زي ما فيه حاجات صح و حاجات غلط

فيه حاجات غلط ممكن تبقى صح

بس عاوزة شوية

تــظــبـــيــط

ــــــــــــــــــــــــــــ

قبل أن تقرأ المدونة

-- حقٌ على أصحاب الكؤوس أن يتناصحوا --

لا يُعــذَر المسلم في تخليه عن الدعوة إلى الله والأمر بالمعروف والنهي عن المنكر حتـى وان كان مُقصراً في نفسه في بعض الأمور ,

بـل إن الإنسان عليه أن ينهى عن المنكر حتى وان كان هــو واقـع فيــه

فوقوعه في المنكر ذنب وعدم إنكاره على الآخرين ذنب آخر يُسأل عنه,
ولا شك ان على من ينصح أن يسعى جاهداً لتغيير ما بنفسه ليكون قدوةً ومثالاً يُحتذى به.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

10 March, 2009

ـ يعني تكبر الـ(D) أو تحرق الـ(دم) ؟؟ مافيش وسط ؟؟ ـ




شايف اللي بيحصل حوالينا ؟؟

المسلمين بيتبهدلوا في كل مكان في الأرض ,

طيب الحل إيه ؟؟

لازم نغضب و نغضب ... نغضب خالص ,
و نحرق دمنا , و نثور ...
- و لأن مافيش في إيدنا نعمل حاجة - ,
ثم نخور و نكتئب و نبكي على الأطلال

أو فيه حل تاني : كبر الـ D و ... - مش فاكر التانية - ,
و ولا تحط في دماغك يا عم , و لا أكنهم مسلمين زينا و لا نعرفهم ,

تختار إيه ؟؟

بص يا CD, طبعا نرفزتك و غضبك مش هيفيدوك بحاجة , بل بالعكس , هيضروك - صحتك بالدنيا
-
و طبعا ما ينفعش ( تعيش في الطراوة ) و ( تنفض للمجتمع ) , يبقى تعمل ايه ؟
بص يا زعيم ..

ستيفن كوفي في كتابه "العادات السبع للأشخاص الأكثر فاعليه" رسم لسيادتك دائرة سوداء كبيييييرة ,
و رسم في وسطها دائرة بيضاء صغنونه ,

سعادتك بقى الدايرة السودة دي هي المشكلات و الواقع و القرف اللي احنا بنشوفه كل يوم
أما البيضه بقى , فتبقى انت ,احم احم , قصدي قدراتك و الحاجات اللي انت تقدر تعملها ,
و طبعا قدراتك بالنسبة للواقع الأسود صغيرة جدا زي الدايرة البيضه دي , طب إيه الحل ؟؟



عَمُو ستيفن
قال لك لو قعدت تبص على الدايرة السوده هتكبر أكتر و أكتر
لأن الحاجات الوحشة بتكبر مع الزمن ... و المصايب بتزيد لوحدها ,
هتقعد سيادتك تتكلم عليها و تشجب فيها و هي عمالة تكبر و انت ما بتعملش حاجة علشان تحلها ..
و لا حتى قعدت تحاول تكبر الخير الصغير بنفس النسبة اللي الشر بيزيد بيها ..
يبقى تعمل إيه ؟

لو مش عارف تصغر السودة , يبقى تكبر البيضه !!

يعني تحاول تبص على البيضه -الدائرة يعني - ,
و تتجاهل السودة لأنك ما تقدرش تعمل فيها حاجة ,

خليك مع البيضه و حاول تكبرها أكتر و أكتر لحد ما تقضي الى السودة - في المشمش طبعا , انت بس هتكبر البيضاء , إنما الشر و الفساد لازم يبقوا موجودين , احنا مش في الجنة يا زعيم - ,

.
.
.
.
.
.
.
.


بصيغة أخرى يعني : بدل ما هتسأل نفسل "ليه" هتسأل نفسك "ازاي" ؟؟
يعني .....

