زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

21 December, 2009

ـ من فضلك اجعلني أشعر أنني مهم !! ـ

السلام عليكم و رحمة الله و بركاته ,

بما إني اشتغلت و الحمد لله و بقى لي رئيس -غالبا بيكون رخم- في العمل ,
يبقى هنتكلم النهاردة إن شاء الله عن عادة ممتازة في التعامل مع الناس ,
تخليهم يحبوا طعمك و ريحتك و يشربوك و هم مبسوطين - زي حليب إنجوي -


نبدأ بعون الله :

في ( الكَفر حَدَانا ) كان مكتب التجنيد لازق فيه مركز الشرطة ,
و طبعا يوم تقديم الورق كانت العملية زحمة طحن على شباك مكتب التجنيد ,
و بينما نحن على هذا الحال , إذ بعسكري من مركز الشرطة ,
و اللي كنا بنشتري منه استمارة الفيش أو طوابع الشرطة ,
العسكري ده كان عامل نفسه واسطة لواحد ,
و عاوز يدخل من الباب و يخلص له الورق ,
لكن عسكري مكتب التجنيد -اللي تبع القوات المسلحة-
ما رضاش يدخل العسكري بتاع الفيش -اللي تبع الداخلية- ,
و قال له : تعالى من الشباك و قف في الدور ,

طبعا العسكري بتاع الداخليه ما عجبهوش الوضع ,
خاصة إنه كان عامل فيها ( بتاع ) قدام الواد اللي جايله كواسطة ,
و راح مزعق في عسكري التجنيد و قال له :
أقف في الشباك إزاي ؟؟
هو أنا فاضي ؟؟
أنا ورايا شغل , و ( ببيع فيش ) !!!

بصراحة أول ما سمعته كنت (هفطس ) من الضحك ,
إيه يعني بيبيع فيش و طوابع ؟؟
هو البتاع ده مفكر نفسه حاجة بجد و لا إيه ؟؟


لكن اتضح لي فيما بعد إن كل إنسان بيحب يحس ( إن ليه لزمه )
حتى و إن كان في الحقيقة مالوش لزمة ,



زي ما في قصة ( سلطان الأباريق ) :

" يُحكى أن رجلاً كانت وظيفته ومسؤوليته هي الاشراف على الأباريق لحمام عمومي،
والتأكد من أنها مليئة بالماء بحيث يأتي الشخص ويأخذ أحد الأباريق ويقضي حاجته ثم يرجع الابريق الى صاحبنا،
الذي يقوم باعادة ملئها للشخص التالي وهكذا.
في إحدى المرات جاء شخص وكان مستعجلا فخطف أحد هذه الأباريق بصورة سريعة وانطلق نحو دورة المياه،
فصرخ به مسؤول الأباريق بقوة وأمره بالعودة اليه فرجع الرجل على مضض،
وأمره مسؤول الأباريق بأن يترك الإبريق الذي في يده ويأخذ آخر بجانبه،
فأخذه الشخص ثم مضى لقضاء حاجته،
وحين عاد لكي يسلم الإبريق سأل مسؤول الأباريق:
لماذا أمرتني بالعودة وأخذ إبريق آخر مع أنه لا فرق بين الأباريق،
فقال مسؤول الأباريق بتعجب : إذن ما عملي هنا ؟! "


و دي طبيعة في البشر ,
زي ما بيقول علماء علم النفس إن كل شخص يولد وعلى جبهته علامة تقول :

(( من فضلك اجعلني أشعر أنني مهم ))


و دي فعلا عادة مهمة جدا مع تعاملك مع أي حد ,
سواء من هم أعلى منك أو دونك,



حتى أنت أيضا بحاجة لهذا الشعور ,

أنا لما كنت عاطل - أعاذنا و الله و إياكم - كنت حاسس إني ماليش لزمة في حاجة ,
لكن لما اشتغلت , حسيت إني مفيد ... شوية
و إن شاء الله أبقى مفيد أكثر مع مرور الوقت ,



الخلاصة إنك المفروض تحاول تُظهر اهتمامك بكل أحد ,

و تُشعره بقيمته كي يحبك ,

بس خلاص ,

و دعواتكم بالخيرعلشان أنا لسه واصل امبارح و راجع تاني الشغل بعد بكرة ,
و مش راجع تاني غير بعد أسبوعين إن شاء الله ,

و جزاكم الله خيرا على القراءة ,
و طبعا >> حقوق النشر للجميع <<
و يا حبذا أن تذكر المصدر :
tazbee6.blogspot.com

..............

