زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

19 January, 2010

ـ عـ(الاِسم) دور !! ـ




السلام عليكم و رحمة الله و بركاته ,

النهاردة إن شاء الله هحكيلكم شوية عن ( سيرة البطل مودي ) !!

" نشأ البطل مودي في بيئة قاسية ,
تعلم فيها أصول الضرب
و ( الكحرته ) ,
و أجاد مودي فنون القتال
اليابانية و الصينية و الكورية الشمالية ,
و ذاع صيت مودي بين القبائل في سن مبكرة ,
حتى لقبه الناس بـ( وَحْش الحِتَّه ) , و ...... "


متهيأ لي فيه حاجة غلط في الكلام اللي فوق ده , صح ؟؟

المفروض البطل ده كان يبقى اسمه ( عنترة ) مثلا , أو ( مجانص ) أو ( أبو شِفّة ) أو اسم جامد كده
إنما ( مودي ) دي مش لايقة عليه خالص , صح ؟؟

هييجي واحد ( يتلامض ) و يقول : إيه يعني اللي يمنع إن يكون اسمه مودي و يبقى بطل و مغوار كده ؟؟
هو الاسم ماله و مال الشخصية ؟؟


هقول له لا , ده ماله و نص و تلات تربع و أربع أتلات ,
لكل شيء من اسمه نصيب ,
و الدليل من الواقع هو إنه مافيش بطل و لا محارب و لا قائد أبدا كان اسمه ( مودي )
و لا ( توتي ) , و لا حتى ( حَمُؤَّه )

بل إن العرب قديما كانت تسمي أبناءهم أسماءا مخيفة لزوم الحرب و الذي منه ,
زي ( تَأَبَّطَ شَرَّاً ) مثلا اللي واحد اشترى منه اسمه !!

أما الدليل من الشرع إن النبي - صلى الله عليه و سلم - كان يغير الأسماء القبيحة إلى أخرى حسنة كي لا ينال حاملها من قبحها ,
فعن ابن عمر أن رسول الله - صلى الله عليه وسلم- غيّر اسم عاصية , وقال : (وأنتِ جميلة )

و قد حدث و رفض أحدهم تغيير رسول الله لاسمه ,
فأُصيب بما في اسمه من شر ,
فعن سعيد بن المسيب أن جَدَّهُ "حزناً" -اسمه يعني- ,
قَدِمَ على النبي - صلى الله عليه وسلم- فقال : ما اسمك ؟
قال : اسمي حزن ,
قال : بل أنت سهل ,
قال : ما أنا بمغير اسماً سمانيه أبي
قال ابن المسيب -حفيده- : فمازالت فينا الحزونة بعد .



و الأمثلة في السنة كثيرة عن تغيير النبي للأسماء القبيحة بأخرى حسنة ,

بل إنه - صلى الله عليه و سلم - كان يحب الأسماء الحسنة و يتفاءل بها ,
كما في صلح الحديبية عندما بعثت قريش ( سهيل بن عمرو ) فقال الرسول : ( سَهُلَ أمركم ) ,


تمام كده ؟؟
حد فاهم حاجة ؟؟

حاسس إن ( عم اللمض ) اللي اتكلم في الأول ده , عاوز يتكلم تاني و يقول :
يعني انت عامل الموضوع الطويل العريض ده كله علشان نبقى نسمي ولادنا أسماء حلوة ؟؟؟
ماشي يا سيدي , هنبقى نسميهم
بس احنا نتخرج الأول و بعدين نشتغل و بعدين نحوّش و بعدين نخطب و بعدين نتجوز و بعدين نخلف ,
و إن شاء الله هنسمي ولادنا أسماء حلوة !!!


هقول له : لا يا عم الأمور , انت كده فهمت نُص الموضوع بس ,
النص التاني اللي عاوز أتكلم عنه هو ارتباط الأسماء عامةً - مش أسماء الأشخاص بس - بمسمياتها ,

فقد غير النبي - صلى الله عليه و سلم - اسم ( يثرب ) لما فيه من التثريب , إلى ( طيبة ) لما فيه من الطيب

كما كان يكره الأمكنة ذات الأسماء القبيحة ويكره العبور فيها ،
كما مر في بعض غزواته بين جبلين فسأل عن اسميهما فقالوا : فاضح ومخز ، فلم يمر بينهما .