بدل ما تقول هم الناس وحشين ليه و الاسلام ضعيف ليه ,
و كل الناس علينا ليه , و الفساد ماله جامد قوي ليه ؟؟

هتسأل بـ"إزاي" ....

هتقول , إزاي أغير الناس السيئين ,
إزاي أخلي الاسلام قوي ؟
إزاي أحاول أحارب الفساد
أو أو حتى أتجنبه ؟

شوف , في الحالتين المشاكل موجودة ,
بس الحالة الأولى انت سألت نفسك و كلمتها بطريقة سلبية محبطه ,

أما الحالة التانية فانت سألت نفسك بطريقة مشجعة تدفعك للعمل ,

يعني بدل ما تقعد "تبكي على الاطلال " جنب التلفزيون و انت بتسمع الأخبار ,

هتسأل نفسك , أنا لوحدي كده أقدر أعمل ايه ؟
أنا ممكن أتفوق , ممكن أتبرع بفلوس , ممكن أوعّي الناس ,
ممكن أخاطب "الآخر" و أشرح له الحقيقة ,
ممكن أعمل حاجات كتيرة هي بسيطة آي نعم ,
لكني عملت و ما قعدتش و حطيت ايدي على خدي و خلاص ,

حاجة أخيرة عاوز أقولها
كنت قرأت ( من the man ) كتاب عن مهارات التعامل مع الضغوط
بيوصف عده طرق لتعامل الناس مع الضغوط و ردود أفعالهم , منها حاجة اسمها :

" التسامي " :

"إن هذه الآلية الدفاعية تخفف من شدة الصراعات والتوتر الداخلي لدى الإنسان من خلال تحويل تلك الأفكار والصراعات إلى مجالات مفيدة وسليمة ومقبولة اجتماعياً،
كما أنها تمكن الفرد من الإبقاء على هذه الصراعات مكبوتة وبعيدة عن الوعي ."

يعني تخلي الظروف اللي حواليك دافع ليك للنجاح و التفوق ,
سواء في المذاكرة -علشان أنفع بلدي- أو الابتكار -علشان يبقى عندنا منتجات و صناعات و ما نحتاجش لحد- ,


أو أدبيا : أكتب شعر أعبر فيه عن ما في نفسي, أو أي مقالات ,
أو اجتماعيا : تتكلم مع الناس اللي تعرفهم و تحاول تطورهم و تنفع مجتمعك علشان تزيل الانهزامية اللي في النفوس دي ,

و في مجالات كتيرة , انت و حسب شغلك و تفكيرك ممكن تلاقي أكتر من طريق و وسيلة لتحويل الضغوط و المشاكل اللي حواليك لأفعال مفيدة لك و "لأسرتك " و للمجتمع كله ...
,

و أرجوكم ما حدش يكسل ,
لو حد استفاد أي حاجة يدعي لكاتب الموضوع الأصلي
"اللهم تب عليه و وفقه لما تحب و ترضى و أدخله الجنة و أجره من النار"
و جزاكم الله خيرا ...و آسف على الإطالة .

و طبعا >> حقوق النشر للجميع <<
لو رأيت إنه يستحق النشر
و ياريت تذكر رابط المدونة :

أو على الأقل تذكر إنه
منقول من مدونة تظبيط

......................

تحيتي


.....


40 comments:

  1. كلام جميل أوى
    فعلا
    لازم المشاكل اللى حوالينا تكون دافع للتقدم والتطور مش للإنهزام والإنكسار
    تقبل تحياتى

    ReplyDelete
  2. بجد بجد الله عليك,
    كلام جميل جدا جدا,
    تسلم دماغك وصوابع ايدك وكيبوردك,
    مش هقول اكتر من ان ربنا ينفع بيك ويوفقك دايما ويستخدمك في كل خير.

