زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

06 October, 2009

ـ ( جونك ) إيه !! ؟؟ ـ


السلام عليكم ,

امتدادا لمواضيعنا السابقة :


عايش إزاي و بتعمل إيه ؟؟

ـ البشرية هتخسر إيه ؟ لو القطر داس عليك ؟؟ ـ

نقدم لكم هذا الموضوع ,

نعرفكم الأول بـ(تاريخ) و أصل كلمة : جون ,
أصلها: جول = goal = هدف

و كلامنا النهادرة عن الجون أو " الهدف "

أعرف واحد ناجح دراسيا و أكادميا جدا - كان دحيح يعني - ,

و تعامله حلو مع الناس و ليه علاقات ,

و حالته المادية ... مستورة و الحمد لله ,

لكنه كئيب و مكتئب و خانق نفسه
و عنده مشكلة كل ما يقابل حد يقولها له :

" أنا عاوز يكون لي هدف "

نقول له : يا عم ربنا يهديك ,

خلي هدفك إنك تشتغل شغلانة حلوة ,

يقول : طب و بعد ما أشتغل ؟؟
الهدف خُلُص و لازم ندور على غيره ...
يبقى ده ما ينفعش يكون هدف ,

نقول له : خلي هدفك تحوش فلوس و تجيب عربية ,

يقول : طب ما بعد ما أجيب العربية ؟؟
الهدف خلص , يبقى ده ما ينفعش يكون هدف !!

طب يابني خلي هدفك إنك تحوش فلوس علشان تتجوز و تخلف و عيالك ( يوأوأوا ) و يعيطوا حواليك

يتنيل على عينه برضه و يقول : و بعدين ؟؟
الهدف هيخلص , يبقى ده ما ينفعش يكون هدف !!!


لحد ما ربنا كرمنا و عدينا على الدكتور محمد عبد القادر في الصيدلية بتاعتهم - اللي هيعرف مين محمد عبد القادر يتصل بـ 0900 0900 - ,

و سأله نفس السؤال ,
و اقترحنا عليه نفس الاقتراحات ,
و قال نفس الإجابات ,

لكن ( الدَكتور ) محمد كان متعلم و ( متنور ) و راجل متدين - نحسبه و لا نزكيه على الله - و في نفس الوقت واخد كورسات تنمية بشرية , فالراجل ( دماغه متظبطة )

فقال له فعلا الهدف اللي بيخلص ما ينفعش يكون هدف

و علشان كده بتوع التنمية البشرية بيقولوا :

" الهدف لازم يبقى مستمر في الزمن "

و لازم يكون فيه أهداف قصيرة المدى ,
علشان ما تزهقش في رحلتك نحو الهدف الأساسي ,
و أخرى بعيدة المدى , و دي الأساسية اللي احنا رايحين ليها ,

طيب إزاي الهدف الصغير قصير المدى , و الهدف الكبير طويل المدى ,
إزاي كلاهما يكون مستمر في الزمن ؟؟

إنها النِيَّة !!!

النية هي الشيء الوحيد الذي يجعل هدفك مهما قَصُر ممتدا في الزمن ,


لو هدفك قصير المدى :
زي إنك تشتري موبايل مثلا ,
خلي فيه نية صالحة , إنك تستخدم الموبايل في سماع القرآن و قراءة الكتب الإلكترونية و غيرها ,
ساعتها لما تشتري موبايل و هدفك يتحقق مش هيبقى خلص زي ما كنت بتفكر زمان ,
هيبقى الأجر بتاع الهدف مستمر في الزمن برضه ,


و لو كان هدفك طويل المدى زي إنك تتجوز و تنجب ,
خلي فيه نية صالحة مثل أن تعف نفسك و أن تنجب أولادا مسلمين يرفعوا راية الإسلام ,
و بكدة لما هدفك ده يتحقق مش هيبقى خلص زي ما كنت بتفكر زمان ,
لا , هيبقى أجره ممتد معاك

حاجة أخيرة عاوز أقولها ,

أي هدف بعيد المدى ( لازم ) يتقسم لأهداف صغيرة مرحلية ,
علشان يبقى أسهل في التحقيق ,
و أفضل علشان لا تهاب الهدف الكبير ,
و أفضل حتى لا تمل الوقت في تحقيق الهدف الأكبر ,
لكن ستشعر أنك كل فترة تحقق أهدافا و لو قصيرة ,
( فتشعر بالإنجاز ) و أنك على الطريق الصحيح ,

و .... كفى !!