ده كله علشان المسميات دائما بيبقى لها من اسمها نصيب ,

يعني مثلا حديث
رسول الله صلى الله عليه و سلم :
" ليأتين على الناس زمان ؛ قلوبهم قلوب الأعاجم ؛ حب الدنيا ،
سنتهم سنة الأعراب ، ما أتاهم من رزق جعلوه في الحيوان ،
يرون الجهاد ضررا ، والزكاة مغرما "

شايف دول غيروا مجرد اسم الجهاد و الزكاة ,
فصارت ثقيلة على قلوبهم ,

يعني لما (سموا) الجهاد ضررا , كرهوه , فأحبوا الدنيا ,
و لما (سموا) الزكاة مغرما , كرهوها , فلم يتصدقوا بشيء و جعلوا أموالهم لتسمين حيواناتهم ,

لكن لو كانوا بصوا للموضوع بأسماء أخرى ,
و شافوا إن الجهاد ليس موتا , بل هو باب الحياة الأخرى , كانوا هيحبوه
و لو كانوا نظروا للزكاة على إنها باقية لهم في حياتهم الأخرى و إنها بتتضاعف , لهانت عليهم ,


يعني إيه برضه ؟؟

بص يا سيدي ,
العالم بتوع التنمية البشرية بيقولوا لك لما يكون عندك ( مشكلة ) ما تقولش عليها مشكلة !!

سميها أي اسم تاني غير اسمها الرخم ده ,
سميها مثلا ( تحدي ) ,
طبعا جوهر المشكلة لم يتغير , لكن احنا بس هنغير اسمها فقط ,
و لما نغير اسمها هنلاقي إن جناب ( العقل الباطن ) بقى بيتعامل معاها بطريقة تانية ,
بدل ما كان بيتعامل معاها كـ(مشكلة) رخمة و صعبة و تقيلة على قلبه ,
بقى يتعامل معاها على إنها ( تحدي ) , شيق و محفز و فيه منافسة علشان يحلها ,
يعني غير تعامله مع نفس الحاجة لمجرد إن اسمها تغير!!


شفت العقل الباطن عبيط إزاي ؟؟
بس عاوز اللي ياخده على قد عقله ,


أبسطها لك بمثال سهل و بسيط و في مستوى الطالب العبيط :
الواحد كل ما هو ماشي في الشارع بيحاول يغض بصره على قد ما يقدر ,
و ساعات بيقدر و ساعات ما بيقدرش
و حتى لو قدر بيقدر بصعوبة جدا ,
لأن عقله واخد العملية إنها محاولة لمقاومة الطبع البشري - الذي يميل للنساء - بأن يمتنع عن النظر للـ(مزز) ,

لو الواحد مثلا جرب يآخذ الموضوع بطريقة تانية ,
و تخيل نفسه في لعبة كمبيوتر ,
و إنه كل ما يبص لبنت الـ(life) بتاعته نقاطها هتقل ,
و كل ما (يلمح) - مش يبحلق - واحدة جاية يقعد يقول في نفسه :
مش هبص , مش هبص , مش هبص ,
لحد ما تعدي
و يقول بعدها : الحمد لله , الحمد لله , الحمد لله
و يتخيل نفسه من بعيد و كأن 100 نقطة بيدخلوا جواه في اللعبة ,
ٍٍ[كما في الحديث : " و إن هَمَّ بسيئة فلم يعملها كتبها الله عنده حسنة كاملة" ]
و يتجهز علشان يكسب الـ100 نقطة التانيين
و هكذا ,


العملية شكلها أهبل و عبيط ,
بس صدقني , خد عقلك الباطن على قد عقله ,
و غير له أسامي الحاجات الوحشة بحاجات حلوة ,
و هتلاقيه ماشي معاك زي السكينة في الحلاوة إن شاء الله ,