    ReplyDelete
  3. تسلم يا تيمى
    عارف لولا إنى نازل ومستعجل
    كنت قعدت أرغى معاك على الموضوع ده شوية

    بس إنت برضه قلت كل اللى فى نفسى

    ReplyDelete
  4. السلام عليكم ورحمة
    الله تعالى وبركاته
    انت حاطط نفسك اول تعليق ليه؟
    ايه شغل الوااااااااااااااسطة ده:(
    هو علشان انت اللى كاتب او ناقل الموضوع تقوم حاطط نفسك اول واحد :(
    لا ماينفعش كده انا بقولك اهوه
    يعنى كده انت نرفزتنى :(اعمل ايه :(

    ReplyDelete
  5. طيب انا اتنرفزت
    وعبرت عن نرفزتى
    اتكلم بقى:
    ولا أقولك
    خليه فى تعليق
    جدييييدددد:)

    ReplyDelete
  6. اقولك مثلا ياتيمى
    كلنا بنتشكى من عدم
    نظافة الشارع والبلد
    جربنا نحاول ننضفها؟
    مش حاقول مقشة واكنس:)
    لا بس على الاقل مش حازود
    ال(قمامة )اللى فيها
    ومش بتكلم على
    الاكياس الكبيرةلألألأ
    لا هل عودت نفسك
    ما ترمى(عقب)سيجارة
    فى الشارع؟
    هل عودت نفسك على
    اطفاء اى عقب سيجارة
    مشتعل تلاقيه فى سكتك ؟
    هل جربت تتاكد من (قفل
    الحنفية )فى المسجد بعد الوضوء
    اشياء بسيطة لن توثر عليك
    ولا على المجتمع صدقنى !!!لكن ممكن
    شىء بشىءوشوية بشوية الحال بيتغير!
    احنا علينا المحاولة والله عليه السداد
    والتوفيق بيده هو سبحانه وتعالى.

    ReplyDelete
  7. هو انا فهمتو صخ؟
    ولا موووش صخ؟

    ReplyDelete
  8. .
    .
    .
    .
    .
    .
    .
    .
    .
    .
    الله؟اشمعنى انت؟

    ReplyDelete
  9. ايييييييييييييييييون
    يعني نبص علي نص الكوباية المليانة
    اهو انا بعمل كده
    الحمد الله بحاول منكدش علي نفسي

    موضوع رائع بجد
    تسلم الايادي

    كما عهدناك

    وبعدين ايه نظام التعليق الاول اللى بتحجزه لنفسك ده
    لازم يعني تسيب بصمتك في كل مكان
    هه
    ايه اللى في نفسك من ورا التعليق ده

    رد يا راجل

    ReplyDelete
  10. تمام كلام سليم كلام مظبوط
    طول حياتى التدوينينة بنادى بده
    يلا إن شاء الله يتحقق
    دمت فى سعادة

    ReplyDelete
  11. ربنا يكرمك ويتوب عليك ويؤجرك من جهنم
    بجد بجد ربنا يحميك
    نظرة موضوعية يحتاجها الجميع

    ReplyDelete
  12. جزاك الله خيراً يا استاذنا هوا ده الكلام ولا بلاش نخلي اتساع الدائرة السوداء وقود وحافز لينا عشان نوسع فيها دايرة تأثيرنا (الدائرة البيضا) وطبعاً عشان نعمل كده مش نخلي كل تركيزنا على الدايرة السودا ولا كل تركيزنا على الدائرة البيضا!! يعني ايه الكلام الفارغ اللي انا بقوله ده ... حقولك يعني نخلي الدائرة السودا واتساعها في مجال ابصارنا ونخلى الدائرة البيضا في بؤرة ابصارنا بحيث ان احنا منفقدشي اتصالنا بالعالم من حوالينا وحتى المصايب اللي بتحصل فيه لأن ده هوا اللي بيوجهنا وبيوجه اولوياتنا في توسيع الدائرة البيضا ... حنلاقي فيه حاجات كتير اوي مطلوبة مننا بس حنعرف نرتب الاولويات حسب حاجتين 1- اللي بيحصل في الدائرة السودا 2- قدراتنا على التغيير والاستفادة من المجالات اللي احنا شطار فيها .... انا طولت عليك وعارف انك قولت كل الكلام ده في مقالتك الجميلة بس اعتبر اني كنت بسمعها بس باسلوب مختلف شوية ... سلامو عليكم ورحمة الله
    أخوك ... أحمد كمال