16 comments:

  1. .












    روي عن علي رضي الله عنه أنه قال :
    ( كان في الأرض أمانان من عذاب الله
    وقد رُفع أحدهما
    فدونكم الآخر فتمسكوا به )

    قال تعالى :
    (وماكان الله ليعذبهم وأنت فيهم
    وما كان الله معذبهم وهم يستغفرون)











    .

    ReplyDelete
  2. حمدا لله على السلامه,
    فعلا كلام صائب,
    في علم النفس بيعتبروا الامر ده حاجه من الحاجات الضروريه في الحياة واطلقوا عليها الحاجه إلى القبول والتقدير او الحاجه الى الاهتمام,
    وسبحان الله لنا في رسول الله خير قدوه في تعامله مع الاخرين واشعار كل منهم بانه ذو مكانه خاصه عنده,
    بس احنا نقتدي وكل حاجه هتتصلح
    فما خاب قوم رسول الله قدوتهم.

    ReplyDelete
  3. الف مبروك على الوظيفة
    وبالتوفيق دايما

    ReplyDelete
  4. ما شاء الله

    موضوع لذيذ

    ومهم ومفيد

    معكم حق فى كل كلمه فيه

    واعتقد ان التعامل بالشكل ده

    يدخل فى حسن لخلق

    جزاكم الله خيرا

    حلوة جدا قصة الاباريق ديه

    ReplyDelete
  5. ازيك يا بشوشتى

    ايه يعم الكلام الجامد ده

    انت شكلك ظبط الناس هناك وثبتهم اتنمى من كل قلبى ان يوفقك ربى .

    واوعى تنسى الاكله اللى وعدتنا بيها لما تقبض .

    استودعك رب السموات والارض

    ReplyDelete
  6. جزاك الله خيرا

    و ألف مبروك الأول على الوظيفة :)


    بالنسبة للملاحظات بتاعتك دي هي دقيقة قوي ، وإنت إن شاء الله لما تكون في مكان المهندس اللي فوقك هتبقى متغاظ قوي لو أي حد عمل حاجة من غير ما يقولك .

    طيب هقولك على موقف حصل مع رئيسي أنا في الشغل ، هو للأسف فاهم الحتة دي قوي ، بس المشكلة إنه بيطبقها على الناس ومبيطبقهاش على نفسه ، يعني لما يحب يشجعك يقعد يحسسك إنك إنت الوحيد في الكون اللي تنفع للوظيفة دي ، وإنت مبدع وحاول تطون جرئ أكتر وكلا من دا ،، ولما تيجي ساعة الجد وتتصرف من دماغك في بعض الأمور -من غير أي أخطاء طبعا - وترجعله تلاقيه طلع دخان من ودانه ومناخيره - زي توم وجيري كده - وإنت ازاي يا بشمهندس تعمل حاجة زي دي من غير ما ترجعلي ؟؟؟؟ . طبعاً أنا بقى بعمل فيها برئ وبفكره بكلامه بزوق شوية لدرجة إنه معدش بيعاتبني حتى لو غلطت .
    كنت بقوله خلاص أنا آسف يا بشمهندس ، أنا كنت بحاول أكون مبدع وجرئ بس خلاص مش هكون مبدع بعد كده !!

    أنت نفسك لما يكون في أشخاص تحت إيدك في العمل هتحس بالموضوع دا ...