و نختم بهذا الكلام القيم لابن القيم -رحمه الله- في زاد المعاد :
" لما كانت الأسماء قوالب للمعاني ودالة عليها اقتضت الحكمة أن يكون بينها وبينها ارتباط وتناسب،
وأن لا يكون المعنى معها بمنزلة الأجنبي المحض الذي لا تعلق له بها؛
فإن حكمة الحكيم تأبى ذلك والواقع يشهد بخلافه،
بل للأسماء تأثير في المسميات،
وللمسميات تأثر على أسمائها في الحسن والقبح والخفة والثقل واللطافة والكثافة كما قيل:
وقلما أبصرت عيناك ذا لقب ** إلا ومعناه إن فكرت في لقبه "


و لا تنسونا من دعوةٍ صالحة أن يُصلح الله لي شأني كله ,
و يطهرني و يشفيني من كل شر ,
و أن يشفي مرضانا و مرضى المسلمين
و يرحم موتانا و موتى المسلمين
و يغفر للمسلمين و المسلمات

............


______________________________

خارج الموضوع :
أعتذر عن انقطاعي عن المدونات الأخرى الفترة الماضية ,
و عن عن مدونتي هي الأخرى
و عاوز أعرف رأيكم في الـtheme الجديد , بصراحة ده اللي لقيته ,
لو حد عنده واحد أحسن يبقى عمل فيا جميل
و لو حد عنده أي تعقيب أو رأي على المدونة كهيكل و شكل أو على مواضيعها , يتفضل يقول ,
بس هرد عليه بعد أسبوع إن شاء الله لأني مسافر الشغل بكرة إن شاء الله ,
ما تنسوش الدعاء بالله عليكم

19 comments:

  1. .











    قال شيخ الإسلام ابن تيمية :
    إذا لم تجد للعمل الصالح حلاوة في قلبك فاتهم عملك,
    فإن الرب تعالى شكور











    .

    ReplyDelete
  2. وكذا أسماء البنات برضة
    تخيل حضرتك واحدة مسمية نفسها
    الشقية
    الدلوعة
    وهلم جرجر
    دى حاجة يعنى من المفاسد اللى بيسببها الاسم السئ
    --
    مواضيع حضراتكمم لا غبار عليها والله بدون مجاملة..انا حاطها مدونتكم فى مفضلتى
    --
    اما الشكل..ففى حاجة خطأ..خلفية المدونة مش واضحة عندى
    فى موقع للقوالب جميل جدا..
    http://btemplates.com

    ReplyDelete
  3. جميل اوى الموضوع ده
    وانا سمعت عنه قبل كده من بتوع التنمية البشرية برضه:)

    بالنسبة لرايى فى شكل المدونة الجديد مش شايفاه مختلف كتير عن الشكل القديم

    ReplyDelete
  4. طبعا انا معجبة جداا جداا بكلامك ومدونتك الرائعة
    لكن احزنى جدااا انه يوجد شخص متخصص فى سرقة كل مدونتك وينسبها لنفسة
    فبلتالى ليك الحق انك تدافع عن حقك فى تعبك ومجهودك
    http://www.nogumfm.com/forum/showthread.php?t=104943

    ReplyDelete
  5. الأخ الفاضل :: TIMMY ::
    أولا

    الحمد لله على السلامة

    وإن شاء الله تكون الأمور طيبة وعلى أحسن ما يرام ..

    وبالنسبة للموضوع .. لقد طرحت موضوعًا مهما وأجدت طرحه ..

    أنا معاك

    الأسماء مهمة وتعطي انعكاس للمسمى ..

    لا عدمنا أسلوبك الظريف الخفيف .. المفيد ..)


    تحياتي

    ReplyDelete
  6. الثـانية
    تروح وتيجى
    بالسلامة ياتيمى
    انت وكــل مسافـر

    ReplyDelete
  7. الأولة
    السلام عليكم
    ورحمة الله تعالى
    وبركــــــــــــاته

    ReplyDelete
  8. الثالثة
    منكم نستفيد
    ونحاول ونجرب حكاية
    الضحك على العقل الباطن
    دا ولو انى عارفة عقلى الباطن
    ما بينضحكش عليه ابداً:واعى وناصح
    زى صحبته:)

    ReplyDelete
  9. رابعاً
    المضمون حلووووو
    مفيش شك أما الشكل
    فأنت عارف :احب الزخارف
    والورود والالوان والرسومات.