    ReplyDelete
  13. السلام عليكم
    بجاد موضوع جامد و معبر
    بس لازم الواحد يتنرفزلوا نرفوزتين عشان يفتكير و يدعموا اكثر
    و كمان يعرف ان في في الدنيا حاجات اهم بكثير
    جزاك الله كل خير
    و شكرا علي السؤال المدونة مغلقة لأن الكلام لم يعد ليه لازمه
    احيانا الصمت بيكون اكثر تعبيرا (:(:
    شكرا مرة تانيه

    ReplyDelete
  14. د.عرفة :
    شكرا جزيلا لمرورك ,
    فعلا لازم نتخذ من المشاكل اللي حوالينا وقود يدفعن اللأمام ... المفروض يعني !!

    ReplyDelete
  15. سلمى محمد :
    شكرا جزيلا على المرور ,
    و الحمد لله إن الكلام كان جيد ,

    بس بلاش " تسلم دماغك " دي ... لأنها مش سليمة بالمرة !!!

    ربنا يهدينا و إياكم و يرفقنا لما يحب و يرضى ,

    ReplyDelete
  16. ياسر :

    ماشييا عم المستعجل ,
    ربنا ينولك اللي في بالك و تنجح من غير ما تشيل :)

    ReplyDelete
  17. د . نور :
    و عليكم السلام و رحمة الله و بركاته ,

    معلش بقى يا دكتورة , اقي قولي لنا المرة الجاية نحجز أول تعليق ليكي ,
    بس ابقي سيبي 2 جنيه مع التمرجي :)

    و بالنسبة لكلامك عن النظافة و الشوارع و كده , فمعاكي حق ,
    لو الواحد مش قادي يخلي الناس ما ترميش و يقلل الدائرة السوداء بتاعهم , يبقى على الأقل هو ما يرميش و يوسع الدائرة البيضاء بتاعته ,
    و لو كل واحد عمل كده ففعلا الحال كله هيتغير في النهاية ,
    لأن المجتمع عبارة عن أفراد , لو كل فرد اتغير , يبقى المجتمع كله اتغير ,

    .
    .
    .
    .
    .
    .
    .
    .

    و شكرا على تعليقك يا دكتورة ,
    دائما منورانا :)

    ReplyDelete
  18. مها زين :

    أيوااااااااا , هو نص الكباية ده الل يبنتكلم عنه ,
    بنبص للجزء المليان و نحاول نملاه على قد ما نقدر , بالإمكانيات المتاحة لدينا ,

    و الحمد لله إنك بتعملي كده :)

    هههههه
    و بالنسبة للتعليق الأول .. أنا هعترف بكل حاجة , أصل في ناس بتبقى صورها الرمزية مش قد كده , فلو حد من عائلتي الكريمة عدى عليا و أنا برد على التعليقات و شاف الصورة اللي مش قد كده دي , هيبقى شكلي أن االلي مش قد كده ,
    و العملية مش مستاهلة يعني :)

    ReplyDelete
  19. محمد غاليا :

    الله يكرمك يا محمد ,
    فعلا انت مدونتك مليانة حاجات زي كده ,
    و إن شاء الله تتحقق ,
    شكرا جزيلا لمرورك ,

    دمت في حفظ الرحمن ,

    ReplyDelete
  20. موناليزا :

