حاجة تفرح

السلام عليكم و رحمة الله و بركاته

امبارح كنت راجع من الشغل عن طريق القاهرة ,
و كنت أول مرة أرجع ساعة الفطار ,
لأني كنت ركبت الميكروباص من القاهرة حوالي 6:15 م

و أول ما تحركنا على الطريق وجدنا أشياء تفرح القلب فعلا ,
كل شوية نلاقي ناس بتشاور للسواق إنه يقف أو يخفف السرعة ,
و يعطون للراكبين أكلا و عصائر للإفطار ,
فالبعض أعطى الركاب أطباق أرز ساخنة مع قطعة لحم ,
و آخرون أعطوا الركاب تمرا ,
و عصائر معلبة ,
و مشروبات شعبية كالتمر الهندي ,في أكياس ,
ده طبعا غير موائد الرحمن في كل مكان

لكن أكثر ما أعجبني هو بعض الناس ممن ليس لديهم نقود لشراء الأكل أو العصائر لتوزيعها
و يريدون ثواب إطعام الصائمين
لم يستسلموا و يجلسوا في بيوتهم ,
لكنهم فكروا : كيف نشارك في هذا الأجر و ليس معنا من النقود لذلك ؟؟
فكانوا يعبئون الماء البارد في أكياس - مثل أكياس اللبن - و يوزعونه أيضا .


بصراحة الواحد كان سعيد جدا , رغم غنه ما أخدش حاجة غير تمر ,
بجد الناس فيها خير كتير ,
ربنا يقدر الجميع على فعل الخير ,

لكن السؤال الذي تبادر إلى ذهني :
هل هذه المظاهر في الشعب المصري فقط ؟؟
أم في جميع البلاد الإسلامية أيضا ؟؟


في أمان الله


........

ـ ما تركزش علشان ما تهيسش !! ـ

بسم الله الرحمن الرحيم

السلام عليكم و رحمة الله و بركاته ,

طبعا بما إننا في مصر ( أم الدنيا ) فأكيد كلنا شفنا الزبالة اللي ( مالية الدنيا )
و غالبا بنشوف عند الزبالة كلاب و قطط ( بتسترزق ) و تحاول تلاقي أي حاجة تاكلها ,

لكن السؤال هو :
هل لاحظت كلبا أو قطة بياكل و ( نِفسه مكسورة ) لأنه حاسس إنه متشرد و مالوش بيت ,
أو لأنه بياكل من زبالة الناس ؟؟

طب سيبك من الزبالة ,
عمرك شفت حمار جاله اكتئاب من الشغل اللي بيشتغله ؟؟
كل يوم من الغيط -المزرعة يعني - للبيت ,
يحطوا عليه حاجات و يشيلوا من عليه حاجات ,
و هو راضي , مش بيحس بالملل من التكرار , و لا بيشعر باكتئاب !!

و لو سألت نفسك ليه ؟؟؟
هتكون الإجابة بديهية :
لأنهم حيوانات , و الحيوانات مش بتفكر ...

أما بخصوص البشر
فأنا أعرف شخصاً دخل مصحة نفسية ,
فكان يشعر بالضيق و الحبس و ... غيرها من المشاعر السيئة ,
بينما كان هناك الكثير ممن حوله - من ذوي الحلالات المتأخرة - لا يشعرون بشيء
بل يتسكعون في الممرات و يغنون و ينامون مطمئنين لا يشعرون بما هم فيه ,
فكأن عقله و تفكيره كان سبب شقائه دونهم ,

كما قال الرافعي شيخ الأدباءِ و حكيمهم :
" إن الألم هو فهم الألمِ لا غير " [وحي القلم - بين خروفين]

و عن هذا المعنى يتحدث ماليء الدنيا و شاغل الناس - المتنبي - فقال :
ذو العقل يشقى في النعيم بعقلهِ *** و أخو الجهالةِ في الشقاوةِ ينعم

يعني ساعات الواحد بيبقى في نعيم و حياة حلوة رغيدة ,
و يقعد يفكر كتير و يتوقع الأسوأ و يخاف من الستقبل و يوجع دماغه بحاجات مالوش دعوة بيها.....
فيجعلُ عقلُهُ نعيمَهُ شقاءاً