    ReplyDelete
  10. عودا أحمدا يا هندسة " واحمدا اهي عشان نبأي في صميم الموضوع :D "

    أنا اكتر حاجه باحبها هي اني اضحك على عقلي الباطن ده واخده على أد عقله زي مانت بتقول كده وخصوصا لما باكتشف سذاجته في الاحلام اللي بيفرجني عليها بالليل وأنا نايم ويبأي مقتنع أوي بالاحداث اللى ملهاش علاقة ببعض
    وكل ما افتكر موقف منهم اقعد اضحك واقول عبيط عبيط :D




    هو بالحق فين الثيم الجديد ؟
    انا مش شايف غير اللون الابيض الناصع
    هو ده ولا ايه ؟؟

    كل سنة وانت طيب يا باشمهندس ودعواتك للطلبة الغلابة اللى بيمتحنوا
    جزاك الله خيرا

    ReplyDelete
  11. جزاكم الله خيرا على الموضوع , بصراحة هو كان ملخبطني في الاول لكن أتضحت الأمور في الاخر و ذلك فكرني بما فعله أعداء الامة لنا حتى نتقبل الحرام فالربا أقنعونا أنه فوائد و الخمر قالوا عنه أنه مشروبات روحية و الدعارة دافعو عنها لأنها فن

    ReplyDelete
  12. تناول رائع
    يا تيمى للموضوع

    تناولت مواضيع حيوية جدا جدا

    من خلال نقطة بسيطة جدا


    بصراحة تناول جميل جدا

    ReplyDelete
  13. معاك حق طبعا لازم يكون فى توافق بين الأسماء والمسميات
    الموضوع هايل كعادتك
    ربنا يوفقك دايماااااا

    ReplyDelete
  14. بارك الله فيك يا هندسة

    أصبت :)


    موضوع جميل فعلاً ، وفي ناس كتير بتعتبر الأسامي موضة مش أكتر !!!

    ربنا يصلح حال المسلمين

    وترج لينا بالسلامة موفق سالم غانم إن شاء الله :)

    بالنسبة للقالب الجديد ، مش عارف هو مش مظبوط عندي ليه ، حاسس إن فيه حاجة غلط ، وإن كنت أؤييد وأبايع البياض الناصع الرائع دا :D

    Keep it simple ;)


    بوركت

    ReplyDelete
  15. الكلمة تعبر عن فكر صاحبها فاذا تم السماح بتغيير الكلمة فقد تم التصريح بتغيير الفكر المقصود بها...."تذكر ذلك جيدا"

    ReplyDelete
  16. تيمي وبصراحة افتقد مدونتك كثيرا ولا أقبل عذرك للغياب
    ربنا يكرمك يا ولدي كلامك صحيح وعملي إلى أقصى الحدود
    لاتنساني بدعوتين الله يكرمك :)

    ReplyDelete
  17. شكرا جزيلا لكم جميعا إخواني الكرام على المرور و التفاعل ,

    و بخصوص الثيم الحمد لله أخانا غير المعرف أهدانا موقع جميل جدا جزاه الله خيرا

    و شكرا جزيلا على متابعتكم المستمرة ,

    و صبركم على كلامي الممل ... أحيانا :D

    في أمان الله

    ReplyDelete
  18. آه و بالنسبة لأختنا اللي جابت المنتدى اللي فيه واحد بياخد المواضيع ,
    أنا زعلت شويتين , بس قلت بركة , أهو واحد بينشر المواضيع من غير جهد مني ,
    ربنا يكتر أمثاله !! -ممن ينشرون مواضيعي و ليس ممن ينسبونها لأنفسهم -

    و جزاكم الله خيرا على الاهتمام

    ReplyDelete
  19. و قبل ما أمشي أحب أضرب سلام كبير جدا قوي خالص للباشمهندس سامح اللثي نورنا علق لنا في المدونة ,
    بالمناسبة .. الرقم بتاعي نزل :)

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