و جزاكم الله خيرا ,

و لا تنسوا الدعاء لصاحبنا اللي بدأنا الكلام عليه ,
هو و الدكتور محمد عبد القادر ,
و محمد فوزي بالمرة اللي عرفهم على بعض
إن ربنا يصلح لنا شأننا كله و لا يكلنا إلى أنفسنا طرفة عين

و لجميع المسلمين و المسلمات


و حقوق النشر للجميع بشرط ذكر المصدر

و جزاكم الله خيرا .




18 comments:

  1. .











    سبحان الله و الحمد لله و لا إله إلا الله و الله أكبر











    .

    ReplyDelete
  2. يارب نكسب يا خويا ونجيب أجوان كتير !!!!

    بس خد بالك من راس الحربة كويس قوي (العمل) , وكمان الحارس بتاعك ( قلبك ) لحسن تبقى أنت بتجيب أجوان من هنا , وهو عمال يدخل فيه أجوان من هنا لغاية ما الشبكة تتخرم .

    ربنا يصلح حالك وحالنا يارب , آمين

    بارك الله فيك

    سبحان الله و الحمد لله و لا إله إلا الله و الله أكبر

    ReplyDelete
  3. احب ان اقول بان كلام دكتور محمد مفيد جدا للغاية وان لليكون لى هدف لازم يكون نيتة مستعدة لان الهدف يوجد الحلو والوحش فلازم نستعد للهدف

    ReplyDelete
  4. هو دكتور محمد عبد القادر ده من طنطا؟؟
    كلام زى الفل :)

    على فكرة ما جاليش طلب إضافة يا ريت تبعت لى رسالة عشان اعرف ايميلك جزاكم الله خيرا

    ReplyDelete
  5. محمد فوزى اللى مذكور فى الموضوعOctober 6, 2009 at 8:38 PM

    انا جيت اشوف اسمى وكنت فخور
    لاقيتك كاتب عليا محمد فوزى بالمرة
    بقى كده يعنى
    يعنى أنا ماليش لازمه
    أنا هكنسلك و هصاحب أخوك .

    ReplyDelete
  6. اشكرك على هذا الموضوع

    ReplyDelete
  7. تمام اوى

    هو ده الكلام المظبوط

    ReplyDelete
  8. غير معرف :

    كلامك في ( الجون ) فعلا :) ,
    العمل و النية أهم شيء ,
    بل ممكن الواحد يحصل على أجر من غير عمل و بالنية فقط , كمن يحتسب نومته ,

    بارك الله فينا و إياك ,

    و شكرا جزيلا لمرورك ,

    ReplyDelete
  9. زهرة الإسلام :

    فعلا كلام الدكتور محمد جميل جدا ,

    ربنا يبارك فيه ,

    و جزاكم الله خيرا لمروركم

    ReplyDelete
  10. جزاكم الله خيرا,
    موضوع رائع ومهم,نفعك الله به ونفعنا به,
    لاتنسونا من صالح دعائكم على الدوام ان شاء الله.

    ReplyDelete
  11. مجرد مدونة :

    جزانا و إياكم ,

    و طلب الإضافة أنا بعته تاني , و متهيأ لي وصل .

    و ردي كان في رسالة أوف لاين :)

    ReplyDelete
  12. محمد فوزي :

    ما هو لازم يكون بالمرة يا محمد , يعني هيبقى بالمرتين ؟؟ :)

    و ياباشا انت ليك لزمة و نص , هو احنا من غيرك نسوى بصلة برضه :)

    ReplyDelete
  13. ايومي :

    جزانا و إياكم ,
    ربنا ينفعنا و يهدينا و يهدي الجميع ,

    ReplyDelete
  14. د. عرفة ,

    شكرا جزيلا يا محمد و ربنا ينفعنا بما نقول .

    ReplyDelete
  15. موناليزا :

    عفوا و شكرا جزيلا للمرور ..

    ReplyDelete
  16. مضبوط كلامك ياتيمى
    وأختلاف الاهداف وتنوعها
    بيعطى للحياة قوة دفع
    حتى تقسيم الاهداف لمراحل
    بيساعد على تحقيق ولو
    جزء جزء منها.

    ReplyDelete
  17. المهم كيف حالك
    ياتيمى أرجو ان
    تكون بخير باذن الله
    وبطل تحتل التعليق
    الاولانى :علمتنى ياأخى
    اعمل زيك:):)عدتنى :)

    ReplyDelete
  18. norahaty

    فعلا يا دكتورة لما الواحد يكون ليه أكثر من هدف في بيبقى أفضل ليه , حتى على الأقل يغير بدل الزهق :) ,

    بالنسبة لحالي أنا الحمد لله بخير ,
    و بالنسبة لأول تعليق , أنا لقيت ليه فائدة كبيرة لأن تقريبا كل الناس بتقرأه , فقلت أستغل نفوذي بقى :)

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