كما في وحي القلم للرافعي :
" والسعادة في جملتها وتفصيلها
أن يكون لك فكرٌ غير مقيد بمعنى تتألم منه،
ولا بمعنى تخاف منه،
ولا بمعنى تحذر منه؛
والشقاء في تفصيله وجملته هو انحباس الفكر في معاني الألم والخوف والاضطراب . "
[وحي القلم - دموع من رسائل الطائشة]

و على النقيض , تجد أحدهم في محنة - كأولئك الناس في المصحة - ,
لكنهم لا يفكرون فيما هم فيه ,
فـ( لا يشعرون ) بالشقاء الذي هم فيه , فيعيشون و كأنهم في نعيم


طيب نعمل إيه يعني ؟؟
( نشد فيشة عقلنا ) و نعيش من غير عقل علشان نبقى سعداء ؟؟

طبعا لأ ,
لأن العقل مش حاجة وحشة ,
بل على العكس ,
فقد ذم الله - عز و جل - من لم يُعمِل عقله , فقال :
{ وَلَقَدْ ذَرَأْنَا لِجَهَنَّمَ كَثِيرًا مِنَ الْجِنِّ وَالإِنسِ
لَهُمْ قُلُوبٌ لا يَفْقَهُونَ بِهَا وَلَهُمْ أَعْيُنٌ لا يُبْصِرُونَ بِهَا وَلَهُمْ آذَانٌ لا يَسْمَعُونَ بِهَا
أُوْلَئِكَ كَالأَنْعَامِ بَلْ هُمْ أَضَلُّ أُوْلَئِكَ هُمُ الْغَافِلُونَ } [الأعراف : 179]
- و هذه الآية تبين ان العقل في القلب , بينما الذي في الدماغ هو المخ , و هذا ليس موضوعنا -

كده تبقى العملية اتعقدت !!!
العقل بيخلي الإنسان تعيس لما يفكر ( كتير ) ,
و ما ينفعش ما يفكرش خالص لأنه سيكون مذموماً من الله عز و جل ,

طب يعمل إيه ؟؟؟

طبعا مش هيعمل عمل , و لا هيعمل حواجبه ,
إنما هيشغل عقله ( بطريقة مناسبة )

انت لو عندك عربية - سيارة - و سبتها من غير ما تشغلها , هتفضل جديدة و مش هتبوظ ,
و لو شغلتها على أعلى قدرة , على الفاضية و المليانة , يبقى هتهلكها معاك ,
إنما لو شغلتها عند قدرة مناسبة , و سرعة مناسبة , و مشيت بيها في الطُرق المناسبة
يبقى انت تقدمت و ما فضلتش في الصفر , و في نفس الوقت ما بوظتش العربية و تعبتها .

هي دي النظرية :

فكّر

لكن مش بعمق , و من غير شطحات ,
لأن التفكير بعمق بيدخل الواحد في طرق ليست من شأنه ,
التفكير بعمق بيخلي الواحد يفكر في المستقبل و يخاف منه ,
و يفكر ليه ربنا خلقنا علشان نعبده ؟؟
و لماذا فلان فقير ؟؟ و فلان معوق و فلان غني ,
و إزاي أصلح الكون كله و أبحث عن المثالية و مدينة أفلاطون ,
و... غيرها ,
و مثل هذا التفكير و هذه الأسئلة لن يجد لها جوابا ,
لأنها ليست من شأنه
- للاستزادة : ليك اعتراض على قضاء ربنا ؟؟-
بل هي من إرادة الله التي جعلها لحكمةٍ , سواء أخبرنا بها أم لا ,
و أنك لن تغير الكون , و أن العالم لن يكون مثاليا ابداً ,
و أن هناك أشياء ستموت و لن تعرف الحكمة من ورائها ,

فعيش , و فكر , و تأمل ,
لكن في الحاجات المسموح بها فقط ,

و غير كده لا ,
فكما قال أحدهم :
إن التأمل في الحياة يزيد أوجاع الحياة

و نختم بكلامٍ للرافعي - بتصرف - :
" وا أسفاه، هذه هي الحقيقة ,
إن دقة الفهم للحياة تفسدها على صاحبها
وإن العقل الصغير في فهمه للحياة هو العقل الكامل في التذاذه بها ,
وا أسفاه، هذه هي الحقيقة! " [وحي القلم - في الربيع الأزرق]


ـ

و كل عام أنتم بخير
و لا تنسوا الدعاء لي بالخير و الصلاح بالله عليكم
في أمان الله
ـ