    آآآآآآآآآمين أأأأأأأمين , ربنا يستجيب لدعائك ,
    جزاكم الله خيرا على الدعاء , و على المرور و التعليق ,
    ربنا يجزيكِ خير ,
    و ربنا يرزقنا العمل بما نقول ,

    ReplyDelete
  21. Thinking_man

    جزانا و إياكم , و انت اللي استاذنا بجد ,
    جزاك الله خيرا على المرور و تشريفك ليا بجد ,

    و فعلا إضافة حضرتك بالنسبة لجعل السوداء في مجال الابصار و البيضاء في بؤرته من الحاجات اللي الواحد كان تايه عنها أو مش عارفها بالتحديد ,
    فعلا هي مهمة جدا علشان الواحد لا يفقد الاحساس بالعالم و ما يحدث فيه , علشان ترتيب الأولويات ,

    حضرتك ما طولتش و لا حاجة , بالعكس أنا بستمتع جدا بقراءة ما تكتب لأنه منظم و بيدخل العقل بسلاسة :)
    جزاك الله خيرا بجد
    و عليكم السلام و رحمة الله و بركاته ,

    ReplyDelete
  22. SomeOne

    و عليكم السلام و رحمة الله و بركاته ,

    انا معاكي إن الواحد ممكن يتنرفز شوية .. لأن عنده دم يعني :) , بس يفتكر قبل ما دمه يتحرق , و يحاول يستغل حالة الاشتعال دي في حاجة إيجابية ,

    جزانا و إياكم
    و شكرا جزيلا على المرورك الكريم ,
    و الحمد لله إنك بخير ,
    و أحيانا فعلا الصمت بيكون أبلغ من الكلام ,
    لكن أحيانا أخرى بيكون الكلام وسيلة لابد منها للتنفيس و إلا هننفجر !!

    ربنا يهدينا و إياكم و يهيأ لنا الخير و يوفقنا لما يحب و يرضى ,

    ReplyDelete
  23. انا مع حضرتك

    بجد جزاك الله خيرا

    كل سنة وحضرتك طيب

    ReplyDelete
  24. Timmy
    السلام عليكم...

    أولا: إيه حكاية أول تعليق فاضي؟

    ثانيا: حلوة cD و The man

    ثالثا: بدل ما الواحد يفرقع لازم يكون إيجابي ويحاول يفرغ الغضب الداخلي بإنه مثلا يشجب ويصوت ويلطم -سياسة المنطقة العربية- علشان بس صحته زي ما قلت حضرتك وبعدين يبتدي يفكر -دا لو فضل فيه نفس- كيف يغير


    كلام بالعقل: كان صلاح الدين الأيوبي لا يرى مبتسماإلا نادرا وكان يقول : كيف أضحك والأقصى أسير...
    لكنه كان حزن يقود إلى عمل وهو فعلا عمل حاجة وحرر الأقصى في موقعة حطين...

    الدور علينا

    ReplyDelete
  25. بص موضوعك جامد جدا جدا جدا ومتفائل جدا وانت لذيذ جدا
    تحياتي

    ReplyDelete
  26. لييييييييييييييييييييه كده يابشمهندس؟؟؟
    اظن حضرتك فاهم انا قصدي على ايه,
    ارجوك بلاش كده,هستنى الوضع يرجع لاصله قريب باذن الله,
    في رعاية الله.

