبقى حاجة أنتيكا لو بقى ريس بلد متجوز من بلد تانية !! 

دي حتى تبقى عيبه في حق بنات بلده :) 

مش لاقي حد في بلده رايح يتجوز من بره ؟؟

و بصراحة أنا ما شفتش رئيس دولة متجوز من واحدة من دولة تانية خالص 

إلا بقى الملوك بتوع بريطانيا زمان اللي كانوا بيتجوزوا من فرنسا 

علشان الحروب و كده 

جواز مصالح يعني :) 

و دي شوية روابط لو ما كنتش مقتنع :

http://www.facebook.com/topic.php?uid=104224996294040&topic=27915

http://www.masrawy.com/Ketabat/ArticlesDetails.aspx?AID=93896&ref=hp 

http://soutalhaq.net/forum/showthread.php?s=6234bd54ab1c2d2a3f409b5941947846&p=158954#post158954

و طبعا من حقك ترفض لو كنت مقتنع بالرفض 

و رأي الأغلبية في الآخر لازم الكل يحترمه 

المهم تشارك و تقول رأيك

.............

ـ التالته .. للأسف مش تابته !!! ـ

السلام عليكم ..

يه رأيكم نبدأ النهاردة بنكتة .. بس قديمة شوية .. ماشي ؟؟

بيقول لك : مرة عشر رجالة ماشيين و را بعض ....
كلهم وقعوا في حفرة واحدة


طيب هم اعتبروا البتاعة دي نكتة و الناس بتضحك عليها ليه ؟؟
متهيأ لي علشان ما ينفعش العشرة كلهم ما ياخدوش بالهم ..

يعني مثلا الأول ممكن يقع .. ممكن التاني برضه ما يلحقش نفسه و يقع وراه ..
إنما العشرة كلهم ما يلحقوش نفسهم !!!
دول يبقوا شاربين (حاجة أصفرة)


يعني انت متفق معايا طبعا إن الواحد ممكن ما ياخدش باله من أول مرة ,,
و ممكن التانية كمان ..
لكن التالتة لأ , خلاص .. يكون أخد باله و نص ..
لأنهم زي ما بيقولوا .. التالتة تابته ..

يعني الواحد ما يقعش في نفس الغلط 3 مرات ... ممكن مرة .. مرتين ... لكن تلاتة ؟؟
ده يبقى (مسطول) بقى ..

و الرسول -صلى الله عليه و سلم- نبهنا لكده ..
فقال : (( لا يُلدغ المؤمن من جحر واحد مرتين )) [متفق عليه]

يعني المؤمن المفروض ما يقعش في نفس الغلط مرتين ..


أنا عارف إنكم زهقتم و بتقولوا الجدع ده عاوز ايه ؟؟
ما احنا عارفين و بناخد بالنا و مش بنعمل الخطأ مرتين و را بعض ..

أقول لكم .. متأكدين ؟؟
يعني احنا مش بنكرر الغلط اللي بنقع فيه ؟؟
طيب اقرأ معايا الكلام ده لابن الجوزي -رحمه الله- :

" رأيت كل من يتعثر بشيء يلتفت إلى ما تعثر به ،
فينظر إليه ،
إما ليحذر منه أن جاز عليه مرة أخرى ،
أو لينظر ـ مع احترازه و فهمه ـ كيف فاته التحرز من مثل هذا ؟؟ .
فأخذت من ذلك إشارة
و قلت : يا من عثر مراراً هلا أبصرت ما الذي عثرك فاحترزت من مثله ؟؟
أو قبّحت لنفسك مع حزمها تلك الواقعة .
فالعجب لك كيف عثرت بمثل الذنب الفلاني و الذنب الفلاني ؟. " [صيد الخاطر] 

للأسف كم من ذنوب وقعنا فيها كثيرا .. أكثر من مرة ..
نعمل الذنب , و نقع فيه تاني ..
و ناخد بالنا منه .. و نرجع نقع فيه تاني ..
و لا أزكي نفسي ..

فيا من عثر مراراً 
هلا أبصرت ما الذي عثرك فاحترزت من مثله ؟؟

.
.
.
.
.
.

و جزاكم الله خيرا على القراءة ..
 
و لا تنسوني من دعوة صالحة :
أن يغفر الله لي و يتوب عليّ و يدخلني الجنة و ينجني من النار ..
و جميع المسلمين و المسلمات .. آمين




....