    وحكاية الأباريق دي فكرتني بحكاية أبويا كان بيحكاهلي وأنا صغير عن الناس اللي ملهاش لازمة وعاملة تفسها مهمة دي ، هي نفس القصة بس على شيخ الخفر لما العمدة طرده وقعده في البيت ، قعد في البرندة وحط القلل قدامه ولما يحد يجي يشرب ، اشرب من دي ، لأ متشربش من دي !! ودي بقت لازمته في الحياة :))


    ألف مبروك مرة تانية ، وابقى طمنا عليك يا هندسة :)

    ReplyDelete
  7. جزاكم الله خيرا على الموضوع الجميل ده
    فعلا مسألة الشعور بالاهتمام تمثل قيمة كبيرة عند كل الناس
    والنقطة دي اتكلم عنها ديل كانريجي كتير جدا في كتابه الشهير "كيف تكسب الأصدقاء وتؤثر في الناس"

    ومبروك على الشغل :)

    ReplyDelete
  8. الأخ الفاضل :: TIMMY ::
    أولا مبروك عليك السنة الهجرية الجديدة
    ثانيًا مبروك عليك الوظيفة
    ثالثًا موضوع جدًّا هــــــــــــايل
    تحياتي

    ReplyDelete
  9. مبروك ع الشغل يا باشمهندس وعقبال ما تبأي مدير عام أد الدنيا

    بالنسبة للبوست فعلا كل ما حسست الناس بقيمتهم وأثنيت علي صفاتهم الكويسةوأفعالهم الحسنة ك ما حبوك أكتر وكل ما حبو شغلهم وأخلصوا فيه أكتر

    جزاك الله خيرا

    ReplyDelete
  10. صباح الخير
    اول مره اجي هنا
    المدونه جميله

    الف مبروك علي الوظيفه

    البوست جميل

    في اي علاقه انسانيه الانسان محتاج يحس انه مهم عند الطرف التاني
    وفي الحياه مهم انه يحس ان له فايده
    مش عايش كده وخلاص

    تحياتي

    ReplyDelete
  11. ما هو عشان كده يا بشمهندس الشاعر العربي كتب شعر في ربابة
    عارف ربابة
    ربابة ربة البيتِ
    تصب الخل في الزيتِ
    لها سبع دجاجات وديك حسن الصوتِ
    الله عليكي يا ربابة ، كانت مهمة بشكل

    ReplyDelete
  12. الاحساس بالاهمية
    شعور انسانى بحت
    وحتى غريزي كمـــان
    وخـاصة من هم دونك
    صدقنى حينفعوك جداً فى
    شغلك لو اعطيتهم الأحساس
    دا وكمان (تتقى )شرهم
    مبروك الشغل ياتيمى

    ReplyDelete
  13. اولا .. كل سنه وانت طيب ياباشمهندس

    ثانيا مبروك ع الشغل

    ثالثا وكالعاده مابتسيبش لينا الا الاعجاب بكلامك وبمبادئك ده غير طريقه تفكيرك اللي ماشاء الله بتبهر ناس كتير

    ربنا يكملك بعقلك يا تيمي

    انت مثال لشباب كتير والله وتقدر تعدل حياة ناس اكتر لو سمعوا كلامك هنا ومشيوا بكتير من مبادئك

    ربنا يحفظك

    سلام :)

    ReplyDelete
  14. السلام عليكم ورحمة الله وبركاته
    وبعد..
    فكل عام وأنتم بخير وعافية .. شكر الله لكم متابعتكم لمدونتي ومدونتكم "بلاوطن" ..
    لا أرى أنى غبت عنكم فقد كانت تدويناتي تبلغكم ولاأرى أني غبت عنكم فقد كان سؤالكم ودعاؤكم يبلغنى .. وهكذا أرواح المؤمنين وقلوبهم التي ألف الله بينها فلم يعد لقوة من قوى البشر أن تفرق قلوباً ألف الله بينها ..
    دمتم بخير وعافية
    د/ توكل مسعود

    ReplyDelete
  15. ايون معاك حق
    كل واحدج لازم يحس بانه ليه قيمة وده مش عيب ابدا ولا تكبر
    الموضوع مهم وطرحك هايل
    ربنا يكرمك

    ReplyDelete
  16. ايون معاك حق
    كل واحدج لازم يحس بانه ليه قيمة وده مش عيب ابدا ولا تكبر
    الموضوع مهم وطرحك هايل
    ربنا يكرمك

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