    ReplyDelete
  27. لازم نحاول احنا نغير علي قدنا ساعتها هنلاقي غيرنا بيحاول زينا

    ReplyDelete
  28. والله كلامك رائع

    المدونة دى بتفرق معايا اوى لما بدخلها

    ربنا يكرمك ويجازيك عنا خيرا :)

    ReplyDelete
  29. ههههههههههههه

    بوست جميل أوي والله يا تيمي

    أنا بردو من أنصار نص الكوباية المليان

    مع العلم نبص له مش نسرح فيه

    ونكون عارفين بردو إن فيه نص فاضي

    ونفكر إزاي نملاه

    مش نفضل نتكلم عليه أد ما ندور على طرق وننفذها

    ـــــــــ

    بالنسبة لموضوع أول تعليق ده واعترافك

    فمعتش عندي غير تعليق واحد

    ههههههههههههههههههههههههههههههههههههه

    بس كده

    كل سنة وأنت طيب يا حبيبي

    ReplyDelete
  30. جزاك الله خيرا موضوع جميل جدا
    اسال الله ان يجعله فى ميزان حسناتك
    ولا يجب ان نكون سلبيين امام واقع امتنا بل نجتهد ان نسمو بها الى اعلى مكان
    يالا يا مسلمين نعلى للاسلام رايه نعز بيها الدين ونمنح الدنيا هدايه

    ReplyDelete
  31. الجمهور يتساءل ويطالب,
    أرجو سرعة الاجابة ياباشمهندس.

    ReplyDelete
  32. أختكم في الله :

    جزانا و إياكم ,

    و كل سنة و حضرتك طيبة

    ReplyDelete
  33. ست البنات :

    و عليكم السلام و رحمة الله و بركاته يا دكتورة ,

    فعلا الواحد لازم يستثمر غضبه ,
    و مثال صلاح الدين الذي ذكرتيه من أبلغ الأمثلة على ذلك ,
    فلم يقده حزنه للاكتئاب و اليأس , بل للعمل و الجد ,

    جزاكِ الله خيرا يا دكتورة

    ReplyDelete
  34. فتاة ضائعة

    جزاكِ الله خيرا ,
    و سعيد جدا إن الموضوع عجب حضرتك ,
    شكرا جزيلا لمرورك

    ReplyDelete
  35. سلمى محمد :

    معلش , الواحد كان مخنوق - كالعادة - و عموما أنا نقلتها في مكان تاني و ما مسحتهاش ,

    و شكرا جزيلا على السؤال ,
    و بانتظار عودة حضرتك أيضا ,
    جزاكم الله خيرا

    ReplyDelete
  36. حسن حنفي :
    فعلا يا حسن ,
    لو اتغير كل واحد ,
    هنلاقي اللي حوالينا بيتغيروا زينا
    و واحد على واحد .. يعملوا المجتمع كله :)

    ReplyDelete
  37. yafa
    جزانا و إياكم أختي الكريمة ,
    و كون دخول المدونة بيفرق معاكي ده شيء يسعدني ,
    جزاكم الله خيرا
    و ربنا ينفعنا و ينفع بينا

    ReplyDelete
  38. سمو الأمير :

    فعلا يا أحمد , الواحد المفروض ما يسرحش في النص المليان ,
    و يحاول يملأ الفاضي كمان و لا يكتفي بالمليان بس ,

    و ربنا يهدينا و ننفذ اللي بنقول عليه ,
    جزاك الله خيرا لمرورك :)

    ReplyDelete
  39. طالبة الفردوس :

    جزانا و إياكم ,
    و ربنا يوفقنا و نعمل بما نقول و نكون إيجابيين ,

    ربنا يهدينا و يهدي الجميع ,
    جزاكم الله خيرا

    ReplyDelete

دلوقتي تقدر تعلق بأكثر من طريقة :
كـ(غير معرف) بدون ما يكون لك حساب خالص
أو بحسابك على الفيس بوك
أو بحسابك على بلوجر
بس عبرني و علق :) ـ

حقوق النشر للجميع


ـ
و لا تنسوا
كاتب الموضوع من دعوة صالحة بظهر الغيب

أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

>> حقوق النشر للجميع <<
لو رأيت أنه يستحق النشر
بشرط عدم التحريف أو التغيير
و يا حبذا لو تذكر رابط المدونة

tazbee6.blogspot.com


أو تذكر أن الموضوع

" منقول من مدونة تظبيط "

ـ